3. சக்கவத்திஸுத்தவண்ணனா

அத்ததீ³பஸரணதாவண்ணனா

80. ஏவம் மே ஸுதந்தி சக்கவத்திஸுத்தம். தத்ராயமனுத்தானபத³வண்ணனா – மாதுலாயந்தி ஏவம்னாமகே நக³ரே. தம் நக³ரம் கோ³சரகா³மம் கத்வா அவிதூ³ரே வனஸண்டே³ விஹரதி. ‘‘தத்ர கோ² ப⁴க³வா பி⁴க்கூ² ஆமந்தேஸீ’’தி ஏத்த² அயமனுபுப்³பி³கதா² –

ப⁴க³வா கிர இமஸ்ஸ ஸுத்தஸ்ஸ ஸமுட்டா²னஸமயே பச்சூஸகாலே மஹாகருணாஸமாபத்திதோ வுட்டா²ய லோகம் வோலோகேந்தோ இமாய அனாக³தவம்ஸதீ³பிகாய ஸுத்தந்தகதா²ய மாதுலனக³ரவாஸீனம் சதுராஸீதியா பாணஸஹஸ்ஸானம் த⁴ம்மாபி⁴ஸமயம் தி³ஸ்வா பாதோவ வீஸதிபி⁴க்கு²ஸஹஸ்ஸபரிவாரோ மாதுலனக³ரம் ஸம்பத்தோ. மாதுலனக³ரவாஸினோ க²த்தியா ‘‘ப⁴க³வா ஆக³தோ’’தி ஸுத்வா பச்சுக்³க³ம்ம த³ஸப³லம் நிமந்தேத்வா மஹாஸக்காரேன நக³ரம் பவேஸேத்வா நிஸஜ்ஜட்டா²னம் ஸம்விதா⁴ய ப⁴க³வந்தம் மஹாரஹே பல்லங்கே நிஸீதா³பேத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னம் அத³ம்ஸு. ப⁴க³வா ப⁴த்தகிச்சம் நிட்டா²பேத்வா சிந்தேஸி – ‘‘ஸசாஹம் இமஸ்மிம் டா²னே இமேஸம் மனுஸ்ஸானம் த⁴ம்மம் தே³ஸேஸ்ஸாமி, அயம் பதே³ஸோ ஸம்பா³தோ⁴, மனுஸ்ஸானம் டா²தும் வா நிஸீதி³தும் வா ஓகாஸோ ந ப⁴விஸ்ஸதி, மஹதா கோ² பன ஸமாக³மேன ப⁴விதப்³ப³’’ந்தி.

அத² ராஜகுலானம் ப⁴த்தானுமோத³னம் அகத்வாவ பத்தம் க³ஹேத்வா நக³ரதோ நிக்க²மி. மனுஸ்ஸா சிந்தயிம்ஸு – ‘‘ஸத்தா² அம்ஹாகம் அனுமோத³னம்பி அகத்வா க³ச்ச²தி, அத்³தா⁴ ப⁴த்தக்³க³ம் அமனாபம் அஹோஸி, பு³த்³தா⁴னம் நாம ந ஸக்கா சித்தம் க³ஹேதும், பு³த்³தே⁴ஹி ஸத்³தி⁴ம் விஸ்ஸாஸகரணம் நாம ஸமுஸ்ஸிதப²ணம் ஆஸீவிஸம் கீ³வாய க³ஹணஸதி³ஸம் ஹோதி; ஏத² போ⁴, ததா²க³தம் க²மாபேஸ்ஸாமா’’தி. ஸகலனக³ரவாஸினோ ப⁴க³வதா ஸஹேவ நிக்க²ந்தா. ப⁴க³வா க³ச்ச²ந்தோவ மக³த⁴க்கே²த்தே டி²தம் ஸாகா²விடபஸம்பன்னம் ஸந்த³ச்சா²யம் கரீஸமத்தபூ⁴மிபத்த²டம் ஏகம் மாதுலருக்க²ம் தி³ஸ்வா இமஸ்மிம் ருக்க²மூலே நிஸீதி³த்வா த⁴ம்மே தே³ஸியமானே ‘‘மஹாஜனஸ்ஸ டா²னனிஸஜ்ஜனோகாஸோ ப⁴விஸ்ஸதீ’’தி. நிவத்தித்வா மக்³கா³ ஓக்கம்ம ருக்க²மூலம் உபஸங்கமித்வா த⁴ம்மப⁴ண்டா³கா³ரிகம் ஆனந்த³த்தே²ரம் ஓலோகேஸி. தே²ரோ ஓலோகிதஸஞ்ஞாய ஏவ ‘‘ஸத்தா² நிஸீதி³துகாமோ’’தி ஞத்வா ஸுக³தமஹாசீவரம் பஞ்ஞபேத்வா அதா³ஸி. நிஸீதி³ ப⁴க³வா பஞ்ஞத்தே ஆஸனே. அத²ஸ்ஸ புரதோ மனுஸ்ஸா நிஸீதி³ம்ஸு. உபோ⁴ஸு பஸ்ஸேஸு பச்ச²தோ ச பி⁴க்கு²ஸங்கோ⁴, ஆகாஸே தே³வதா அட்ட²ம்ஸு, ஏவம் மஹாபரிஸமஜ்ஜ²க³தோ தத்ர கோ² ப⁴க³வா பி⁴க்கூ² ஆமந்தேஸி.

தே பி⁴க்கூ²தி தத்ர உபவிட்டா² த⁴ம்மப்படிக்³கா³ஹகா பி⁴க்கூ². அத்ததீ³பாதி அத்தானம் தீ³பம் தாணம் லேணம் க³திம் பராயணம் பதிட்ட²ம் கத்வா விஹரதா²தி அத்தோ². அத்தஸரணாதி இத³ம் தஸ்ஸேவ வேவசனம். அனஞ்ஞஸரணாதி இத³ம் அஞ்ஞஸரணபடிக்கே²பவசனம். ந ஹி அஞ்ஞோ அஞ்ஞஸ்ஸ ஸரணம் ஹோதி, அஞ்ஞஸ்ஸ வாயாமேன அஞ்ஞஸ்ஸ அஸுஜ்ஜ²னதோ. வுத்தம்பி சேதம் ‘‘அத்தா ஹி அத்தனோ நாதோ², கோ ஹி நாதோ² பரோ ஸியா’’தி (த⁴. ப. 160). தேனாஹ ‘‘அனஞ்ஞஸரணா’’தி. கோ பனேத்த² அத்தா நாம, லோகியலோகுத்தரோ த⁴ம்மோ. தேனாஹ – ‘‘த⁴ம்மதீ³பா த⁴ம்மஸரணா அனஞ்ஞஸரணா’’தி. ‘‘காயே காயானுபஸ்ஸீ’’திஆதீ³னி மஹாஸதிபட்டா²னே வித்தா²ரிதானி.

கோ³சரேதி சரிதும் யுத்தட்டா²னே. ஸகேதி அத்தனோ ஸந்தகே. பேத்திகே விஸயேதி பிதிதோ ஆக³தவிஸயே. சரதந்தி சரந்தானம். ‘‘சரந்த’’ந்திபி பாடோ², அயமேவத்தோ². ந லச்ச²தீதி ந லபி⁴ஸ்ஸதி ந பஸ்ஸிஸ்ஸதி. மாரோதி தே³வபுத்தமாரோபி, மச்சுமாரோபி, கிலேஸமாரோபி. ஓதாரந்தி ரந்த⁴ம் சி²த்³த³ம் விவரம். அயம் பனத்தோ² லேட்³டு³ட்டா²னதோ நிக்க²ம்ம தோரணே நிஸீதி³த்வா பா³லாதபம் தபந்தம் லாபம் ஸகுணம் க³ஹேத்வா. பக்க²ந்த³ஸேனஸகுணவத்து²னா தீ³பேதப்³போ³. வுத்தஞ்ஹேதம் –

‘‘பூ⁴தபுப்³ப³ம், பி⁴க்க²வே, ஸகுணக்³கி⁴ லாபம் ஸகுணம் ஸஹஸா அஜ்ஜ²ப்பத்தா அக்³க³ஹேஸி. அத² கோ², பி⁴க்க²வே, லாபோ ஸகுணோ ஸகுணக்³கி⁴யா ஹரியமானோ ஏவம் பரிதே³வஸி ‘மயமேவம்ஹ அலக்கி²கா, மயம் அப்பபுஞ்ஞா, யே மயம் அகோ³சரே சரிம்ஹ பரவிஸயே, ஸசேஜ்ஜ மயம் கோ³சரே சரேய்யாம ஸகே பேத்திகே விஸயே, ந ம்யாயம் ஸகுணக்³கி⁴ அலம் அப⁴விஸ்ஸ யதி³த³ம் யுத்³தா⁴யா’தி. கோ பன தே லாப கோ³சரோ ஸகோ பேத்திகோ விஸயோதி? யதி³த³ம் நங்க³லகட்ட²கரணம் லேட்³டு³ட்டா²னந்தி. அத² கோ², பி⁴க்க²வே, ஸகுணக்³கி⁴ ஸகே ப³லே அபத்த²த்³தா⁴ ஸகே ப³லே அஸம்வத³மானா லாபம் ஸகுணம் பமுஞ்சி க³ச்ச² கோ² த்வம் லாப, தத்ரபி க³ந்த்வா ந மோக்க²ஸீதி.

அத² கோ², பி⁴க்க²வே, லாபோ ஸகுணோ நங்க³லகட்ட²கரணம் லேட்³டு³ட்டா²னம் க³ந்த்வா மஹந்தம் லேட்³டு³ம் அபி⁴ருஹித்வா ஸகுணக்³கி⁴ம் வத³மானோ அட்டா²ஸி ‘‘ஏஹி கோ² தா³னி மே ஸகுணக்³கி⁴, ஏஹி கோ² தா³னி மே ஸகுணக்³கீ⁴’’தி. அத² கோ² ஸா, பி⁴க்க²வே, ஸகுணக்³கி⁴ ஸகே ப³லே அபத்த²த்³தா⁴ ஸகே ப³லே அஸம்வத³மானா உபோ⁴ பக்கே² ஸன்னய்ஹ லாபம் ஸகுணம் ஸஹஸா அஜ்ஜ²ப்பத்தா. யதா³ கோ², பி⁴க்க²வே, அஞ்ஞாஸி லாபோ ஸகுணோ ப³ஹுஆக³தா கோ² ம்யாயம் ஸகுணக்³கீ⁴தி, அத² கோ² தஸ்ஸேவ லேட்³டு³ஸ்ஸ அந்தரம் பச்சுபாதி³. அத² கோ², பி⁴க்க²வே, ஸகுணக்³கி⁴ தத்தே²வ உரம் பச்சதாளேஸி. ஏவஞ்ஹி தம், பி⁴க்க²வே, ஹோதி யோ அகோ³சரே சரதி பரவிஸயே.

தஸ்மாதிஹ, பி⁴க்க²வே, மா அகோ³சரே சரித்த² பரவிஸயே, அகோ³சரே, பி⁴க்க²வே, சரதம் பரவிஸயே லச்ச²தி மாரோ ஓதாரம், லச்ச²தி மாரோ ஆரம்மணம். கோ ச, பி⁴க்க²வே, பி⁴க்கு²னோ அகோ³சரோ பரவிஸயோ, யதி³த³ம் பஞ்ச காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா, ஸோதவிஞ்ஞேய்யா ஸத்³தா³ இட்டா² கந்தா மனாபா பியரூபா காமூபஸம்ஹிதா ரஜனீயா, கா⁴னவிஞ்ஞேய்யா க³ந்தா⁴ இட்டா² கந்தா மனாபா பியரூபா காமூபஸம்ஹிதா ரஜனீயா, ஜிவ்ஹாவிஞ்ஞேய்யா ரஸா இட்டா² கந்தா மனாபா பியரூபா காமூபஸம்ஹிதா ரஜனீயா, காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா. அயம், பி⁴க்க²வே, பி⁴க்கு²னோ அகோ³சரோ பரவிஸயோ.

கோ³சரே, பி⁴க்க²வே, சரத²…பே… ந லச்ச²தி மாரோ ஆரம்மணம். கோ ச, பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோ, யதி³த³ம் சத்தாரோ ஸதிபட்டா²னா. கதமே சத்தாரோ? இத⁴ பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு வேத³னானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; சித்தே சித்தானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம் – அயம், பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோதி (ஸம். நி. 5.371).

குஸலானந்தி அனவஜ்ஜலக்க²ணானம். ஸமாதா³னஹேதூதி ஸமாதா³ய வத்தனஹேது. ஏவமித³ம் புஞ்ஞம் பவட்³ட⁴தீதி ஏவம் இத³ம் லோகியலோகுத்தரம் புஞ்ஞப²லம் வட்³ட⁴தி, புஞ்ஞப²லந்தி ச உபரூபரி புஞ்ஞம்பி புஞ்ஞவிபாகோபி வேதி³தப்³போ³.

த³ள்ஹனேமிசக்கவத்திராஜகதா²வண்ணனா

81. தத்த² து³வித⁴ம் குஸலம் வட்டகா³மீ ச விவட்டகா³மீ ச. தத்த² வட்டகா³மிகுஸலம் நாம மாதாபிதூனம் புத்ததீ⁴தாஸு புத்ததீ⁴தானஞ்ச மாதாபிதூஸு ஸினேஹவஸேன முது³மத்³த³வசித்தம். விவட்டகா³மிகுஸலம் நாம ‘‘சத்தாரோ ஸதிபட்டா²னா’’திஆதி³பே⁴தா³ ஸத்ததிம்ஸ போ³தி⁴பக்கி²யத⁴ம்மா. தேஸு வட்டகா³மிபுஞ்ஞஸ்ஸ பரியோஸானம் மனுஸ்ஸலோகே சக்கவத்திஸிரீவிப⁴வோ. விவட்டகா³மிகுஸலஸ்ஸ மக்³க³ப²லனிப்³பா³னஸம்பத்தி. தத்த² விவட்டகா³மிகுஸலஸ்ஸ விபாகம் ஸுத்தபரியோஸானே த³ஸ்ஸேஸ்ஸதி.

இத⁴ பன வட்டகா³மிகுஸலஸ்ஸ விபாகத³ஸ்ஸனத்த²ம், பி⁴க்க²வே, யதா³ புத்ததீ⁴தரோ மாதாபிதூனம் ஓவாதே³ ந அட்ட²ம்ஸு, ததா³ ஆயுனாபி வண்ணேனாபி இஸ்ஸரியேனாபி பரிஹாயிம்ஸு. யதா³ பன அட்ட²ம்ஸு, ததா³ வட்³டி⁴ம்ஸூதி வத்வா வட்டகா³மிகுஸலானுஸந்தி⁴வஸேன ‘‘பூ⁴தபுப்³ப³ம், பி⁴க்க²வே’’தி தே³ஸனம் ஆரபி⁴. தத்த² சக்கவத்தீதிஆதீ³னி மஹாபதா³னே (தீ³. நி. அட்ட². 2.33) வித்தா²ரிதானேவ.

82. ஓஸக்கிதந்தி ஈஸகம்பி அவஸக்கிதம். டா²னா சுதந்தி ஸப்³ப³ஸோ டா²னா அபக³தம். தம் கிர சக்கரதனம் அந்தேபுரத்³வாரே அக்கா²ஹதம் விய வேஹாஸம் அட்டா²ஸி. அத²ஸ்ஸ உபோ⁴ஸு பஸ்ஸேஸு த்³வே க²தி³ரத்த²ம்பே⁴ நிக²ணித்வா சக்கரதனமத்த²கே நேமிஅபி⁴முக²ம் ஏகம் ஸுத்தகம் ப³ந்தி⁴ம்ஸு. அதோ⁴பா⁴கே³பி நேமிஅபி⁴முக²ம் ஏகம் ப³ந்தி⁴ம்ஸு. தேஸு உபரிமஸுத்ததோ அப்பமத்தகம்பி ஓக³தம் சக்கரதனம் ஓஸக்கிதம் நாம ஹோதி, ஹேட்டா² ஸுத்தஸ்ஸ டா²னம் உபரிமகோடியா அதிக்கந்தக³தம் டா²னா சுதம் நாம ஹோதி, ததே³தம் அதிப³லவதோ³ஸே ஸதி ஏவம் ஹோதி. ஸுத்தமத்தம்பி ஏகங்கு³லத்³வங்கு³லமத்தம் வா ப⁴ட்ட²ம் டா²னா சுதமேவ ஹோதி. தம் ஸந்தா⁴யேதம் வுத்தம் ‘‘ஓஸக்கிதம் டா²னா சுத’’ந்தி.

அத² மே ஆரோசேய்யாஸீதி தாத, த்வம் அஜ்ஜ ஆதி³ம் கத்வா தி³வஸஸ்ஸ திக்க²த்தும் சக்கரதனஸ்ஸ உபட்டா²னம் க³ச்ச², ஏவம் க³ச்ச²ந்தோ யதா³ சக்கரதனம் ஈஸகம்பி ஓஸக்கிதம் டா²னா சுதம் பஸ்ஸஸி, அத² மய்ஹம் ஆசிக்கே²ய்யாஸி. ஜீவிதஞ்ஹி மே தவ ஹத்தே² நிக்கி²த்தந்தி. அத்³த³ஸாதி அப்பமத்தோ தி³வஸஸ்ஸ திக்க²த்தும் க³ந்த்வா ஓலோகேந்தோ ஏகதி³வஸம் அத்³த³ஸ.

83. அத² கோ², பி⁴க்க²வேதி பி⁴க்க²வே, அத² ராஜா த³ள்ஹனேமி ‘‘சக்கரதனம் ஓஸக்கித’’ந்தி ஸுத்வா உப்பன்னப³லவதோ³மனஸ்ஸோ ‘‘ந தா³னி மயா சிரம் ஜீவிதப்³ப³ம் ப⁴விஸ்ஸதி, அப்பாவஸேஸம் மே ஆயு, ந மே தா³னி காமே பரிபு⁴ஞ்ஜனகாலோ, பப்³ப³ஜ்ஜாகாலோ மே இதா³னீ’’தி ரோதி³த்வா பரிதே³வித்வா ஜேட்ட²புத்தம் குமாரம் ஆமந்தாபேத்வா ஏதத³வோச. ஸமுத்³த³பரியந்தந்தி பரிக்கி²த்தஏகஸமுத்³த³பரியந்தமேவ. இத³ம் ஹிஸ்ஸ குலஸந்தகம். சக்கவாளபரியந்தம் பன புஞ்ஞித்³தி⁴வஸேன நிப்³ப³த்தம், ந தம் ஸக்கா தா³தும். குலஸந்தகம் பன நிய்யாதேந்தோ ‘‘ஸமுத்³த³பரியந்த’’ந்தி ஆஹ. கேஸமஸ்ஸுந்தி தாபஸபப்³ப³ஜ்ஜம் பப்³ப³ஜந்தாபி ஹி பட²மம் கேஸமஸ்ஸும் ஓஹாரேந்தி. ததோ பட்டா²ய பரூள்ஹகேஸே ப³ந்தி⁴த்வா விசரந்தி. தேன வுத்தம் – ‘‘கேஸமஸ்ஸும் ஓஹாரேத்வா’’தி.

காஸாயானீதி கஸாயரஸபீதானி. ஆதி³தோ ஏவம் கத்வா பச்சா² வக்கலானிபி தா⁴ரேந்தி. பப்³ப³ஜீதி பப்³ப³ஜிதோ. பப்³ப³ஜித்வா ச அத்தனோ மங்க³லவனுய்யானேயேவ வஸி. ராஜிஸிம்ஹீதி ராஜஈஸிம்ஹி. ப்³ராஹ்மணபப்³ப³ஜிதா ஹி ‘‘ப்³ராஹ்மணிஸயோ’’தி வுச்சந்தி. ஸேதச்ச²த்தம் பன பஹாய ராஜபப்³ப³ஜிதா ராஜிஸயோதி. அந்தரதா⁴யீதி அந்தரஹிதம் நிப்³பு³ததீ³பஸிகா² விய அபா⁴வம் உபக³தம். படிஸம்வேதே³ஸீதி கந்த³ந்தோ பரிதே³வந்தோ ஜானாபேஸி. பேத்திகந்தி பிதிதோ ஆக³தம் தா³யஜ்ஜம் ந ஹோதி, ந ஸக்கா குஸீதேன ஹீனவீரியேன த³ஸ அகுஸலகம்மபதே² ஸமாதா³ய வத்தந்தேன பாபுணிதும். அத்தனோ பன ஸுகதம் கம்மம் நிஸ்ஸாய த³ஸவித⁴ம் த்³வாத³ஸவித⁴ம் வா சக்கவத்திவத்தம் பூரேந்தேனேவேதம் பத்தப்³ப³ந்தி தீ³பேதி. அத² நம் வத்தபடிபத்தியம் சோதே³ந்தோ ‘‘இங்க⁴ த்வ’’ந்திஆதி³மாஹ. தத்த² அரியேதி நித்³தோ³ஸே. சக்கவத்திவத்தேதி சக்கவத்தீனம் வத்தே.

சக்கவத்திஅரியவத்தவண்ணனா

84. த⁴ம்மந்தி த³ஸகுஸலகம்மபத²த⁴ம்மம். நிஸ்ஸாயாதி தத³தி⁴ட்டா²னேன சேதஸா தமேவ நிஸ்ஸயம் கத்வா. த⁴ம்மம் ஸக்கரோந்தோதி யதா² கதோ ஸோ த⁴ம்மோ ஸுட்டு² கதோ ஹோதி, ஏவமேதம் கரோந்தோ. த⁴ம்மம் க³ரும் கரோந்தோதி தஸ்மிம் கா³ரவுப்பத்தியா தம் க³ரும் கரோந்தோ. த⁴ம்மம் மானேந்தோதி தமேவ த⁴ம்மம் பியஞ்ச பா⁴வனீயஞ்ச கத்வா விஹரந்தோ. த⁴ம்மம் பூஜேந்தோதி தம் அபதி³ஸித்வா க³ந்த⁴மாலாதி³பூஜனேனஸ்ஸ பூஜம் கரோந்தோ. த⁴ம்மம் அபசயமானோதி தஸ்ஸேவ த⁴ம்மஸ்ஸ அஞ்ஜலிகரணாதீ³ஹி நீசவுத்திதம் கரோந்தோ. த⁴ம்மத்³த⁴ஜோ த⁴ம்மகேதூதி தம் த⁴ம்மம் த⁴ஜமிவ புரக்க²த்வா கேதுமிவ ச உக்கி²பித்வா பவத்தியா த⁴ம்மத்³த⁴ஜோ த⁴ம்மகேது ச ஹுத்வாதி அத்தோ². த⁴ம்மாதி⁴பதேய்யோதி த⁴ம்மாதி⁴பதிபூ⁴தோ ஆக³தபா⁴வேன த⁴ம்மவஸேனேவ ஸப்³ப³கிரியானம் கரணேன த⁴ம்மாதி⁴பதேய்யோ ஹுத்வா. த⁴ம்மிகம் ரக்கா²வரணகு³த்திம் ஸம்வித³ஹஸ்ஸூதி த⁴ம்மோ அஸ்ஸா அத்தீ²தி த⁴ம்மிகா, ரக்கா² ச ஆவரணஞ்ச கு³த்தி ச ரக்கா²வரணகு³த்தி. தத்த² ‘‘பரம் ரக்க²ந்தோ அத்தானம் ரக்க²தீ’’தி (ஸம். நி. 5.385) வசனதோ க²ந்திஆத³யோ ரக்கா². வுத்தஞ்ஹேதம் ‘‘கத²ஞ்ச, பி⁴க்க²வே, பரம் ரக்க²ந்தோ அத்தானம் ரக்க²தி. க²ந்தியா அவிஹிம்ஸாய மேத்தசித்ததா அனுத்³த³யதா’’தி (ஸம். நி. 5.385). நிவாஸனபாருபனகே³ஹாதீ³னம் நிவாரணா ஆவரணம், சோராதி³உபத்³த³வனிவாரணத்த²ம் கோ³பாயனா கு³த்தி, தம் ஸப்³ப³ம்பி ஸுட்டு² ஸம்வித³ஹஸ்ஸு பவத்தய ட²பேஹீதி அத்தோ². இதா³னி யத்த² ஸா ஸம்வித³ஹிதப்³பா³, தம் த³ஸ்ஸேந்தோ அந்தோஜனஸ்மிந்திஆதி³மாஹ.

தத்ராயம் ஸங்கே²பத்தோ² – அந்தோஜனஸங்கா²தம் தவ புத்ததா³ரம் ஸீலஸம்வரே பதிட்ட²பேஹி, வத்த²க³ந்த⁴மாலாதீ³னி சஸ்ஸ தே³ஹி, ஸப்³போ³பத்³த³வே சஸ்ஸ நிவாரேஹி. ப³லகாயாதீ³ஸுபி ஏஸேவ நயோ. அயம் பன விஸேஸோ – ப³லகாயோ காலம் அனதிக்கமித்வா ப⁴த்தவேதனஸம்பதா³னேனபி அனுக்³க³ஹேதப்³போ³. அபி⁴ஸித்தக²த்தியா ப⁴த்³ரஸ்ஸாஜானேய்யாதி³ரதனஸம்பதா³னேனபி உபஸங்க³ண்ஹிதப்³பா³. அனுயந்தக²த்தியா தேஸம் அனுரூபயானவாஹனஸம்பதா³னேனபி பரிதோஸேதப்³பா³. ப்³ராஹ்மணா அன்னபானவத்தா²தி³னா தே³ய்யத⁴ம்மேன. க³ஹபதிகா ப⁴த்தபீ³ஜனங்க³லபா²லப³லிப³த்³தா³தி³ஸம்பதா³னேன. ததா² நிக³மவாஸினோ நேக³மா, ஜனபத³வாஸினோ ச ஜானபதா³. ஸமிதபாபபா³ஹிதபாபா ஸமணப்³ராஹ்மணா ஸமணபரிக்கா²ரஸம்பதா³னேன ஸக்காதப்³பா³. மிக³பக்கி²னோ அப⁴யதா³னேன ஸமஸ்ஸாஸேதப்³பா³.

விஜிதேதி அத்தனோ ஆணாபவத்திட்டா²னே. அத⁴ம்மகாரோதி அத⁴ம்மகிரியா. மா பவத்தித்தா²தி யதா² நப்பவத்ததி, ததா² நம் படிபாதே³ஹீதி அத்தோ². ஸமணப்³ராஹ்மணாதி ஸமிதபாபபா³ஹிதபாபா. மத³ப்பமாதா³ படிவிரதாதி நவவிதா⁴ மானமதா³, பஞ்சஸு காமகு³ணேஸு சித்தவோஸ்ஸஜ்ஜனஸங்கா²தா பமாதா³ ச படிவிரதா. க²ந்திஸோரச்சே நிவிட்டா²தி அதி⁴வாஸனக²ந்தியஞ்ச ஸுரதபா⁴வே ச பதிட்டி²தா. ஏகமத்தானந்தி அத்தனோ ராகா³தீ³னம் த³மனாதீ³ஹி ஏகமத்தானம் த³மேந்தி ஸமேந்தி பரினிப்³பா³பேந்தீதி வுச்சந்தி. காலேன காலந்தி காலே காலே. அபி⁴னிவஜ்ஜேய்யாஸீதி கூ³த²ம் விய விஸம் விய அக்³கி³ம் விய ச ஸுட்டு² வஜ்ஜேய்யாஸி. ஸமாதா³யாதி ஸுரபி⁴குஸுமதா³மம் விய அமதம் விய ச ஸம்மா ஆதா³ய பவத்தேய்யாஸி.

இத⁴ ட²த்வா வத்தம் ஸமானேதப்³ப³ம். அந்தோஜனஸ்மிம் ப³லகாயேபி ஏகம், க²த்தியேஸு ஏகம், அனுயந்தேஸு ஏகம், ப்³ராஹ்மணக³ஹபதிகேஸு ஏகம், நேக³மஜானபதே³ஸு ஏகம், ஸமணப்³ராஹ்மணேஸு ஏகம், மிக³பக்கீ²ஸு ஏகம், அத⁴ம்மகாரப்படிக்கே²போ ஏகம், அத⁴னானம் த⁴னானுப்பதா³னம் ஏகம் ஸமணப்³ராஹ்மணே உபஸங்கமித்வா பஞ்ஹபுச்ச²னம் ஏகந்தி ஏவமேதம் த³ஸவித⁴ம் ஹோதி. க³ஹபதிகே பன பக்கி²ஜாதே ச விஸும் கத்வா க³ணேந்தஸ்ஸ த்³வாத³ஸவித⁴ம் ஹோதி. புப்³பே³ அவுத்தம் வா க³ணேந்தேன அத⁴ம்மராக³ஸ்ஸ ச விஸமலோப⁴ஸ்ஸ ச பஹானவஸேன த்³வாத³ஸவித⁴ம் வேதி³தப்³ப³ம். இத³ம் கோ² தாத தந்தி இத³ம் த³ஸவித⁴ம் த்³வாத³ஸவித⁴ஞ்ச அரியசக்கவத்திவத்தம் நாம. வத்தமானஸ்ஸாதி பூரேத்வா வத்தமானஸ்ஸ. தத³ஹுபோஸதே²திஆதி³ மஹாஸுத³ஸ்ஸனே வுத்தம்.

90. ஸமதேனாதி அத்தனோ மதியா. ஸுத³ந்தி நிபாதமத்தம். பஸாஸதீதி அனுஸாஸதி. இத³ம் வுத்தம் ஹோதி – போராணகம் ராஜவம்ஸம் ராஜபவேணிம் ராஜத⁴ம்மம் பஹாய அத்தனோ மதிமத்தே ட²த்வா ஜனபத³ம் அனுஸாஸதீதி. ஏவமயம் மக⁴தே³வவம்ஸஸ்ஸ களாரஜனகோ விய த³ள்ஹனேமிவம்ஸஸ்ஸ உபச்சே²த³கோ அந்திமபுரிஸோ ஹுத்வா உப்பன்னோ. புப்³பே³னாபரந்தி புப்³ப³காலேன ஸதி³ஸா ஹுத்வா அபரகாலம். ஜனபதா³ ந பப்³ப³ந்தீதி ந வட்³ட⁴ந்தி. யதா² தம் புப்³ப³கானந்தி யதா² புப்³ப³கானம் ராஜூனம் புப்³பே³ ச பச்சா² ச ஸதி³ஸாயேவ ஹுத்வா பப்³பி³ம்ஸு, ததா² ந பப்³ப³ந்தி. கத்த²சி ஸுஞ்ஞா ஹோந்தி ஹதவிலுத்தா, தேலமது⁴பா²ணிதாதீ³ஸு சேவ யாகு³ப⁴த்தாதீ³ஸு ச ஓஜாபி பரிஹாயித்தா²தி அத்தோ².

அமச்சா பாரிஸஜ்ஜாதி அமச்சா சேவ பரிஸாவசரா ச. க³ணகமஹாமத்தாதி அச்சி²த்³த³காதி³பாட²க³ணகா சேவ மஹாஅமச்சா ச. அனீகட்டா²தி ஹத்தி²ஆசரியாத³யோ. தோ³வாரிகாதி த்³வாரரக்கி²னோ. மந்தஸ்ஸாஜீவினோதி மந்தா வுச்சதி பஞ்ஞா, தம் நிஸ்ஸயம் கத்வா யே ஜீவந்தி பண்டி³தா மஹாமத்தா, தேஸம் ஏதம் நாமம்.

ஆயுவண்ணாதி³பரிஹானிகதா²வண்ணனா

91. நோ ச கோ² அத⁴னானந்தி ப³லவலோப⁴த்தா பன அத⁴னானம் த³லித்³த³மனுஸ்ஸானம் த⁴னம் நானுப்பதா³ஸி. நானுப்பதி³யமானேதி அனனுப்பதி³யமானே, அயமேவ வா பாடோ². தா³லித்³தி³யந்தி த³லித்³த³பா⁴வோ. அத்தனா ச ஜீவாஹீதி ஸயஞ்ச ஜீவம் யாபேஹீதி அத்தோ². உத்³த⁴க்³கி³கந்திஆதீ³ஸு உபரூபரிபூ⁴மீஸு ப²லதா³னவஸேன உத்³த⁴மக்³க³மஸ்ஸாதி உத்³த⁴க்³கி³கா. ஸக்³க³ஸ்ஸ ஹிதா தத்ருபபத்திஜனனதோதி ஸோவக்³கி³கா. நிப்³ப³த்தட்டா²னே ஸுகோ² விபாகோ அஸ்ஸாதி ஸுக²விபாகா. ஸுட்டு² அக்³கா³னம் தி³ப்³ப³வண்ணாதீ³னம் த³ஸன்னம் விஸேஸானம் நிப்³ப³த்தனதோ ஸக்³க³ஸம்வத்தனிகா. ஏவரூபம் த³க்கி²ணம் தா³னம் பதிட்ட²பேதீதி அத்தோ².

92. பவட்³டி⁴ஸ்ஸதீதி வட்³டி⁴ஸ்ஸதி ப³ஹும் ப⁴விஸ்ஸதி. ஸுனிஸேத⁴ம் நிஸேதே⁴ய்யந்தி ஸுட்டு² நிஸித்³த⁴ம் நிஸேதே⁴ய்யம். மூலக⁴ச்சந்தி மூலஹதம். க²ரஸ்ஸரேனாதி ப²ருஸஸத்³தே³ன. பணவேனாதி வஜ்ஜ²பே⁴ரியா.

93. ஸீஸானி நேஸம் சி²ந்தி³ஸ்ஸாமாதி யேஸம் அந்தமஸோ மூலகமுட்டி²ம்பி ஹரிஸ்ஸாம, தேஸம் ததே²வ ஸீஸானி சி²ந்தி³ஸ்ஸாம, யதா² கோசி ஹடபா⁴வம்பி ந ஜானிஸ்ஸதி, அம்ஹாகம் தா³னி கிமேத்த² ராஜாபி ஏவம் உட்டா²ய பரம் மாரேதீதி அயம் நேஸம் அதி⁴ப்பாயோ. உபக்கமிம்ஸூதி ஆரபி⁴ம்ஸு. பந்த²து³ஹனந்தி பந்த²கா⁴தம், பந்தே² ட²த்வா சோரகம்மம்.

94. ந ஹி, தே³வாதி ஸோ கிர சிந்தேஸி – ‘‘அயம் ராஜா ஸச்சம் தே³வாதி முக²படிஞ்ஞாய தி³ன்னாய மாராபேதி, ஹந்தா³ஹம் முஸாவாத³ம் கரோமீ’’தி, மரணப⁴யா ‘‘ந ஹி தே³வா’’தி அவோச.

96. ஏகித³ந்தி ஏத்த² இத³ந்தி நிபாதமத்தம், ஏகே ஸத்தாதி அத்தோ². சாரித்தந்தி மிச்சா²சாரம். அபி⁴ஜ்ஜா²ப்³யாபாதா³தி அபி⁴ஜ்ஜா² ச ப்³யாபாதோ³ ச. மிச்சா²தி³ட்டீ²தி நத்தி² தி³ன்னந்திஆதி³கா அந்தக்³கா³ஹிகா பச்சனீகதி³ட்டி².

101. அத⁴ம்மராகோ³தி மாதா மாதுச்சா² பிதுச்சா² மாதுலானீதிஆதி³கே அயுத்தட்டா²னே ராகோ³. விஸமலோபோ⁴தி பரிபோ⁴க³யுத்தேஸுபி டா²னேஸு அதிப³லவலோபோ⁴. மிச்சா²த⁴ம்மோதி புரிஸானம் புரிஸேஸு இத்தீ²னஞ்ச இத்தீ²ஸு ச²ந்த³ராகோ³.

அமத்தேய்யதாதிஆதீ³ஸு மாது ஹிதோ மத்தேய்யோ, தஸ்ஸ பா⁴வோ மத்தேய்யதா, மாதரி ஸம்மா படிபத்தியா ஏதம் நாமம். தஸ்ஸா அபா⁴வோ சேவ தப்படிபக்க²தா ச அமத்தேய்யதா. அபேத்தேய்யதாதீ³ஸுபி ஏஸேவ நயோ. ந குலே ஜேட்டா²பசாயிதாதி குலே ஜேட்டா²னம் அபசிதியா நீசவுத்தியா அகரணபா⁴வோ.

த³ஸவஸ்ஸாயுகஸமயவண்ணனா

103. யம் இமேஸந்தி யஸ்மிம் ஸமயே இமேஸம். அலம்பதேய்யாதி பதினோ தா³தும் யுத்தா. இமானி ரஸானீதி இமானி லோகே அக்³க³ரஸானி. அதிப்³யாதி³ப்பிஸ்ஸந்தீதி அதிவிய தி³ப்பிஸ்ஸந்தி, அயமேவ வா பாடோ². குஸலந்திபி ந ப⁴விஸ்ஸதீதி குஸலந்தி நாமம்பி ந ப⁴விஸ்ஸதி, பஞ்ஞத்திமத்தம்பி ந பஞ்ஞாயிஸ்ஸதீதி அத்தோ². புஜ்ஜா ச ப⁴விஸ்ஸந்தி பாஸம்ஸா சாதி பூஜாரஹா ச ப⁴விஸ்ஸந்தி பஸம்ஸாரஹா ச. ததா³ கிர மனுஸ்ஸா ‘‘அஸுகேன நாம மாதா பஹதா, பிதா பஹதோ, ஸமணப்³ராஹ்மணா ஜீவிதா வோரோபிதா, குலே ஜேட்டா²னம் அத்தி²பா⁴வம்பி ந ஜானாதி, அஹோ புரிஸோ’’தி தமேவ பூஜேஸ்ஸந்தி சேவ பஸம்ஸிஸ்ஸந்தி ச.

ந ப⁴விஸ்ஸதி மாதாதி வாதி அயம் மய்ஹம் மாதாதி க³ருசித்தம் ந ப⁴விஸ்ஸதி. கே³ஹே மாதுகா³மம் விய நானாவித⁴ம் அஸப்³பி⁴கத²ம் கத²யமானா அகா³ரவுபசாரேன உபஸங்கமிஸ்ஸந்தி. மாதுச்சா²தீ³ஸுபி ஏஸேவ நயோ. ஏத்த² ச மாதுச்சா²தி மாதுப⁴கி³னீ. மாதுலானீதி மாதுலப⁴ரியா. ஆசரியப⁴ரியாதி ஸிப்பாயதனானி ஸிக்கா²பகஸ்ஸ ஆசரியஸ்ஸ ப⁴ரியா. க³ரூனம் தா³ராதி சூளபிதுமஹாபிதுஆதீ³னம் ப⁴ரியா. ஸம்பே⁴த³ந்தி மிஸ்ஸீபா⁴வம், மரியாத³பே⁴த³ம் வா.

திப்³போ³ ஆகா⁴தோ பச்சுபட்டி²தோ ப⁴விஸ்ஸதீதி ப³லவகோபோ புனப்புனம் உப்பத்திவஸேன பச்சுபட்டி²தோ ப⁴விஸ்ஸதி. அபரானி த்³வே ஏதஸ்ஸேவ வேவசனானி. கோபோ ஹி சித்தம் ஆகா⁴தேதீதி ஆகா⁴தோ. அத்தனோ ச பரஸ்ஸ ச ஹிதஸுக²ம் ப்³யாபாதே³தீதி ப்³யாபாதோ³. மனோபதூ³ஸனதோ மனோபதோ³ஸோதி வுச்சதி. திப்³ப³ம் வத⁴கசித்தந்தி பியமானஸ்ஸாபி பரம் மாரணத்தா²ய வத⁴கசித்தம். தஸ்ஸ வத்து²ம் த³ஸ்ஸேதும் மாதுபி புத்தம்ஹீதிஆதி³ வுத்தம். மாக³விகஸ்ஸாதி மிக³லுத்³த³கஸ்ஸ.

104. ஸத்த²ந்தரகப்போதி ஸத்தே²ன அந்தரகப்போ. ஸம்வட்டகப்பம் அப்பத்வா அந்தராவ லோகவினாஸோ. அந்தரகப்போ ச நாமேஸ து³ப்³பி⁴க்க²ந்தரகப்போ ரோக³ந்தரகப்போ ஸத்த²ந்தரகப்போதி திவிதோ⁴. தத்த² லோபு⁴ஸ்ஸதா³ய பஜாய து³ப்³பி⁴க்க²ந்தரகப்போ ஹோதி. மோஹுஸ்ஸதா³ய ரோக³ந்தரகப்போ. தோ³ஸுஸ்ஸதா³ய ஸத்த²ந்தரகப்போ. தத்த² து³ப்³பி⁴க்க²ந்தரகப்பேன நட்டா² யேபு⁴ய்யேன பேத்திவிஸயே உபபஜ்ஜந்தி. கஸ்மா? ஆஹாரனிகந்தியா ப³லவத்தா. ரோக³ந்தரகப்பேன நட்டா² யேபு⁴ய்யேன ஸக்³கே³ நிப்³ப³த்தந்தி கஸ்மா? தேஸஞ்ஹி ‘‘அஹோ வதஞ்ஞேஸம் ஸத்தானம் ஏவரூபோ ரோகோ³ ந ப⁴வேய்யா’’தி மேத்தசித்தம் உப்பஜ்ஜதீதி. ஸத்த²ந்தரகப்பேன நட்டா² யேபு⁴ய்யேன நிரயே உபபஜ்ஜந்தி. கஸ்மா? அஞ்ஞமஞ்ஞம் ப³லவாகா⁴ததாய.

மிக³ஸஞ்ஞந்தி ‘‘அயம் மிகோ³, அயம் மிகோ³’’தி ஸஞ்ஞம். திண்ஹானி ஸத்தா²னி ஹத்தே²ஸு பாதுப⁴விஸ்ஸந்தீதி தேஸம் கிர ஹத்தே²ன பு²ட்ட²மத்தம் யம்கிஞ்சி அந்தமஸோ திணபண்ணம் உபாதா³ய ஆவுத⁴மேவ ப⁴விஸ்ஸதி. மா ச மயம் கஞ்சீதி மயம் கஞ்சி ஏகபுரிஸம்பி ஜீவிதா மா வோரோபயிம்ஹ. மா ச அம்ஹே கோசீதி அம்ஹேபி கோசி ஏகபுரிஸோ ஜீவிதா மா வோரோபயித்த². யம்னூன மயந்தி அயம் லோகவினாஸோ பச்சுபட்டி²தோ, ந ஸக்கா த்³வீஹி ஏகட்டா²னே டி²தேஹி ஜீவிதம் லத்³து⁴ந்தி மஞ்ஞமானா ஏவம் சிந்தயிம்ஸு. வனக³ஹனந்தி வனஸங்கா²தேஹி திணகு³ம்ப³லதாதீ³ஹி க³ஹனம் து³ப்பவேஸட்டா²னம். ருக்க²க³ஹனந்தி ருக்கே²ஹி க³ஹனம் து³ப்பவேஸட்டா²னம். நதீ³விது³க்³க³ந்தி நதீ³னம் அந்தரதீ³பாதீ³ஸு து³க்³க³மனட்டா²னம். பப்³ப³தவிஸமந்தி பப்³ப³தேஹி விஸமம், பப்³ப³தேஸுபி வா விஸமட்டா²னம். ஸபா⁴கா³யிஸ்ஸந்தீதி யதா² அஹம் ஜீவாமி தி³ட்டா² போ⁴ ஸத்தா, த்வம்பி ததா² ஜீவஸீதி ஏவம் ஸம்மோத³னகதா²ய அத்தனா ஸபா⁴கே³ கரிஸ்ஸந்தி.

ஆயுவண்ணாதி³வட்³ட⁴னகதா²வண்ணனா

105. ஆயதந்தி மஹந்தம். பாணாதிபாதா விரமேய்யாமாதி பாணாதிபாததோ ஓஸக்கேய்யாம. பாணாதிபாதம் விரமேய்யாமாதிபி ஸஜ்ஜா²யந்தி, தத்த² பாணாதிபாதம் பஜஹேய்யாமாதி அத்தோ². வீஸதிவஸ்ஸாயுகாதி மாதாபிதரோ பாணாதிபாதா படிவிரதா, புத்தா கஸ்மா வீஸதிவஸ்ஸாயுகா அஹேஸுந்தி கே²த்தவிஸுத்³தி⁴யா. தேஸஞ்ஹி மாதாபிதரோ ஸீலவந்தோ ஜாதா. இதி ஸீலக³ப்³பே⁴ வட்³டி⁴தத்தா இமாய கே²த்தவிஸுத்³தி⁴யா தீ³கா⁴யுகா அஹேஸும். யே பனேத்த² காலம் கத்வா தத்தே²வ நிப்³ப³த்தா, தே அத்தனோவ ஸீலஸம்பத்தியா தீ³கா⁴யுகா அஹேஸும்.

அஸ்ஸாமாதி ப⁴வேய்யாம. சத்தாரீஸவஸ்ஸாயுகாதிஆத³யோ கோட்டா²ஸா அதி³ன்னாதா³னாதீ³ஹி படிவிரதானம் வஸேன வேதி³தப்³பா³.

ஸங்க²ராஜஉப்பத்திவண்ணனா

106. இச்சா²தி மய்ஹம் ப⁴த்தம் தே³தா²தி ஏவம் உப்பஜ்ஜனகதண்ஹா. அனஸனந்தி ந அஸனம் அவிப்பா²ரிகபா⁴வோ காயாலஸியம், ப⁴த்தம் பு⁴த்தானம் ப⁴த்தஸம்மத³பச்சயா நிபஜ்ஜிதுகாமதாஜனகோ காயது³ப்³ப³லபா⁴வோதி அத்தோ². ஜராதி பாகடஜரா. குக்குடஸம்பாதிகாதி ஏககா³மஸ்ஸ ச²த³னபிட்ட²தோ உப்பதித்வா இதரகா³மஸ்ஸ ச²த³னபிட்டே² பதனஸங்கா²தோ குக்குடஸம்பாதோ. ஏதாஸு அத்தீ²தி குக்குடஸம்பாதிகா. ‘‘குக்குடஸம்பாதி³கா’’திபி பாடோ², கா³மந்தரதோ கா³மந்தரம் குக்குடானம் பத³ஸா க³மனஸங்கா²தோ குக்குடஸம்பாதோ³ ஏதாஸு அத்தீ²தி அத்தோ². உப⁴யம்பேதம் க⁴னனிவாஸதம்யேவ தீ³பேதி. அவீசி மஞ்ஞே பு²டோ ப⁴விஸ்ஸதீதி அவீசிமஹானிரயோ விய நிரந்தரபூரிதோ ப⁴விஸ்ஸதி.

107. ‘‘அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு மேத்தேய்யோ நாம ப⁴க³வா லோகே உப்பஜ்ஜிஸ்ஸதீ’’தி ந வட்³ட⁴மானகவஸேன வுத்தம். ந ஹி பு³த்³தா⁴ வட்³ட⁴மானே ஆயும்ஹி நிப்³ப³த்தந்தி, ஹாயமானே பன நிப்³ப³த்தந்தி. தஸ்மா யதா³ தம் ஆயு வட்³டி⁴த்வா அஸங்கே²ய்யதம் பத்வா புன ஹாயமானம் அஸீதிவஸ்ஸஸஹஸ்ஸகாலே ட²ஸ்ஸதி, ததா³ உப்பஜ்ஜிஸ்ஸதீதி அத்தோ². பரிஹரிஸ்ஸதீதி இத³ம் பன பரிவாரேத்வா விசரந்தானம் வஸேன வுத்தம். யூபோதி பாஸாதோ³. ரஞ்ஞா மஹாபனாதே³ன காராபிதோதி ரஞ்ஞா ஹேதுபூ⁴தேன தஸ்ஸத்தா²ய ஸக்கேன தே³வராஜேன விஸ்ஸகம்மதே³வபுத்தம் பேஸேத்வா காராபிதோ. புப்³பே³ கிர த்³வே பிதாபுத்தா நளகாரா பச்சேகபு³த்³த⁴ஸ்ஸ நளேஹி ச உது³ம்ப³ரேஹி ச பண்ணஸாலம் காராபேத்வா தம் தத்த² வாஸாபேத்வா சதூஹி பச்சயேஹி உபட்ட²ஹிம்ஸு. தே காலம் கத்வா தே³வலோகே நிப்³ப³த்தா. தேஸு பிதா தே³வலோகேயேவ அட்டா²ஸி. புத்தோ தே³வலோகா சவித்வா ஸுருசிஸ்ஸ ரஞ்ஞோ தே³வியா ஸுமேதா⁴ய குச்சி²ஸ்மிம் நிப்³ப³த்தோ. மஹாபனாதோ³ நாம குமாரோ அஹோஸி. ஸோ அபரபா⁴கே³ ச²த்தம் உஸ்ஸாபேத்வா மஹாபனாதோ³ நாம ராஜா ஜாதோ. அத²ஸ்ஸ புஞ்ஞானுபா⁴வேன ஸக்கோ தே³வராஜா விஸ்ஸகம்மதே³வபுத்தம் ரஞ்ஞோ பாஸாத³ம் கரோஹீதி பஹிணி ஸோ தஸ்ஸ பாஸாத³ம் நிம்மினி பஞ்சவீஸதியோஜனுப்³பே³த⁴ம் ஸத்தரதனமயம் ஸதபூ⁴மகம். யம் ஸந்தா⁴ய ஜாதகே வுத்தம் –

‘‘பனாதோ³ நாம ஸோ ராஜா, யஸ்ஸ யூபோ ஸுவண்ணயோ;

திரியம் ஸோளஸுப்³பே³தோ⁴, உத்³த⁴மாஹு ஸஹஸ்ஸதா⁴.

ஸஹஸ்ஸகண்டோ³ ஸதகே³ண்டு³, த⁴ஜாலு ஹரிதாமயோ;

அனச்சும் தத்த² க³ந்த⁴ப்³பா³, ச² ஸஹஸ்ஸானி ஸத்ததா⁴.

ஏவமேதம் ததா³ ஆஸி, யதா² பா⁴ஸஸி ப⁴த்³த³ஜி;

ஸக்கோ அஹம் ததா³ ஆஸிம், வேய்யாவச்சகரோ தவா’’தி. (ஜா. 5.3.42);

ஸோ ராஜா தத்த² யாவதாயுகம் வஸித்வா காலம் கத்வா தே³வலோகே நிப்³ப³த்தி. தஸ்மிம் தே³வலோகே நிப்³ப³த்தே ஸோ பாஸாதோ³ மஹாக³ங்கா³ய அனுஸோதம் பதி. தஸ்ஸ து⁴ரஸோபானஸம்முக²ட்டா²னே பயாக³பதிட்டா²னம் நாம நக³ரம் மாபிதம். து²பிகாஸம்முக²ட்டா²னே கோடிகா³மோ நாம. அபரபா⁴கே³ அம்ஹாகம் ப⁴க³வதோ காலே ஸோ நளகாரதே³வபுத்தோ தே³வலோகதோ சவித்வா மனுஸ்ஸபதே² ப⁴த்³த³ஜிஸேட்டி² நாம ஹுத்வா ஸத்து² ஸந்திகே பப்³ப³ஜித்வா அரஹத்தம் பாபுணி. ஸோ நாவாய க³ங்கா³தரணதி³வஸே பி⁴க்கு²ஸங்க⁴ஸ்ஸ தம் பாஸாத³ம் த³ஸ்ஸேதீதி வத்து² வித்தா²ரேதப்³ப³ம். கஸ்மா பனேஸ பாஸாதோ³ ந அந்தரஹிதோதி? இதரஸ்ஸ ஆனுபா⁴வா. தேன ஸத்³தி⁴ம் புஞ்ஞம் கத்வா தே³வலோகே நிப்³ப³த்தகுலபுத்தோ அனாக³தே ஸங்கோ² நாம ராஜா ப⁴விஸ்ஸதி. தஸ்ஸ பரிபோ⁴க³த்தா²ய ஸோ பாஸாதோ³ உட்ட²ஹிஸ்ஸதி, தஸ்மா ந அந்தரஹிதோதி.

108. உஸ்ஸாபேத்வாதி தம் பாஸாத³ம் உட்டா²பேத்வா. அஜ்ஜா²வஸித்வாதி தத்த² வஸித்வா. தம் த³த்வா விஸ்ஸஜ்ஜித்வாதி தம் பாஸாத³ம் தா³னவஸேன த³த்வா நிரபேக்கோ² பரிச்சாக³வஸேன ச விஸ்ஸஜ்ஜித்வா. கஸ்ஸ ச ஏவம் த³த்வாதி? ஸமணாதீ³னம். தேனாஹ – ‘‘ஸமணப்³ராஹ்மணகபணத்³தி⁴கவனிப்³ப³கயாசகானம் தா³னம் த³த்வா’’தி. கத²ம் பன ஸோ ஏகம் பாஸாத³ம் ப³ஹூனம் த³ஸ்ஸதீதி? ஏவம் கிரஸ்ஸ சித்தம் உப்பஜ்ஜிஸ்ஸதி ‘‘அயம் பாஸாதோ³ விப்பகிரியதூ’’தி. ஸோ க²ண்ட³க²ண்ட³ஸோ விப்பகிரிஸ்ஸதி. ஸோ தம் அலக்³க³மானோவ ஹுத்வா ‘‘யோ யத்தகம் இச்ச²தி, ஸோ தத்தகம் க³ண்ஹதூ’’தி தா³னவஸேன விஸ்ஸஜ்ஜிஸ்ஸதி. தேன வுத்தம் – ‘‘தா³னம் த³த்வா மேத்தேய்யஸ்ஸ ப⁴க³வதோ…பே… விஹரிஸ்ஸதீ’’தி. ஏத்தகேன ப⁴க³வா வட்டகா³மிகுஸலஸ்ஸ அனுஸந்தி⁴ம் த³ஸ்ஸேதி.

109. இதா³னி விவட்டகா³மிகுஸலஸ்ஸ அனுஸந்தி⁴ம் த³ஸ்ஸேந்தோ புன அத்ததீ³பா, பி⁴க்க²வே, விஹரதா²திஆதி³மாஹ.

பி⁴க்கு²னோ ஆயுவண்ணாதி³வட்³ட⁴னகதா²வண்ணனா

110. இத³ம் கோ², பி⁴க்க²வே, பி⁴க்கு²னோ ஆயுஸ்மிந்தி பி⁴க்க²வே யம் வோ அஹம் ஆயுனாபி வட்³டி⁴ஸ்ஸதா²தி அவோசம், தத்த² இத³ம் பி⁴க்கு²னோ ஆயுஸ்மிம் இத³ம் ஆயுகாரணந்தி அத்தோ². தஸ்மா தும்ஹேஹி ஆயுனா வட்³டி⁴துகாமேஹி இமே சத்தாரோ இத்³தி⁴பாதா³ பா⁴வேதப்³பா³தி த³ஸ்ஸேதி.

வண்ணஸ்மிந்தி யம் வோ அஹம் வண்ணேனபி வட்³டி⁴ஸ்ஸதா²தி அவோசம், இத³ம் தத்த² வண்ணகாரணம். ஸீலவதோ ஹி அவிப்படிஸாராதீ³னம் வஸேன ஸரீரவண்ணோபி கித்திவஸேன கு³ணவண்ணோபி வட்³ட⁴தி. தஸ்மா தும்ஹேஹி வண்ணேன வட்³டி⁴துகாமேஹி ஸீலஸம்பன்னேஹி ப⁴விதப்³ப³ந்தி த³ஸ்ஸேதி.

ஸுக²ஸ்மிந்தி யம் வோ அஹம் ஸுகே²னபி வட்³டி⁴ஸ்ஸதா²தி அவோசம், இத³ம் தத்த² விவேகஜம் பீதிஸுகா²தி³னானப்பகாரகம் ஜா²னஸுக²ம். தஸ்மா தும்ஹேஹி ஸுகே²ன வட்³டி⁴துகாமேஹி இமானி சத்தாரி ஜா²னானி பா⁴வேதப்³பா³னி.

போ⁴க³ஸ்மிந்தி யம் வோ அஹம் போ⁴கே³னபி வட்³டி⁴ஸ்ஸதா²தி அவோசம், அயம் ஸோ அப்பமாணானம் ஸத்தானம் அப்படிகூலதாவஹோ ஸுக²ஸயனாதி³ ஏகாத³ஸானிஸம்ஸோ ஸப்³ப³தி³ஸாவிப்பா²ரிதப்³ரஹ்மவிஹாரபோ⁴கோ³. தஸ்மா தும்ஹேஹி போ⁴கே³ன வட்³டி⁴துகாமேஹி இமே ப்³ரஹ்மவிஹாரா பா⁴வேதப்³பா³.

ப³லஸ்மிந்தி யம் வோ அஹம் ப³லேனபி வட்³டி⁴ஸ்ஸதா²தி அவோசம், இத³ம் ஆஸவக்க²யபரியோஸானே உப்பன்னம் அரஹத்தப²லஸங்கா²தம் ப³லம். தஸ்மா தும்ஹேஹி ப³லேன வட்³டி⁴துகாமேஹி அரஹத்தப்பத்தியா யோகோ³ கரணீயோ.

யத²யித³ம், பி⁴க்க²வே, மாரப³லந்தி யதா² இத³ம் தே³வபுத்தமாரமச்சுமாரகிலேஸமாரானம் ப³லம் து³ப்பஸஹம் து³ரபி⁴ஸம்ப⁴வம், ஏவம் அஞ்ஞம் லோகே ஏகப³லம்பி ந ஸமனுபஸ்ஸாமி. தம்பி ப³லம் இத³மேவ அரஹத்தப²லம் பஸஹதி அபி⁴ப⁴வதி அஜ்ஜோ²த்த²ரதி. தஸ்மா ஏத்தே²வ யோகோ³ கரணீயோதி த³ஸ்ஸேதி.

ஏவமித³ம் புஞ்ஞந்தி ஏவம் இத³ம் லோகுத்தரபுஞ்ஞம்பி யாவ ஆஸவக்க²யா பவட்³ட⁴தீதி விவட்டகா³மிகுஸலானுஸந்தி⁴ம் நிட்ட²பேந்தோ அரஹத்தனிகூடேன தே³ஸனம் நிட்ட²பேஸி. ஸுத்தபரியோஸானே வீஸதி பி⁴க்கு²ஸஹஸ்ஸானி அரஹத்தம் பாபுணிம்ஸு. சதுராஸீதி பாணஸஹஸ்ஸானி அமதபானம் பிவிம்ஸூதி.

ஸுமங்க³லவிலாஸினியா தீ³க⁴னிகாயட்ட²கதா²ய

சக்கவத்திஸுத்தவண்ணனா நிட்டி²தா.