10. ஸங்கீ³திஸுத்தவண்ணனா

296. ஏவம் மே ஸுதந்தி ஸங்கீ³திஸுத்தம். தத்ராயமபுப்³ப³பத³வண்ணனா – சாரிகம் சரமானோதி நிப³த்³த⁴சாரிகம் சரமானோ. ததா³ கிர ஸத்தா² த³ஸஸஹஸ்ஸசக்கவாளே ஞாணஜாலம் பத்த²ரித்வா லோகம் வோலோகயமானோ பாவானக³ரவாஸினோ மல்லராஜானோ தி³ஸ்வா இமே ராஜானோ மய்ஹம் ஸப்³ப³ஞ்ஞுதஞ்ஞாணஜாலஸ்ஸ அந்தோ பஞ்ஞாயந்தி, கிம் நு கோ²தி ஆவஜ்ஜந்தோ ‘‘ராஜானோ ஏகம் ஸந்தா⁴கா³ரம் காரேஸும், மயி க³தே மங்க³லம் ப⁴ணாபேஸ்ஸந்தி, அஹம் தேஸம் மங்க³லம் வத்வா உய்யோஜேத்வா ‘பி⁴க்கு²ஸங்க⁴ஸ்ஸ த⁴ம்மகத²ம் கதே²ஹீ’தி ஸாரிபுத்தம் வக்கா²மி, ஸாரிபுத்தோ தீஹி பிடகேஹி ஸம்மஸித்வா சுத்³த³ஸபஞ்ஹாதி⁴கேன பஞ்ஹஸஹஸ்ஸேன படிமண்டே³த்வா பி⁴க்கு²ஸங்க⁴ஸ்ஸ ஸங்கீ³திஸுத்தம் நாம கதே²ஸ்ஸதி, ஸுத்தந்தம் ஆவஜ்ஜேத்வா பஞ்ச பி⁴க்கு²ஸதானி ஸஹ படிஸம்பி⁴தா³ஹி அரஹத்தம் பாபுணிஸ்ஸந்தீ’’தி இமமத்த²ம் தி³ஸ்வா சாரிகம் பக்கந்தோ. தேன வுத்தம் – ‘‘மல்லேஸு சாரிகம் சரமானோ’’தி.

உப்³ப⁴தகனவஸந்தா⁴கா³ரவண்ணனா

297. உப்³ப⁴தகந்தி தஸ்ஸ நாமம், உச்சத்தா வா ஏவம் வுத்தம். ஸந்தா⁴கா³ரந்தி நக³ரமஜ்ஜே² ஸந்தா⁴கா³ரஸாலா. ஸமணேன வாதி ஏத்த² யஸ்மா க⁴ரவத்து²பரிக்³க³ஹகாலேயேவ தே³வதா அத்தனோ வஸனட்டா²னம் க³ண்ஹந்தி. தஸ்மா தே³வேன வாதி அவத்வா ‘‘ஸமணேன வா ப்³ராஹ்மணேன வா கேனசி வா மனுஸ்ஸபூ⁴தேனா’’தி வுத்தம். யேன ப⁴க³வா தேனுபஸங்கமிம்ஸூதி ப⁴க³வதோ ஆக³மனம் ஸுத்வா ‘‘அம்ஹேஹி க³ந்த்வாபி ந ப⁴க³வா ஆனீதோ, தூ³தம் பேஸேத்வாபி ந பக்கோஸாபிதோ, ஸயமேவ பன மஹாபி⁴க்கு²ஸங்க⁴பரிவாரோ அம்ஹாகம் வஸனட்டா²னம் ஸம்பத்தோ, அம்ஹேஹி ச ஸந்தா⁴கா³ரஸாலா காரிதா, ஏத்த² மயம் த³ஸப³லம் ஆனேத்வா மங்க³லம் ப⁴ணாபேஸ்ஸாமா’’தி சிந்தேத்வா உபஸங்கமிம்ஸு.

298. யேன ஸந்தா⁴கா³ரம் தேனுபஸங்கமிம்ஸூதி தம் தி³வஸம் கிர ஸந்தா⁴கா³ரே சித்தகம்மம் நிட்ட²பேத்வா அட்டகா முத்தமத்தா ஹோந்தி, பு³த்³தா⁴ ச நாம அரஞ்ஞஜ்ஜா²ஸயா அரஞ்ஞாராமா, அந்தோகா³மே வஸேய்யும் வா நோ வா. தஸ்மா ப⁴க³வதோ மனம் ஜானித்வாவ படிஜக்³கி³ஸ்ஸாமாதி சிந்தேத்வா தே ப⁴க³வந்தம் உபஸங்கமிம்ஸு. இதா³னி பன மனம் லபி⁴த்வா படிஜக்³கி³துகாமா யேன ஸந்தா⁴கா³ரம் தேனுபஸங்கமிம்ஸு. ஸப்³ப³ஸந்த²ரிந்தி யதா² ஸப்³ப³ம் ஸந்த²தம் ஹோதி, ஏவம். யேன ப⁴க³வா தேனுபஸங்கமிம்ஸூதி ஏத்த² பன தே மல்லராஜானோ ஸந்தா⁴கா³ரம் படிஜக்³கி³த்வா நக³ரவீதி²யோபி ஸம்மஜ்ஜாபேத்வா த⁴ஜே உஸ்ஸாபேத்வா கே³ஹத்³வாரேஸு புண்ணக⁴டே ச கத³லியோ ச ட²பாபேத்வா ஸகலனக³ரம் தீ³பமாலாதீ³ஹி விப்பகிண்ணதாரகம் விய கத்வா கீ²ரபாயகே தா³ரகே கீ²ரம் பாய்யேத², த³ஹரே குமாரே லஹும் லஹும் போ⁴ஜாபேத்வா ஸயாபேத², உச்சாஸத்³த³ம் மா கரித்த², அஜ்ஜ ஏகரத்திம் ஸத்தா² அந்தோகா³மே வஸிஸ்ஸதி, பு³த்³தா⁴ நாம அப்பஸத்³த³காமா ஹோந்தீதி பே⁴ரிம் சராபேத்வா ஸயம் த³ண்ட³தீ³பிகம் ஆதா³ய யேன ப⁴க³வா தேனுபஸங்கமிம்ஸு.

299. ப⁴க³வந்தம்யேவ புரக்க²த்வாதி ப⁴க³வந்தம் புரதோ கத்வா. தத்த² ப⁴க³வா பி⁴க்கூ²னஞ்சேவ உபாஸகானஞ்ச மஜ்ஜே² நிஸின்னோ அதிவிய விரோசதி, ஸமந்தபாஸாதி³கோ ஸுவண்ணவண்ணோ அபி⁴ரூபோ த³ஸ்ஸனீயோ. புரிமகாயதோ ஸுவண்ணவண்ணா ரஸ்மி உட்ட²ஹித்வா அஸீதிஹத்த²ம் டா²னம் க³ண்ஹாதி. பச்சி²மகாயதோ. த³க்கி²ணஹத்த²தோ. வாமஹத்த²தோ ஸுவண்ணவண்ணா ரஸ்மி உட்ட²ஹித்வா அஸீதிஹத்த²ம் டா²னம் க³ண்ஹாதி. உபரி கேஸந்ததோ பட்டா²ய ஸப்³ப³கேஸாவட்டேஹி மோரகீ³வவண்ணா ரஸ்மி உட்ட²ஹித்வா க³க³னதலே அஸீதிஹத்த²ம் டா²னம் க³ண்ஹாதி. ஹேட்டா² பாத³தலேஹி பவாளவண்ணா ரஸ்மி உட்ட²ஹித்வா க⁴னபத²வியம் அஸீதிஹத்த²ம் டா²னம் க³ண்ஹாதி. ஏவம் ஸமந்தா அஸீதி ஹத்த²மத்தம் டா²னம் ச²ப்³ப³ண்ணா பு³த்³த⁴ரஸ்மியோ விஜ்ஜோதமானா விப்ப²ந்த³மானா விதா⁴வந்தி. ஸப்³பே³ தி³ஸாபா⁴கா³ ஸுவண்ணசம்பகபுப்பே²ஹி விகிரியமானா விய ஸுவண்ணக⁴டதோ நிக்க²ந்தஸுவண்ணரஸதா⁴ராஹி ஸிஞ்சமானா விய பஸாரிதஸுவண்ணபடபரிக்கி²த்தா விய வேரம்ப⁴வாதஸமுட்டி²தகிம்ஸுககணிகாரபுப்ப²சுண்ணஸமாகிண்ணா விய ச விப்பகாஸந்தி.

ப⁴க³வதோபி அஸீதிஅனுப்³யஞ்ஜனப்³யாமப்பபா⁴த்³வத்திம்ஸவரலக்க²ணஸமுஜ்ஜலம் ஸரீரம் ஸமுக்³க³ததாரகம் விய க³க³னதலம், விகஸிதமிவ பது³மவனம், ஸப்³ப³பாலிபு²ல்லோ விய யோஜனஸதிகோ பாரிச்ச²த்தகோ படிபாடியா ட²பிதானம் த்³வத்திம்ஸசந்தா³னம் த்³வத்திம்ஸஸூரியானம் த்³வத்திம்ஸசக்கவத்திராஜானம் த்³வத்திம்ஸதே³வராஜானம் த்³வத்திம்ஸமஹாப்³ரஹ்மானம் ஸிரியா ஸிரிம் அபி⁴ப⁴வமானம் விய விரோசதி. பரிவாரேத்வா நிஸின்னா பி⁴க்கூ²பி ஸப்³பே³வ அப்பிச்சா² ஸந்துட்டா² பவிவித்தா அஸம்ஸட்டா² ஆரத்³த⁴வீரியா வத்தாரோ வசனக்க²மா சோத³கா பாபக³ரஹினோ ஸீலஸம்பன்னா ஸமாதி⁴ஸம்பன்னா பஞ்ஞாவிமுத்தி விமுத்திஞாணத³ஸ்ஸனஸம்பன்னா. தேஹி பரிவாரிதோ ப⁴க³வா ரத்தகம்ப³லபரிக்கி²த்தோ விய ஸுவண்ணக்க²ந்தோ⁴, ரத்தபது³மவனஸண்ட³மஜ்ஜ²க³தா விய ஸுவண்ணனாவா, பவாளவேதி³காபரிக்கி²த்தோ விய ஸுவண்ணபாஸாதோ³ விரோசித்த².

அஸீதிமஹாதே²ராபி நம் மேக⁴வண்ணம் பம்ஸுகூலம் பாருபித்வா மணிவம்மவம்மிதா விய மஹானாகா³ பரிவாரயிம்ஸு வந்தராகா³ பி⁴ன்னகிலேஸா விஜடிதஜடா சி²ன்னப³ந்த⁴னா குலே வா க³ணே வா அலக்³கா³. இதி ப⁴க³வா ஸயம் வீதராகோ³ வீதராகே³ஹி, வீததோ³ஸோ வீததோ³ஸேஹி, வீதமோஹோ வீதமோஹேஹி, நித்தண்ஹோ நித்தண்ஹேஹி, நிக்கிலேஸோ நிக்கிலேஸேஹி, ஸயம் பு³த்³தோ⁴ ப³ஹுஸ்ஸுதபு³த்³தே⁴ஹி பரிவாரிதோ பத்தபரிவாரிதம் விய கேஸரம், கேஸரபரிவாரிதா விய கண்ணிகா, அட்ட²னாக³ஸஹஸ்ஸபரிவாரிதோ விய ச²த்³த³ந்தோ நாக³ராஜா, நவுதிஹம்ஸஸஹஸ்ஸபரிவாரிதோ விய த⁴தரட்டோ² ஹம்ஸராஜா, ஸேனங்க³பரிவாரிதோ விய சக்கவத்திராஜா, மருக³ணபரிவாரிதோ விய ஸக்கோ தே³வராஜா, ப்³ரஹ்மக³ணபரிவாரிதோ விய ஹாரிதோ மஹாப்³ரஹ்மா, அஸமேன பு³த்³த⁴வேஸேன அபரிமாணேன பு³த்³த⁴விலாஸேன தஸ்ஸம் பரிஸதி நிஸின்னோ பாவேய்யகே மல்லே ப³ஹுதே³வ ரத்திம் த⁴ம்மியா கதா²ய ஸந்த³ஸ்ஸேத்வா உய்யோஜேஸி.

ஏத்த² ச த⁴ம்மிகதா² நாம ஸந்தா⁴கா³ரஅனுமோத³னப்படிஸம்யுத்தா பகிண்ணககதா² வேதி³தப்³பா³. ததா³ ஹி ப⁴க³வா ஆகாஸக³ங்க³ம் ஓதாரேந்தோ விய பத²வோஜம் ஆகட்³ட⁴ந்தோ விய மஹாஜம்பு³ம் மத்த²கே க³ஹேத்வா சாலேந்தோ விய யோஜனியமது⁴க³ண்ட³ம் சக்கயந்தேன பீளேத்வா மது⁴பானம் பாயமானோ விய ச பாவேய்யகானம் மல்லானம் ஹிதஸுகா²வஹம் பகிண்ணககத²ம் கதே²ஸி.

300. துண்ஹீபூ⁴தம் துண்ஹீபூ⁴தந்தி யம் யம் தி³ஸம் அனுவிலோகேதி, தத்த² தத்த² துண்ஹீபூ⁴தமேவ. அனுவிலோகேத்வாதி மம்ஸசக்கு²னா தி³ப்³ப³சக்கு²னாதி த்³வீஹி சக்கூ²ஹி ததோ ததோ விலோகேத்வா. மம்ஸசக்கு²னா ஹி நேஸம் ப³ஹித்³தா⁴ இரியாபத²ம் பரிக்³க³ஹேஸி. தத்த² ஏகபி⁴க்கு²ஸ்ஸாபி நேவ ஹத்த²குக்குச்சம் ந பாத³குக்குச்சம் அஹோஸி, ந கோசி ஸீஸமுக்கி²பி, ந கத²ம் கதே²ஸி, ந நித்³தா³யந்தோ நிஸீதி³. ஸப்³பே³பி தீஹி ஸிக்கா²ஹி ஸிக்கி²தா நிவாதே பதீ³பஸிகா² விய நிச்சலா நிஸீதி³ம்ஸு. இதி நேஸம் இமம் இரியாபத²ம் மம்ஸசக்கு²னா பரிக்³க³ஹேஸி. ஆலோகம் பன வட்³ட⁴யித்வா தி³ப்³ப³சக்கு²னா ஹத³யரூபம் தி³ஸ்வா அப்³ப⁴ந்தரக³தம் ஸீலம் ஓலோகேஸி. ஸோ அனேகஸதானம் பி⁴க்கூ²னம் அந்தோகும்பி⁴யம் ஜலமானம் பதீ³பம் விய அரஹத்துபக³ம் ஸீலம் அத்³த³ஸ. ஆரத்³த⁴விபஸ்ஸகா ஹி தே பி⁴க்கூ². இதி நேஸம் ஸீலம் தி³ஸ்வா ‘‘இமேபி பி⁴க்கூ² மய்ஹம் அனுச்ச²விகா, அஹம்பி இமேஸம் அனுச்ச²விகோ’’தி சக்கு²தலேஸு நிமித்தம் ட²பேத்வா பி⁴க்கு²ஸங்க⁴ம் ஓலோகேத்வா ஆயஸ்மந்தம் ஸாரிபுத்தம் ஆமந்தேஸி ‘‘பிட்டி² மே ஆகி³லாயதீ’’தி. கஸ்மா ஆகி³லாயதி? ப⁴க³வதோ ஹி ச²ப்³ப³ஸ்ஸானி மஹாபதா⁴னம் பத³ஹந்தஸ்ஸ மஹந்தம் காயது³க்க²ம் அஹோஸி. அத²ஸ்ஸ அபரபா⁴கே³ மஹல்லககாலே பிட்டி²வாதோ உப்பஜ்ஜி.

ஸங்கா⁴டிம் பஞ்ஞாபேத்வாதி ஸந்தா⁴கா³ரஸ்ஸ கிர ஏகபஸ்ஸே தே ராஜானோ கப்பியமஞ்சகம் பஞ்ஞபேஸும் ‘‘அப்பேவ நாம ஸத்தா² நிபஜ்ஜேய்யா’’தி. ஸத்தா²பி சதூஹி இரியாபதே²ஹி பரிபு⁴த்தம் இமேஸம் மஹப்ப²லம் ப⁴விஸ்ஸதீதி தத்த² ஸங்கா⁴டிம் பஞ்ஞாபேத்வா நிபஜ்ஜி.

பி⁴ன்னனிக³ண்ட²வத்து²வண்ணனா

301. தஸ்ஸ காலங்கிரியாயாதிஆதீ³ஸு யம் வத்தப்³ப³ம், தம் ஸப்³ப³ம் ஹேட்டா² வுத்தமேவ.

302. ஆமந்தேஸீதி ப⁴ண்ட³னாதி³வூபஸமகரம் ஸ்வாக்²யாதம் த⁴ம்மம் தே³ஸேதுகாமோ ஆமந்தேஸி.

ஏககவண்ணனா

303. தத்தா²தி தஸ்மிம் த⁴ம்மே. ஸங்கா³யிதப்³ப³ந்தி ஸமக்³கே³ஹி கா³யிதப்³ப³ம், ஏகவசனேஹி அவிருத்³த⁴வசனேஹி ப⁴ணிதப்³ப³ம். ந விவதி³தப்³ப³ந்தி அத்தே² வா ப்³யஞ்ஜனே வா விவாதோ³ ந காதப்³போ³. ஏகோ த⁴ம்மோதி ஏககது³கதிகாதி³வஸேன ப³ஹுதா⁴ ஸாமக்³கி³ரஸம் த³ஸ்ஸேதுகாமோ பட²மம் தாவ ‘‘ஏகோ த⁴ம்மோ’’தி ஆஹ. ஸப்³பே³ ஸத்தாதி காமப⁴வாதீ³ஸு ஸஞ்ஞாப⁴வாதீ³ஸு ஏகவோகாரப⁴வாதீ³ஸு ச ஸப்³ப³ப⁴வேஸு ஸப்³பே³ ஸத்தா. ஆஹாரட்டி²திகாதி ஆஹாரதோ டி²தி ஏதேஸந்தி ஆஹாரட்டி²திகா. இதி ஸப்³ப³ஸத்தானம் டி²தி ஹேது ஆஹாரோ நாம ஏகோ த⁴ம்மோ அம்ஹாகம் ஸத்தா²ரா யாதா²வதோ ஞத்வா ஸம்மத³க்கா²தோ ஆவுஸோதி தீ³பேதி.

நனு ச ஏவம் ஸந்தே யம் வுத்தம் ‘‘அஸஞ்ஞஸத்தா தே³வா அஹேதுகா அனாஹாரா அப²ஸ்ஸகா’’திஆதி³, (விப⁴. 1017) தம் வசனம் விருஜ்ஜ²தீதி, ந விருஜ்ஜ²தி. தேஸஞ்ஹி ஜா²னம் ஆஹாரோ ஹோதி. ஏவம் ஸந்தேபி ‘‘சத்தாரோமே, பி⁴க்க²வே, ஆஹாரா பூ⁴தானம் வா ஸத்தானம் டி²தியா ஸம்ப⁴வேஸீனம் வா அனுக்³க³ஹாய. கதமே சத்தாரோ? கப³ளீகாரோ ஆஹாரோ ஓளாரிகோ வா ஸுகு²மோ வா, ப²ஸ்ஸோ து³தியோ, மனோஸஞ்சேதனா ததியா, விஞ்ஞாணம் சதுத்த²’’ந்தி (ஸம். நி. 2.11) இத³ம்பி விருஜ்ஜ²தீதி, இத³ம்பி ந விருஜ்ஜ²தி. ஏதஸ்மிஞ்ஹி ஸுத்தே நிப்பரியாயேன ஆஹாரலக்க²ணாவ த⁴ம்மா ஆஹாராதி வுத்தா. இத⁴ பன பரியாயேன பச்சயோ ஆஹாரோதி வுத்தோ. ஸப்³ப³த⁴ம்மானஞ்ஹி பச்சயோ லத்³து⁴ம் வட்டதி. ஸோ ச யம் யம் ப²லம் ஜனேதி, தம் தம் ஆஹரதி நாம, தஸ்மா ஆஹாரோதி வுச்சதி. தேனேவாஹ ‘‘அவிஜ்ஜம்பாஹம், பி⁴க்க²வே, ஸாஹாரம் வதா³மி, நோ அனாஹாரம். கோ ச, பி⁴க்க²வே, அவிஜ்ஜாய ஆஹாரோ? பஞ்சனீவரணாதிஸ்ஸ வசனீயம். பஞ்சனீவரணேபாஹம், பி⁴க்க²வே, ஸாஹாரே வதா³மி, நோ அனாஹாரே. கோ ச, பி⁴க்க²வே, பஞ்சன்னம் நீவரணானம் ஆஹாரோ? அயோனிஸோமனஸிகாரோதிஸ்ஸ வசனீய’’ந்தி (அ. நி. 10.61). அயம் இத⁴ அதி⁴ப்பேதோ.

ஏதஸ்மிஞ்ஹி பச்சயாஹாரே க³ஹிதே பரியாயாஹாரோபி நிப்பரியாயாஹாரோபி ஸப்³போ³ க³ஹிதோவ ஹோதி. தத்த² அஸஞ்ஞப⁴வே பச்சயாஹாரோ லப்³ப⁴தி. அனுப்பன்னே ஹி பு³த்³தே⁴ தித்தா²யதனே பப்³ப³ஜிதா வாயோகஸிணே பரிகம்மம் கத்வா சதுத்த²ஜ்ஜா²னம் நிப்³ப³த்தேத்வா ததோ வுட்டா²ய தீ⁴ சித்தம், தி⁴ப்³ப³தேதம் சித்தம் சித்தஸ்ஸ நாம அபா⁴வோயேவ ஸாது⁴, சித்தஞ்ஹி நிஸ்ஸாயேவ வத⁴ப³ந்தா⁴தி³பச்சயம் து³க்க²ம் உப்பஜ்ஜதி. சித்தே அஸதி நத்தே²தந்தி க²ந்திம் ருசிம் உப்பாதே³த்வா அபரிஹீனஜ்ஜா²னா காலங்கத்வா அஸஞ்ஞப⁴வே நிப்³ப³த்தந்தி. யோ யஸ்ஸ இரியாபதோ² மனுஸ்ஸலோகே பணிஹிதோ அஹோஸி, ஸோ தேன இரியாபதே²ன நிப்³ப³த்தித்வா பஞ்ச கப்பஸதானி டி²தோ வா நிஸின்னோ வா நிபன்னோ வா ஹோதி. ஏவரூபானம்பி ஸத்தானம் பச்சயாஹாரோ லப்³ப⁴தி. தே ஹி யம் ஜா²னம் பா⁴வேத்வா நிப்³ப³த்தா, ததே³வ நேஸம் பச்சயோ ஹோதி. யதா² ஜியாவேகே³ன கி²த்தஸரோ யாவ ஜியாவேகோ³ அத்தி², தாவ க³ச்ச²தி, ஏவம் யாவ ஜா²னபச்சயோ அத்தி², தாவ திட்ட²ந்தி. தஸ்மிம் நிட்டி²தே கீ²ணவேகோ³ ஸரோ விய பதந்தி. யே பன தே நேரயிகா நேவ உட்டா²னப²லூபஜீவீ ந புஞ்ஞப²லூபஜீவீதி வுத்தா, தேஸம் கோ ஆஹாரோதி? தேஸம் கம்மமேவ ஆஹாரோ. கிம் பஞ்ச ஆஹாரா அத்தீ²தி சே. பஞ்ச, ந பஞ்சாதி இத³ம் ந வத்தப்³ப³ம். நனு பச்சயோ ஆஹாரோதி வுத்தமேதம். தஸ்மா யேன கம்மேன தே நிரயே நிப்³ப³த்தா, ததே³வ தேஸம் டி²திபச்சயத்தா ஆஹாரோ ஹோதி. யம் ஸந்தா⁴ய இத³ம் வுத்தம் ‘‘ந ச தாவ காலங்கரோதி, யாவ ந தம் பாபகம்மம் ப்³யந்தீ ஹோதீ’’தி (ம. நி. 3.250).

கப³ளீகாரம் ஆஹாரம் ஆரப்³ப⁴ சேத்த² விவாதோ³ ந காதப்³போ³. முகே² உப்பன்னோ கே²ளோபி ஹி தேஸம் ஆஹாரகிச்சம் ஸாதே⁴தி. கே²ளோபி ஹி நிரயே து³க்க²வேத³னியோ ஹுத்வா பச்சயோ ஹோதி, ஸக்³கே³ ஸுக²வேத³னியோ. இதி காமப⁴வே நிப்பரியாயேன சத்தாரோ ஆஹாரா. ரூபாரூபப⁴வேஸு ட²பேத்வா அஸஞ்ஞம் ஸேஸானம் தயோ. அஸஞ்ஞானஞ்சேவ அவஸேஸானஞ்ச பச்சயாஹாரோதி இமினா ஆஹாரேன ‘‘ஸப்³பே³ ஸத்தா ஆஹாரட்டி²திகா’’தி ஏதம் பஞ்ஹம் கதே²த்வா ‘‘அயம் கோ² ஆவுஸோ’’தி ஏவம் நிய்யாதனம்பி ‘‘அத்தி² கோ² ஆவுஸோ’’தி புன உத்³த⁴ரணம்பி அகத்வா ‘‘ஸப்³பே³ ஸத்தா ஸங்கா²ரட்டி²திகா’’தி து³தியபஞ்ஹம் விஸ்ஸஜ்ஜேஸி.

கஸ்மா பன ந நிய்யாதேஸி ந உத்³த⁴ரித்த²? தத்த² தத்த² நிய்யாதியமானேபி உத்³த⁴ரியமானேபி பரியாபுணிதும் வாசேதும் து³க்க²ம் ஹோதி, தஸ்மா த்³வே ஏகாப³த்³தே⁴ கத்வா விஸ்ஸஜ்ஜேஸி. இமஸ்மிம்பி விஸ்ஸஜ்ஜனே ஹேட்டா² வுத்தபச்சயோவ அத்தனோ ப²லஸ்ஸ ஸங்க²ரணதோ ஸங்கா²ரோதி வுத்தோ. இதி ஹேட்டா² ஆஹாரபச்சயோ கதி²தோ, இத⁴ ஸங்கா²ரபச்சயோதி அயமேத்த² ஹேட்டி²மதோ விஸேஸோ. ‘‘ஹேட்டா² நிப்பரியாயாஹாரோ க³ஹிதோ, இத⁴ பரியாயாஹாரோதி ஏவம் க³ஹிதே விஸேஸோ பாகடோ ப⁴வேய்ய, நோ ச க³ண்ஹிம்ஸூ’தி மஹாஸீவத்தே²ரோ ஆஹ. இந்த்³ரியப³த்³த⁴ஸ்ஸபி ஹி அனிந்த்³ரியப³த்³த⁴ஸ்ஸபி பச்சயோ லத்³து⁴ம் வட்டதி. வினா பச்சயேன த⁴ம்மோ நாம நத்தி². தத்த² அனிந்த்³ரியப³த்³த⁴ஸ்ஸ திணருக்க²லதாதி³னோ பத²வீரஸோ ஆபோரஸோ ச பச்சயோ ஹோதி. தே³வே அவஸ்ஸந்தே ஹி திணாதீ³னி மிலாயந்தி, வஸ்ஸந்தே ச பன ஹரிதானி ஹோந்தி. இதி தேஸம் பத²வீரஸோ ஆபோரஸோ ச பச்சயோ ஹோதி. இந்த்³ரியப³த்³த⁴ஸ்ஸ அவிஜ்ஜா தண்ஹா கம்மம் ஆஹாரோதி ஏவமாத³யோ பச்சயா, இதி ஹேட்டா² பச்சயோயேவ ஆஹாரோதி கதி²தோ, இத⁴ ஸங்கா²ரோதி. அயமேவேத்த² விஸேஸோ.

அயம் கோ², ஆவுஸோதி ஆவுஸோ அம்ஹாகம் ஸத்தா²ரா மஹாபோ³தி⁴மண்டே³ நிஸீதி³த்வா ஸயம் ஸப்³ப³ஞ்ஞுதஞ்ஞாணேன ஸச்சி²கத்வா அயம் ஏகத⁴ம்மோ தே³ஸிதோ. தத்த² ஏகத⁴ம்மே தும்ஹேஹி ஸப்³பே³ஹேவ ஸங்கா³யிதப்³ப³ம் ந விவதி³தப்³ப³ம். யத²யித³ம் ப்³ரஹ்மசரியந்தி யதா² ஸங்கா³யமானானம் தும்ஹாகம் இத³ம் ஸாஸனப்³ரஹ்மசரியம் அத்³த⁴னியம் அஸ்ஸ. ஏகேன ஹி பி⁴க்கு²னா ‘‘அத்தி², கோ² ஆவுஸோ, ஏகோ த⁴ம்மோ ஸம்மத³க்கா²தோ. கதமோ ஏகோ த⁴ம்மோ? ஸப்³பே³ ஸத்தா ஆஹாரட்டி²திகா. ஸப்³பே³ ஸத்தா ஸங்கா²ரட்டி²திகா’’தி கதி²தே தஸ்ஸ கத²ம் ஸுத்வா அஞ்ஞோ கதே²ஸ்ஸதி. தஸ்ஸபி அஞ்ஞோதி ஏவம் பரம்பரகதா²னியமேன இத³ம் ப்³ரஹ்மசரியம் சிரம் திட்ட²மானம் ஸதே³வகஸ்ஸ லோகஸ்ஸ அத்தா²ய ஹிதாய ப⁴விஸ்ஸதீதி ஏககவஸேன த⁴ம்மஸேனாபதி ஸாரிபுத்தத்தே²ரோ ஸாமக்³கி³ரஸம் த³ஸ்ஸேஸீதி.

ஏககவண்ணனா நிட்டி²தா.

து³கவண்ணனா

304. இதி ஏககவஸேன ஸாமக்³கி³ரஸம் த³ஸ்ஸேத்வா இதா³னி து³கவஸேன த³ஸ்ஸேதும் புன தே³ஸனம் ஆரபி⁴. தத்த² நாமரூபது³கே நாமந்தி சத்தாரோ அரூபினோ க²ந்தா⁴ நிப்³பா³னஞ்ச. தத்த² சத்தாரோ க²ந்தா⁴ நாமனட்டே²ன நாமம். நாமனட்டே²னாதி நாமகரணட்டே²ன. யதா² ஹி மஹாஜனஸம்மதத்தா மஹாஸம்மதஸ்ஸ ‘‘மஹாஸம்மதோ’’தி நாமம் அஹோஸி, யதா² மாதாபிதரோ ‘‘அயம் திஸ்ஸோ நாம ஹோது, பு²ஸ்ஸோ நாம ஹோதூ’’தி ஏவம் புத்தஸ்ஸ கித்திமனாமம் கரோந்தி, யதா² வா ‘‘த⁴ம்மகதி²கோ வினயத⁴ரோ’’தி கு³ணதோ நாமம் ஆக³ச்ச²தி, ந ஏவம் வேத³னாதீ³னம். வேத³னாத³யோ ஹி மஹாபத²வீஆத³யோ விய அத்தனோ நாமம் கரோந்தாவ உப்பஜ்ஜந்தி. தேஸு உப்பன்னேஸு தேஸம் நாமம் உப்பன்னமேவ ஹோதி. ந ஹி வேத³னம் உப்பன்னம் ‘‘த்வம் வேத³னா நாம ஹோஹீ’’தி, கோசி ப⁴ணதி, ந சஸ்ஸா யேன கேனசி காரணேன நாமக்³க³ஹணகிச்சம் அத்தி², யதா² பத²வியா உப்பன்னாய ‘‘த்வம் பத²வீ நாம ஹோஹீ’’தி நாமக்³க³ஹணகிச்சம் நத்தி², சக்கவாளஸினேரும்ஹி சந்தி³மஸூரியனக்க²த்தேஸு உப்பன்னேஸு ‘‘த்வம் சக்கவாளம் நாம, த்வம் நக்க²த்தம் நாம ஹோஹீ’’தி நாமக்³க³ஹணகிச்சம் நத்தி², நாமம் உப்பன்னமேவ ஹோதி, ஓபபாதிகா பஞ்ஞத்தி நிபததி, ஏவம் வேத³னாய உப்பன்னாய ‘‘த்வம் வேத³னா நாம ஹோஹீ’’தி நாமக்³க³ஹணகிச்சம் நத்தி², தாய உப்பன்னாய வேத³னாதி நாமம் உப்பன்னமேவ ஹோதி. ஸஞ்ஞாதீ³ஸுபி ஏஸேவ நயோ அதீதேபி ஹி வேத³னா வேத³னாயேவ. ஸஞ்ஞா. ஸங்கா²ரா. விஞ்ஞாணம் விஞ்ஞாணமேவ. அனாக³தேபி. பச்சுப்பன்னேபி. நிப்³பா³னம் பன ஸதா³பி நிப்³பா³னமேவாதி. நாமனட்டே²ன நாமம். நமனட்டே²னாபி சேத்த² சத்தாரோ க²ந்தா⁴ நாமம். தே ஹி ஆரம்மணாபி⁴முக²ம் நமந்தி. நாமனட்டே²ன ஸப்³ப³ம்பி நாமம். சத்தாரோ ஹி க²ந்தா⁴ ஆரம்மணே அஞ்ஞமஞ்ஞம் நாமேந்தி, நிப்³பா³னம் ஆரம்மணாதி⁴பதிபச்சயதாய அத்தனி அனவஜ்ஜத⁴ம்மே நாமேதி.

ரூபந்தி சத்தாரோ ச மஹாபூ⁴தா சதுன்னஞ்ச மஹாபூ⁴தானம் உபாதா³ய ரூபம், தம் ஸப்³ப³ம்பி ருப்பனட்டே²ன ரூபம். தஸ்ஸ வித்தா²ரகதா² விஸுத்³தி⁴மக்³கே³ வுத்தனயேனேவ வேதி³தப்³பா³.

அவிஜ்ஜாதி து³க்கா²தீ³ஸு அஞ்ஞாணம். அயம்பி வித்தா²ரதோ விஸுத்³தி⁴மக்³கே³ கதி²தாயேவ. ப⁴வதண்ஹாதி ப⁴வபத்த²னா. யதா²ஹ ‘‘தத்த² கதமா ப⁴வதண்ஹா? யோ ப⁴வேஸு ப⁴வச்ச²ந்தோ³’’திஆதி³ (த⁴. ஸ. 1319).

ப⁴வதி³ட்டீ²தி ப⁴வோ வுச்சதி ஸஸ்ஸதம், ஸஸ்ஸதவஸேன உப்பஜ்ஜனகதி³ட்டி². ஸா ‘‘தத்த² கதமா ப⁴வதி³ட்டி²? ‘ப⁴விஸ்ஸதி அத்தா ச லோகோ சா’தி யா ஏவரூபா தி³ட்டி² தி³ட்டி²க³த’’ந்திஆதி³னா (த⁴. ஸ. 1320) நயேன அபி⁴த⁴ம்மே வித்தா²ரிதா. விப⁴வதி³ட்டீ²தி விப⁴வோ வுச்சதி உச்சே²த³ம், உச்சே²த³வஸேன உப்பஜ்ஜனகதி³ட்டி². ஸாபி ‘‘தத்த² கதமா விப⁴வதி³ட்டி²? ‘ந ப⁴விஸ்ஸதி அத்தா ச லோகோ சா’தி (த⁴. ஸ. 285). யா ஏவரூபா தி³ட்டி² தி³ட்டி²க³த’’ந்திஆதி³னா (த⁴. ஸ. 1321) நயேன தத்தே²வ வித்தா²ரிதா.

அஹிரிகந்தி ‘‘யம் ந ஹிரீயதி ஹிரீயிதப்³பே³னா’’தி (த⁴. ஸ. 1328) ஏவம் வித்தா²ரிதா நில்லஜ்ஜதா. அனோத்தப்பந்தி ‘‘யம் ந ஓத்தப்பதி ஓத்தப்பிதப்³பே³னா’’தி (த⁴. ஸ. 1329) ஏவம் வித்தா²ரிதோ அபா⁴யனகஆகாரோ.

ஹிரீ ச ஓத்தப்பஞ்சாதி ‘‘யம் ஹிரீயதி ஹிரீயிதப்³பே³ன, ஓத்தப்பதி ஓத்தப்பிதப்³பே³னா’’தி (த⁴. ஸ. 1330-31) ஏவம் வித்தா²ரிதானி ஹிரிஓத்தப்பானி. அபி சேத்த² அஜ்ஜ²த்தஸமுட்டா²னா ஹிரீ, ப³ஹித்³தா⁴ஸமுட்டா²னம் ஓத்தப்பம். அத்தாதி⁴பதேய்யா ஹிரீ, லோகாதி⁴பதேய்யம் ஓத்தப்பம். லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தம் ஓத்தப்பம். வித்தா²ரகதா² பனேத்த² ஸப்³பா³காரேன விஸுத்³தி⁴மக்³கே³ வுத்தா.

தோ³வசஸ்ஸதாதி து³க்க²ம் வசோ ஏதஸ்மிம் விப்படிகூலகா³ஹிம்ஹி விபச்சனீகஸாதே அனாத³ரே புக்³க³லேதி து³ப்³ப³சோ, தஸ்ஸ கம்மம் தோ³வசஸ்ஸம், தஸ்ஸ பா⁴வோ தோ³வசஸ்ஸதா. வித்தா²ரதோ பனேஸா ‘‘தத்த² கதமா தோ³வசஸ்ஸதா? ஸஹத⁴ம்மிகே வுச்சமானே தோ³வசஸ்ஸாய’’ந்தி (த⁴. ஸ. 1332) அபி⁴த⁴ம்மே ஆக³தா. ஸா அத்த²தோ ஸங்கா²ரக்க²ந்தோ⁴ ஹோதி. ‘‘சதுன்னஞ்ச க²ந்தா⁴னம் ஏதேனாகாரேன பவத்தானம் ஏதம் அதி⁴வசன’’ந்தி வத³ந்தி. பாபமித்ததாதி பாபா அஸ்ஸத்³தா⁴த³யோ புக்³க³லா ஏதஸ்ஸ மித்தாதி பாபமித்தோ, தஸ்ஸ பா⁴வோ பாபமித்ததா. வித்தா²ரதோ பனேஸா – ‘‘தத்த² கதமா பாபமித்ததா? யே தே புக்³க³லா அஸ்ஸத்³தா⁴ து³ஸ்ஸீலா அப்பஸ்ஸுதா மச்ச²ரினோ து³ப்பஞ்ஞா. யா தேஸம் ஸேவனா நிஸேவனா ஸம்ஸேவனா ப⁴ஜனா ஸம்ப⁴ஜனா ப⁴த்தி ஸம்ப⁴த்தி தம்ஸம்பவங்கதா’’தி (த⁴. ஸ. 1333) ஏவம் ஆக³தா. ஸாபி அத்த²தோ தோ³வசஸ்ஸதா விய த³ட்ட²ப்³பா³.

ஸோவசஸ்ஸதா ச கல்யாணமித்ததா ச வுத்தப்படிபக்க²னயேன வேதி³தப்³பா³. உபோ⁴பி பனேதா இத⁴ லோகியலோகுத்தரமிஸ்ஸகா கதி²தா.

ஆபத்திகுஸலதாதி ‘‘பஞ்சபி ஆபத்திக்க²ந்தா⁴ ஆபத்தியோ, ஸத்தபி ஆபத்திக்க²ந்தா⁴ ஆபத்தியோ. யா தாஸம் ஆபத்தீனம் ஆபத்திகுஸலதா பஞ்ஞா பஜானனா’’தி (த⁴. ஸ. 1336) ஏவம் வுத்தோ ஆபத்திகுஸலபா⁴வோ.

ஆபத்திவுட்டா²னகுஸலதாதி ‘‘யா தாஹி ஆபத்தீஹி வுட்டா²னகுஸலதா பஞ்ஞா பஜானனா’’தி (த⁴. ஸ. 1337) ஏவம் வுத்தா ஸஹ கம்மவாசாய ஆபத்தீஹி வுட்டா²னபரிச்சே²த³ஜானனா பஞ்ஞா.

ஸமாபத்திகுஸலதாதி ‘‘அத்தி² ஸவிதக்கஸவிசாரா ஸமாபத்தி, அத்தி² அவிதக்கவிசாரமத்தா ஸமாபத்தி, அத்தி² அவிதக்கஅவிசாரா ஸமாபத்தி. யா தாஸம் ஸமாபத்தீனம் குஸலதா பஞ்ஞா பஜானனா’’தி (த⁴. ஸ. 1338) ஏவம் வுத்தா ஸஹ பரிகம்மேன அப்பனாபரிச்சே²த³ஜானனா பஞ்ஞா. ஸமாபத்திவுட்டா²னகுஸலதாதி ‘‘யா தாஹி ஸமாபத்தீஹி வுட்டா²னகுஸலதா பஞ்ஞா பஜானனா’’தி (த⁴. ஸ. 1339) ஏவம் வுத்தா யதா²பரிச்சி²ன்னஸமயவஸேனேவ ஸமாபத்திதோ வுட்டா²னஸமத்தா² ‘‘ஏத்தகம் க³தே ஸூரியே உட்ட²ஹிஸ்ஸாமீ’’தி வுட்டா²னகாலபரிச்சே²த³கா பஞ்ஞா.

தா⁴துகுஸலதாதி ‘‘அட்டா²ரஸ தா⁴துயோ சக்கு²தா⁴து…பே… மனோவிஞ்ஞாணதா⁴து. யா தாஸம் தா⁴தூனம் குஸலதா பஞ்ஞா பஜானனா’’தி (த⁴. ஸ. 1340) ஏவம் வுத்தா அட்டா²ரஸன்னம் தா⁴தூனம் ஸபா⁴வபரிச்சே²த³கா ஸவனதா⁴ரணஸம்மஸனபடிவேத⁴பஞ்ஞா. மனஸிகாரகுஸலதாதி ‘‘யா தாஸம் தா⁴தூனம் மனஸிகாரகுஸலதா பஞ்ஞா பஜானனா’’தி (த⁴. ஸ. 1341) ஏவம் வுத்தா தாஸம்யேவ தா⁴தூனம் ஸம்மஸனபடிவேத⁴பச்சவேக்க²ணபஞ்ஞா.

ஆயதனகுஸலதாதி ‘‘த்³வாத³ஸாயதனானி சக்கா²யதனம்…பே… த⁴ம்மாயதனம். யா தேஸம் ஆயதனானம் ஆயதனகுஸலதா பஞ்ஞா பஜானனா’’தி (த⁴. ஸ. 1342) ஏவம் வுத்தா த்³வாத³ஸன்னம் ஆயதனானம் உக்³க³ஹமனஸிகாரபஜானனா பஞ்ஞா. அபிச தா⁴துகுஸலதாபி உக்³க³ஹமனஸிகாரஸவனஸம்மஸனபடிவேத⁴பச்சவேக்க²ணேஸு வத்ததி மனஸிகாரகுஸலதாபி ஆயதனகுஸலதாபி. அயம் பனேத்த² விஸேஸோ, ஸவனஉக்³க³ஹபச்சவேக்க²ணா லோகியா, படிவேதோ⁴ லோகுத்தரோ, ஸம்மஸனமனஸிகாரா லோகியலோகுத்தரமிஸ்ஸகா. படிச்சஸமுப்பாத³குஸலதாதி ‘‘அவிஜ்ஜாபச்சயா ஸங்கா²ரா…பே… ஸமுத³யோ ஹோதீதி யா தத்த² பஞ்ஞா பஜானனா’’தி (த⁴. ஸ. 1343) ஏவம் வுத்தா த்³வாத³ஸன்னம் பச்சயாகாரானம் உக்³க³ஹாதி³வஸேன பவத்தா பஞ்ஞா.

டா²னகுஸலதாதி ‘‘யே யே த⁴ம்மா யேஸம் யேஸம் த⁴ம்மானம் ஹேதுபச்சயா உப்பாதா³ய தம் தம் டா²னந்தி யா தத்த² பஞ்ஞா பஜானனா’’தி (த⁴. ஸ. 1344) ஏவம் வுத்தா ‘‘சக்கு²ம் வத்து²ம் கத்வா ரூபம் ஆரம்மணம் கத்வா உப்பன்னஸ்ஸ சக்கு²விஞ்ஞாணஸ்ஸ சக்கு²ரூபம் (த⁴. ஸ. அட்ட². 1344) டா²னஞ்சேவ காரணஞ்சா’’தி ஏவம் டா²னபரிச்சி²ந்த³னஸமத்தா² பஞ்ஞா. அட்டா²னகுஸலதாதி ‘‘யே யே த⁴ம்மா யேஸம் யேஸம் த⁴ம்மானம் ந ஹேதூ ந பச்சயா உப்பாதா³ய தம் தம் அட்டா²னந்தி யா தத்த² பஞ்ஞா பஜானனா’’தி (த⁴. ஸ. 1345) ஏவம் வுத்தா ‘‘சக்கு²ம் வத்து²ம் கத்வா ரூபம் ஆரம்மணம் கத்வா ஸோதவிஞ்ஞாணாதீ³னி நுப்பஜ்ஜந்தி, தஸ்மா தேஸம் சக்கு²ரூபம் ந டா²னம் ந காரண’’ந்தி ஏவம் அட்டா²னபரிச்சி²ந்த³னஸமத்தா² பஞ்ஞா அபிச ஏதஸ்மிம் து³கே ‘‘கித்தாவதா பன, ப⁴ந்தே, டா²னாடா²னகுஸலோ பி⁴க்கூ²தி அலம் வசனாயாதி. இதா⁴னந்த³, பி⁴க்கு² அட்டா²னமேதம் அனவகாஸோ, யம் தி³ட்டி²ஸம்பன்னோ புக்³க³லோ கஞ்சி ஸங்கா²ரம் நிச்சதோ உபக³ச்சே²ய்ய, நேதம் டா²னம் விஜ்ஜதீதி பஜானாதி. டா²னஞ்ச கோ² ஏதம் விஜ்ஜதி, யம் புது²ஜ்ஜனோ கஞ்சி ஸங்கா²ரம் நிச்சதோ உபக³ச்சே²ய்யா’’தி (ம. நி. 3.127) இமினாபி ஸுத்தேன அத்தோ² வேதி³தப்³போ³.

அஜ்ஜவந்தி கோ³முத்தவங்கதா சந்த³வங்கதா நங்க³லகோடிவங்கதாதி தயோ அனஜ்ஜவா. ஏகச்சோ ஹி பி⁴க்கு² பட²மவயே ஏகவீஸதியா அனேஸனாஸு ச²ஸு ச அகோ³சரேஸு சரதி, மஜ்ஜி²மபச்சி²மவயேஸு லஜ்ஜீ குக்குச்சகோ ஸிக்கா²காமோ ஹோதி, அயம் கோ³முத்தவங்கதா நாம. ஏகோ பட²மவயேபி பச்சி²மவயேபி சதுபாரிஸுத்³தி⁴ஸீலம் பூரேதி, லஜ்ஜீ குக்குச்சகோ ஸிக்கா²காமோ ஹோதி, மஜ்ஜி²மவயே புரிமஸதி³ஸோ, அயம் சந்த³வங்கதா நாம. ஏகோ பட²மவயேபி மஜ்ஜி²மவயேபி சதுபாரிஸுத்³தி⁴ஸீலம் பூரேதி, லஜ்ஜீ குக்குச்சகோ ஸிக்கா²காமோ ஹோதி, பச்சி²மவயே புரிமஸதி³ஸோ அயம் நங்க³லகோடிவங்கதா நாம. ஏகோ ஸப்³ப³மேதம் வங்கதம் பஹாய தீஸுபி வயேஸு பேஸலோ லஜ்ஜீ குக்குச்சகோ ஸிக்கா²காமோ ஹோதி. தஸ்ஸ யோ ஸோ உஜுபா⁴வோ, இத³ம் அஜ்ஜவம் நாம. அபி⁴த⁴ம்மேபி வுத்தம் – ‘‘தத்த² கதமோ அஜ்ஜவோ. யா அஜ்ஜவதா அஜிம்ஹதா அவங்கதா அகுடிலதா, அயம் வுச்சதி அஜ்ஜவோ’’தி (த⁴. ஸ. 1346). லஜ்ஜவந்தி ‘‘தத்த² கதமோ லஜ்ஜவோ? யோ ஹிரீயதி ஹிரீயிதப்³பே³ன ஹிரீயதி பாபகானம் அகுஸலானம் த⁴ம்மானம் ஸமாபத்தியா. அயம் வுச்சதி லஜ்ஜவோ’’தி ஏவம் வுத்தோ லஜ்ஜீபா⁴வோ.

க²ந்தீதி ‘‘தத்த² கதமா க²ந்தி? யா க²ந்தி க²மனதா அதி⁴வாஸனதா அசண்டி³க்கம் அனஸ்ஸுரோபோ அத்தமனதா சித்தஸ்ஸா’’தி (த⁴. ஸ. 1348) ஏவம் வுத்தா அதி⁴வாஸனக²ந்தி. ஸோரச்சந்தி ‘‘தத்த² கதமம் ஸோரச்சம்? யோ காயிகோ அவீதிக்கமோ, வாசஸிகோ அவீதிக்கமோ, காயிகவாசஸிகோ அவீதிக்கமோ. இத³ம் வுச்சதி ஸோரச்சம். ஸப்³போ³பி ஸீலஸம்வரோ ஸோரச்ச’’ந்தி (த⁴. ஸ. 1349) ஏவம் வுத்தோ ஸுரதபா⁴வோ.

ஸாக²ல்யந்தி ‘‘தத்த² கதமம் ஸாக²ல்யம்? யா ஸா வாசா அண்ட³கா கக்கஸா பரகடுகா பராபி⁴ஸஜ்ஜனீ கோத⁴ஸாமந்தா அஸமாதி⁴ஸம்வத்தனிகா, ததா²ரூபிம் வாசம் பஹாய யா ஸா வாசா நேளா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா, ததா²ரூபிம் வாசம் பா⁴ஸிதா ஹோதி. யா தத்த² ஸண்ஹவாசதா ஸகி²லவாசதா அப²ருஸவாசதா. இத³ம் வுச்சதி ஸாக²ல்ய’’ந்தி (த⁴. ஸ. 1350) ஏவம் வுத்தோ ஸம்மோத³கமுது³கபா⁴வோ. படிஸந்தா²ரோதி அயம் லோகஸன்னிவாஸோ ஆமிஸேன த⁴ம்மேன சாதி த்³வீஹி சி²த்³தோ³, தஸ்ஸ தம் சி²த்³த³ம் யதா² ந பஞ்ஞாயதி, ஏவம் பீட²ஸ்ஸ விய பச்சத்த²ரணேன ஆமிஸேன த⁴ம்மேன ச படிஸந்த²ரணம். அபி⁴த⁴ம்மேபி வுத்தம் ‘‘தத்த² கதமோ படிஸந்தா²ரோ? ஆமிஸபடிஸந்தா²ரோ ச த⁴ம்மபடிஸந்தா²ரோ ச. இதே⁴கச்சோ படிஸந்தா²ரகோ ஹோதி ஆமிஸபடிஸந்தா²ரேன வா த⁴ம்மபடிஸந்தா²ரேன வா. அயம் வுச்சதி படிஸந்தா²ரோ’’தி (த⁴. ஸ. 1351). ஏத்த² ச ஆமிஸேன ஸங்க³ஹோ ஆமிஸபடிஸந்தா²ரோ நாம. தம் கரோந்தேன மாதாபிதூனம் பி⁴க்கு²க³திகஸ்ஸ வேய்யாவச்சகரஸ்ஸ ரஞ்ஞோ சோரானஞ்ச அக்³க³ம் அக்³க³ஹேத்வாபி தா³தும் வட்டதி. ஆமஸித்வா தி³ன்னே ஹி ராஜானோ ச சோரா ச அனத்த²ம்பி கரோந்தி ஜீவிதக்க²யம்பி பாபேந்தி, அனாமஸித்வா தி³ன்னே அத்தமனா ஹோந்தி. சோரனாக³வத்து²ஆதீ³னி சேத்த² வத்தூ²னி கதே²தப்³பா³னி. தானி ஸமந்தபாஸாதி³காய வினயட்ட²கதா²யம் (பாசி. அட்ட². 185-7) வித்தா²ரிதானி. ஸக்கச்சம் உத்³தே³ஸதா³னம் பாளிவண்ணனா த⁴ம்மகதா²கத²னந்தி ஏவம் த⁴ம்மேன ஸங்க³ஹோ த⁴ம்மபடிஸந்தா²ரோ நாம.

அவிஹிம்ஸாதி கருணாபி கருணாபுப்³ப³பா⁴கோ³பி. வுத்தம்பி சேதம் – ‘‘தத்த² கதமா அவிஹிம்ஸா? யா ஸத்தேஸு கருணா கருணாயனா கருணாயிதத்தம் கருணாசேதோவிமுத்தி, அயம் வுச்சதி அவிஹிம்ஸா’’தி. ஸோசேய்யந்தி மேத்தாய ச மேத்தாபுப்³ப³பா⁴க³ஸ்ஸ ச வஸேன ஸுசிபா⁴வோ. வுத்தம்பி சேதம் – ‘‘தத்த² கதமம் ஸோசேய்யம்? யா ஸத்தேஸு மேத்தி மேத்தாயனா மேத்தாயிதத்தம் மேத்தாசேதோவிமுத்தி, இத³ம் வுச்சதி ஸோசேய்ய’’ந்தி.

முட்ட²ஸ்ஸச்சந்தி ஸதிவிப்பவாஸோ, யதா²ஹ ‘‘தத்த² கதமம் முட்ட²ஸ்ஸச்சம்? யா அஸதி அனனுஸ்ஸதி அப்படிஸ்ஸதி அஸ்ஸரணதா அதா⁴ரணதா பிலாபனதா ஸம்முஸ்ஸனதா, இத³ம் வுச்சதி முட்ட²ஸ்ஸச்சம்’’ (த⁴. ஸ. 1356). அஸம்பஜஞ்ஞந்தி, ‘‘தத்த² கதமம் அஸம்பஜஞ்ஞம்? யம் அஞ்ஞாணம் அத³ஸ்ஸனம் அவிஜ்ஜாலங்கீ³ மோஹோ அகுஸலமூல’’ந்தி ஏவம் வுத்தா அவிஜ்ஜாயேவ. ஸதி ஸதியேவ. ஸம்பஜஞ்ஞம் ஞாணம்.

இந்த்³ரியேஸு அகு³த்தத்³வாரதாதி ‘‘தத்த² கதமா இந்த்³ரியேஸு அகு³த்தத்³வாரதா? இதே⁴கச்சோ சக்கு²னா ரூபம் தி³ஸ்வா நிமித்தக்³கா³ஹீ ஹோதீ’’திஆதி³னா (த⁴. ஸ. 1352) நயேன வித்தா²ரிதோ இந்த்³ரியஸம்வரபே⁴தோ³. போ⁴ஜனே அமத்தஞ்ஞுதாதி ‘‘தத்த² கதமா போ⁴ஜனே அமத்தஞ்ஞுதா? இதே⁴கச்சோ அப்படிஸங்கா² அயோனிஸோ ஆஹாரம் ஆஹாரேதி த³வாய மதா³ய மண்ட³னாய விபூ⁴ஸனாய. யா தத்த² அஸந்துட்டி²தா அமத்தஞ்ஞுதா அப்படிஸங்கா² போ⁴ஜனே’’தி ஏவம் ஆக³தோ போ⁴ஜனே அமத்தஞ்ஞுபா⁴வோ. அனந்தரது³கோ வுத்தப்படிபக்க²னயேன வேதி³தப்³போ³.

படிஸங்கா²னப³லந்தி ‘‘தத்த² கதமம் படிஸங்கா²னப³லம்? யா பஞ்ஞா பஜானனா’’தி ஏவம் வித்தா²ரிதம் அப்படிஸங்கா²ய அகம்பனஞாணம். பா⁴வனாப³லந்தி பா⁴வேந்தஸ்ஸ உப்பன்னம் ப³லம். அத்த²தோ வீரியஸம்போ³ஜ்ஜ²ங்க³ஸீஸேன ஸத்த போ³ஜ்ஜ²ங்கா³ ஹோந்தி. வுத்தம்பி சேதம் – ‘‘தத்த² கதமம் பா⁴வனாப³லம்? யா குஸலானம் த⁴ம்மானம் ஆஸேவனா பா⁴வனா ப³ஹுலீகம்மம், இத³ம் வுச்சதி பா⁴வனாப³லம். ஸத்தபோ³ஜ்ஜ²ங்கா³ பா⁴வனாப³ல’’ந்தி.

ஸதிப³லந்தி அஸ்ஸதியா அகம்பனவஸேன ஸதியேவ. ஸமாதி⁴ப³லந்தி உத்³த⁴ச்சே அகம்பனவஸேன ஸமாதி⁴யேவ. ஸமதோ² ஸமாதி⁴. விபஸ்ஸனா பஞ்ஞா. ஸமதோ²வ தம் ஆகாரம் க³ஹேத்வா புன பவத்தேதப்³ப³ஸ்ஸ ஸமத²ஸ்ஸ நிமித்தவஸேன ஸமத²னிமித்தம் பக்³கா³ஹனிமித்தேபி ஏஸேவ நயோ. பக்³கா³ஹோ வீரியம். அவிக்கே²போ ஏகக்³க³தா. இமேஹி பன ஸதி ச ஸம்பஜஞ்ஞஞ்ச படிஸங்கா²னப³லஞ்ச பா⁴வனாப³லஞ்ச ஸதிப³லஞ்ச ஸமாதி⁴ப³லஞ்ச ஸமதோ² ச விப்பஸ்ஸனா ச ஸமத²னிமித்தஞ்ச பக்³கா³ஹனிமித்தஞ்ச பக்³கா³ஹோ ச அவிக்கே²போ சாதி ச²ஹி து³கேஹி பரதோ ஸீலதி³ட்டி²ஸம்பதா³து³கேன ச லோகியலோகுத்தரமிஸ்ஸகா த⁴ம்மா கதி²தா.

ஸீலவிபத்தீதி ‘‘தத்த² கதமா ஸீலவிபத்தி? காயிகோ வீதிக்கமோ…பே… ஸப்³ப³ம்பி து³ஸ்ஸீல்யம் ஸீலவிபத்தீ’’தி ஏவம் வுத்தோ ஸீலவினாஸகோ அஸம்வரோ. தி³ட்டி²விபத்தீதி ‘‘தத்த² கதமா தி³ட்டி²விபத்தி? நத்தி² தி³ன்னம் நத்தி² யிட்ட²’’ந்தி ஏவம் ஆக³தா ஸம்மாதி³ட்டி²வினாஸிகா மிச்சா²தி³ட்டி².

ஸீலஸம்பதா³தி ‘‘தத்த² கதமா ஸீலஸம்பதா³? காயிகோ அவீதிக்கமோ’’தி ஏவம் புப்³பே³ வுத்தஸோரச்சமேவ ஸீலஸ்ஸ ஸம்பாத³னதோ பரிபூரணதோ ‘‘ஸீலஸம்பதா³’’தி வுத்தம். ஏத்த² ச ‘‘ஸப்³போ³பி ஸீலஸம்வரோ ஸீலஸம்பதா³’’தி இத³ம் மானஸிகபரியாதா³னத்த²ம் வுத்தம். தி³ட்டி²ஸம்பதா³தி ‘‘தத்த² கதமா தி³ட்டி²ஸம்பதா³? அத்தி² தி³ன்னம் அத்தி² யிட்ட²ம்…பே… ஸச்சி²கத்வா பவேதே³ந்தீதி யா ஏவரூபா பஞ்ஞா பஜானனா’’தி ஏவம் ஆக³தம் தி³ட்டி²பாரிபூரிபூ⁴தம் ஞாணம்.

ஸீலவிஸுத்³தீ⁴தி விஸுத்³தி⁴ம் பாபேதும் ஸமத்த²ம் ஸீலம். அபி⁴த⁴ம்மே பனாயம் ‘‘தத்த² கதமா ஸீலவிஸுத்³தி⁴? காயிகோ அவீதிக்கமோ வாசஸிகோ அவீதிக்கமோ காயிகவாசஸிகோ அவீதிக்கமோ, அயம் வுச்சதி ஸீலவிஸுத்³தீ⁴’’தி ஏவம் விப⁴த்தா. தி³ட்டி²விஸுத்³தீ⁴தி விஸுத்³தி⁴ம் பாபேதும் ஸமத்த²ம் த³ஸ்ஸனம். அபி⁴த⁴ம்மே பனாயம் ‘‘தத்த² கதமா தி³ட்டி²விஸுத்³தி⁴? கம்மஸ்ஸகதஞாணம் ஸச்சானுலோமிகஞாணம் மக்³க³ஸமங்கி³ஸ்ஸஞாணம் ப²லஸமங்கி³ஸ்ஸஞாண’’ந்தி ஏவம் வுத்தா. ஏத்த² ச திவித⁴ம் து³ச்சரிதம் அத்தனா கதம்பி பரேன கதம்பி ஸகம் நாம ந ஹோதி அத்த²ப⁴ஞ்ஜனதோ. ஸுசரிதம் ஸகம் நாம அத்த²ஜனனதோதி ஏவம் ஜானனம் கம்மஸ்ஸகதஞாணம் நாம. தஸ்மிம் ட²த்வா ப³ஹும் வட்டகா³மிகம்மம் ஆயூஹித்வா ஸுக²தோ ஸுகே²னேவ அரஹத்தம் பத்தா க³ணனபத²ம் வீதிவத்தா. விபஸ்ஸனாஞாணம் பன வசீஸச்சஞ்ச அனுலோமேதி, பரமத்த²ஸச்சஞ்ச ந விலோமேதீதி ஸச்சானுலோமிகம் ஞாணந்தி வுத்தம்.

‘‘தி³ட்டி²விஸுத்³தி⁴ கோ² பன யதா²தி³ட்டி²ஸ்ஸ ச பதா⁴ன’’ந்தி ஏத்த² தி³ட்டி²விஸுத்³தீ⁴தி ஞாணத³ஸ்ஸனம் கதி²தம். யதா²தி³ட்டி²ஸ்ஸ ச பதா⁴னந்தி தம்ஸம்பயுத்தமேவ வீரியம். அபி ச புரிமபதே³ன சதுமக்³க³ஞாணம். பச்சி²மபதே³ன தம்ஸம்பயுத்தம் வீரியம். அபி⁴த⁴ம்மே பன ‘‘தி³ட்டி²விஸுத்³தி⁴ கோ² பனாதி யா பஞ்ஞா பஜானனா அமோஹோ த⁴ம்மவிசயோ ஸம்மாதி³ட்டி². யதா²தி³ட்டி²ஸ்ஸ ச பதா⁴னந்தி யோ சேதஸிகோ வீரியாரம்போ⁴ ஸம்மாவாயாமோ’’தி ஏவம் அயம் து³கோ விப⁴த்தோ.

‘‘ஸம்வேகோ³ ச ஸம்வேஜனீயேஸு டா²னேஸூ’’தி ஏத்த² ‘‘ஸம்வேகோ³தி ஜாதிப⁴யம் ஜராப⁴யம் ப்³யாதி⁴ப⁴யம் மரணப⁴ய’’ந்தி ஏவம் ஜாதிஆதீ³னி ப⁴யதோ த³ஸ்ஸனஞாணம். ஸம்வேஜனீயம் டா²னந்தி ஜாதிஜராப்³யாதி⁴மரணம். ஏதானி ஹி சத்தாரி ஜாதி து³க்கா², ஜரா து³க்கா², ப்³யாதி⁴ து³க்கோ², மரணம் து³க்க²ந்தி ஏவம் ஸம்வேகு³ப்பத்திகாரணத்தா ஸம்வேஜனீயம் டா²னந்தி வுத்தானி. ஸம்விக்³க³ஸ்ஸ ச யோனிஸோ பதா⁴னந்தி ஏவம் ஸம்வேக³ஜாதஸ்ஸ உபாயபதா⁴னம். ‘‘இத⁴ பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதீ’’தி ஏவம் ஆக³தவீரியஸ்ஸேதம் அதி⁴வசனம்.

அஸந்துட்டி²தா ச குஸலேஸு த⁴ம்மேஸூதி யா குஸலானம் த⁴ம்மானம் பா⁴வனாய அஸந்துட்ட²ஸ்ஸ பி⁴ய்யோகம்யதா, தாய ஹி ஸமங்கீ³பூ⁴தோ புக்³க³லோ ஸீலம் பூரேத்வா ஜா²னம் உப்பாதே³தி. ஜா²னம் லபி⁴த்வா விபஸ்ஸனம் ஆரப⁴தி. ஆரத்³த⁴விபஸ்ஸகோ அரஹத்தம் அக³ஹேத்வா அந்தரா வோஸானம் நாபஜ்ஜதி. அப்படிவானிதா ச பதா⁴னஸ்மிந்தி ‘‘குஸலானம் த⁴ம்மானம் பா⁴வனாய ஸக்கச்சகிரியதா ஸாதச்சகிரியதா அட்டி²தகிரியதா அனோலீனவுத்திதா அனிக்கி²த்தச²ந்த³தா அனிக்கி²த்தது⁴ரதா ஆஸேவனா பா⁴வனா ப³ஹுலீகம்ம’’ந்தி ஏவம் வுத்தா ரத்திந்தி³வம் ச² கோட்டா²ஸே கத்வா ஜாக³ரியானுயோக³வஸேன ஆரத்³தே⁴ பதா⁴னஸ்மிம் அரஹத்தம் அபத்வா அனிவத்தனதா.

விஜ்ஜாதி திஸ்ஸோ விஜ்ஜா. விமுத்தீதி த்³வே விமுத்தியோ, சித்தஸ்ஸ ச அதி⁴முத்தி, நிப்³பா³னஞ்ச. ஏத்த² ச அட்ட² ஸமாபத்தியோ நீவரணாதீ³ஹி ஸுட்டு² முத்தத்தா அதி⁴முத்தி நாம. நிப்³பா³னம் ஸப்³ப³ஸங்க²ததோ முத்தத்தா விமுத்தீதி வேதி³தப்³ப³ம்.

க²யே ஞாணந்தி கிலேஸக்க²யகரே அரியமக்³கே³ ஞாணம். அனுப்பாதே³ ஞாணந்தி படிஸந்தி⁴வஸேன அனுப்பாத³பூ⁴தே தம்தம்மக்³க³வஜ்ஜ²கிலேஸானம் வா அனுப்பாத³பரியோஸானே உப்பன்னே அரியப²லே ஞாணம். தேனேவாஹ ‘‘க²யே ஞாணந்தி மக்³க³ஸமங்கி³ஸ்ஸ ஞாணம். அனுப்பாதே³ ஞாணந்தி ப²லஸமங்கி³ஸ்ஸ ஞாண’’ந்தி. இமே கோ², ஆவுஸோதிஆதி³ ஏககே வுத்தனயேனேவ யோஜேதப்³ப³ம். இதி பஞ்சதிம்ஸாய து³கானம் வஸேன தே²ரோ ஸாமக்³கி³ரஸம் த³ஸ்ஸேஸீதி.

து³கவண்ணனா நிட்டி²தா.

திகவண்ணனா

305. இதி து³கவஸேன ஸாமக்³கி³ரஸம் த³ஸ்ஸேத்வா இதா³னி திகவஸேன த³ஸ்ஸேதும் புன ஆரபி⁴. தத்த² லுப்³ப⁴தீதி லோபோ⁴. அகுஸலஞ்ச தம் மூலஞ்ச, அகுஸலானம் வா மூலந்தி அகுஸலமூலம். து³ஸ்ஸதீதி தோ³ஸோ. முய்ஹதீதி மோஹோ. தேஸம் படிபக்க²னயேன அலோபா⁴த³யோ வேதி³தப்³பா³.

து³ட்டு² சரிதானி, விரூபானி வா சரிதானீதி து³ச்சரிதானி. காயேன து³ச்சரிதம், காயதோ வா பவத்தம் து³ச்சரிதந்தி காயது³ச்சரிதம். ஸேஸேஸுபி ஏஸேவ நயோ. ஸுட்டு² சரிதானி, ஸுந்த³ரானி வா சரிதானீதி ஸுசரிதானி. த்³வேபி சேதே திகா பண்ணத்தியா வா கம்மபதே²ஹி வா கதே²தப்³பா³. பஞ்ஞத்தியா தாவ காயத்³வாரே பஞ்ஞத்தஸிக்கா²பத³ஸ்ஸ வீதிக்கமோ காயது³ச்சரிதம். அவீதிக்கமோ காயஸுசரிதம். வசீத்³வாரே பஞ்ஞத்தஸிக்கா²பத³ஸ்ஸ வீதிக்கமோ வசீது³ச்சரிதம், அவீதிக்கமோ வசீஸுசரிதம். உப⁴யத்த² பஞ்ஞத்தஸ்ஸ ஸிக்கா²பத³ஸ்ஸ வீதிக்கமோவ மனோது³ச்சரிதம், அவீதிக்கமோ மனோஸுசரிதம். அயம் பண்ணத்திகதா². பாணாதிபாதாத³யோ பன திஸ்ஸோ சேதனா காயத்³வாரேபி வசீத்³வாரேபி உப்பன்னா காயது³ச்சரிதம். சதஸ்ஸோ முஸாவாதா³தி³சேதனா வசீது³ச்சரிதம். அபி⁴ஜ்ஜா² ப்³யாபாதோ³ மிச்சா²தி³ட்டீ²தி தயோ சேதனாஸம்பயுத்தத⁴ம்மா மனோது³ச்சரிதம். பாணாதிபாதாதீ³ஹி விரமந்தஸ்ஸ உப்பன்னா திஸ்ஸோ சேதனாபி விரதியோபி காயஸுசரிதம். முஸாவாதா³தீ³ஹி விரமந்தஸ்ஸ சதஸ்ஸோ சேதனாபி விரதியோபி வசீஸுசரிதம். அனபி⁴ஜ்ஜா² அப்³யாபாதோ³ ஸம்மாதி³ட்டீ²தி தயோ சேதனாஸம்பயுத்தத⁴ம்மா மனோஸுசரிதந்தி அயம் கம்மபத²கதா².

காமபடிஸம்யுத்தோ விதக்கோ காமவிதக்கோ. ப்³யாபாத³படிஸம்யுத்தோ விதக்கோ ப்³யாபாத³விதக்கோ. விஹிம்ஸாபடிஸம்யுத்தோ விதக்கோ விஹிம்ஸாவிதக்கோ. தேஸு த்³வே ஸத்தேஸுபி ஸங்கா²ரேஸுபி உப்பஜ்ஜந்தி. காமவிதக்கோ ஹி பியே மனாபே ஸத்தே வா ஸங்கா²ரே வா விதக்கேந்தஸ்ஸ உப்பஜ்ஜதி. ப்³யாபாத³விதக்கோ அப்பியே அமனாபே ஸத்தே வா ஸங்கா²ரே வா குஜ்ஜி²த்வா ஓலோகனகாலதோ பட்டா²ய யாவ வினாஸனா உப்பஜ்ஜதி. விஹிம்ஸாவிதக்கோ ஸங்கா²ரேஸு நுப்பஜ்ஜதி. ஸங்கா²ரோ ஹி து³க்கா²பேதப்³போ³ நாம நத்தி². இமே ஸத்தா ஹஞ்ஞந்து வா உச்சி²ஜ்ஜந்து வா வினஸ்ஸந்து வா மா வா அஹேஸுந்தி சிந்தனகாலே பன ஸத்தேஸு உப்பஜ்ஜதி.

நேக்க²ம்மபடிஸம்யுத்தோ விதக்கோ நேக்க²ம்மவிதக்கோ. ஸோ அஸுப⁴புப்³ப³பா⁴கே³ காமாவசரோ ஹோதி. அஸுப⁴ஜ்ஜா²னே ரூபாவசரோ. தம் ஜா²னம் பாத³கம் கத்வா உப்பன்னமக்³க³ப²லகாலே லோகுத்தரோ. அப்³யாபாத³படிஸம்யுத்தோ விதக்கோ அப்³யாபாத³விதக்கோ. ஸோ மேத்தாபுப்³ப³பா⁴கே³ காமாவசரோ ஹோதி. மேத்தாஜா²னே ரூபாவசரோ. தம் ஜா²னம் பாத³கம் கத்வா உப்பன்னமக்³க³ப²லகாலே லோகுத்தரோ. அவிஹிம்ஸாபடிஸம்யுத்தோ விதக்கோ அவிஹிம்ஸாவிதக்கோ. ஸோ கருணாபுப்³ப³பா⁴கே³ காமாவசரோ. கருணாஜா²னே ரூபாவசரோ. தம் ஜா²னம் பாத³கம் கத்வா உப்பன்னமக்³க³ப²லகாலே லோகுத்தரோ. யதா³ அலோபோ⁴ ஸீஸம் ஹோதி, ததா³ இதரே த்³வே தத³ன்வாயிகா ப⁴வந்தி. யதா³ மேத்தா ஸீஸம் ஹோதி, ததா³ இதரே த்³வே தத³ன்வாயிகா ப⁴வந்தி. யதா³ கருணா ஸீஸம் ஹோதி, ததா³ இதரே த்³வே தத³ன்வாயிகா ப⁴வந்தீதி. காமஸங்கப்பாத³யோ வுத்தனயேனேவ வேதி³தப்³பா³. தே³ஸனாமத்தமேவ ஹேதம். அத்த²தோ பன காமவிதக்காதீ³னஞ்ச காமஸங்கப்பாதீ³னஞ்ச நானாகரணம் நத்தி².

காமபடிஸம்யுத்தா ஸஞ்ஞா காமஸஞ்ஞா. ப்³யாபாத³படிஸம்யுத்தா ஸஞ்ஞா ப்³யாபாத³ஸஞ்ஞா. விஹிம்ஸாபடிஸம்யுத்தா ஸஞ்ஞா விஹிம்ஸாஸஞ்ஞா. தாஸம்பி காமவிதக்காதீ³னம் விய உப்பஜ்ஜனாகாரோ வேதி³தப்³போ³. தம்ஸம்பயுத்தாயேவ ஹி ஏதா. நேக்க²ம்மஸஞ்ஞாத³யோபி நேக்க²ம்மவிதக்காதி³ஸம்பயுத்தாயேவ. தஸ்மா தாஸம்பி ததே²வ காமாவசராதி³பா⁴வோ வேதி³தப்³போ³.

காமதா⁴துஆதீ³ஸு ‘‘காமபடிஸம்யுத்தோ தக்கோ விதக்கோ மிச்சா²ஸங்கப்போ. அயம் வுச்சதி காமதா⁴து. ஸப்³பே³பி அகுஸலா த⁴ம்மா காமதா⁴தூ’’தி அயம் காமதா⁴து. ‘‘ப்³யாபாத³படிஸம்யுத்தோ தக்கோ விதக்கோ மிச்சா²ஸங்கப்போ. அயம் வுச்சதி ப்³யாபாத³தா⁴து. த³ஸஸு ஆகா⁴தவத்தூ²ஸு சித்தஸ்ஸ ஆகா⁴தோ படிகா⁴தோ அனத்தமனதா சித்தஸ்ஸா’’தி அயம் ப்³யாபாத³தா⁴து. ‘‘விஹிம்ஸா படிஸம்யுத்தோ தக்கோ விதக்கோ மிச்சா²ஸங்கப்போ. அயம் வுச்சதி விஹிம்ஸாதா⁴து. இதே⁴கச்சோ பாணினா வா லேட்³டு³னா வா த³ண்டே³ன வா ஸத்தே²ன வா ரஜ்ஜுயா வா அஞ்ஞதரஞ்ஞதரேன வா ஸத்தே விஹேடே²தீ’’தி அயம் விஹிம்ஸாதா⁴து. தத்த² த்³வே கதா² ஸப்³ப³ஸங்கா³ஹிகா ச அஸம்பி⁴ன்னா ச. தத்த² காமதா⁴துயா க³ஹிதாய இதரா த்³வே க³ஹிதாவ ஹோந்தி, ததோ பன நீஹரித்வா அயம் ப்³யாபாத³தா⁴து அயம் விஹிம்ஸாதா⁴தூதி த³ஸ்ஸேதீதி அயம் ஸப்³ப³ஸங்கா³ஹிககதா² நாம. காமதா⁴தும் கதே²ந்தோ பன ப⁴க³வா ப்³யாபாத³தா⁴தும் ப்³யாபாத³தா⁴துட்டா²னே, விஹிம்ஸாதா⁴தும் விஹிம்ஸாதா⁴துட்டா²னே ட²பேத்வா அவஸேஸம் காமதா⁴து நாமாதி கதே²ஸீதி அயம் அஸம்பி⁴ன்னகதா² நாம.

நேக்க²ம்மதா⁴துஆதீ³ஸு ‘‘நேக்க²ம்மபடிஸம்யுத்தோ தக்கோ விதக்கோ ஸம்மாஸங்கப்போ. அயம் வுச்சதி நேக்க²ம்மதா⁴து. ஸப்³பே³பி குஸலா த⁴ம்மா நேக்க²ம்மதா⁴தூ’’தி அயம் நேக்க²ம்மதா⁴து. ‘‘அப்³யாபாத³படிஸம்யுத்தோ தக்கோ…பே… அயம் வுச்சதி அப்³யாபாத³தா⁴து. யா ஸத்தேஸு மேத்தி…பே… மேத்தாசேதோவிமுத்தீ’’தி அயம் அப்³யாபாத³தா⁴து. ‘‘அவிஹிம்ஸாபடிஸம்யுத்தோ தக்கோ…பே… அயம் வுச்சதி அவிஹிம்ஸாதா⁴து. யா ஸத்தேஸு கருணா…பே… கருணாசேதோவிமுத்தீ’’தி அயம் அவிஹிம்ஸாதா⁴து. இதா⁴பி வுத்தனயேனேவ த்³வே கதா² வேதி³தப்³பா³.

அபராபி திஸ்ஸோ தா⁴துயோதி அஞ்ஞாபி ஸுஞ்ஞதட்டே²ன திஸ்ஸோ தா⁴துயோ. தாஸு ‘‘தத்த² கதமா காமதா⁴து? ஹேட்ட²தோ அவீசினிரயம் பரியந்தம் கரித்வா’’தி ஏவம் வித்தா²ரிதோ காமப⁴வோ காமதா⁴து நாம. ‘‘ஹேட்ட²தோ ப்³ரஹ்மலோகம் பரியந்தம் கரித்வா ஆகாஸானஞ்சாயதனுபகே³ தே³வே பரியந்தம் கரித்வா’’தி ஏவம் வித்தா²ரிதா பன ரூபாரூபப⁴வா இதரா த்³வே தா⁴துயோ. தா⁴துயா ஆக³தட்டா²னம்ஹி ஹி ப⁴வேன பரிச்சி²ந்தி³தப்³பா³. ப⁴வஸ்ஸ ஆக³தட்டா²னே தா⁴துயா பரிச்சி²ந்தி³தப்³பா³. இத⁴ ப⁴வேன பரிச்சே²தோ³ கதி²தோ. ரூபதா⁴துஆதீ³ஸு ரூபாரூபதா⁴துயோ ரூபாரூபப⁴வாயேவ. நிரோத⁴தா⁴துயா நிப்³பா³னம் கதி²தம்.

ஹீனாதீ³ஸு ஹீனா தா⁴தூதி த்³வாத³ஸ அகுஸலசித்துப்பாதா³. அவஸேஸா தேபூ⁴மகத⁴ம்மா மஜ்ஜி²மதா⁴து. நவ லோகுத்தரத⁴ம்மா பணீததா⁴து.

காமதண்ஹாதி பஞ்சகாமகு³ணிகோ ராகோ³. ரூபாரூபப⁴வேஸு பன ராகோ³ ஜா²னனிகந்திஸஸ்ஸததி³ட்டி²ஸஹக³தோ ராகோ³ ப⁴வவஸேன பத்த²னா ப⁴வதண்ஹா. உச்சே²த³தி³ட்டி²ஸஹக³தோ ராகோ³ விப⁴வதண்ஹா. அபிச ட²பேத்வா பச்சி²மம் தண்ஹாத்³வயம் ஸேஸதண்ஹா காமதண்ஹா நாம. யதா²ஹ ‘‘தத்த² கதமா ப⁴வதண்ஹா? ப⁴வதி³ட்டி²ஸஹக³தோ ராகோ³ ஸாராகோ³ சித்தஸ்ஸ ஸாராகோ³. அயம் வுச்சதி ப⁴வதண்ஹா. தத்த² கதமா விப⁴வதண்ஹா? உச்சே²த³தி³ட்டி²ஸஹக³தோ ராகோ³ ஸாராகோ³ சித்தஸ்ஸ ஸாராகோ³, அயம் வுச்சதி விப⁴வதண்ஹா. அவஸேஸா தண்ஹா காமதண்ஹா’’தி. புன காமதண்ஹாதீ³ஸு பஞ்சகாமகு³ணிகோ ராகோ³ காமதண்ஹா. ரூபாரூபப⁴வேஸு ச²ந்த³ராகோ³ இதரா த்³வே தண்ஹா. அபி⁴த⁴ம்மே பனேதா ‘‘காமதா⁴துபடிஸம்யுத்தோ…பே… அரூபதா⁴துபடிஸம்யுத்தோ’’தி ஏவம் வித்தா²ரிதா. இமினா வாரேன கிம் த³ஸ்ஸேதி? ஸப்³பே³பி தேபூ⁴மகா த⁴ம்மா ரஜனீயட்டே²ன தண்ஹாவத்து²காதி ஸப்³ப³தண்ஹா காமதண்ஹாய பரியாதி³யித்வா ததோ நீஹரித்வா இதரா த்³வே தண்ஹா த³ஸ்ஸேதி. ரூபதண்ஹாதீ³ஸு ரூபப⁴வே ச²ந்த³ராகோ³ ரூபதண்ஹா. அரூபப⁴வே ச²ந்த³ராகோ³ அரூபதண்ஹா. உச்சே²த³தி³ட்டி²ஸஹக³தோ ராகோ³ நிரோத⁴தண்ஹா.

ஸம்யோஜனத்திகே வட்டஸ்மிம் ஸம்யோஜயந்தி ப³ந்த⁴ந்தீதி ஸம்யோஜனானி. ஸதி ரூபாதி³பே⁴தே³ காயே தி³ட்டி², விஜ்ஜமானா வா காயே தி³ட்டீ²தி ஸக்காயதி³ட்டி². விசினந்தோ ஏதாய கிச்ச²தி, ந ஸக்கோதி ஸன்னிட்டா²னம் காதுந்தி விசிகிச்சா². ஸீலஞ்ச வதஞ்ச பராமஸதீதி ஸீலப்³ப³தபராமாஸோ. அத்த²தோ பன ‘‘ரூபம் அத்ததோ ஸமனுபஸ்ஸதீ’’திஆதி³னா நயேன ஆக³தா வீஸதிவத்து²கா தி³ட்டி² ஸக்காயதி³ட்டி² நாம. ‘‘ஸத்த²ரி கங்க²தீ’’திஆதி³னா நயேன ஆக³தா அட்ட²வத்து²கா விமதி விசிகிச்சா² நாம. ‘‘இதே⁴கச்சோ ஸீலேன ஸுத்³தி⁴ வதேன ஸுத்³தி⁴ ஸீலப்³ப³தேன ஸுத்³தீ⁴தி ஸீலம் பராமஸதி, வதம் பராமஸதி, ஸீலப்³ப³தம் பராமஸதி. யா ஏவரூபா தி³ட்டி² தி³ட்டி²க³த’’ந்திஆதி³னா நயேன ஆக³தோ விபரியேஸக்³கா³ஹோ ஸீலப்³ப³தபராமாஸோ நாம.

தயோ ஆஸவாதி ஏத்த² சிரபாரிவாஸியட்டே²ன வா ஆஸவனட்டே²ன வா ஆஸவா. தத்த² ‘‘புரிமா, பி⁴க்க²வே, கோடி ந பஞ்ஞாயதி அவிஜ்ஜாய, இதோ புப்³பே³ அவிஜ்ஜா நாஹோஸி, அத² பச்சா² ஸமப⁴வீ’’தி, ‘‘புரிமா, பி⁴க்க²வே, கோடி ந பஞ்ஞாயதி ப⁴வதண்ஹாய ப⁴வதி³ட்டி²யா, இதோ புப்³பே³ ப⁴வதி³ட்டி² நாஹோஸி, அத² பச்சா² ஸமப⁴வீ’’தி ஏவம் தாவ சிரபாரிவாஸியட்டே²ன ஆஸவா வேதி³தப்³பா³. சக்கு²தோ ரூபே ஸவதி ஆஸவதி ஸந்த³தி பவத்ததி. ஸோததோ ஸத்³தே³. கா⁴னதோ க³ந்தே⁴. ஜிவ்ஹாதோ ரஸே. காயதோ போ²ட்ட²ப்³பே³. மனதோ த⁴ம்மே ஸவதி ஆஸவதி ஸந்த³தி பவத்ததீதி ஏவம் ஆஸவனட்டே²ன ஆஸவாதி வேதி³தப்³பா³.

பாளியம் பன கத்த²சி த்³வே ஆஸவா ஆக³தா ‘‘தி³ட்ட²த⁴ம்மிகா ச ஆஸவா ஸம்பராயிகா ச ஆஸவா’’தி, கத்த²சி ‘‘தயோமே, பி⁴க்க²வே, ஆஸவா. காமாஸவோ ப⁴வாஸவோ அவிஜ்ஜாஸவோ’’தி தயோ. அபி⁴த⁴ம்மே தேயேவ தி³ட்டா²ஸவேன ஸத்³தி⁴ம் சத்தாரோ. நிப்³பே³தி⁴கபரியாயே ‘‘அத்தி², பி⁴க்க²வே, ஆஸவா நிரயகா³மினியா, அத்தி² ஆஸவா திரச்சா²னயோனிகா³மினியா, அத்தி² ஆஸவா பேத்திவிஸயகா³மினியா, அத்தி² ஆஸவா மனுஸ்ஸலோககா³மினியா அத்தி² ஆஸவா தே³வலோககா³மினியா’’தி ஏவம் பஞ்ச. ச²க்கனிபாதே ஆஹுனேய்யஸுத்தே ‘‘அத்தி², பி⁴க்க²வே, ஆஸவா ஸம்வரா பஹாதப்³பா³, அத்தி² ஆஸவா படிஸேவனா பஹாதப்³பா³, அத்தி² ஆஸவா பரிவஜ்ஜனா பஹாதப்³பா³, அத்தி² ஆஸவா அதி⁴வாஸனா பஹாதப்³பா³, அத்தி² ஆஸவா வினோத³னா பஹாதப்³பா³, அத்தி² ஆஸவா பா⁴வனா பஹாதப்³பா³’’தி ஏவம் ச². ஸப்³பா³ஸவபரியாயே தேயேவ த³ஸ்ஸனாபஹாதப்³பே³ஹி ஸத்³தி⁴ம் ஸத்த. இமஸ்மிம் பன ஸங்கீ³திஸுத்தே தயோ. தத்த² ‘‘யோ காமேஸு காமச்ச²ந்தோ³’’தி ஏவம் வுத்தோ பஞ்சகாமகு³ணிகோ ராகோ³ காமாஸவோ நாம. ‘‘யோ ப⁴வேஸு ப⁴வச்ச²ந்தோ³’’தி ஏவம் வுத்தோ ஸஸ்ஸததி³ட்டி²ஸஹக³தோ ராகோ³, ப⁴வவஸேன வா பத்த²னா ப⁴வாஸவோ நாம. ‘‘து³க்கே² அஞ்ஞாண’’ந்திஆதி³னா நயேன ஆக³தா அவிஜ்ஜா அவிஜ்ஜாஸவோ நாமாதி. காமப⁴வாத³யோ காமதா⁴துஆதி³வஸேன வுத்தாயேவ.

காமேஸனாதீ³ஸு ‘‘தத்த² கதமா காமேஸனா? யோ காமேஸு காமச்ச²ந்தோ³ காமஜ்ஜோ²ஸானம், அயம் வுச்சதி காமேஸனா’’தி ஏவம் வுத்தோ காமக³வேஸனராகோ³ காமேஸனா நாம. ‘‘தத்த² கதமா ப⁴வேஸனா? யோ ப⁴வேஸு ப⁴வச்ச²ந்தோ³ ப⁴வஜ்ஜோ²ஸானம், அயம் வுச்சதி ப⁴வேஸனா’’தி ஏவம் வுத்தோ ப⁴வக³வேஸனராகோ³ ப⁴வேஸனா நாம. ‘‘தத்த² கதமா ப்³ரஹ்மசரியேஸனா? ஸஸ்ஸதோ லோகோதி வா…பே… நேவ ஹோதி ந நஹோதி ததா²க³தோ பரம்மரணாதி வா, யா ஏவரூபா தி³ட்டி² தி³ட்டி²க³தம் விபரியேஸக்³கா³ஹோ, அயம் வுச்சதி ப்³ரஹ்மசரியேஸனா’’தி ஏவம் வுத்தா தி³ட்டி²க³திகஸம்மதஸ்ஸ ப்³ரஹ்மசரியஸ்ஸ க³வேஸனதி³ட்டி² ப்³ரஹ்மசரியேஸனா நாம. ந கேவலஞ்ச ப⁴வராக³தி³ட்டி²யோவ, ததே³கட்ட²ம் கம்மம்பி ஏஸனாயேவ. வுத்தஞ்ஹேதம் ‘‘தத்த² கதமா காமேஸனா? காமராகோ³ ததே³கட்ட²ம் அகுஸலம் காயகம்மம் வசீகம்மம் மனோகம்மம், அயம் வுச்சதி காமேஸனா. தத்த² கதமா ப⁴வேஸனா? ப⁴வராகோ³ ததே³கட்ட²ம் அகுஸலம் காயகம்மம் வசீகம்மம் மனோகம்மம், அயம் வுச்சதி ப⁴வேஸனா. தத்த² கதமா ப்³ரஹ்மசரியேஸனா? அந்தக்³கா³ஹிகா தி³ட்டி² ததே³கட்ட²ம் அகுஸலம் காயகம்மம் வசீகம்மம் மனோகம்மம், அயம் வுச்சதி ப்³ரஹ்மசரியேஸனா’’தி.

விதா⁴ஸு ‘‘கத²ம்வித⁴ம் ஸீலவந்தம் வத³ந்தி, கத²ம்வித⁴ம் பஞ்ஞவந்தம் வத³ந்தீ’’திஆதீ³ஸு (ஸம். நி. 1.95) ஆகாரஸண்டா²னம் விதா⁴ நாம. ‘‘ஏகவிதே⁴ன ஞாணவத்து² து³விதே⁴ன ஞாணவத்தூ²’’திஆதீ³ஸு (விப⁴. 751) கோட்டா²ஸோ. ‘‘ஸேய்யோஹமஸ்மீதி விதா⁴’’திஆதீ³ஸு (விப⁴. 920) மானோ விதா⁴ நாம. இத⁴ ஸோ அதி⁴ப்பேதோ. மானோ ஹி ஸேய்யாதி³வஸேன வித³ஹனதோ விதா⁴தி வுச்சதி. ஸேய்யோஹமஸ்மீதி இமினா ஸேய்யஸதி³ஸஹீனானம் வஸேன தயோ மானா வுத்தா. ஸதி³ஸஹீனேஸுபி ஏஸேவ நயோ.

அயஞ்ஹி மானோ நாம ஸேய்யஸ்ஸ திவிதோ⁴, ஸதி³ஸஸ்ஸ திவிதோ⁴, ஹீனஸ்ஸ திவிதோ⁴தி நவவிதோ⁴ ஹோதி. தத்த² ‘‘ஸேய்யஸ்ஸ ஸேய்யோஹமஸ்மீ’’தி மானோ ராஜூனஞ்சேவ பப்³ப³ஜிதானஞ்ச உப்பஜ்ஜதி.

ராஜா ஹி ரட்டே²ன வா த⁴னவாஹனேஹி வா ‘‘கோ மயா ஸதி³ஸோ அத்தீ²’’தி ஏதம் மானம் கரோதி. பப்³ப³ஜிதோபி ஸீலது⁴தங்கா³தீ³ஹி ‘‘கோ மயா ஸதி³ஸோ அத்தீ²’’தி ஏதம் மானம் கரோதி. ‘‘ஸேய்யஸ்ஸ ஸதி³ஸோஹமஸ்மீ’’தி மானோபி ஏதேஸம்யேவ உப்பஜ்ஜதி. ராஜா ஹி ரட்டே²ன வா த⁴னவாஹனேஹி வா அஞ்ஞராஜூஹி ஸத்³தி⁴ம் மய்ஹம் கிம் நானாகரணந்தி ஏதம் மானம் கரோதி. பப்³ப³ஜிதோபி ஸீலது⁴தங்கா³தீ³ஹிபி அஞ்ஞேன பி⁴க்கு²னா மய்ஹம் கிம் நானாகரணந்தி ஏதம் மானம் கரோதி. ‘‘ஸேய்யஸ்ஸ ஹீனோஹமஸ்மீ’’தி மானோபி ஏதேஸம்யேவ உப்பஜ்ஜதி. யஸ்ஸ ஹி ரஞ்ஞோ ரட்ட²ம் வா த⁴னவாஹனாதீ³னி வா நாதிஸம்பன்னானி ஹோந்தி, ஸோ மய்ஹம் ராஜாதி வோஹாரமுக²மத்தமேவ, கிம் ராஜா நாம அஹந்தி ஏதம் மானம் கரோதி. பப்³ப³ஜிதோபி அப்பலாப⁴ஸக்காரோ அஹம் த⁴ம்மகதி²கோ ப³ஹுஸ்ஸுதோ மஹாதே²ரோதி கதா²மத்தகமேவ, கிம் த⁴ம்மகதி²கோ நாமாஹம் கிம் ப³ஹுஸ்ஸுதோ கிம் மஹாதே²ரோ யஸ்ஸ மே லாப⁴ஸக்காரோ நத்தீ²தி ஏதம் மானம் கரோதி.

‘‘ஸதி³ஸஸ்ஸ ஸேய்யோஹமஸ்மீ’’தி மானாத³யோ அமச்சாதீ³னம் உப்பஜ்ஜந்தி. அமச்சோ வா ஹி ரட்டி²யோ வா போ⁴க³யானவாஹனாதீ³ஹி கோ மயா ஸதி³ஸோ அஞ்ஞோ ராஜபுரிஸோ அத்தீ²தி வா மய்ஹம் அஞ்ஞேஹி ஸத்³தி⁴ம் கிம் நானாகரணந்தி வா அமச்சோதி நாமமேவ மய்ஹம், கா⁴ஸச்சா²த³னமத்தம்பி மே நத்தி², கிம் அமச்சோ நாமாஹந்தி வா ஏதே மானே கரோதி.

‘‘ஹீனஸ்ஸ ஸேய்யோஹமஸ்மீ’’தி மானாத³யோ தா³ஸாதீ³னம் உப்பஜ்ஜந்தி. தா³ஸோ ஹி மாதிதோ வா பிதிதோ வா கோ மயா ஸதி³ஸோ அஞ்ஞோ தா³ஸோ நாம அத்தி², அஞ்ஞே ஜீவிதும் அஸக்கோந்தா குச்சி²ஹேது தா³ஸா ஜாதா, அஹம் பன பவேணீஆக³தத்தா ஸேய்யோதி வா பவேணீஆக³தபா⁴வேன உப⁴தோஸுத்³தி⁴கதா³ஸத்தேன அஸுகதா³ஸேன நாம ஸத்³தி⁴ம் கிம் மய்ஹம் நானாகரணந்தி வா குச்சி²வஸேனாஹம் தா³ஸப்³ய உபக³தோ, மாதாபிதுகோடியா பன மே தா³ஸட்டா²னம் நத்தி², கிம் தா³ஸோ நாம அஹந்தி வா ஏதே மானே கரோதி. யதா² ச தா³ஸோ, ஏவம் புக்குஸசண்டா³லாத³யோபி ஏதே மானே கரோந்தியேவ.

ஏத்த² ச ஸேய்யஸ்ஸ ஸேய்யோஹமஸ்மீதி, ச ஸதி³ஸஸ்ஸ ஸதி³ஸோஹமஸ்மீதி ச ஹீனஸ்ஸ ஹீனோஹமஸ்மீதி ச இமே தயோ மானா யாதா²வமானா நாம அரஹத்தமக்³க³வஜ்ஜா². ஸேஸா ச² மானா அயாதா²வமானா நாம பட²மமக்³க³வஜ்ஜா².

தயோ அத்³தா⁴தி தயோ காலா. அதீதோ அத்³தா⁴திஆதீ³ஸு த்³வேபரியாயா ஸுத்தந்தபரியாயோ ச அபி⁴த⁴ம்மபரியாயோ ச. ஸுத்தந்தபரியாயேன படிஸந்தி⁴தோ புப்³பே³ அதீதோ அத்³தா⁴ நாம. சுதிதோ பச்சா² அனாக³தோ அத்³தா⁴ நாம. ஸஹ சுதிபடிஸந்தீ⁴ஹி தத³ந்தரம் பச்சுப்பன்னோ அத்³தா⁴ நாம. அபி⁴த⁴ம்மபரியாயேன தீஸு க²ணேஸு ப⁴ங்க³தோ உத்³த⁴ம் அதீதோ அத்³தா⁴ நாம. உப்பாத³தோ புப்³பே³ அனாக³தோ அத்³தா⁴ நாம. க²ணத்தயே பச்சுப்பன்னோ அத்³தா⁴ நாம. அதீதாதி³பே⁴தோ³ ச நாம அயம் த⁴ம்மானம் ஹோதி, ந காலஸ்ஸ. அதீதாதி³பே⁴தே³ பன த⁴ம்மே உபாதா³ய இத⁴ பரமத்த²தோ அவிஜ்ஜமானோபி காலோ தேனேவ வோஹாரேன வுத்தோதி வேதி³தப்³போ³.

தயோ அந்தாதி தயோ கோட்டா²ஸா. ‘‘காயப³ந்த⁴னஸ்ஸ அந்தோ ஜீரதீ’’திஆதீ³ஸு (சூளவ. 278) ஹி அந்தோயேவ அந்தோ. ‘‘ஏஸேவந்தோ து³க்க²ஸ்ஸா’’திஆதீ³ஸு (ஸம். நி. 2.51) பரபா⁴கோ³ அந்தோ. ‘‘அந்தமித³ம், பி⁴க்க²வே, ஜீவிகான’’ந்தி (ஸம். நி. 3.80) ஏத்த² லாமகபா⁴வோ அந்தோ. ‘‘ஸக்காயோ கோ², ஆவுஸோ, பட²மோ அந்தோ’’திஆதீ³ஸு (அ. நி. 6.61) கோட்டா²ஸோ அந்தோ. இத⁴ கோட்டா²ஸோ அதி⁴ப்பேதோ. ஸக்காயோதி பஞ்சுபாதா³னக்க²ந்தா⁴. ஸக்காயஸமுத³யோதி தேஸம் நிப்³ப³த்திகா புரிமதண்ஹா. ஸக்காயனிரோதோ⁴தி உபி⁴ன்னம் அப்பவத்திபூ⁴தம் நிப்³பா³னம். மக்³கோ³ பன நிரோதா⁴தி⁴க³மஸ்ஸ உபாயத்தா நிரோதே⁴ க³ஹிதே க³ஹிதோவாதி வேதி³தப்³போ³.

து³க்க²து³க்க²தாதி து³க்க²பூ⁴தா து³க்க²தா. து³க்க²வேத³னாயேதம் நாமம். ஸங்கா²ரது³க்க²தாதி ஸங்கா²ரபா⁴வேன து³க்க²தா. அது³க்க²மஸுகா²வேத³னாயேதம் நாமம். ஸா ஹி ஸங்க²தத்தா உப்பாத³ஜராப⁴ங்க³பீளிதா, தஸ்மா அஞ்ஞது³க்க²ஸபா⁴வவிரஹதோ ஸங்கா²ரது³க்க²தாதி வுத்தா. விபரிணாமது³க்க²தாதி விபரிணாமே து³க்க²தா. ஸுக²வேத³னாயேதம் நாமம். ஸுக²ஸ்ஸ ஹி விபரிணாமே து³க்க²ம் உப்பஜ்ஜதி, தஸ்மா ஸுக²ம் விபரிணாமது³க்க²தாதி வுத்தம். அபிச ட²பேத்வா து³க்க²வேத³னம் ஸுக²வேத³னஞ்ச ஸப்³பே³பி தேபூ⁴மகா த⁴ம்மா ‘‘ஸப்³பே³ ஸங்கா²ரா து³க்கா²’’தி வசனதோ ஸங்கா²ரது³க்க²தாதி வேதி³தப்³பா³.

மிச்ச²த்தனியதோதி மிச்சா²ஸபா⁴வோ ஹுத்வா நியதோ. நியதமிச்சா²தி³ட்டி²யா ஸத்³தி⁴ம் ஆனந்தரியகம்மஸ்ஸேதம் நாமம். ஸம்மாஸபா⁴வே நியதோ ஸம்மத்தனியதோ. சதுன்னம் அரியமக்³கா³னமேதம் நாமம். ந நியதோதி அனியதோ. அவஸேஸானம் த⁴ம்மானமேதம் நாமம்.

தயோ தமாதி ‘‘தமந்த⁴காரோ ஸம்மோஹோ அவிஜ்ஜோகோ⁴ மஹாப⁴யோ’’தி வசனதோ அவிஜ்ஜா தமோ நாம. இத⁴ பன அவிஜ்ஜாஸீஸேன விசிகிச்சா² வுத்தா. ஆரப்³பா⁴தி ஆக³ம்ம. கங்க²தீதி கங்க²ம் உப்பாதே³தி. விசிகிச்ச²தீதி விசினந்தோ கிச்ச²ம் ஆபஜ்ஜதி, ஸன்னிட்டா²தும் ந ஸக்கோதி. நாதி⁴முச்ச²தீதி தத்த² அதி⁴முச்சி²தும் ந ஸக்கோதி. ந ஸம்பஸீத³தீதி தம் ஆரப்³ப⁴ பஸாத³ம் ஆரோபேதும் ந ஸக்கோதி.

அரக்கே²ய்யானீதி ந ரக்கி²தப்³பா³னி. தீஸு த்³வாரேஸு பச்சேகம் ரக்க²ணகிச்சம் நத்தி², ஸப்³பா³னி ஸதியா ஏவ ரக்கி²தானீதி தீ³பேதி. நத்தி² ததா²க³தஸ்ஸாதி. ‘‘இத³ம் நாம மே ஸஹஸா உப்பன்னம் காயது³ச்சரிதம், இமாஹம் யதா² மே பரோ ந ஜானாதி, ததா² ரக்கா²மி, படிச்சா²தே³மீ’’தி ஏவம் ரக்கி²தப்³ப³ம் நத்தி² ததா²க³தஸ்ஸ காயது³ச்சரிதம். ஸேஸேஸுபி ஏஸேவ நயோ. கிம் பன ஸேஸகீ²ணாஸவானம் காயஸமாசாராத³யோ அபரிஸுத்³தா⁴தி? நோ அபரிஸுத்³தா⁴. ந பன ததா²க³தஸ்ஸ விய பரிஸுத்³தா⁴. அப்பஸ்ஸுதகீ²ணாஸவோ ஹி கிஞ்சாபி லோகவஜ்ஜம் நாபஜ்ஜதி, பண்ணத்தியம் பன அகோவித³த்தா விஹாரகாரம் குடிகாரம் ஸஹகா³ரம் ஸஹஸேய்யந்தி ஏவரூபா காயத்³வாரே ஆபத்தியோ ஆபஜ்ஜதி. ஸஞ்சரித்தம் பத³ஸோத⁴ம்மம் உத்தரிச²ப்பஞ்சவாசம் பூ⁴தாரோசனந்தி ஏவரூபா வசீத்³வாரே ஆபத்தியோ ஆபஜ்ஜதி. உபனிக்கி²த்தஸாதி³யனவஸேன மனோத்³வாரே ரூபியப்படிக்³கா³ஹணாபத்திம் ஆபஜ்ஜதி, த⁴ம்மஸேனாபதிஸதி³ஸஸ்ஸாபி ஹி கீ²ணாஸவஸ்ஸ மனோத்³வாரே ஸஉபாரம்ப⁴வஸேன மனோது³ச்சரிதம் உப்பஜ்ஜதி ஏவ.

சாதுமவத்து²ஸ்மிஞ்ஹி பஞ்சஹி பி⁴க்கு²ஸதேஹி ஸத்³தி⁴ம் ஸாரிபுத்தமோக்³க³ல்லானானம் பணாமிதகாலே தேஸம் அத்தா²ய சாதுமேய்யகேஹி ஸக்யேஹி ப⁴க³வதி க²மாபிதே தே²ரோ ப⁴க³வதா ‘‘கிந்தி தே ஸாரிபுத்த அஹோஸி மயா பி⁴க்கு²ஸங்கே⁴ பணாமிதே’’தி புட்டோ² அஹம் பரிஸாய அப்³யத்தபா⁴வேன ஸத்தா²ரா பணாமிதோ. இதோ தா³னி பட்டா²ய பரம் ந ஓவதி³ஸ்ஸாமீதி சித்தம் உப்பாதே³த்வா ஆஹ ‘‘ஏவம் கோ² மே, ப⁴ந்தே, அஹோஸி ப⁴க³வதா பி⁴க்கு²ஸங்கோ⁴ பணாமிதோ, அப்போஸ்ஸுக்கோ தா³னி ப⁴க³வா தி³ட்ட²த⁴ம்மஸுக²விஹாரம் அனுயுத்தோ விஹரிஸ்ஸதி, மயம்பி தா³னி அப்போஸ்ஸுக்கா தி³ட்ட²த⁴ம்மஸுக²விஹாரம் அனுயுத்தா விஹரிஸ்ஸாமா’’தி.

அத²ஸ்ஸ தஸ்மிம் மனோது³ச்சரிதே உபாரம்ப⁴ம் ஆரோபேந்தோ ஸத்தா² ஆஹ – ‘‘ஆக³மேஹி த்வம், ஸாரிபுத்த ந கோ² தே, ஸாரிபுத்த, புனபி ஏவரூபம் சித்தம் உப்பாதே³தப்³ப³’’ந்தி. ஏவம் பரம் ந ஓவதி³ஸ்ஸாமி நானுஸாஸிஸ்ஸாமீதி விதக்கிதமத்தம்பி தே²ரஸ்ஸ மனோது³ச்சரிதம் நாம ஜாதம். ப⁴க³வதோ பன ஏத்தகம் நாம நத்தி², அனச்ச²ரியஞ்சேதம். ஸப்³ப³ஞ்ஞுதம் பத்தஸ்ஸ து³ச்சரிதம் ந ப⁴வேய்ய. போ³தி⁴ஸத்தபூ⁴மியம் டி²தஸ்ஸ ச²ப்³ப³ஸ்ஸானி பதா⁴னம் அனுயுஞ்ஜந்தஸ்ஸாபி பனஸ்ஸ நாஹோஸி. உத³ரச்ச²வியா பிட்டி²கண்டகம் அல்லீனாய ‘‘காலங்கதோ ஸமணோ கோ³தமோ’’தி தே³வதானம் விமதியா உப்பஜ்ஜமானாயபி ‘‘ஸித்³த⁴த்த² கஸ்மா கிலமஸி? ஸக்கா போ⁴கே³ ச பு⁴ஞ்ஜிதும் புஞ்ஞானி ச காது’’ந்தி மாரேன பாபிமதா வுச்சமானஸ்ஸ ‘‘போ⁴கே³ பு⁴ஞ்ஜிஸ்ஸாமீ’’தி விதக்கமத்தம்பி நுப்பஜ்ஜதி. அத² நம் மாரோ போ³தி⁴ஸத்தகாலே ச²ப்³ப³ஸ்ஸானி பு³த்³த⁴காலே ஏகம் வஸ்ஸம் அனுப³ந்தி⁴த்வா கிஞ்சி வஜ்ஜம் அபஸ்ஸித்வா இத³ம் வத்வா பக்காமி –

‘‘ஸத்தவஸ்ஸானி ப⁴க³வந்தம், அனுப³ந்தி⁴ம் பதா³பத³ம்;

ஓதாரம் நாதி⁴க³ச்சி²ஸ்ஸம், ஸம்பு³த்³த⁴ஸ்ஸ ஸதீமதோ’’தி. (ஸு. நி. 448);

அபிச அட்டா²ரஸன்னம் பு³த்³த⁴த⁴ம்மானம் வஸேனாபி ப⁴க³வதோ து³ச்சரிதாபா⁴வோ வேதி³தப்³போ³. அட்டா²ரஸ பு³த்³த⁴த⁴ம்மா நாம நத்தி² ததா²க³தஸ்ஸ காயது³ச்சரிதம், நத்தி² வசீது³ச்சரிதம், நத்தி² மனோது³ச்சரிதம், அதீதே பு³த்³த⁴ஸ்ஸ அப்படிஹதஞாணம், அனாக³தே, பச்சுப்பன்னே பு³த்³த⁴ஸ்ஸ அப்படிஹதஞாணம், ஸப்³ப³ம் காயகம்மம் பு³த்³த⁴ஸ்ஸ ப⁴க³வதோ ஞாணானுபரிவத்தி, ஸப்³ப³ம் வசீகம்மம், ஸப்³ப³ம் மனோகம்மம் பு³த்³த⁴ஸ்ஸ ப⁴க³வதோ ஞாணானுபரிவத்தி, நத்தி² ச²ந்த³ஸ்ஸ ஹானி, நத்தி² வீரியஸ்ஸ ஹானி, நத்தி² ஸதியா ஹானி, நத்தி² த³வா, நத்தி² ரவா, நத்தி² சலிதம் நத்தி² ஸஹஸா, நத்தி² அப்³யாவடோ மனோ, நத்தி² அகுஸலசித்தந்தி.

கிஞ்சனாதி பலிபோ³தா⁴. ராகோ³ கிஞ்சனந்தி ராகோ³ உப்பஜ்ஜமானோ ஸத்தே ப³ந்த⁴தி பலிபு³ந்த⁴தி தஸ்மா கிஞ்சனந்தி வுச்சதி. இதரேஸுபி த்³வீஸு ஏஸேவ நயோ.

அக்³கீ³தி அனுத³ஹனட்டே²ன அக்³கி³. ராக³க்³கீ³தி ராகோ³ உப்பஜ்ஜமானோ ஸத்தே அனுத³ஹதி ஜா²பேதி, தஸ்மா அக்³கீ³தி வுச்சதி. இதரேஸுபி ஏஸேவ நயோ. தத்த² வத்தூ²னி ஏகா த³ஹரபி⁴க்கு²னீ சித்தலபப்³ப³தவிஹாரே உபோஸதா²கா³ரம் க³ந்த்வா த்³வாரபாலரூபகம் ஓலோகயமானா டி²தா. அத²ஸ்ஸா அந்தோ ராகோ³ உப்பன்னோ. ஸா தேனேவ ஜா²யித்வா காலமகாஸி. பி⁴க்கு²னியோ க³ச்ச²மானா ‘‘அயம் த³ஹரா டி²தா, பக்கோஸத², ந’’ந்தி ஆஹம்ஸு. ஏகா க³ந்த்வா கஸ்மா டி²தாஸீதி ஹத்தே² க³ண்ஹி. க³ஹிதமத்தா பரிவத்தித்வா பபதா. இத³ம் தாவ ராக³ஸ்ஸ அனுத³ஹனதாய வத்து². தோ³ஸஸ்ஸ பன அனுத³ஹனதாய மனோபதோ³ஸிகா தே³வா. மோஹஸ்ஸ அனுத³ஹனதாய கி²ட்³டா³பதோ³ஸிகா தே³வா த³ட்ட²ப்³பா³. மோஹவஸேன ஹி தாஸம் ஸதிஸம்மோஸோ ஹோதி. தஸ்மா கி²ட்³டா³வஸேன ஆஹாரகாலம் அதிவத்தித்வா காலங்கரோந்தி.

ஆஹுனேய்யக்³கீ³திஆதீ³ஸு ஆஹுனம் வுச்சதி ஸக்காரோ, ஆஹுனம் அரஹந்தீதி ஆஹுனேய்யா. மாதாபிதரோ ஹி புத்தானம் ப³ஹூபகாரதாய ஆஹுனம் அரஹந்தி. தேஸு விப்படிபஜ்ஜமானா புத்தா நிரயாதீ³ஸு நிப்³ப³த்தந்தி. தஸ்மா கிஞ்சாபி மாதாபிதரோ நானுத³ஹந்தி, அனுத³ஹனஸ்ஸ பன பச்சயா ஹோந்தி. இதி அனுத³ஹனட்டே²ன ஆஹுனேய்யக்³கீ³தி வுச்சந்தி. ஸ்வாயமத்தோ² மித்தவிந்த³கவத்து²னா தீ³பேதப்³போ³ –

மித்தவிந்த³கோ ஹி மாதரா ‘‘தாத, அஜ்ஜ உபோஸதி²கோ ஹுத்வா விஹாரே ஸப்³ப³ரத்திம் த⁴ம்மஸ்ஸவனம் ஸுண, ஸஹஸ்ஸம் தே த³ஸ்ஸாமீ’’தி வுத்தோ த⁴னலோபே⁴ன உபோஸத²ம் ஸமாதா³ய விஹாரம் க³ந்த்வா இத³ம் டா²னம் அகுதோப⁴யந்தி ஸல்லக்கே²த்வா த⁴ம்மாஸனஸ்ஸ ஹேட்டா² நிபன்னோ ஸப்³ப³ரத்திம் நித்³தா³யித்வா க⁴ரம் அக³மாஸி. மாதா பாதோவ யாகு³ம் பசித்வா உபனாமேஸி. ஸோ ஸஹஸ்ஸம் க³ஹேத்வாவ பிவி. அத²ஸ்ஸ ஏதத³ஹோஸி – ‘‘த⁴னம் ஸம்ஹரிஸ்ஸாமீ’’தி. ஸோ நாவாய ஸமுத்³த³ம் பக்க²ந்தி³துகாமோ அஹோஸி. அத² நம் மாதா ‘‘தாத, இமஸ்மிம் குலே சத்தாலீஸகோடித⁴னம் அத்தி², அலம் க³மனேனா’’தி நிவாரேஸி. ஸோ தஸ்ஸா வசனம் அனாதி³யித்வா க³ச்ச²தி ஏவ. மாதா புரதோ அட்டா²ஸி. அத² நம் குஜ்ஜி²த்வா ‘‘அயம் மய்ஹம் புரதோ திட்ட²தீ’’தி பாதே³ன பஹரித்வா பதிதம் அந்தரம் கத்வா அக³மாஸி.

மாதா உட்ட²ஹித்வா ‘‘மாதி³ஸாய மாதரி ஏவரூபம் கம்மம் கத்வா க³தஸ்ஸ தே க³தட்டா²னே ஸுக²ம் ப⁴விஸ்ஸதீதி ஏவம்ஸஞ்ஞீ நாம த்வம் புத்தா’’தி ஆஹ. தஸ்ஸ நாவம் ஆருய்ஹ க³ச்ச²தோ ஸத்தமே தி³வஸே நாவா அட்டா²ஸி. அத² தே மனுஸ்ஸா ‘‘அத்³தா⁴ ஏத்த² பாபபுரிஸோ அத்தி² ஸலாகம் தே³தா²’’தி ஆஹம்ஸு. ஸலாகா தி³ய்யமானா தஸ்ஸேவ திக்க²த்தும் பாபுணாதி. தே தஸ்ஸ உளும்பம் த³த்வா தம் ஸமுத்³தே³ பக்கி²பிம்ஸு. ஸோ ஏகம் தீ³பம் க³ந்த்வா விமானபேதீஹி ஸத்³தி⁴ம் ஸம்பத்திம் அனுப⁴வந்தோ தாஹி ‘‘புரதோ புரதோ மா அக³மாஸீ’’தி வுச்சமானோபி தத்³தி³கு³ணம் தத்³தி³கு³ணம் ஸம்பத்திம் பஸ்ஸந்தோ அனுபுப்³பே³ன கு²ரசக்கத⁴ரம் ஏகம் அத்³த³ஸ. தஸ்ஸ தம் சக்கம் பது³மபுப்ப²ம் விய உபட்டா²ஸி. ஸோ தம் ஆஹ – ‘‘அம்போ⁴, இத³ம் தயா பிளந்தி⁴தம் பது³மம் மய்ஹம் தே³ஹீ’’தி. ‘‘ந இத³ம் ஸாமி பது³மம், கு²ரசக்கம் ஏத’’ந்தி. ஸோ ‘‘வஞ்சேஸி மம், த்வம் கிம் மயா பது³மம் அதி³ட்ட²புப்³ப³’’ந்தி வத்வா த்வம் லோஹிதசந்த³னம் விலிம்பித்வா பிளந்த⁴னம் பது³மபுப்ப²ம் மய்ஹம் ந தா³துகாமோதி ஆஹ. ஸோ சிந்தேஸி ‘‘அயம்பி மயா கதஸதி³ஸம் கம்மம் கத்வா தஸ்ஸ ப²லம் அனுப⁴விதுகாமோ’’தி. அத² நம் ‘‘ஹந்த³ ரே’’தி வத்வா தஸ்ஸ மத்த²கே சக்கம் பக்கி²பி. தேன வுத்தம் –

‘‘சதுப்³பி⁴ அட்ட²ஜ்ஜ²க³மா, அட்டா²ஹிபி ச ஸோளஸ;

ஸோளஸாஹி ச பா³த்திம்ஸ, அத்ரிச்ச²ம் சக்கமாஸதோ³;

இச்சா²ஹதஸ்ஸ போஸஸ்ஸ, சக்கம் ப⁴மதி மத்த²கே’’தி. (ஜா. 1.1.104).

க³ஹபதீதி பன கே³ஹஸாமிகோ வுச்சதி. ஸோ மாதுகா³மஸ்ஸ ஸயனவத்தா²லங்காராதி³அனுப்பதா³னேன ப³ஹூபகாரோ. தம் அதிசரந்தோ மாதுகா³மோ நிரயாதீ³ஸு நிப்³ப³த்ததி, தஸ்மா ஸோபி புரிமனயேனேவ அனுத³ஹனட்டே²ன க³ஹபதக்³கீ³தி வுத்தோ.

தத்த² வத்து² – கஸ்ஸபபு³த்³த⁴ஸ்ஸ காலே ஸோதாபன்னஸ்ஸ உபாஸகஸ்ஸ ப⁴ரியா அதிசாரினீ அஹோஸி. ஸோ தம் பச்சக்க²தோ தி³ஸ்வா ‘‘கஸ்மா த்வம் ஏவம் கரோஸீ’’தி ஆஹ. ஸா ‘‘ஸசாஹம் ஏவரூபம் கரோமி, அயம் மே ஸுனகோ² விலுப்பமானோ கா²த³தூ’’தி வத்வா காலங்கத்வா கண்ணமுண்ட³கத³ஹே வேமானிகபேதீ ஹுத்வா நிப்³ப³த்தா. தி³வா ஸம்பத்திம் அனுப⁴வதி, ரத்திம் து³க்க²ம். ததா³ பா³ராணஸீராஜா மிக³வம் சரந்தோ அரஞ்ஞம் பவிஸித்வா அனுபுப்³பே³ன கண்ணமுண்ட³கத³ஹம் ஸம்பத்தோ தாய ஸத்³தி⁴ம் ஸம்பத்திம் அனுப⁴வதி. ஸா தம் வஞ்சேத்வா ரத்திம் து³க்க²ம் அனுப⁴வதி. ஸோ ஞத்வா ‘‘கத்த² நு கோ² க³ச்ச²தீ’’தி பிட்டி²தோ பிட்டி²தோ க³ந்த்வா அவிதூ³ரே டி²தோ கண்ணமுண்ட³கத³ஹதோ நிக்க²மித்வா தம் ‘‘படபட’’ந்தி கா²த³மானம் ஏகம் ஸுனக²ம் தி³ஸ்வா அஸினா த்³விதா⁴ சி²ந்தி³. த்³வே அஹேஸும். புன சி²ன்னே சத்தாரோ. புன சி²ன்னே அட்ட². புன சி²ன்னே ஸோளஸ அஹேஸும். ஸா ‘‘கிம் கரோஸி ஸாமீ’’தி ஆஹ. ஸோ ‘‘கிம் இத³’’ந்தி ஆஹ. ஸா ‘‘ஏவம் அகத்வா கே²ளபிண்ட³ம் பூ⁴மியம் நிட்டு²பி⁴த்வா பாதே³ன க⁴ம்ஸாஹீ’’தி ஆஹ. ஸோ ததா² அகாஸி. ஸுனகா² அந்தரதா⁴யிம்ஸு. தம் தி³வஸம் தஸ்ஸா கம்மம் கீ²ணம். ராஜா விப்படிஸாரீ ஹுத்வா க³ந்தும் ஆரத்³தோ⁴. ஸா ‘‘மய்ஹம், ஸாமி, கம்மம் கீ²ணம் மா அக³மா’’தி ஆஹ. ராஜா அஸுத்வாவ க³தோ.

த³க்கி²ணேய்யக்³கீ³தி ஏத்த² பன த³க்கி²ணாதி சத்தாரோ பச்சயா, பி⁴க்கு²ஸங்கோ⁴ த³க்கி²ணேய்யோ. ஸோ கி³ஹீனம் தீஸு ஸரணேஸு பஞ்சஸு ஸீலேஸு த³ஸஸு ஸீலேஸு மாதாபிதுஉபட்டா²னே த⁴ம்மிகஸமணப்³ராஹ்மணஉபட்டா²னேதி ஏவமாதீ³ஸு கல்யாணத⁴ம்மேஸு நியோஜனேன ப³ஹூபகாரோ, தஸ்மிம் மிச்சா²படிபன்னா கி³ஹீ பி⁴க்கு²ஸங்க⁴ம் அக்கோஸித்வா பரிபா⁴ஸித்வா நிரயாதீ³ஸு நிப்³ப³த்தந்தி, தஸ்மா ஸோபி புரிமனயேனேவ அனுத³ஹனட்டே²ன த³க்கி²ணேய்யக்³கீ³தி வுத்தோ. இமஸ்ஸ பனத்த²ஸ்ஸ விபா⁴வனத்த²ம் விமானவத்து²ஸ்மிம் ரேவதீவத்து² வித்தா²ரேதப்³ப³ம்.

‘‘திவிதே⁴ன ரூபஸங்க³ஹோ’’தி ஏத்த² திவிதே⁴னாதி தீஹி கோட்டா²ஸேஹி. ஸங்க³ஹோதி ஜாதிஸஞ்ஜாதிகிரியக³ணனவஸேன சதுப்³பி³தோ⁴ ஸங்க³ஹோ. தத்த² ஸப்³பே³ க²த்தியா ஆக³ச்ச²ந்தூதிஆதி³கோ (ம. நி. 1.462) ஜாதிஸங்க³ஹோ. ஸப்³பே³ கோஸலகாதிஆதி³கோ ஸஞ்ஜாதிஸங்க³ஹோ. ஸப்³பே³ ஹத்தா²ரோஹாதிஆதி³கோ கிரியஸங்க³ஹோ. சக்கா²யதனம் கதமம் க²ந்த⁴க³ணனம் க³ச்ச²தீதி? சக்கா²யதனம் ரூபக்க²ந்த⁴க³ணனம் க³ச்ச²தீதி. ஹஞ்சி சக்கா²யதனம் ரூபக்க²ந்தே⁴ன ஸங்க³ஹிதந்தி அயம் க³ணனஸங்க³ஹோ, ஸோ இத⁴ அதி⁴ப்பேதோ. தஸ்மா திவிதே⁴ன ரூபஸங்க³ஹோதி தீஹி கோட்டா²ஸேஹி ரூபக³ணனாதி அத்தோ².

ஸனித³ஸ்ஸனாதீ³ஸு அத்தானம் ஆரப்³ப⁴ பவத்தேன சக்கு²விஞ்ஞாணஸங்கா²தேன ஸஹ நித³ஸ்ஸனேனாதி ஸனித³ஸ்ஸனம். சக்கு²படிஹனனஸமத்த²தோ ஸஹ படிகே⁴னாதி ஸப்படிக⁴ம். தம் அத்த²தோ ரூபாயதனமேவ. சக்கு²விஞ்ஞாணஸங்கா²தம் நாஸ்ஸ நித³ஸ்ஸனந்தி அனித³ஸ்ஸனம். ஸோதாதி³படிஹனனஸமத்த²தோ ஸஹ படிகே⁴னாதி ஸப்படிக⁴ம். தம் அத்த²தோ சக்கா²யதனாதீ³னி நவ ஆயதனானி. வுத்தப்பகாரம் நாஸ்ஸ நித³ஸ்ஸனந்தி அனித³ஸ்ஸனம். நாஸ்ஸ படிகோ⁴தி அப்படிக⁴ம். தம் அத்த²தோ ட²பேத்வா த³ஸாயதனானி அவஸேஸம் ஸுகு²மரூபம்.

தயோ ஸங்கா²ராதி ஸஹஜாதத⁴ம்மே சேவ ஸம்பராயே ப²லத⁴ம்மே ச ஸங்க²ரோந்தி ராஸீ கரோந்தீதி ஸங்கா²ரா. அபி⁴ஸங்க²ரோதீதி அபி⁴ஸங்கா²ரோ. புஞ்ஞோ அபி⁴ஸங்கா²ரோ புஞ்ஞாபி⁴ஸங்கா²ரோ.

‘‘தத்த² கதமோ புஞ்ஞாபி⁴ஸங்கா²ரோ? குஸலா சேதனா காமாவசரா ரூபாவசரா தா³னமயா ஸீலமயா பா⁴வனாமயா’’தி ஏவம் வுத்தானம் அட்ட²ன்னம் காமாவசரகுஸலமஹாசித்தசேதனானம், பஞ்சன்னம் ரூபாவசரகுஸலசேதனானஞ்சேதம் அதி⁴வசனம். ஏத்த² ச தா³னஸீலமயா அட்டே²வ சேதனா ஹோந்தி. பா⁴வனாமயா தேரஸாபி. யதா² ஹி பகு³ணம் த⁴ம்மம் ஸஜ்ஜா²யமானோ ஏகம் த்³வே அனுஸந்தி⁴ம் க³தோபி ந ஜானாதி, பச்சா² ஆவஜ்ஜந்தோ ஜானாதி, ஏவமேவ கஸிணபரிகம்மம் கரோந்தஸ்ஸ பகு³ணஜ்ஜா²னம் பச்சவேக்க²ந்தஸ்ஸ ஞாணவிப்பயுத்தாபி பா⁴வனா ஹோதி. தேன வுத்தம் ‘‘பா⁴வனாமயா தேரஸாபீ’’தி.

தத்த² தா³னமயாதீ³ஸு ‘‘தா³னம் ஆரப்³ப⁴ தா³னமதி⁴கிச்ச யா உப்பஜ்ஜதி சேதனா ஸஞ்சேதனா சேதயிதத்தம், அயம் வுச்சதி தா³னமயோ புஞ்ஞாபி⁴ஸங்கா²ரோ. ஸீலம் ஆரப்³ப⁴, பா⁴வனம் ஆரப்³ப⁴, பா⁴வனமதி⁴கிச்ச யா உப்பஜ்ஜதி சேதனா ஸஞ்சேதனா சேதயிதத்தம், அயம் வுச்சதி பா⁴வனாமயோ புஞ்ஞாபி⁴ஸங்கா²ரோ’’தி அயம் ஸங்கே²பதே³ஸனா.

சீவராதீ³ஸு பன சதூஸு பச்சயேஸு ரூபாதீ³ஸு வா ச²ஸு ஆரம்மணேஸு அன்னாதீ³ஸு வா த³ஸஸு தா³னவத்தூ²ஸு தம் தம் தே³ந்தஸ்ஸ தேஸம் உப்பாத³னதோ பட்டா²ய புப்³ப³பா⁴கே³, பரிச்சாக³காலே, பச்சா² ஸோமனஸ்ஸசித்தேன அனுஸ்ஸரணே சாதி தீஸு காலேஸு பவத்தா சேதனா தா³னமயா நாம. ஸீலபூரணத்தா²ய பன பப்³ப³ஜிஸ்ஸாமீதி விஹாரம் க³ச்ச²ந்தஸ்ஸ, பப்³ப³ஜந்தஸ்ஸ மனோரத²ம் மத்த²கம் பாபேத்வா பப்³ப³ஜிதோ வதம்ஹி ஸாது⁴ ஸாதூ⁴தி ஆவஜ்ஜந்தஸ்ஸ, பாதிமோக்க²ம் ஸம்வரந்தஸ்ஸ, சீவராத³யோ பச்சயே பச்சவேக்க²ந்தஸ்ஸ, ஆபாத²க³தேஸு ரூபாதீ³ஸு சக்கு²த்³வாராதீ³னி ஸம்வரந்தஸ்ஸ, ஆஜீவம் ஸோதே⁴ந்தஸ்ஸ ச பவத்தா சேதனா ஸீலமயா நாம.

படிஸம்பி⁴தா³யம் வுத்தேன விபஸ்ஸனாமக்³கே³ன ‘‘சக்கு²ம் அனிச்சதோ து³க்க²தோ அனத்ததோ பா⁴வேந்தஸ்ஸ…பே… மனம். ரூபே. த⁴ம்மே. சக்கு²விஞ்ஞாணம்…பே… மனோவிஞ்ஞாணம். சக்கு²ஸம்ப²ஸ்ஸம்…பே… மனோஸம்ப²ஸ்ஸம். சக்கு²ஸம்ப²ஸ்ஸஜம் வேத³னம்…பே… மனோஸம்ப²ஸ்ஸஜம் வேத³னம். ரூபஸஞ்ஞம், ஜராமரணம் அனிச்சதோ து³க்க²தோ அனத்ததோ பா⁴வேந்தஸ்ஸ பவத்தா சேதனா பா⁴வனாமயா நாமா’’தி அயம் வித்தா²ரகதா².

அபுஞ்ஞோ ச ஸோ அபி⁴ஸங்கா²ரோ சாதி அபுஞ்ஞாபி⁴ஸங்கா²ரோ. த்³வாத³ஸஅகுஸலசித்தஸம்பயுத்தானம் சேதனானம் ஏதம் அதி⁴வசனம். வுத்தம்பி சேதம் ‘‘தத்த² கதமோ அபுஞ்ஞாபி⁴ஸங்கா²ரோ? அகுஸலசேதனா காமாவசரா, அயம் வுச்சதி அபுஞ்ஞாபி⁴ஸங்கா²ரோ’’தி. ஆனேஞ்ஜம் நிச்சலம் ஸந்தம் விபாகபூ⁴தம் அரூபமேவ அபி⁴ஸங்க²ரோதீதி ஆனேஞ்ஜாபி⁴ஸங்கா²ரோ. சதுன்னம் அரூபாவசரகுஸலசேதனானம் ஏதம் அதி⁴வசனம். யதா²ஹ ‘‘தத்த² கதமோ ஆனேஞ்ஜாபி⁴ஸங்கா²ரோ? குஸலசேதனா அரூபாவசரா, அயம் வுச்சதி ஆனேஞ்ஜாபி⁴ஸங்கா²ரோ’’தி.

புக்³க³லத்திகே ஸத்தவிதோ⁴ புரிஸபுக்³க³லோ, திஸ்ஸோ ஸிக்கா² ஸிக்க²தீதி ஸேக்கோ². கீ²ணாஸவோ ஸிக்கி²தஸிக்க²த்தா புன ந ஸிக்கி²ஸ்ஸதீதி அஸேக்கோ². புது²ஜ்ஜனோ ஸிக்கா²ஹி பரிபா³ஹியத்தா நேவஸேக்கோ² நாஸேக்கோ².

தே²ரத்திகே ஜாதிமஹல்லகோ கி³ஹீ ஜாதித்தே²ரோ நாம. ‘‘சத்தாரோமே, பி⁴க்க²வே, தே²ரகரணா த⁴ம்மா. இத⁴, பி⁴க்க²வே, தே²ரோ ஸீலவா ஹோதி, ப³ஹுஸ்ஸுதோ ஹோதி, சதுன்னம் ஜா²னானம் லாபீ⁴ ஹோதி, ஆஸவானம் க²யா ப³ஹுஸ்ஸுதோ ஹோதி, சதுன்னம் ஜா²னானம் லாபீ⁴ ஹோதி, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இமே கோ², பி⁴க்க²வே, சத்தாரோ தே²ரகரணா த⁴ம்மா’’தி (அ. நி. 4.22). ஏவம் வுத்தேஸு த⁴ம்மேஸு ஏகேன வா அனேகேஹி வா ஸமன்னாக³தோ த⁴ம்மதே²ரோ நாம. அஞ்ஞதரோ தே²ரனாமகோ பி⁴க்கூ²தி ஏவம் தே²ரனாமகோ வா, யம் வா பன மஹல்லககாலே பப்³ப³ஜிதம் ஸாமணேராத³யோ தி³ஸ்வா தே²ரோ தே²ரோதி வத³ந்தி, அயம் ஸம்முதிதே²ரோ நாம.

புஞ்ஞகிரியவத்தூ²ஸு தா³னமேவ தா³னமயம். புஞ்ஞகிரியா ச ஸா தேஸம் தேஸம் ஆனிஸம்ஸானம் வத்து² சாதி புஞ்ஞகிரியவத்து². இதரேஸுபி த்³வீஸு ஏஸேவ நயோ. அத்த²தோ பன புப்³பே³ வுத்ததா³னமயசேதனாதி³வஸேனேவ ஸத்³தி⁴ம் புப்³ப³பா⁴க³அபரபா⁴க³சேதனாஹி இமானி தீணி புஞ்ஞகிரியவத்தூ²னி வேதி³தப்³பா³னி. ஏகமேகஞ்சேத்த² புப்³ப³பா⁴க³தோ பட்டா²ய காயேன கரோந்தஸ்ஸ காயகம்மம் ஹோதி. தத³த்த²ம் வாசம் நிச்சா²ரேந்தஸ்ஸ வசீகம்மம். காயங்க³வாசங்க³ம் அசோபேத்வா மனஸா சிந்தேந்தஸ்ஸ மனோகம்மம். அன்னாதீ³னி தே³ந்தஸ்ஸ சாபி அன்னதா³னாதீ³னி தே³மீதி வா தா³னபாரமிம் ஆவஜ்ஜேத்வா வா தா³னகாலே தா³னமயம் புஞ்ஞகிரியவத்து² ஹோதி. வத்தஸீஸே ட²த்வா த³த³தோ ஸீலமயம். க²யதோ வயதோ ஸம்மஸனம் பட்ட²பேத்வா த³த³தோ பா⁴வனாமயம் புஞ்ஞகிரியவத்து² ஹோதி.

அபரானிபி ஸத்த புஞ்ஞகிரியவத்தூ²னி அபசிதிஸஹக³தம் புஞ்ஞகிரியவத்து², வேய்யாவச்சஸஹக³தம், பத்தானுப்பதா³னம், பத்தப்³ப⁴னுமோத³னம், தே³ஸனாமயம், ஸவனமயம், தி³ட்டி²ஜுக³தம் புஞ்ஞகிரியவத்தூ²தி. தத்த² மஹல்லகம் தி³ஸ்வா பச்சுக்³க³மனபத்தசீவரப்படிக்³க³ஹணஅபி⁴வாத³னமக்³க³ஸம்பதா³னாதி³வஸேன அபசிதிஸஹக³தம் வேதி³தப்³ப³ம். வுட்³ட⁴தரானம் வத்தப்படிபத்திகரணவஸேன, கா³மம் பிண்டா³ய பவிட்ட²ம் பி⁴க்கு²ம் தி³ஸ்வா பத்தம் க³ஹேத்வா கா³மே பி⁴க்க²ம் ஸமாத³பேத்வா உபஸம்ஹரணவஸேன, ‘‘க³ச்ச² பி⁴க்கூ²னம் பத்தம் ஆஹரா’’தி ஸுத்வா வேகே³ன க³ந்த்வா பத்தாஹரணாதி³வஸேன ச வேய்யாவச்சஸஹக³தம் வேதி³தப்³ப³ம். சத்தாரோ பச்சயே த³த்வா ஸப்³ப³ஸத்தானம் பத்தி ஹோதூதி பவத்தனவஸேன பத்தானுப்பதா³னம் வேதி³தப்³ப³ம். பரேஹி தி³ன்னாய பத்தியா ஸாது⁴ ஸுட்டூ²தி அனுமோத³னாவஸேன பத்தப்³ப⁴னுமோத³னம் வேதி³தப்³ப³ம். ஏகோ ‘‘ஏவம் மம் ‘த⁴ம்மகதி²கோ’தி ஜானிஸ்ஸந்தீ’’தி இச்சா²ய ட²த்வா லாப⁴க³ருகோ ஹுத்வா தே³ஸேதி, தம் ந மஹப்ப²லம். ஏகோ அத்தனோ பகு³ணத⁴ம்மம் அபச்சாஸீஸமானோ பரேஸம் தே³ஸேதி, இத³ம் தே³ஸனாமயம் புஞ்ஞகிரியவத்து² நாம. ஏகோ ஸுணந்தோ ‘‘இதி மம் ‘ஸத்³தோ⁴’தி ஜானிஸ்ஸந்தீ’’தி ஸுணாதி, தம் ந மஹப்ப²லம். ஏகோ ‘‘ஏவம் மே மஹப்ப²லம் ப⁴விஸ்ஸதீ’’தி ஹிதப்ப²ரணேன முது³சித்தேன த⁴ம்மம் ஸுணாதி, இத³ம் ஸவனமயம் புஞ்ஞகிரியவத்து². தி³ட்டி²ஜுக³தம் பன ஸப்³பே³ஸம் நியமலக்க²ணம். யம்கிஞ்சி புஞ்ஞம் கரோந்தஸ்ஸ ஹி தி³ட்டி²யா உஜுபா⁴வேனேவ மஹப்ப²லம் ஹோதி.

இதி இமேஸம் ஸத்தன்னம் புஞ்ஞகிரியவத்தூ²னம் புரிமேஹேவ தீஹி ஸங்க³ஹோ வேதி³தப்³போ³. ஏத்த² ஹி அபசிதிவேய்யாவச்சானி ஸீலமயே. பத்திதா³னபத்தப்³ப⁴னுமோத³னானி தா³னமயே. தே³ஸனாஸவனானி பா⁴வனாமயே. தி³ட்டி²ஜுக³தம் தீஸுபி ஸங்க³ஹம் க³ச்ச²தி.

சோத³னாவத்தூ²னீதி சோத³னாகாரணானி. தி³ட்டே²னாதி மம்ஸசக்கு²னா வா தி³ப்³ப³சக்கு²னா வா வீதிக்கமம் தி³ஸ்வா சோதே³தி. ஸுதேனாதி பகதிஸோதேன வா தி³ப்³ப³ஸோதேன வா பரஸ்ஸ ஸத்³த³ம் ஸுத்வா சோதே³தி. பரிஸங்காய வாதி தி³ட்ட²பரிஸங்கிதேன வா ஸுதபரிஸங்கிதேன வா முதபரிஸங்கிதேன வா சோதே³தி. அயமேத்த² ஸங்கே²போ, வித்தா²ரோ பன ஸமந்தபாஸாதி³காயம் வுத்தனயேனேவ வேதி³தப்³போ³.

காமூபபத்தியோதி காமூபஸேவனா காமப்படிலாபா⁴ வா. பச்சுபட்டி²தகாமாதி நிப³த்³த⁴காமா நிப³த்³தா⁴ரம்மணா. ஸேய்யதா²பி மனுஸ்ஸாதி யதா² மனுஸ்ஸா. மனுஸ்ஸா ஹி நிப³த்³தே⁴யேவ வத்து²ஸ்மிம் வஸம் வத்தேந்தி. யத்த² படிப³த்³த⁴சித்தா ஹோந்தி, ஸதம்பி ஸஹஸ்ஸம்பி த³த்வா மாதுகா³மம் ஆனேத்வா நிப³த்³த⁴போ⁴க³ம் பு⁴ஞ்ஜந்தி. ஏகச்சே தே³வா நாம சதுதே³வலோகவாஸினோ. தேபி நிப³த்³த⁴வத்து²ஸ்மிம்யேவ வஸம் வத்தேந்தி. ஏகச்சே வினிபாதிகா நாம நேரயிகே ட²பேத்வா அவஸேஸா மச்ச²கச்ச²பாத³யோபி ஹி நிப³த்³த⁴வத்து²ஸ்மிம்யேவ வஸம் வத்தேந்தி. மச்சோ² அத்தனோ மச்சி²யா கச்ச²போ கச்ச²பியாதி. நிம்மினித்வா நிம்மினித்வாதி நீலபீதாதி³வஸேன யாதி³ஸம் யாதி³ஸம் அத்தனோ ரூபம் இச்ச²ந்தி, தாதி³ஸம் தாதி³ஸம் நிம்மினித்வா ஆயஸ்மதோ அனுருத்³த⁴ஸ்ஸ புரதோ மனாபகாயிகா தே³வதா விய. நிம்மானரதீதி ஏவம் ஸயம் நிம்மிதே நிம்மிதே நிம்மானே ரதி ஏதேஸந்தி நிம்மானரதீ. பரனிம்மிதகாமாதி பரேஹி நிம்மிதகாமா. தேஸஞ்ஹி மனம் ஞத்வா பரே யதா²ருசிதம் காமபோ⁴க³ம் நிம்மினந்தி, தே தத்த² வஸம் வத்தேந்தி. கத²ம் பரஸ்ஸ மனம் ஜானந்தீதி? பகதிஸேவனவஸேன. யதா² ஹி குஸலோ ஸூதோ³ ரஞ்ஞோ பு⁴ஞ்ஜந்தஸ்ஸ யம் யம் ஸோ ப³ஹும் க³ண்ஹாதி, தம் தம் தஸ்ஸ ருச்சதீதி ஜானாதி, ஏவம் பகதியா அபி⁴ருசிதாரம்மணம் ஞத்வா தாதி³ஸகம்யேவ நிம்மினந்தி. தே தத்த² வஸம் வத்தேந்தி, மேது²னம் ஸேவந்தி. கேசி பன தே²ரா ‘‘ஹஸிதமத்தேன ஓலோகிதமத்தேன ஆலிங்கி³தமத்தேன ச தேஸம் காமகிச்சம் இஜ்ஜ²தீ’’தி வத³ந்தி, தம் அட்ட²கதா²யம் ‘‘ஏதம் பன நத்தீ²’’தி படிக்கி²த்தம். ந ஹி காயேன அபு²ஸந்தஸ்ஸ போ²ட்ட²ப்³ப³ம் காமகிச்சம் ஸாதே⁴தி. ச²ன்னம்பி ஹி காமாவசரானம் காமா பாகதிகா ஏவ. வுத்தம்பி சேதம் –

‘‘ச² ஏதே காமாவசரா, ஸப்³ப³காமஸமித்³தி⁴னோ;

ஸப்³பே³ஸம் ஏகஸங்கா²தம், ஆயு ப⁴வதி கித்தக’’ந்தி. (விப⁴. 1023);

ஸுகூ²பபத்தியோதி ஸுக²ப்படிலாபா⁴. உப்பாதே³த்வா உப்பாதே³த்வா ஸுக²ம் விஹரந்தீதி தே ஹேட்டா² பட²மஜ்ஜா²னஸுக²ம் நிப்³ப³த்தேத்வா உபரி விபாகஜ்ஜா²னஸுக²ம் அனுப⁴வந்தீதி அத்தோ². ஸுகே²ன அபி⁴ஸன்னாதி து³தியஜ்ஜா²னஸுகே²ன திந்தா. பரிஸன்னாதி ஸமந்ததோ திந்தா. பரிபூராதி பரிபுண்ணா. பரிப்பு²டாதி தஸ்ஸேவ வேவசனம். இத³ம்பி விபாகஜ்ஜா²னஸுக²மேவ ஸந்தா⁴ய வுத்தம். அஹோஸுக²ம் அஹோஸுக²ந்தி தேஸம் கிர ப⁴வலோபோ⁴ மஹா உப்பஜ்ஜதி. தஸ்மா கதா³சி கரஹசி ஏவம் உதா³னம் உதா³னேந்தி. ஸந்தமேவாதி பணீதமேவ. துஸிதாதி ததோ உத்தரிம் ஸுக²ஸ்ஸ அபத்த²னதோ ஸந்துட்டா² ஹுத்வா. ஸுக²ம் படிவேதே³ந்தீதி ததியஜ்ஜா²னஸுக²ம் அனுப⁴வந்தி.

ஸேக்கா² பஞ்ஞாதி ஸத்த அரியபஞ்ஞா. அரஹதோ பஞ்ஞா அஸேக்கா². அவஸேஸா பஞ்ஞா நேவஸேக்கா²னாஸேக்கா².

சிந்தாமயாதீ³ஸு அயம் வித்தா²ரோ – ‘‘தத்த² கதமா சிந்தாமயா பஞ்ஞா? யோக³விஹிதேஸு வா கம்மாயதனேஸு யோக³விஹிதேஸு வா ஸிப்பாயதனேஸு யோக³விஹிதேஸு வா விஜ்ஜாட்டா²னேஸு கம்மஸ்ஸகதம் வா ஸச்சானுலோமிகம் வா ரூபம் அனிச்சந்தி வா…பே… விஞ்ஞாணம் அனிச்சந்தி வா யம் ஏவரூபம் அனுலோமிகம் க²ந்திம் தி³ட்டி²ம் ருசிம் முத்திம் பேக்க²ம் த⁴ம்மனிஜ்ஜா²னக்க²ந்திம் பரதோ அஸுத்வா படிலப⁴தி, அயம் வுச்சதி சிந்தாமயா பஞ்ஞா. தத்த² கதமா ஸுதமயா பஞ்ஞா? யோக³விஹிதேஸு வா கம்மாயதனேஸு…பே… த⁴ம்மனிஜ்ஜா²னக்க²ந்திம் பரதோ ஸுத்வா படிலப⁴தி, அயம் வுச்சதி ஸுதமயா பஞ்ஞா. (தத்த² கதமா பா⁴வனாமயா பஞ்ஞா?) ஸப்³பா³பி ஸமாபன்னஸ்ஸ பஞ்ஞா பா⁴வனாமயா பஞ்ஞா’’தி (விப⁴. 768-69).

ஸுதாவுத⁴ந்தி ஸுதமேவ ஆவுத⁴ம். தம் அத்த²தோ தேபிடகம் பு³த்³த⁴வசனம். தஞ்ஹி நிஸ்ஸாய பி⁴க்கு² பஞ்ஞாவுத⁴ம் நிஸ்ஸாய ஸூரோ யோதோ⁴ அவிகம்பமானோ மஹாகந்தாரம் விய ஸம்ஸாரகந்தாரம் அதிக்கமதி அவிஹஞ்ஞமானோ. தேனேவ வுத்தம் – ‘‘ஸுதாவுதோ⁴, பி⁴க்க²வே, அரியஸாவகோ அகுஸலம் பஜஹதி, குஸலம் பா⁴வேதி, ஸாவஜ்ஜம் பஜஹதி, அனவஜ்ஜம் பா⁴வேதி, ஸுத்³த⁴மத்தானம் பரிஹரதீ’’தி (அ. நி. 7.67).

பவிவேகாவுத⁴ந்தி ‘‘காயவிவேகோ சித்தவிவேகோ உபதி⁴விவேகோ’’தி அயம் திவிதோ⁴பி விவேகோவ ஆவுத⁴ம். தஸ்ஸ நானாகரணம் காயவிவேகோ விவேகட்ட²காயானம் நேக்க²ம்மாபி⁴ரதானம். சித்தவிவேகோ ச பரிஸுத்³த⁴சித்தானம் பரமவோதா³னப்பத்தானம். உபதி⁴விவேகோ ச நிருபதீ⁴னம் புக்³க³லானம். இமஸ்மிஞ்ஹி திவிதே⁴ விவேகே அபி⁴ரதோ, ந குதோசி பா⁴யதி. தஸ்மா அயம்பி அவஸ்ஸயட்டே²ன ஆவுத⁴ந்தி வுத்தோ. லோகியலோகுத்தரபஞ்ஞாவ ஆவுத⁴ம் பஞ்ஞாவுத⁴ம். யஸ்ஸ ஸா அத்தி², ஸோ ந குதோசி பா⁴யதி, ந சஸ்ஸ கோசி பா⁴யதி. தஸ்மா ஸாபி அவஸ்ஸயட்டே²னேவ ஆவுத⁴ந்தி வுத்தா.

அனஞ்ஞாதஞ்ஞஸ்ஸாமீதிந்த்³ரியந்தி இதோ புப்³பே³ அனஞ்ஞாதம் அவிதி³தம் த⁴ம்மம் ஜானிஸ்ஸாமீதி படிபன்னஸ்ஸ உப்பன்னம் இந்த்³ரியம். ஸோதாபத்திமக்³க³ஞாணஸ்ஸேதம் அதி⁴வசனம். அஞ்ஞிந்த்³ரியந்தி அஞ்ஞாபூ⁴தம் ஆஜானனபூ⁴தம் இந்த்³ரியம். ஸோதாபத்திப²லதோ பட்டா²ய ச²ஸு டா²னேஸு ஞாணஸ்ஸேதம் அதி⁴வசனம். அஞ்ஞாதாவிந்த்³ரியந்தி அஞ்ஞாதாவீஸு ஜானனகிச்சபரியோஸானப்பத்தேஸு த⁴ம்மேஸு இந்த்³ரியம். அரஹத்தப²லஞாணஸ்ஸேதம் அதி⁴வசனம்.

மம்ஸசக்கு² சக்கு²பஸாதோ³. தி³ப்³ப³சக்கு² ஆலோகனிஸ்ஸிதம் ஞாணம். பஞ்ஞாசக்கு² லோகியலோகுத்தரபஞ்ஞா.

அதி⁴ஸீலஸிக்கா²தீ³ஸு அதி⁴ஸீலஞ்ச தம் ஸிக்கி²தப்³ப³தோ ஸிக்கா² சாதி அதி⁴ஸீலஸிக்கா². இதரஸ்மிம் த்³வயேபி ஏஸேவ நயோ. தத்த² ஸீலம் அதி⁴ஸீலம், சித்தம் அதி⁴சித்தம், பஞ்ஞா அதி⁴பஞ்ஞாதி அயம் பபே⁴தோ³ வேதி³தப்³போ³ –

ஸீலம் நாம பஞ்சஸீலத³ஸஸீலானி, பாதிமோக்க²ஸம்வரோ அதி⁴ஸீலம் நாம. அட்ட² ஸமாபத்தியோ சித்தம், விபஸ்ஸனாபாத³கஜ்ஜா²னம் அதி⁴சித்தம். கம்மஸ்ஸகதஞாணம் பஞ்ஞா, விபஸ்ஸனாபஞ்ஞா அதி⁴பஞ்ஞா. அனுப்பன்னேபி ஹி பு³த்³து⁴ப்பாதே³ பவத்ததீதி பஞ்சஸீலத³ஸஸீலானி ஸீலமேவ, பாதிமோக்க²ஸம்வரஸீலம் பு³த்³து⁴ப்பாதே³யேவ பவத்ததீதி அதி⁴ஸீலம். சித்தபஞ்ஞாஸுபி ஏஸேவ நயோ. அபிச நிப்³பா³னம் பத்த²யந்தேன ஸமாதி³ன்னம் பஞ்சஸீலம்பி த³ஸஸீலம்பி அதி⁴ஸீலமேவ. ஸமாபன்னா அட்ட² ஸமாபத்தியோபி அதி⁴சித்தமேவ. ஸப்³ப³ம் வா லோகியம் ஸீலமேவ, லோகுத்தரம் அதி⁴ஸீலம். சித்தபஞ்ஞாஸுபி ஏஸேவ நயோ.

பா⁴வனாஸு கீ²ணாஸவஸ்ஸ பஞ்சத்³வாரிககாயோ காயபா⁴வனா நாம. அட்ட² ஸமாபத்தியோ சித்தபா⁴வனா நாம. அரஹத்தப²லபஞ்ஞா பஞ்ஞாபா⁴வனா நாம. கீ²ணாஸவஸ்ஸ ஹி ஏகந்தேனேவ பஞ்சத்³வாரிககாயோ ஸுபா⁴விதோ ஹோதி. அட்ட² ஸமாபத்தியோ சஸ்ஸ ந அஞ்ஞேஸம் விய து³ப்³ப³லா, தஸ்ஸேவ ச பஞ்ஞா பா⁴விதா நாம ஹோதி பஞ்ஞாவேபுல்லபத்தியா. தஸ்மா ஏவம் வுத்தம்.

அனுத்தரியேஸு விபஸ்ஸனா த³ஸ்ஸனானுத்தரியம் மக்³கோ³ படிபதா³னுஸ்ஸரியம். ப²லம் விமுத்தானுத்தரியம். ப²லம் வா த³ஸ்ஸனானுத்தரியம். மக்³கோ³ படிபதா³னுத்தரியம். நிப்³பா³னம் விமுத்தானுத்தரியம். நிப்³பா³னம் வா த³ஸ்ஸனானுத்தரியம், ததோ உத்தரிஞ்ஹி த³ட்ட²ப்³ப³ம் நாம நத்தி². மக்³கோ³ படிபதா³னுத்தரியம். ப²லம் விமுத்தானுத்தரியம். அனுத்தரியந்தி உத்தமம் ஜேட்ட²கம்.

ஸமாதீ⁴ஸு பட²மஜ்ஜா²னஸமாதி⁴ ஸவிதக்கஸவிசாரோ. பஞ்சகனயேன து³தியஜ்ஜா²னஸமாதி⁴ அவிதக்கவிசாரமத்தோ. ஸேஸோ அவிதக்கஅவிசாரோ.

ஸுஞ்ஞதாதீ³ஸு திவிதா⁴ கதா² ஆக³மனதோ, ஸகு³ணதோ, ஆரம்மணதோதி. ஆக³மனதோ நாம ஏகோ பி⁴க்கு² அனத்ததோ அபி⁴னிவிஸித்வா அனத்ததோ தி³ஸ்வா அனத்ததோ வுட்டா²தி, தஸ்ஸ விபஸ்ஸனா ஸுஞ்ஞதா நாம ஹோதி. கஸ்மா? அஸுஞ்ஞதத்தகாரகானம் கிலேஸானம் அபா⁴வா. விபஸ்ஸனாக³மனேன மக்³க³ஸமாதி⁴ ஸுஞ்ஞதோ நாம ஹோதி. மக்³கா³க³மனேன ப²லஸமாதி⁴ ஸுஞ்ஞதோ நாம. அபரோ அனிச்சதோ அபி⁴னிவிஸித்வா அனிச்சதோ தி³ஸ்வா அனிச்சதோ வுட்டா²தி. தஸ்ஸ விபஸ்ஸனா அனிமித்தா நாம ஹோதி. கஸ்மா? நிமித்தகாரககிலேஸாபா⁴வா. விபஸ்ஸனாக³மனேன மக்³க³ஸமாதி⁴ அனிமித்தோ நாம ஹோதி. மக்³கா³க³மனேன ப²லம் அனிமித்தம் நாம. அபரோ து³க்க²தோ அபி⁴னிவிஸித்வா து³க்க²தோ தி³ஸ்வா து³க்க²தோ வுட்டா²தி, தஸ்ஸ விபஸ்ஸனா அப்பணிஹிதா நாம ஹோதி. கஸ்மா? பணிதி⁴காரககிலேஸாபா⁴வா. விபஸ்ஸனாக³மனேன மக்³க³ஸமாதி⁴ அப்பணிஹிதோ நாம. மக்³கா³க³மனேன ப²லம் அப்பணிஹிதம் நாமாதி அயம் ஆக³மனதோ கதா². மக்³க³ஸமாதி⁴ பன ராகா³தீ³ஹி ஸுஞ்ஞதத்தா ஸுஞ்ஞதோ, ராக³னிமித்தாதீ³னம் அபா⁴வா அனிமித்தோ, ராக³பணிதி⁴ஆதீ³னம் அபா⁴வா அப்பணிஹிதோதி அயம் ஸகு³ணதோ கதா². நிப்³பா³னம் ராகா³தீ³ஹி ஸுஞ்ஞதத்தா ராகா³தி³னிமித்தபணிதீ⁴னஞ்ச அபா⁴வா ஸுஞ்ஞதஞ்சேவ அனிமித்தஞ்ச அப்பணிஹிதஞ்ச. ததா³ரம்மணோ மக்³க³ஸமாதி⁴ ஸுஞ்ஞதோ அனிமித்தோ அப்பணிஹிதோ. அயம் ஆரம்மணதோ கதா².

ஸோசேய்யானீதி ஸுசிபா⁴வகரா ஸோசேய்யப்படிபதா³ த⁴ம்மா. வித்தா²ரோ பனேத்த² ‘‘தத்த² கதமம் காயஸோசேய்யம்? பாணாதிபாதா வேரமணீ’’திஆதி³னா நயேன வுத்தானம் திண்ணம் ஸுசரிதானம் வஸேன வேதி³தப்³போ³.

மோனேய்யானீதி முனிபா⁴வகரா மோனேய்யப்படிபதா³ த⁴ம்மா. தேஸம் வித்தா²ரோ ‘‘தத்த² கதமம் காயமோனேய்யம்? திவித⁴காயது³ச்சரிதஸ்ஸ பஹானம் காயமோனேய்யம், திவித⁴ம் காயஸுசரிதம் காயமோனேய்யம், காயாரம்மணே ஞாணம் காயமோனேய்யம், காயபரிஞ்ஞா காயமோனேய்யம், காயபரிஞ்ஞாஸஹக³தோ மக்³கோ³ காயமோனேய்யம், காயஸ்மிம் ச²ந்த³ராக³ப்பஹானம் காயமோனேய்யம், காயஸங்கா²ரனிரோதா⁴ சதுத்த²ஜ்ஜா²னஸமாபத்தி காயமோனேய்யம். தத்த² கதமம் வசீமோனேய்யம்? சதுப்³பி³த⁴வசீது³ச்சரிதஸ்ஸ பஹானம் வசீமோனேய்யம், சதுப்³பி³த⁴ம் வசீஸுசரிதம் வசீமோனேய்யம், வாசாரம்மணே ஞாணம் வசீமோனேய்யம் வாசாபரிஞ்ஞா வசீமோனேய்யம் பரிஞ்ஞாஸஹக³தோ மக்³கோ³, வாசாய ச²ந்த³ராக³ப்பஹானம், வசீஸங்கா²ரனிரோதா⁴ து³தியஜ்ஜா²னஸமாபத்தி வசீமோனேய்யம். தத்த² கதமம் மனோமோனேய்யம்? திவித⁴மனோது³ச்சரிதஸ்ஸ பஹானம் மனோமோனேய்யம், திவித⁴ம் மனோஸுசரிதம் மனோமோனேய்யம், மனாரம்மணே ஞாணம் மனோமோனேய்யம், மனோபரிஞ்ஞா மனோமோனேய்யம். பரிஞ்ஞாஸஹக³தோ மக்³கோ³, மனஸ்மிம் ச²ந்த³ராக³ப்பஹானம், சித்தஸங்கா²ரனிரோதா⁴ ஸஞ்ஞாவேத³யிதனிரோத⁴ஸமாபத்தி மனோமோனேய்ய’’ந்தி (மஹானி. 14).

கோஸல்லேஸு ஆயோதி வுட்³டி⁴. அபாயோதி அவுட்³டி⁴. தஸ்ஸ தஸ்ஸ காரணம் உபாயோ. தேஸம் பஜானனா கோஸல்லம். வித்தா²ரோ பன விப⁴ங்கே³ வுத்தோயேவ.

வுத்தஞ்ஹேதம் – ‘‘தத்த² கதமம் ஆயகோஸல்லம்? இமே த⁴ம்மே மனஸிகரோதோ அனுப்பன்னா சேவ அகுஸலா த⁴ம்மா நுப்பஜ்ஜந்தி, உப்பன்னா ச அகுஸலா த⁴ம்மா நிருஜ்ஜ²ந்தி. இமே வா பன மே த⁴ம்மே மனஸிகரோதோ அனுப்பன்னா சேவ குஸலா த⁴ம்மா உப்பஜ்ஜந்தி, உப்பன்னா ச குஸலா த⁴ம்மா பி⁴ய்யோபா⁴வாய வேபுல்லாய பா⁴வனாய பாரிபூரியா ஸம்வத்தந்தீதி, யா தத்த² பஞ்ஞா பஜானனா…பே… ஸம்மாதி³ட்டி². இத³ம் வுச்சதி ஆயகோஸல்லம். தத்த² கதமம் அபாயகோஸல்லம்? இமே த⁴ம்மே மனஸிகரோதோ அனுப்பன்னா சேவ குஸலா த⁴ம்மா ந உப்பஜ்ஜந்தி, உப்பன்னா ச குஸலா த⁴ம்மா நிருஜ்ஜ²ந்தி. இமே வா பன மே த⁴ம்மே மனஸிகரோதோ அனுப்பன்னா சேவ அகுஸலா த⁴ம்மா உப்பஜ்ஜந்தி, உப்பன்னா ச அகுஸலா த⁴ம்மா பி⁴ய்யோபா⁴வாய வேபுல்லாய பா⁴வனாய பாரிபூரியா ஸம்வத்தந்தீதி, யா தத்த² பஞ்ஞா பஜானனா…பே… ஸம்மாதி³ட்டி². இத³ம் வுச்சதி அபாயகோஸல்லம். ஸப்³பா³பி தத்ருபாயா பஞ்ஞா உபாயகோஸல்ல’’ந்தி (விப⁴. 771). இத³ம் பன அச்சாயிககிச்சே வா ப⁴யே வா உப்பன்னே தஸ்ஸ திகிச்ச²னத்த²ம் டா²னுப்பத்தியா காரணஜானனவஸேனேவ வேதி³தப்³ப³ம்.

மதா³தி மஜ்ஜனாகாரவஸேன பவத்தமானா. தேஸு ‘‘அஹம் நிரோகோ³ ஸட்டி² வா ஸத்ததி வா வஸ்ஸானி அதிக்கந்தானி, ந மே ஹரீதகீக²ண்ட³ம்பி கா²தி³தபுப்³ப³ம், இமே பனஞ்ஞே அஸுகம் நாம டா²னம் ருஜ்ஜதி, பே⁴ஸஜ்ஜம் கா²தா³மாதி விசரந்தி, கோ அஞ்ஞோ மாதி³ஸோ நிரோகோ³ நாமா’’தி ஏவம் மானகரணம் ஆரோக்³யமதோ³. ‘‘மஹல்லககாலே புஞ்ஞம் கரிஸ்ஸாம, த³ஹரம்ஹ தாவா’’தி யோப்³ப³னே ட²த்வா மானகரணம் யோப்³ப³னமதோ³. ‘‘சிரம் ஜீவிம், சிரம் ஜீவாமி, சிரம் ஜீவிஸ்ஸாமி; ஸுக²ம் ஜீவிம், ஸுக²ம் ஜீவாமி, ஸுக²ம் ஜீவிஸ்ஸாமீ’’தி ஏவம் மானகரணம் ஜீவிதமதோ³.

ஆதி⁴பதேய்யேஸு அதி⁴பதிதோ ஆக³தம் ஆதி⁴பதேய்யம். ‘‘ஏத்தகோம்ஹி ஸீலேன ஸமாதி⁴னா பஞ்ஞாய விமுத்தியா, ந மே ஏதம் பதிரூப’’ந்தி ஏவம் அத்தானம் அதி⁴பத்திம் ஜேட்ட²கம் கத்வா பாபஸ்ஸ அகரணம் அத்தாதி⁴பதேய்யம் நாம. லோகம் அதி⁴பதிம் கத்வா அகரணம் லோகாதி⁴பதேய்யம் நாம. லோகுத்தரத⁴ம்மம் அதி⁴பதிம் கத்வா அகரணம் த⁴ம்மாதி⁴பதேய்யம் நாம.

கதா²வத்தூ²னீதி கதா²காரணானி. அதீதம் வா அத்³தா⁴னந்தி அதீதம் த⁴ம்மம், அதீதக்க²ந்தே⁴தி அத்தோ². அபிச ‘‘யம், பி⁴க்க²வே, ரூபம் அதீதம் நிருத்³த⁴ம் விபரிணதம், ‘அஹோஸீ’தி தஸ்ஸ ஸங்கா², ‘அஹோஸீ’தி தஸ்ஸ பஞ்ஞத்தி ‘அஹோஸீ’தி தஸ்ஸ ஸமஞ்ஞா, ந தஸ்ஸ ஸங்கா² ‘அத்தீ²’தி, ந தஸ்ஸ ஸங்கா² ‘ப⁴விஸ்ஸதீ’தி (ஸம். நி. 3.62) ஏவம் ஆக³தேன நிருத்திபத²ஸுத்தேனபேத்த² அத்தோ² தீ³பேதப்³போ³.

விஜ்ஜாதி தமவிஜ்ஜ²னட்டே²ன விஜ்ஜா. விதி³தகரணட்டே²னாபி விஜ்ஜா. புப்³பே³னிவாஸானுஸ்ஸதிஞாணஞ்ஹி உப்பஜ்ஜமானம் புப்³பே³னிவாஸம் சா²தே³த்வா டி²தம் தமம் விஜ்ஜ²தி, புப்³பே³னிவாஸஞ்ச விதி³தம் கரோதீதி விஜ்ஜா. சுதூபபாதஞாணம் சுதிபடிஸந்தி⁴ச்சா²த³கம் தமம் விஜ்ஜ²தி, தஞ்ச விதி³தம் கரோதீதி விஜ்ஜா. ஆஸவானம் க²யே ஞாணம் சதுஸச்சச்சா²த³கம் தமம் விஜ்ஜ²தி, சதுஸச்சத⁴ம்மஞ்ச விதி³தம் கரோதீதி விஜ்ஜா.

விஹாரேஸு அட்ட² ஸமாபத்தியோ தி³ப்³போ³ விஹாரோ. சதஸ்ஸோ அப்பமஞ்ஞா ப்³ரஹ்மா விஹாரோ. ப²லஸமாபத்தி அரியோ விஹாரோ.

பாடிஹாரியானி கேவட்டஸுத்தே வித்தா²ரிதானேவ.

‘‘இமே கோ², ஆவுஸோ’’திஆதீ³ஸு வுத்தனயேனேவ யோஜேதப்³ப³ம். இதி ஸமஸட்டி²யா திகானம் வஸேன அஸீதிஸதபஞ்ஹே கதே²ந்தோ தே²ரோ ஸாமக்³கி³ரஸம் த³ஸ்ஸேஸீதி.

திகவண்ணனா நிட்டி²தா.

சதுக்கவண்ணனா

306. இதி திகவஸேன ஸாமக்³கி³ரஸம் த³ஸ்ஸேத்வா இதா³னி சதுக்கவஸேன த³ஸ்ஸேதும் புன தே³ஸனம் ஆரபி⁴. தத்த² ‘‘ஸதிபட்டா²னசதுக்கம்’’ புப்³பே³ வித்தா²ரிதமேவ.

ஸம்மப்பதா⁴னசதுக்கே ச²ந்த³ம் ஜனேதீதி ‘‘யோ ச²ந்தோ³ ச²ந்தி³கதா கத்துகம்யதா குஸலோ த⁴ம்மச்ச²ந்தோ³’’தி ஏவம் வுத்தம் கத்துகம்யதம் ஜனேதி. வாயமதீதி வாயாமம் கரோதி. வீரியம் ஆரப⁴தீதி வீரியம் ஜனேதி. சித்தம் பக்³க³ண்ஹாதீதி சித்தம் உபத்த²ம்பே⁴தி. அயமேத்த² ஸங்கே²போ. வித்தா²ரோ பன ஸம்மப்பதா⁴னவிப⁴ங்கே³ ஆக³தோயேவ.

இத்³தி⁴பாதே³ஸு ச²ந்த³ம் நிஸ்ஸாய பவத்தோ ஸமாதி⁴ ச²ந்த³ஸமாதி⁴. பதா⁴னபூ⁴தா ஸங்கா²ரா பதா⁴னஸங்கா²ரா. ஸமன்னாக³தந்தி தேஹி த⁴ம்மேஹி உபேதம். இத்³தி⁴யா பாத³ம், இத்³தி⁴பூ⁴தம் வா பாத³ந்தி இத்³தி⁴பாத³ம். ஸேஸேஸுபி ஏஸேவ நயோ. அயமேத்த² ஸங்கே²போ, வித்தா²ரோ பன இத்³தி⁴பாத³விப⁴ங்கே³ ஆக³தோ ஏவ. விஸுத்³தி⁴மக்³கே³ பனஸ்ஸ அத்தோ² தீ³பிதோ. ஜா²னகதா²பி விஸுத்³தி⁴மக்³கே³ வித்தா²ரிதாவ.

307. தி³ட்ட²த⁴ம்மஸுக²விஹாராயாதி இமஸ்மிம்யேவ அத்தபா⁴வே ஸுக²விஹாரத்தா²ய. இத⁴ ப²லஸமாபத்திஜா²னானி, கீ²ணாஸவஸ்ஸ அபரபா⁴கே³ நிப்³ப³த்திதஜா²னானி ச கதி²தானி.

ஆலோகஸஞ்ஞம் மனஸிகரோதீதி தி³வா வா ரத்திம் வா ஸூரியசந்த³பஜ்ஜோதமணிஆதீ³னம் ஆலோகம் ஆலோகோதி மனஸிகரோதி. தி³வாஸஞ்ஞம் அதி⁴ட்டா²தீதி ஏவம் மனஸி கத்வா தி³வாதிஸஞ்ஞம் ட²பேதி. யதா² தி³வா ததா² ரத்திந்தி யதா² தி³வா தி³ட்டோ² ஆலோகோ, ததே²வ தம் ரத்திம் மனஸிகரோதி. யதா² ரத்திம் ததா² தி³வாதி யதா² ரத்திம் ஆலோகோ தி³ட்டோ², ஏவமேவ தி³வா மனஸிகரோதி. இதி விவடேன சேதஸாதி ஏவம் அபிஹிதேன சித்தேன. அபரியோனத்³தே⁴னாதி ஸமந்ததோ அனத்³தே⁴ன. ஸப்பபா⁴ஸந்தி ஸஓபா⁴ஸம். ஞாணத³ஸ்ஸனபடிலாபா⁴யாதி ஞாணத³ஸ்ஸனபடிலாப⁴த்தா²ய. இமினா கிம் கதி²தம்? மித்³த⁴வினோத³னஆலோகோ கதி²தோ பரிகம்மஆலோகோ வா. இமினா கிம் கதி²தம் ஹோதி? கீ²ணாஸவஸ்ஸ தி³ப்³ப³சக்கு²ஞாணம். தஸ்மிம் வா ஆக³தேபி அனாக³தேபி பாத³கஜ்ஜா²னஸமாபத்திமேவ ஸந்தா⁴ய ‘‘ஸப்பபா⁴ஸம் சித்தம் பா⁴வேதீ’’தி வுத்தம்.

ஸதிஸம்பஜஞ்ஞாயாதி ஸத்தட்டா²னிகஸ்ஸ ஸதிஸம்பஜஞ்ஞஸ்ஸ அத்தா²ய. விதி³தா வேத³னா உப்பஜ்ஜந்தீதிஆதீ³ஸு கீ²ணாஸவஸ்ஸ வத்து² விதி³தம் ஹோதி ஆரம்மணம் விதி³தம் வத்தா²ரம்மணம் விதி³தம். வத்தா²ரம்மணவிதி³ததாய ஏவம் வேத³னா உப்பஜ்ஜந்தி, ஏவம் திட்ட²ந்தி, ஏவம் நிருஜ்ஜ²ந்தி. ந கேவலஞ்ச வேத³னா ஏவ இத⁴ வுத்தா ஸஞ்ஞாத³யோபி, அவுத்தா சேதனாத³யோபி, விதி³தா ச உப்பஜ்ஜந்தி சேவ திட்ட²ந்தி ச நிருஜ்ஜ²ந்தி ச. அபி ச வேத³னாய உப்பாதோ³ விதி³தோ ஹோதி, உபட்டா²னம் விதி³தம் ஹோதி. அவிஜ்ஜாஸமுத³யா வேத³னாஸமுத³யோ, தண்ஹாஸமுத³யா கம்மஸமுத³யோ, ப²ஸ்ஸஸமுத³யா வேத³னாயஸமுத³யோ. நிப்³ப³த்திலக்க²ணம் பஸ்ஸந்தோபி வேத³னாக்க²ந்த⁴ஸ்ஸ ஸமுத³யம் பஸ்ஸதி. ஏவம் வேத³னாய உப்பாதோ³ விதி³தோ ஹோதி. கத²ம் வேத³னாய உபட்டா²னம் விதி³தம் ஹோதி? அனிச்சதோ மனஸிகரோதோ க²யதூபட்டா²னம் விதி³தம் ஹோதி. து³க்க²தோ மனஸிகரோதோ ப⁴யதூபட்டா²னம் விதி³தம் ஹோதி. அனத்ததோ மனஸிகரோதோ ஸுஞ்ஞதூபட்டா²னம் விதி³தம் ஹோதி. ஏவம் வேத³னாய உபட்டா²னம் விதி³தம் ஹோதி, க²யதோ ப⁴யதோ ஸுஞ்ஞதோ ஜானாதி. கத²ம் வேத³னாய அத்த²ங்க³மோ விதி³தோ ஹோதி? அவிஜ்ஜானிரோதா⁴ வேத³னானிரோதோ⁴.…பே… ஏவம் வேத³னாய அத்த²ங்க³மோ விதி³தோ ஹோதி. இமினாபி நயேனேத்த² அத்தோ² வேதி³தப்³போ³.

இதி ரூபந்திஆதி³ வுத்தனயமேவ. அயம் ஆவுஸோ ஸமாதி⁴பா⁴வனாதி அயம் ஆஸவானம் க²யஞாணஸ்ஸ பாத³கஜ்ஜா²னஸமாதி⁴பா⁴வனா.

308. அப்பமஞ்ஞாதி பமாணம் அக³ஹேத்வா அனவஸேஸப²ரணவஸேன அப்பமஞ்ஞாவ. அனுபத³வண்ணனா பன பா⁴வனாஸமாதி⁴விதா⁴னஞ்ச ஏதாஸம் விஸுத்³தி⁴மக்³கே³ வித்தா²ரிதமேவ. அரூபகதா²பி விஸுத்³தி⁴மக்³கே³ வித்தா²ரிதாவ.

அபஸ்ஸேனானீதி அபஸ்ஸயானி. ஸங்கா²யாதி ஞாணேன ஞத்வா. படிஸேவதீதி ஞாணேன ஞத்வா ஸேவிதப்³ப³யுத்தகமேவ ஸேவதி. தஸ்ஸ ச வித்தா²ரோ ‘‘படிஸங்கா² யோனிஸோ சீவரம் பரிபு⁴ஞ்ஜதீ’’திஆதி³னா நயேன வேதி³தப்³போ³. ஸங்கா²யேகம் அதி⁴வாஸேதீதி ஞாணேன ஞத்வா அதி⁴வாஸேதப்³ப³யுத்தகமேவ அதி⁴வாஸேதி. வித்தா²ரோ பனேத்த² ‘‘படிஸங்கா² யோனிஸோ க²மோ ஹோதி ஸீதஸ்ஸா’’திஆதி³னா நயேன வேதி³தப்³போ³. பரிவஜ்ஜேதீதி ஞாணேன ஞத்வா பரிவஜ்ஜேதும் யுத்தமேவ பரிவஜ்ஜேதி. தஸ்ஸ வித்தா²ரோ ‘‘படிஸங்கா² யோனிஸோ சண்ட³ம் ஹத்தி²ம் பரிவஜ்ஜேதீ’’திஆதி³னா நயேன வேதி³தப்³போ³. வினோதே³தீதி ஞாணேன ஞத்வா வினோதே³தப்³ப³மேவ வினோதே³தி, நுத³தி நீஹரதி அந்தோ பவிஸிதும் ந தே³தி. தஸ்ஸ வித்தா²ரோ ‘‘உப்பன்னம் காமவிதக்கம் நாதி⁴வாஸேதீ’’திஆதி³னா நயேன வேதி³தப்³போ³.

அரியவம்ஸசதுக்கவண்ணனா