11. த³ஸுத்தரஸுத்தவண்ணனா

350. ஏவம் மே ஸுதந்தி த³ஸுத்தரஸுத்தம். தத்ராயம் அபுப்³ப³பத³வண்ணனா – ஆவுஸோ பி⁴க்க²வேதி ஸாவகானம் ஆலபனமேதம். பு³த்³தா⁴ ஹி பரிஸம் ஆமந்தயமானா ‘பி⁴க்க²வே’தி வத³ந்தி. ஸாவகா ஸத்தா²ரம் உச்சட்டா²னே ட²பேஸ்ஸாமாதி ஸத்து² ஆலபனேன அனாலபித்வா ஆவுஸோதி ஆலபந்தி. தே பி⁴க்கூ²தி தே த⁴ம்மஸேனாபதிம் பரிவாரேத்வா நிஸின்னா பி⁴க்கூ². கே பன தே பி⁴க்கூ²தி? அனிப³த்³த⁴வாஸா தி³ஸாக³மனீயா பி⁴க்கூ². பு³த்³த⁴காலே த்³வே வாரே பி⁴க்கூ² ஸன்னிபதந்தி – உபகட்ட²வஸ்ஸூபனாயிககாலே ச பவாரணகாலே ச. உபகட்ட²வஸ்ஸூபனாயிகாய த³ஸபி வீஸதிபி திம்ஸம்பி சத்தாலீஸம்பி பஞ்ஞாஸம்பி பி⁴க்கூ² வக்³கா³ வக்³கா³ கம்மட்டா²னத்தா²ய ஆக³ச்ச²ந்தி. ப⁴க³வா தேஹி ஸத்³தி⁴ம் ஸம்மோதி³த்வா கஸ்மா, பி⁴க்க²வே, உபகட்டா²ய வஸ்ஸூபனாயிகாய விசரதா²தி புச்ச²தி. அத² தே ‘‘ப⁴க³வா கம்மட்டா²னத்த²ம் ஆக³தம்ஹ, கம்மட்டா²னம் நோ தே³தா²’’தி யாசந்தி.

ஸத்தா² தேஸம் சரியவஸேன ராக³சரிதஸ்ஸ அஸுப⁴கம்மட்டா²னம் தே³தி. தோ³ஸசரிதஸ்ஸ மேத்தாகம்மட்டா²னம், மோஹசரிதஸ்ஸ உத்³தே³ஸோ பரிபுச்சா² – ‘காலேன த⁴ம்மஸ்ஸவனம், காலேன த⁴ம்மஸாகச்சா², இத³ம் துய்ஹம் ஸப்பாய’ந்தி ஆசிக்க²தி. விதக்கசரிதஸ்ஸ ஆனாபானஸ்ஸதிகம்மட்டா²னம் தே³தி. ஸத்³தா⁴சரிதஸ்ஸ பஸாத³னீயஸுத்தந்தே பு³த்³த⁴ஸுபோ³தி⁴ம் த⁴ம்மஸுத⁴ம்மதம் ஸங்க⁴ஸுப்படிபத்திஞ்ச பகாஸேதி. ஞாணசரிதஸ்ஸ அனிச்சதாதி³படிஸம்யுத்தே க³ம்பீ⁴ரே ஸுத்தந்தே கதே²தி. தே கம்மட்டா²னம் க³ஹேத்வா ஸசே ஸப்பாயம் ஹோதி, தத்தே²வ வஸந்தி. நோ சே ஹோதி, ஸப்பாயம் ஸேனாஸனம் புச்சி²த்வா க³ச்ச²ந்தி. தே தத்த² வஸந்தா தேமாஸிகம் படிபத³ம் க³ஹேத்வா க⁴டேத்வா வாயமந்தா ஸோதாபன்னாபி ஹோந்தி ஸகதா³கா³மினோபி அனாகா³மினோபி அரஹந்தோபி.

ததோ வுத்த²வஸ்ஸா பவாரேத்வா ஸத்து² ஸந்திகம் க³ந்த்வா ‘‘ப⁴க³வா அஹம் தும்ஹாகம் ஸந்திகே கம்மட்டா²னம் க³ஹேத்வா ஸோதாபத்திப²லம் பத்தோ…பே… அஹம் அக்³க³ப²லம் அரஹத்த’’ந்தி படிலத்³த⁴கு³ணம் ஆரோசேந்தி. தத்த² இமே பி⁴க்கூ² உபகட்டா²ய வஸ்ஸூபனாயிகாய ஆக³தா. ஏவம் ஆக³ந்த்வா க³ச்ச²ந்தே பன பி⁴க்கூ² ப⁴க³வா அக்³க³ஸாவகானம் ஸந்திகம் பேஸேதி, யதா²ஹ ‘‘அபலோகேத² பன, பி⁴க்க²வே, ஸாரிபுத்தமோக்³க³ல்லானே’’தி. பி⁴க்கூ² ச வத³ந்தி ‘‘கிம் நு கோ² மயம், ப⁴ந்தே, அபலோகேம ஸாரிபுத்தமோக்³க³ல்லானே’’தி (ஸம். நி. 3.2). அத² நே ப⁴க³வா தேஸம் த³ஸ்ஸனே உய்யோஜேஸி. ‘‘ஸேவத², பி⁴க்க²வே, ஸாரிபுத்தமோக்³க³ல்லானே; ப⁴ஜத², பி⁴க்க²வே, ஸாரிபுத்தமோக்³க³ல்லானே. பண்டி³தா பி⁴க்கூ² அனுக்³கா³ஹகா ஸப்³ரஹ்மசாரீனம். ஸேய்யதா²பி, பி⁴க்க²வே, ஜனேதா ஏவம் ஸாரிபுத்தோ. ஸேய்யதா²பி ஜாதஸ்ஸ ஆபாதே³தா ஏவம் மோக்³க³ல்லானோ. ஸாரிபுத்தோ, பி⁴க்க²வே, ஸோதாபத்திப²லே வினேதி, மோக்³க³ல்லானோ உத்தமத்தே²’’தி (ம. நி. 3.371).

ததா³பி ப⁴க³வா இமேஹி பி⁴க்கூ²ஹி ஸத்³தி⁴ம் படிஸந்தா²ரம் கத்வா தேஸம் பி⁴க்கூ²னம் ஆஸயம் உபபரிக்க²ந்தோ ‘‘இமே பி⁴க்கூ² ஸாவகவினேய்யா’’தி அத்³த³ஸ. ஸாவகவினேய்யா நாம யே பு³த்³தா⁴னம்பி த⁴ம்மதே³ஸனாய பு³ஜ்ஜ²ந்தி ஸாவகானம்பி. பு³த்³த⁴வினேய்யா பன ஸாவகா போ³தே⁴தும் ந ஸக்கோந்தி. ஸாவகவினேய்யபா⁴வம் பன ஏதேஸம் ஞத்வா கதரஸ்ஸ பி⁴க்கு²னோ தே³ஸனாய பு³ஜ்ஜி²ஸ்ஸந்தீதி ஓலோகேந்தோ ஸாரிபுத்தஸ்ஸாதி தி³ஸ்வா தே²ரஸ்ஸ ஸந்திகம் பேஸேஸி. தே²ரோ தே பி⁴க்கூ² புச்சி² ‘‘ஸத்து² ஸந்திகம் க³தத்த² ஆவுஸோ’’தி. ‘‘ஆம, க³தம்ஹ ஸத்தா²ரா பன அம்ஹே தும்ஹாகம் ஸந்திகம் பேஸிதா’’தி. ததோ தே²ரோ ‘‘இமே பி⁴க்கூ² மய்ஹம் தே³ஸனாய பு³ஜ்ஜி²ஸ்ஸந்தி, கீதி³ஸீ நு கோ² தேஸம் தே³ஸனா வட்டதீ’’தி சிந்தேந்தோ ‘‘இமே பி⁴க்கூ² ஸமக்³கா³ராமா, ஸாமக்³கி³ரஸஸ்ஸ தீ³பிகா நேஸம் தே³ஸனா வட்டதீ’’தி ஸன்னிட்டா²னம் கத்வா ததா²ரூபம் தே³ஸனம் தே³ஸேதுகாமோ த³ஸுத்தரம் பவக்கா²மீதிஆதி³மாஹ. தத்த² த³ஸதா⁴ மாதிகம் ட²பேத்வா விப⁴த்தோதி த³ஸுத்தரோ, ஏககதோ பட்டா²ய யாவ த³ஸகா க³தோதிபி த³ஸுத்தரோ, ஏகேகஸ்மிம் பப்³பே³ த³ஸ த³ஸ பஞ்ஹா விஸேஸிதாதிபி த³ஸுத்தரோ, தம் த³ஸுத்தரம். பவக்கா²மீதி கதே²ஸ்ஸாமி. த⁴ம்மந்தி ஸுத்தம். நிப்³பா³னபத்தியாதி நிப்³பா³னபடிலாப⁴த்தா²ய. து³க்க²ஸ்ஸந்தகிரியாயாதி ஸகலஸ்ஸ வட்டது³க்க²ஸ்ஸ பரியந்தகரணத்த²ம். ஸப்³ப³க³ந்த²ப்பமோசனந்தி அபி⁴ஜ்ஜா²காயக³ந்தா²தீ³னம் ஸப்³ப³க³ந்தா²னம் பமோசனம்.

இதி தே²ரோ தே³ஸனம் உச்சம் கரோந்தோ பி⁴க்கூ²னம் தத்த² பேமம் ஜனேந்தோ ஏவமேதம் உக்³க³ஹேதப்³ப³ம் பரியாபுணிதப்³ப³ம் தா⁴ரேதப்³ப³ம் வாசேதப்³ப³ம் மஞ்ஞிஸ்ஸந்தீதி சதூஹி பதே³ஹி வண்ணம் கதே²ஸி, ‘‘ஏகாயனோ அயம், பி⁴க்க²வே, மக்³கோ³’’திஆதி³னா நயேன தேஸம் தேஸம் ஸுத்தானம் ப⁴க³வா விய.

ஏகத⁴ம்மவண்ணனா

351. (க) தத்த² ப³ஹுகாரோதி ப³ஹூபகாரோ.

(க²) பா⁴வேதப்³போ³தி வட்³டே⁴தப்³போ³.

(க³) பரிஞ்ஞேய்யோதி தீஹி பரிஞ்ஞாஹி பரிஜானிதப்³போ³.

(க⁴) பஹாதப்³போ³தி பஹானானுபஸ்ஸனாய பஜஹிதப்³போ³.

(ங) ஹானபா⁴கி³யோதி அபாயகா³மிபரிஹானாய ஸம்வத்தனகோ.

(ச) விஸேஸபா⁴கி³யோதி விஸேஸகா³மிவிஸேஸாய ஸம்வத்தனகோ.

(ச²) து³ப்படிவிஜ்ஜோ²தி து³ப்பச்சக்க²கரோ.

(ஜ) உப்பாதே³தப்³போ³தி நிப்பா²தே³தப்³போ³.

(ஜ²) அபி⁴ஞ்ஞேய்யோதி ஞாதபரிஞ்ஞாய அபி⁴ஜானிதப்³போ³.

(ஞ) ஸச்சி²காதப்³போ³தி பச்சக்க²ம் காதப்³போ³.

ஏவம் ஸப்³ப³த்த² மாதிகாஸு அத்தோ² வேதி³தப்³போ³. இதி ஆயஸ்மா ஸாரிபுத்தோ யதா² நாம த³க்கோ² வேளுகாரோ ஸம்முகீ²பூ⁴தம் வேளும் சே²த்வா நிக்³க³ண்டி²ம் கத்வா த³ஸதா⁴ க²ண்டே³ கத்வா ஏகமேகம் க²ண்ட³ம் ஹீரம் ஹீரம் கரோந்தோ பா²லேதி, ஏவமேவ தேஸம் பி⁴க்கூ²னம் ஸப்பாயம் தே³ஸனம் உபபரிக்கி²த்வா த³ஸதா⁴ மாதிகம் ட²பேத்வா ஏகேககோட்டா²ஸே ஏகேகபத³ம் விப⁴ஜந்தோ ‘‘கதமோ ஏகோ த⁴ம்மோ ப³ஹுகாரோ, அப்பமாதோ³ குஸலேஸு த⁴ம்மேஸூதி’’திஆதி³னா நயேன தே³ஸனம் வித்தா²ரேதும் ஆரத்³தோ⁴.

தத்த² அப்பமாதோ³ குஸலேஸு த⁴ம்மேஸூதி ஸப்³ப³த்த²கம் உபகாரகம் அப்பமாத³ம் கதே²ஸி. அயஞ்ஹி அப்பமாதோ³ நாம ஸீலபூரணே, இந்த்³ரியஸம்வரே, போ⁴ஜனே மத்தஞ்ஞுதாய, ஜாக³ரியானுயோகே³, ஸத்தஸு ஸத்³த⁴ம்மேஸு, விபஸ்ஸனாக³ப்³ப⁴ம் க³ண்ஹாபனே, அத்த²படிஸம்பி⁴தா³தீ³ஸு, ஸீலக்க²ந்தா⁴தி³பஞ்சத⁴ம்மக்க²ந்தே⁴ஸு, டா²னாட்டா²னேஸு, மஹாவிஹாரஸமாபத்தியம், அரியஸச்சேஸு, ஸதிபட்டா²னாதீ³ஸு, போ³தி⁴பக்கி²யேஸு, விபஸ்ஸனாஞாணாதீ³ஸு அட்ட²ஸு விஜ்ஜாஸூதி ஸப்³பே³ஸு அனவஜ்ஜட்டே²ன குஸலேஸு த⁴ம்மேஸு ப³ஹூபகாரோ.

தேனேவ நம் ப⁴க³வா ‘‘யாவதா, பி⁴க்க²வே, ஸத்தா அபதா³ வா…பே… ததா²க³தோ தேஸம் அக்³க³மக்கா²யதி. ஏவமேவ கோ², பி⁴க்க²வே, யே கேசி குஸலா த⁴ம்மா, ஸப்³பே³தே அப்பமாத³மூலகா அப்பமாத³ஸமோஸரணா, அப்பமாதோ³ தேஸம் த⁴ம்மானம் அக்³க³மக்கா²யதீ’’திஆதி³னா (ஸம். நி. 5.139) நயேன ஹத்தி²பதா³தீ³ஹி ஓபம்மேஹி ஓபமேந்தோ ஸம்யுத்தனிகாயே அப்பமாத³வக்³கே³ நானப்பகாரம் தோ²மேதி. தம் ஸப்³ப³ம் ஏகபதே³னேவ ஸங்க³ஹேத்வா தே²ரோ அப்பமாதோ³ குஸலேஸு த⁴ம்மேஸூதி ஆஹ. த⁴ம்மபதே³ அப்பமாத³வக்³கே³னாபிஸ்ஸ ப³ஹூபகாரதா தீ³பேதப்³பா³. அஸோகவத்து²னாபி தீ³பேதப்³பா³ –

(க) அஸோகராஜா ஹி நிக்³ரோத⁴ஸாமணேரஸ்ஸ ‘‘அப்பமாதோ³ அமதபத³’’ந்தி கா³த²ம் ஸுத்வா ஏவ ‘‘திட்ட², தாத, மய்ஹம் தயா தேபிடகம் பு³த்³த⁴வசனம் கதி²த’’ந்தி ஸாமணேரே பஸீதி³த்வா சதுராஸீதிவிஹாரஸஹஸ்ஸானி காரேஸி. இதி தா²மஸம்பன்னேன பி⁴க்கு²னா அப்பமாத³ஸ்ஸ ப³ஹூபகாரதா தீஹி பிடகேஹி தீ³பேத்வா கதே²தப்³பா³. யம்கிஞ்சி ஸுத்தம் வா கா³த²ம் வா அப்பமாத³தீ³பனத்த²ம் ஆஹரந்தோ ‘‘அட்டா²னே ட²த்வா ஆஹரஸி, அதித்தே²ன பக்க²ந்தோ³’’தி ந வத்தப்³போ³. த⁴ம்மகதி²கஸ்ஸேவேத்த² தா²மோ ச ப³லஞ்ச பமாணம்.

(க²) காயக³தாஸதீதி ஆனாபானம் சதுஇரியாபதோ² ஸதிஸம்பஜஞ்ஞம் த்³வத்திம்ஸாகாரோ சதுதா⁴துவவத்தா²னம் த³ஸ அஸுபா⁴ நவ ஸிவதி²கா சுண்ணிகமனஸிகாரோ கேஸாதீ³ஸு சத்தாரி ரூபஜ்ஜா²னானீதி ஏத்த² உப்பன்னஸதியா ஏதம் அதி⁴வசனம். ஸாதஸஹக³தாதி ட²பேத்வா சதுத்த²ஜ்ஜா²னம் அஞ்ஞத்த² ஸாதஸஹக³தா ஹோதி ஸுக²ஸம்பயுத்தா, தம் ஸந்தா⁴யேதம் வுத்தம்.

(க³) ஸாஸவோ உபாதா³னியோதி ஆஸவானஞ்சேவ உபாதா³னானஞ்ச பச்சயபூ⁴தோ. இதி தேபூ⁴மகத⁴ம்மமேவ நியமேதி.

(க⁴) அஸ்மிமானோதி ரூபாதீ³ஸு அஸ்மீதி மானோ.

(ங) அயோனிஸோ மனஸிகாரோதி அனிச்சே நிச்சந்திஆதி³னா நயேன பவத்தோ உப்பத²மனஸிகாரோ.

(ச) விபரியாயேன யோனிஸோ மனஸிகாரோ வேதி³தப்³போ³.

(ச²) ஆனந்தரிகோ சேதோஸமாதீ⁴தி அஞ்ஞத்த² மக்³கா³னந்தரம் ப²லம் ஆனந்தரிகோ சேதோஸமாதி⁴ நாம. இத⁴ பன விபஸ்ஸனானந்தரோ மக்³கோ³ விபஸ்ஸனாய வா அனந்தரத்தா அத்தனோ வா அனந்தரம் ப²லதா³யகத்தா ஆனந்தரிகோ சேதோஸமாதீ⁴தி அதி⁴ப்பேதோ.

(ஜ) அகுப்பம் ஞாணந்தி அஞ்ஞத்த² ப²லபஞ்ஞா அகுப்பஞாணம் நாம. இத⁴ பச்சவேக்க²ணபஞ்ஞா அதி⁴ப்பேதா.

(ஜ²) ஆஹாரட்டி²திகாதி பச்சயட்டி²திகா. அயம் ஏகோ த⁴ம்மோதி யேன பச்சயேன திட்ட²ந்தி, அயம் ஏகோ த⁴ம்மோ ஞாதபரிஞ்ஞாய அபி⁴ஞ்ஞேய்யோ.

(ஞ) அகுப்பா சேதோவிமுத்தீதி அரஹத்தப²லவிமுத்தி.

இமஸ்மிம் வாரே அபி⁴ஞ்ஞாய ஞாதபரிஞ்ஞா கதி²தா. பரிஞ்ஞாய தீரணபரிஞ்ஞா. பஹாதப்³ப³ஸச்சி²காதப்³பே³ஹி பஹானபரிஞ்ஞா. து³ப்படிவிஜ்ஜோ²தி ஏத்த² பன மக்³கோ³ கதி²தோ. ஸச்சி²காதப்³போ³தி ப²லம் கதி²தம், மக்³கோ³ ஏகஸ்மிம்யேவ பதே³ லப்³ப⁴தி. ப²லம் பன அனேகேஸுபி லப்³ப⁴தியேவ.

பூ⁴தாதி ஸபா⁴வதோ விஜ்ஜமானா. தச்சா²தி யாதா²வா. ததா²தி யதா² வுத்தா ததா²ஸபா⁴வா. அவிததா²தி யதா² வுத்தா ந ததா² ந ஹோந்தி. அனஞ்ஞதா²தி வுத்தப்பகாரதோ ந அஞ்ஞதா². ஸம்மா ததா²க³தேன அபி⁴ஸம்பு³த்³தா⁴தி ததா²க³தேன போ³தி⁴பல்லங்கே நிஸீதி³த்வா ஹேதுனா காரணேன ஸயமேவ அபி⁴ஸம்பு³த்³தா⁴ ஞாதா விதி³தா ஸச்சி²கதா. இமினா தே²ரோ ‘‘இமே த⁴ம்மா ததா²க³தேன அபி⁴ஸம்பு³த்³தா⁴, அஹம் பன தும்ஹாகம் ரஞ்ஞோ லேக²வாசகஸதி³ஸோ’’தி ஜினஸுத்தம் த³ஸ்ஸேந்தோ ஓகப்பனம் ஜனேஸி.

ஏகத⁴ம்மவண்ணனா நிட்டி²தா.

த்³வேத⁴ம்மவண்ணனா

352. (க) இமே த்³வே த⁴ம்மா ப³ஹுகாராதி இமே த்³வே ஸதிஸம்பஜஞ்ஞா த⁴ம்மா ஸீலபூரணாதீ³ஸு அப்பமாதோ³ விய ஸப்³ப³த்த² உபகாரகா ஹிதாவஹா.

(க²) ஸமதோ² ச விபஸ்ஸனா சாதி இமே த்³வே ஸங்கீ³திஸுத்தே லோகியலோகுத்தரா கதி²தா. இமஸ்மிம் த³ஸுத்தரஸுத்தே புப்³ப³பா⁴கா³ கதி²தா.

(ச²) ஸத்தானம் ஸம்கிலேஸாய ஸத்தானம் விஸுத்³தி⁴யாதி அயோனிஸோ மனஸிகாரோ ஹேது சேவ பச்சயோ ச ஸத்தானம் ஸம்கிலேஸாய, யோனிஸோ மனஸிகாரோ விஸுத்³தி⁴யா. ததா² தோ³வசஸ்ஸதா பாபமித்ததா ஸம்கிலேஸாய; ஸோவசஸ்ஸதா கல்யாணமித்ததா விஸுத்³தி⁴யா. ததா² தீணி அகுஸலமூலானி; தீணி குஸலமூலானி. சத்தாரோ யோகா³ சத்தாரோ விஸம்யோகா³. பஞ்ச சேதோகி²லா பஞ்சிந்த்³ரியானி. ச² அகா³ரவா ச² கா³ரவா. ஸத்த அஸத்³த⁴ம்மா ஸத்த ஸத்³த⁴ம்மா. அட்ட² குஸீதவத்தூ²னி அட்ட² ஆரம்ப⁴வத்தூ²னி. நவ ஆகா⁴தவத்தூ²னி நவ ஆகா⁴தப்படிவினயா. த³ஸ அகுஸலகம்மபதா² த³ஸ குஸலகம்மபதா²தி ஏவம் பபே⁴தா³ இமே த்³வே த⁴ம்மா து³ப்படிவிஜ்ஜா²தி வேதி³தப்³பா³.

(ஜ²) ஸங்க²தா தா⁴தூதி பச்சயேஹி கதா பஞ்சக்க²ந்தா⁴. அஸங்க²தா தா⁴தூதி பச்சயேஹி அகதம் நிப்³பா³னம்.

(ஞ) விஜ்ஜா ச விமுத்தி சாதி ஏத்த² விஜ்ஜாதி திஸ்ஸோ விஜ்ஜா. விமுத்தீதி அரஹத்தப²லம்.

இமஸ்மிம் வாரே அபி⁴ஞ்ஞாதீ³னி ஏககஸதி³ஸானேவ, உப்பாதே³தப்³ப³பதே³ பன மக்³கோ³ கதி²தோ, ஸச்சி²காதப்³ப³பதே³ ப²லம்.

த்³வேத⁴ம்மவண்ணனா நிட்டி²தா.

தயோத⁴ம்மவண்ணனா

353. (ச²) காமானமேதம் நிஸ்ஸரணம் யதி³த³ம் நேக்க²ம்மந்தி ஏத்த² நேக்க²ம்மந்தி அனாகா³மிமக்³கோ³ அதி⁴ப்பேதோ. ஸோ ஹி ஸப்³ப³ஸோ காமானம் நிஸ்ஸரணம். ரூபானம் நிஸ்ஸரணம் யதி³த³ம் ஆருப்பந்தி ஏத்த² ஆருப்பேபி அரஹத்தமக்³கோ³. புன உப்பத்தினிவாரணதோ ஸப்³ப³ஸோ ரூபானம் நிஸ்ஸரணம் நாம. நிரோதோ⁴ தஸ்ஸ நிஸ்ஸரணந்தி இத⁴ அரஹத்தப²லம் நிரோதோ⁴தி அதி⁴ப்பேதம். அரஹத்தப²லேன ஹி நிப்³பா³னே தி³ட்டே² புன ஆயதிம் ஸப்³ப³ஸங்கா²ரா ந ஹோந்தீதி அரஹத்தம் ஸங்க²தனிரோத⁴ஸ்ஸ பச்சயத்தா நிரோதோ⁴தி வுத்தம்.

(ஜ) அதீதம்ஸே ஞாணந்தி அதீதம்ஸாரம்மணம் ஞாணம் இதரேஸுபி ஏஸேவ நயோ.

இமஸ்மிம்பி வாரே அபி⁴ஞ்ஞாத³யோ ஏககஸதி³ஸாவ. து³ப்படிவிஜ்ஜ²பதே³ பன மக்³கோ³ கதி²தோ, ஸச்சி²காதப்³பே³ ப²லம்.

தயோத⁴ம்மவண்ணனா நிட்டி²தா.

சத்தாரோத⁴ம்மவண்ணனா

354. (க) சத்தாரி சக்கானீதி ஏத்த² சக்கம் நாம தா³ருசக்கம், ரதனசக்கம், த⁴ம்மசக்கம், இரியாபத²சக்கம், ஸம்பத்திசக்கந்தி பஞ்சவித⁴ம். தத்த² ‘‘யம் பனித³ம் ஸம்ம, ரத²கார, சக்கம் ச²ஹி மாஸேஹி நிட்டி²தம், சா²ரத்தூனேஹீ’’தி (அ. நி. 3.15) இத³ம் தா³ருசக்கம். ‘‘பிதரா பவத்திதம் சக்கம் அனுப்பவத்தேதீ’’தி (அ. நி. 5.132) இத³ம் ரதனசக்கம். ‘‘பவத்திதம் சக்க’’ந்தி (ம. நி. 2.399) இத³ம் த⁴ம்மசக்கம். ‘‘சதுசக்கம் நவத்³வார’’ந்தி (ஸம். நி. 1.29) இத³ம் இரியாபத²சக்கம். ‘‘சத்தாரிமானி, பி⁴க்க²வே, சக்கானி, யேஹி ஸமன்னாக³தானம் தே³வமனுஸ்ஸானம் சதுசக்கம் பவத்ததீ’’தி (அ. நி. 4.31) இத³ம் ஸம்பத்திசக்கம். இதா⁴பி ஏததே³வ அதி⁴ப்பேதம்.

பதிரூபதே³ஸவாஸோதி யத்த² சதஸ்ஸோ பரிஸா ஸந்தி³ஸ்ஸந்தி, ஏவரூபே அனுச்ச²விகே தே³ஸே வாஸோ. ஸப்புரிஸூபனிஸ்ஸயோதி பு³த்³தா⁴தீ³னம் ஸப்புரிஸானம் அவஸ்ஸயனம் ஸேவனம் ப⁴ஜனம். அத்தஸம்மாபணிதீ⁴தி அத்தனோ ஸம்மா ட²பனம், ஸசே பன புப்³பே³ அஸ்ஸத்³தா⁴தீ³ஹி ஸமன்னாக³தோ ஹோதி, தானி பஹாய ஸத்³தா⁴தீ³ஸு பதிட்டா²பனம். புப்³பே³ ச கதபுஞ்ஞதாதி புப்³பே³ உபசிதகுஸலதா. இத³மேவேத்த² பமாணம். யேன ஹி ஞாணஸம்பயுத்தசித்தேன குஸலம் கதம் ஹோதி, ததே³வ குஸலம் தம் புரிஸம் பதிரூபதே³ஸே உபனேதி, ஸப்புரிஸே ப⁴ஜாபேஸி. ஸோ ஏவ ச புக்³க³லோ அத்தானம் ஸம்மா ட²பேதி. சதூஸு ஆஹாரேஸு பட²மோ லோகியோவ. ஸேஸா பன தயோ ஸங்கீ³திஸுத்தே லோகியலோகுத்தரமிஸ்ஸகா கதி²தா. இத⁴ புப்³ப³பா⁴கே³ லோகியா.

(ச) காமயோக³விஸம்யோகா³த³யோ அனாகா³மிமக்³கா³தி³வஸேன வேதி³தப்³பா³.

(ச²) ஹானபா⁴கி³யாதீ³ஸு பட²மஸ்ஸ ஜா²னஸ்ஸ லாபீ⁴ காமஸஹக³தா ஸஞ்ஞாமனஸிகாரா ஸமுதா³சரந்தி ஹானபா⁴கி³யோ ஸமாதி⁴. தத³னுத⁴ம்மதா ஸதி ஸந்திட்ட²தி டி²திபா⁴கி³யோ ஸமாதி⁴. விதக்கஸஹக³தா ஸஞ்ஞாமனஸிகாரா ஸமுதா³சரந்தி விஸேஸபா⁴கி³யோ ஸமாதி⁴. நிப்³பி³தா³ஸஹக³தா ஸஞ்ஞாமனஸிகாரா ஸமுதா³சரந்தி விராகூ³பஸஞ்ஹிதோ நிப்³பே³த⁴பா⁴கி³யோ ஸமாதீ⁴தி இமினா நயேன ஸப்³ப³ஸமாபத்தியோ வித்தா²ரேத்வா அத்தோ² வேதி³தப்³போ³. விஸுத்³தி⁴மக்³கே³ பனஸ்ஸ வினிச்ச²யகதா² கதி²தாவ.

இமஸ்மிம்பி வாரே அபி⁴ஞ்ஞாதீ³னி ஏககஸதி³ஸானேவ. அபி⁴ஞ்ஞாபதே³ பனேத்த² மக்³கோ³ கதி²தோ. ஸச்சி²காதப்³ப³பதே³ ப²லம்.

சத்தாரோத⁴ம்மவண்ணனா நிட்டி²தா.

பஞ்சத⁴ம்மவண்ணனா

355. (க²) பீதிப²ரணதாதீ³ஸு பீதிம் ப²ரமானா உப்பஜ்ஜதீதி த்³வீஸு ஜா²னேஸு பஞ்ஞா பீதிப²ரணதா நாம. ஸுக²ம் ப²ரமானம் உப்பஜ்ஜதீதி தீஸு ஜா²னேஸு பஞ்ஞா ஸுக²ப²ரணதா நாம. பரேஸம் சேதோ ப²ரமானா உப்பஜ்ஜதீதி சேதோபரியபஞ்ஞா சேதோப²ரணதா நாம. ஆலோகப²ரணே உப்பஜ்ஜதீதி தி³ப்³ப³சக்கு²பஞ்ஞா ஆலோகப²ரணதா நாம. பச்சவேக்க²ணஞாணம் பச்சவேக்க²ணனிமித்தம் நாம. வுத்தம்பி சேதம் ‘‘த்³வீஸு ஜா²னேஸு பஞ்ஞா பீதிப²ரணதா, தீஸு ஜா²னேஸு பஞ்ஞா ஸுக²ப²ரணதா. பரசித்தே பஞ்ஞா சேதோப²ரணதா, தி³ப்³ப³சக்கு² ஆலோகப²ரணதா. தம்ஹா தம்ஹா ஸமாதி⁴ம்ஹா வுட்டி²தஸ்ஸ பச்சவேக்க²ணஞாணம் பச்சவேக்க²ணனிமித்த’’ந்தி (விப⁴. 804).

தத்த² பீதிப²ரணதா ஸுக²ப²ரணதா த்³வே பாதா³ விய. சேதோப²ரணதா ஆலோகப²ரணதா த்³வே ஹத்தா² விய. அபி⁴ஞ்ஞாபாத³கஜ்ஜா²னம் மஜ்ஜி²மகாயோ விய. பச்சவேக்க²ணனிமித்தம் ஸீஸம் விய. இதி ஆயஸ்மா ஸாரிபுத்தத்தே²ரோ பஞ்சங்கி³கம் ஸம்மாஸமாதி⁴ம் அங்க³பச்சங்க³ஸம்பன்னம் புரிஸம் கத்வா த³ஸ்ஸேஸி.

(ஜ) அயம் ஸமாதி⁴ பச்சுப்பன்னஸுகோ² சே வாதிஆதீ³ஸு அரஹத்தப²லஸமாதி⁴ அதி⁴ப்பேதோ. ஸோ ஹி அப்பிதப்பிதக்க²ணே ஸுக²த்தா பச்சுப்பன்னஸுகோ². புரிமோ புரிமோ பச்சி²மஸ்ஸ பச்சி²மஸ்ஸ ஸமாதி⁴ஸுக²ஸ்ஸ பச்சயத்தா ஆயதிம் ஸுக²விபாகோ.

கிலேஸேஹி ஆரகத்தா அரியோ. காமாமிஸவட்டாமிஸலோகாமிஸானம் அபா⁴வா நிராமிஸோ. பு³த்³தா⁴தீ³ஹி மஹாபுரிஸேஹி ஸேவிதத்தா அகாபுரிஸஸேவிதோ. அங்க³ஸந்ததாய ஆரம்மணஸந்ததாய ஸப்³ப³கிலேஸத³ரத²ஸந்ததாய ச ஸந்தோ. அதப்பனீயட்டே²ன பணீதோ. கிலேஸபடிப்பஸ்ஸத்³தி⁴யா லத்³த⁴த்தா கிலேஸபடிப்பஸ்ஸத்³தி⁴பா⁴வம் வா லத்³த⁴த்தா படிப்பஸ்ஸத்³த⁴லத்³தோ⁴. படிப்பஸ்ஸத்³த⁴ம் படிப்பஸ்ஸத்³தீ⁴தி ஹி இத³ம் அத்த²தோ ஏகம். படிப்பஸ்ஸத்³த⁴கிலேஸேன வா அரஹதா லத்³த⁴த்தா படிப்பஸ்ஸத்³த⁴லத்³தோ⁴. ஏகோதி³பா⁴வேன அதி⁴க³தத்தா ஏகோதி³பா⁴வமேவ வா அதி⁴க³தத்தா ஏகோதி³பா⁴வாதி⁴க³தோ. அப்பகு³ணஸாஸவஸமாதி⁴ விய ஸஸங்கா²ரேன ஸப்பயோகே³ன சித்தேன பச்சனீகத⁴ம்மே நிக்³க³ய்ஹ கிலேஸே வாரேத்வா அனதி⁴க³தத்தா நஸஸங்கா²ரனிக்³க³ய்ஹவாரிதக³தோ. தஞ்ச ஸமாதி⁴ம் ஸமாபஜ்ஜந்தோ ததோ வா வுட்ட²ஹந்தோ ஸதிவேபுல்லபத்தத்தா. ஸதோவ ஸமாபஜ்ஜதி ஸதோ வுட்ட²ஹதி. யதா²பரிச்சி²ன்னகாலவஸேன வா ஸதோ ஸமாபஜ்ஜதி ஸதோ வுட்ட²ஹதி. தஸ்மா யதே³த்த² ‘‘அயம் ஸமாதி⁴ பச்சுப்பன்னஸுகோ² சேவ ஆயதிஞ்ச ஸுக²விபாகோ’’தி ஏவம் பச்சவேக்க²மானஸ்ஸ பச்சத்தம்யேவ அபரப்பச்சயம் ஞாணம் உப்பஜ்ஜதி, தம் ஏகமங்க³ம். ஏஸ நயோ ஸேஸேஸுபி. ஏவமிமேஹி பஞ்சஹி பச்சவேக்க²ணஞாணேஹி அயம் ஸமாதி⁴ ‘‘பஞ்சஞாணிகோ ஸம்மாஸமாதீ⁴’’தி வுத்தோ.

இமஸ்மிம் வாரே விஸேஸபா⁴கி³யபதே³ மக்³கோ³ கதி²தோ. ஸச்சி²காதப்³ப³பதே³ ப²லம். ஸேஸம் புரிமஸதி³ஸமேவ.

ச²த⁴ம்மவண்ணனா

356. ச²க்கேஸு ஸப்³ப³ம் உத்தானத்த²மேவ. து³ப்படிவிஜ்ஜ²பதே³ பனேத்த² மக்³கோ³ கதி²தோ. ஸேஸம் புரிமஸதி³ஸம்.

ஸத்தத⁴ம்மவண்ணனா

357. (ஞ) ஸம்மப்பஞ்ஞாய ஸுதி³ட்டா² ஹோந்தீதி ஹேதுனா நயேன விபஸ்ஸனாஞாணேன ஸுதி³ட்டா² ஹோந்தி. காமாதி வத்து²காமா ச கிலேஸகாமா ச, த்³வேபி ஸபரிளாஹட்டே²ன அங்கா³ரகாஸு விய ஸுதி³ட்டா² ஹோந்தி. விவேகனின்னந்தி நிப்³பா³னனின்னம். போணம் பப்³பா⁴ரந்தி நின்னஸ்ஸேதம் வேவசனம். ப்³யந்தீபூ⁴தந்தி நியதிபூ⁴தம். நித்தண்ஹந்தி அத்தோ². குதோ? ஸப்³ப³ஸோ ஆஸவட்டா²னீயேஹி த⁴ம்மேஹி தேபூ⁴மகத⁴ம்மேஹீதி அத்தோ². இத⁴ பா⁴வேதப்³ப³பதே³ மக்³கோ³ கதி²தோ. ஸேஸம் புரிமஸதி³ஸமேவ.

அட்ட²த⁴ம்மவண்ணனா

358. (க) ஆதி³ப்³ரஹ்மசரியிகாய பஞ்ஞாயாதி ஸிக்க²த்தயஸங்க³ஹஸ்ஸ மக்³க³ப்³ரஹ்மசரியஸ்ஸ ஆதி³பூ⁴தாய புப்³ப³பா⁴கே³ தருணஸமத²விபஸ்ஸனாபஞ்ஞாய. அட்ட²ங்கி³கஸ்ஸ வா மக்³க³ஸ்ஸ ஆதி³பூ⁴தாய ஸம்மாதி³ட்டி²பஞ்ஞாய. திப்³ப³ந்தி ப³லவம். ஹிரோத்தப்பந்தி ஹிரீ ச ஓத்தப்பஞ்ச. பேமந்தி கே³ஹஸ்ஸிதபேமம். கா³ரவோதி க³ருசித்தபா⁴வோ. க³ருபா⁴வனீயஞ்ஹி உபனிஸ்ஸாய விஹரதோ கிலேஸா நுப்பஜ்ஜந்தி ஓவாதா³னுஸாஸனிம் லப⁴தி. தஸ்மா தம் நிஸ்ஸாய விஹாரோ பஞ்ஞாபடிலாப⁴ஸ்ஸ பச்சயோ ஹோதி.

(ச²) அக்க²ணேஸு யஸ்மா பேதா அஸுரானம் ஆவாஹனம் க³ச்ச²ந்தி, விவாஹனம் க³ச்ச²ந்தி, தஸ்மா பேத்திவிஸயேனேவ அஸுரகாயோ க³ஹிதோதி வேதி³தப்³போ³.

(ஜ) அப்பிச்ச²ஸ்ஸாதி ஏத்த² பச்சயஅப்பிச்சோ², அதி⁴க³மஅப்பிச்சோ², பரியத்திஅப்பிச்சோ², து⁴தங்க³அப்பிச்சோ²தி சத்தாரோ அப்பிச்சா². தத்த² பச்சயஅப்பிச்சோ² ப³ஹும் தே³ந்தே அப்பம் க³ண்ஹாதி, அப்பம் தே³ந்தே அப்பதரம் வா க³ண்ஹாதி, ந வா க³ண்ஹாதி, ந அனவஸேஸகா³ஹீ ஹோதி. அதி⁴க³மஅப்பிச்சோ² மஜ்ஜ²ந்திகத்தே²ரோ விய அத்தனோ அதி⁴க³மம் அஞ்ஞேஸம் ஜானிதும் ந தே³தி. பரியத்திஅப்பிச்சோ² தேபிடகோபி ஸமானோ ந ப³ஹுஸ்ஸுதபா⁴வம் ஜானாபேதுகாமோ ஹோதி ஸாகேததிஸ்ஸத்தே²ரோ விய. து⁴தங்க³அப்பிச்சோ² து⁴தங்க³பரிஹரணபா⁴வம் அஞ்ஞேஸம் ஜானிதும் ந தே³தி த்³வேபா⁴திகத்தே²ரேஸு ஜேட்ட²கத்தே²ரோ விய. வத்து² விஸுத்³தி⁴மக்³கே³ கதி²தம். அயம் த⁴ம்மோதி ஏவம் ஸந்தகு³ணனிகூ³ஹனேன ச பச்சயபடிக்³க³ஹணே மத்தஞ்ஞுதாய ச அப்பிச்ச²ஸ்ஸ புக்³க³லஸ்ஸ அயம் நவலோகுத்தரத⁴ம்மோ ஸம்பஜ்ஜதி, நோ மஹிச்ச²ஸ்ஸ. ஏவம் ஸப்³ப³த்த² யோஜேதப்³ப³ம்.

ஸந்துட்ட²ஸ்ஸாதி சதூஸு பச்சயேஸு தீஹி ஸந்தோஸேஹி ஸந்துட்ட²ஸ்ஸ. பவிவித்தஸ்ஸாதி காயசித்தஉபதி⁴விவேகேஹி விவித்தஸ்ஸ. தத்த² காயவிவேகோ நாம க³ணஸங்க³ணிகம் வினோதே³த்வா அட்ட²ஆரம்ப⁴வத்து²வஸேன ஏகீபா⁴வோ. ஏகீபா⁴வமத்தேன பன கம்மம் ந நிப்ப²ஜ்ஜதீதி கஸிணபரிகம்மம் கத்வா அட்ட² ஸமாபத்தியோ நிப்³ப³த்தேதி, அயம் சித்தவிவேகோ நாம. ஸமாபத்திமத்தேனேவ கம்மம் ந நிப்ப²ஜ்ஜதீதி ஜா²னம் பாத³கம் கத்வா ஸங்கா²ரே ஸம்மஸித்வா ஸஹ படிஸம்பி⁴தா³ஹி அரஹத்தம் பாபுணாதி, அயம் உபதி⁴விவேகோ நாம. தேனாஹ ப⁴க³வா – ‘‘காயவிவேகோ ச விவேகட்ட²காயானம் நேக்க²ம்மாபி⁴ரதானம். சித்தவிவேகோ ச பரிஸுத்³த⁴சித்தானம் பரமவோதா³னப்பத்தானம். உபதி⁴விவேகோ ச நிருபதீ⁴னம் புக்³க³லானம் விஸங்கா²ரக³தான’’ந்தி (மஹானி. 49).

ஸங்க³ணிகாராமஸ்ஸாதி க³ணஸங்க³ணிகாய சேவ கிலேஸஸங்க³ணிகாய ச ரதஸ்ஸ. ஆரத்³த⁴வீரியஸ்ஸாதி காயிகசேதஸிகவீரியவஸேன ஆரத்³த⁴வீரியஸ்ஸ. உபட்டி²தஸதிஸ்ஸாதி சதுஸதிபட்டா²னவஸேன உபட்டி²தஸதிஸ்ஸ. ஸமாஹிதஸ்ஸாதி ஏகக்³க³சித்தஸ்ஸ. பஞ்ஞவதோதி கம்மஸ்ஸகதபஞ்ஞாய பஞ்ஞவதோ. நிப்பபஞ்சஸ்ஸாதி விக³தமானதண்ஹாதி³ட்டி²பபஞ்சஸ்ஸ.

இத⁴ பா⁴வேதப்³ப³பதே³ மக்³கோ³ கதி²தோ. ஸேஸம் புரிமஸதி³ஸமேவ.

நவத⁴ம்மவண்ணனா

359. (க²) ஸீலவிஸுத்³தீ⁴தி விஸுத்³தி⁴ம் பாபேதும் ஸமத்த²ம் சதுபாரிஸுத்³தி⁴ஸீலம். பாரிஸுத்³தி⁴பதா⁴னியங்க³ந்தி பரிஸுத்³த⁴பா⁴வஸ்ஸ பதா⁴னங்க³ம். சித்தவிஸுத்³தீ⁴தி விபஸ்ஸனாய பத³ட்டா²னபூ⁴தா அட்ட² பகு³ணஸமாபத்தியோ. தி³ட்டி²விஸுத்³தீ⁴தி ஸபச்சயனாமரூபத³ஸ்ஸனம். கங்கா²விதரணவிஸுத்³தீ⁴தி பச்சயாகாரஞாணம். அத்³த⁴த்தயேபி ஹி பச்சயவஸேனேவ த⁴ம்மா பவத்தந்தீதி பஸ்ஸதோ கங்க²ம் விதரதி. மக்³கா³மக்³க³ஞாணத³ஸ்ஸனவிஸுத்³தீ⁴தி ஓபா⁴ஸாத³யோ ந மக்³கோ³, வீதி²ப்படிபன்னம் உத³யப்³ப³யஞாணம் மக்³கோ³தி ஏவம் மக்³கா³மக்³கே³ ஞாணம். படிபதா³ஞாணத³ஸ்ஸனவிஸுத்³தீ⁴தி ரத²வினீதே வுட்டா²னகா³மினிவிபஸ்ஸனா கதி²தா, இத⁴ தருணவிபஸ்ஸனா. ஞாணத³ஸ்ஸனவிஸுத்³தீ⁴தி ரத²வினீதே மக்³கோ³ கதி²தோ, இத⁴ வுட்டா²னகா³மினிவிபஸ்ஸனா. ஏதா பன ஸத்தபி விஸுத்³தி⁴யோ வித்தா²ரேன விஸுத்³தி⁴மக்³கே³ கதி²தா. பஞ்ஞாதி அரஹத்தப²லபஞ்ஞா. விமுத்திபி அரஹத்தப²லவிமுத்தியேவ.

(ச²) தா⁴துனானத்தம் படிச்ச உப்பஜ்ஜதி ப²ஸ்ஸனானத்தந்தி சக்கா²தி³தா⁴துனானத்தம் படிச்ச சக்கு²ஸம்ப²ஸ்ஸாதி³னானத்தம் உப்பஜ்ஜதீதி அத்தோ². ப²ஸ்ஸனானத்தம் படிச்சாதி சக்கு²ஸம்ப²ஸ்ஸாதி³னானத்தம் படிச்ச. வேத³னானானத்தந்தி சக்கு²ஸம்ப²ஸ்ஸஜாதி³வேத³னானானத்தம். ஸஞ்ஞானானத்தம் படிச்சாதி காமஸஞ்ஞாதி³னானத்தம் படிச்ச. ஸங்கப்பனானத்தந்தி காமஸங்கப்பாதி³னானத்தம். ஸங்கப்பனானத்தம் படிச்ச உப்பஜ்ஜதி ச²ந்த³னானத்தந்தி ஸங்கப்பனானத்ததாய ரூபே ச²ந்தோ³ ஸத்³தே³ ச²ந்தோ³தி ஏவம் ச²ந்த³னானத்தம் உப்பஜ்ஜதி. பரிளாஹனானத்தந்தி ச²ந்த³னானத்ததாய ரூபபரிளாஹோ ஸத்³த³பரிளாஹோதி ஏவம் பரிளாஹனானத்தம் உப்பஜ்ஜதி. பரியேஸனானானத்தந்தி பரிளாஹனானத்ததாய ரூபபரியேஸனாதி³னானத்தம் உப்பஜ்ஜதி. லாப⁴னானத்தந்தி பரியேஸனானானத்ததாய ரூபபடிலாபா⁴தி³னானத்தம் உப்பஜ்ஜதி.

(ஜ) ஸஞ்ஞாஸு மரணஸஞ்ஞாதி மரணானுபஸ்ஸனாஞாணே ஸஞ்ஞா. ஆஹாரேபடிகூலஸஞ்ஞாதி ஆஹாரம் பரிக்³க³ண்ஹந்தஸ்ஸ உப்பன்னஸஞ்ஞா. ஸப்³ப³லோகேஅனபி⁴ரதிஸஞ்ஞாதி ஸப்³ப³ஸ்மிம் வட்டே உக்கண்ட²ந்தஸ்ஸ உப்பன்னஸஞ்ஞா. ஸேஸா ஹேட்டா² கதி²தா ஏவ. இத⁴ ப³ஹுகாரபதே³ மக்³கோ³ கதி²தோ. ஸேஸம் புரிமஸதி³ஸமேவ.

த³ஸத⁴ம்மவண்ணனா

360. (ஜ²) நிஜ்ஜரவத்தூ²னீதி நிஜ்ஜரகாரணானி. மிச்சா²தி³ட்டி² நிஜ்ஜிண்ணா ஹோதீதி அயம் ஹேட்டா² விபஸ்ஸனாயபி நிஜ்ஜிண்ணா ஏவ பஹீனா. கஸ்மா புன க³ஹிதாதி அஸமுச்சி²ன்னத்தா. விபஸ்ஸனாய ஹி கிஞ்சாபி ஜிண்ணா, ந பன ஸமுச்சி²ன்னா, மக்³கோ³ பன உப்பஜ்ஜித்வா தம் ஸமுச்சி²ந்த³தி, ந புன வுட்டா²தும் தே³தி. தஸ்மா புன க³ஹிதா. ஏவம் ஸப்³ப³பதே³ஸு நயோ நேதப்³போ³.

ஏத்த² ச ஸம்மாதி³ட்டி²பச்சயா சதுஸட்டி² த⁴ம்மா பா⁴வனாபாரிபூரிம் க³ச்ச²ந்தி. கதமே சதுஸட்டி²? ஸோதாபத்திமக்³க³க்க²ணே அதி⁴மோக்க²ட்டே²ன ஸத்³தி⁴ந்த்³ரியம் பரிபூரேதி, பக்³க³ஹட்டே²ன வீரியிந்த்³ரியம் பரிபூரேதி, அனுஸ்ஸரணட்டே²ன ஸதிந்த்³ரியம் பரிபூரேதி, அவிக்கே²பட்டே²ன ஸமாதி⁴ந்த்³ரியம் பரிபூரேதி, த³ஸ்ஸனட்டே²ன பஞ்ஞிந்த்³ரியம் பரிபூரேதி, விஜானனட்டே²ன மனிந்த்³ரியம், அபி⁴னந்த³னட்டே²ன ஸோமனஸ்ஸிந்த்³ரியம், பவத்தஸந்ததிஅதி⁴பதேய்யட்டே²ன ஜீவிதிந்த்³ரியம் பரிபூரேதி…பே… அரஹத்தப²லக்க²ணே அதி⁴மோக்க²ட்டே²ன ஸத்³தி⁴ந்த்³ரியம், பவத்தஸந்ததிஅதி⁴பதேய்யட்டே²ன ஜீவிதிந்த்³ரியம் பரிபூரேதீதி ஏவம் சதூஸு மக்³கே³ஸு சதூஸு ப²லேஸு அட்ட² அட்ட² ஹுத்வா சதுஸட்டி² த⁴ம்மா பாரிபூரிம் க³ச்ச²ந்தி. இத⁴ அபி⁴ஞ்ஞேய்யபதே³ மக்³கோ³ கதி²தோ. ஸேஸம் புரிமஸதி³ஸமேவ.

இத⁴ ட²த்வா பஞ்ஹா ஸமோதா⁴னேதப்³பா³. த³ஸகே ஸதம் பஞ்ஹா கதி²தா. ஏககே ச நவகே ச ஸதம், து³கே ச அட்ட²கே ச ஸதம், திகே ச ஸத்தகே ச ஸதம், சதுக்கே ச ச²க்கே ச ஸதம், பஞ்சகே பஞ்ஞாஸாதி அட்³ட⁴ச²ட்டா²னி பஞ்ஹஸதானி கதி²தானி ஹோந்தி.

‘‘இத³மவோச ஆயஸ்மா ஸாரிபுத்தோ, அத்தமனா தே பி⁴க்கூ² ஆயஸ்மதோ ஸாரிபுத்தஸ்ஸ பா⁴ஸிதம் அபி⁴னந்து³’’ந்தி ஸாது⁴, ஸாதூ⁴தி அபி⁴னந்த³ந்தா ஸிரஸா ஸம்படிச்சி²ம்ஸு. தாய ச பன அத்தமனதாய இமமேவ ஸுத்தம் ஆவஜ்ஜமானா பஞ்சஸதாபி தே பி⁴க்கூ² ஸஹ படிஸம்பி⁴தா³ஹி அக்³க³ப²லே அரஹத்தே பதிட்ட²ஹிம்ஸூதி.

ஸுமங்க³லவிலாஸினியா தீ³க⁴னிகாயட்ட²கதா²ய

த³ஸுத்தரஸுத்தவண்ணனா நிட்டி²தா.