மஹாஸீவத்தே²ரவத்து²

தே²ரோ கிர அட்டா²ரஸ மஹாக³ணே வாசேஸி. தஸ்ஸோவாதே³ ட²த்வா திம்ஸஸஹஸ்ஸா பி⁴க்கூ² அரஹத்தம் பாபுணிம்ஸு. அதே²கோ பி⁴க்கு² ‘‘மய்ஹம் தாவ அப்³ப⁴ந்தரே கு³ணா அப்பமாணா, கீதி³ஸா நு கோ² மே ஆசரியஸ்ஸ கு³ணா’’தி ஆவஜ்ஜந்தோ புது²ஜ்ஜனபா⁴வம் பஸ்ஸித்வா ‘‘அம்ஹாகம் ஆசரியோ அஞ்ஞேஸம் அவஸ்ஸயோ ஹோதி, அத்தனோ ப⁴விதும் ந ஸக்கோதி, ஓவாத³மஸ்ஸ த³ஸ்ஸாமீ’’தி ஆகாஸேன க³ந்த்வா விஹாரஸமீபே ஓதரித்வா தி³வாட்டா²னே நிஸின்னம் ஆசரியம் உபஸங்கமித்வா வத்தம் த³ஸ்ஸேத்வா ஏகமந்தம் நிஸீதி³.

தே²ரோ – ‘‘கிம் காரணா ஆக³தோஸி பிண்ட³பாதிகா’’தி ஆஹ. ஏகம் அனுமோத³னம் க³ண்ஹிஸ்ஸாமீதி ஆக³தோஸ்மி, ப⁴ந்தேதி. ஓகாஸோ ந ப⁴விஸ்ஸதி, ஆவுஸோதி? விதக்கமாளகே டி²தகாலே புச்சி²ஸ்ஸாமி, ப⁴ந்தேதி. தஸ்மிம் டா²னே அஞ்ஞே புச்ச²ந்தீதி. பி⁴க்கா²சாரமக்³கே³, ப⁴ந்தேதி. தத்ராபி அஞ்ஞே புச்ச²ந்தீதி. து³பட்டனிவாஸனட்டா²னே, ஸங்கா⁴டிபாருபனட்டா²னே, பத்தனீஹரணட்டா²னே, கா³மே சரித்வா ஆஸனஸாலாயம் யாகு³பீதகாலே, ப⁴ந்தேதி. தத்த² அட்ட²கதா²தே²ரா அத்தனோ கங்க²ம் வினோதே³ந்தி, ஆவுஸோதி. அந்தோகா³மதோ நிக்க²ந்தகாலே புச்சி²ஸ்ஸாமி, ப⁴ந்தேதி. தத்ராபி அஞ்ஞே புச்ச²ந்தி, ஆவுஸோதி. அந்தராமக்³கே³, ப⁴ந்தே, போ⁴ஜனஸாலாயம் ப⁴த்தகிச்சபரியோஸானே, ப⁴ந்தே, தி³வாட்டா²னே, பாத³தோ⁴வனகாலே, முக²தோ⁴வனகாலே, ப⁴ந்தேதி? ததா³ அஞ்ஞே புச்ச²ந்தீதி. ததோ பட்டா²ய யாவ அருணா அபரே புச்ச²ந்தி, ஆவுஸோதி. த³ந்தகட்ட²ம் க³ஹேத்வா முக²தோ⁴வனத்த²ம் க³மனகாலே, ப⁴ந்தேதி? ததா³ அஞ்ஞே புச்ச²ந்தீதி. முக²ம் தோ⁴வித்வா ஆக³மனகாலே, ப⁴ந்தேதி? தத்ராபி அஞ்ஞே புச்ச²ந்தீதி. ஸேனாஸனம் பவிஸித்வா நிஸின்னகாலே, ப⁴ந்தேதி? தத்ராபி அஞ்ஞே புச்ச²ந்தீதி. ப⁴ந்தே, நனு முக²ம் தோ⁴வித்வா ஸேனாஸனம் பவிஸித்வா தயோ சத்தாரோ பல்லங்கே உஸுமம் கா³ஹாபேத்வா யோனிஸோமனஸிகாரே கம்மம் கரோந்தானம் ஓகாஸகாலேன ப⁴விதப்³ப³ம் ஸியா, மரணக²ணம்பி ந லபி⁴ஸ்ஸத², ப⁴ந்தே, ப²லகஸதி³ஸத்த² ப⁴ந்தே பரஸ்ஸ அவஸ்ஸயோ ஹோத², அத்தனோ ப⁴விதும் ந ஸக்கோத², ந மே தும்ஹாகம் அனுமோத³னாய அத்தோ²தி ஆகாஸே உப்பதித்வா அக³மாஸி.

தே²ரோ – ‘‘இமஸ்ஸ பி⁴க்கு²னோ பரியத்தியா கம்மம் நத்தி², மய்ஹம் பன அங்குஸகோ ப⁴விஸ்ஸாமீதி ஆக³தோ’’தி ஞத்வா ‘‘இதா³னி ஓகாஸோ ந ப⁴விஸ்ஸதி, பச்சூஸகாலே க³மிஸ்ஸாமீ’’தி பத்தசீவரம் ஸமீபே கத்வா ஸப்³ப³ம் தி³வஸபா⁴க³ம் பட²மயாமமஜ்ஜி²மயாமஞ்ச த⁴ம்மம் வாசேத்வா பச்சி²மயாமே ஏகஸ்மிம் தே²ரே உத்³தே³ஸம் க³ஹேத்வா நிக்க²ந்தே பத்தசீவரம் க³ஹேத்வா தேனேவ ஸத்³தி⁴ம் நிக்க²ந்தோ. நிஸின்னஅந்தேவாஸிகா ஆசரியோ கேனசி பபஞ்சேன நிக்க²ந்தோதி மஞ்ஞிம்ஸு. நிக்க²ந்தோ தே²ரோ கோசி தே³வ ஸமானாசரியபி⁴க்கூ²தி ஸஞ்ஞம் அகாஸி.

தே²ரோ கிர ‘‘மாதி³ஸஸ்ஸ அரஹத்தம் நாம கிம், த்³வீஹதீஹேனேவ பாபுணித்வா பச்சாக³மிஸ்ஸாமீ’’தி அந்தேவாஸிகானம் அனாரோசேத்வாவ ஆஸாள்ஹீமாஸஸ்ஸ ஜுண்ஹபக்க²தேரஸியா நிக்க²ந்தோ கா³மந்தபப்³பா⁴ரம் க³ந்த்வா சங்கமம் ஆருய்ஹ கம்மட்டா²னம் மனஸிகரோந்தோ தம் தி³வஸம் அரஹத்தம் க³ஹேதும் நாஸக்கி². உபோஸத²தி³வஸே ஸம்பத்தே ‘‘த்³வீஹதீஹேன அரஹத்தம் க³ண்ஹிஸ்ஸாமீதி ஆக³தோ, க³ஹேதும் பன நாஸக்கி²ம். தயோ மாஸே பன தீணி தி³வஸானி விய யாவ மஹாபவாரணா தாவ ஜானிஸ்ஸாமீ’’தி வஸ்ஸம் உபக³ந்த்வாபி க³ஹேதும் நாஸக்கி². பவாரணாதி³வஸே சிந்தேஸி – ‘‘அஹம் த்³வீஹதீஹேன அரஹத்தம் க³ண்ஹிஸ்ஸாமீதி ஆக³தோ, தேமாஸேனாபி நாஸக்கி²ம், ஸப்³ரஹ்மசாரினோ பன விஸுத்³தி⁴பவாரணம் பவாரேந்தீ’’தி. தஸ்ஸேவம் சிந்தயதோ அஸ்ஸுதா⁴ரா பவத்தந்தி. ததோ ‘‘ந மஞ்சே மய்ஹம் சதூஹி இரியாபதே²ஹி மக்³க³ப²லம் உப்பஜ்ஜிஸ்ஸதி, அரஹத்தம் அப்பத்வா நேவ மஞ்சே பிட்டி²ம் பஸாரேஸ்ஸாமி, ந பாதே³ தோ⁴விஸ்ஸாமீ’’தி மஞ்சம் உஸ்ஸாபேத்வா ட²பேஸி. புன அந்தோவஸ்ஸம் பத்தம், அரஹத்தம் க³ஹேதும் நாஸக்கி²யேவ. ஏகூனதிம்ஸபவாரணாஸு அஸ்ஸுதா⁴ரா பவத்தந்தி. கா³மதா³ரகா தே²ரஸ்ஸ பாதே³ஸு பா²லிதட்டா²னானி கண்டகேஹி ஸிப்³ப³ந்தி, த³வம் கரோந்தாபி ‘‘அய்யஸ்ஸ மஹாஸீவத்தே²ரஸ்ஸ விய பாதா³ ஹோந்தூ’’தி த³வம் கரோந்தி.

தே²ரோ திம்ஸஸம்வச்ச²ரே மஹாபவாரணாதி³வஸே ஆலம்ப³ணப²லகம் நிஸ்ஸாய டி²தோ ‘‘இதா³னி மே திம்ஸ வஸ்ஸானி ஸமணத⁴ம்மம் கரோந்தஸ்ஸ, நாஸக்கி²ம் அரஹத்தம் பாபுணிதும், அத்³தா⁴ மே இமஸ்மிம் அத்தபா⁴வே மக்³கோ³ வா ப²லம் வா நத்தி², ந மே லத்³த⁴ம் ஸப்³ரஹ்மசாரீஹி ஸத்³தி⁴ம் விஸுத்³தி⁴பவாரணம் பவாரேது’’ந்தி சிந்தேஸி. தஸ்ஸேவம் சிந்தயதோவ தோ³மனஸ்ஸம் உப்பஜ்ஜி, அஸ்ஸுதா⁴ரா பவத்தந்தி. அத² அவிதூ³ரட்டா²னே ஏகா தே³வதீ⁴தா ரோத³மானா அட்டா²ஸி. ‘‘கோ ஏத்த² ரோத³ஸீ’’தி? ‘‘அஹம், ப⁴ந்தே, தே³வதீ⁴தா’’தி. ‘‘கஸ்மா ரோத³ஸீ’’தி? ‘‘ரோத³மானேன மக்³க³ப²லம் நிப்³ப³த்திதம், தேன அஹம்பி ஏகம் த்³வே மக்³க³ப²லானி நிப்³ப³த்தேஸ்ஸாமீதி ரோதா³மி, ப⁴ந்தே’’தி.

ததோ தே²ரோ – ‘‘போ⁴ மஹாஸீவத்தே²ர, தே³வதாபி தயா ஸத்³தி⁴ம் கேளிம் கரோந்தி, அனுச்ச²விகம் நு கோ² தே ஏத’’ந்தி விபஸ்ஸனம் வட்³டே⁴த்வா ஸஹ படிஸம்பி⁴தா³ஹி அரஹத்தம் அக்³க³ஹேஸி. ஸோ ‘‘இதா³னி நிபஜ்ஜிஸ்ஸாமீ’’தி ஸேனாஸனம் படிஜக்³கி³த்வா மஞ்சகம் பஞ்ஞபேத்வா உத³கட்டா²னே உத³கம் பச்சுபட்ட²பேத்வா ‘‘பாதே³ தோ⁴விஸ்ஸாமீ’’தி ஸோபானப²லகே நிஸீதி³.

அந்தேவாஸிகாபிஸ்ஸ ‘‘அம்ஹாகம் ஆசரியஸ்ஸ ஸமணத⁴ம்மம் காதும் க³ச்ச²ந்தஸ்ஸ திம்ஸ வஸ்ஸானி, ஸக்கி² நு கோ² விஸேஸம் நிப்³ப³த்தேதும், நாஸக்கீ²’’தி ஆவஜ்ஜயமானா ‘‘அரஹத்தம் பத்வா பாத³தோ⁴வனத்த²ம் நிஸின்னோ’’தி தி³ஸ்வா ‘‘அம்ஹாகம் ஆசரியோ அம்ஹாதி³ஸேஸு அந்தேவாஸிகேஸு திட்ட²ந்தேஸு ‘அத்தனாவ பாதே³ தோ⁴விஸ்ஸதீ’தி அட்டா²னமேதம், அஹம் தோ⁴விஸ்ஸாமி அஹம் தோ⁴விஸ்ஸாமீ’’தி திம்ஸஸஹஸ்ஸானிபி ஆகாஸேன க³ந்த்வா வந்தி³த்வா ‘‘பாதே³ தோ⁴விஸ்ஸாம, ப⁴ந்தே’’தி ஆஹம்ஸு. ஆவுஸோ, இதா³னி திம்ஸ வஸ்ஸானி ஹோந்தி மம பாதா³னம் அதோ⁴தானம், திட்ட²த², தும்ஹே, அஹமேவ தோ⁴விஸ்ஸாமீதி.

ஸக்கோபி ஆவஜ்ஜந்தோ – ‘‘மய்ஹம் அய்யோ மஹாஸீவத்தே²ரோ அரஹத்தம் பத்தோ திம்ஸஸஹஸ்ஸானம் அந்தேவாஸிகானம் ‘பாதே³ தோ⁴விஸ்ஸாமா’தி ஆக³தானம் பாதே³ தோ⁴விதும் ந தே³தி. மாதி³ஸே பன உபட்டா²கே திட்ட²ந்தே ‘மய்ஹம் அய்யோ ஸயம் பாதே³ தோ⁴விஸ்ஸதீ’தி அட்டா²னமேதம், அஹம் தோ⁴விஸ்ஸாமீ’’தி ஸன்னிட்டா²னம் கத்வா ஸுஜாதாய தே³வியா ஸத்³தி⁴ம் பி⁴க்கு²ஸங்க⁴ஸ்ஸ ஸந்திகே பாதுரஹோஸி. ஸோ ஸுஜம் அஸுரகஞ்ஞம் புரதோ கத்வா ‘‘அபேத², ப⁴ந்தே, மாதுகா³மோ’’தி ஓகாஸம் காரேத்வா தே²ரம் உபஸங்கமித்வா வந்தி³த்வா புரதோ உக்குடிகோ நிஸீதி³த்வா ‘‘பாதே³ தோ⁴விஸ்ஸாமி, ப⁴ந்தே’’தி ஆஹ. கோஸிய, இதா³னி மே திம்ஸ வஸ்ஸானி பாதா³னம் அதோ⁴தானம், தே³வதானஞ்ச பகதியாபி மனுஸ்ஸஸரீரக³ந்தோ⁴ நாம ஜேகு³ச்சோ², யோஜனஸதே டி²தானம்பி கண்டே² ஆஸத்தகுணபம் விய ஹோதி, அஹமேவ தோ⁴விஸ்ஸாமீதி. ப⁴ந்தே, அயம் க³ந்தோ⁴ நாம ந பஞ்ஞாயதி, தும்ஹாகம் பன ஸீலக³ந்தோ⁴ ச² தே³வலோகே அதிக்கமித்வா உபரி ப⁴வக்³க³ம் பத்வா டி²தோ. ஸீலக³ந்த⁴தோ அஞ்ஞோ உத்தரிதரோ க³ந்தோ⁴ நாம நத்தி², ப⁴ந்தே, தும்ஹாகம் ஸீலக³ந்தே⁴னம்ஹி ஆக³தோதி வாமஹத்தே²ன கோ³ப்ப²கஸந்தி⁴யம் க³ஹேத்வா த³க்கி²ணஹத்தே²ன பாத³தலம் பரிமஜ்ஜி. த³ஹரகுமாரஸ்ஸேவ பாதா³ அஹேஸும். ஸக்கோ பாதே³ தோ⁴வித்வா வந்தி³த்வா தே³வலோகமேவ க³தோ.

ஏவம் ‘‘ந லபா⁴மி ஸப்³ரஹ்மசாரீஹி ஸத்³தி⁴ம் விஸுத்³தி⁴பவாரணம் பவாரேது’’ந்தி ஆவஜ்ஜந்தஸ்ஸ உப்பன்னம் தோ³மனஸ்ஸம் நிஸ்ஸாய பி⁴க்கு²னோ மஞ்ஞனவஸேன விபஸ்ஸனாய ஆரம்மணம்பி விபஸ்ஸனாபி மக்³கோ³பி ப²லம்பி ஸவிதக்கஸவிசாரதோ³மனஸ்ஸந்தி ச அவிதக்காவிசாரதோ³மனஸ்ஸந்தி ச வுத்தந்தி வேதி³தப்³ப³ம்.

தத்த² ஏகோ பி⁴க்கு² ஸவிதக்கஸவிசாரதோ³மனஸ்ஸே விபஸ்ஸனம் பட்ட²பேத்வா இத³ம் தோ³மனஸ்ஸம் கிம் நிஸ்ஸிதந்தி உபதா⁴ரேந்தோ வத்து²னிஸ்ஸிதந்தி பஜானாதீதி ப²ஸ்ஸபஞ்சமகே வுத்தனயேனேவ அனுக்கமேன அரஹத்தே பதிட்டா²தி. ஏகோ அவிதக்காவிசாரே தோ³மனஸ்ஸே விபஸ்ஸனம் பட்ட²பேத்வா வுத்தனயேனேவ அரஹத்தே பதிட்டா²தி. தத்த² அபி⁴னிவிட்ட²தோ³மனஸ்ஸேஸுபி ஸவிதக்கஸவிசாரதோ அவிதக்கஅவிசாரம் பணீததரம். ஸவிதக்கஸவிசாரதோ³மனஸ்ஸவிபஸ்ஸனாதோபி அவிதக்காவிசாரதோ³மனஸ்ஸவிபஸ்ஸனா பணீததரா. ஸவிதக்கஸவிசாரதோ³மனஸ்ஸப²லஸமாபத்திதோபி அவிதக்காவிசாரதோ³மனஸ்ஸப²லஸமாபத்தியேவ பணீததரா. தேனாஹ ப⁴க³வா – ‘‘யே அவிதக்கஅவிசாரே தே பணீததரே’’தி.

362. ஏவரூபா உபேக்கா² ந ஸேவிதப்³பா³தி ஏவரூபா கே³ஹஸிதஉபேக்கா² ந ஸேவிதப்³பா³. கே³ஹஸிதஉபேக்கா² நாம ‘‘தத்த² கதமா ச² கே³ஹஸிதஉபேக்கா². சக்கு²னா ரூபம் தி³ஸ்வா உப்பஜ்ஜதி உபேக்கா² பா³லஸ்ஸ மூள்ஹஸ்ஸ புது²ஜ்ஜனஸ்ஸ அனோதி⁴ஜினஸ்ஸ அவிபாகஜினஸ்ஸ அனாதீ³னவத³ஸ்ஸாவினோ அஸ்ஸுதவதோ புது²ஜ்ஜனஸ்ஸ, யா ஏவரூபா உபேக்கா², ரூபம் ஸா நாதிவத்ததி, தஸ்மா ஸா உபேக்கா² கே³ஹஸிதாதி வுச்சதீ’’தி ஏவம் ச²ஸு த்³வாரேஸு இட்டா²ரம்மணே ஆபாத²க³தே கு³ளபிண்டி³கே நிலீனமக்கி²கா விய ரூபாதீ³னி அனதிவத்தமானா தத்தே²வ லக்³கா³ லக்³கி³தா ஹுத்வா உப்பன்னா காமகு³ணனிஸ்ஸிதா உபேக்கா² ந ஸேவிதப்³பா³.

ஏவரூபா உபேக்கா² ஸேவிதப்³பா³தி ஏவரூபா நேக்க²ம்மஸிதா உபேக்கா² ஸேவிதப்³பா³. நேக்க²ம்மஸிதா உபேக்கா² நாம – ‘‘தத்த² கதமா ச² நேக்க²ம்மஸிதா உபேக்கா²? ரூபானம் த்வேவ அனிச்சதம் விதி³த்வா விபரிணாமவிராக³னிரோத⁴ம் ‘புப்³பே³ சேவ ரூபா ஏதரஹி ச, ஸப்³பே³ தே ரூபா அனிச்சா, து³க்கா², விபரிணாமத⁴ம்மா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதோ உப்பஜ்ஜதி உபேக்கா², யா ஏவரூபா உபேக்கா², ரூபம் ஸா அதிவத்ததி, தஸ்மா ஸா உபேக்கா² நேக்க²ம்மஸிதாதி வுச்சதீ’’தி (ம. நி. 3.308). ஏவம் ச²ஸு த்³வாரேஸு இட்டா²னிட்ட²ஆரம்மணே ஆபாத²க³தே இட்டே² அரஜ்ஜந்தஸ்ஸ, அனிட்டே² அது³ஸ்ஸந்தஸ்ஸ, அஸமபேக்க²னேன அஸம்முய்ஹந்தஸ்ஸ உப்பன்னா விபஸ்ஸனா ஞாணஸம்பயுத்தா உபேக்கா². அபிச வேத³னாஸபா⁴கா³ தத்ர மஜ்ஜ²த்துபேக்கா²பி ஏத்த² உபேக்கா²வ. தஸ்மா ஸேவிதப்³பா³தி அயம் நேக்க²ம்மவஸேன விபஸ்ஸனாவஸேன அனுஸ்ஸதிட்டா²னவஸேன பட²மது³தியததியசதுத்த²ஜ்ஜா²னவஸேன ச உப்பஜ்ஜனகஉபேக்கா² ஸேவிதப்³பா³ நாம.

ஏத்த² யம் சே ஸவிதக்கம் ஸவிசாரந்தி தாயபி நேக்க²ம்மஸிதஉபேக்கா²ய யம் நேக்க²ம்மவஸேன விபஸ்ஸனாவஸேன அனுஸ்ஸதிட்டா²னவஸேன பட²மஜ்ஜா²னவஸேன ச உப்பன்னம் ஸவிதக்கஸவிசாரம் உபேக்க²ந்தி ஜானேய்ய. யம் சே அவிதக்கம் அவிசாரந்தி யம் பன து³தியஜ்ஜா²னாதி³வஸேன உப்பன்னம் அவிதக்காவிசாரம் உபேக்க²ந்தி ஜானேய்ய. யே அவிதக்கே அவிசாரே தே பணீததரேதி ஏதாஸு த்³வீஸு யா அவிதக்கஅவிசாரா, ஸா பணீததராதி அத்தோ². இமினா கிம் கதி²தம் ஹோதி? த்³வின்னம் அரஹத்தம் கதி²தம். ஏகோ ஹி பி⁴க்கு² ஸவிதக்கஸவிசாரஉபேக்கா²ய விபஸ்ஸனம் பட்ட²பேத்வா அயம் உபேக்கா² கிம் நிஸ்ஸிதாதி உபதா⁴ரேந்தோ வத்து²னிஸ்ஸிதாதி பஜானாதீதி ப²ஸ்ஸபஞ்சமகே வுத்தனயேனேவ அனுக்கமேன அரஹத்தே பதிட்டா²தி. ஏகோ அவிதக்காவிசாராய உபேக்கா²ய விபஸ்ஸனம் பட்ட²பேத்வா வுத்தனயேனேவ அரஹத்தே பதிட்டா²தி. தத்த² அபி⁴னிவிட்ட²உபேக்கா²ஸுபி ஸவிதக்கஸவிசாரதோ அவிதக்காவிசாரா பணீததரா. ஸவிதக்கஸவிசாரஉபேக்கா²விபஸ்ஸனாதோபி அவிதக்காவிசாரஉபேக்கா²விபஸ்ஸனாபணீததரா. ஸவிதக்கஸவிசாரஉபேக்கா²ப²லஸமாபத்திதோபி அவிதக்காவிசாருபேக்கா²ப²லஸமாபத்தியேவ பணீததரா. தேனாஹ ப⁴க³வா ‘‘யே அவிதக்கே அவிசாரே தே பணீததரே’’தி.

363. ஏவம் படிபன்னோ கோ², தே³வானமிந்த³, பி⁴க்கு² பபஞ்சஸஞ்ஞாஸங்கா²னிரோத⁴ஸாருப்பகா³மினிம் படிபத³ம் படிபன்னோ ஹோதீதி ப⁴க³வா அரஹத்தனிகூடேன தே³ஸனம் நிட்ட²பேஸி. ஸக்கோ பன ஸோதாபத்திப²லம் பத்தோ. பு³த்³தா⁴னஞ்ஹி அஜ்ஜா²ஸயோ ஹீனோ ந ஹோதி, உக்கட்டோ²வ ஹோதி. ஏகஸ்ஸபி ப³ஹூனம்பி த⁴ம்மம் தே³ஸேந்தா அரஹத்தேனேவ கூடம் க³ண்ஹந்தி. ஸத்தா பன அத்தனோ அனுரூபே உபனிஸ்ஸயே டி²தா கேசி ஸோதாபன்னா ஹோந்தி, கேசி ஸகதா³கா³மீ, கேசி அனாகா³மீ, கேசி அரஹந்தோ. ராஜா விய ஹி ப⁴க³வா, ராஜகுமாரா விய வேனேய்யா. யதா² ஹி ராஜா போ⁴ஜனகாலே அத்தனோ பமாணேன பிண்ட³ம் உத்³த⁴ரித்வா ராஜகுமாரானம் உபனேதி, தே ததோ அத்தனோ முக²ப்பமாணேனேவ கப³ளம் கரோந்தி, ஏவம் ப⁴க³வா அத்தஜ்ஜா²ஸயானுரூபாய தே³ஸனாய அரஹத்தேனேவ கூடம் க³ண்ஹாதி. வேனேய்யா அத்தனோ உபனிஸ்ஸயப்பமாணேன ததோ ஸோதாபத்திப²லமத்தம் வா ஸகதா³கா³மிஅனாகா³மிஅரஹத்தப²லமேவ வா க³ண்ஹந்தி. ஸக்கோ பன ஸோதாபன்னோ ஜாதோ. ஸோதாபன்னோ ச ஹுத்வா ப⁴க³வதோ புரதோயேவ சவித்வா தருணஸக்கோ ஹுத்வா நிப்³ப³த்தி, தே³வதானஞ்ஹி சவமானானம் அத்தபா⁴வஸ்ஸ க³தாக³தட்டா²னம் நாம ந பஞ்ஞாயதி, தீ³பஸிகா²க³மனம் விய ஹோதி. தஸ்மா ஸேஸதே³வதா ந ஜானிம்ஸு. ஸக்கோ பன ஸயம் சுதத்தா ப⁴க³வா ச அப்படிஹதஞாணத்தா த்³வேவ ஜனா ஜானிம்ஸு. அத² ஸக்கோ சிந்தேஸி ‘‘மய்ஹஞ்ஹி ப⁴க³வதா தீஸு டா²னேஸு நிப்³ப³த்திதப²லமேவ கதி²தம், அயஞ்ச பன மக்³கோ³ வா ப²லம் வா ஸகுணிகாய விய உப்பதித்வா க³ஹேதும் ந ஸக்கா, ஆக³மனீயபுப்³ப³பா⁴க³படிபதா³ய அஸ்ஸ ப⁴விதப்³ப³ம். ஹந்தா³ஹம் உபரி கீ²ணாஸவஸ்ஸ புப்³ப³பா⁴க³படிபத³ம் புச்சா²மீ’’தி.