8. ஸக்கபஞ்ஹஸுத்தவண்ணனா

நிதா³னவண்ணனா

344. ஏவம் மே ஸுதந்தி ஸக்கபஞ்ஹஸுத்தம். தத்ராயமனுத்தானபத³வண்ணனா – அம்ப³ஸண்டா³ நாம ப்³ராஹ்மணகா³மோதி ஸோ கிர கா³மோ அம்ப³ஸண்டா³னம் அவிதூ³ரே நிவிட்டோ², தஸ்மா ‘‘அம்ப³ஸண்டா³’’ த்வேவ வுச்சதி. வேதி³யகே பப்³ப³தேதி ஸோ கிர பப்³ப³தோ பப்³ப³தபாதே³ ஜாதேன மணிவேதி³காஸதி³ஸேன நீலவனஸண்டே³ன ஸமந்தா பரிக்கி²த்தோ, தஸ்மா ‘வேதி³யகபப்³ப³தோ’ த்வேவ ஸங்க்²யம் க³தோ. இந்த³ஸாலகு³ஹாயந்தி புப்³பே³பி ஸா த்³வின்னம் பப்³ப³தானம் அந்தரே கு³ஹா, இந்த³ஸாலருக்கோ² சஸ்ஸா த்³வாரே, தஸ்மா ‘இந்த³ஸாலகு³ஹா’தி ஸங்க்²யம் க³தா. அத² நம் குட்டேஹி பரிக்கி²பித்வா த்³வாரவாதபானானி யோஜேத்வா ஸுபரினிட்டி²தஸுதா⁴கம்மமாலாகம்மலதாகம்மவிசித்தம் லேணம் கத்வா ப⁴க³வதோ அத³ம்ஸு. புரிமவோஹாரவஸேன பன ‘‘இந்த³ஸாலகு³ஹா’’ த்வேவ நம் ஸஞ்ஜானந்தி. தம் ஸந்தா⁴ய வுத்தம் ‘இந்த³ஸாலகு³ஹாய’ந்தி.

உஸ்ஸுக்கம் உத³பாதீ³தி த⁴ம்மிகோ உஸ்ஸாஹோ உப்பஜ்ஜி. நனு ச ஏஸ அபி⁴ண்ஹத³ஸ்ஸாவீ ப⁴க³வதோ, ந ஸோ தே³வதாஸன்னிபாதோ நாம அத்தி², யத்தா²யம் ந ஆக³தபுப்³போ³, ஸக்கேன ஸதி³ஸோ அப்பமாத³விஹாரீ தே³வபுத்தோ நாம நத்தி². அத² கஸ்மா பு³த்³த⁴த³ஸ்ஸனம் அனாக³தபுப்³ப³ஸ்ஸ விய அஸ்ஸ உஸ்ஸாஹோ உத³பாதீ³தி? மரணப⁴யேன ஸந்தஜ்ஜிதத்தா. தஸ்மிம் கிரஸ்ஸ ஸமயே ஆயு பரிக்கீ²ணோ, ஸோ பஞ்ச புப்³ப³னிமித்தானி தி³ஸ்வா ‘‘பரிக்கீ²ணோ தா³னி மே ஆயூ’’தி அஞ்ஞாஸி. யேஸஞ்ச தே³வபுத்தானம் மரணனிமித்தானி ஆவி ப⁴வந்தி, தேஸு யே பரித்தகேன புஞ்ஞகம்மேன தே³வலோகே நிப்³ப³த்தா, தே ‘‘குஹிம் நு கோ² இதா³னி நிப்³ப³த்திஸ்ஸாமா’’தி ப⁴யம் ஸந்தாஸம் ஆபஜ்ஜந்தி. யே கதபீ⁴ருத்தானா ப³ஹும் புஞ்ஞம் கத்வா நிப்³ப³த்தா, தே அத்தனா தி³ன்னதா³னம் ரக்கி²தஸீலம் பா⁴விதபா⁴வனஞ்ச ஆக³ம்ம ‘‘உபரிதே³வலோகே ஸம்பத்திம் அனுப⁴விஸ்ஸாமா’’தி ந பா⁴யந்தி.

ஸக்கோ பன தே³வராஜா புப்³ப³னிமித்தானி தி³ஸ்வா த³ஸயோஜனஸஹஸ்ஸம் தே³வனக³ரம், யோஜனஸஹஸ்ஸுப்³பே³த⁴ம் வேஜயந்தம், தியோஜனஸதிகம் ஸுத⁴ம்மதே³வஸப⁴ம், யோஜனஸதுப்³பே³த⁴ம் பாரிச்ச²த்தகம், ஸட்டி²யோஜனிகம் பண்டு³கம்ப³லஸிலம், அட்³ட⁴தியா நாடககோடியோ த்³வீஸு தே³வலோகேஸு தே³வபரிஸம், நந்த³னவனம், சித்தலதாவனம், மிஸ்ஸகவனம், பா²ருஸகவனந்தி ஏதம் ஸப்³ப³ஸம்பத்திம் ஓலோகேத்வா ‘‘நஸ்ஸதி வத போ⁴ மே அயம் ஸம்பத்தீ’’தி ப⁴யாபி⁴பூ⁴தோ அஹோஸி.

ததோ ‘‘அத்தி² நு கோ² கோசி ஸமணோ வா ப்³ராஹ்மணோ வா லோகபிதாமஹோ மஹாப்³ரஹ்மா வா, யோ மே ஹத³யனிஸ்ஸிதம் ஸோகஸல்லம் ஸமுத்³த⁴ரித்வா இமம் ஸம்பத்திம் தா²வரம் கரேய்யா’’தி ஓலோகேந்தோ கஞ்சி அதி³ஸ்வா புன அத்³த³ஸ ‘‘மாதி³ஸானம் ஸதஸஹஸ்ஸானம்பி உப்பன்னம் ஸோகஸல்லம் ஸம்மாஸம்பு³த்³தோ⁴ உத்³த⁴ரிதும் படிப³லோ’’தி. அதே²வம் பரிவிதக்கேந்தஸ்ஸ தேன கோ² பன ஸமயேன ஸக்கஸ்ஸ தே³வானமிந்த³ஸ்ஸ உஸ்ஸுக்கம் உத³பாதி³ ப⁴க³வந்தம் த³ஸ்ஸனாய.

கஹம் நு கோ² ப⁴க³வா ஏதரஹி விஹரதீதி கதரஸ்மிம் ஜனபதே³ கதரம் நக³ரம் உபனிஸ்ஸாய கஸ்ஸ பச்சயே பரிபு⁴ஞ்ஜந்தோ கஸ்ஸ அமதம் த⁴ம்மம் தே³ஸயமானோ விஹரதீதி. அத்³த³ஸா கோ²தி அத்³த³க்கி² படிவிஜ்ஜி². மாரிஸாதி பியவசனமேதம், தே³வதானம் பாடியேக்கோ வோஹாரோ. நித்³து³க்கா²திபி வுத்தம் ஹோதி. கஸ்மா பனேஸ தே³வே ஆமந்தேஸி? ஸஹாயத்தா²ய. புப்³பே³ கிரேஸ ப⁴க³வதி ஸளலக⁴ரே விஹரந்தே ஏககோவ த³ஸ்ஸனாய அக³மாஸி. ஸத்தா² ‘‘அபரிபக்கம் தாவஸ்ஸ ஞாணம், கதிபாஹம் பன அதிக்கமித்வா மயி இந்த³ஸாலகு³ஹாயம் விஹரந்தே பஞ்ச புப்³ப³னிமித்தானி தி³ஸ்வா மரணப⁴யபீ⁴தோ த்³வீஸு தே³வலோகேஸு தே³வதாஹி ஸத்³தி⁴ம் உபஸங்கமித்வா சுத்³த³ஸ பஞ்ஹே புச்சி²த்வா உபேக்கா²பஞ்ஹவிஸ்ஸஜ்ஜனாவஸானே அஸீதியா தே³வதாஸஹஸ்ஸேஹி ஸத்³தி⁴ம் ஸோதாபத்திப²லே பதிட்ட²ஹிஸ்ஸதீ’’தி சிந்தேத்வா ஓகாஸம் நாகாஸி. ஸோ ‘‘மம புப்³பே³பி ஏககஸ்ஸ க³தத்தா ஸத்தா²ரா ஓகாஸோ ந கதோ, அத்³தா⁴ மே நத்தி² மக்³க³ப²லஸ்ஸ உபனிஸ்ஸயோ, ஏகஸ்ஸ பன உபனிஸ்ஸயே ஸதி சக்கவாளபரியந்தாயபி பரிஸாய ப⁴க³வா த⁴ம்மம் தே³ஸேதியேவ. அவஸ்ஸம் கோ² பன த்³வீஸு தே³வலோகேஸு கஸ்ஸசி தே³வஸ்ஸ உபனிஸ்ஸயோ ப⁴விஸ்ஸதி, தம் ஸந்தா⁴ய ஸத்தா² த⁴ம்மம் தே³ஸேஸ்ஸதி. தம் ஸுத்வா அஹம்பி அத்தனோ தோ³மனஸ்ஸம் வூபஸமேஸ்ஸாமீ’’தி சிந்தேத்வா ஸஹாயத்தா²ய ஆமந்தேஸி.

ஏவம் ப⁴த்³த³ம் தவாதி கோ² தே³வா தாவதிம்ஸாதி ஏவம் ஹோது மஹாராஜ, க³ச்சா²ம ப⁴க³வந்தம் த³ஸ்ஸனாய, து³ல்லபோ⁴ பு³த்³து⁴ப்பாதோ³, ப⁴த்³த³ம் தவ, யோ த்வம் ‘‘பப்³ப³தகீளம் நதீ³கீளம் க³ச்சா²மா’’தி அவத்வா அம்ஹே ஏவரூபேஸு டா²னேஸு நியோஜேஸீதி. பச்சஸ்ஸோஸுந்தி தஸ்ஸ வசனம் ஸிரஸா ஸம்படிச்சி²ம்ஸு.

345. பஞ்சஸிக²ம் க³ந்த⁴ப்³ப³தே³வபுத்தம் ஆமந்தேஸீதி தே³வே தாவ ஆமந்தேது, இமம் கஸ்மா விஸும் ஆமந்தேஸி? ஓகாஸகரணத்த²ம். ஏவம் கிரஸ்ஸ அஹோஸி ‘‘த்³வீஸு தே³வலோகேஸு தே³வதா க³ஹேத்வா து⁴ரேன பஹரந்தஸ்ஸ விய ஸத்தா²ரம் உபஸங்கமிதும் ந யுத்தம், அயம் பன பஞ்சஸிகோ² த³ஸப³லஸ்ஸ உபட்டா²கோ வல்லபோ⁴ இச்சி²திச்சி²தக்க²ணே க³ந்த்வா பஞ்ஹம் புச்சி²த்வா த⁴ம்மம் ஸுணாதி, இமம் புரதோ பேஸேத்வா ஓகாஸம் காரேத்வா இமினா கதோகாஸே உபஸங்கமித்வா பஞ்ஹம் புச்சி²ஸ்ஸாமீ’’தி ஓகாஸகரணத்த²ம் ஆமந்தேஸி.

ஏவம் ப⁴த்³த³ம் தவாதி ஸோ ‘‘ஏவம் மஹாராஜ, ஹோது, ப⁴த்³த³ம் தவ, யோ த்வம் மம் ‘ஏஹி, மாரிஸ, உய்யானகீளாதீ³னி வா நடஸமஜ்ஜாதீ³னி வா த³ஸ்ஸனாய க³ச்சா²மா’தி அவத்வா ‘பு³த்³த⁴ம் பஸ்ஸிஸ்ஸாம, த⁴ம்மம் ஸோஸ்ஸாமா’தி வத³ஸீ’’தி த³ள்ஹதரம் உபத்த²ம்பே⁴ந்தோ தே³வானமிந்த³ஸ்ஸ வசனம் படிஸ்ஸுத்வா அனுசரியம் ஸஹசரணம் ஏகதோ க³மனம் உபாக³மி.

தத்த² பே³லுவபண்டு³ந்தி பே³லுவபக்கம் விய பண்டு³வண்ணம். தஸ்ஸ கிர ஸோவண்ணமயம் போக்க²ரம், இந்த³னீலமயோ த³ண்டோ³, ரஜதமயா தந்தியோ, பவாளமயா வேட²கா, வீணாபத்தகம் கா³வுதம், தந்திப³ந்த⁴னட்டா²னம் கா³வுதம், உபரி த³ண்ட³கோ கா³வுதந்தி திகா³வுதப்பமாணா வீணா. இதி ஸோ தம் வீணம் ஆதா³ய ஸமபஞ்ஞாஸமுச்ச²னா முச்சே²த்வா அக்³க³னகே²ஹி பஹரித்வா மது⁴ரம் கீ³தஸ்ஸரம் நிச்சா²ரேத்வா ஸேஸதே³வே ஸக்கஸ்ஸ க³மனகாலம் ஜானாபேந்தோ ஏகமந்தம் அட்டா²ஸி. ஏவம் தஸ்ஸ கீ³தவாதி³தஸஞ்ஞாய ஸன்னிபதிதே தே³வக³ணே அத² கோ² ஸக்கோ தே³வானமிந்தோ³…பே… வேதி³யகே பப்³ப³தே பச்சுட்டா²ஸி.

346. அதிரிவ ஓபா⁴ஸஜாதோதி அஞ்ஞேஸு தி³வஸேஸு ஏகஸ்ஸேவ தே³வஸ்ஸ வா மாரஸ்ஸ வா ப்³ரஹ்முனோ வா ஓபா⁴ஸேன ஓபா⁴ஸஜாதோ ஹோதி, தம்தி³வஸம் பன த்³வீஸு தே³வலோகேஸு தே³வதானம் ஓபா⁴ஸேன அதிரிவ ஓபா⁴ஸஜாதோ ஏகபஜ்ஜோதோ ஸஹஸ்ஸசந்த³ஸூரியஉக்³க³தகாலஸதி³ஸோ அஹோஸி. பரிதோ கா³மேஸு மனுஸ்ஸாதி ஸமந்தா கா³மேஸு மனுஸ்ஸா. பகதிஸாயமாஸகாலேயேவ கிர கா³மமஜ்ஜே² தா³ரகேஸு கீளந்தேஸு தத்த² ஸக்கோ அக³மாஸி, தஸ்மா மனுஸ்ஸா பஸ்ஸித்வா ஏவமாஹம்ஸு. நனு ச மஜ்ஜி²மயாமே தே³வதா ப⁴க³வந்தம் உபஸங்கமந்தி, அயம் கஸ்மா பட²மயாமஸ்ஸாபி புரிமபா⁴கே³யேவ ஆக³தோதி? மரணப⁴யேனேவ தஜ்ஜிதத்தா. கிம்ஸு நாமாதி கிம்ஸு நாம போ⁴ ஏதம், கோ நு கோ² அஜ்ஜ மஹேஸக்கோ² தே³வோ வா ப்³ரஹ்மா வா ப⁴க³வந்தம் பஞ்ஹம் புச்சி²தும் த⁴ம்மம் ஸோதும் உபஸங்கமந்தோ, கத²ம்ஸு நாம போ⁴ ப⁴க³வா பஞ்ஹம் விஸ்ஸஜ்ஜேஸ்ஸதி த⁴ம்மம் தே³ஸேஸ்ஸதி, லாபா⁴ அம்ஹாகம், யேஸம் நோ ஏவம் தே³வதானம் கங்கா²வினோத³கோ ஸத்தா² அவிதூ³ரே விஹாரே வஸதி, யே லபா⁴ம தா²லகபி⁴க்க²ம்பி கடச்சு²பி⁴க்க²ம்பி தா³துந்தி ஸம்விக்³கா³ லோமஹட்ட²ஜாதா உத்³த⁴க்³க³லோமா ஹுத்வா த³ஸனக²ஸமோதா⁴னஸமுஜ்ஜலம் அஞ்ஜலிம் ஸிரஸ்மிம் பதிட்ட²பேத்வா நமஸ்ஸமானா அட்ட²ம்ஸு.

347. து³ருபஸங்கமாதி து³பயிருபாஸியா. அஹம் ஸராகோ³ ஸதோ³ஸோ ஸமோஹோ, ஸத்தா² வீதராகோ³ வீததோ³ஸோ வீதமோஹோ, தஸ்மா து³பயிருபாஸியா ததா²க³தா மாதி³ஸேன. ஜா²யீதி லக்க²ணூபனிஜ்ஜா²னேன ச ஆரம்மணூபனிஜ்ஜா²னேன ச ஜா²யீ. தஸ்மிஞ்ஞேவ ஜா²னே ரதாதி ஜா²னரதா. தத³ந்தரம் படிஸல்லீனாதி தத³ந்தரம் படிஸல்லீனா ஸம்பதி படிஸல்லீனா வா. தஸ்மா ந கேவலம் ஜா²யீ ஜா²னரதாதி து³ருபஸங்கமா, இதா³னிமேவ படிஸல்லீனாதிபி து³ருபஸங்கமா. பஸாதே³ய்யாஸீதி ஆராதே⁴ய்யாஸி, ஓகாஸம் மே காரேத்வா த³தே³ய்யாஸீதி வத³தி. பே³லுவபண்டு³வீணம் ஆதா³யாதி நனு புப்³பே³வ ஆதி³ன்னாதி? ஆம, ஆதி³ன்னா. மக்³க³க³மனவஸேன பன அம்ஸகூடே லக்³கி³தா, இதா³னி நம் வாமஹத்தே² ட²பேத்வா வாத³னஸஜ்ஜம் கத்வா ஆதி³யி. தேன வுத்தம் ‘‘ஆதா³யா’’தி.

பஞ்சஸிக²கீ³தகா³தா²வண்ணனா

348. அஸ்ஸாவேஸீதி ஸாவேஸி. பு³த்³தூ⁴பஸஞ்ஹிதாதி பு³த்³த⁴ம் ஆரப்³ப⁴ பு³த்³த⁴ம் நிஸ்ஸயம் கத்வா பவத்தாதி அத்தோ². ஸேஸபதே³ஸுபி ஏஸேவ நயோ.

வந்தே³ தே பிதரம் ப⁴த்³தே³, திம்ப³ரும் ஸூரியவச்ச²ஸேதி ஏத்த² ஸூரியவச்ச²ஸாதி ஸூரியஸமானஸரீரா. தஸ்ஸா கிர தே³வதீ⁴தாய பாத³ந்ததோ ரஸ்மி உட்ட²ஹித்வா கேஸந்தம் ஆரோஹதி, தஸ்மா பா³லஸூரியமண்ட³லஸதி³ஸா கா²யதி, இதி நம் ‘‘ஸூரியவச்ச²ஸா’’தி ஸஞ்ஜானந்தி. தம் ஸந்தா⁴யாஹ – ‘‘ப⁴த்³தே³, ஸூரியவச்ச²ஸே, தவ பிதரம் திம்ப³ரும் க³ந்த⁴ப்³ப³தே³வராஜானம் வந்தா³மீ’’தி. யேன ஜாதாஸி கல்யாணீதி யேன காரணபூ⁴தேன யம் திம்ப³ரும் தே³வராஜானம் நிஸ்ஸாய த்வம் ஜாதா, கல்யாணீ ஸப்³ப³ங்க³ஸோப⁴னா. ஆனந்த³ஜனனீ மமாதி மய்ஹம் பீதிஸோமனஸ்ஸவட்³ட⁴னீ.

வாதோவ ஸேத³தம் கந்தோதி யதா² ஸஞ்ஜாதஸேதா³னம் ஸேத³ஹரணத்த²ம் வாதோ இட்டோ² ஹோதி கந்தோ மனாபோ, ஏவந்தி அத்தோ². பானீயம்வ பிபாஸதோதி பாதுமிச்ச²ந்தஸ்ஸ பிபாஸதோ பிபாஸாபி⁴பூ⁴தஸ்ஸ. அங்கீ³ரஸீதி அங்கே³ ரஸ்மியோ அஸ்ஸாதி அங்கீ³ரஸீ, தமேவ ஆரப்³ப⁴ ஆலபந்தோ வத³தி. த⁴ம்மோ அரஹதாமிவாதி அரஹந்தானம் நவலோகுத்தரத⁴ம்மோ விய.

ஜிக⁴ச்ச²தோதி பு⁴ஞ்ஜிதுகாமஸ்ஸ கு²தா³பி⁴பூ⁴தஸ்ஸ. ஜலந்தமிவ வாரினாதி யதா² கோசி ஜலந்தம் ஜாதவேத³ம் உத³ககும்பே⁴ன நிப்³பா³பேய்ய, ஏவம் தவ காரணா உப்பன்னம் மம காமராக³பரிளாஹம் நிப்³பா³பேஹீதி வத³தி.

யுத்தம் கிஞ்ஜக்க²ரேணுனாதி பது³மகேஸரரேணுனா யுத்தம். நாகோ³ க⁴ம்மாபி⁴தத்தோ வாதி க⁴ம்மாபி⁴தத்தஹத்தீ² விய. ஓகா³ஹே தே த²னூத³ரந்தி யதா² ஸோ நாகோ³ போக்க²ரணிம் ஓகா³ஹித்வா பிவித்வா அக்³க³ஸோண்ட³மத்தம் பஞ்ஞாயமானம் கத்வா நிமுக்³கோ³ ஸுக²ம் ஸாதம் விந்த³தி, ஏவம் கதா³ நு கோ² தே த²னூத³ரம் த²னவேமஜ்ஜ²ம் உத³ரஞ்ச ஓதரித்வா அஹம் ஸுக²ம் ஸாதம் படிலபி⁴ஸ்ஸாமீதி வத³தி.

‘‘அச்சங்குஸோவ நாகோ³வ, ஜிதம் மே துத்ததோமரம்;

காரணம் நப்பஜானாமி, ஸம்மத்தோ லக்க²ணூருயா’’தி. –

ஏத்த² துத்தம் வுச்சதி கண்ணமூலே விஜ்ஜ²னஅயத³ண்ட³கோ. தோமரந்தி பாதா³தீ³ஸு விஜ்ஜ²னத³ண்ட³தோமரம். அங்குஸோதி மத்த²கே விஜ்ஜ²னகுடிலகண்டகோ. யோ ச நாகோ³ பபி⁴ன்னமத்தோ அச்சங்குஸோ ஹோதி, அங்குஸம் அதீதோ; அங்குஸேன விஜ்ஜி²யமானோபி வஸம் ந க³ச்ச²தி, ஸோ ‘‘ஜிதம் மயா துத்ததோமரம், யோ அஹம் அங்குஸஸ்ஸபி வஸம் ந க³ச்சா²மீ’’தி மத³த³ப்பேன கிஞ்சி காரணம் ந பு³ஜ்ஜ²தி. யதா² ஸோ அச்சங்குஸோ நாகோ³ ‘‘ஜிதம் மே துத்ததோமர’’ந்தி கிஞ்சி காரணம் நப்பஜானாதி, ஏவம் அஹம்பி லக்க²ணஸம்பன்னஊருதாய லக்க²ணூருயா ஸம்மத்தோ மத்தோ பமத்தோ உம்மத்தோ விய கிஞ்சி காரணம் நப்பஜானாமீதி வத³தி. அத² வா அச்சங்குஸோவ நாகோ³ அஹம்பி ஸம்மத்தோ லக்க²ணூருயா கிஞ்சி ததோ விராக³காரணம் நப்பஜானாமி. கஸ்மா? யஸ்மா தேன நாகே³ன விய ஜிதம் மே துத்ததோமரம், ந கஸ்ஸசி வத³தோ வசனம் ஆதி³யாமி.

தயி கே³தி⁴தசித்தோஸ்மீதி ப⁴த்³தே³ லக்க²ணூரு தயி ப³த்³த⁴சித்தோஸ்மி. கே³தி⁴தசித்தோதி வா கே³த⁴ம் அஜ்ஜு²பேதசித்தோ. சித்தம் விபரிணாமிதந்தி பகதிம் ஜஹித்வா டி²தம். படிக³ந்தும் ந ஸக்கோமீதி நிவத்திதும் ந ஸக்கோமி. வங்கக⁴ஸ்தோவ அம்பு³ஜோதி ப³ளிஸம் கி³லித்வா டி²தமச்சோ² விய. ‘‘க⁴ஸோ’’திபி பாடோ², அயமேவத்தோ².

வாமூரூதி வாமாகாரேன ஸண்டி²தஊரு, கத³லிக்க²ந்த⁴ஸதி³ஸஊரூதி வா அத்தோ². ஸஜாதி ஆலிங்க³. மந்த³லோசனேதி இத்தி²யோ ந திகி²ணம் நிஜ்ஜா²யந்தி மந்த³ம் ஆலோசேந்தி ஓலோகேந்தி, தஸ்மா ‘‘மந்த³லோசனா’’தி வுச்சந்தி. பலிஸ்ஸஜாதி ஸப்³ப³தோபா⁴கே³ன ஆலிங்க³. ஏதம் மே அபி⁴பத்தி²தந்தி ஏதம் மயா அபி⁴ண்ஹம் பத்தி²தம்.

அப்பகோ வத மே ஸந்தோதி பகதியாவ மந்தோ³ ஸமானோ. வேல்லிதகேஸியாதி கேஸா முஞ்சித்வா பிட்டி²யம் விஸ்ஸட்ட²காலே ஸப்போ விய வேல்லந்தா க³ச்ச²ந்தா அஸ்ஸாதி வேல்லிதகேஸீ, தஸ்ஸா வேல்லிதகேஸியா. அனேகபா⁴வோ ஸமுப்பாதீ³தி அனேகவிதோ⁴ ஜாதோ. அனேகபா⁴கோ³தி வா பாடோ². அரஹந்தேவ த³க்கி²ணாதி அரஹந்தம்ஹி தி³ன்னதா³னம் விய நானப்பகாரதோ பபி⁴ன்னோ.

யம் மே அத்தி² கதம் புஞ்ஞந்தி யம் மயா கதம் புஞ்ஞமத்தி². அரஹந்தேஸு தாதி³ஸூதி தாதி³லக்க²ணப்பத்தேஸு அரஹந்தேஸு. தயா ஸத்³தி⁴ம் விபச்சதந்தி ஸப்³ப³ம் தயா ஸத்³தி⁴மேவ விபாகம் தே³து.

ஏகோதீ³தி ஏகீபா⁴வம் க³தோ. நிபகோ ஸதோதி நேபக்கம் வுச்சதி பஞ்ஞா, தாய ஸமன்னாக³தோதி நிபகோ. ஸதியா ஸமன்னாக³தத்தா ஸதோ. அமதம் முனி ஜிகீ³ஸானோதி யதா² ஸோ பு³த்³த⁴முனி அமதம் நிப்³பா³னம் ஜிகீ³ஸதி பரியேஸதி, ஏவம் தம் அஹம் ஸூரியவச்ச²ஸே ஜிகீ³ஸாமி பரியேஸாமி. யதா² வா ஸோ அமதம் ஜிகீ³ஸானோ ஏஸந்தோ க³வேஸந்தோ விசரதி, ஏவாஹம் தம் ஏஸந்தோ க³வேஸந்தோ விசராமீதிபி அத்தோ².

யதா²பி முனி நந்தே³ய்ய, பத்வா ஸம்போ³தி⁴முத்தமந்தி யதா² பு³த்³த⁴முனி போ³தி⁴பல்லங்கே நிஸின்னோ ஸப்³ப³ஞ்ஞுதஞ்ஞாணம் பத்வா நந்தே³ய்ய தோஸேய்ய. ஏவம் நந்தே³ய்யந்தி ஏவமேவ அஹம்பி தயா மிஸ்ஸீபா⁴வம் க³தோ நந்தே³ய்யம், பீதிஸோமனஸ்ஸஜாதோ ப⁴வேய்யந்தி வத³தி.

தாஹம் ப⁴த்³தே³ வரேய்யாஹேதி அஹேதி ஆமந்தனம், அஹே ப⁴த்³தே³ ஸூரியவச்ச²ஸே, ஸக்கேன தே³வானமிந்தே³ன ‘‘கிம் த்³வீஸு தே³வலோகேஸு தே³வரஜ்ஜம் க³ண்ஹஸி, ஸுரியவச்ச²ஸ’’ந்தி, ஏவம் வரே தி³ன்னே தே³வரஜ்ஜம் பஹாய ‘‘ஸூரியவச்ச²ஸம் க³ண்ஹாமீ’’தி ஏவம் தம் அஹம் வரேய்யம் இச்சே²ய்யம் க³ண்ஹேய்யந்தி அத்தோ².

ஸாலம்வ ந சிரம் பு²ல்லந்தி தவ பிது நக³ரத்³வாரே நசிரம் புப்பி²தோ ஸாலோ அத்தி². ஸோ அதிவிய மனோஹரோ. தம் நசிரம் பு²ல்லஸாலம் விய. பிதரம் தே ஸுமேத⁴ஸேதி அதிஸஸ்ஸிரீகம் தவ பிதரம் வந்த³மானோ நமஸ்ஸாமி நமோ கரோமி. யஸ்ஸாஸேதாதி³ஸீ பஜாதி யஸ்ஸ ஆஸி ஏதாதி³ஸீ தீ⁴தா.

349. ஸம்ஸந்த³தீதி கஸ்மா கீ³தஸத்³த³ஸ்ஸ சேவ வீணாஸத்³த³ஸ்ஸ ச வண்ணம் கதே²ஸி? கிம் தத்த² ப⁴க³வதோ ஸாராகோ³ அத்தீ²தி? நத்தி². ச²ளங்கு³பேக்கா²ய உபேக்க²கோ ப⁴க³வா ஏதாதி³ஸேஸு டா²னேஸு, கேவலம் இட்டா²னிட்ட²ம் ஜானாதி, ந தத்த² ரஜ்ஜதி. வுத்தம்பி சேதம் ‘‘ஸம்விஜ்ஜதி கோ², ஆவுஸோ, ப⁴க³வதோ சக்கு², பஸ்ஸதி ப⁴க³வா சக்கு²னா ரூபம், ச²ந்த³ராகோ³ ப⁴க³வதோ நத்தி², ஸுவிமுத்தசித்தோ ப⁴க³வா. ஸம்விஜ்ஜதி கோ², ஆவுஸோ, ப⁴க³வதோ ஸோத’’ந்திஆதி³ (ஸம். நி. 4.232). ஸசே பன வண்ணம் ந கதே²ய்ய, பஞ்சஸிகோ² ‘‘ஓகாஸோ மே கதோ’’தி ந ஜானேய்ய. அத² ஸக்கோ ‘‘ப⁴க³வதா பஞ்சஸிக²ஸ்ஸ ஓகாஸோ ந கதோ’’தி தே³வதா க³ஹேத்வா ததோவ படினிவத்தேய்ய, ததோ மஹாஜானியோ ப⁴வேய்ய. வண்ணே பன கதி²தே ‘‘கதோ ப⁴க³வதா பஞ்சஸிக²ஸ்ஸ ஓகாஸோ’’தி தே³வதாஹி ஸத்³தி⁴ம் உபஸங்கமித்வா பஞ்ஹம் புச்சி²த்வா விஸ்ஸஜ்ஜனாவஸானே அஸீதியா தே³வதாஸஹஸ்ஸேஹி ஸத்³தி⁴ம் ஸோதாபத்திப²லே பதிட்ட²ஹிஸ்ஸதீதி ஞத்வா வண்ணம் கதே²ஸி.

தத்த² கதா³ ஸம்யூள்ஹாதி கதா³ க³ந்தி²தா பிண்டி³தா. தேன கோ² பனாஹம், ப⁴ந்தே, ஸமயேனாதி தேன ஸமயேன தஸ்மிம் தும்ஹாகம் ஸம்போ³தி⁴ப்பத்திதோ பட்டா²ய அட்ட²மே ஸத்தாஹே. ப⁴த்³தா³ நாம ஸூரியவச்ச²ஸாதி நாமதோ ப⁴த்³தா³ ஸரீரஸம்பத்தியா ஸூரியவச்ச²ஸா. ப⁴கி³னீதி வோஹாரவசனமேதம், தே³வதீ⁴தாதி அத்தோ². பரகாமினீதி பரம் காமேதி அபி⁴கங்க²தி.

உபனச்சந்தியாதி நச்சமானாய. ஸா கிர ஏகஸ்மிம் ஸமயே சாதுமஹாராஜிகதே³வேஹி ஸத்³தி⁴ம் ஸக்கஸ்ஸ தே³வராஜஸ்ஸ நச்சம் த³ஸ்ஸனத்தா²ய க³தா, தஸ்மிஞ்ச க²ணே ஸக்கோ ததா²க³தஸ்ஸ அட்ட² யதா²பு⁴ச்சே கு³ணே பயிருதா³ஹாஸி. ஏவம் தஸ்மிம் தி³வஸே க³ந்த்வா நச்சந்தீ அஸ்ஸோஸி.

ஸக்கூபஸங்கமவண்ணனா

350. படிஸம்மோத³தீதி ‘‘ஸம்ஸந்த³தி கோ² தே’’திஆதீ³னி வத³ந்தோ ப⁴க³வா ஸம்மோத³தி, பஞ்சஸிகோ² படிஸம்மோத³தி. கா³தா² ச பா⁴ஸந்தோ பஞ்சஸிகோ² ஸம்மோத³தி, ப⁴க³வா படிஸம்மோத³தி. ஆமந்தேஸீதி ஜானாபேஸி. தஸ்ஸ கிரேவம் அஹோஸி ‘‘அயம் பஞ்சஸிகோ² மயா மம கம்மேன பேஸிதோ அத்தனோ கம்மம் கரோதி. ஏவரூபஸ்ஸ ஸத்து² ஸந்திகே ட²த்வா காமகு³ணூபஸஞ்ஹிதம் அனனுச்ச²விகம் கதே²ஸி, நடா நாம நில்லஜ்ஜா ஹோந்தி, கதே²ந்தோ விப்பகாரம்பி த³ஸ்ஸேய்ய, ஹந்த³ நம் மம கம்மம் ஜானாபேமீ’’தி சிந்தேத்வா ஆமந்தேஸி.

351. ஏவஞ்ச பன ததா²க³தாதி த⁴ம்மஸங்கா³ஹகத்தே²ரேஹி ட²பிதவசனம். அபி⁴வத³ந்தீதி அபி⁴வாத³னஸம்படிச்ச²னேன வட்³டி⁴தவசனேன வத³ந்தி. அபி⁴வதி³தோதி வட்³டி⁴தவசனேன வுத்தோ.

உருந்தா³ ஸமபாதீ³தி மஹந்தா விவடா அஹோஸி, அந்த⁴காரோ கு³ஹாயம் அந்தரதா⁴யி. ஆலோகோ உத³பாதீ³தி யோ பகதியா கு³ஹாயம் அந்த⁴காரோ, ஸோ அந்தரஹிதோ, ஆலோகோ ஜாதோ. ஸப்³ப³மேதம் த⁴ம்மஸங்கா³ஹகானம் வசனம்.

352. சிரபடிகாஹம், ப⁴ந்தேதி சிரதோ அஹம், சிரதோ பட்டா²யாஹம் த³ஸ்ஸனகாமோதி அத்தோ². கேஹிசி கேஹிசி கிச்சகரணீயேஹீதி தே³வானம் தீ⁴தா ச புத்தா ச அங்கே நிப்³ப³த்தந்தி, பாத³பரிசாரிகா இத்தி²யோ ஸயனே நிப்³ப³த்தந்தி, தாஸம் மண்ட³னபஸாத⁴னகாரிகா தே³வதா ஸயனம் பரிவாரேத்வா நிப்³ப³த்தந்தி, வேய்யாவச்சகரா அந்தோவிமானே நிப்³ப³த்தந்தி, ஏதேஸம் அத்தா²ய அட்³ட³கரணம் நாம நத்தி². யே பன ஸீமந்தரே நிப்³ப³த்தந்தி, தே ‘‘தவ ஸந்தகா, மம ஸந்தகா’’தி நிச்சே²தும் அஸக்கோந்தா அட்³ட³ம் கரோந்தி, ஸக்கம் தே³வராஜானம் புச்ச²ந்தி. ஸோ ‘‘யஸ்ஸ விமானம் ஆஸன்னதரம், தஸ்ஸ ஸந்தகா’’தி வத³தி. ஸசே த்³வேபி ஸமட்டா²னே ஹோந்தி, ‘‘யஸ்ஸ விமானம் ஓலோகேந்தீ டி²தா, தஸ்ஸ ஸந்தகா’’தி வத³தி. ஸசே ஏகம்பி ந ஓலோகேதி, தம் உபி⁴ன்னம் கலஹுபச்சே²த³னத்த²ம் அத்தனோ ஸந்தகம் கரோதி. கீளாதீ³னிபி கிச்சானி கரணீயானேவ. ஏவரூபானி தானி கரணீயானி ஸந்தா⁴ய ‘‘கேஹிசி கேஹிசி கிச்சகரணீயேஹீ’’தி ஆஹ.

ஸலளாகா³ரகேதி ஸலளமயக³ந்த⁴குடியம். அஞ்ஞதரேன ஸமாதி⁴னாதி ததா³ கிர ப⁴க³வா ஸக்கஸ்ஸேவ அபரிபாகக³தம் ஞாணம் விதி³த்வா ஓகாஸம் அகாரேதுகாமோ ப²லஸமாபத்திவிஹாரேன நிஸீதி³. தம் ஏஸ அஜானந்தோ ‘‘அஞ்ஞதரேன ஸமாதி⁴னா’’தி ஆஹ. பூ⁴ஜதி ச நாமாதி பூ⁴ஜதீதி தஸ்ஸா நாமம். பரிசாரிகாதி பாத³பரிசாரிகா தே³வதீ⁴தா. ஸா கிர த்³வே ப²லானி பத்தா, தேனஸ்ஸா தே³வலோகே அபி⁴ரதியேவ நத்தி². நிச்சம் ப⁴க³வதோ உபட்டா²னம் ஆக³ந்த்வா அஞ்ஜலிம் ஸிரஸி ட²பேத்வா ப⁴க³வந்தம் நமஸ்ஸமானா திட்ட²தி. நேமிஸத்³தே³ன தம்ஹா ஸமாதி⁴ம்ஹா வுட்டி²தோதி ‘‘ஸமாபன்னோ ஸத்³த³ம் ஸுணாதீ’’தி நோ வத ரே வத்தப்³பே³, நனு ப⁴க³வா ஸக்கஸ்ஸ தே³வானமிந்த³ஸ்ஸ ‘‘அபிசாஹம் ஆயஸ்மதோ சக்கனேமிஸத்³தே³ன தம்ஹா ஸமாதி⁴ம்ஹா வுட்டி²தோ’’தி ப⁴ணதீதி. திட்ட²து நேமிஸத்³தோ³, ஸமாபன்னோ நாம அந்தோஸமாபத்தியம் கண்ணமூலே த⁴மமானஸ்ஸ ஸங்க²யுக³ளஸ்ஸாபி அஸனிஸன்னிபாதஸ்ஸாபி ஸத்³த³ம் ந ஸுணாதி. ப⁴க³வா பன ‘‘ஏத்தகம் காலம் ஸக்கஸ்ஸ ஓகாஸம் ந கரிஸ்ஸாமீ’’தி பரிச்சி²ந்தி³த்வா காலவஸேன ப²லஸமாபத்திம் ஸமாபன்னோ. ஸக்கோ ‘‘ந தா³னி மே ஸத்தா² ஓகாஸம் கரோதீ’’தி க³ந்த⁴குடிம் பத³க்கி²ணம் கத்வா ரத²ம் நிவத்தேத்வா தே³வலோகாபி⁴முக²ம் பேஸேஸி. க³ந்த⁴குடிபரிவேணம் ரத²ஸத்³தே³ன ஸமோஹிதம் பஞ்சங்கி³கதூரியம் விய அஹோஸி. ப⁴க³வதோ யதா²பரிச்சி²ன்னகாலவஸேன ஸமாபத்திதோ வுட்டி²தஸ்ஸ ரத²ஸத்³தே³னேவ பட²மாவஜ்ஜனம் உப்பஜ்ஜி, தஸ்மா ஏவமாஹ.

கோ³பகவத்து²வண்ணனா

353. ஸீலேஸு பரிபூரகாரினீதி பஞ்சஸு ஸீலேஸு பரிபூரகாரினீ. இத்தி²த்தம் விராஜேத்வாதி இத்தி²த்தம் நாம அலம், ந ஹி இத்தி²த்தே ட²த்வா சக்கவத்திஸிரிம், ந ஸக்கமாரப்³ரஹ்மஸிரியோ பச்சனுப⁴விதும், ந பச்சேகபோ³தி⁴ம், ந ஸம்மாஸம்போ³தி⁴ம் க³ந்தும் ஸக்காதி ஏவம் இத்தி²த்தம் விராஜேதி நாம. மஹந்தமித³ம் புரிஸத்தம் நாம ஸேட்ட²ம் உத்தமம், ஏத்த² ட²த்வா ஸக்கா ஏதா ஸம்பத்தியோ பாபுணிதுந்தி ஏவம் பன புரிஸத்தம் பா⁴வேதி நாம. ஸாபி ஏவமகாஸி. தேன வுத்தம் – ‘‘இத்தி²த்தம் விராஜேத்வா புரிஸத்தம் பா⁴வேத்வா’’தி. ஹீனம் க³ந்த⁴ப்³ப³காயந்தி ஹீனம் லாமகம் க³ந்த⁴ப்³ப³னிகாயம். கஸ்மா பன தே பரிஸுத்³த⁴ஸீலா தத்த² உப்பன்னாதி? புப்³ப³னிகந்தியா. புப்³பே³பி கிர நேஸம் ஏததே³வ வஸிதட்டா²னம், தஸ்மா நிகந்திவஸேன தத்த² உப்பன்னா. உபட்டா²னந்தி உபட்டா²னஸாலம். பாரிசரியந்தி பரிசரணபா⁴வம். கீ³தவாதி³தேஹி அம்ஹே பரிசரிஸ்ஸாமாதி ஆக³ச்ச²ந்தி.

படிசோதே³ஸீதி ஸாரேஸி. ஸோ கிர தே தி³ஸ்வா ‘‘இமே தே³வபுத்தா அதிவிய விரோசேந்தி அதிவண்ணவந்தோ, கிம் நு கோ² கம்மம் கத்வா ஆக³தா’’தி ஆவஜ்ஜந்தோ ‘‘பி⁴க்கூ² அஹேஸு’’ந்தி அத்³த³ஸ. ததோ ‘‘பி⁴க்கூ² ஹோந்து, ஸீலேஸு பரிபூரகாரினோ’’தி உபதா⁴ரேந்தோ ‘‘பரிபூரகாரினோ’’தி அத்³த³ஸ. ‘‘பரிபூரகாரினோ ஹோந்து, அஞ்ஞோ கு³ணோ அத்தி² நத்தீ²’’தி உபதா⁴ரேந்தோ ‘‘ஜா²னலாபி⁴னோ’’தி அத்³த³ஸ. ‘‘ஜா²னலாபி⁴னோ ஹோந்து, குஹிம் வாஸிகா’’தி உபதா⁴ரேந்தோ ‘‘மய்ஹம்வ குலூபகா’’தி அத்³த³ஸ. பரிஸுத்³த⁴ஸீலா நாம ச²ஸு தே³வலோகேஸு யத்தி²ச்ச²ந்தி, தத்த² நிப்³ப³த்தந்தி. இமே பன உபரிதே³வலோகே ச ந நிப்³ப³த்தா. ஜா²னலாபி⁴னோ நாம ப்³ரஹ்மலோகே நிப்³ப³த்தந்தி, இமே ச ப்³ரஹ்மலோகே ந நிப்³ப³த்தா. அஹம் பன ஏதேஸம் ஓவாதே³ ட²த்வா தே³வலோகஸாமிகஸ்ஸ ஸக்கஸ்ஸ தே³வானமிந்த³ஸ்ஸ பல்லங்கே புத்தோ ஹுத்வா நிப்³ப³த்தோ, இமே ஹீனே க³ந்த⁴ப்³ப³காயே நிப்³ப³த்தா. அட்டி²வேத⁴புக்³க³லா நாமேதே வட்டேத்வா வட்டேத்வா கா³ள்ஹம் விஜ்ஜி²தப்³பா³தி சிந்தேத்வா குதோமுகா² நாமாதிஆதீ³ஹி வசனேஹி படிசோதே³ஸி.

தத்த² குதோமுகா²தி ப⁴க³வதி அபி⁴முகே² த⁴ம்மம் தே³ஸேந்தே தும்ஹே குதோமுகா² கிம் அஞ்ஞா விஹிதா இதோ சிதோ ச ஓலோகயமானா உதா³ஹு நித்³தா³யமானா? து³த்³தி³ட்ட²ரூபந்தி து³த்³தி³ட்ட²ஸபா⁴வம் த³ட்டு²ம் அயுத்தம். ஸஹத⁴ம்மிகேதி ஏகஸ்ஸ ஸத்து² ஸாஸனே ஸமாசிண்ணத⁴ம்மே கதபுஞ்ஞே. தேஸம் ப⁴ந்தேதி தேஸம் கோ³பகேன தே³வபுத்தேன ஏவம் வத்வா புன ‘‘அஹோ தும்ஹே நில்லஜ்ஜா அஹிரிகா’’திஆதீ³ஹி வசனேஹி படிசோதி³தானம் த்³வே தே³வா தி³ட்டே²வ த⁴ம்மே ஸதிம் படிலபி⁴ம்ஸு.

காயம் ப்³ரஹ்மபுரோஹிதந்தி தே கிர சிந்தயிம்ஸு – ‘‘நடேஹி நாம நச்சந்தேஹி கா³யந்தேஹி வாதே³ந்தேஹி ஆக³ந்த்வா தா³யோ நாம லபி⁴தப்³போ³ அஸ்ஸ, அயம் பன அம்ஹாகம் தி³ட்ட²காலதோ பட்டா²ய பக்கி²த்தலோணம் உத்³த⁴னம் விய தடதடாயதேவ, கிம் நு கோ² இத³’’ந்தி ஆவஜ்ஜந்தா அத்தனோ ஸமணபா⁴வம் பரிஸுத்³த⁴ஸீலதம் ஜா²னலாபி⁴தம் தஸ்ஸேவ குலூபகபா⁴வஞ்ச தி³ஸ்வா ‘‘பரிஸுத்³த⁴ஸீலா நாம ச²ஸு தே³வலோகேஸு யதா²ருசிதே டா²னே நிப்³ப³த்தந்தி, ஜா²னலாபி⁴னோ ப்³ரஹ்மலோகே. மயம் உபரிதே³வலோகேபி ப்³ரஹ்மலோகேபி நிப்³ப³த்திதும் நாஸக்கி²ம்ஹ. அம்ஹாகம் ஓவாதே³ ட²த்வா அயம் இத்தி²கா உபரி நிப்³ப³த்தா, மயம் பி⁴க்கூ² ஸமானா ப⁴க³வதி ப்³ரஹ்மசரியம் சரித்வா ஹீனே க³ந்த⁴ப்³ப³காயே நிப்³ப³த்தா. தேன நோ அயம் ஏவம் நிக்³க³ண்ஹாதீ’’தி ஞத்வா தஸ்ஸ கத²ம் ஸுணந்தாயேவ தேஸு த்³வே ஜனா பட²மஜ்ஜா²னஸதிம் படிலபி⁴த்வா ஜா²னம் பாத³கம் கத்வா ஸங்கா²ரே ஸம்மஸந்தா அனாகா³மிப²லேயேவ பதிட்ட²ஹிம்ஸு. அத² நேஸம் ஸோ பரித்தோ காமாவசரத்தபா⁴வோ தா⁴ரேதும் நாஸக்கி². தஸ்மா தாவதே³வ சவித்வா ப்³ரஹ்மபுரோஹிதேஸு நிப்³ப³த்தா. ஸோ ச நேஸம் காயோ தத்த² டி²தானம்யேவ நிப்³ப³த்தோ. தேன வுத்தம் – ‘‘தேஸம், ப⁴ந்தே, கோ³பகேன தே³வபுத்தேன படிசோதி³தானம் த்³வே தே³வா தி³ட்டே²வ த⁴ம்மே ஸதிம் படிலபி⁴ம்ஸு காயம் ப்³ரஹ்மபுரோஹித’’ந்தி.

தத்த² தி³ட்டே²வ த⁴ம்மேதி தஸ்மிஞ்ஞேவ அத்தபா⁴வே ஜா²னஸதிம் படிலபி⁴ம்ஸு. தத்தே²வ ட²த்வா சுதா பன காயம் ப்³ரஹ்மபுரோஹிதம் ப்³ரஹ்மபுரோஹிதஸரீரம் படிலபி⁴ம்ஸூதி ஏவமத்தோ² த³ட்ட²ப்³போ³. ஏகோ பன தே³வோதி ஏகோ தே³வபுத்தோ நிகந்திம் சி²ந்தி³தும் அஸக்கோந்தோ காமே அஜ்ஜ²வஸி, தத்தே²வ ஆவாஸிகோ அஹோஸி.

354. ஸங்க⁴ஞ்சுபட்டா²ஸிந்தி ஸங்க⁴ஞ்ச உபட்டா²ஸிம்.

ஸுத⁴ம்மதாயாதி த⁴ம்மஸ்ஸ ஸுந்த³ரபா⁴வேன. திதி³வூபபன்னோதி திதி³வே தித³ஸபுரே உபபன்னோ. க³ந்த⁴ப்³ப³காயூபக³தே வஸீனேதி க³ந்த⁴ப்³ப³காயம் ஆவாஸிகோ ஹுத்வா உபக³தே. யே ச மயம் புப்³பே³ மனுஸ்ஸபூ⁴தாதி யே புப்³பே³ மனுஸ்ஸபூ⁴தா மயம் அன்னேன பானேன உபட்ட²ஹிம்ஹாதி இமினா ஸத்³தி⁴ம் யோஜேத்வா அத்தோ² வேதி³தப்³போ³.

பாதூ³பஸங்க³ய்ஹாதி பாதே³ உபஸங்க³ய்ஹ பாத³தோ⁴வனபாத³மக்க²னானுப்பதா³னேன பூஜேத்வா சேவ வந்தி³த்வா ச. ஸகே நிவேஸனேதி அத்தனோ க⁴ரே. இமஸ்ஸாபி பத³ஸ்ஸ உபட்ட²ஹிம்ஹாதி இமினாவ ஸம்ப³ந்தோ⁴.

பச்சத்தம் வேதி³தப்³போ³தி அத்தனாவ வேதி³தப்³போ³. அரியான ஸுபா⁴ஸிதானீதி தும்ஹேஹி வுச்சமானானி பு³த்³தா⁴னம் ப⁴க³வந்தானம் ஸுபா⁴ஸிதானி.

தும்ஹே பன ஸேட்ட²முபாஸமானாதி உத்தமம் பு³த்³த⁴ம் ப⁴க³வந்தம் உபாஸமானா அனுத்தரே பு³த்³த⁴ஸாஸனே வா. ப்³ரஹ்மசரியந்தி ஸேட்ட²சரியம். ப⁴வதூபபத்தீதி ப⁴வந்தானம் உபபத்தி.

அகா³ரே வஸதோ மய்ஹந்தி க⁴ரமஜ்ஜே² வஸந்தஸ்ஸ மய்ஹம்.

ஸ்வஜ்ஜாதி ஸோ அஜ்ஜ. கோ³தமஸாவகேனாதி இத⁴ கோ³பகோ கோ³தமஸாவகோதி வுத்தோ. ஸமேச்சாதி ஸமாக³ந்த்வா.

ஹந்த³ வியாயாம ப்³யாயாமாதி ஹந்த³ உய்யமாம ப்³யாயமாம. மா நோ மயம் பரபேஸ்ஸா அஹும்ஹாதி நோதி நிபாதமத்தம், மா மயம் பரஸ்ஸ பேஸனகாரகாவ அஹும்ஹாதி அத்தோ². கோ³தமஸாஸனானீதி இத⁴ பகதியா படிவித்³த⁴ம் பட²மஜ்ஜா²னமேவ கோ³தமஸாஸனானீதி வுத்தம், தம் அனுஸ்ஸரம் அனுஸ்ஸரித்வாதி அத்தோ².

சித்தானி விராஜயித்வாதி பஞ்சகாமகு³ணிகசித்தானி விராஜயித்வா. காமேஸு ஆதீ³னவந்தி விக்க²ம்ப⁴னவஸேன பட²மஜ்ஜா²னேன காமேஸு ஆதீ³னவம் அத்³த³ஸம்ஸு, ஸமுச்சே²த³வஸேன ததியமக்³கே³ன. காமஸம்யோஜனப³ந்த⁴னானீதி காமஸஞ்ஞோஜனானி ச காமப³ந்த⁴னானி ச. பாபிமயோகா³னீதி பாபிமதோ மாரஸ்ஸ யோக³பூ⁴தானி, ப³ந்த⁴னபூ⁴தானீதி அத்தோ². து³ரச்சயானீதி து³ரதிக்கமானி. ஸஇந்தா³ தே³வா ஸபஜாபதிகாதி இந்த³ம் ஜேட்ட²கம் கத்வா உபவிட்டா² ஸஇந்தா³ பஜாபதிம் தே³வராஜானம் ஜேட்ட²கம் கத்வா உபவிட்டா² ஸபஜாபதிகா. ஸபா⁴யுபவிட்டா²தி ஸபா⁴யம் உபவிட்டா², நிஸின்னாதி அத்தோ².

வீராதி ஸூரா. விராகா³தி வீதராகா³. விரஜம் கரோந்தாதி விரஜம் அனாகா³மிமக்³க³ம் கரோந்தா உப்பாதே³ந்தா. நாகோ³வ ஸன்னானி கு³ணானீதி காமஸஞ்ஞோஜனப³ந்த⁴னானி சே²த்வா தே³வே தாவதிம்ஸே அதிக்கமிம்ஸு. ஸம்வேக³ஜாதஸ்ஸாதி ஜாதஸம்வேக³ஸ்ஸ ஸக்கஸ்ஸ.

காமாபி⁴பூ⁴தி து³விதா⁴னம்பி காமானம் அபி⁴பூ⁴. ஸதியா விஹீனாதி ஜா²னஸதிவிரஹிதா.

திண்ணம் தேஸந்தி தேஸு தீஸு ஜனேஸு. ஆவஸினேத்த² ஏகோதி தத்த² ஹீனே காயே ஏகோயேவ ஆவாஸிகோ ஜாதோ. ஸம்போ³தி⁴பதா²னுஸாரினோதி அனாகா³மிமக்³கா³னுஸாரினோ. தே³வேபி ஹீளேந்தீதி த்³வே தே³வலோகே ஹீளேந்தா அதோ⁴கரோந்தா உபசாரப்பனாஸமாதீ⁴ஹி ஸமாஹிதத்தா அத்தனோ பாத³பம்ஸும் தே³வதானம் மத்த²கே ஓகிரந்தா ஆகாஸே உப்பதித்வா க³தாதி.

ஏதாதி³ஸீ த⁴ம்மப்பகாஸனேத்தா²தி ஏத்த² ஸாஸனே ஏவரூபா த⁴ம்மப்பகாஸனா, யாய ஸாவகா ஏதேஹி கு³ணேஹி ஸமன்னாக³தா ஹோந்தி. ந தத்த² கிம் கங்க²தி கோசி ஸாவகோதி கிம் தத்த² தேஸு ஸாவகேஸு கோசி ஏகஸாவகோபி பு³த்³தா⁴தீ³ஸு வா சாதுத்³தி³ஸபா⁴வே வா ந கங்க²தி ‘‘ஸப்³ப³தி³ஸாஸு அஸஜ்ஜமானோ அக³ய்ஹமானோ விஹரதீ’’தி. இதா³னி ப⁴க³வதோ வண்ணம் ப⁴ணந்தோ ‘‘நிதிண்ணஓக⁴ம் விசிகிச்ச²சி²ன்னம், பு³த்³த⁴ம் நமஸ்ஸாம ஜினம் ஜனிந்த³’’ந்தி ஆஹ. தத்த² விசிகிச்ச²சி²ன்னந்தி சி²ன்னவிசிகிச்ச²ம். ஜனிந்த³ந்தி ஸப்³ப³லோகுத்தமம்.

யம் தே த⁴ம்மந்தி யம் தவ த⁴ம்மம். அஜ்ஜ²க³ம்ஸு தேதி தே தே³வபுத்தா அதி⁴க³தா. காயம் ப்³ரஹ்மபுரோஹிதந்தி அம்ஹாகம் பஸ்ஸந்தானம்யேவ ப்³ரஹ்மபுரோஹிதஸரீரம். இத³ம் வுத்தம் ஹோதி – யம் தவ த⁴ம்மம் ஜானித்வா தேஸம் திண்ணம் ஜனானம் தே த்³வே விஸேஸகூ³ அம்ஹாகம் பஸ்ஸந்தானம்யேவ காயம் ப்³ரஹ்மபுரோஹிதம் அதி⁴க³ந்த்வா மக்³க³ப²லவிஸேஸம் அஜ்ஜ²க³ம்ஸு, மயம்பி தஸ்ஸ த⁴ம்மஸ்ஸ பத்தியா ஆக³தம்ஹாஸி மாரிஸாதி. ஆக³தம்ஹஸேதி ஸம்பத்தம்ஹ. கதாவகாஸா ப⁴க³வதா, பஞ்ஹம் புச்சே²மு மாரிஸாதி ஸசே நோ ப⁴க³வா ஓகாஸம் கரோதி, அத² ப⁴க³வதா கதாவகாஸா ஹுத்வா பஞ்ஹம், மாரிஸ, புச்சே²ய்யாமாதி அத்தோ².

மக⁴மாணவவத்து²

355. தீ³க⁴ரத்தம் விஸுத்³தோ⁴ கோ² அயம் யக்கோ²தி சிரகாலதோ பபு⁴தி விஸுத்³தோ⁴. கீவ சிரகாலதோ? அனுப்பன்னே பு³த்³தே⁴ மக³த⁴ரட்டே² மசலகா³மகே மக⁴மாணவகாலதோ பட்டா²ய. ததா³ கிரேஸ ஏகதி³வஸம் காலஸ்ஸேவ வுட்டா²ய கா³மமஜ்ஜே² மனுஸ்ஸானம் கா³மகம்மகரணட்டா²னம் க³ந்த்வா அத்தனோ டி²தட்டா²னம் பாத³ந்தேனேவ பம்ஸுகசவரம் அபனேத்வா ரமணீயமகாஸி, அஞ்ஞோ ஆக³ந்த்வா தத்த² அட்டா²ஸி. ஸோ தாவதகேனேவ ஸதிம் படிலபி⁴த்வா மஜ்ஜே² கா³மஸ்ஸ க²லமண்ட³லமத்தம் டா²னம் ஸோதே⁴த்வா வாலுகம் ஓகிரித்வா தா³ரூனி ஆஹரித்வா ஸீதகாலே அக்³கி³ம் கரோதி, த³ஹரா ச மஹல்லகா ச ஆக³ந்த்வா தத்த² நிஸீத³ந்தி.

அத²ஸ்ஸ ஏகதி³வஸம் ஏதத³ஹோஸி – ‘‘மயம் நக³ரம் க³ந்த்வா ராஜராஜமஹாமத்தாத³யோ பஸ்ஸாம, இமேஸுபி சந்தி³மஸூரியேஸு ‘சந்தோ³ நாம தே³வபுத்தோ, ஸூரியோ நாம தே³வபுத்தோ’தி வத³ந்தி. கிம் நு கோ² கத்வா ஏதே ஏதா ஸம்பத்தியோ அதி⁴க³தா’’தி? ததோ ‘‘நாஞ்ஞம் கிஞ்சி, புஞ்ஞகம்மமேவ கத்வா’’தி சிந்தேத்வா ‘‘மயாபி ஏவம்வித⁴ஸம்பத்திதா³யகம் புஞ்ஞகம்மமேவ கத்தப்³ப³’’ந்தி சிந்தேஸி.

ஸோ காலஸ்ஸேவ வுட்டா²ய யாகு³ம் பிவித்வா வாஸிப²ரஸுகுதா³லமுஸலஹத்தோ² சதுமஹாபத²ம் க³ந்த்வா முஸலேன பாஸாணே உச்சாலேத்வா பவட்டேதி, யானானம் அக்க²படிகா⁴தருக்கே² ஹரதி, விஸமம் ஸமம் கரோதி, சதுமஹாபதே² ஸாலம் கரோதி, போக்க²ரணிம் க²ணதி, ஸேதும் ப³ந்த⁴தி, ஏவம் தி³வஸம் கம்மம் கத்வா அத்த²ங்க³தே ஸூரியே க⁴ரம் ஏதி. தம் அஞ்ஞோ புச்சி² – ‘‘போ⁴, மக⁴, த்வம் பாதோவ நிக்க²மித்வா ஸாயம் அரஞ்ஞதோ ஏஸி, கிம் கம்மம் கரோஸீ’’தி? புஞ்ஞகம்மம் கரோமி. ஸக்³க³கா³மிமக்³க³ம் ஸோதே⁴மீதி. கிமித³ம், போ⁴, புஞ்ஞம் நாமாதி? த்வம் ந ஜானாஸீதி? ஆம, ந ஜானாமீதி. நக³ரம் க³தகாலே தி³ட்ட²புப்³பா³ தே ராஜராஜமஹாமத்தாத³யோதி? ஆம, தி³ட்ட²புப்³பா³தி. புஞ்ஞகம்மம் கத்வா தேஹி தம் டா²னம் லத்³த⁴ம், அஹம்பி ஏவம்வித⁴ஸம்பத்திதா³யகம் கம்மம் கரோமி. ‘‘சந்தோ³ நாம தே³வபுத்தோ, ஸூரியோ நாம தே³வபுத்தோ’’தி ஸுதபுப்³ப³ம் தயாதி? ஆம ஸுதபுப்³ப³ந்தி. ஏதஸ்ஸ ஸக்³க³ஸ்ஸ க³மனமக்³க³ம் அஹம் ஸோதே⁴மீதி. இத³ம் பன புஞ்ஞகம்மம் கிம் தவேவ வட்டதி, அஞ்ஞஸ்ஸ ந வட்டதீதி? ந கஸ்ஸசேதம் வாரிதந்தி. யதி³ ஏவம் ஸ்வே அரஞ்ஞம் க³மனகாலே மய்ஹம்பி ஸத்³த³ம் தே³ஹீதி. புனதி³வஸே தம் க³ஹேத்வா க³தோ, ஏவம் தஸ்மிம் கா³மே தேத்திம்ஸ மனுஸ்ஸா தருணவயா ஸப்³பே³ தஸ்ஸேவ அனுவத்தகா அஹேஸும். தே ஏகச்ச²ந்தா³ ஹுத்வா புஞ்ஞகம்மானி கரோந்தா விசரந்தி. யம் தி³ஸம் க³ச்ச²ந்தி, மக்³க³ம் ஸமம் கரோந்தா ஏகதி³வஸேனேவ கரோந்தி, போக்க²ரணிம் க²ணந்தா, ஸாலம் கரோந்தா, ஸேதும் ப³ந்த⁴ந்தா ஏகதி³வஸேனேவ நிட்டா²பேந்தி.

அத² நேஸம் கா³மபோ⁴ஜகோ சிந்தேஸி – ‘‘அஹம் புப்³பே³ ஏதேஸு ஸுரம் பிவந்தேஸு பாணகா⁴தாதீ³னி கரோந்தேஸு ச கஹாபணாதி³வஸேன சேவ த³ண்ட³ப³லிவஸேன ச த⁴னம் லபா⁴மி. இதா³னி ஏதேஸம் புஞ்ஞகரணகாலதோ பட்டா²ய ஏத்தகோ ஆயோ நத்தி², ஹந்த³ நே ராஜகுலே பரிபி⁴ந்தா³மீ’’தி ராஜானம் உபஸங்கமித்வா சோரே, மஹாராஜ, பஸ்ஸாமீதி. குஹிம், தாதாதி? மய்ஹம் கா³மேதி. கிம் சோரா நாம, தாதாதி? ராஜாபராதி⁴கா தே³வாதி. கிம் ஜாதிகாதி? க³ஹபதிஜாதிகா தே³வாதி. க³ஹபதிகா கிம் கரிஸ்ஸந்தி, தயா ஜானமானேன கஸ்மா மய்ஹம் ந கதி²தந்தி? ப⁴யேன, மஹாராஜ, ந கதே²மி, இதா³னி மா மய்ஹம் தோ³ஸம் கரேய்யாதா²தி. அத² ராஜா ‘‘அயம் மய்ஹம் மஹாரவம் ரவதீ’’தி ஸத்³த³ஹித்வா ‘‘தேன ஹி க³ச்ச², த்வமேவ நே ஆனேஹீ’’தி ப³லம் த³த்வா பேஸேஸி. ஸோ க³ந்த்வா தி³வஸம் அரஞ்ஞே கம்மம் கத்வா ஸாயமாஸம் பு⁴ஞ்ஜித்வா கா³மமஜ்ஜே² நிஸீதி³த்வா ‘‘ஸ்வே கிம் கம்மம் கரிஸ்ஸாம, கிம் மக்³க³ம் ஸமம் கரோம, போக்க²ரணிம் க²ணாம, ஸேதும் ப³ந்தா⁴மா’’தி மந்தயமானேயேவ தே பரிவாரேத்வா ‘‘மா ப²ந்தி³த்த², ரஞ்ஞோ ஆணா’’தி ப³ந்தி⁴த்வா பாயாஸி. அத² கோ² நேஸம் இத்தி²யோ ‘‘ஸாமிகா கிர வோ ‘ராஜாபராதி⁴கா சோரா’தி ப³ந்தி⁴த்வா நிய்யந்தீ’’தி ஸுத்வா ‘‘அதிசிரேன கூடா ஏதே ‘புஞ்ஞகம்மம் கரோமா’தி தி³வஸே தி³வஸே அரஞ்ஞேவ அச்ச²ந்தி, ஸப்³ப³கம்மந்தா பரிஹீனா, கே³ஹே ந கிஞ்சி வட்³ட⁴தி, ஸுட்டு² ப³த்³தா⁴ ஸுட்டு² க³ஹிதா’’தி வதி³ம்ஸு.

கா³மபோ⁴ஜகோபி தே நேத்வா ரஞ்ஞோ த³ஸ்ஸேஸி. ராஜா அனுபபரிக்கி²த்வாயேவ ‘‘ஹத்தி²னா மத்³தா³பேதா²’’தி ஆஹ. தேஸு நீயமானேஸு மகோ⁴ இதரே ஆஹ – ‘‘போ⁴, ஸக்கி²ஸ்ஸத² மம வசனம் காது’’ந்தி? தவ வசனம் கரோந்தாயேவம்ஹ இமம் ப⁴யம் பத்தா, ஏவம் ஸந்தேபி தவ வசனம் கரோம, ப⁴ண போ⁴, கிம் கரோமாதி? ஏத்த² போ⁴ வட்டே சரந்தானம் நாம நிப³த்³த⁴ம் ஏதம், கிம் பன தும்ஹே சோராதி? ந சோரம்ஹாதி. இமஸ்ஸ லோகஸ்ஸ ஸச்சகிரியா நாம அவஸ்ஸயோ, தஸ்மா ஸப்³பே³பி ‘‘யதி³ அம்ஹே சோரா, ஹத்தீ² மத்³த³து, அத² ந சோரா, மா மத்³த³தூ’’தி ஸச்சகிரியம் கரோதா²தி. தே ததா² அகம்ஸு. ஹத்தீ² உபக³ந்தும்பி ந ஸக்கோதி, விரவந்தோ பலாயதி, ஹத்தி²ம் துத்ததோமரங்குஸேஹி கோட்டேந்தாபி உபனேதும் ந ஸக்கோந்தி. ‘‘ஹத்தி²ம் உபனேதும் ந ஸக்கோமா’’தி ரஞ்ஞோ ஆரோசேஸும். தேன ஹி உபரி கடேன படிச்சா²தே³த்வா மத்³தா³பேதா²தி. உபரி கடே தி³ன்னே தி³கு³ணரவம் விரவந்தோ பலாயதி.

ராஜா ஸுத்வா பேஸுஞ்ஞகாரகம் பக்கோஸாபேத்வா ஆஹ – ‘‘தாத, ஹத்தீ² மத்³தி³தும் ந இச்ச²தீ’’தி? ஆம, தே³வ, ஜேட்ட²கமாணவோ மந்தம் ஜானாதி, மந்தஸ்ஸேவ அயமானுபா⁴வோதி. ராஜா தம் பக்கோஸாபேத்வா ‘‘மந்தோ கிர தே அத்தீ²’’தி புச்சி²? நத்தி², தே³வ, மய்ஹம் மந்தோ, ஸச்சகிரியம் பன மயம் கரிம்ஹ – ‘‘யதி³ அம்ஹே ரஞ்ஞோ சோரா, மத்³த³து, அத² ந சோரா, மா மத்³த³தூ’’தி, ஸச்சகிரியாய நோ ஏஸ ஆனுபா⁴வோதி. கிம் பன, தாத, தும்ஹே கம்மம் கரோதா²தி? அம்ஹே, தே³வ, மக்³க³ம் ஸமம் கரோம, சதுமஹாபதே² ஸாலம் கரோம, போக்க²ரணிம் க²ணாம, ஸேதும் ப³ந்தா⁴ம, ஏவரூபானி புஞ்ஞகம்மானி கரோந்தா விசரிம்ஹாதி.

அயம் தும்ஹே கிமத்த²ம் பிஸுணேஸீதி? அம்ஹாகம் பமத்தகாலே இத³ஞ்சித³ஞ்ச லப⁴தி, அப்பமத்தகாலே தம் நத்தி², ஏதேன காரணேனாதி. தாத, அயம் ஹத்தீ² நாம திரச்சா²னோ, ஸோபி தும்ஹாகம் கு³ணே ஜானாதி. அஹம் மனுஸ்ஸோ ஹுத்வாபி ந ஜானாமி, தும்ஹாகம் வஸனகா³மம் தும்ஹாகம்யேவ புன அஹரணீயம் கத்வா தே³மி, அயம்பி ஹத்தீ² தும்ஹாகம்யேவ ஹோது, பேஸுஞ்ஞகாரகோபி தும்ஹாகம்யேவ தா³ஸோ ஹோது. இதோ பட்டா²ய மய்ஹம்பி புஞ்ஞகம்மம் கரோதா²தி த⁴னம் த³த்வா விஸ்ஸஜ்ஜேஸி. தே த⁴னம் க³ஹேத்வா வாரேன வாரேன ஹத்தி²ம் ஆருய்ஹ க³ச்ச²ந்தா மந்தயந்தி ‘‘போ⁴ புஞ்ஞகம்மம் நாம அனாக³தப⁴வத்தா²ய கரியதி, அம்ஹாகம் பன அந்தோஉத³கே புப்பி²தம் நீலுப்பலம் விய இமஸ்மிஞ்ஞேவ அத்தபா⁴வே விபாகம் தே³தி. இதா³னி அதிரேகம் புஞ்ஞம் கரிஸ்ஸாமா’’தி, கிம் கரோமாதி? சதுமஹாபதே² தா²வரம் கத்வா மஹாஜனஸ்ஸ விஸ்ஸமனஸாலம் கரோம, இத்தீ²ஹி பன ஸத்³தி⁴ம் அபத்திகம் கத்வா கரிஸ்ஸாம, அம்ஹேஸு ஹி ‘‘சோரா’’தி க³ஹேத்வா நீயமானேஸு இத்தீ²னம் ஏகாபி சிந்தாமத்தகம்பி அகத்வா ‘‘ஸுப³த்³தா⁴ ஸுக³ஹிதா’’தி உட்ட²ஹிம்ஸு, தஸ்மா தாஸம் பத்திம் ந த³ஸ்ஸாமாதி. தே அத்தனோ கே³ஹானி க³ந்த்வா ஹத்தி²னோ தேத்திம்ஸபிண்ட³ம் தே³ந்தி, தேத்திம்ஸ திணமுட்டி²யோ ஆஹரந்தி, தம் ஸப்³ப³ம் ஹத்தி²ஸ்ஸ குச்சி²பூரம் ஜாதம். தே அரஞ்ஞம் பவிஸித்வா ருக்கே² சி²ந்த³ந்தி, சி²ன்னம் சி²ன்னம் ஹத்தீ² கட்³டி⁴த்வா ஸகடபதே² ட²பேஸி. தே ருக்கே² தச்சே²த்வா ஸாலாய கம்மம் ஆரபி⁴ம்ஸு.

மக⁴ஸ்ஸ கே³ஹே ஸுஜாதா, ஸுத⁴ம்மா, சித்தா, நந்தா³தி சதஸ்ஸோ ப⁴ரியாயோ அஹேஸும். ஸுத⁴ம்மா வட்³ட⁴கிம் புச்ச²தி – ‘‘தாத, இமே ஸஹாயா காலஸ்ஸேவ க³ந்த்வா ஸாயம் ஏந்தி, கிம் கம்மம் கரோந்தீ’’தி? ‘‘ஸாலம் கரோந்தி, அம்மா’’தி. ‘‘தாத, மய்ஹம்பி ஸாலாய பத்திம் கத்வா தே³ஹீ’’தி. ‘‘இத்தீ²ஹி அபத்திகம் கரோமா’’தி ஏதே வத³ந்தீதி. ஸா வட்³ட⁴கிஸ்ஸ அட்ட² கஹாபணே த³த்வா ‘‘தாத, யேன கேனசி உபாயேன மய்ஹம் பத்திகம் கரோஹீ’’தி ஆஹ. ஸோ ‘‘ஸாது⁴ அம்மா’’தி வத்வா புரேதரம் வாஸிப²ரஸும் க³ஹேத்வா கா³மமஜ்ஜே² ட²த்வா ‘‘கிம் போ⁴ அஜ்ஜ இமஸ்மிம்பி காலே ந நிக்க²மதா²’’தி உச்சாஸத்³த³ம் கத்வா ‘‘ஸப்³பே³ மக்³க³ம் ஆருள்ஹா’’தி ஞத்வா ‘‘க³ச்ச²த² தாவ தும்ஹே, மய்ஹம் பபஞ்சோ அத்தீ²’’தி தே புரதோ கத்வா அஞ்ஞம் மக்³க³ம் ஆருய்ஹ கண்ணிகூபக³ம் ருக்க²ம் சி²ந்தி³த்வா தச்சே²த்வா மட்ட²ம் கத்வா ஆஹரித்வா ஸுத⁴ம்மாய கே³ஹே ட²பேஸி – ‘‘மயா தே³ஹீதி வுத்ததி³வஸே நீஹரித்வா த³தே³ய்யாஸீ’’தி.

அத² நிட்டி²தே த³ப்³ப³ஸம்பா⁴ரகம்மே பூ⁴மிகம்மதோ பட்டா²ய சயப³ந்த⁴னத²ம்பு⁴ஸ்ஸாபன ஸங்கா⁴டயோஜன கண்ணிகமஞ்சப³ந்த⁴னேஸு கதேஸு ஸோ வட்³ட⁴கீ கண்ணிகமஞ்சே நிஸீதி³த்வா சதூஹி தி³ஸாஹி கோ³பானஸியோ உக்கி²பித்வா ‘‘போ⁴ ஏகம் பமுட்ட²ம் அத்தீ²’’தி ஆஹ. கிம் போ⁴ பமுட்ட²ம், ஸப்³ப³மேவ த்வம் பமுஸ்ஸஸீதி. இமா போ⁴ கோ³பானஸியோ கத்த² பதிட்ட²ஹிஸ்ஸந்தீதி? கண்ணிகா நாம லத்³து⁴ம் வட்டதீதி. குஹிம் போ⁴ இதா³னி ஸக்கா லத்³து⁴ந்தி? குலானம் கே³ஹே ஸக்கா லத்³து⁴ந்தி. ஆஹிண்ட³ந்தா புச்ச²தா²தி. தே அந்தோகா³மம் பவிஸித்வா புச்சி²த்வா ஸுத⁴ம்மாய க⁴ரத்³வாரே ‘‘இமஸ்மிம் க⁴ரே கண்ணிகா அத்தீ²’’தி ஆஹம்ஸு. ஸா ‘‘அத்தீ²’’தி ஆஹ. ஹந்த³ மூலம் க³ண்ஹாஹீதி. மூலம் ந க³ண்ஹாமி, ஸசே மம பத்திம் கரோத², த³ஸ்ஸாமீதி. ஏத² போ⁴ மாதுகா³மஸ்ஸ பத்திம் ந கரோம, அரஞ்ஞம் க³ந்த்வா ருக்க²ம் சி²ந்தி³ஸ்ஸாமாதி நிக்க²மிம்ஸு.

ததோ வட்³ட⁴கீ ‘‘கிம் ந லத்³தா⁴, தாத, கண்ணிகா’’தி புச்சி². தே தமத்த²ம் ஆரோசயிம்ஸு. வட்³ட⁴கீ கண்ணிகமஞ்சே நிஸின்னோவ ஆகாஸம் உல்லோகேத்வா ‘‘போ⁴ அஜ்ஜ நக்க²த்தம் ஸுந்த³ரம், இத³ம் அஞ்ஞம் ஸம்வச்ச²ரம் அதிக்கமித்வா ஸக்கா லத்³து⁴ம், தும்ஹேஹி ச து³க்கே²ன ஆப⁴தா த³ப்³ப³ஸம்பா⁴ரா, தே ஸகலஸம்வச்ச²ரேன இமஸ்மிஞ்ஞேவ டா²னே பூதிகா ப⁴விஸ்ஸந்தி. தே³வலோகே நிப்³ப³த்தகாலே தஸ்ஸாபி ஏகஸ்மிம் கோணே ஸாலா ஹோது, ஆஹரத² ந’’ந்தி ஆஹ. ஸாபி யாவ தே ந புன ஆக³ச்ச²ந்தி, தாவ கண்ணிகாய ஹேட்டி²மதலே ‘‘அயம் ஸாலா ஸுத⁴ம்மா நாமா’’தி அக்க²ரானி சி²ந்தா³பேத்வா அஹதேன வத்தே²ன வேடே²த்வா ட²பேஸி. கம்மிகா ஆக³ந்த்வா – ‘‘ஆஹர, ரே கண்ணிகம், யம் ஹோது தம் ஹோது. துய்ஹம்பி பத்திம் கரிஸ்ஸாமா’’தி ஆஹம்ஸு. ஸா நீஹரித்வா ‘‘தாதா, யாவ அட்ட² வா ஸோளஸ வா கோ³பானஸியோ ந ஆரோஹந்தி, தாவ இமம் வத்த²ம் மா நிப்³பே³ட²யித்தா²’’தி வத்வா அதா³ஸி. தே ‘‘ஸாதூ⁴’’தி ஸம்படிச்சி²த்வா க³ஹேத்வா கோ³பானஸியோ ஆரோபேத்வாவ வத்த²ம் நிப்³பே³டே²ஸும்.

ஏகோ மஹாகா³மிகமனுஸ்ஸோ உத்³த⁴ம் உல்லோகேந்தோ அக்க²ரானி தி³ஸ்வா ‘‘கிம், போ⁴, இத³’’ந்தி அக்க²ரஞ்ஞும் மனுஸ்ஸம் பக்கோஸாபேத்வா த³ஸ்ஸேஸி. ஸோ ‘‘ஸுத⁴ம்மா நாம அயம் ஸாலா’’தி ஆஹ. ‘‘ஹரத², போ⁴, மயம் ஆதி³தோ பட்டா²ய ஸாலம் கத்வா நாமமத்தம்பி ந லபா⁴ம, ஏஸா ரதனமத்தேன கண்ணிகருக்கே²ன ஸாலம் அத்தனோ நாமேன காரேதீ’’தி விரவந்தி. வட்³ட⁴கீ தேஸம் விரவந்தானம்யேவ கோ³பானஸியோ பவேஸேத்வா ஆணிம் த³த்வா ஸாலாகம்மம் நிட்டா²பேஸி.

ஸாலம் திதா⁴ விப⁴ஜிம்ஸு, ஏகஸ்மிம் கோட்டா²ஸே இஸ்ஸரானம் வஸனட்டா²னம் அகம்ஸு, ஏகஸ்மிம் து³க்³க³தானம், ஏகஸ்மிம் கி³லானானம். தேத்திம்ஸ ஜனா தேத்திம்ஸ ப²லகானி பஞ்ஞபேத்வா ஹத்தி²ஸ்ஸ ஸஞ்ஞம் அத³ம்ஸு – ‘‘ஆக³ந்துகோ ஆக³ந்த்வா யஸ்ஸ அத்த²தே ப²லகே நிஸீத³தி, தம் க³ஹேத்வா ப²லகஸாமிகஸ்ஸேவ கே³ஹே பதிட்ட²பேஹி. தஸ்ஸ பாத³பரிகம்மபிட்டி²பரிகம்மகா²த³னீயபோ⁴ஜனீயஸயனானி ஸப்³பா³னி ப²லகஸாமிகஸ்ஸேவ பா⁴ரோ ப⁴விஸ்ஸதீ’’தி. ஹத்தீ² ஆக³தாக³தம் க³ஹேத்வா ப²லகஸாமிகஸ்ஸ கே³ஹம் நேதி, ஸோ தஸ்ஸ தம் தி³வஸம் கத்தப்³ப³ம் கரோதி.

மக⁴மாணவோ ஸாலதோ அவிதூ³ரே டா²னே கோவிளாரருக்க²ம் ரோபாபேஸி, மூலே சஸ்ஸ பாஸாணப²லகம் அத்த²ரி. நந்தா³ நாமஸ்ஸ ப⁴ரியா அவிதூ³ரே போக்க²ரணிம் க²ணாபேஸி, சித்தா மாலாவச்சே² ரோபாபேஸி, ஸப்³ப³ஜேட்டி²கா பன ஆதா³ஸம் க³ஹேத்வா அத்தபா⁴வம் மண்ட³யமானாவ விசரதி. மகோ⁴ தம் ஆஹ – ‘‘ப⁴த்³தே³, ஸுத⁴ம்மா, ஸாலாய பத்திகா ஜாதா, நந்தா³ போக்க²ரணிம் க²ணாபேஸி, சித்தா மாலாவச்சே² ரோபாபேஸி. தவ பன புஞ்ஞகம்மம் நாம நத்தி², ஏகம் புஞ்ஞம் கரோஹி, ப⁴த்³தே³’’தி ஸா ‘‘த்வம் கஸ்ஸ காரணா கரோஸி, நனு தயா கதம் மய்ஹமேவா’’தி வத்வா அத்தபா⁴வமண்ட³னமேவ அனுயுஞ்ஜதி.

மகோ⁴ யாவதாயுகம் ட²த்வா ததோ சவித்வா தாவதிம்ஸப⁴வனே ஸக்கோ ஹுத்வா நிப்³ப³த்தி, தேபி தேத்திம்ஸ கா³மிகமனுஸ்ஸா காலங்கத்வா தேத்திம்ஸ தே³வபுத்தா ஹுத்வா தஸ்ஸேவ ஸந்திகே நிப்³ப³த்தா. ஸக்கஸ்ஸ வேஜயந்தோ நாம பாஸாதோ³ ஸத்த யோஜனஸதானி உக்³க³ச்சி², த⁴ஜோ தீணி யோஜனஸதானி உக்³க³ச்சி², கோவிளாரருக்க²ஸ்ஸ நிஸ்ஸந்தே³ன ஸமந்தா தியோஜனஸதபரிமண்ட³லோ பஞ்சத³ஸயோஜனபரிணாஹக்க²ந்தோ⁴ பாரிச்ச²த்தகோ நிப்³ப³த்தி, பாஸாணப²லகஸ்ஸ நிஸ்ஸந்தே³ன பாரிச்ச²த்தகமூலே ஸட்டி²யோஜனிகா பண்டு³கம்ப³லஸிலா நிப்³ப³த்தி. ஸுத⁴ம்மாய கண்ணிகருக்க²ஸ்ஸ நிஸ்ஸந்தே³ன தியோஜனஸதிகா ஸுத⁴ம்மா தே³வஸபா⁴ நிப்³ப³த்தி. நந்தா³ய போக்க²ரணியா நிஸ்ஸந்தே³ன பஞ்ஞாஸயோஜனா நந்தா³ நாம போக்க²ரணீ நிப்³ப³த்தி. சித்தாய மாலாவச்ச²வத்து²னிஸ்ஸந்தே³ன ஸட்டி²யோஜனிகம் சித்தலதாவனம் நாம உய்யானம் நிப்³ப³த்தி.

ஸக்கோ தே³வராஜா ஸுத⁴ம்மாய தே³வஸபா⁴ய யோஜனிகே ஸுவண்ணபல்லங்கே நிஸின்னோ தியோஜனிகே ஸேதச்ச²த்தே தா⁴ரியமானே தேஹி தே³வபுத்தேஹி தாஹி தே³வகஞ்ஞாஹி அட்³ட⁴தியாஹி நாடககோடீஹி த்³வீஸு தே³வலோகேஸு தே³வதாஹி ச பரிவாரிதோ மஹாஸம்பத்திம் ஓலோகேந்தோ தா திஸ்ஸோ இத்தி²யோ தி³ஸ்வா ‘‘இமா தாவ பஞ்ஞாயந்தி, ஸுஜாதா குஹி’’ந்தி ஓலோகேந்தோ ‘‘அயம் மம வசனம் அகத்வா கி³ரிகந்த³ராய ப³கஸகுணிகா ஹுத்வா நிப்³ப³த்தா’’தி தி³ஸ்வா தே³வலோகதோ ஓதரித்வா தஸ்ஸா ஸந்திகம் க³தோ. ஸா தி³ஸ்வாவ ஸஞ்ஜானித்வா அதோ⁴முகா² ஜாதா. ‘‘பா³லே, இதா³னி கிம் ஸீஸம் ந உக்கி²பஸி? த்வம் மம வசனம் அகத்வா அத்தபா⁴வமேவ மண்ட³யமானா வீதினாமேஸி. ஸுத⁴ம்மாய ச நந்தா³ய ச சித்தாய ச மஹாஸம்பத்தி நிப்³ப³த்தா, ஏஹி அம்ஹாகம் ஸம்பத்திம் பஸ்ஸா’’தி தே³வலோகம் நேத்வா நந்தா³ய போக்க²ரணியா பக்கி²பித்வா பல்லங்கே நிஸீதி³.

நாடகித்தி²யோ ‘‘குஹிம் க³தத்த², மஹாராஜா’’தி புச்சி²ம்ஸு. ஸோ அனாரோசேதுகாமோபி தாஹி நிப்பீளியமானோ ‘‘ஸுஜாதாய ஸந்திக’’ந்தி ஆஹ. குஹிம் நிப்³ப³த்தா, மஹாராஜாதி? கந்த³ரபாதே³தி. இதா³னி குஹிந்தி? நந்தா³போக்க²ரணியம் மே விஸ்ஸட்டா²தி. ஏத², போ⁴, அம்ஹாகம் அய்யம் பஸ்ஸாமாதி ஸப்³பா³ தத்த² அக³மம்ஸு. ஸா புப்³பே³ ஸப்³ப³ஜேட்டி²கா ஹுத்வா தா அவமஞ்ஞித்த². இதா³னி தாபி தம் தி³ஸ்வா – ‘‘பஸ்ஸத², போ⁴ அம்ஹாகம் அய்யாய முக²ம் கக்கடகவிஜ்ஜ²னஸூலஸதி³ஸ’’ந்திஆதீ³னி வத³ந்தியோ கேளிம் அகம்ஸு. ஸா அதிவிய அட்டியமானா ஸக்கம் தே³வராஜானம் ஆஹ – ‘‘மஹாராஜ, இமானி ஸுவண்ணரஜதமணிவிமானானி வா நந்தா³போக்க²ரணீ வா மய்ஹம் கிம் கரிஸ்ஸதி, ஜாதிபூ⁴மியேவ மஹாராஜ ஸத்தானம் ஸுகா², மம் தத்தே²வ கந்த³ரபாதே³ விஸ்ஸஜ்ஜேஹீ’’தி. ஸக்கோ தம் தத்த² விஸ்ஸஜ்ஜேத்வா ‘‘மம வசனம் கரிஸ்ஸஸீ’’தி ஆஹ. கரிஸ்ஸாமி, மஹாராஜாதி. பஞ்ச ஸீலானி க³ஹேத்வா அக²ண்டா³னி கத்வா ரக்க², கதிபாஹேன தம் ஏதாஸம் ஜேட்டி²கம் கரிஸ்ஸாமீதி. ஸா ததா² அகாஸி.

ஸக்கோ கதிபாஹஸ்ஸ அச்சயேன ‘‘ஸக்கா நு கோ² ஸீலம் ரக்கி²து’’ந்தி க³ந்த்வா மச்ச²ரூபேன உத்தானகோ ஹுத்வா தஸ்ஸா புரதோ உத³கபிட்டே² ஓஸரதி, ஸா ‘‘மதமச்ச²கோ ப⁴விஸ்ஸதீ’’தி க³ந்த்வா ஸீஸே அக்³க³ஹேஸி. மச்சோ² நங்கு³ட்ட²ம் சாலேஸி. ஸா ‘‘ஜீவதி மஞ்ஞே’’தி உத³கே விஸ்ஸஜ்ஜேஸி. ஸக்கோ ஆகாஸே ட²த்வா ‘‘ஸாது⁴, ஸாது⁴, ரக்க²ஸி ஸிக்கா²பத³ம், ஏவம் தம் ரக்க²மானம் கதிபாஹேனேவ நாடகானம் ஜேட்டி²கம் கரிஸ்ஸாமீ’’தி ஆஹ. தஸ்ஸாபி பஞ்ச வஸ்ஸஸதானி ஆயு அஹோஸி. ஏகதி³வஸம்பி உத³ரபூரம் நாலத்த²ம், ஸுக்கி²த்வா பரிஸுக்கி²த்வா மிலாயமானாபி ஸீலம் அக²ண்டே³த்வா காலங்கத்வா பா³ராணஸியம் கும்ப⁴காரகே³ஹே நிப்³ப³த்தி.

ஸக்கோ ‘‘குஹிம் நிப்³ப³த்தா’’தி ஓலோகேந்தோ தி³ஸ்வா ‘‘ததோ இத⁴ ஆனேதும் ந ஸக்கா, ஜீவிதவுத்திமஸ்ஸா த³ஸ்ஸாமீ’’தி ஸுவண்ணஏளாலுகானம் யானகம் பூரேத்வா மஜ்ஜே² கா³மஸ்ஸ மஹல்லகவேஸேன நிஸீதி³த்வா ‘‘ஏளாலுகானி க³ண்ஹதா²’’தி உக்குட்டி²மகாஸி. ஸமந்தா கா³மவாஸிகா ஆக³ந்த்வா ‘‘தே³ஹி, தாதா’’தி ஆஹம்ஸு. அஹம் ஸீலரக்க²கானம் தே³மி, தும்ஹே ஸீலம் ரக்க²தா²தி. தாத மயம் ஸீலம் நாம கீதி³ஸந்திபி ந ஜானாம, மூலேன தே³ஹீதி. ‘‘ஸீலரக்க²கானம்யேவ த³ம்மீ’’தி ஆஹ. ‘‘ஏத², ரே கோஸி அயம் ஏளாலுகமஹல்லகோ’’தி ஸப்³பே³ நிவத்திம்ஸு.

ஸா தா³ரிகா புச்சி² – ‘‘அம்ம, தும்ஹே ஏளாலுகத்தா²ய க³தா துச்ச²ஹத்தா²வ ஆக³தா’’தி. கோஸி, அம்ம, ஏளாலுகமஹல்லகோ ‘‘அஹம் ஸீலரக்க²கானம் த³ம்மீ’’தி வத³தி, நூனிமஸ்ஸ தா³ரிகா ஸீலம் கா²தி³த்வா வத்தந்தி, மயம் ஸீலமேவ ந ஜானாமாதி. ஸா ‘‘மய்ஹம் ஆனீதம் ப⁴விஸ்ஸதீ’’தி க³ந்த்வா ‘‘ஏளாலுகம், தாத, தே³ஹீ’’தி ஆஹ. ‘‘த்வம் ஸீலானி ரக்க²ஸி அம்மா’’தி? ‘‘ஆம, தாத ரக்கா²மீ’’தி. இத³ம் மயா துய்ஹமேவ ஆப⁴தந்தி கே³ஹத்³வாரே யானேன ஸத்³தி⁴ம் ட²பேத்வா பக்காமி. ஸாபி யாவஜீவம் ஸீலம் ரக்கி²த்வா சவித்வா வேபசித்திஅஸுரஸ்ஸ தீ⁴தா ஹுத்வா நிப்³ப³த்தி. ஸீலனிஸ்ஸந்தே³ன பாஸாதி³கா அஹோஸி. ஸோ ‘‘தீ⁴துவிவாஹமங்க³லம் கரிஸ்ஸாமீ’’தி அஸுரே ஸன்னிபாதேஸி.

ஸக்கோ ‘‘குஹிம் நிப்³ப³த்தா’’தி ஓலோகேந்தோ ‘‘அஸுரப⁴வனே நிப்³ப³த்தா, அஜ்ஜஸ்ஸா விவாஹமங்க³லம் கரிஸ்ஸந்தீ’’தி தி³ஸ்வா ‘‘இதா³னி யம்கிஞ்சி கத்வா ஆனேதப்³பா³ மயா’’தி அஸுரவண்ணம் நிம்மினித்வா க³ந்த்வா அஸுரானம் அந்தரே அட்டா²ஸி. ‘‘தவ ஸாமிகம் வதே³ஹீ’’தி தஸ்ஸா ஹத்தே² பிதா புப்ப²தா³மம் அதா³ஸி ‘‘யம் இச்ச²ஸி, தஸ்ஸூபரி கி²பாஹீ’’தி. ஸா ஓலோகேந்தீ ஸக்கம் தி³ஸ்வா புப்³ப³ஸன்னிவாஸேன ஸஞ்ஜாதஸினேஹா ‘‘அயம் மே ஸாமிகோ’’தி தஸ்ஸூபரி தா³மம் கி²பி. ஸோ தம் பா³ஹாய க³ஹேத்வா ஆகாஸே உப்பதி, தஸ்மிம் க²ணே அஸுரா ஸஞ்ஜானிம்ஸு. தே ‘‘க³ண்ஹத², க³ண்ஹத², ஜரஸக்கம், வேரிகோ அம்ஹாகம், ந மயம் ஏதஸ்ஸ தா³ரிகம் த³ஸ்ஸாமா’’தி அனுப³ந்தி⁴ம்ஸு. வேபசித்தி புச்சி² ‘‘கேனாஹடா’’தி? ‘‘ஜரஸக்கேன மஹாராஜா’’தி. ‘‘அவஸேஸேஸு அயமேவ ஸேட்டோ², அபேதா²’’தி ஆஹ. ஸக்கோ நம் நேத்வா அட்³ட⁴தியகோடினாடகானம் ஜேட்டி²கட்டா²னே ட²பேஸி. ஸா ஸக்கம் வரம் யாசி – ‘‘மஹாராஜ, மய்ஹம் இமஸ்மிம் தே³வலோகே மாதா வா பிதா வா பா⁴தா வா ப⁴கி³னீ வா நத்தி², யத்த² யத்த² க³ச்ச²ஸி, தத்த² தத்த² மம் க³ஹேத்வாவ க³ச்ச² மஹாராஜா’’தி. ஸக்கோ ‘‘ஸாதூ⁴’’தி படிஞ்ஞம் அதா³ஸி.

ஏவம் மசலகா³மகே மக⁴மாணவகாலதோ பட்டா²ய விஸுத்³த⁴பா⁴வமஸ்ஸ ஸம்பஸ்ஸந்தோ ப⁴க³வா ‘‘தீ³க⁴ரத்தம் விஸுத்³தோ⁴ கோ² அயம் யக்கோ²’’தி ஆஹ. அத்த²ஸஞ்ஹிதந்தி அத்த²னிஸ்ஸிதம் காரணனிஸ்ஸிதம்.

பஞ்ஹவேய்யாகரணவண்ணனா

357. கிம் ஸம்யோஜனாதி கிம் ப³ந்த⁴னா, கேன ப³ந்த⁴னேன ப³த்³தா⁴ ஹுத்வா. புது²காயாதி ப³ஹுஜனா. அவேராதி அப்படிகா⁴. அத³ண்டா³தி ஆவுத⁴த³ண்ட³த⁴னத³ண்ட³வினிமுத்தா. அஸபத்தாதி அபச்சத்தி²கா. அப்³யாபஜ்ஜாதி விக³ததோ³மனஸ்ஸா. விஹரேமு அவேரினோதி அஹோ வத கேனசி ஸத்³தி⁴ம் அவேரினோ விஹரேய்யாம, கத்த²சி கோபம் ந உப்பாதே³த்வா அச்ச²ராய க³ஹிதகம் ஜங்க⁴ஸஹஸ்ஸேன ஸத்³தி⁴ம் பரிபு⁴ஞ்ஜேய்யாமாதி தா³னம் த³த்வா பூஜம் கத்வா ச பத்த²யந்தி. இதி ச நேஸம் ஹோதீதி ஏவஞ்ச நேஸம் அயம் பத்த²னா ஹோதி. அத² ச பனாதி ஏவம் பத்த²னாய ஸதிபி.

இஸ்ஸாமச்ச²ரியஸம்யோஜனாதி பரஸம்பத்திகீ²யனலக்க²ணா இஸ்ஸா, அத்தஸம்பத்தியா பரேஹி ஸாதா⁴ரணபா⁴வஸ்ஸ அஸஹனலக்க²ணம் மச்ச²ரியம், இஸ்ஸா ச மச்ச²ரியஞ்ச ஸம்யோஜனம் ஏதேஸந்தி இஸ்ஸாமச்ச²ரியஸம்யோஜனா. அயமேத்த² ஸங்கே²போ. வித்தா²ரதோ பன இஸ்ஸாமச்ச²ரியானி அபி⁴த⁴ம்மே வுத்தானேவ.

ஆவாஸமச்ச²ரியேன பனேத்த² யக்கோ² வா பேதோ வா ஹுத்வா தஸ்ஸேவ ஆவாஸஸ்ஸ ஸங்காரம் ஸீஸேன உக்கி²பித்வா விசரதி. குலமச்ச²ரியேன தஸ்மிம் குலே அஞ்ஞேஸம் தா³னாதீ³னி கரோந்தே தி³ஸ்வா ‘‘பி⁴ன்னம் வதித³ம் குலம் மமா’’தி சிந்தயதோ லோஹிதம்பி முக²தோ உக்³க³ச்ச²தி, குச்சி²விரேசனம்பி ஹோதி, அந்தானிபி க²ண்டா³க²ண்டா³னி ஹுத்வா நிக்க²மந்தி. லாப⁴மச்ச²ரியேன ஸங்க⁴ஸ்ஸ வா க³ணஸ்ஸ வா ஸந்தகே லாபே⁴ மச்ச²ராயித்வா புக்³க³லிகபரிபோ⁴கே³ன பரிபு⁴ஞ்ஜித்வா யக்கோ² வா பேதோ வா மஹாஅஜக³ரோ வா ஹுத்வா நிப்³ப³த்ததி. ஸரீரவண்ணகு³ணவண்ணமச்ச²ரியேன பன பரியத்தித⁴ம்மமச்ச²ரியேன ச அத்தனோவ வண்ணம் வண்ணேதி, ந பரேஸம் வண்ணம், ‘‘கிம் வண்ணோ ஏஸோ’’தி தம் தம் தோ³ஸம் வத³ந்தோ பரியத்திஞ்ச கஸ்ஸசி கிஞ்சி அதே³ந்தோ து³ப்³ப³ண்ணோ சேவ ஏளமூகோ³ ச ஹோதி.

அபிச ஆவாஸமச்ச²ரியேன லோஹகே³ஹே பச்சதி. குலமச்ச²ரியேன அப்பலாபோ⁴ ஹோதி. லாப⁴மச்ச²ரியேன கூ³த²னிரயே நிப்³ப³த்ததி. வண்ணமச்ச²ரியேன ப⁴வே நிப்³ப³த்தஸ்ஸ வண்ணோ நாம ந ஹோதி. த⁴ம்மமச்ச²ரியேன குக்குளனிரயே நிப்³ப³த்ததி. இத³ம் பன இஸ்ஸாமச்ச²ரியஸம்யோஜனம் ஸோதாபத்திமக்³கே³ன பஹீயதி. யாவ தம் நப்பஹீயதி, தாவ தே³வமனுஸ்ஸா அவேரதாதீ³னி பத்த²யந்தாபி வேராதீ³ஹி ந பரிமுச்சந்தியேவ.

திண்ணா மேத்த² கங்கா²தி ஏதஸ்மிம் பஞ்ஹே மயா தும்ஹாகம் வசனம் ஸுத்வா கங்கா² திண்ணாதி வத³தி, ந மக்³க³வஸேன திண்ணகங்க²தம் தீ³பேதி. விக³தா கத²ம்கதா²தி இத³ம் கத²ம், இத³ம் கத²ந்தி அயம்பி கத²ம்கதா² விக³தா.

358. நிதா³னாதீ³னி வுத்தத்தா²னேவ. பியாப்பியனிதா³னந்தி பியஸத்தஸங்கா²ரனிதா³னம் மச்ச²ரியம், அப்பியஸத்தஸங்கா²ரனிதா³னா இஸ்ஸா. உப⁴யம் வா உப⁴யனிதா³னம். பப்³ப³ஜிதஸ்ஸ ஹி ஸத்³தி⁴விஹாரிகாத³யோ, க³ஹட்ட²ஸ்ஸ புத்தாத³யோ ஹத்தி²அஸ்ஸாத³யோ வா ஸத்தா பியா ஹோந்தி கேளாயிதா மமாயிதா, முஹுத்தம்பி தே அபஸ்ஸந்தோ அதி⁴வாஸேதும் ந ஸக்கோதி. ஸோ அஞ்ஞம் தாதி³ஸம் பியஸத்தம் லப⁴ந்தம் தி³ஸ்வா இஸ்ஸம் கரோதி. ‘‘இமினா அம்ஹாகம் கிஞ்சி கம்மம் அத்தி², முஹுத்தம் தாவ நம் தே³தா²’’தி தமேவ அஞ்ஞேஹி யாசிதோ ‘‘ந ஸக்கா தா³தும், கிலமிஸ்ஸதி வா உக்கண்டி²ஸ்ஸதி வா’’திஆதீ³னி வத்வா மச்ச²ரியம் கரோதி. ஏவம் தாவ உப⁴யம்பி பியஸத்தனிதா³னம் ஹோதி. பி⁴க்கு²ஸ்ஸ பன பத்தசீவரபரிக்கா²ரஜாதம், க³ஹட்ட²ஸ்ஸ வா அலங்காராதி³உபகரணம் பியம் ஹோதி மனாபம், ஸோ அஞ்ஞஸ்ஸ தாதி³ஸம் உப்பஜ்ஜமானம் தி³ஸ்வா ‘‘அஹோ வதஸ்ஸ ஏவரூபம் ந ப⁴வேய்யா’’தி இஸ்ஸம் கரோதி, யாசிதோ வாபி ‘‘மயம்பேதம் மமாயந்தா ந பரிபு⁴ஞ்ஜாம, ந ஸக்கா தா³து’’ந்தி மச்ச²ரியம் கரோதி. ஏவம் உப⁴யம்பி பியஸங்கா²ரனிதா³னம் ஹோதி. அப்பியே பன தே வுத்தப்பகாரே ஸத்தே ச ஸங்கா²ரே ச லபி⁴த்வா ஸசேபிஸ்ஸ தே அமனாபா ஹோந்தி, ததா²பி கிலேஸானம் விபரீதவுத்திதாய ‘‘ட²பேத்வா மம் கோ அஞ்ஞோ ஏவரூபஸ்ஸ லாபீ⁴’’தி இஸ்ஸம் வா கரோதி, யாசிதோ தாவகாலிகம்பி அத³த³மானோ மச்ச²ரியம் வா கரோதி. ஏவம் உப⁴யம்பி அப்பியஸத்தஸங்கா²ரனிதா³னம் ஹோதி.

ச²ந்த³னிதா³னந்தி ஏத்த² பரியேஸனச²ந்தோ³, படிலாப⁴ச²ந்தோ³, பரிபோ⁴க³ச²ந்தோ³, ஸன்னிதி⁴ச²ந்தோ³, விஸ்ஸஜ்ஜனச²ந்தோ³தி பஞ்சவிதோ⁴ ச²ந்தோ³.

கதமோ பரியேஸனச²ந்தோ³? இதே⁴கச்சோ அதித்தோ ச²ந்த³ஜாதோ ரூபம் பரியேஸதி, ஸத்³த³ம். க³ந்த⁴ம். ரஸம். போ²ட்ட²ப்³ப³ம் பரியேஸதி, த⁴னம் பரியேஸதி. அயம் பரியேஸனச²ந்தோ³.

கதமோ படிலாப⁴ச²ந்தோ³? இதே⁴கச்சோ அதித்தோ ச²ந்த³ஜாதோ ரூபம் படிலப⁴தி, ஸத்³த³ம். க³ந்த⁴ம். ரஸம். போ²ட்ட²ப்³ப³ம் படிலப⁴தி, த⁴னம் படிலப⁴தி. அயம் படிலாப⁴ச²ந்தோ³.

கதமோ பரிபோ⁴க³ச²ந்தோ³? இதே⁴கச்சோ அதித்தோ ச²ந்த³ஜாதோ ரூபம் பரிபு⁴ஞ்ஜதி, ஸத்³த³ம். க³ந்த⁴ம். ரஸம். போ²ட்ட²ப்³ப³ம் பரிபு⁴ஞ்ஜதி, த⁴னம் பரிபு⁴ஞ்ஜதி. அயம் பரிபோ⁴க³ச²ந்தோ³.

கதமோ ஸன்னிதி⁴ச²ந்தோ³? இதே⁴கச்சோ அதித்தோ ச²ந்த³ஜாதோ த⁴னஸன்னிசயம் கரோதி ‘‘ஆபதா³ஸு ப⁴விஸ்ஸதீ’’தி. அயம் ஸன்னிதி⁴ச²ந்தோ³.

கதமோ விஸ்ஸஜ்ஜனச²ந்தோ³? இதே⁴கச்சோ அதித்தோ ச²ந்த³ஜாதோ த⁴னம் விஸ்ஸஜ்ஜேதி, ஹத்தா²ரோஹானம், அஸ்ஸாரோஹானம், ரதி²கானம், த⁴னுக்³க³ஹானம் – ‘‘இமே மம் ரக்கி²ஸ்ஸந்தி கோ³பிஸ்ஸந்தி மமாயிஸ்ஸந்தி ஸம்பரிவாரயிஸ்ஸந்தீ’’தி. அயம் விஸ்ஸஜ்ஜனச²ந்தோ³. இமே பஞ்ச ச²ந்தா³. இத⁴ தண்ஹாமத்தமேவ, தம் ஸந்தா⁴ய இத³ம் வுத்தம்.

விதக்கனிதா³னோதி ஏத்த² ‘‘லாப⁴ம் படிச்ச வினிச்ச²யோ’’தி (தீ³. நி. 2.110) ஏவம் வுத்தோ வினிச்ச²யவிதக்கோ விதக்கோ நாம. வினிச்ச²யோதி த்³வே வினிச்ச²யா தண்ஹாவினிச்ச²யோ ச, தி³ட்டி²வினிச்ச²யோ ச. அட்ட²ஸதம் தண்ஹாவிசரிதம் தண்ஹாவினிச்ச²யோ நாம. த்³வாஸட்டி² தி³ட்டி²யோ தி³ட்டி²வினிச்ச²யோ நாமாதி ஏவம் வுத்ததண்ஹாவினிச்ச²யவஸேன ஹி இட்டா²னிட்ட²பியாப்பியவவத்தா²னம் ந ஹோதி. ததே³வ ஹி ஏகச்சஸ்ஸ இட்ட²ம் ஹோதி, ஏகச்சஸ்ஸ அனிட்ட²ம் பச்சந்தராஜமஜ்ஜி²மதே³ஸராஜூனம் க³ண்டு³ப்பாத³மிக³மம்ஸாதீ³ஸு விய. தஸ்மிம் பன தண்ஹாவினிச்ச²யவினிச்சி²தே படிலத்³த⁴வத்து²ஸ்மிம் ‘‘ஏத்தகம் ரூபஸ்ஸ ப⁴விஸ்ஸதி, ஏத்தகம் ஸத்³த³ஸ்ஸ, ஏத்தகம் க³ந்த⁴ஸ்ஸ, ஏத்தகம் ரஸஸ்ஸ, ஏத்தகம் போ²ட்ட²ப்³ப³ஸ்ஸ ப⁴விஸ்ஸதி, ஏத்தகம் மய்ஹம் ப⁴விஸ்ஸதி, ஏத்தகம் பரஸ்ஸ ப⁴விஸ்ஸதி, ஏத்தகம் நித³ஹிஸ்ஸாமி, ஏத்தகம் பரஸ்ஸ த³ஸ்ஸாமீ’’தி வவத்தா²னம் விதக்கவினிச்ச²யேன ஹோதி. தேனாஹ ‘‘ச²ந்தோ³ கோ², தே³வானமிந்த³, விதக்கனிதா³னோ’’தி.

பபஞ்சஸஞ்ஞாஸங்கா²னிதா³னோதி தயோ பபஞ்சா தண்ஹாபபஞ்சோ, மானபபஞ்சோ, தி³ட்டி²பபஞ்சோதி. தத்த² அட்ட²ஸததண்ஹாவிசரிதம் தண்ஹாபபஞ்சோ நாம. நவவிதோ⁴ மானோ மானபபஞ்சோ நாம. த்³வாஸட்டி² தி³ட்டி²யோ தி³ட்டி²பபஞ்சோ நாம. தேஸு இத⁴ தண்ஹாபபஞ்சோ அதி⁴ப்பேதோ. கேனட்டே²ன பபஞ்சோ? மத்தபமத்தாகாரபாபனட்டே²ன பபஞ்சோ. தம்ஸம்பயுத்தா ஸஞ்ஞா பபஞ்சஸஞ்ஞா. ஸங்கா² வுச்சதி கோட்டா²ஸோ ‘‘ஸஞ்ஞானிதா³னா ஹி பபஞ்சஸங்கா²’’திஆதீ³ஸு விய. இதி பபஞ்சஸஞ்ஞாஸங்கா²னிதா³னோதி பபஞ்சஸஞ்ஞாகோட்டா²ஸனிதா³னோ விதக்கோதி அத்தோ².

பபஞ்சஸஞ்ஞாஸங்கா²னிரோத⁴ஸாருப்பகா³மினிந்தி ஏதிஸ்ஸா பபஞ்சஸஞ்ஞாஸங்கா²ய க²யா நிரோதோ⁴ வூபஸமோ, தஸ்ஸ ஸாருப்பஞ்சேவ தத்த² கா³மினிம் சாதி ஸஹ விபஸ்ஸனாய மக்³க³ம் புச்ச²தி.

வேத³னாகம்மட்டா²னவண்ணனா

359. அத²ஸ்ஸ ப⁴க³வா ஸோமனஸ்ஸம்பாஹந்தி திஸ்ஸோ வேத³னா ஆரபி⁴. கிம் பன ப⁴க³வதா புச்சி²தம் கதி²தம், அபுச்சி²தம், ஸானுஸந்தி⁴கம், அனனுஸந்தி⁴கந்தி? புச்சி²தமேவ கதி²தம், நோ அபுச்சி²தம், ஸானுஸந்தி⁴கமேவ, நோ அனனுஸந்தி⁴கம். தே³வதானஞ்ஹி ரூபதோ அரூபம் பாகடதரம், அரூபேபி வேத³னா பாகடதரா. கஸ்மா? தே³வதானஞ்ஹி கரஜகாயம் ஸுகு²மம், கம்மஜம் ப³லவம், கரஜகாயஸ்ஸ ஸுகு²மத்தா, கம்மஜஸ்ஸ ப³லவத்தா ஏகாஹாரம்பி அதிக்கமித்வா ந திட்ட²ந்தி, உண்ஹபாஸாணே ட²பிதஸப்பிபிண்டி³ விய விலீயந்தீதி ஸப்³ப³ம் ப்³ரஹ்மஜாலே வுத்தனயேனேவ வேதி³தப்³ப³ம். தஸ்மா ப⁴க³வா ஸக்கஸ்ஸ திஸ்ஸோ வேத³னா ஆரபி⁴. து³வித⁴ஞ்ஹி கம்மட்டா²னம் – ரூபகம்மட்டா²னம், அரூபகம்மட்டா²னஞ்ச. ரூபபரிக்³க³ஹோ, அரூபபரிக்³க³ஹோதிபி ஏததே³வ வுச்சதி. தத்த² ப⁴க³வா யஸ்ஸ ரூபம் பாகடம், தஸ்ஸ ஸங்கே²பமனஸிகாரவஸேன வா வித்தா²ரமனஸிகாரவஸேன வா சதுதா⁴துவவத்தா²னம் வித்தா²ரேந்தோ ரூபகம்மட்டா²னம் கதே²தி. யஸ்ஸ அரூபம் பாகடம், தஸ்ஸ அரூபகம்மட்டா²னம் கதே²தி. கதே²ந்தோ ச தஸ்ஸ வத்து²பூ⁴தம் ரூபகம்மட்டா²னம் த³ஸ்ஸேத்வாவ கதே²தி, தே³வானம் பன அரூபகம்மட்டா²னம் பாகடந்தி அரூபகம்மட்டா²னவஸேன வேத³னா ஆரபி⁴.

திவிதோ⁴ ஹி அரூபகம்மட்டா²னே அபி⁴னிவேஸோ – ப²ஸ்ஸவஸேன, வேத³னாவஸேன, சித்தவஸேனாதி. கத²ம்? ஏகச்சஸ்ஸ ஹி ஸங்கி²த்தேன வா வித்தா²ரேன வா பரிக்³க³ஹிதே ரூபகம்மட்டா²னே தஸ்மிம் ஆரம்மணே சித்தசேதஸிகானம் பட²மாபி⁴னிபாதோ தம் ஆரம்மணம் பு²ஸந்தோ உப்பஜ்ஜமானோ ப²ஸ்ஸோ பாகடோ ஹோதி. ஏகச்சஸ்ஸ தம் ஆரம்மணம் அனுப⁴வந்தீ உப்பஜ்ஜமானா வேத³னா பாகடா ஹோதி. ஏகச்சஸ்ஸ தம் ஆரம்மணம் பரிக்³க³ஹேத்வா தம் விஜானந்தம் உப்பஜ்ஜமானம் விஞ்ஞாணம் பாகடம் ஹோதி.

தத்த² யஸ்ஸ ப²ஸ்ஸோ பாகடோ ஹோதி, ஸோபி ந கேவலம் ப²ஸ்ஸோவ உப்பஜ்ஜதி, தேன ஸத்³தி⁴ம் ததே³வ ஆரம்மணம் அனுப⁴வமானா வேத³னாபி உப்பஜ்ஜதி, ஸஞ்ஜானமானா ஸஞ்ஞாபி, சேதயமானா சேதனாபி, விஜானமானம் விஞ்ஞாணம்பி உப்பஜ்ஜதீதி ப²ஸ்ஸபஞ்சமகேயேவ பரிக்³க³ண்ஹாதி. யஸ்ஸ வேத³னா பாகடா ஹோதி, ஸோபி ந கேவலம் வேத³னாவ உப்பஜ்ஜதி, தாய ஸத்³தி⁴ம் ததே³வ ஆரம்மணம் பு²ஸமானோ ப²ஸ்ஸோபி உப்பஜ்ஜதி, ஸஞ்ஜானமானா ஸஞ்ஞாபி, சேதயமானா சேதனாபி, விஜானமானம் விஞ்ஞாணம்பி உப்பஜ்ஜதீதி ப²ஸ்ஸபஞ்சமகேயேவ பரிக்³க³ண்ஹாதி. யஸ்ஸ விஞ்ஞாணம் பாகடம் ஹோதி, ஸோபி ந கேவலம் விஞ்ஞாணமேவ உப்பஜ்ஜதி, தேன ஸத்³தி⁴ம் ததே³வாரம்மணம் பு²ஸமானோ ப²ஸ்ஸோபி உப்பஜ்ஜதி, அனுப⁴வமானா வேத³னாபி, ஸஞ்ஜானமானா ஸஞ்ஞாபி, சேதயமானா சேதனாபி உப்பஜ்ஜதீதி ப²ஸ்ஸபஞ்சமகேயேவ பரிக்³க³ண்ஹாதி.

ஸோ ‘‘இமே ப²ஸ்ஸபஞ்சமகா த⁴ம்மா கிம் நிஸ்ஸிதா’’தி உபதா⁴ரேந்தோ ‘‘வத்து²னிஸ்ஸிதா’’தி பஜானாதி. வத்து² நாம கரஜகாயோ, யம் ஸந்தா⁴ய வுத்தம் – ‘‘இத³ஞ்ச பன மே விஞ்ஞாணம் ஏத்த² ஸிதம் ஏத்த² படிப³த்³த⁴’’ந்தி. ஸோ அத்த²தோ பூ⁴தானி சேவ உபாதா³ரூபானி ச. ஏவமேத்த² வத்து² ரூபம், ப²ஸ்ஸபஞ்சமகா நாமந்தி நாமரூபமத்தமேவ பஸ்ஸதி. ரூபஞ்சேத்த² ரூபக்க²ந்தோ⁴, நாமம் சத்தாரோ அரூபினோ க²ந்தா⁴தி பஞ்சக்க²ந்த⁴மத்தம் ஹோதி. நாமரூபவினிமுத்தா ஹி பஞ்சக்க²ந்தா⁴, பஞ்சக்க²ந்த⁴வினிமுத்தம் வா நாமரூபம் நத்தி². ஸோ ‘‘இமே பஞ்சக்க²ந்தா⁴ கிம் ஹேதுகா’’தி உபபரிக்க²ந்தோ ‘‘அவிஜ்ஜாதி³ஹேதுகா’’தி பஸ்ஸதி. ததோ ‘‘பச்சயோ சேவ பச்சயுப்பன்னஞ்ச இத³ம், அஞ்ஞோ ஸத்தோ வா புக்³க³லோ வா நத்தி², ஸுத்³த⁴ஸங்கா²ரபுஞ்ஜமத்தமேவா’’தி ஸப்பச்சயனாமரூபவஸேன திலக்க²ணம் ஆரோபேத்வா விபஸ்ஸனாபடிபாடியா ‘‘அனிச்சம் து³க்க²ம் அனத்தா’’தி ஸம்மஸந்தோ விசரதி, ஸோ அஜ்ஜ அஜ்ஜாதி படிவேத⁴ம் ஆகங்க²மானோ ததா²ரூபே தி³வஸே உதுஸப்பாயம், புக்³க³லஸப்பாயம், போ⁴ஜனஸப்பாயம், த⁴ம்மஸவனஸப்பாயம் வா லபி⁴த்வா ஏகபல்லங்கேன நிஸின்னோவ விபஸ்ஸனம் மத்த²கம் பாபேத்வா அரஹத்தே பதிட்டா²தி. ஏவமிமேஸம்பி திண்ணம் ஜனானம் யாவ அரஹத்தா கம்மட்டா²னம் கதி²தம் ஹோதி.

இத⁴ பன ப⁴க³வா அரூபகம்மட்டா²னம் கதே²ந்தோ வேத³னாஸீஸேன கதே²ஸி. ப²ஸ்ஸவஸேன ஹி விஞ்ஞாணவஸேன வா கதி²யமானம் ஏதஸ்ஸ ந பாகடம் ஹோதி, அந்த⁴காரம் விய கா²யதி. வேத³னாவஸேன பன பாகடம் ஹோதி. கஸ்மா? வேத³னானம் உப்பத்தியா பாகடதாய. ஸுக²து³க்க²வேத³னானஞ்ஹி உப்பத்தி பாகடா. யதா³ ஸுக²ம் உப்பஜ்ஜதி, ததா³ ஸகலம் ஸரீரம் கோ²பே⁴ந்தம் மத்³த³ந்தம் ப²ரமானம் அபி⁴ஸந்த³யமானம் ஸததோ⁴தஸப்பிம் கா²தா³பயந்தம் விய, ஸதபாகதேலம் மக்க²யமானம் விய, க⁴டஸஹஸ்ஸேன பரிளாஹம் நிப்³பா³பயமானம் விய, ‘‘அஹோ ஸுக²ம், அஹோ ஸுக²’’ந்தி வாசம் நிச்சா²ரயமானமேவ உப்பஜ்ஜதி. யதா³ து³க்க²ம் உப்பஜ்ஜதி, ததா³ ஸகலஸரீரம் கோ²பே⁴ந்தம் மத்³த³ந்தம் ப²ரமானம் அபி⁴ஸந்த³யமானம் தத்தபா²லம் பவேஸேந்தம் விய, விலீனதம்ப³லோஹேன ஆஸிஞ்சந்தம் விய, ஸுக்க²திணவனப்பதிம்ஹி அரஞ்ஞே தா³ருஉக்காகலாபம் கி²பமானம் விய ‘‘அஹோ து³க்க²ம், அஹோ து³க்க²’’ந்தி விப்பலாபயமானமேவ உப்பஜ்ஜதி. இதி ஸுக²து³க்க²வேத³னானம் உப்பத்தி பாகடா ஹோதி.

அது³க்க²மஸுகா² பன து³த்³தீ³பனா அந்த⁴காரேன விய அபி⁴பூ⁴தா. ஸா ஸுக²து³க்கா²னம் அபக³மே ஸாதாஸாதபடிக்கே²பவஸேன மஜ்ஜ²த்தாகாரபூ⁴தா அது³க்க²மஸுகா² வேத³னாதி நயதோ க³ண்ஹந்தஸ்ஸ பாகடா ஹோதி. யதா² கிம்? யதா² அந்தரா பிட்டி²பாஸாணம் ஆருஹித்வா பலாதஸ்ஸ மிக³ஸ்ஸ அனுபத³ம் க³ச்ச²ந்தோ மிக³லுத்³த³கோ பிட்டி²பாஸாணஸ்ஸ ஓரபா⁴கே³பி பரபா⁴கே³பி பத³ம் தி³ஸ்வா மஜ்ஜே² அபஸ்ஸந்தோபி ‘‘இதோ ஆருள்ஹோ, இதோ ஓருள்ஹோ, மஜ்ஜே² பிட்டி²பாஸாணே இமினா பதே³ஸேன க³தோ ப⁴விஸ்ஸதீ’’தி நயதோ ஜானாதி. ஏவம் ஆருள்ஹட்டா²னே பத³ம் விய ஹி ஸுக²வேத³னாய உப்பத்தி பாகடா ஹோதி, ஓருள்ஹட்டா²னே பத³ம் விய து³க்க²வேத³னாய உப்பத்தி பாகடா ஹோதி, இதோ ஆருய்ஹ, இதோ ஓருய்ஹ, மஜ்ஜே² ஏவம் க³தோதி நயதோ க³ஹணம் விய ஸுக²து³க்கா²னம் அபக³மே ஸாதாஸாதபடிக்கே²பவஸேன மஜ்ஜ²த்தாகாரபூ⁴தா அது³க்க²மஸுகா² வேத³னாதி நயதோ க³ண்ஹந்தஸ்ஸ பாகடா ஹோதி. ஏவம் ப⁴க³வா பட²மம் ரூபகம்மட்டா²னம் கதே²த்வா பச்சா² அரூபகம்மட்டா²னம் வேத³னாவஸேன நிவத்தேத்வா த³ஸ்ஸேஸி.

ந கேவலஞ்ச இதே⁴வ ஏவம் த³ஸ்ஸேஸி, மஹாஸதிபட்டா²னே, மஜ்ஜி²மனிகாயம்ஹி ஸதிபட்டா²னே, சூளதண்ஹாஸங்க²யே, மஹாதண்ஹாஸங்க²யே, சூளவேத³ல்லஸுத்தே, மஹாவேத³ல்லஸுத்தே, ரட்ட²பாலஸுத்தே, மாக³ண்டி³யஸுத்தே, தா⁴துவிப⁴ங்கே³, ஆனேஞ்ஜஸப்பாயே, ஸகலே வேத³னாஸம்யுத்தேதி ஏவம் அனேகேஸு ஸுத்தந்தேஸு பட²மம் ரூபகம்மட்டா²னம் கதே²த்வா பச்சா² அரூபகம்மட்டா²னம் வேத³னாவஸேன நிவத்தேத்வா த³ஸ்ஸேஸி. யதா² ச தேஸு தேஸு, ஏவம் இமஸ்மிம்பி ஸக்கபஞ்ஹே பட²மம் ரூபகம்மட்டா²னம் கதே²த்வா பச்சா² அரூபகம்மட்டா²னம் வேத³னாவஸேன நிவத்தேத்வா த³ஸ்ஸேஸி. ரூபகம்மட்டா²னம் பனேத்த² வேத³னாய ஆரம்மணமத்தகம்யேவ ஸங்கி²த்தம், தஸ்மா பாளியம் நாருள்ஹம் ப⁴விஸ்ஸதி.

360. அரூபகம்மட்டா²னே யம் தஸ்ஸ பாகடம் வேத³னாவஸேன அபி⁴னிவேஸமுக²ம், தமேவ த³ஸ்ஸேதும் ஸோமனஸ்ஸம்பாஹம், தே³வானமிந்தா³திஆதி³மாஹ. தத்த² து³விதே⁴னாதி த்³விவிதே⁴ன, த்³வீஹி கோட்டா²ஸேஹீதி அத்தோ². ஏவரூபம் ஸோமனஸ்ஸம் ந ஸேவிதப்³ப³ந்தி ஏவரூபம் கே³ஹஸிதஸோமனஸ்ஸம் ந ஸேவிதப்³ப³ம். கே³ஹஸிதஸோமனஸ்ஸம் நாம ‘‘தத்த² கதமானி ச² கே³ஹஸிதானி ஸோமனஸ்ஸானி? சக்கு²விஞ்ஞேய்யானம் ரூபானம் இட்டா²னம் கந்தானம் மனாபானம் மனோரமானம் லோகாமிஸபடிஸம்யுத்தானம் படிலாப⁴ம் வா படிலாப⁴தோ ஸமனுபஸ்ஸதோ, புப்³பே³ வா படிலத்³த⁴புப்³ப³ம் அதீதம் நிருத்³த⁴ம் விபரிணதம் ஸமனுஸ்ஸரதோ உப்பஜ்ஜதி ஸோமனஸ்ஸம், யம் ஏவரூபம் ஸோமனஸ்ஸம், இத³ம் வுச்சதி கே³ஹஸிதம் ஸோமனஸ்ஸ’’ந்தி ஏவம் ச²ஸு த்³வாரேஸு வுத்தகாமகு³ணனிஸ்ஸிதம் ஸோமனஸ்ஸம் (ம. நி. 3.306).

ஏவரூபம் ஸோமனஸ்ஸம் ஸேவிதப்³ப³ந்தி ஏவரூபம் நேக்க²ம்மஸிதம் ஸோமனஸ்ஸம் ஸேவிதப்³ப³ம். நேக்க²ம்மஸிதம் ஸோமனஸ்ஸம் நாம – ‘‘தத்த² கதமானி ச² நேக்க²ம்மஸிதானி ஸோமனஸ்ஸானி? ரூபானம் த்வேவ அனிச்சதம் விதி³த்வா விபரிணாமவிராக³னிரோத⁴ம் புப்³பே³ சேவ ரூபா ஏதரஹி ச ஸப்³பே³ தே ரூபா அனிச்சா, து³க்கா², விபரிணாமத⁴ம்மாதி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதோ உப்பஜ்ஜதி ஸோமனஸ்ஸம், யம் ஏவரூபம் ஸோமனஸ்ஸம், இத³ம் வுச்சதி நேக்க²ம்மஸிதம் ஸோமனஸ்ஸ’’ந்தி (ம. நி. 3.308) ஏவம் ச²ஸு த்³வாரேஸு இட்டா²ரம்மணே ஆபாத²க³தே அனிச்சாதி³வஸேன விபஸ்ஸனம் பட்ட²பேத்வா உஸ்ஸுக்காபேதும் ஸக்கோந்தஸ்ஸ ‘‘உஸ்ஸுக்கிதா மே விபஸ்ஸனா’’தி ஸோமனஸ்ஸஜாதஸ்ஸ உப்பன்னம் ஸோமனஸ்ஸம். ஸேவிதப்³ப³ந்தி இத³ம் நேக்க²ம்மவஸேன, விபஸ்ஸனாவஸேன, அனுஸ்ஸதிவஸேன, பட²மஜ்ஜா²னாதி³வஸேன ச உப்பஜ்ஜனகஸோமனஸ்ஸம் ஸேவிதப்³ப³ம் நாம.

தத்த² யம் சே ஸவிதக்கம் ஸவிசாரந்தி தஸ்மிம்பி நேக்க²ம்மஸிதே ஸோமனஸ்ஸே யம் நேக்க²ம்மவஸேன, விபஸ்ஸனாவஸேன, அனுஸ்ஸதிவஸேன, பட²மஜ்ஜா²னவஸேன ச உப்பன்னம் ஸவிதக்கம் ஸவிசாரம் ஸோமனஸ்ஸந்தி ஜானேய்ய. யம் சே அவிதக்கம் அவிசாரந்தி யம் பன து³தியததியஜ்ஜா²னவஸேன உப்பன்னம் அவிதக்கம் அவிசாரம் ஸோமனஸ்ஸந்தி ஜானேய்ய. யே அவிதக்கே அவிசாரே, தே பணீததரேதி ஏதேஸுபி த்³வீஸு யம் அவிதக்கம் அவிசாரம், தம் பணீததரந்தி அத்தோ².

இமினா கிம் கதி²தம் ஹோதி? த்³வின்னம் அரஹத்தம் கதி²தம். கத²ம்? ஏகோ கிர பி⁴க்கு² ஸவிதக்கஸவிசாரே ஸோமனஸ்ஸே விபஸ்ஸனம் பட்ட²பேத்வா ‘‘இத³ம் ஸோமனஸ்ஸம் கிம் நிஸ்ஸித’’ந்தி உபதா⁴ரேந்தோ ‘‘வத்து²னிஸ்ஸித’’ந்தி பஜானாதீதி ப²ஸ்ஸபஞ்சமகே வுத்தனயேனேவ அனுக்கமேன அரஹத்தே பதிட்டா²தி. ஏகோ அவிதக்கஅவிசாரே ஸோமனஸ்ஸே விபஸ்ஸனம் பட்ட²பேத்வா வுத்தனயேனேவ அரஹத்தே பதிட்டா²தி. தத்த² அபி⁴னிவிட்ட²ஸோமனஸ்ஸேஸுபி ஸவிதக்கஸவிசாரதோ அவிதக்கஅவிசாரம் பணீததரம். ஸவிதக்கஸவிசாரஸோமனஸ்ஸவிபஸ்ஸனாதோபி அவிதக்கஅவிசாரவிபஸ்ஸனா பணீததரா. ஸவிதக்கஸவிசாரஸோமனஸ்ஸப²லஸமாபத்திதோபி அவிதக்கஅவிசாரஸோமனஸ்ஸப²லஸமாபத்தியேவ பணீததரா. தேனாஹ ப⁴க³வா ‘‘யே அவிதக்கே அவிசாரே, தே பணீததரே’’தி.

361. ஏவரூபம் தோ³மனஸ்ஸம் ந ஸேவிதப்³ப³ந்தி ஏவரூபம் கே³ஹஸிததோ³மனஸ்ஸம் ந ஸேவிதப்³ப³ம். கே³ஹஸிததோ³மனஸ்ஸம் நாம – ‘‘தத்த² கதமானி ச² கே³ஹஸிதானி தோ³மனஸ்ஸானி? சக்கு²விஞ்ஞேய்யானம் ரூபானம் இட்டா²னம் கந்தானம் மனாபானம் மனோரமானம் லோகாமிஸபடிஸம்யுத்தானம் அப்படிலாப⁴ம் வா அப்படிலாப⁴தோ ஸமனுபஸ்ஸதோ புப்³பே³ வா அபடிலத்³த⁴புப்³ப³ம் அதீதம் நிருத்³த⁴ம் விபரிணதம் ஸமனுஸ்ஸரதோ உப்பஜ்ஜதி தோ³மனஸ்ஸம், யம் ஏவரூபம் தோ³மனஸ்ஸம், இத³ம் வுச்சதி கே³ஹஸிததோ³மனஸ்ஸ’’ந்தி (ம. நி. 3.307). ஏவம் ச²ஸு த்³வாரேஸு இட்டா²ரம்மணம் நானுப⁴விம், நானுப⁴விஸ்ஸாமி, நானுப⁴வாமீதி விதக்கயதோ உப்பன்னம் காமகு³ணனிஸ்ஸிதம் தோ³மனஸ்ஸம்.

ஏவரூபம் தோ³மனஸ்ஸம் ஸேவிதப்³ப³ந்தி ஏவரூபம் நேக்க²ம்மஸிததோ³மனஸ்ஸம் ஸேவிதப்³ப³ம். நேக்க²ம்மஸிததோ³மனஸ்ஸம் நாம – ‘‘தத்த² கதமானி ச² நேக்க²ம்மஸிதானி தோ³மனஸ்ஸானி? ரூபானம் த்வேவ அனிச்சதம் விதி³த்வா விபரிணாமவிராக³னிரோத⁴ம் புப்³பே³ சேவ ரூபா ஏதரஹி ச ஸப்³பே³ தே ரூபா அனிச்சா, து³க்கா², விபரிணாமத⁴ம்மாதி ஏவமேதம் யதா²பூ⁴தம் ஸம்பப்பஞ்ஞாய தி³ஸ்வா அனுத்தரேஸு விமோக்கே²ஸு பிஹம் உபட்டா²பேதி ‘குதா³ஸ்ஸு நாமாஹம் ததா³யதனம், உபஸம்பஜ்ஜ விஹரிஸ்ஸாமி, யத³ரியா ஏதரஹி ஆயதனம் உபஸம்பஜ்ஜ விஹரந்தீ’தி. இதி அனுத்தரேஸு விமோக்கே²ஸு பிஹம் உபட்டா²பயதோ உப்பஜ்ஜதி பிஹபச்சயா தோ³மனஸ்ஸம், யம் ஏவரூபம் தோ³மனஸ்ஸம், இத³ம் வுச்சதி நேக்க²ம்மஸிததோ³மனஸ்ஸ’’ந்தி (ம. நி. 3.307) ஏவம் ச²ஸு த்³வாரேஸு இட்டா²ரம்மணே ஆபாத²க³தே அனுத்தரவிமோக்க²ஸங்கா²தஅரியப²லத⁴ம்மேஸு பிஹம் உபட்ட²பேத்வா தத³தி⁴க³மாய அனிச்சாதி³வஸேன விபஸ்ஸனம் பட்ட²பேத்வா உஸ்ஸுக்காபேதுமஸக்கோந்தஸ்ஸ இமம்பி பக்க²ம், இமம்பி மாஸம், இமம்பி ஸம்வச்ச²ரம் விபஸ்ஸனம் உஸ்ஸுக்காபேத்வா அரியபூ⁴மிம் பாபுணிதும் நாஸக்கி²ந்தி அனுஸோசதோ உப்பன்னம் தோ³மனஸ்ஸம். ஸேவிதப்³ப³ந்தி இத³ம் நேக்க²ம்மவஸேன, விபஸ்ஸனாவஸேன, அனுஸ்ஸதிவஸேன, பட²மஜ்ஜா²னாதி³வஸேன ச உப்பஜ்ஜனகதோ³மனஸ்ஸம் ஸேவிதப்³ப³ம் நாம.

தத்த² யம் சே ஸவிதக்கஸவிசாரந்தி தஸ்மிம்பி து³விதே⁴ தோ³மனஸ்ஸே கே³ஹஸிததோ³மனஸ்ஸமேவ ஸவிதக்கஸவிசாரதோ³மனஸ்ஸம் நாம. நேக்க²ம்மவஸேன, விபஸ்ஸனாவஸேன, அனுஸ்ஸதிவஸேன, பட²மது³தியஜ்ஜா²னவஸேன ச உப்பன்னதோ³மனஸ்ஸம் பன அவிதக்கஅவிசாரதோ³மனஸ்ஸந்தி வேதி³தப்³ப³ம். நிப்பரியாயேன பன அவிதக்கஅவிசாரதோ³மனஸ்ஸம் நாம நத்தி². தோ³மனஸ்ஸிந்த்³ரியஞ்ஹி ஏகம்ஸேன அகுஸலஞ்சேவ ஸவிதக்கஸவிசாரஞ்ச, ஏதஸ்ஸ பன பி⁴க்கு²னோ மஞ்ஞனவஸேன ஸவிதக்கஸவிசாரந்தி ச அவிதக்கஅவிசாரந்தி ச வுத்தம்.

தத்ராயம் நயோ – இத⁴ பி⁴க்கு² தோ³மனஸ்ஸபச்சயபூ⁴தே ஸவிதக்கஸவிசாரத⁴ம்மே அவிதக்கஅவிசாரத⁴ம்மே ச தோ³மனஸ்ஸபச்சயா ஏவ உப்பன்னே மக்³க³ப²லத⁴ம்மே ச அஞ்ஞேஸம் படிபத்தித³ஸ்ஸனவஸேன தோ³மனஸ்ஸந்தி க³ஹேத்வா ‘‘கதா³ நு கோ² மே ஸவிதக்கஸவிசாரதோ³மனஸ்ஸே விபஸ்ஸனா பட்ட²பிதா ப⁴விஸ்ஸதி, கதா³ அவிதக்கஅவிசாரதோ³மனஸ்ஸே’’தி ச ‘‘கதா³ நு கோ² மே ஸவிதக்கஸவிசாரதோ³மனஸ்ஸப²லஸமாபத்தி நிப்³ப³த்திதா ப⁴விஸ்ஸதி, கதா³ அவிதக்கஅவிசாரதோ³மனஸ்ஸப²லஸமாபத்தீ’’தி சிந்தேத்வா தேமாஸிகம், ச²மாஸிகம், நவமாஸிகம் வா படிபத³ம் க³ண்ஹாதி. தேமாஸிகம் க³ஹேத்வா பட²மமாஸே ஏகம் யாமம் ஜக்³க³தி, த்³வே யாமே நித்³தா³ய ஓகாஸம் கரோதி, மஜ்ஜி²மே மாஸே த்³வே யாமே ஜக்³க³தி, ஏகம் யாமம் நித்³தா³ய ஓகாஸம் கரோதி, பச்சி²மமாஸே சங்கமனிஸஜ்ஜாயேவ யாபேதி. ஏவம் சே அரஹத்தம் பாபுணாதி, இச்சேதம் குஸலம். நோ சே பாபுணாதி, விஸேஸேத்வா ச²மாஸிகம் க³ண்ஹாதி. தத்ராபி த்³வே த்³வே மாஸே வுத்தனயேன படிபஜ்ஜித்வா அரஹத்தம் பாபுணிதும் அஸக்கோந்தோ விஸேஸேத்வா நவமாஸிகம் க³ண்ஹாதி. தத்ராபி தயோ தயோ மாஸே ததே²வ படிபஜ்ஜித்வா அரஹத்தம் பாபுணிதும் அஸக்கோந்தஸ்ஸ ‘‘ந லத்³வம் வத மே ஸப்³ரஹ்மசாரீஹி ஸத்³தி⁴ம் விஸுத்³தி⁴பவாரணம் பவாரேது’’ந்தி ஆவஜ்ஜதோ தோ³மனஸ்ஸம் உப்பஜ்ஜதி, அஸ்ஸுதா⁴ரா பவத்தந்தி கா³மந்தபப்³பா⁴ரவாஸீமஹாஸீவத்தே²ரஸ்ஸ விய.

மஹாஸீவத்தே²ரவத்து²

தே²ரோ கிர அட்டா²ரஸ மஹாக³ணே வாசேஸி. தஸ்ஸோவாதே³ ட²த்வா திம்ஸஸஹஸ்ஸா பி⁴க்கூ² அரஹத்தம் பாபுணிம்ஸு. அதே²கோ பி⁴க்கு² ‘‘மய்ஹம் தாவ அப்³ப⁴ந்தரே கு³ணா அப்பமாணா, கீதி³ஸா நு கோ² மே ஆசரியஸ்ஸ கு³ணா’’தி ஆவஜ்ஜந்தோ புது²ஜ்ஜனபா⁴வம் பஸ்ஸித்வா ‘‘அம்ஹாகம் ஆசரியோ அஞ்ஞேஸம் அவஸ்ஸயோ ஹோதி, அத்தனோ ப⁴விதும் ந ஸக்கோதி, ஓவாத³மஸ்ஸ த³ஸ்ஸாமீ’’தி ஆகாஸேன க³ந்த்வா விஹாரஸமீபே ஓதரித்வா தி³வாட்டா²னே நிஸின்னம் ஆசரியம் உபஸங்கமித்வா வத்தம் த³ஸ்ஸேத்வா ஏகமந்தம் நிஸீதி³.

தே²ரோ – ‘‘கிம் காரணா ஆக³தோஸி பிண்ட³பாதிகா’’தி ஆஹ. ஏகம் அனுமோத³னம் க³ண்ஹிஸ்ஸாமீதி ஆக³தோஸ்மி, ப⁴ந்தேதி. ஓகாஸோ ந ப⁴விஸ்ஸதி, ஆவுஸோதி? விதக்கமாளகே டி²தகாலே புச்சி²ஸ்ஸாமி, ப⁴ந்தேதி. தஸ்மிம் டா²னே அஞ்ஞே புச்ச²ந்தீதி. பி⁴க்கா²சாரமக்³கே³, ப⁴ந்தேதி. தத்ராபி அஞ்ஞே புச்ச²ந்தீதி. து³பட்டனிவாஸனட்டா²னே, ஸங்கா⁴டிபாருபனட்டா²னே, பத்தனீஹரணட்டா²னே, கா³மே சரித்வா ஆஸனஸாலாயம் யாகு³பீதகாலே, ப⁴ந்தேதி. தத்த² அட்ட²கதா²தே²ரா அத்தனோ கங்க²ம் வினோதே³ந்தி, ஆவுஸோதி. அந்தோகா³மதோ நிக்க²ந்தகாலே புச்சி²ஸ்ஸாமி, ப⁴ந்தேதி. தத்ராபி அஞ்ஞே புச்ச²ந்தி, ஆவுஸோதி. அந்தராமக்³கே³, ப⁴ந்தே, போ⁴ஜனஸாலாயம் ப⁴த்தகிச்சபரியோஸானே, ப⁴ந்தே, தி³வாட்டா²னே, பாத³தோ⁴வனகாலே, முக²தோ⁴வனகாலே, ப⁴ந்தேதி? ததா³ அஞ்ஞே புச்ச²ந்தீதி. ததோ பட்டா²ய யாவ அருணா அபரே புச்ச²ந்தி, ஆவுஸோதி. த³ந்தகட்ட²ம் க³ஹேத்வா முக²தோ⁴வனத்த²ம் க³மனகாலே, ப⁴ந்தேதி? ததா³ அஞ்ஞே புச்ச²ந்தீதி. முக²ம் தோ⁴வித்வா ஆக³மனகாலே, ப⁴ந்தேதி? தத்ராபி அஞ்ஞே புச்ச²ந்தீதி. ஸேனாஸனம் பவிஸித்வா நிஸின்னகாலே, ப⁴ந்தேதி? தத்ராபி அஞ்ஞே புச்ச²ந்தீதி. ப⁴ந்தே, நனு முக²ம் தோ⁴வித்வா ஸேனாஸனம் பவிஸித்வா தயோ சத்தாரோ பல்லங்கே உஸுமம் கா³ஹாபேத்வா யோனிஸோமனஸிகாரே கம்மம் கரோந்தானம் ஓகாஸகாலேன ப⁴விதப்³ப³ம் ஸியா, மரணக²ணம்பி ந லபி⁴ஸ்ஸத², ப⁴ந்தே, ப²லகஸதி³ஸத்த² ப⁴ந்தே பரஸ்ஸ அவஸ்ஸயோ ஹோத², அத்தனோ ப⁴விதும் ந ஸக்கோத², ந மே தும்ஹாகம் அனுமோத³னாய அத்தோ²தி ஆகாஸே உப்பதித்வா அக³மாஸி.

தே²ரோ – ‘‘இமஸ்ஸ பி⁴க்கு²னோ பரியத்தியா கம்மம் நத்தி², மய்ஹம் பன அங்குஸகோ ப⁴விஸ்ஸாமீதி ஆக³தோ’’தி ஞத்வா ‘‘இதா³னி ஓகாஸோ ந ப⁴விஸ்ஸதி, பச்சூஸகாலே க³மிஸ்ஸாமீ’’தி பத்தசீவரம் ஸமீபே கத்வா ஸப்³ப³ம் தி³வஸபா⁴க³ம் பட²மயாமமஜ்ஜி²மயாமஞ்ச த⁴ம்மம் வாசேத்வா பச்சி²மயாமே ஏகஸ்மிம் தே²ரே உத்³தே³ஸம் க³ஹேத்வா நிக்க²ந்தே பத்தசீவரம் க³ஹேத்வா தேனேவ ஸத்³தி⁴ம் நிக்க²ந்தோ. நிஸின்னஅந்தேவாஸிகா ஆசரியோ கேனசி பபஞ்சேன நிக்க²ந்தோதி மஞ்ஞிம்ஸு. நிக்க²ந்தோ தே²ரோ கோசி தே³வ ஸமானாசரியபி⁴க்கூ²தி ஸஞ்ஞம் அகாஸி.

தே²ரோ கிர ‘‘மாதி³ஸஸ்ஸ அரஹத்தம் நாம கிம், த்³வீஹதீஹேனேவ பாபுணித்வா பச்சாக³மிஸ்ஸாமீ’’தி அந்தேவாஸிகானம் அனாரோசேத்வாவ ஆஸாள்ஹீமாஸஸ்ஸ ஜுண்ஹபக்க²தேரஸியா நிக்க²ந்தோ கா³மந்தபப்³பா⁴ரம் க³ந்த்வா சங்கமம் ஆருய்ஹ கம்மட்டா²னம் மனஸிகரோந்தோ தம் தி³வஸம் அரஹத்தம் க³ஹேதும் நாஸக்கி². உபோஸத²தி³வஸே ஸம்பத்தே ‘‘த்³வீஹதீஹேன அரஹத்தம் க³ண்ஹிஸ்ஸாமீதி ஆக³தோ, க³ஹேதும் பன நாஸக்கி²ம். தயோ மாஸே பன தீணி தி³வஸானி விய யாவ மஹாபவாரணா தாவ ஜானிஸ்ஸாமீ’’தி வஸ்ஸம் உபக³ந்த்வாபி க³ஹேதும் நாஸக்கி². பவாரணாதி³வஸே சிந்தேஸி – ‘‘அஹம் த்³வீஹதீஹேன அரஹத்தம் க³ண்ஹிஸ்ஸாமீதி ஆக³தோ, தேமாஸேனாபி நாஸக்கி²ம், ஸப்³ரஹ்மசாரினோ பன விஸுத்³தி⁴பவாரணம் பவாரேந்தீ’’தி. தஸ்ஸேவம் சிந்தயதோ அஸ்ஸுதா⁴ரா பவத்தந்தி. ததோ ‘‘ந மஞ்சே மய்ஹம் சதூஹி இரியாபதே²ஹி மக்³க³ப²லம் உப்பஜ்ஜிஸ்ஸதி, அரஹத்தம் அப்பத்வா நேவ மஞ்சே பிட்டி²ம் பஸாரேஸ்ஸாமி, ந பாதே³ தோ⁴விஸ்ஸாமீ’’தி மஞ்சம் உஸ்ஸாபேத்வா ட²பேஸி. புன அந்தோவஸ்ஸம் பத்தம், அரஹத்தம் க³ஹேதும் நாஸக்கி²யேவ. ஏகூனதிம்ஸபவாரணாஸு அஸ்ஸுதா⁴ரா பவத்தந்தி. கா³மதா³ரகா தே²ரஸ்ஸ பாதே³ஸு பா²லிதட்டா²னானி கண்டகேஹி ஸிப்³ப³ந்தி, த³வம் கரோந்தாபி ‘‘அய்யஸ்ஸ மஹாஸீவத்தே²ரஸ்ஸ விய பாதா³ ஹோந்தூ’’தி த³வம் கரோந்தி.

தே²ரோ திம்ஸஸம்வச்ச²ரே மஹாபவாரணாதி³வஸே ஆலம்ப³ணப²லகம் நிஸ்ஸாய டி²தோ ‘‘இதா³னி மே திம்ஸ வஸ்ஸானி ஸமணத⁴ம்மம் கரோந்தஸ்ஸ, நாஸக்கி²ம் அரஹத்தம் பாபுணிதும், அத்³தா⁴ மே இமஸ்மிம் அத்தபா⁴வே மக்³கோ³ வா ப²லம் வா நத்தி², ந மே லத்³த⁴ம் ஸப்³ரஹ்மசாரீஹி ஸத்³தி⁴ம் விஸுத்³தி⁴பவாரணம் பவாரேது’’ந்தி சிந்தேஸி. தஸ்ஸேவம் சிந்தயதோவ தோ³மனஸ்ஸம் உப்பஜ்ஜி, அஸ்ஸுதா⁴ரா பவத்தந்தி. அத² அவிதூ³ரட்டா²னே ஏகா தே³வதீ⁴தா ரோத³மானா அட்டா²ஸி. ‘‘கோ ஏத்த² ரோத³ஸீ’’தி? ‘‘அஹம், ப⁴ந்தே, தே³வதீ⁴தா’’தி. ‘‘கஸ்மா ரோத³ஸீ’’தி? ‘‘ரோத³மானேன மக்³க³ப²லம் நிப்³ப³த்திதம், தேன அஹம்பி ஏகம் த்³வே மக்³க³ப²லானி நிப்³ப³த்தேஸ்ஸாமீதி ரோதா³மி, ப⁴ந்தே’’தி.

ததோ தே²ரோ – ‘‘போ⁴ மஹாஸீவத்தே²ர, தே³வதாபி தயா ஸத்³தி⁴ம் கேளிம் கரோந்தி, அனுச்ச²விகம் நு கோ² தே ஏத’’ந்தி விபஸ்ஸனம் வட்³டே⁴த்வா ஸஹ படிஸம்பி⁴தா³ஹி அரஹத்தம் அக்³க³ஹேஸி. ஸோ ‘‘இதா³னி நிபஜ்ஜிஸ்ஸாமீ’’தி ஸேனாஸனம் படிஜக்³கி³த்வா மஞ்சகம் பஞ்ஞபேத்வா உத³கட்டா²னே உத³கம் பச்சுபட்ட²பேத்வா ‘‘பாதே³ தோ⁴விஸ்ஸாமீ’’தி ஸோபானப²லகே நிஸீதி³.

அந்தேவாஸிகாபிஸ்ஸ ‘‘அம்ஹாகம் ஆசரியஸ்ஸ ஸமணத⁴ம்மம் காதும் க³ச்ச²ந்தஸ்ஸ திம்ஸ வஸ்ஸானி, ஸக்கி² நு கோ² விஸேஸம் நிப்³ப³த்தேதும், நாஸக்கீ²’’தி ஆவஜ்ஜயமானா ‘‘அரஹத்தம் பத்வா பாத³தோ⁴வனத்த²ம் நிஸின்னோ’’தி தி³ஸ்வா ‘‘அம்ஹாகம் ஆசரியோ அம்ஹாதி³ஸேஸு அந்தேவாஸிகேஸு திட்ட²ந்தேஸு ‘அத்தனாவ பாதே³ தோ⁴விஸ்ஸதீ’தி அட்டா²னமேதம், அஹம் தோ⁴விஸ்ஸாமி அஹம் தோ⁴விஸ்ஸாமீ’’தி திம்ஸஸஹஸ்ஸானிபி ஆகாஸேன க³ந்த்வா வந்தி³த்வா ‘‘பாதே³ தோ⁴விஸ்ஸாம, ப⁴ந்தே’’தி ஆஹம்ஸு. ஆவுஸோ, இதா³னி திம்ஸ வஸ்ஸானி ஹோந்தி மம பாதா³னம் அதோ⁴தானம், திட்ட²த², தும்ஹே, அஹமேவ தோ⁴விஸ்ஸாமீதி.

ஸக்கோபி ஆவஜ்ஜந்தோ – ‘‘மய்ஹம் அய்யோ மஹாஸீவத்தே²ரோ அரஹத்தம் பத்தோ திம்ஸஸஹஸ்ஸானம் அந்தேவாஸிகானம் ‘பாதே³ தோ⁴விஸ்ஸாமா’தி ஆக³தானம் பாதே³ தோ⁴விதும் ந தே³தி. மாதி³ஸே பன உபட்டா²கே திட்ட²ந்தே ‘மய்ஹம் அய்யோ ஸயம் பாதே³ தோ⁴விஸ்ஸதீ’தி அட்டா²னமேதம், அஹம் தோ⁴விஸ்ஸாமீ’’தி ஸன்னிட்டா²னம் கத்வா ஸுஜாதாய தே³வியா ஸத்³தி⁴ம் பி⁴க்கு²ஸங்க⁴ஸ்ஸ ஸந்திகே பாதுரஹோஸி. ஸோ ஸுஜம் அஸுரகஞ்ஞம் புரதோ கத்வா ‘‘அபேத², ப⁴ந்தே, மாதுகா³மோ’’தி ஓகாஸம் காரேத்வா தே²ரம் உபஸங்கமித்வா வந்தி³த்வா புரதோ உக்குடிகோ நிஸீதி³த்வா ‘‘பாதே³ தோ⁴விஸ்ஸாமி, ப⁴ந்தே’’தி ஆஹ. கோஸிய, இதா³னி மே திம்ஸ வஸ்ஸானி பாதா³னம் அதோ⁴தானம், தே³வதானஞ்ச பகதியாபி மனுஸ்ஸஸரீரக³ந்தோ⁴ நாம ஜேகு³ச்சோ², யோஜனஸதே டி²தானம்பி கண்டே² ஆஸத்தகுணபம் விய ஹோதி, அஹமேவ தோ⁴விஸ்ஸாமீதி. ப⁴ந்தே, அயம் க³ந்தோ⁴ நாம ந பஞ்ஞாயதி, தும்ஹாகம் பன ஸீலக³ந்தோ⁴ ச² தே³வலோகே அதிக்கமித்வா உபரி ப⁴வக்³க³ம் பத்வா டி²தோ. ஸீலக³ந்த⁴தோ அஞ்ஞோ உத்தரிதரோ க³ந்தோ⁴ நாம நத்தி², ப⁴ந்தே, தும்ஹாகம் ஸீலக³ந்தே⁴னம்ஹி ஆக³தோதி வாமஹத்தே²ன கோ³ப்ப²கஸந்தி⁴யம் க³ஹேத்வா த³க்கி²ணஹத்தே²ன பாத³தலம் பரிமஜ்ஜி. த³ஹரகுமாரஸ்ஸேவ பாதா³ அஹேஸும். ஸக்கோ பாதே³ தோ⁴வித்வா வந்தி³த்வா தே³வலோகமேவ க³தோ.

ஏவம் ‘‘ந லபா⁴மி ஸப்³ரஹ்மசாரீஹி ஸத்³தி⁴ம் விஸுத்³தி⁴பவாரணம் பவாரேது’’ந்தி ஆவஜ்ஜந்தஸ்ஸ உப்பன்னம் தோ³மனஸ்ஸம் நிஸ்ஸாய பி⁴க்கு²னோ மஞ்ஞனவஸேன விபஸ்ஸனாய ஆரம்மணம்பி விபஸ்ஸனாபி மக்³கோ³பி ப²லம்பி ஸவிதக்கஸவிசாரதோ³மனஸ்ஸந்தி ச அவிதக்காவிசாரதோ³மனஸ்ஸந்தி ச வுத்தந்தி வேதி³தப்³ப³ம்.

தத்த² ஏகோ பி⁴க்கு² ஸவிதக்கஸவிசாரதோ³மனஸ்ஸே விபஸ்ஸனம் பட்ட²பேத்வா இத³ம் தோ³மனஸ்ஸம் கிம் நிஸ்ஸிதந்தி உபதா⁴ரேந்தோ வத்து²னிஸ்ஸிதந்தி பஜானாதீதி ப²ஸ்ஸபஞ்சமகே வுத்தனயேனேவ அனுக்கமேன அரஹத்தே பதிட்டா²தி. ஏகோ அவிதக்காவிசாரே தோ³மனஸ்ஸே விபஸ்ஸனம் பட்ட²பேத்வா வுத்தனயேனேவ அரஹத்தே பதிட்டா²தி. தத்த² அபி⁴னிவிட்ட²தோ³மனஸ்ஸேஸுபி ஸவிதக்கஸவிசாரதோ அவிதக்கஅவிசாரம் பணீததரம். ஸவிதக்கஸவிசாரதோ³மனஸ்ஸவிபஸ்ஸனாதோபி அவிதக்காவிசாரதோ³மனஸ்ஸவிபஸ்ஸனா பணீததரா. ஸவிதக்கஸவிசாரதோ³மனஸ்ஸப²லஸமாபத்திதோபி அவிதக்காவிசாரதோ³மனஸ்ஸப²லஸமாபத்தியேவ பணீததரா. தேனாஹ ப⁴க³வா – ‘‘யே அவிதக்கஅவிசாரே தே பணீததரே’’தி.

362. ஏவரூபா உபேக்கா² ந ஸேவிதப்³பா³தி ஏவரூபா கே³ஹஸிதஉபேக்கா² ந ஸேவிதப்³பா³. கே³ஹஸிதஉபேக்கா² நாம ‘‘தத்த² கதமா ச² கே³ஹஸிதஉபேக்கா². சக்கு²னா ரூபம் தி³ஸ்வா உப்பஜ்ஜதி உபேக்கா² பா³லஸ்ஸ மூள்ஹஸ்ஸ புது²ஜ்ஜனஸ்ஸ அனோதி⁴ஜினஸ்ஸ அவிபாகஜினஸ்ஸ அனாதீ³னவத³ஸ்ஸாவினோ அஸ்ஸுதவதோ புது²ஜ்ஜனஸ்ஸ, யா ஏவரூபா உபேக்கா², ரூபம் ஸா நாதிவத்ததி, தஸ்மா ஸா உபேக்கா² கே³ஹஸிதாதி வுச்சதீ’’தி ஏவம் ச²ஸு த்³வாரேஸு இட்டா²ரம்மணே ஆபாத²க³தே கு³ளபிண்டி³கே நிலீனமக்கி²கா விய ரூபாதீ³னி அனதிவத்தமானா தத்தே²வ லக்³கா³ லக்³கி³தா ஹுத்வா உப்பன்னா காமகு³ணனிஸ்ஸிதா உபேக்கா² ந ஸேவிதப்³பா³.

ஏவரூபா உபேக்கா² ஸேவிதப்³பா³தி ஏவரூபா நேக்க²ம்மஸிதா உபேக்கா² ஸேவிதப்³பா³. நேக்க²ம்மஸிதா உபேக்கா² நாம – ‘‘தத்த² கதமா ச² நேக்க²ம்மஸிதா உபேக்கா²? ரூபானம் த்வேவ அனிச்சதம் விதி³த்வா விபரிணாமவிராக³னிரோத⁴ம் ‘புப்³பே³ சேவ ரூபா ஏதரஹி ச, ஸப்³பே³ தே ரூபா அனிச்சா, து³க்கா², விபரிணாமத⁴ம்மா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதோ உப்பஜ்ஜதி உபேக்கா², யா ஏவரூபா உபேக்கா², ரூபம் ஸா அதிவத்ததி, தஸ்மா ஸா உபேக்கா² நேக்க²ம்மஸிதாதி வுச்சதீ’’தி (ம. நி. 3.308). ஏவம் ச²ஸு த்³வாரேஸு இட்டா²னிட்ட²ஆரம்மணே ஆபாத²க³தே இட்டே² அரஜ்ஜந்தஸ்ஸ, அனிட்டே² அது³ஸ்ஸந்தஸ்ஸ, அஸமபேக்க²னேன அஸம்முய்ஹந்தஸ்ஸ உப்பன்னா விபஸ்ஸனா ஞாணஸம்பயுத்தா உபேக்கா². அபிச வேத³னாஸபா⁴கா³ தத்ர மஜ்ஜ²த்துபேக்கா²பி ஏத்த² உபேக்கா²வ. தஸ்மா ஸேவிதப்³பா³தி அயம் நேக்க²ம்மவஸேன விபஸ்ஸனாவஸேன அனுஸ்ஸதிட்டா²னவஸேன பட²மது³தியததியசதுத்த²ஜ்ஜா²னவஸேன ச உப்பஜ்ஜனகஉபேக்கா² ஸேவிதப்³பா³ நாம.

ஏத்த² யம் சே ஸவிதக்கம் ஸவிசாரந்தி தாயபி நேக்க²ம்மஸிதஉபேக்கா²ய யம் நேக்க²ம்மவஸேன விபஸ்ஸனாவஸேன அனுஸ்ஸதிட்டா²னவஸேன பட²மஜ்ஜா²னவஸேன ச உப்பன்னம் ஸவிதக்கஸவிசாரம் உபேக்க²ந்தி ஜானேய்ய. யம் சே அவிதக்கம் அவிசாரந்தி யம் பன து³தியஜ்ஜா²னாதி³வஸேன உப்பன்னம் அவிதக்காவிசாரம் உபேக்க²ந்தி ஜானேய்ய. யே அவிதக்கே அவிசாரே தே பணீததரேதி ஏதாஸு த்³வீஸு யா அவிதக்கஅவிசாரா, ஸா பணீததராதி அத்தோ². இமினா கிம் கதி²தம் ஹோதி? த்³வின்னம் அரஹத்தம் கதி²தம். ஏகோ ஹி பி⁴க்கு² ஸவிதக்கஸவிசாரஉபேக்கா²ய விபஸ்ஸனம் பட்ட²பேத்வா அயம் உபேக்கா² கிம் நிஸ்ஸிதாதி உபதா⁴ரேந்தோ வத்து²னிஸ்ஸிதாதி பஜானாதீதி ப²ஸ்ஸபஞ்சமகே வுத்தனயேனேவ அனுக்கமேன அரஹத்தே பதிட்டா²தி. ஏகோ அவிதக்காவிசாராய உபேக்கா²ய விபஸ்ஸனம் பட்ட²பேத்வா வுத்தனயேனேவ அரஹத்தே பதிட்டா²தி. தத்த² அபி⁴னிவிட்ட²உபேக்கா²ஸுபி ஸவிதக்கஸவிசாரதோ அவிதக்காவிசாரா பணீததரா. ஸவிதக்கஸவிசாரஉபேக்கா²விபஸ்ஸனாதோபி அவிதக்காவிசாரஉபேக்கா²விபஸ்ஸனாபணீததரா. ஸவிதக்கஸவிசாரஉபேக்கா²ப²லஸமாபத்திதோபி அவிதக்காவிசாருபேக்கா²ப²லஸமாபத்தியேவ பணீததரா. தேனாஹ ப⁴க³வா ‘‘யே அவிதக்கே அவிசாரே தே பணீததரே’’தி.

363. ஏவம் படிபன்னோ கோ², தே³வானமிந்த³, பி⁴க்கு² பபஞ்சஸஞ்ஞாஸங்கா²னிரோத⁴ஸாருப்பகா³மினிம் படிபத³ம் படிபன்னோ ஹோதீதி ப⁴க³வா அரஹத்தனிகூடேன தே³ஸனம் நிட்ட²பேஸி. ஸக்கோ பன ஸோதாபத்திப²லம் பத்தோ. பு³த்³தா⁴னஞ்ஹி அஜ்ஜா²ஸயோ ஹீனோ ந ஹோதி, உக்கட்டோ²வ ஹோதி. ஏகஸ்ஸபி ப³ஹூனம்பி த⁴ம்மம் தே³ஸேந்தா அரஹத்தேனேவ கூடம் க³ண்ஹந்தி. ஸத்தா பன அத்தனோ அனுரூபே உபனிஸ்ஸயே டி²தா கேசி ஸோதாபன்னா ஹோந்தி, கேசி ஸகதா³கா³மீ, கேசி அனாகா³மீ, கேசி அரஹந்தோ. ராஜா விய ஹி ப⁴க³வா, ராஜகுமாரா விய வேனேய்யா. யதா² ஹி ராஜா போ⁴ஜனகாலே அத்தனோ பமாணேன பிண்ட³ம் உத்³த⁴ரித்வா ராஜகுமாரானம் உபனேதி, தே ததோ அத்தனோ முக²ப்பமாணேனேவ கப³ளம் கரோந்தி, ஏவம் ப⁴க³வா அத்தஜ்ஜா²ஸயானுரூபாய தே³ஸனாய அரஹத்தேனேவ கூடம் க³ண்ஹாதி. வேனேய்யா அத்தனோ உபனிஸ்ஸயப்பமாணேன ததோ ஸோதாபத்திப²லமத்தம் வா ஸகதா³கா³மிஅனாகா³மிஅரஹத்தப²லமேவ வா க³ண்ஹந்தி. ஸக்கோ பன ஸோதாபன்னோ ஜாதோ. ஸோதாபன்னோ ச ஹுத்வா ப⁴க³வதோ புரதோயேவ சவித்வா தருணஸக்கோ ஹுத்வா நிப்³ப³த்தி, தே³வதானஞ்ஹி சவமானானம் அத்தபா⁴வஸ்ஸ க³தாக³தட்டா²னம் நாம ந பஞ்ஞாயதி, தீ³பஸிகா²க³மனம் விய ஹோதி. தஸ்மா ஸேஸதே³வதா ந ஜானிம்ஸு. ஸக்கோ பன ஸயம் சுதத்தா ப⁴க³வா ச அப்படிஹதஞாணத்தா த்³வேவ ஜனா ஜானிம்ஸு. அத² ஸக்கோ சிந்தேஸி ‘‘மய்ஹஞ்ஹி ப⁴க³வதா தீஸு டா²னேஸு நிப்³ப³த்திதப²லமேவ கதி²தம், அயஞ்ச பன மக்³கோ³ வா ப²லம் வா ஸகுணிகாய விய உப்பதித்வா க³ஹேதும் ந ஸக்கா, ஆக³மனீயபுப்³ப³பா⁴க³படிபதா³ய அஸ்ஸ ப⁴விதப்³ப³ம். ஹந்தா³ஹம் உபரி கீ²ணாஸவஸ்ஸ புப்³ப³பா⁴க³படிபத³ம் புச்சா²மீ’’தி.

பாதிமோக்க²ஸம்வரவண்ணனா

364. ததோ தம் புச்ச²ந்தோ கத²ம் படிபன்னோ பன, மாரிஸாதிஆதி³மாஹ. தத்த² பாதிமோக்க²ஸம்வராயாதி உத்தமஜேட்ட²கஸீலஸம்வராய. காயஸமாசாரம்பீதிஆதி³ ஸேவிதப்³ப³காயஸமாசாராதி³வஸேன பாதிமோக்க²ஸம்வரத³ஸ்ஸனத்த²ம் வுத்தம். ஸீலகதா² ச நாமேஸா கம்மபத²வஸேன வா பண்ணத்திவஸேன வா கதே²தப்³பா³ ஹோதி.

தத்த² கம்மபத²வஸேன கதே²ந்தேன அஸேவிதப்³ப³காயஸமாசாரோ தாவ பாணாதிபாதஅதி³ன்னாதா³னமிச்சா²சாரேஹி கதே²தப்³போ³. பண்ணத்திவஸேன கதே²ந்தேன காயத்³வாரே பஞ்ஞத்தஸிக்கா²பத³வீதிக்கமவஸேன கதே²தப்³போ³. ஸேவிதப்³ப³காயஸமாசாரோ பாணாதிபாதாதி³வேரமணீஹி சேவ காயத்³வாரே பஞ்ஞத்தஸிக்கா²பத³அவீதிக்கமேன ச கதே²தப்³போ³. அஸேவிதப்³ப³வசீஸமாசாரோ முஸாவாதா³தி³வசீது³ச்சரிதேன சேவ வசீத்³வாரே பஞ்ஞத்தஸிக்கா²பத³வீதிக்கமேன ச கதே²தப்³போ³. ஸேவிதப்³ப³வசீஸமாசாரோ முஸாவாதா³தி³வேரமணீஹி சேவ வசீத்³வாரே பஞ்ஞத்தஸிக்கா²பத³அவீதிக்கமேன ச கதே²தப்³போ³.

பரியேஸனா பன காயவாசாஹி பரியேஸனாயேவ. ஸா காயவசீஸமாசாரக³ஹணேன க³ஹிதாபி ஸமானா யஸ்மா ஆஜீவட்ட²மகஸீலம் நாம ஏதஸ்மிஞ்ஞேவ த்³வாரத்³வயே உப்பஜ்ஜதி, ந ஆகாஸே, தஸ்மா ஆஜீவட்ட²மகஸீலத³ஸ்ஸனத்த²ம் விஸும் வுத்தா. தத்த² நஸேவிதப்³ப³பரியேஸனா அனரியபரியேஸனாய கதே²தப்³பா³. ஸேவிதப்³ப³பரியேஸனா அரியபரியேஸனாய. வுத்தஞ்ஹேதம் –

‘‘த்³வேமா, பி⁴க்க²வே, பரியேஸனா அனரியா ச பரியேஸனா, அரியா ச பரியேஸனா. கதமா ச, பி⁴க்க²வே, அனரியா பரியேஸனா? இத⁴, பி⁴க்க²வே, ஏகச்சோ அத்தனா ஜாதித⁴ம்மோ ஸமானோ ஜாதித⁴ம்மம்யேவ பரியேஸதி, அத்தனா ஜராத⁴ம்மோ, ப்³யாதி⁴த⁴ம்மோ, மரணத⁴ம்மோ, ஸோகத⁴ம்மோ, ஸம்கிலேஸத⁴ம்மோ ஸமானோ ஸம்கிலேஸத⁴ம்மம்யேவ பரியேஸதி.

கிஞ்ச, பி⁴க்க²வே, ஜாதித⁴ம்மம் வதே³த²? புத்தப⁴ரியம், பி⁴க்க²வே, ஜாதித⁴ம்மம், தா³ஸிதா³ஸம் ஜாதித⁴ம்மம் அஜேளகம் ஜாதித⁴ம்மம், குக்குடஸூகரம் ஜாதித⁴ம்மம், ஹத்தி²க³வாஸ்ஸவளவம் ஜாதித⁴ம்மம், ஜாதரூபரஜதம் ஜாதித⁴ம்மம். ஜாதித⁴ம்மா ஹேதே, பி⁴க்க²வே, உபத⁴யோ, ஏத்தா²யம் க³தி²தோ முச்சி²தோ அஜ்ஜா²பன்னோ அத்தனா ஜாதித⁴ம்மோ ஸமானோ ஜாதித⁴ம்மம்யேவ பரியேஸதி.

கிஞ்ச, பி⁴க்க²வே, ஜராத⁴ம்மம் வதே³த²? புத்தப⁴ரியம், பி⁴க்க²வே, ஜராத⁴ம்மம்…பே… ஜராத⁴ம்மம்யேவ பரியேஸதி.

கிஞ்ச, பி⁴க்க²வே, ப்³யாதி⁴த⁴ம்மம் வதே³த²? புத்தப⁴ரியம், பி⁴க்க²வே, ப்³யாதி⁴த⁴ம்மம், தா³ஸிதா³ஸம் ப்³யாதி⁴த⁴ம்மம், அஜேளகம், குக்குடஸூகரம், ஹத்தி²க³வாஸ்ஸவளவம் ப்³யாதி⁴த⁴ம்மம். ப்³யாதி⁴த⁴ம்மா ஹேதே, பி⁴க்க²வே, உபத⁴யோ, ஏத்தா²யம் க³தி²தோ முச்சி²தோ அஜ்ஜா²பன்னோ அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மம்யேவ பரியேஸதி.

கிஞ்ச, பி⁴க்க²வே, மரணத⁴ம்மம் வதே³த²? புத்தப⁴ரியம், பி⁴க்க²வே, மரணத⁴ம்மம்…பே… மரணத⁴ம்மம்யேவ பரியேஸதி.

கிஞ்ச, பி⁴க்க²வே, ஸோகத⁴ம்மம் வதே³த²? புத்தப⁴ரியம்…பே… ஸோகத⁴ம்மம்யேவ பரியேஸதி.

கிஞ்ச, பி⁴க்க²வே, ஸம்கிலேஸத⁴ம்மம் வதே³த²…பே… ஜாதரூபரஜதம் ஸம்கிலேஸத⁴ம்மம். ஸம்கிலேஸத⁴ம்மா, ஹேதே, பி⁴க்க²வே, உபத⁴யோ, ஏத்தா²யம் க³தி²தோ முச்சி²தோ அஜ்ஜா²பன்னோ அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மம்யேவ பரியேஸதி. அயம், பி⁴க்க²வே, அனரியா பரியேஸனாதி (ம. நி. 1.274).

அபிச குஹனாதி³வஸேன பஞ்சவிதா⁴, அகோ³சரவஸேன ச²ப்³பி³தா⁴ வேஜ்ஜகம்மாதி³வஸேன ஏகவீஸதிவிதா⁴, ஏவம் பவத்தா ஸப்³பா³பி அனேஸனா அனரியபரியேஸனாயேவாதி வேதி³தப்³பா³.

‘‘கதமா ச, பி⁴க்க²வே, அரியா பரியேஸனா? இத⁴, பி⁴க்க²வே, ஏகச்சோ அத்தனா ஜாதித⁴ம்மோ ஸமானோ ஜாதித⁴ம்மே ஆதீ³னவம் விதி³த்வா அஜாதம் அனுத்தரம் யோக³க்கே²மம் நிப்³பா³னம் பரியேஸதி, அத்தனா ஜராத⁴ம்மோ, ப்³யாதி⁴, மரண, ஸோக, ஸம்கிலேஸத⁴ம்மோ ஸமானோ ஸம்கிலேஸத⁴ம்மே ஆதீ³னவம் விதி³த்வா அஸம்கிலிட்ட²ம் அனுத்தரம் யோக³க்கே²மம் நிப்³பா³னம் பரியேஸதி. அயம் அரியா பரியேஸனாதி (ம. நி. 1.275).

அபிச பஞ்ச குஹனாதீ³னி ச² அகோ³சரே ஏகவீஸதிவித⁴ஞ்ச அனேஸனம் வஜ்ஜேத்வா பி⁴க்கா²சரியாய த⁴ம்மேன ஸமேன பரியேஸனாபி அரியபரியேஸனாயேவாதி வேதி³தப்³பா³.

ஏத்த² ச யோ யோ ‘‘ந ஸேவிதப்³போ³’’தி வுத்தோ, ஸோ ஸோ புப்³ப³பா⁴கே³ பாணாதிபாதாதீ³னம் ஸம்பா⁴ரபரியேஸனாபயோக³கரணக³மனகாலதோ பட்டா²ய ந ஸேவிதப்³போ³வ. இதரோ ஆதி³தோ பட்டா²ய ஸேவிதப்³போ³, அஸக்கோந்தேன சித்தம்பி உப்பாதே³தப்³ப³ம். அபிச ஸங்க⁴பே⁴தா³தீ³னம் அத்தா²ய பரக்கமந்தானம் தே³வத³த்தாதீ³னம் விய காயஸமாசாரோ ந ஸேவிதப்³போ³, தி³வஸஸ்ஸ த்³வத்திக்க²த்தும் திண்ணம் ரதனானம் உபட்டா²னக³மனாதி³வஸேன பவத்தோ த⁴ம்மஸேனாபதிமஹாமோக்³க³ல்லானத்தே²ராதீ³னம் விய காயஸமாசாரோ ஸேவிதப்³போ³. த⁴னுக்³க³ஹபேஸனாதி³வஸேன வாசம் பி⁴ந்த³ந்தானம் தே³வத³த்தாதீ³னம் விய வசீஸமாசாரோ ந ஸேவிதப்³போ³, திண்ணம் ரதனானம் கு³ணகித்தனாதி³வஸேன பவத்தோ த⁴ம்மஸேனாபதிமஹாமோக்³க³ல்லானத்தே²ராதீ³னம் விய வசீஸமாசாரோ ஸேவிதப்³போ³. அனரியபரியேஸனம் பரியேஸந்தானம் தே³வத³த்தாதீ³னம் விய பரியேஸனா ந ஸேவிதப்³பா³, அரியபரியேஸனமேவ பரியேஸந்தானம் த⁴ம்மஸேனாபதிமஹாமோக்³க³ல்லானத்தே²ராதீ³னம் விய பரியேஸனா ஸேவிதப்³பா³.

ஏவம் படிபன்னோ கோ²தி ஏவம் அஸேவிதப்³ப³ம் காயவசீஸமாசாரம் பரியேஸனஞ்ச பஹாய ஸேவிதப்³பா³னம் பாரிபூரியா படிபன்னோ, தே³வானமிந்த³, பி⁴க்கு² பாதிமோக்க²ஸம்வராய உத்தமஜேட்ட²கஸீலஸம்வரத்தா²ய படிபன்னோ நாம ஹோதீதி ப⁴க³வா கீ²ணாஸவஸ்ஸ ஆக³மனீயபுப்³ப³பா⁴க³படிபத³ம் கதே²ஸி.

இந்த்³ரியஸம்வரவண்ணனா

365. து³தியபுச்சா²யம் இந்த்³ரியஸம்வராயாதி இந்த்³ரியானம் பிதா⁴னாய, கு³த்தத்³வாரதாய ஸம்வுதத்³வாரதாயாதி அத்தோ². விஸ்ஸஜ்ஜனே பனஸ்ஸ சக்கு²விஞ்ஞேய்யம் ரூபம்பீதிஆதி³ ஸேவிதப்³ப³ரூபாதி³வஸேன இந்த்³ரியஸம்வரத³ஸ்ஸனத்த²ம் வுத்தம். தத்த² ஏவம் வுத்தேதி ஹேட்டா² ஸோமனஸ்ஸாதி³பஞ்ஹாவிஸ்ஸஜ்ஜனானம் ஸுதத்தா இமினாபி ஏவரூபேன ப⁴விதப்³ப³ந்தி ஸஞ்ஜாதபடிபா⁴னோ ப⁴க³வதா ஏவம் வுத்தே ஸக்கோ தே³வானமிந்தோ³ ப⁴க³வந்தம் ஏதத³வோச, ஏதம் இமஸ்ஸ கோ² அஹம், ப⁴ந்தேதி ஆதி³கம் வசனம் அவோச. ப⁴க³வாபிஸ்ஸ ஓகாஸம் த³த்வா துண்ஹீ அஹோஸி. கதே²துகாமோபி ஹி யோ அத்த²ம் ஸம்பாதே³தும் ந ஸக்கோதி, அத்த²ம் ஸம்பாதே³தும் ஸக்கோந்தோ வா ந கதே²துகாமோ ஹோதி, ந தஸ்ஸ ப⁴க³வா ஓகாஸம் கரோதி. அயம் பன யஸ்மா கதே²துகாமோ சேவ, ஸக்கோதி ச அத்த²ம் ஸம்பாதே³தும் தேனஸ்ஸ ப⁴க³வா ஓகாஸமகாஸி.

தத்த² ஏவரூபம் ந ஸேவிதப்³ப³ந்தி ஆதீ³ஸு அயம் ஸங்கே²போ – யம் ரூபம் பஸ்ஸதோ ராகா³த³யோ உப்பஜ்ஜந்தி, தம் ந ஸேவிதப்³ப³ம் ந த³ட்ட²ப்³ப³ம் ந ஓலோகேதப்³ப³ந்தி அத்தோ². யம் பன பஸ்ஸதோ அஸுப⁴ஸஞ்ஞா வா ஸண்டா²தி, பஸாதோ³ வா உப்பஜ்ஜதி, அனிச்சஸஞ்ஞாபடிலாபோ⁴ வா ஹோதி, தம் ஸேவிதப்³ப³ம்.

யம் சித்தக்க²ரம் சித்தப்³யஞ்ஜனம்பி ஸத்³த³ம் ஸுணதோ ராகா³த³யோ உப்பஜ்ஜந்தி, ஏவரூபோ ஸத்³தோ³ ந ஸேவிதப்³போ³. யம் பன அத்த²னிஸ்ஸிதம் த⁴ம்மனிஸ்ஸிதம் கும்ப⁴தா³ஸிகீ³தம்பி ஸுணந்தஸ்ஸ பஸாதோ³ வா உப்பஜ்ஜதி, நிப்³பி³தா³ வா ஸண்டா²தி, ஏவரூபோ ஸத்³தோ³ ஸேவிதப்³போ³.

யம் க³ந்த⁴ம் கா⁴யதோ ராகா³த³யோ உப்பஜ்ஜந்தி, ஏவரூபோ க³ந்தோ⁴ ந ஸேவிதப்³போ³. யம் பன க³ந்த⁴ம் கா⁴யதோ அஸுப⁴ஸஞ்ஞாதி³படிலாபோ⁴ ஹோதி, ஏவரூபோ க³ந்தோ⁴ ஸேவிதப்³போ³.

யம் ரஸம் ஸாயதோ ராகா³த³யோ உப்பஜ்ஜந்தி, ஏவரூபோ ரஸோ ந ஸேவிதப்³போ³. யம் பன ரஸம் ஸாயதோ ஆஹாரே படிகூலஸஞ்ஞா சேவ உப்பஜ்ஜதி, ஸாயிதபச்சயா ச காயப³லம் நிஸ்ஸாய அரியபூ⁴மிம் ஓக்கமிதும் ஸக்கோதி, மஹாஸீவத்தே²ரபா⁴கி³னேய்யஸீவஸாமணேரஸ்ஸ விய பரிபு⁴ஞ்ஜந்தஸ்ஸேவ கிலேஸக்க²யோ வா ஹோதி, ஏவரூபோ ரஸோ ஸேவிதப்³போ³.