10. பாயாஸிராஜஞ்ஞஸுத்தவண்ணனா

406. ஏவம் மே ஸுதந்தி பாயாஸிராஜஞ்ஞஸுத்தம். தத்ராயமபுப்³ப³பத³வண்ணனா – ஆயஸ்மாதி பியவசனமேதம். குமாரகஸ்ஸபோதி தஸ்ஸ நாமம். குமாரகாலே பப்³ப³ஜிதத்தா பன ப⁴க³வதா ‘‘கஸ்ஸபம் பக்கோஸத², இத³ம் ப²லம் வா கா²த³னீயம் வா கஸ்ஸபஸ்ஸ தே³தா²’’தி வுத்தே ‘‘கதரகஸ்ஸபஸ்ஸா’’தி. ‘‘குமாரகஸ்ஸபஸ்ஸா’’தி ஏவம் க³ஹிதனாமத்தா ததோ பட்டா²ய வுட்³ட⁴காலேபி ‘‘குமாரகஸ்ஸபோ’’ த்வேவ வுச்சதி. அபிச ரஞ்ஞோ போஸாவனிகபுத்தத்தாபி தம் குமாரகஸ்ஸபோதி ஸஞ்ஜானிம்ஸு.

அயம் பனஸ்ஸ புப்³ப³யோக³தோ பட்டா²ய ஆவிபா⁴வகதா² – தே²ரோ கிர பது³முத்தரஸ்ஸ ப⁴க³வதோ காலே ஸேட்டி²புத்தோ அஹோஸி. அதே²கதி³வஸம் ப⁴க³வந்தம் சித்ரகதி²ம் ஏகம் அத்தனோ ஸாவகம் ஏதத³க்³கே³ ட²பேந்தம் தி³ஸ்வா ப⁴க³வதோ ஸத்தாஹம் தா³னம் த³த்வா ‘‘அஹம்பி ப⁴க³வா அனாக³தே ஏகஸ்ஸ பு³த்³த⁴ஸ்ஸ அயம் தே²ரோ விய சித்ரகதீ² ஸாவகோ ப⁴வாமீ’’தி பத்த²னம் கத்வா புஞ்ஞானி கரோந்தோ கஸ்ஸபஸ்ஸ ப⁴க³வதோ ஸாஸனே பப்³ப³ஜித்வா விஸேஸம் நிப்³ப³த்தேதும் நாஸக்கி². ததா³ கிர பரினிப்³பு³தஸ்ஸ ப⁴க³வதோ ஸாஸனே ஓஸக்கந்தே பஞ்ச பி⁴க்கூ² நிஸ்ஸேணிம் ப³ந்தி⁴த்வா பப்³ப³தம் ஆருய்ஹ ஸமணத⁴ம்மம் அகம்ஸு. ஸங்க⁴த்தே²ரோ ததியதி³வஸே அரஹத்தம் பத்தோ, அனுதே²ரோ சதுத்த²தி³வஸே அனாகா³மீ அஹோஸி, இதரே தயோ விஸேஸம் நிப்³ப³த்தேதும் அஸக்கோந்தா தே³வலோகே நிப்³ப³த்தா.

தேஸம் ஏகம் பு³த்³த⁴ந்தரம் தே³வேஸு ச மனுஸ்ஸேஸு ச ஸம்பத்திம் அனுப⁴வந்தானம் ஏகோ தக்கஸிலாயம் ராஜகுலே நிப்³ப³த்தித்வா பக்குஸாதி நாம ராஜா ஹுத்வா ப⁴க³வந்தம் உத்³தி³ஸ்ஸ பப்³ப³ஜித்வா ராஜக³ஹம் உத்³தி³ஸ்ஸ ஆக³ச்ச²ந்தோ கும்ப⁴காரஸாலாயம் ப⁴க³வதோ த⁴ம்மதே³ஸனம் ஸுத்வா அனாகா³மிப²லம் பத்தோ. ஏகோ ஏகஸ்மிம் ஸமுத்³த³பட்டனே குலக⁴ரே நிப்³ப³த்தித்வா நாவம் ஆருய்ஹ பி⁴ன்னனாவோ தா³ருசீரானி நிவாஸேத்வா லாப⁴ஸம்பத்திம் பத்தோ ‘‘அஹம் அரஹா’’தி சித்தம் உப்பாதே³த்வா ‘‘ந த்வம் அரஹா, க³ச்ச², ஸத்தா²ரம் உபஸங்கமித்வா பஞ்ஹம் புச்சா²’’தி அத்த²காமாய தே³வதாய சோதி³தோ ததா² கத்வா அரஹத்தப²லம் பத்தோ.

ஏகோ ராஜக³ஹே ஏகிஸ்ஸா குலதா³ரிகாய குச்சி²ம்ஹி உப்பன்னோ. ஸா ச பட²மம் மாதாபிதரோ யாசித்வா பப்³ப³ஜ்ஜம் அலப⁴மானா குலக⁴ரம் க³ந்த்வா க³ப்³ப⁴ம் க³ண்ஹி. க³ப்³ப⁴ஸண்டி²தம்பி அஜானந்தி ஸாமிகம் ஆராதே⁴த்வா தேன அனுஞ்ஞாதா பி⁴க்கு²னீஸு பப்³ப³ஜிதா, தஸ்ஸா க³ப்³ப⁴னிமித்தம் தி³ஸ்வா பி⁴க்கு²னியோ தே³வத³த்தம் புச்சி²ம்ஸு. ஸோ ‘‘அஸ்ஸமணீ’’தி ஆஹ. த³ஸப³லம் புச்சி²ம்ஸு. ஸத்தா² உபாலித்தே²ரம் ஸம்படிச்சா²பேஸி. தே²ரோ ஸாவத்தி²னக³ரவாஸீனி குலானி விஸாக²ஞ்ச உபாஸிகம் பக்கோஸாபேத்வா ஸோதே⁴ந்தோ ‘‘புரே லத்³தோ⁴ க³ப்³போ⁴, பப்³ப³ஜ்ஜா அரோகா³’’தி ஆஹ. ஸத்தா² ‘‘ஸுவினிச்சி²தம் அதி⁴கரண’’ந்தி தே²ரஸ்ஸ ஸாது⁴காரமதா³ஸி. ஸா பி⁴க்கு²னீ ஸுவண்ணபி³ம்ப³ஸதி³ஸம் புத்தம் விஜாயி. தம் க³ஹேத்வா ராஜா பஸேனதி³ கோஸலோ போஸாபேஸி. ‘‘கஸ்ஸபோ’’தி சஸ்ஸ நாமம் கத்வா அபரபா⁴கே³ அலங்கரித்வா ஸத்து² ஸந்திகம் நேத்வா பப்³பா³ஜேஸி. இதி நம் ரஞ்ஞோ போஸாவனிகபுத்தத்தாபி ‘‘குமாரகஸ்ஸபோ’’தி ஸஞ்ஜானிம்ஸூதி. தம் ஏகதி³வஸம் அந்த⁴வனே ஸமணத⁴ம்மம் கரோந்தம் அத்த²காமா தே³வதா பஞ்ஹே உக்³க³ஹாபேத்வா ‘‘இமே பஞ்ஹே ப⁴க³வந்தம் புச்சா²’’தி ஆஹ. தே²ரோ பஞ்ஹே புச்சி²த்வா பஞ்ஹவிஸ்ஸஜ்ஜனாவஸானே அரஹத்தம் பாபுணி. ப⁴க³வாபி தம் சித்ரகதி²கானம் பி⁴க்கூ²னம் அக்³க³ட்டா²னே ட²பேஸி.

ஸேதப்³யாதி தஸ்ஸ நக³ரஸ்ஸ நாமம். உத்தரேன ஸேதப்³யந்தி ஸேதப்³யதோ உத்தரதி³ஸாய. ராஜஞ்ஞோதி அனபி⁴ஸித்தகராஜா. தி³ட்டி²க³தந்தி தி³ட்டி²யேவ. யதா² கூ³த²க³தம் முத்தக³தந்தி வுத்தே ந கூ³தா²தி³தோ அஞ்ஞம் அத்தி², ஏவம் தி³ட்டி²யேவ தி³ட்டி²க³தம். இதிபி நத்தீ²தி தம் தம் காரணம் அபதி³ஸித்வா ஏவம்பி நத்தீ²தி வத³தி. புரா…பே… ஸஞ்ஞாபேதீதி யாவ ந ஸஞ்ஞாபேதி.

சந்தி³மஸூரியஉபமாவண்ணனா

411. இமே போ⁴, கஸ்ஸப, சந்தி³மஸூரியாதி ஸோ கிர தே²ரேன புச்சி²தோ சிந்தேஸி ‘‘அயம் ஸமணோ பட²மம் சந்தி³மஸூரியே உபமம் ஆஹரி, சந்தி³மஸூரியஸதி³ஸோ ப⁴விஸ்ஸதி பஞ்ஞாய, அனபி⁴ப⁴வனீயோ அஞ்ஞேன, ஸசே பனாஹம் ‘சந்தி³மஸூரியா இமஸ்மிம் லோகே’தி ப⁴ணிஸ்ஸாமி, ‘கிம் நிஸ்ஸிதா ஏதே, கித்தகபமாணா, கித்தகம் உச்சா’திஆதீ³ஹி பலிவேடே²ஸ்ஸதி. அஹம் கோ² பனேதம் நிப்³பே³டே²தும் ந ஸக்கி²ஸ்ஸாமி, ‘பரஸ்மிம் லோகே’ இச்சேவஸ்ஸ கதே²ஸ்ஸாமீ’’தி. தஸ்மா ஏவமாஹ.

ப⁴க³வா பன ததோ புப்³பே³ ந சிரஸ்ஸேவ ஸுதா⁴போ⁴ஜனீயஜாதகம் கதே²ஸி. தத்த² ‘‘சந்தே³ சந்தோ³ தே³வபுத்தோ, ஸூரியே ஸூரியோ தே³வபுத்தோ’’தி ஆக³தம். ப⁴க³வதா ச கதி²தம் ஜாதகம் வா ஸுத்தந்தம் வா ஸகலஜம்பு³தீ³பே பத்த²டம் ஹோதி, தேன ஸோ ‘‘ஏத்த² நிவாஸினோ தே³வபுத்தா நத்தீ²’’தி ந ஸக்கா வத்துந்தி சிந்தேத்வா தே³வா தே ந மனுஸ்ஸாதி ஆஹ.

412. அத்தி² பன, ராஜஞ்ஞ, பரியாயோதி அத்தி² பன காரணந்தி புச்ச²தி. ஆபா³தி⁴காதி விஸபா⁴க³வேத³னாஸங்கா²தேன ஆபா³தே⁴ன ஸமன்னாக³தா. து³க்கி²தாதி து³க்க²ப்பத்தா. பா³ள்ஹகி³லானாதி அதி⁴மத்தகி³லானா. ஸத்³தா⁴யிகாதி அஹம் தும்ஹே ஸத்³த³ஹாமி, தும்ஹே மய்ஹம் ஸத்³தா⁴யிகா ஸத்³தா⁴யிதப்³ப³வசனாதி அத்தோ². பச்சயிகாதி அஹம் தும்ஹே பத்தியாமி, தும்ஹே மய்ஹம் பச்சயிகா பத்தியாயிதப்³பா³தி அத்தோ².

சோராதி³உபமாவண்ணனா

413. உத்³தி³ஸித்வாதி தேஸம் அத்தானஞ்ச படிஸாமிதப⁴ண்ட³கஞ்ச த³ஸ்ஸேத்வா, ஸம்படிச்சா²பேத்வாதி அத்தோ². விப்பலபந்தஸ்ஸாதி ‘‘புத்தோ மே, தீ⁴தா மே, த⁴னம் மே’’தி விவித⁴ம் பலபந்தஸ்ஸ. நிரயபாலேஸூதி நிரயே கம்மகாரணிகஸத்தேஸு. யே பன ‘‘கம்மமேவ கம்மகாரணம் கரோதி, நத்தி² நிரயபாலா’’தி வத³ந்தி. தே ‘‘தமேனம், பி⁴க்க²வே, நிரயபாலா’’தி தே³வதூ³தஸுத்தம் படிபா³ஹந்தி. மனுஸ்ஸலோகே ராஜகுலேஸு காரணிகமனுஸ்ஸா விய ஹி நிரயே நிரயபாலா ஹோந்தி.

415. வேளுபேஸிகாஹீதி வேளுவிலீவேஹி. ஸுனிம்மஜ்ஜதா²தி யதா² ஸுட்டு² நிம்மஜ்ஜிதம் ஹோதி, ஏவம் நிம்மஜ்ஜத², அபனேதா²தி அத்தோ².

அஸுசீதி அமனாபோ. அஸுசிஸங்கா²தோதி அஸுசிகோட்டா²ஸபூ⁴தோ அஸுசீதி ஞாதோ வா. து³க்³க³ந்தோ⁴தி குணபக³ந்தோ⁴. ஜேகு³ச்சோ²தி ஜிகு³ச்சி²தப்³ப³யுத்தோ. படிகூலோதி த³ஸ்ஸனேனேவ படிகா⁴வஹோ. உப்³பா³த⁴தீதி தி³வஸஸ்ஸ த்³விக்க²த்தும் ந்ஹத்வா திக்க²த்தும் வத்தா²னி பரிவத்தேத்வா அலங்கதபடிமண்டி³தானம் சக்கவத்திஆதீ³னம்பி மனுஸ்ஸானம் க³ந்தோ⁴ யோஜனஸதே டி²தானம் தே³வதானம் கண்டே² ஆஸத்தகுணபம் விய பா³த⁴தி.

416. புன பாணாதிபாதாதி³பஞ்சஸீலானி ஸமாதா³யவத்தேந்தானம் வஸேன வத³தி. தாவதிம்ஸானந்தி இத³ஞ்ச தூ³ரே நிப்³ப³த்தா தாவ மா ஆக³ச்ச²ந்து, இமே கஸ்மா ந ஏந்தீதி வத³தி.

418. ஜச்சந்தூ⁴பமோ மஞ்ஞே படிபா⁴ஸீதி ஜச்சந்தோ⁴ விய உபட்டா²ஸி. அரஞ்ஞவனபத்தா²னீதி அரஞ்ஞகங்க³யுத்ததாய அரஞ்ஞானி, மஹாவனஸண்ட³தாய வனபத்தா²னி. பந்தானீதி தூ³ரானி.

419. கல்யாணத⁴ம்மேதி தேனேவ ஸீலேன ஸுந்த³ரத⁴ம்மே. து³க்க²படிகூலேதி து³க்க²ம் அபத்தே²ந்தே. ஸேய்யோ ப⁴விஸ்ஸதீதி பரலோகே ஸுக³திஸுக²ம் ப⁴விஸ்ஸதீதி அதி⁴ப்பாயோ.

420. உபவிஜஞ்ஞாதி உபக³தவிஜாயனகாலா, பரிபக்கக³ப்³பா⁴ ந சிரஸ்ஸேவ விஜாயிஸ்ஸதீதி அத்தோ². ஓபபோ⁴க்³கா³ ப⁴விஸ்ஸதீதி பாத³பரிசாரிகா ப⁴விஸ்ஸதி. அனயப்³யஸனந்தி மஹாது³க்க²ம். அயோதி ஸுக²ம், ந அயோ அனயோ, து³க்க²ம். ததே³தம் ஸப்³ப³ஸோ ஸுக²ம் ப்³யஸதி விக்கி²பதீதி ப்³யஸனம். இதி அனயோவ ப்³யஸனம் அனயப்³யஸனம், மஹாது³க்க²ந்தி அத்தோ². அயோனிஸோதி அனுபாயேன. அபக்கம் ந பரிபாசேந்தீதி அபரிணதம் அகீ²ணம் ஆயும் அந்தராவ ந உபச்சி²ந்த³ந்தி. பரிபாகம் ஆக³மேந்தீதி ஆயுபரிபாககாலம் ஆக³மேந்தி. த⁴ம்மஸேனாபதினாபேதம் வுத்தம் –

‘‘நாபி⁴னந்தா³மி மரணம், நாபி⁴னந்தா³மி ஜீவிதம்;

காலஞ்ச படிகங்கா²மி, நிப்³பி³ஸம் ப⁴தகோ யதா²தி. (தே²ரகா³. 1001)

421. உப்³பி⁴ந்தி³த்வாதி மத்திகாலேபம் பி⁴ந்தி³த்வா.

422. ராமணேய்யகந்தி ரமணீயபா⁴வம். வேலாஸிகாதி கி²ட்³டா³பராதி⁴கா. கோமாரிகாதி தருணதா³ரிகா. துய்ஹம் ஜீவந்தி ஸுபினத³ஸ்ஸனகாலே நிக்க²மந்தம் வா பவிஸந்தம் வா ஜீவம் அபி நு பஸ்ஸந்தி. இத⁴ சித்தாசாரம் ‘‘ஜீவ’’ந்தி க³ஹேத்வா ஆஹ. ஸோ ஹி தத்த² ஜீவஸஞ்ஞீதி.

423. ஜியாயாதி த⁴னுஜியாய, கீ³வம் வேடே²த்வாதி அத்தோ². பத்தி²ன்னதரோதி த²த்³த⁴தரோ. இமினா கிம் த³ஸ்ஸேதி? தும்ஹே ஜீவகாலே ஸத்தஸ்ஸ பஞ்சக்க²ந்தா⁴தி வத³ந்தி, சவனகாலே பன ரூபக்க²ந்த⁴மத்தமேவ அவஸிஸ்ஸதி, தயோ க²ந்தா⁴ அப்பவத்தா ஹோந்தி, விஞ்ஞாணக்க²ந்தோ⁴ க³ச்ச²தி. அவஸிட்டே²ன ரூபக்க²ந்தே⁴ன லஹுதரேன ப⁴விதப்³ப³ம், க³ருகதரோ ச ஹோதி. தஸ்மா நத்தி² கோசி குஹிம் க³ந்தாதி இமமத்த²ம் த³ஸ்ஸேதி.

424. நிப்³பு³தந்தி வூபஸந்ததேஜம்.

425. அனுபஹச்சாதி அவினாஸேத்வா. ஆமதோ ஹோதீதி அத்³த⁴மதோ மரிதும் ஆரத்³தோ⁴ ஹோதி. ஓது⁴னாதா²தி ஓரதோ கரோத². ஸந்து⁴னாதா²தி பரதோ கரோத². நித்³து⁴னாதா²தி அபராபரம் கரோத². தஞ்சாயதனம் ந படிஸம்வேதே³தீதி தேன சக்கு²னா தம் ரூபாயதனம் ந விபா⁴வேதி. ஏஸ நயோ ஸப்³ப³த்த².

426. ஸங்க²த⁴மோதி ஸங்க²த⁴மகோ. உபலாபேத்வாதி த⁴மித்வா.

428. அக்³கி³கோதி அக்³கி³பரிசாரகோ. ஆபாதே³ய்யந்தி நிப்பா²தே³ய்யம், ஆயும் வா பாபுணாபேய்யம். போஸேய்யந்தி போ⁴ஜனாதீ³ஹி ப⁴ரேய்யம். வட்³டே⁴ய்யந்தி வட்³டி⁴ம் க³மேய்யம். அரணீஸஹிதந்தி அரணீயுக³ளம்.

429. திரோராஜானோபீதி திரோரட்டே² அஞ்ஞஸ்மிம்பி ஜனபதே³ ராஜானோ ஜானந்தி. அப்³யத்தோதி அவிஸதோ³ அசே²கோ. கோபேனபீதி யே மம் ஏவம் வக்க²ந்தி, தேஸு உப்பஜ்ஜனகேன கோபேனபி ஏதம் தி³ட்டி²க³தம் ஹரிஸ்ஸாமி பரிஹரிஸ்ஸாமீதி க³ஹேத்வா விசரிஸ்ஸாமி. மக்கே²னாதி தயா வுத்தயுத்தகாரணமக்க²லக்க²ணேன மக்கே²னாபி. பலாஸேனாதி தயா ஸத்³தி⁴ம் யுக³க்³கா³ஹலக்க²ணேன பலாஸேனாபி.

430. ஹரிதகபண்ணந்தி யம் கிஞ்சி ஹரிதகம், அந்தமஸோ அல்லதிணபண்ணம்பி ந ஹோதீதி அத்தோ². ஸன்னத்³த⁴கலாபந்தி ஸன்னத்³த⁴த⁴னுகலாபம். ஆஸித்தோத³கானி வடுமானீதி பரிபுண்ணஸலிலா மக்³கா³ ச கந்த³ரா ச. யோக்³கா³னீதி ப³லிப³த்³தே³.

ப³ஹுனிக்க²ந்தரோதி ப³ஹுனிக்க²ந்தோ சிரனிக்க²ந்தோதி அத்தோ². யதா²ப⁴தேன ப⁴ண்டே³னாதி யம் வோ திணகட்டோ²த³கப⁴ண்ட³கம் ஆரோபிதம், தேன யதா²ப⁴தேன யதா²ரோபிதேன, யதா²க³ஹிதேனாதி அத்தோ².

அப்பஸாரானீதி அப்பக்³கா⁴னி. பணியானீதி ப⁴ண்டா³னி.

கூ³த²பா⁴ரிகாதி³உபமாவண்ணனா

432. மம ச ஸூகரப⁴த்தந்தி மம ச ஸூகரானம் இத³ம் ப⁴த்தம். உக்³க⁴ரந்தந்தி உபரி க⁴ரந்தம். பக்³க⁴ரந்தந்தி ஹேட்டா² பரிஸ்ஸவந்தம். தும்ஹே க்²வேத்த² ப⁴ணேதி தும்ஹே கோ² ஏத்த² ப⁴ணே. அயமேவ வா பாடோ². ததா² ஹி பன மே ஸூகரப⁴த்தந்தி ததா² ஹி பன மே அயம் கூ³தோ² ஸூகரானம் ப⁴த்தம்.

434. ஆக³தாக³தம் கலிம் கி³லதீதி ஆக³தாக³தம் பராஜயகு³ளம் கி³லதி. பஜ்ஜோஹிஸ்ஸாமீதி பஜ்ஜோஹனம் கரிஸ்ஸாமி, ப³லிகம்மம் கரிஸ்ஸாமீதி அத்தோ². அக்கே²ஹி தி³ப்³பி³ஸ்ஸாமாதி கு³ளேஹி கீளிஸ்ஸாம. லித்தம் பரமேன தேஜஸாதி பரமதேஜேன விஸேன லித்தம்.

436. கா³மபட்டந்தி வுட்டி²தகா³மபதே³ஸோ வுச்சதி. ‘‘கா³மபத³’’ந்திபி பாடோ², அயமேவத்தோ². ஸாணபா⁴ரந்தி ஸாணவாகபா⁴ரம். ஸுஸன்னத்³தோ⁴தி ஸுப³த்³தோ⁴. த்வம் பஜானாஹீதி த்வம் ஜான. ஸசே க³ண்ஹிதுகாமோஸி, க³ண்ஹாஹீதி வுத்தம் ஹோதி.

கோ²மந்தி கோ²மவாகம். அயந்தி காளலோஹம். லோஹந்தி தம்ப³லோஹம். ஸஜ்ஜ²ந்தி ரஜதம். ஸுவண்ணந்தி ஸுவண்ணமாஸகம். அபி⁴னந்தி³ம்ஸூதி துஸ்ஸிம்ஸு.

437. அத்தமனோதி ஸகமனோ துட்ட²சித்தோ. அபி⁴ரத்³தோ⁴தி அபி⁴ப்பஸன்னோ. பஞ்ஹாபடிபா⁴னானீதி பஞ்ஹுபட்டா²னானி. பச்சனீகம் கத்தப்³ப³ந்தி பச்சனீகம் படிவிருத்³த⁴ம் விய கத்தப்³ப³ம் அமஞ்ஞிஸ்ஸம், படிலோமகா³ஹம் க³ஹேத்வா அட்டா²ஸிந்தி அத்தோ².

438. ஸங்கா⁴தம் ஆபஜ்ஜந்தீதி ஸங்கா⁴தம் வினாஸம் மரணம் ஆபஜ்ஜந்தி. ந மஹப்ப²லோதி விபாகப²லேன ந மஹப்ப²லோ ஹோதி. ந மஹானிஸம்ஸோதி கு³ணானிஸம்ஸேன மஹானிஸம்ஸோ ந ஹோதி. ந மஹாஜுதிகோதி ஆனுபா⁴வஜுதியா மஹாஜுதிகோ ந ஹோதி. ந மஹாவிப்பா²ரோதி விபாகவிப்பா²ரதாய மஹாவிப்பா²ரோ ந ஹோதி. பீ³ஜனங்க³லந்தி பீ³ஜஞ்ச நங்க³லஞ்ச. து³க்கே²த்தேதி து³ட்டு²கே²த்தே நிஸ்ஸாரகே²த்தே. து³ப்³பூ⁴மேதி விஸமபூ⁴மிபா⁴கே³. பதிட்டா²பேய்யாதி ட²பேய்ய. க²ண்டா³னீதி சி²ன்னபி⁴ன்னானி. பூதீனீதி நிஸ்ஸாரானி. வாதாதபஹதானீதி வாதேன ச ஆதபேன ச ஹதானி பரியாதி³ன்னதேஜானி. அஸாராதா³னீதி தண்டு³லஸாராதா³னரஹிதானி பலாலானி. அஸுக²ஸயிதானீதி யானி ஸுக்கா²பேத்வா கோட்டே² ஆகிரித்வா ட²பிதானி, தானி ஸுக²ஸயிதானி நாம. ஏதானி பன ந தாதி³ஸானி. அனுப்பவேச்சே²ய்யாதி அனுபவேஸேய்ய, ந ஸம்மா வஸ்ஸேய்ய, அன்வத்³த⁴மாஸம் அனுத³ஸாஹம் அனுபஞ்சாஹம் ந வஸ்ஸேய்யாதி அத்தோ². அபி நு தானீதி அபி நு ஏவம் கே²த்தபீ³ஜவுட்டி²தோ³ஸே ஸதி தானி பீ³ஜானி அங்குரமூலபத்தாதீ³ஹி உத்³த⁴ம் வுத்³தி⁴ம் ஹேட்டா² விரூள்ஹிம் ஸமந்ததோ ச வேபுல்லம் ஆபஜ்ஜேய்யுந்தி. ஏவரூபோ கோ² ராஜஞ்ஞ யஞ்ஞோதி ஏவரூபம் ராஜஞ்ஞ தா³னம் பரூபகா⁴தேன உப்பாதி³தபச்சயதோபி தா³யகதோபி பரிக்³கா³ஹகதோபி அவிஸுத்³த⁴த்தா ந மஹப்ப²லம் ஹோதி.

ஏவரூபோ கோ² ராஜஞ்ஞ யஞ்ஞோதி ஏவரூபம் ராஜஞ்ஞதா³னம் அபரூபகா⁴தேன உப்பன்னபச்சயதோபி அபரூபகா⁴திதாய ஸீலவந்ததா³யகதோபி ஸம்மாதி³ட்டி²ஆதி³கு³ணஸம்பன்னபடிக்³கா³ஹகதோபி மஹப்ப²லம் ஹோதி. ஸசே பன கு³ணாதிரேகம் நிரோதா⁴ வுட்டி²தம் படிக்³கா³ஹகம் லப⁴தி, சேதனா ச விபுலா ஹோதி, தி³ட்டே²வ த⁴ம்மே விபாகம் தே³தீதி.

439. இமம் பன தே²ரஸ்ஸ த⁴ம்மகத²ம் ஸுத்வா பாயாஸிராஜஞ்ஞோ தே²ரம் நிமந்தேத்வா ஸத்தாஹம் தே²ரஸ்ஸ மஹாதா³னம் த³த்வா ததோ பட்டா²ய மஹாஜனஸ்ஸ தா³னம் பட்ட²பேஸி. தம் ஸந்தா⁴ய அத² கோ² பாயாஸி ராஜஞ்ஞோதிஆதி³ வுத்தம். தத்த² கணாஜகந்தி ஸகுண்ட³கம் உத்தண்டு³லப⁴த்தம். பி³லங்க³து³தியந்தி கஞ்ஜிகது³தியம். தோ⁴ரகானி ச வத்தா²னீதி தூ²லானி ச வத்தா²னி. கு³ளவாலகானீதி கு³ளத³ஸானி, புஞ்ஜபுஞ்ஜவஸேன டி²தமஹந்தத³ஸானீதி அத்தோ². ஏவம் அனுத்³தி³ஸதீதி ஏவம் உபதி³ஸதி. பாதா³பீதி பாதே³னபி.

440. அஸக்கச்சந்தி ஸத்³தா⁴விரஹிதம் அஸ்ஸத்³த⁴தா³னம். அஸஹத்தா²தி ந ஸஹத்தே²ன. அசித்தீகதந்தி சித்தீகாரவிரஹிதம், ந சித்தீகாரம்பி பச்சுபட்டா²பேத்வா ந பணீதசித்தம் கத்வா அதா³ஸி. அபவித்³த⁴ந்தி ச²ட்³டி³தம் விப்பதிதம். ஸுஞ்ஞம் ஸேரீஸகந்தி ஸேரீஸகம் நாம ஏகம் துச்ச²ம் ரஜதவிமானம் உபக³தோ. தஸ்ஸ கிர த்³வாரே மஹாஸிரீஸருக்கோ², தேன தம் ‘‘ஸேரீஸக’’ந்தி வுச்சதி.

441. ஆயஸ்மா க³வம்பதீதி தே²ரோ கிர புப்³பே³ மனுஸ்ஸகாலே கோ³பாலதா³ரகானம் ஜேட்ட²கோ ஹுத்வா மஹதோ ஸிரீஸஸ்ஸ மூலம் ஸோதே⁴த்வா வாலிகம் ஓகிரித்வா ஏகம் பிண்ட³பாதிகத்தே²ரம் ருக்க²மூலே நிஸீதா³பேத்வா அத்தனா லத்³த⁴ம் ஆஹாரம் த³த்வா ததோ சுதோ தஸ்ஸானுபா⁴வேன தஸ்மிம் ரஜதவிமானே நிப்³ப³த்தி. ஸிரீஸருக்கோ² விமானத்³வாரே அட்டா²ஸி. ஸோ பஞ்ஞாஸாய வஸ்ஸேஹி ப²லதி, ததோ பஞ்ஞாஸ வஸ்ஸானி க³தானீதி தே³வபுத்தோ ஸம்வேக³ம் ஆபஜ்ஜதி. ஸோ அபரேன ஸமயேன அம்ஹாகம் ப⁴க³வதோ காலே மனுஸ்ஸேஸு நிப்³ப³த்தித்வா ஸத்து² த⁴ம்மகத²ம் ஸுத்வா அரஹத்தம் பத்தோ. புப்³பா³சிண்ணவஸேன பன தி³வாவிஹாரத்தா²ய ததே³வ விமானம் அபி⁴ண்ஹம் க³ச்ச²தி, தம் கிரஸ்ஸ உதுஸுக²ம் ஹோதி. தம் ஸந்தா⁴ய ‘‘தேன கோ² பன ஸமயேன ஆயஸ்மா க³வம்பதீ’’திஆதி³ வுத்தம்.

ஸோ ஸக்கச்சம் தா³னம் த³த்வாதி ஸோ பரஸ்ஸ ஸந்தகம்பி தா³னம் ஸக்கச்சம் த³த்வா. ஏவமாரோசேஸீதி ‘‘ஸக்கச்சம் தா³னம் தே³தா²’’திஆதி³னா நயேன ஆரோசேஸி. தஞ்ச பன தே²ரஸ்ஸ ஆரோசனம் ஸுத்வா மஹாஜனோ ஸக்கச்சம் தா³னம் த³த்வா தே³வலோகே நிப்³ப³த்தோ. பாயாஸிஸ்ஸ பன ராஜஞ்ஞஸ்ஸ பரிசாரகா ஸக்கச்சம் தா³னம் த³த்வாபி நிகந்திவஸேன க³ந்த்வா தஸ்ஸேவ ஸந்திகே நிப்³ப³த்தா. தம் கிர தி³ஸாசாரிகவிமானம் வட்டனிஅடவியம் அஹோஸி. பாயாஸிதே³வபுத்தோ ச ஏகதி³வஸம் வாணிஜகானம் த³ஸ்ஸேத்வா அத்தனோ கதகம்மம் கதே²ஸீதி.

இதி ஸுமங்க³லவிலாஸினியா தீ³க⁴னிகாயட்ட²கதா²யம்

பாயாஸிராஜஞ்ஞஸுத்தவண்ணனா நிட்டி²தா.