(8.) அட்ட²கனித்³தே³ஸவண்ணனா

952. அட்ட²கனித்³தே³ஸே கிலேஸாயேவ கிலேஸவத்தூ²னி. குஸீதவத்தூ²னீதி குஸீதஸ்ஸ அலஸஸ்ஸ வத்தூ²னி, பதிட்டா², கோஸஜ்ஜகாரணானீதி அத்தோ². கம்மம் காதப்³ப³ம் ஹோதீதி சீவரவிசாரணாதி³கம்மம் காதப்³ப³ம் ஹோதி. ந வீரியம் ஆரப⁴தீதி து³வித⁴ம்பி வீரியம் நாரப⁴தி. அப்பத்தஸ்ஸாதி ஜா²னவிபஸ்ஸனாமக்³க³ப²லத⁴ம்மஸ்ஸ அப்பத்தஸ்ஸ பத்தியா. அனதி⁴க³தஸ்ஸாதி தஸ்ஸேவ அனதி⁴க³தஸ்ஸ அதி⁴க³மத்தா²ய. அஸச்சி²கதஸ்ஸாதி தஸ்ஸேவ அஸச்சி²கதஸ்ஸ ஸச்சி²கரணத்தா²ய. இத³ம் பட²மந்தி ‘இத³ம் ஹந்தா³ஹம் நிபஜ்ஜாமீ’தி ஏவம் ஓஸீத³னம் பட²மம் குஸீதவத்து². இமினா நயேன ஸப்³ப³த்த² அத்தோ² வேதி³தப்³போ³.

மாஸாசிதம் மஞ்ஞேதி ஏத்த² பன மாஸாசிதம் நாம திந்தமாஸோ; யதா² திந்தமாஸோ க³ருகோ ஹோதி, ஏவம் க³ருகோதி அதி⁴ப்பாயோ. கி³லானா வுட்டி²தோ ஹோதீதி கி³லானோ ஹுத்வா பச்சா² வுட்டி²தோ ஹோதி.

954. அட்ட²ஸு லோகத⁴ம்மேஸூதி ஏத்த² லோகஸ்ஸ த⁴ம்மாதி லோகத⁴ம்மா. ஏதேஹி விமுத்தோ நாம நத்தி², பு³த்³தா⁴னம்பி ஹோந்தி ஏவ. தஸ்மா ‘லோகத⁴ம்மா’தி வுச்சந்தி. படிகா⁴தோதி படிஹஞ்ஞனாகாரோ. லாபே⁴ ஸாராகோ³தி ‘அஹம் லாப⁴ம் லபா⁴மீ’தி ஏவம் கே³ஹஸிதஸோமனஸ்ஸவஸேன உப்பன்னோ ஸாராகோ³; ஸோ சித்தம் படிஹனதி. அலாபே⁴ படிவிரோதோ⁴தி ‘அஹம் லாப⁴ம் ந லபா⁴மீ’தி தோ³மனஸ்ஸவஸேன உப்பன்னவிரோதோ⁴; ஸோபி சித்தம் படிஹனதி. தஸ்மா ‘படிகா⁴தோ’தி வுத்தோ. யஸாதீ³ஸுபி ‘அஹம் மஹாபரிவாரோ, அஹம் அப்பபரிவாரோ, அஹம் பஸம்ஸப்பத்தோ, அஹம் க³ரஹப்பத்தோ, அஹம் ஸுக²ப்பத்தோ, அஹம் து³க்க²ப்பதோ’தி ஏவமேதேஸம் உப்பத்தி வேதி³தப்³பா³. அனரியவோஹாராதி அனரியானம் வோஹாரா.

957. புரிஸதோ³ஸாதி புரிஸானம் தோ³ஸா. ந ஸராமீதி ‘மயா ஏதஸ்ஸ கம்மஸ்ஸ கதட்டா²னம் ந ஸராமி ந ஸல்லக்கே²மீ’தி ஏவம் அஸ்ஸதிபா⁴வேன நிப்³பே³டே²தி மோசேதி. சோத³கம்யேவ படிப்ப²ரதீதி படிவிருத்³தோ⁴ ஹுத்வா ப²ரதி, படிபா⁴ணிதபா⁴வேன திட்ட²தி. கிம் நு கோ² துய்ஹந்தி ‘துய்ஹம் பா³லஸ்ஸ அப்³யத்தஸ்ஸ ப⁴ணிதேன நாம கிம்’ யோ த்வம் நேவ வத்து²னா ஆபத்திம், ந சோத³னம் ஜானாஸீ’தி தீ³பேதி; ‘த்வம் பி நாம ஏவம் கிஞ்சி அஜானந்தோ ப⁴ணிதப்³ப³ம் மஞ்ஞிஸ்ஸஸீ’தி அஜ்ஜோ²த்த²ரதி. பச்சாரோபேதீதி ‘த்வம் பி கோ²ஸீ’திஆதீ³னி வத³ந்தோ படிஆரோபேதி. படிகரோஹீதி தே³ஸனாகா³மினிம் தே³ஸேஹி, வுட்டா²னகா³மினிதோ வுட்டா²ஹி ததோ ஸுத்³த⁴ந்தே பதிட்டி²தோ அஞ்ஞம் சோதே³ஸ்ஸஸீ’தி தீ³பேதி.

அஞ்ஞேனாஞ்ஞம் படிசரதீதி அஞ்ஞேன காரணேன வசனேன வா அஞ்ஞம் காரணம் வசனம் வா படிச்சா²தே³தி. ‘ஆபத்திம் ஆபன்னோஸீ’தி வுத்தோ ‘கோ ஆபன்னோ? கிம் ஆபன்னோ? கத²ம் ஆபன்னோ? கிஸ்மிம் ஆபன்னோ? கம் ப⁴ணத²? கிம் ப⁴ணதா²’தி வத³தி. ‘ஏவரூபம் கிஞ்சி தயா தி³ட்ட²’ந்தி வுத்தே ‘ந ஸுணாமீ’தி ஸோதம் வா உபனேதி. ப³ஹித்³தா⁴ கத²ம் அபனாமேதீதி ‘இத்த²ன்னாமம் ஆபத்திம் ஆபன்னோஸீ’தி புட்டோ² ‘பாடலிபுத்தம் க³தோம்ஹீ’தி வத்வா புன ‘தவ பாடலிபுத்தக³மனம் ந புச்சா²மா’தி வுத்தே ‘ததோ ராஜக³ஹம் க³தோம்ஹீ’தி ‘ராஜக³ஹம் வா யாஹி, ப்³ராஹ்மணகே³ஹம் வா; ஆபத்திம் ஆபன்னோஸீ’தி? ‘தத்த² மே ஸூகரமம்ஸம் லத்³த⁴’ந்திஆதீ³னி வத³ந்தோ கத²ம் ப³ஹித்³தா⁴ விக்கி²பதி. கோபந்தி குபிதபா⁴வம். தோ³ஸந்தி து³ட்ட²பா⁴வம். உப⁴யம்பேதம் கோத⁴ஸ்ஸேவ நாமம். அப்பச்சயந்தி அஸந்துட்டா²காரம்; தோ³மனஸ்ஸஸ்ஸேதம் நாமம். பாதுகரோதீதி த³ஸ்ஸேதி பகாஸேதி. பா³ஹாவிக்கே²பகம் ப⁴ணதீதி பா³ஹா விக்கி²பித்வா அலஜ்ஜிவசனம் வத³தி. விஹேஸேதீதி விஹேடே²தி பா³த⁴தி. அனாதி³யித்வாதி சித்தீகாரேன அக்³க³ஹேத்வா அவஜானித்வா; அனாத³ரோ ஹுத்வாதி அத்தோ².

அதிபா³ள்ஹந்தி அதித³ள்ஹம் அதிப்பமாணம். மயி ப்³யாவடாதி மயி ப்³யாபாரம் ஆபன்னா. ஹீனாயாவத்தித்வாதி ஹீனஸ்ஸ கி³ஹிபா⁴வஸ்ஸ அத்தா²ய ஆவத்தித்வா; கி³ஹீ ஹுத்வாதி அத்தோ². அத்தமனா ஹோதா²தி துட்ட²சித்தா ஹோத², ‘மயா லபி⁴தப்³ப³ம் லப⁴த², மயா வஸிதப்³ப³ட்டா²னே வஸத², பா²ஸுவிஹாரோ வோ மயா கதோ’தி அதி⁴ப்பாயேன வத³தி.

958. அஸஞ்ஞீதி பவத்தோ வாதோ³ அஸஞ்ஞீவாதோ³; ஸோ தேஸம் அத்தீ²தி அஸஞ்ஞீவாதா³. ரூபீ அத்தாதிஆதீ³ஸு லாபி⁴னோ கஸிணரூபம் அத்தாதி க³ஹேத்வா ரூபீதி தி³ட்டி² உப்பஜ்ஜதி; அலாபி⁴னோ தக்கமத்தேனேவ, ஆஜீவகானம் விய. லாபி⁴னோயேவ ச பன அரூபஸமாபத்தினிமித்தம் அத்தாதி க³ஹேத்வா அரூபீதி தி³ட்டி² உப்பஜ்ஜதி; அலாபி⁴னோ தக்கமத்தேனேவ, நிக³ண்டா²னம் விய. அஸஞ்ஞீபா⁴வே பனேத்த² ஏகந்தேனேவ காரணம் ந பரியேஸிதப்³ப³ம். தி³ட்டி²க³திகோ ஹி உம்மத்தகோ விய யம் வா தம் வா க³ண்ஹாதி. ரூபீ ச அரூபீ சாதி ரூபாரூபமிஸ்ஸககா³ஹவஸேன வுத்தம். அயம் தி³ட்டி² ரூபாவசராரூபாவசரஸமாபத்திலாபி⁴னோபி தக்கிகஸ்ஸாபி உப்பஜ்ஜதி. நேவ ரூபீ நாரூபீதி பன ஏகந்ததோ தக்கிகதி³ட்டி²யேவ. அந்தவாதி பரித்தகஸிணம் அத்ததோ க³ண்ஹந்தஸ்ஸ தி³ட்டி². அனந்தவாதி அப்பமாணகஸிணம். அந்தவா ச அனந்தவா சாதி உத்³த⁴மதோ⁴ ஸபரியந்தம் திரியம் அபரியந்தம் கஸிணம் அத்தாதி க³ஹேத்வா உப்பன்னதி³ட்டி². நேவந்தவா நானந்தவாதி தக்கிகதி³ட்டி²யேவ. ஸேஸம் ஸப்³ப³த்த² உத்தானத்த²மேவாதி.

அட்ட²கனித்³தே³ஸவண்ணனா.