(9.) நவகனித்³தே³ஸவண்ணனா

960. நவகனித்³தே³ஸே நவ ஆகா⁴தவத்தூ²னீதி ஸத்தேஸு உப்பத்திவஸேனேவ கதி²தானி. புரிஸானம் மலானீதி புரிஸமலானி. நவவிதா⁴தி நவகோட்டா²ஸா நவப்பபே⁴தா³ வா.

963. தண்ஹம் படிச்சாதி தண்ஹம் நிஸ்ஸாய. பரியேஸனாதி ரூபாதி³ஆரம்மணபரியேஸனா. ஸா ஹி தண்ஹாய ஸதி ஹோதி. லாபோ⁴தி ரூபாதி³ஆரம்மணபடிலாபோ⁴. ஸோ ஹி பரியேஸனாய ஸதி ஹோதி. வினிச்ச²யோ பன ஞாணதண்ஹாதி³ட்டி²விதக்கவஸேன சதுப்³பி³தோ⁴. தத்த² ‘‘ஸுக²வினிச்ச²யம் ஜஞ்ஞா, ஸுக²வினிச்ச²யம் ஞத்வா அஜ்ஜ²த்தம் ஸுக²மனுயுஞ்ஜேய்யா’’தி (ம. நி. 3.323) அயம் ஞாணவினிச்ச²யோ. ‘‘வினிச்ச²யோதி த்³வே வினிச்ச²யா – தண்ஹாவினிச்ச²யோ ச தி³ட்டி²வினிச்ச²யோ சா’’தி (மஹானி. 102) ஏவம் ஆக³தானி அட்ட²ஸததண்ஹாவிசரிதானி தண்ஹாவினிச்ச²யோ. த்³வாஸட்டி² தி³ட்டி²யோ தி³ட்டி²வினிச்ச²யோ. ‘‘ச²ந்தோ³ கோ², தே³வானமிந்த³, விதக்கனிதா³னோ’’தி (தீ³. நி. 2.358) இமஸ்மிம் பன ஸுத்தே இத⁴ வினிச்ச²யோதி வுத்தோ விதக்கோயேவ ஆக³தோ. லாப⁴ம் லபி⁴த்வா ஹி இட்டா²னிட்ட²ம் ஸுந்த³ராஸுந்த³ரஞ்ச விதக்கேனேவ வினிச்சி²னாதி – ‘ஏத்தகம் மே ரூபாரம்மணத்தா²ய ப⁴விஸ்ஸதி, ஏத்தகம் ஸத்³தா³தி³ஆரம்மணத்தா²ய, ஏத்தகம் மய்ஹம் ப⁴விஸ்ஸதி, ஏத்தகம் பரஸ்ஸ, ஏத்தகம் பரிபு⁴ஞ்ஜிஸ்ஸாமி, ஏத்தகம் நித³ஹிஸ்ஸாமீ’தி. தேன வுத்தம் ‘‘லாப⁴ம் படிச்ச வினிச்ச²யோ’’தி.

ச²ந்த³ராகோ³தி ஏவம் அகுஸலவிதக்கேன விதக்கிதே வத்து²ஸ்மிம் து³ப்³ப³லராகோ³ ச ப³லவராகோ³ ச உப்பஜ்ஜதி. இத³ஞ்ஹி இத⁴ ச²ந்தோ³தி து³ப்³ப³லராக³ஸ்ஸாதி⁴வசனம். அஜ்ஜோ²ஸானந்தி அஹம் மமந்தி ப³லவஸன்னிட்டா²னம். பரிக்³க³ஹோதி தண்ஹாதி³ட்டி²வஸேன பரிக்³க³ஹகரணம். மச்ச²ரியந்தி பரேஹி ஸாதா⁴ரணபா⁴வஸ்ஸ அஸஹனதா. தேனேவஸ்ஸ போராணா ஏவம் வசனத்த²ம் வத³ந்தி – ‘‘இத³ம் அச்ச²ரியம் மய்ஹமேவ ஹோது, மா அஞ்ஞஸ்ஸ அச்ச²ரியம் ஹோதூதி பவத்தத்தா மச்ச²ரியந்தி வுச்சதீ’’தி. ஆரக்கோ²தி த்³வாரபித³ஹனமஞ்ஜுஸகோ³பனாதி³வஸேன ஸுட்டு² ரக்க²ணம். அதி⁴கரோதீதி அதி⁴கரணம்; காரணஸ்ஸேதம் நாமம். ஆரக்கா²தி⁴கரணந்தி பா⁴வனபும்ஸகம்; ஆரக்க²ஹேதூதி அத்தோ². த³ண்டா³தா³னாதீ³ஸு பரனிஸேத⁴னத்த²ம் த³ண்ட³ஸ்ஸ ஆதா³னம் த³ண்டா³தா³னம். ஏகதோதா⁴ராதி³னோ ஸத்த²ஸ்ஸ ஆதா³னம் ஸத்தா²தா³னம். கலஹோதி காயகலஹோபி வாசாகலஹோபி. புரிமோ புரிமோ விரோதோ⁴ விக்³க³ஹோ, பச்சி²மோ பச்சி²மோ விவாதோ³. துவம் துவந்தி அகா³ரவவசனம், த்வம் த்வந்தி அத்தோ².

964. இஞ்ஜிதானீதி இஞ்ஜனானி சலனானி. அஸ்மீதி இஞ்ஜிதமேதந்திஆதீ³ஹி ஸப்³ப³பதே³ஹி மானோவ கதி²தோ. அஹந்தி பவத்தோபி ஹி மானோ இஞ்ஜிதமேவ, அயமஹந்தி பவத்தோபி, நேவஸஞ்ஞீனாஸஞ்ஞீ ப⁴விஸ்ஸந்தி பவத்தோபி. ஸேஸனவகேஹிபி மானோவ கதி²தோ. மானோ ஹி இஞ்ஜனதோ இஞ்ஜிதம், மஞ்ஞனதோ மஞ்ஞிதம், ப²ந்த³னதோ ப²ந்தி³தம், பபஞ்சனதோ பபஞ்சிதம். தேஹி தேஹி காரணேஹி ஸங்க²தத்தா ஸங்க²தந்தி ச வுச்சதி. ஸேஸம் ஸப்³ப³த்த² உத்தானத்த²மேவாதி.

நவகனித்³தே³ஸவண்ணனா.