(4.) சதுக்கனித்³தே³ஸவண்ணனா

939. சதுக்கனித்³தே³ஸே தண்ஹுப்பாதே³ஸு சீவரஹேதூதி ‘கத்த² மனாபம் சீவரம் லபி⁴ஸ்ஸாமீ’தி சீவரகாரணா உப்பஜ்ஜதி. இதிப⁴வாப⁴வஹேதூதி ஏத்த² இதீதி நித³ஸ்ஸனத்தே² நிபாதோ; யதா² சீவராதி³ஹேது ஏவம் ப⁴வாப⁴வஹேதூதிபி அத்தோ². ப⁴வாப⁴வோதி சேத்த² பணீதபணீததரானி தேலமது⁴பா²ணிதாதீ³னி அதி⁴ப்பேதானி. இமேஸம் பன சதுன்னம் தண்ஹுப்பாதா³னம் பஹானத்தா²ய படிபாடியாவ சத்தாரோ அரியவம்ஸா தே³ஸிதாதி வேதி³தப்³பா³.

அக³திக³மனேஸு ச²ந்தா³க³திம் க³ச்ச²தீதி ச²ந்தே³ன பேமேன அக³திம் க³ச்ச²தி, அகத்தப்³ப³ம் கரோதி. பரபதே³ஸுபி ஏஸேவ நயோ. தத்த² யோ ‘அயம் மே மித்தோ வா ஸந்தி³ட்டோ² வா ஸம்ப⁴த்தோ வா ஞாதகோ வா லஞ்ஜம் வா பன மே தே³தீ’தி ச²ந்த³வஸேன அஸ்ஸாமிகம் ஸாமிகம் கரோதி – அயம் ச²ந்தா³க³திம் க³ச்ச²தி நாம. யோ ‘அயம் மே வேரீ’தி பகதிவேரவஸேன வா தங்க²ணுப்பன்னகோத⁴வஸேன வா ஸாமிகம் அஸ்ஸாமிகம் கரோதி – அயம் தோ³ஸாக³திம் க³ச்ச²தி நாம. யோ பன மந்த³த்தா மோமூஹத்தா யம் வா தம் வா வத்வா அஸ்ஸாமிகம் ஸாமிகம் கரோதி – அயம் மோஹாக³திம் க³ச்ச²தி நாம. யோ பன ‘அயம் ராஜவல்லபோ⁴ வா விஸமனிஸ்ஸிதோ வா அனத்த²ம்பி மே கரேய்யா’தி பீ⁴தோ அஸ்ஸாமிகம் ஸாமிகம் கரோதி – அயம் ப⁴யாக³திம் க³ச்ச²தி நாம. யோ வா பன பா⁴ஜியட்டா²னே கிஞ்சி பா⁴ஜேந்தோ ‘அயம் மே மித்தோ வா ஸந்தி³ட்டோ² வா ஸம்ப⁴த்தோ வா’தி பேமவஸேன அதிரேகம் தே³தி, ‘அயம் மே வேரீ’தி தோ³ஸவஸேன ஊனகம் தே³தி, மோமூஹத்தா தி³ன்னாதி³ன்னம் அஜானமானோ கஸ்ஸசி ஊனகம் கஸ்ஸசி அதி⁴கம் தே³தி, ‘அயம் இமஸ்மிம் அதீ³யமானே மய்ஹம் அனத்த²ம்பி கரேய்யா’தி பீ⁴தோ கஸ்ஸசி அதிரேகம் தே³தி, ஸோ சதுப்³பி³தோ⁴பி யதா²னுக்கமேன ச²ந்தா³க³திஆதீ³னி க³ச்ச²தி நாம. அரியா ஏதாய ந க³ச்ச²ந்தீதி அக³தி, அனரியா இமினா அக³திம் க³ச்ச²ந்தீதி அக³திக³மனம். இமம் த்³வயம் சதுன்னம்பி ஸாதா⁴ரணவஸேன வுத்தம். ச²ந்தே³ன க³மனம் ச²ந்த³க³மனம். இத³ம் தோ³ஸாதீ³னம் அஸாதா⁴ரணவஸேன வுத்தம். ஸகபக்க²ராக³ஞ்ச பரபக்க²தோ³ஸஞ்ச புரக்க²த்வா அஸமக்³க³பா⁴வேன க³மனம் வக்³க³க³மனம். இத³ம் ச²ந்த³தோ³ஸஸாதா⁴ரணவஸேன வுத்தம். வாரினோ விய யதா²னின்னம் க³மனந்தி வாரிக³மனம். இத³ம் சதுன்னம்பி ஸாதா⁴ரணவஸேன வுத்தம்.

விபரியாஸேஸு அனிச்சாதீ³னி வத்தூ²னி நிச்சந்திஆதி³னா நயேன விபரீததோ ஏஸந்தீதி விபரியாஸா, ஸஞ்ஞாய விபரியாஸோ ஸஞ்ஞாவிபரியாஸோ. இதரேஸுபி த்³வீஸு ஏஸேவ நயோ. ஏவமேதே சதுன்னம் வத்தூ²னம் வஸேன சத்தாரோ, யேஸு வத்தூ²ஸு ஸஞ்ஞாதீ³னம் வஸேன த்³வாத³ஸ ஹோந்தி. தேஸு அட்ட² ஸோதாபத்திமக்³கே³ன பஹீயந்தி. அஸுபே⁴ ஸுப⁴ந்தி ஸஞ்ஞாசித்தவிபல்லாஸா ஸகதா³கா³மிமக்³கே³ன தனுகா ஹோந்தி, அனாகா³மிமக்³கே³ன பஹீயந்தி. து³க்கே² ஸுக²ந்தி ஸஞ்ஞாசித்தவிபல்லாஸா அரஹத்தமக்³கே³ன பஹீயந்தீதி வேதி³தப்³பா³.

அனரியவோஹாரேஸு அனரியவோஹாராதி அனரியானம் லாமகானம் வோஹாரா. தி³ட்ட²வாதி³தாதி ‘தி³ட்ட²ம் மயா’தி ஏவம் வாதி³தா. ஏத்த² ச தம் தம் ஸமுட்டா²பிகசேதனாவஸேன அத்தோ² வேதி³தப்³போ³. ஸஹ ஸத்³தே³ன சேதனா கதி²தாதிபி வுத்தமேவ. து³தியசதுக்கேபி ஏஸேவ நயோ. அரியோ ஹி அதி³ஸ்வா வா ‘தி³ட்ட²ம் மயா’தி தி³ஸ்வா வா ‘ந தி³ட்ட²ம் மயா’தி வத்தா நாம நத்தி²; அனரியோவ ஏவம் வத³தி. தஸ்மா ஏவம் வத³ந்தஸ்ஸ ஏதா ஸஹ ஸத்³தே³ன அட்ட² சேதனா அனரியவோஹாராதி வேதி³தப்³பா³.

து³ச்சரிதேஸு பட²மசதுக்கம் வேரசேதனாவஸேன வுத்தம், து³தியம் வசீது³ச்சரிதவஸேன.

ப⁴யேஸு பட²மசதுக்கே ஜாதிம் படிச்ச உப்பன்னம் ப⁴யம் ஜாதிப⁴யம். ஸேஸேஸுபி ஏஸேவ நயோ. து³தியசதுக்கே ராஜதோ உப்பன்னம் ப⁴யம் ராஜப⁴யம். ஸேஸேஸுபி ஏஸேவ நயோ.

ததியசதுக்கே சத்தாரி ப⁴யானீதி மஹாஸமுத்³தே³ உத³கம் ஓரோஹந்தஸ்ஸ வுத்தப⁴யானி. மஹாஸமுத்³தே³ கிர மஹிந்த³வீசி நாம ஸட்டி² யோஜனானி உக்³க³ச்ச²தி. க³ங்கா³வீசி நாம பண்ணாஸ. ரோஹணவீசி நாம சத்தாலீஸ யோஜனானி உக்³க³ச்ச²தி. ஏவரூபா ஊமியோ படிச்ச உப்பன்னம் ப⁴யம் ஊமிப⁴யம் நாம. கும்பீ⁴லதோ உப்பன்னம் ப⁴யம் கும்பீ⁴லப⁴யம். உத³காவட்டதோ ப⁴யம் ஆவட்டப⁴யம். ஸுஸுகா வுச்சதி சண்ட³மச்சோ²; ததோ ப⁴யம் ஸுஸுகாப⁴யம்.

சதுத்த²சதுக்கே அத்தானுவாத³ப⁴யந்தி பாபகம்மினோ அத்தானம் அனுவத³ந்தஸ்ஸ உப்பஜ்ஜனகப⁴யம். பரானுவாத³ப⁴யந்தி பரஸ்ஸ அனுவாத³தோ உப்பஜ்ஜனகப⁴யம். த³ண்ட³ப⁴யந்தி அகா³ரிகஸ்ஸ ரஞ்ஞா பவத்திதத³ண்ட³ம், அனகா³ரிகஸ்ஸ வினயத³ண்ட³ம் படிச்ச உப்பஜ்ஜனகப⁴யம். து³க்³க³திப⁴யந்தி சத்தாரோ அபாயே படிச்ச உப்பஜ்ஜனகப⁴யம். இதி இமேஹி சதூஹி சதுக்கேஹி ஸோளஸ மஹாப⁴யானி நாம கதி²தானி.

தி³ட்டி²சதுக்கே திம்ப³ருகதி³ட்டி² (ஸம். நி. 2.18) நாம கதி²தா. தத்த² ஸயம்கதம் ஸுக²து³க்க²ந்தி வேத³னம் அத்ததோ ஸமனுபஸ்ஸதோ வேத³னாய ஏவ வேத³னா கதாதி உப்பன்னா தி³ட்டி². ஏவஞ்ச ஸதி தஸ்ஸா வேத³னாய புப்³பே³பி அத்தி²தா ஆபஜ்ஜதீதி அயம் ஸஸ்ஸததி³ட்டி² நாம ஹோதி. ஸச்சதோ தே²ததோதி ஸச்சதோ தி²ரதோ. பரம்கதந்தி பச்சுப்பன்னவேத³னதோ அஞ்ஞம் வேத³னாகாரணம் வேத³னத்தானம் ஸமனுபஸ்ஸதோ ‘அஞ்ஞாய வேத³னாய அயம் வேத³னா கதா’தி உப்பன்னா தி³ட்டி². ஏவம் ஸதி புரிமாய காரணவேத³னாய உச்சே²தோ³ ஆபஜ்ஜதீதி அயம் உச்சே²த³தி³ட்டி² நாம ஹோதி. ஸயம்கதஞ்ச பரம்கதஞ்சாதி யதா²வுத்தேனேவ அத்தே²ன ‘உபட்³ட⁴ம் ஸயம்கதம், உபட்³ட⁴ம் பரேன கத’ந்தி க³ண்ஹதோ உப்பன்னா தி³ட்டி² – அயம் ஸஸ்ஸதுச்சே²த³தி³ட்டி² நாம. சதுத்தா² அகாரணா ஏவ ஸுக²து³க்க²ம் ஹோதீதி க³ண்ஹதோ உப்பன்னா தி³ட்டி². ஏவம் ஸதி அயம் அஹேதுகதி³ட்டி² நாம. ஸேஸமேத்த² ஹேட்டா² வுத்தனயத்தா உத்தானத்த²மேவாதி.

சதுக்கனித்³தே³ஸவண்ணனா நிட்டி²தா.