(5.) பஞ்சகனித்³தே³ஸவண்ணனா

940. பஞ்சகனித்³தே³ஸே யஸ்மா யேஸம் ஸக்காயதி³ட்டி²ஆதீ³னி அப்பஹீனானி, தே ப⁴வக்³கே³பி நிப்³ப³த்தே ஏதானி ஆகட்³டி⁴த்வா காமப⁴வேயேவ பாதேந்தி, தஸ்மா ஓரம்பா⁴கி³யானி ஸம்யோஜனானீதி வுத்தானி. இதி ஏதானி பஞ்ச க³ச்ச²ந்தம் ந வாரேந்தி, க³தம் பன ஆனேந்தி. ரூபராகா³தீ³னிபி பஞ்ச க³ச்ச²ந்தம் ந வாரேந்தி, ஆக³ந்தும் பன ந தே³ந்தி. ராகா³த³யோ பஞ்ச லக்³க³னட்டே²ன ஸங்கா³, அனுபவிட்ட²ட்டே²ன பன ஸல்லாதி வுத்தா.

941. சேதோகி²லாதி சித்தஸ்ஸ த²த்³த⁴பா⁴வா கசவரபா⁴வா கா²ணுகபா⁴வா. ஸத்த²ரி கங்க²தீதி ஸத்து² ஸரீரே வா கு³ணே வா கங்க²தி. ஸரீரே கங்க²மானோ ‘த்³வத்திம்ஸவரலக்க²ணபடிமண்டி³தம் நாம ஸரீரம் அத்தி² நு கோ² நத்தீ²’தி கங்க²தி. கு³ணே கங்க²மானோ ‘அதீதானாக³தபச்சுப்பன்னஜானனஸமத்த²ம் ஸப்³ப³ஞ்ஞுதஞாணம் அத்தி² நு கோ² நத்தீ²’தி கங்க²தி. விசிகிச்ச²தீதி விசினந்தோ கிச்ச²தி, து³க்க²ம் ஆபஜ்ஜதி, வினிச்சே²தும் ந ஸக்கோதி. நாதி⁴முச்சதீதி ‘ஏவமேத’ந்தி அதி⁴மோக்க²ம் ந படிலப⁴தி. ந ஸம்பஸீத³தீதி கு³ணேஸு ஓதரித்வா நிப்³பி³சிகிச்ச²பா⁴வேன பஸீதி³தும் அனாவிலோ ப⁴விதும் ந ஸக்கோதி.

த⁴ம்மேதி பரியத்தித⁴ம்மே ச படிவேத⁴த⁴ம்மே ச. பரியத்தித⁴ம்மே கங்க²மானோ ‘தேபிடகம் பு³த்³த⁴வசனம் சதுராஸீதித⁴ம்மக்க²ந்த⁴ஸஹஸ்ஸானீதி வத³ந்தி, அத்தி² நு கோ² ஏதம் நத்தீ²’தி கங்க²தி. படிவேத⁴த⁴ம்மே கங்க²மானோ ‘விபஸ்ஸனானிஸ்ஸந்தோ³ மக்³கோ³ நாம, மக்³க³னிஸ்ஸந்தோ³ ப²லம் நாம, ஸப்³ப³ஸங்கா²ரபடினிஸ்ஸக்³கோ³ நிப்³பா³னம் நாமாதி வத³ந்தி, தம் அத்தி² நு கோ² நத்தீ²தி கங்க²தி’.

ஸங்கே⁴ கங்க²தீதி ‘உஜுப்படிபன்னோதிஆதீ³னம் பதா³னம் வஸேன ஏவரூபம் படிபத³ம் படிபன்னா சத்தாரோ மக்³க³ட்டா² சத்தாரோ ப²லட்டா²தி அட்ட²ன்னம் புக்³க³லானம் ஸமூஹபூ⁴தோ ஸங்கோ⁴ நாம அத்தி² நு கோ² நத்தீ²’தி கங்க²தி. ஸிக்கா²ய கங்க²மானோ ‘அதி⁴ஸீலஸிக்கா² நாம அதி⁴சித்தஸிக்கா² நாம அதி⁴பஞ்ஞா ஸிக்கா² நாமாதி வத³ந்தி, ஸா அத்தி² நு கோ² நத்தீ²’தி கங்க²தி.

சேதஸோவினிப³ந்தா⁴தி சித்தம் ப³ந்தி⁴த்வா முட்டி²யம் கத்வா விய க³ண்ஹந்தீதி சேதஸோவினிப³ந்தா⁴. காமேதி வத்து²காமேபி கிலேஸகாமேபி. காயேதி அத்தனோ காயே. ரூபேதி ப³ஹித்³தா⁴ ரூபே. யாவத³த்த²ந்தி யத்தகம் இச்ச²தி தத்தகம். உத³ராவதே³ஹகந்தி உத³ரபூரம். தஞ்ஹி உத³ரம் அவதே³ஹனதோ உத³ராவதே³ஹகந்தி வுச்சதி. ஸேய்யஸுக²ந்தி மஞ்சபீட²ஸுக²ம் உதுஸுக²ம் வா. பஸ்ஸஸுக²ந்தி யதா² ஸம்பரிவத்தகம் ஸயந்தஸ்ஸ த³க்கி²ணபஸ்ஸவாமபஸ்ஸானம் ஸுக²ம் ஹோதி, ஏவம் உப்பன்னஸுக²ம். மித்³த⁴ஸுக²ந்தி நித்³தா³ஸுக²ம். அனுயுத்தோதி யுத்தபயுத்தோ விஹரதி. பணிதா⁴யாதி பத்த²யித்வா. ஸீலேனாதிஆதீ³ஸு ஸீலந்தி சதுபாரிஸுத்³தி⁴ஸீலம். வதந்தி வதஸமாதா³னம். தபோதி தபசரணம். ப்³ரஹ்மசரியந்தி மேது²னவிரதி. தே³வோ வா ப⁴விஸ்ஸாமீதி மஹேஸக்க²தே³வோ வா ப⁴விஸ்ஸாமி. தே³வஞ்ஞதரோ வாதி அப்பேஸக்க²தே³வேஸு வா அஞ்ஞதரோ. குஸலத⁴ம்மே ஆவரந்தி நிவாரேந்தீதி நீவரணானி.

மாதா ஜீவிதா வோரோபிதா ஹோதீதி மனுஸ்ஸேனேவ ஸகஜனிகா மனுஸ்ஸமாதா ஜீவிதா வோரோபிதா ஹோதி. பிதாபி மனுஸ்ஸபிதாவ. அரஹாபி மனுஸ்ஸஅரஹாவ. து³ட்டே²ன சித்தேனாதி வத⁴கசித்தேன.

ஸஞ்ஞீதி ஸஞ்ஞாஸமங்கீ³. அரோகோ³தி நிச்சோ. இத்தே²கே அபி⁴வத³ந்தீதி இத்த²ம் ஏகே அபி⁴வத³ந்தி, ஏவமேகே அபி⁴வத³ந்தீதி அத்தோ². ஏத்தாவதா ஸோளஸ ஸஞ்ஞீவாதா³ கதி²தா. அஸஞ்ஞீதி ஸஞ்ஞாவிரஹிதோ. இமினா பதே³ன அட்ட² அஸஞ்ஞீவாதா³ கதி²தா. ததியபதே³ன அட்ட² நேவஸஞ்ஞீனாஸஞ்ஞீவாதா³ கதி²தா. ஸதோ வா பன ஸத்தஸ்ஸாதி அத²வா பன விஜ்ஜமானஸ்ஸேவ ஸத்தஸ்ஸ. உச்சே²த³ந்தி உபச்சே²த³ம். வினாஸந்தி அத³ஸ்ஸனம். விப⁴வந்தி பா⁴வவிக³மம். ஸப்³பா³னேதானி அஞ்ஞமஞ்ஞவேவசனானேவ. தத்த² த்³வே ஜனா உச்சே²த³தி³ட்டி²ம் க³ண்ஹந்தி – லாபீ⁴ ச அலாபீ⁴ ச. தத்த² லாபீ⁴ அரஹதோ தி³ப்³பே³ன சக்கு²னா சுதிம் தி³ஸ்வா உபபத்திம் அபஸ்ஸந்தோ, யோ வா சுதிமத்தமேவ த³ட்டு²ம் ஸக்கோதி ந உபபாதம், ஸோ உச்சே²த³தி³ட்டி²ம் க³ண்ஹாதி. அலாபீ⁴ ‘கோ பரலோகம் ஜானாதீ’தி காமஸுக²கி³த்³த⁴தாய வா ‘யதா² ருக்க²தோ பண்ணானி பதிதானி ந புன விருஹந்தி, ஏவம் ஸத்தா’திஆதி³னா விதக்கேன வா உச்சே²த³ம் க³ண்ஹாதி. இத⁴ பன தண்ஹாதி³ட்டீ²னம் வஸேன ததா² ச அஞ்ஞதா² ச விகப்பேத்வாவ உப்பன்னா ஸத்த உச்சே²த³வாதா³ கதி²தா. தேஸஞ்ஹி இத³ம் ஸங்க³ஹவசனம். தி³ட்ட²த⁴ம்மனிப்³பா³னம் வா பனேகேதி ஏத்த² தி³ட்ட²த⁴ம்மோதி பச்சக்க²த⁴ம்மோ வுச்சதி. தத்த² தத்த² படிலத்³த⁴த்தபா⁴வஸ்ஸேதம் அதி⁴வசனம். தி³ட்ட²த⁴ம்மே நிப்³பா³னம் தி³ட்ட²த⁴ம்மனிப்³பா³னம்; இமஸ்மிம்யேவ அத்தபா⁴வே து³க்கா² வூபஸம்மந்தி அத்தோ². இத³ம் பஞ்சன்னம் தி³ட்ட²த⁴ம்மனிப்³பா³னவாதா³னம் ஸங்க³ஹவசனம்.

942. வேராதி வேரசேதனா. ப்³யஸனாதி வினாஸா. அக்க²ந்தியாதி அனதி⁴வாஸனாய. அப்பியோதி த³ஸ்ஸனஸவனபடிகூலதாய ந பியாயிதப்³போ³. சிந்தேதும்பி படிகூலத்தா மனோ ஏதஸ்மிம் ந அப்பேதீதி அமனாபோ. வேரப³ஹுலோதி ப³ஹுவேரோ. வஜ்ஜப³ஹுலோதி ப³ஹுதோ³ஸோ.

ஆஜீவகப⁴யந்தி ஆஜீவம் ஜீவிதவுத்திம் படிச்ச உப்பன்னம் ப⁴யம். தம் அகா³ரிகஸ்ஸபி ஹோதி அனகா³ரிகஸ்ஸபி. தத்த² அகா³ரிகேன தாவ ஆஜீவஹேது ப³ஹும் அகுஸலம் கதம் ஹோதி. அத²ஸ்ஸ மரணஸமயே நிரயே உபட்ட²ஹந்தே ப⁴யம் உப்பஜ்ஜதி. அனகா³ரிகேனாபி ப³ஹு அனேஸனா கதா ஹோதி. அத²ஸ்ஸ மரணகாலே நிரயே உபட்ட²ஹந்தே ப⁴யம் உப்பஜ்ஜதி. இத³ம் ஆஜீவகப⁴யம் நாம. அஸிலோகப⁴யந்தி க³ரஹப⁴யம் பரிஸஸாரஜ்ஜப⁴யந்தி கதபாபஸ்ஸ புக்³க³லஸ்ஸ ஸன்னிபதிதம் பரிஸம் உபஸங்கமந்தஸ்ஸ ஸாரஜ்ஜஸங்கா²தம் ப⁴யம் உப்பஜ்ஜதி. இத³ம் பரிஸஸாரஜ்ஜப⁴யம் நாம. இதரத்³வயம் பாகடமேவ.

943. தி³ட்ட²த⁴ம்மனிப்³பா³னவாரேஸு பஞ்சஹி காமகு³ணேஹீதி மனாபியரூபாதீ³ஹி பஞ்சஹி காமகோட்டா²ஸேஹி ப³ந்த⁴னேஹி வா. ஸமப்பிதோதி ஸுட்டு² அப்பிதோ அல்லீனோ ஹுத்வா. ஸமங்கீ³பூ⁴தோதி ஸமன்னாக³தோ. பரிசாரேதீதி தேஸு காமகு³ணேஸு யதா²ஸுக²ம் இந்த்³ரியானி சாரேதி ஸஞ்சாரேதி இதோ சிதோ ச உபனேதி; அத² வா பன லளதி ரமதி கீளதீதி. ஏத்த² ச து³விதா⁴ காமகு³ணா – மானுஸ்ஸகா சேவ தி³ப்³பா³ ச. மானுஸ்ஸகா மந்தா⁴துகாமகு³ணஸதி³ஸா த³ட்ட²ப்³பா³; தி³ப்³பா³ பரனிம்மிதவஸவத்திதே³வராஜஸ்ஸ காமகு³ணஸதி³ஸாதி. ஏவரூபே காமே உபக³தஞ்ஹி தே பரமதி³ட்ட²த⁴ம்மனிப்³பா³னப்பத்தோ ஹோதீதி வத³ந்தி. தத்த² பரமதி³ட்ட²த⁴ம்மனிப்³பா³னந்தி பரமம் தி³ட்ட²த⁴ம்மனிப்³பா³னம், உத்தமந்தி அத்தோ².

து³தியவாரே ஹுத்வா அபா⁴வட்டே²ன அனிச்சா; படிபீளனட்டே²ன து³க்கா²; பகதிஜஹனட்டே²ன விபரிணாமத⁴ம்மாதி வேதி³தப்³பா³. தேஸம் விபரிணாமஞ்ஞதா²பா⁴வாதி தேஸம் காமானம் விபரிணாமஸங்கா²தா அஞ்ஞதா²பா⁴வா. ‘யம்பி மே அஹோஸி தம்பி மே நத்தீ²’தி வுத்தனயேன உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா. தத்த² அந்தோனிஜ்ஜா²யனலக்க²ணோ ஸோகோ; தன்னிஸ்ஸிதலாலப்பலக்க²ணோ பரிதே³வோ; காயபடிபீளனலக்க²ணம் து³க்க²ம்; மனோவிகா⁴தலக்க²ணம் தோ³மனஸ்ஸம்; விகா⁴தலக்க²ணோ உபாயாஸோ.

விதக்கிதந்தி அபி⁴னிரோபனவஸேன பவத்தோ விதக்கோ. விசாரிதந்தி அனுமஜ்ஜனவஸேன பவத்தோ விசாரோ. ஏதேன ஏதந்தி ஏதேன விதக்கேன ச விசாரேன ச ஏதம் பட²மஜ்ஜா²னம் ஓளாரிகம் ஸகண்டகம் விய கா²யதி.

பீதிக³தந்தி பீதிமேவ. சேதஸோ உப்பிலாவிதந்தி சித்தஸ்ஸ உப்பிலபா⁴வகரணம். சேதஸோ ஆபோ⁴கோ³தி ஜா²னா வுட்டா²ய தஸ்மிம் ஸுகே² புனப்புனம் சித்தஸ்ஸ ஆபோ⁴கோ³ மனஸிகாரோதி. ஸேஸம் ஸப்³ப³த்த² உத்தானத்த²மேவாதி.

பஞ்சகனித்³தே³ஸவண்ணனா நிட்டி²தா.