7-12. பச்சனீயபட்டா²னவண்ணனா

1. இதா³னி குஸலாதீ³னம் பதா³னம் படிக்கே²பவஸேன த⁴ம்மானம் பச்சனீயதாய லத்³த⁴னாமம் பச்சனீயபட்டா²னம் த³ஸ்ஸேதும் நகுஸலம் த⁴ம்மம் படிச்ச நகுஸலோ த⁴ம்மோ உப்பஜ்ஜதி ஹேதுபச்சயாதிஆதி³ ஆரத்³த⁴ம். தத்த² நகுஸலம் த⁴ம்மம் படிச்சாதி குஸலஸ்ஸ பச்சயபா⁴வம் வாரேதி. நகுஸலோ த⁴ம்மோ உப்பஜ்ஜதீதி குஸலஸ்ஸ உப்பத்திம் வாரேதி, தஸ்மா ‘‘அகுஸலாப்³யாகதம் ஏகம் க²ந்த⁴ம் படிச்ச அகுஸலாப்³யாகதா தயோ க²ந்தா⁴ சித்தஸமுட்டா²னஞ்ச ரூப’’ந்தி ஏவமாதி³னா நயேனேத்த² பஞ்ஹம் விஸ்ஸஜ்ஜிதப்³ப³ம். தஸ்மிம் தஸ்மிம் பச்சயே லத்³த⁴க³ணனா பன பாளியம் வுத்தாயேவ. யேபி வாரா ஸதி³ஸவிஸ்ஸஜ்ஜனா, தேபி தத்தே²வ த³ஸ்ஸிதா. தஸ்மா ஸப்³ப³மேத்த² ஹேட்டா² வுத்தனயானுஸாரேன பாளிம் உபபரிக்கி²த்வா வேதி³தப்³ப³ம். யதா² சேத்த², ஏவம் து³கபட்டா²னே, து³கதிகபட்டா²னே, திகது³கபட்டா²னே திகதிகபட்டா²னே, து³கது³கபட்டா²னே ச.

ஏத்தாவதா –

திகஞ்ச பட்டா²னவரம் து³குத்தமம்,

து³கம் திகஞ்சேவ திகம் து³கஞ்ச;

திகம் திகஞ்சேவ, து³கம் து³கஞ்ச,

ச² பச்சனீயம்ஹி நயா ஸுக³ம்பீ⁴ராதி. –

அட்ட²கதா²யம் வுத்தகா³தா²ய தீ³பிதா. த⁴ம்மபச்சனீயபட்டா²னே ச² நயா நித்³தி³ட்டா² ஹோந்தி. பச்சயவஸேன பனேத்த² ஏகேகஸ்மிம் பட்டா²னே அனுலோமாத³யோ சத்தாரோ சத்தாரோ நயாதி ஏகேன பரியாயேன சதுவீஸதினயபடிமண்டி³தம் பச்சனீயபட்டா²னஞ்ஞேவ வேதி³தப்³ப³ம்.

பச்சனீயபட்டா²னவண்ணனா.