13-18. அனுலோமபச்சனீயபட்டா²னவண்ணனா

1. இதா³னி குஸலாதீ³ஸு த⁴ம்மேஸு பச்சயத⁴ம்மம் அப்படிக்கி²பித்வா பச்சயுப்பன்னஸ்ஸ குஸலாதி³பா⁴வபடிக்கே²பவஸேன த⁴ம்மானம் அனுலோமபச்சனீயதாய லத்³த⁴னாமம் அனுலோமபச்சனீயபட்டா²னம் த³ஸ்ஸேதும் குஸலம் த⁴ம்மம் படிச்ச ந குஸலோ த⁴ம்மோ உப்பஜ்ஜதி ஹேதுபச்சயாதிஆதி³ ஆரத்³த⁴ம். தத்த² குஸலம் த⁴ம்மம் படிச்சாதி குஸலஸ்ஸ பச்சயபா⁴வம் அனுஜானாதி. ந குஸலோ த⁴ம்மோ உப்பஜ்ஜதீதி குஸலஸ்ஸேவ உப்பத்திம் வாரேதி. தஸ்மா ‘‘குஸலே க²ந்தே⁴ படிச்ச சித்தஸமுட்டா²னம் ரூப’’ந்திஆதி³னா நயேன விஸ்ஸஜ்ஜனம் த³ஸ்ஸிதம், தம் ஸப்³ப³ம் பாளிம் ஓலோகேத்வா ஸாது⁴கம் ஸல்லக்கே²தப்³ப³ம். யம்பி யேன ஸதி³ஸம், யஞ்ச யத்த² லப்³ப⁴தி, யோ ச யேஸம் விஸ்ஸஜ்ஜனானம் யேஸு பச்சயேஸு க³ணனபரிச்சே²தோ³, ஸோ ஸப்³போ³ பாளியம் த³ஸ்ஸிதோ, தஸ்மா பாளியேவ ஏத்த² அத்தோ². யதா² சேத்த², ஏவம் து³கபட்டா²னாதீ³ஸுபீதி.

ஏத்தாவதா –

திகஞ்ச பட்டா²னவரம் து³குத்தமம்,

து³கம் திகஞ்சேவ திகம் து³கஞ்ச;

திகம் திகஞ்சேவ து³கம் து³கஞ்ச,

ச² அனுலோமபச்சனீயம்ஹி நயா ஸுக³ம்பீ⁴ராதி. –

அட்ட²கதா²யம் வுத்தகா³தா²ய தீ³பிதா த⁴ம்மானுலோமபச்சனீயபட்டா²னே ச² நயா நித்³தி³ட்டா² ஹோந்தி. பச்சயவஸேன பனேத்த² ஏகேகஸ்மிம் பட்டா²னே அனுலோமாத³யோ சத்தாரோ சத்தாரோ நயாதி ஏகேன பரியாயேன சதுவீஸதினயபடிமண்டி³தம் அனுலோமபச்சனீயபட்டா²னஞ்ஞேவ வேதி³தப்³ப³ம்.

அனுலோமபச்சனீயபட்டா²னவண்ணனா.