5-22. ஸங்கிலிட்ட²த்திகாதி³வண்ணனா

ஸங்கிலிட்ட²ஸங்கிலேஸிகத்திகே ஸப்³ப³ம் குஸலத்திகே வுத்தனயானுஸாரேனேவ வேதி³தப்³ப³ம்.

79. விதக்கத்திகே யதா²கம்மூபக³ஞாணஸ்ஸ பரிகம்மந்தி தி³ப்³ப³சக்கு²பரிகம்மமேவ தஸ்ஸ உப்பாத³னத்தா²ய பரிகம்மம். உப்பன்னஸ்ஸ பன வளஞ்ஜனகாலே பரிகம்மம் ஸந்தா⁴யேதம் வுத்தம். ஸேஸமேத்த² யதா²பாளிமேவ நிய்யாதி.

82. தி ததா³ரம்மணப⁴வங்க³மூலப⁴வங்கா³னம் வஸேன வுத்தம். ஸேஸமேத்த² ஸப்³ப³ம் பாளிவஸேனேவ வேதி³தப்³ப³ம்.

த³ஸ்ஸனத்திகே த³ஸ்ஸனேன பஹாதப்³போ³ ராகோ³ உப்பஜ்ஜதீதிஆதீ³ஸு த³ஸ்ஸனேன பஹாதப்³போ³ புது²ஜ்ஜனஸ்ஸ உப்பஜ்ஜதி. பா⁴வனாய பஹாதப்³போ³ ஸோதாபன்னஸ்ஸாபீதி ஏவம் உபரிமஸ்ஸ உபரிமஸ்ஸ ஹேட்டி²மா ஹேட்டி²மா நுப்பஜ்ஜந்தீதி வேதி³தப்³பா³. த³ஸ்ஸனேன பஹாதப்³போ³ த⁴ம்மோ பா⁴வனாய பஹாதப்³ப³ஸ்ஸ த⁴ம்மஸ்ஸ ஏகேனபி பச்சயேன பச்சயோ ந ஹோதி. ஸேஸமேத்த² பாளிம் அனுக³ந்த்வா குஸலத்திகே வுத்தலக்க²ணவஸேனேவ வேதி³தப்³ப³ம்.

த³ஸ்ஸனேனபஹாதப்³ப³ஹேதுகத்திகே த³ஸ்ஸனேனபஹாதப்³ப³ஹேதுகாதீ³னம் விபா⁴கோ³ அட்ட²கதா²கண்டே³ வுத்தனயேனேவ வேதி³தப்³போ³. விசிகிச்சு²த்³த⁴ச்சஸஹக³தோ மோஹோ அஹேதுகத்தா ததியபதே³ பவிட்டோ². ஏவமேத்த² யேஸம் த³ஸ்ஸனபா⁴வனாஹி பஹாதப்³போ³ ஹேது அத்தி², தே பஹாதப்³ப³ஹேதுகா. யேஸம் ஸோ நத்தி² தே நேவத³ஸ்ஸனேன நபா⁴வனாயபஹாதப்³ப³ஹேதுகாதி இமம் பஹாதப்³ப³ஹேதுகவிபா⁴க³ம் ஞத்வா ஸேஸம் த³ஸ்ஸனேனபஹாதப்³ப³த்திகே சேவ குஸலத்திகே ச த³ஸ்ஸிதலக்க²ணானுஸாரேனேவ வேதி³தப்³ப³ம்.

ஆசயகா³மித்திகே ச படிச்சவாரஸம்ஸட்ட²வாரேஸு அனுலோமம் குஸலத்திகஸதி³ஸமேவ. ஸேஸம் விஸ்ஸஜ்ஜனதோ க³ணனதோ ச யதா²பாளிமேவ நிய்யாதி.

ஸேக்க²த்திகே அஸேக்கோ² த⁴ம்மோ ஸேக்க²ஸ்ஸ த⁴ம்மஸ்ஸ ந கேனசி பச்சயேன பச்சயோ. ஸேக்கோ² அஸேக்க²ஸ்ஸ அனந்தரபகதூபனிஸ்ஸயோ பன ஹோதி. ஸேஸமேத்த² யதா²பாளிமேவ நிய்யாதி, ததா² பரித்தத்திகே.

பரித்தாரம்மணத்திகே அப்பமாணாரம்மணாசேதனாதி ஸேக்கா²னம் கோ³த்ரபு⁴சேதனா, பச்சவேக்க²ணசேதனாதிபி வத்தும் வட்டதி. விபாகானம் பரித்தாரம்மணானந்தி படிஸந்தி⁴யம் கம்மம் ஆரம்மணம் கத்வா, பவத்தே சக்கு²விஞ்ஞாணாதி³வஸேனரூபாதி³ஆரம்மணம், ததா³ரம்மணவஸேன ஜவனேன க³ஹிதபரித்தாரம்மணஞ்ச ஆரம்மணம் கத்வா உப்பன்னானம். யே பன ‘‘கோ³த்ரபு⁴சித்தேன நத்தி² படிஸந்தீ⁴’’தி வத³ந்தி, தே இமினா ஸுத்தேன படிஸேதே⁴தப்³பா³. ஸேஸமேத்த² பாளினயேனேவ வேதி³தப்³ப³ம். ஹீனத்திகோ ஸங்கிலிட்ட²த்திகஸதி³ஸோ.

மிச்ச²த்தத்திகே மிச்ச²த்தனியதோ ஸம்மத்தனியதஸ்ஸ, ஸம்மத்தனியதோ வா மிச்ச²த்தனியதஸ்ஸ கேனசி பச்சயேன பச்சயோ ந ஹோதி. மிச்ச²த்தனியதோ வா ஸம்மத்தனியதோ வா ஸஹஜாதாதி⁴பதிரஹிதோ நாம நத்தி². ஸம்மத்தனியதே ஏகந்ததோ ஆரம்மணபுரேஜாதம் நத்தி², மிச்ச²த்தனியதே ஸியா ஆரம்மணபுரேஜாதம். அனியதம் சித்தம் ஆரப்³ப⁴ நியதா மிச்சா²தி³ட்டி² உப்பஜ்ஜேய்ய. ஸேஸா நியதம் ஆரப்³ப⁴ நியதம் நுப்பஜ்ஜதி, மிச்ச²த்தனியதம் க³ரும் கத்வா ந கோசி த⁴ம்மோ உப்பஜ்ஜதி. குஸலோ மிச்ச²த்தஸ்ஸ உபனிஸ்ஸயபச்சயோ ந ஹோதி. ஸேஸமேத்த² பாளியம் வுத்தனயேனேவ வேதி³தப்³ப³ம்.

மக்³கா³ரம்மணத்திகே படிச்சவாரஸ்ஸ அனுலோமே விபாகபச்சயோ நத்தி². கம்மபச்சயேபி இமஸ்மிம் திகே நானாக்க²ணிகம் ந லப்³ப⁴தி, ததா² உப்பன்னத்திகஅதீதத்திகேஸு. பச்சனீயே அஹேதுகம் மக்³கா³ரம்மணந்தி அஹேதுகம் மக்³கா³ரம்மணம், ஆவஜ்ஜனம் ஸந்தா⁴யேதம் வுத்தம். ஸேஸமேத்த² பாளிஅனுஸாரேனேவ வேதி³தப்³ப³ம்.

உப்பன்னத்திகே ச அதீதத்திகே ச படிச்சவாராத³யோ நத்தி², பஞ்ஹாவாரமத்தமேவ லப்³ப⁴தி. கஸ்மா? படிச்சவாராத³யோ ஹி ஸஹஜாதபுரேஜாதானஞ்ஞேவ ஹோந்தி. இமே ச திகா அதீதானாக³தமிஸ்ஸகா. உப்பன்னத்திகே சேத்த² அனந்தரபா⁴கி³யாபி பச்சயா ந லப்³ப⁴ந்தி. கஸ்மா? உப்பன்னத்திகே அதீதஸ்ஸ அபா⁴வதோ. உப்பன்னோ ச அனுப்பன்னோ சாதி இமே சேத்த² த்³வே த⁴ம்மா உப்பன்னஸ்ஸ ச அனுப்பன்னஸ்ஸ சாதி இமேஸம் த்³வின்னம் ந கேனசி பச்சயேன பச்சயோ. அனுப்பன்னோ ச உப்பாதீ³ சாதி இமே பன த்³வே உப்பன்னஸ்ஸ ஆரம்மணூபனிஸ்ஸயவஸேன த்³வீஹி பச்சயேஹி பச்சயோ. ஸேஸமேத்த² பாளியம் ஆக³தனயேனேவ வேதி³தப்³ப³ம்.

அதீதத்திகே பச்சுப்பன்னம் அதீதானாக³தஸ்ஸ, அதீதானாக³தஞ்ச அதீதானாக³தஸ்ஸ ந கேனசி பச்சயேன பச்சயோ. நிப்³பா³னம் பன த்³வீஸுபி இமேஸு திகேஸு நேவ பச்சயதோ ந பச்சயுப்பன்னதோ லப்³ப⁴தி. ஸேஸமிதா⁴பி பாளியம் ஆக³தனயேனேவ வேதி³தப்³ப³ம்.

அஜ்ஜ²த்தத்திகே அஜ்ஜ²த்தப³ஹித்³தா⁴பத³ம் ந க³ஹிதம். அஜ்ஜ²த்தப³ஹித்³தா⁴ஸங்கா²தா ஹி உபோ⁴ ராஸயோ நேவ ஏகதோ பச்சயா ஹோந்தி, ந பச்சயுப்பன்னா; தஸ்மா ஹத்த²தலே ட²பிதஸ்ஸ ஸாஸபஸ்ஸ வண்ணோபி ஹத்த²தலவண்ணேன ஸத்³தி⁴ம் ஏகதோ ஆரம்மணம் ந ஹோதீதி வேதி³தப்³போ³. யதா² ச அஜ்ஜ²த்தப³ஹித்³தா⁴பத³ம், ஏவமேத்த² அஜ்ஜ²த்தாரம்மணத்திகேபி அஜ்ஜ²த்தப³ஹித்³தா⁴ரம்மணபத³ம் ந லப்³ப⁴தி. ஸேஸம் யதா²பாளிமேவ நிய்யாதி.

ஸனித³ஸ்ஸனத்திகேபி பாளிவஸேனேவ அத்தோ² க³ஹேதப்³போ³. க³ணனாபேத்த² பாளியம் ஆக³தவாரே ஸங்கி²பித்வா ஹேட்டா² வுத்தனயேனேவ ஸம்ஸந்த³னேஸு ஸம்ஸந்தி³த்வா வேதி³தப்³பா³தி.

த⁴ம்மானுலோமே திகபட்டா²னவண்ணனா.