2. து³கபட்டா²னவண்ணனா

து³கபட்டா²னேபி ஸப்³ப³து³கேஸு பஞ்ஹாவிஸ்ஸஜ்ஜனானி சேவ க³ணனா ச பாளியம் ஆக³தனயேனேவ வேதி³தப்³பா³. அபிசேத்த² ஸஹேதுகஹேதுஸம்பயுத்தது³கானம் விஸ்ஸஜ்ஜனம் ஹேதுது³கவிஸ்ஸஜ்ஜனஸதி³ஸம்; ததா² ஹேதூசேவஸஹேதுகஹேதூசேவஹேதுஸம்பயுத்தது³கானம், ததா² ஸப்பச்சயஸங்க²தது³கானம். இத³ம் து³கம் யதா² ஸப்பச்சயது³கம், ஏவம் காதப்³ப³ந்தி இத³ம் யஸ்மா ஸப்பச்சயோ விய அப்பச்சயேன ஸங்க²தோபி, அஸங்க²தேன ஸத்³தி⁴ம் யோஜனம் ந லப்³ப⁴தி, தஸ்மா வுத்தம். ஸாரம்மணசித்தஸம்பயுத்தஸம்ஸட்ட²து³காபி ஸதி³ஸவிஸ்ஸஜ்ஜனாயேவ; ததா² ஆஸவஓக⁴யோக³கோ³ச்ச²கா. ஏதே ஹி தயோ அஞ்ஞமஞ்ஞம் ஸதி³ஸவிஸ்ஸஜ்ஜனாயேவ. அபிச லோகியஸாஸவஸம்யோஜனியக³ந்த²னியனீவரணியபராமட்ட²ஸங்கிலேஸிகது³கா ஆஸவவிப்பயுத்தஸாஸவஸம்யோஜனவிப்பயுத்தஸம்யோஜனியக³ந்த²விப்பயுத்தக³ந்த²னியனீவரணவிப்பயுத்தனீவரணியபராமாஸவிப்பயுத்தபராமட்ட²கிலேஸவிப்பயுத்தஸங்கிலேஸிகபரியாபன்னஸஉத்தரது³காத இமேபி து³கா ஸமானா.

கிலேஸது³கம் ஸம்யோஜனது³கஸதி³ஸம். ஸங்கிலிட்ட²கிலேஸஸம்பயுத்தனீவரணஸம்பயுத்தத³ஸ்ஸனேனபஹாதப்³ப³ஸரணது³காபி ஸமானா. ததா²கிலேஸா சேவ ஸங்கிலிட்ட²னீவரணா சேவ நீவரணஸம்பயுத்தகிலேஸா சேவ கிலேஸஸம்பயுத்தது³கா. இமினா நயேன ஸப்³பே³ஸம் அத்த²தோ ஸதி³ஸானம் து³கானம் விஸ்ஸஜ்ஜனானி ஸதி³ஸானேவ ஹோந்தீதி வேதி³தப்³பா³னி. ஸப்³ப³ஸ்மிம்பி பன பட்டா²னே கேனசிவிஞ்ஞேய்யது³கம் ந லப்³ப⁴தி. ஆஸவா சேவ ஆஸவஸம்பயுத்தா ச, ஸம்யோஜனா சேவ ஸம்யோஜனஸம்பயுத்தா ச, க³ந்தா² சேவ க³ந்த²ஸம்பயுத்தா ச, நீவரணா சேவ நீவரணஸம்பயுத்தா ச, கிலேஸா சேவ ஸங்கிலிட்டா² சாதி ஏவரூபேஸு து³கேஸு விபாகபச்சயோ சேவ நானாக்க²ணிககம்மபச்சயோ ச ந லப்³ப⁴தி. நஹேதுஸஹேதுகனஹேதுஅஹேதுகேஸு ஹேதுபச்சயோ நத்தி². ஹேதூ சேவ ஹேதுஸம்பயுத்தா ச, ஆஸவா சேவ ஆஸவஸம்பயுத்தா ச, க³ந்தா² சேவ க³ந்த²ஸம்பயுத்தா சாதி இமேஸு து³கேஸு நஹேதுனஜா²னனமக்³கா³ ந லப்³ப⁴ந்தி. ஸம்யோஜனா சேவ ஸம்யோஜனஸம்பயுத்தா ச, நீவரணா சேவ நீவரணஸம்பயுத்தா ச, கிலேஸா சேவ கிலேஸஸம்பயுத்தா ச, கிலேஸா சேவ ஸங்கிலிட்டா² சாதி இமேஸு பன விசிகிச்சு²த்³த⁴ச்சஸஹக³தஸ்ஸ மோஹஸ்ஸ வஸேன நஹேதுபச்சயோ லப்³ப⁴தி; நஜா²னனமக்³க³பச்சயா ந லப்³ப⁴ந்தீதி ஏவம் ஸப்³ப³து³கேஸு லப்³ப⁴மானாலப்³ப⁴மானம் உபபரிக்கி²த்வா பாளிவஸேனேவ வாரக³ணனா வேதி³தப்³பா³தி.

து³கபட்டா²னவண்ணனா.