4. உபாதி³ன்னத்திகவண்ணனா

51. உபாதி³ன்னுபாதா³னியத்திகஸ்ஸ பஞ்ஹாவாரே வத்து² உபாதா³னியானம் க²ந்தா⁴னம் புரேஜாதபச்சயேன பச்சயோதி பவத்திம் ஸந்தா⁴ய வுத்தம். படிஸந்தி⁴யம் பன தம் புரேஜாதம் ந ஹோதி.

72. உபாதி³ன்னுபாதா³னியோ கப³ளீகாரோ ஆஹாரோ உபாதி³ன்னுபாதா³னியஸ்ஸ காயஸ்ஸ ஆஹாரபச்சயேன பச்சயோதி ஏத்த² உபாதி³ன்னுபாதா³னியோ கப³ளீகாராஹாரோ நாம கம்மஸமுட்டா²னானம் ரூபானம் அப்³ப⁴ந்தரக³தா ஓஜா. உபாதி³ன்னுபாதா³னியஸ்ஸ காயஸ்ஸாதி தஸ்ஸேவ கம்மஸமுட்டா²னரூபகாயஸ்ஸ ஆஹாரபச்சயேன பச்சயோ. ரூபஜீவிதிந்த்³ரியம் விய கடத்தாரூபானம் அனுபாலனஉபத்த²ம்ப⁴னவஸேன பச்சயோ, ந ஜனகவஸேன. யம் பன மண்டூ³காத³யோ கி³லித்வா டி²தானம் அஹிஆதீ³னம் காயஸ்ஸ ஜீவமானகமண்டூ³காதி³ஸரீரே ஓஜா ஆஹாரபச்சயேன பச்சயோதி வத³ந்தி, தம் ந க³ஹேதப்³ப³ம். ந ஹி ஜீவமானகஸரீரே ஓஜா அஞ்ஞஸ்ஸ ஸரீரஸ்ஸ ஆஹாரபச்சயதம் ஸாதே⁴தி. அனுபாதி³ன்னுபாதா³னியஸ்ஸ காயஸ்ஸாதி ஏத்த² பன ஜனகவஸேனாபி லப்³ப⁴தி. உபாதி³ன்னுபாதா³னியஸ்ஸ ச அனுபாதி³ன்னுபாதா³னியஸ்ஸ சாதி ஏத்த² ஏகஸ்ஸ உபத்த²ம்ப⁴கவஸேன, ஏகஸ்ஸ ஜனகவஸேன, உபி⁴ன்னம்பி வா உபத்த²ம்ப⁴கவஸேனேவ வுத்தோ. த்³வே பன ஆஹாரா ஏகதோ பச்சயா ஹோந்தா உபத்த²ம்ப⁴காவ ஹோந்தி, ந ஜனகா. ஸேஸமேத்த² பாளிமேவ ஸாது⁴கம் ஓலோகேத்வா வேதி³தப்³ப³ம்.

உபாதி³ன்னத்திகவண்ணனா.