3. விபாகத்திகவண்ணனா

1-23. விபாகத்திகே விபாகம் த⁴ம்மம் படிச்ச விபாகோ த⁴ம்மோ உப்பஜ்ஜதி ஹேதுபச்சயாதி யே ஹேதுபச்சயே தேரஸ வாரா வுத்தா, தே ஸங்கி²பித்வா க³ணனாய த³ஸ்ஸேதும் ஹேதுயா தேரஸாதி வுத்தம். ஆரம்மணே பஞ்சாதிஆதீ³ஸுபி ஏஸேவ நயோ. ஏவமேத்த² தேரஸ பஞ்ச நவ ஸத்த தீணி த்³வேதி ச² க³ணனபரிச்சே²தா³, தேஸம் வஸேன பச்சயஸம்ஸந்த³னே ஹேட்டா² வுத்தனயேனேவ க³ணனா வேதி³தப்³பா³.

24-52. பச்சனீயேபி விபாகம் த⁴ம்மம் படிச்ச விபாகோ த⁴ம்மோ உப்பஜ்ஜதி நஹேதுபச்சயாதி யே நஹேதுபச்சயே த³ஸ வாரா வுத்தா, தே ஸங்கி²பித்வா க³ணனாய த³ஸ்ஸேதும் நஹேதுயா த³ஸாதி வுத்தம். ந ஆரம்மணே பஞ்சாதிஆதீ³ஸுபி ஏஸேவ நயோ. ஏவமேத்த² த³ஸ பஞ்ச தேரஸ த்³வாத³ஸ த்³வே ஏகம் நவ தீணீதி அட்ட² க³ணனபரிச்சே²தா³, தேஸம் வஸேன பச்சயஸம்ஸந்த³னே ஹேட்டா² வுத்தனயேனேவ வித்தா²ரதோ க³ணனா வேதி³தப்³பா³. பாளி பன ஸங்கி²த்தா, ஏதேஸஞ்ஞேவ பன லத்³த⁴க³ணனரபரிச்சே²தா³னம் வாரானம் வஸேன ஸம்ஸந்தி³த்வா அனுலோமபச்சனீயம் பச்சனீயானுலோமஞ்ச வேதி³தப்³ப³ம்.

ஸஹஜாதவாரோ இமினாவ ஏகக³திகோ. பச்சயனிஸ்ஸயஸம்ஸட்ட²ஸம்பயுத்தவாரா யதா²பாளிமேவ நிய்யந்தி.

92. பஞ்ஹாவாரே குஸலாகுஸலே நிருத்³தே⁴தி ஏதஸ்மிம் விபஸ்ஸனாவஸேன பவத்தே குஸலே ஸாரஜ்ஜனாதி³வஸேன பவத்தே அகுஸலே ச நிருத்³தே⁴. விபாகோ ததா³ரம்மணதா உப்பஜ்ஜதீதி காமாவசரவிபாகோ ததா³ரம்மணதாய உப்பஜ்ஜதி. யே பன ‘‘விபஸ்ஸனாஜவனானம் விசிகிச்சு²த்³த⁴ச்சானஞ்ச பரியோஸானே ததா³ரம்மணம் நத்தீ²’’தி வத³ந்தி, தே இமாய தந்தியா படிஸேதே⁴தப்³பா³. ஆகாஸானஞ்சாயதனகுஸலம் விஞ்ஞாணஞ்சாயதனஸ்ஸ கிரியஸ்ஸ ஆரம்மணபச்சயேன பச்சயோதி அரஹத்தம் பத்வா அஸமாபன்னபுப்³பா³ ஸமாபத்தியோ படிலோமதோ ஸமாபஜ்ஜந்தஸ்ஸ வஸேனேதம் வுத்தம். இமினா உபாயேன ஸப்³ப³விஸ்ஸஜ்ஜனேஸு ஸாது⁴கம் பாளிம் உபபரிக்கி²த்வா அத்தோ² வேதி³தப்³போ³.

120. ஹேதுயா ஸத்த, ஆரம்மணே நவ, அதி⁴பதியா த³ஸாதிஆதீ³ஸுபி ஸஹஜாதாதி⁴பதிவஸேன ஆரம்மணாதி⁴பதிவஸேன ஸஹஜாதனிஸ்ஸயவஸேன புரேஜாதனிஸ்ஸயவஸேன அனந்தரூபனிஸ்ஸயவஸேன ஆரம்மணூபனிஸ்ஸயவஸேன பகதூபனிஸ்ஸயவஸேன ஸஹஜாதவிப்பயுத்தவஸேன புரேஜாதபச்சா²ஜாதவிப்பயுத்தவஸேனாதி யத்த² யத்த² யதா² யதா² யத்தகானி விஸ்ஸஜ்ஜனானி லப்³ப⁴ந்தி, தத்த² தத்த² ததா² ததா² தானி ஸப்³பா³னி ஸல்லக்கே²தப்³பா³னி. ததா² பச்சனீயாதீ³ஸு அனுலோமவஸேன வாருத்³த⁴ரணம், அனுலோமதோ லத்³த⁴வாரானம் பச்சனீயதோ க³ணனா, பச்சயஸம்ஸந்த³னம், அனுலோமபச்சனீயே பச்சனீயானுலோமே ச ஸுத்³தி⁴கேஸு சேவ ஸம்ஸந்த³னவஸேன ச பவத்தேஸு ஹேதுமூலகாதீ³ஸு லப்³ப⁴மானவாரக³ணனா, அலப்³ப⁴மானானம் அலப்³ப⁴மானதாதி ஸப்³ப³ம் ஹேட்டா² வுத்தனயேனேவ வேதி³தப்³ப³ம்.

யதா² சேத்த², ஏவம் இதோ பரேஸுபி திகது³கேஸு. பட்டா²னபகரணஞ்ஹி பாளிதோவ அனந்தம் அபரிமாணம். தஸ்ஸ பத³படிபாடியா அத்த²ம் வண்ணயிஸ்ஸாமீதி படிபன்னஸ்ஸ அதிதீ³கா⁴யுகஸ்ஸாபி ஆயு நப்பஹோதி. ந சஸ்ஸ ஏகதே³ஸம் வண்ணேத்வா ஸேஸம்ஹி நயதோ த³ஸ்ஸியமானே ந ஸக்கா அத்தோ² ஜானிதும், தஸ்மா இதோ பரம் ஏத்தகம்பி அவத்வா ஸேஸேஸு திகது³கேஸு ஹேட்டா² அவுத்தப்பகாரத்தா யம் யம் அவஸ்ஸம் வத்தப்³ப³ம், தம் ததே³வ வக்கா²ம. யம் பன அவத்வா க³மிஸ்ஸாம, தம் பாளினயேனேவ வேதி³தப்³ப³ந்தி.

விபாகத்திகவண்ணனா.