பச்சயானுலோமபச்சனீயவண்ணனா

131-189. இதா³னி அனுலோமபச்சனீயே க³ணனம் த³ஸ்ஸேதும் ஹேதுபச்சயா நாரம்மணே பஞ்சாதிஆதி³ ஆரத்³த⁴ம். தத்த² ஹேதாதி⁴பதிமக்³க³பச்சயேஸு அனுலோமதோ டி²தேஸு ஸஹஜாதாத³யோ சத்தாரோ ஸப்³ப³ட்டா²னிகபச்சயா, ஆஹாரிந்த்³ரியஜா²னமக்³க³பச்சயா சத்தாரோதி இமே அட்ட² பச்சனீயதோ ந லப்³ப⁴ந்தி. ஹேதுபச்சயாதி³வஸேன ஹி உப்பஜ்ஜமானோ த⁴ம்மோ இமே அட்ட² பச்சயே அலப⁴ந்தோ நாம நத்தி². ஆரம்மணஅனந்தரஸமனந்தரஉபனிஸ்ஸயஸம்பயுத்தனத்தி²விக³தபச்சயேஸு பன அனுலோமதோ டி²தேஸு அரூபட்டா²னிகா பச்சனீகதோ ந லப்³ப⁴ந்தி. ந ஹி ஆரம்மணபச்சயாதீ³ஹி உப்பஜ்ஜமானா அனந்தரஸமனந்தரபச்சயாத³யோ ந லப⁴ந்தி. ஸஹஜாதஅஞ்ஞமஞ்ஞனிஸ்ஸயகம்மாஹாரிந்த்³ரியஅத்தி²அவிக³தபச்சயேஸு பன அனுலோமதோ டி²தேஸு சத்தாரோ ஸப்³ப³ட்டா²னிகாயேவ, பச்சனீகதோ ந லப்³ப⁴ந்தி. ஏதேஸஞ்ஹி பச்சயானம் வஸேன உப்பஜ்ஜமானோ ஸப்³ப³ட்டா²னிகே அலப⁴ந்தோ நாம நத்தி². பச்சா²ஜாதபச்சயஸ்ஸ அனுலோமதோ டா²னம் நாம நத்தி². ஏவம் ஸேஸேஸு அனுலோமதோ டி²தேஸு யே ச லப்³ப⁴ந்தி, யே ச ந லப்³ப⁴ந்தி, தே ஸல்லக்கே²த்வா ஸப்³பே³ஸுபி து³மூலகாதீ³ஸு நயேஸு தேஸம் தேஸம் பச்சயானம் ஸம்ஸந்த³னே ஊனதரக³ணனானம்யேவ வஸேன க³ணனா வேதி³தப்³பா³தி.

பச்சயானுலோமபச்சனீயவண்ணனா.