2. பவத்திவாரவண்ணனா

33-34. பவத்திவாரே பனேத்த² பச்சுப்பன்னகாலே புக்³க³லவாரஸ்ஸ அனுலோமனயே ‘‘யஸ்ஸ குஸலா த⁴ம்மா உப்பஜ்ஜந்தி, தஸ்ஸ அகுஸலா த⁴ம்மா உப்பஜ்ஜந்தி; யஸ்ஸ வா பன அகுஸலா த⁴ம்மா உப்பஜ்ஜந்தி, தஸ்ஸ குஸலா த⁴ம்மா உப்பஜ்ஜந்தீ’’தி குஸலத⁴ம்மமூலகானி த்³வே யமகானி, அகுஸலத⁴ம்மமூலகம் ஏகந்தி தீணி யமகானி ஹோந்தி. தஸ்ஸ படிலோமனயேபி ஓகாஸவாராதீ³ஸுபி ஏஸேவ நயோ. ஏவமேத்த² ஸப்³ப³வாரேஸு திண்ணம் திண்ணம் யமகானம் வஸேன யமகக³ணனா வேதி³தப்³பா³. அத்த²வினிச்ச²யே பனேத்த² இத³ம் லக்க²ணம் – இமஸ்ஸ ஹி த⁴ம்மயமகஸ்ஸ பவத்திமஹாவாரே ‘‘உப்பஜ்ஜந்தி நிருஜ்ஜ²ந்தீ’’தி இமேஸு உப்பாத³னிரோதே⁴ஸு குஸலாகுஸலத⁴ம்மா தாவ ஏகந்தேன பவத்தியம்யேவ லப்³ப⁴ந்தி, ந சுதிபடிஸந்தீ⁴ஸு. அப்³யாகதத⁴ம்மா பன பவத்தே ச சுதிபடிஸந்தீ⁴ஸு சாதி தீஸுபி காலேஸு லப்³ப⁴ந்தி. ஏவமேத்த² யம் யத்த² யத்த² லப்³ப⁴தி, தஸ்ஸ வஸேன தத்த² தத்த² வினிச்ச²யோ வேதி³தப்³போ³.

தத்ரித³ம் நயமுக²ம் – குஸலாகுஸலானம் தாவ ஏகக்க²ணே அனுப்பஜ்ஜனதோ ‘‘நோ’’தி படிஸேதோ⁴ கதோ. அப்³யாகதா சாதி சித்தஸமுட்டா²னரூபவஸேன வுத்தம்.

35-36. யத்த² குஸலா த⁴ம்மா நுப்பஜ்ஜந்தீதி அஸஞ்ஞப⁴வம் ஸந்தா⁴ய வுத்தம். தேனேவேத்த² ‘‘ஆமந்தா’’தி விஸ்ஸஜ்ஜனம் கதம். உப்பஜ்ஜந்தீதி இத³ம்பி அஸஞ்ஞப⁴வம்யேவ ஸந்தா⁴ய வுத்தம். அப்³யாகதானம் பன அனுப்பத்திட்டா²னஸ்ஸ அபா⁴வா ‘‘நத்தீ²’’தி படிக்கே²போ கதோ.

49. து³தியே அகுஸலேதி ப⁴வம் அஸ்ஸாதே³த்வா உப்பன்னேஸு நிகந்திஜவனேஸு து³தியே ஜவனசித்தே. து³தியே சித்தே வத்தமானேதி படிஸந்தி⁴தோ து³தியே ப⁴வங்க³சித்தே வத்தமானே ஸஹ வா படிஸந்தி⁴யா ப⁴வங்க³ம் விபாகவஸேன ஏகமேவ கத்வா ப⁴வனிகந்தியா ஆவஜ்ஜனசித்தே. தஞ்ஹி கிரியசித்தத்தா அப்³யாகதஜாதியம் விபாகதோ து³தியம் நாம ஹோதி.

57. யஸ்ஸ சித்தஸ்ஸ அனந்தரா அக்³க³மக்³க³ந்தி கோ³த்ரபு⁴சித்தம் ஸந்தா⁴ய வுத்தம். குஸலா த⁴ம்மா உப்பஜ்ஜிஸ்ஸந்தீதி தே அக்³க³மக்³க³த⁴ம்மேயேவ ஸந்தா⁴ய வுத்தம்.

79. யஸ்ஸ சித்தஸ்ஸ அனந்தரா அக்³க³மக்³க³ம் படிலபி⁴ஸ்ஸந்தி, தஸ்ஸ சித்தஸ்ஸ உப்பாத³க்க²ணேதி இத³ம் சித்தஜாதிவஸேன வுத்தம். தஜ்ஜாதிகஸ்ஸ ஹி ஏகாவஜ்ஜனேன உப்பன்னஸ்ஸ ததோ ஓரிமசித்தஸ்ஸ உப்பாத³க்க²ணேபி ஏதம் லக்க²ணம் லப்³ப⁴தேவ.

99. நிரோத⁴வாரேபி குஸலாகுஸலானம் ஏகதோ அனிருஜ்ஜ²னதோ ‘‘நோ’’தி வுத்தம். இமினா நயமுகே²ன ஸப்³ப³த்த² வினிச்ச²யோ வேதி³தப்³போ³தி.

த⁴ம்மயமகவண்ணனா நிட்டி²தா.