7. அனுஸயயமகம்

பரிச்சே²த³பரிச்சி²ன்னுத்³தே³ஸவாரவண்ணனா

1. இதா³னி தேஸஞ்ஞேவ மூலயமகே தே³ஸிதானம் குஸலாதி³த⁴ம்மானம் லப்³ப⁴மானவஸேன ஏகதே³ஸம் ஸங்க³ண்ஹித்வா ஸங்கா²ரயமகானந்தரம் தே³ஸிதஸ்ஸ அனுஸயயமகஸ்ஸ அத்த²வண்ணனா ஹோதி. தத்த² பாளிவவத்தா²னம் தாவ வேதி³தப்³ப³ம் – இமஸ்மிஞ்ஹி அனுஸயயமகே க²ந்த⁴யமகாதீ³ஸு விய தே³ஸனம் அகத்வா அஞ்ஞேன நயேன பாளிதே³ஸனா கதா. கத²ம்? பட²மம் தாவ பரிச்சே²த³தோ, உத்³தே³ஸதோ, உப்பத்திட்டா²னதோதி தீஹாகாரேஹி அனுஸயே க³ஹாபேதும் பரிச்சே²த³வாரோ, பரிச்சி²ன்னுத்³தே³ஸவாரோ, உப்பத்திட்டா²னவாரோதி, தயோ வாரா தே³ஸிதா. ததோ ஸத்தன்னம் மஹாவாரானம் வஸேன அனுஸயே யோஜேத்வா யமகதே³ஸனா கதா. தத்த² ஸத்தானுஸயாதி அயம் ‘‘ஸத்தேவ, ந ததோ உத்³த⁴ம், ந ஹேட்டா²’’தி க³ணனபரிச்சே²தே³ன பரிச்சி²ந்தி³த்வா அனுஸயானம் தே³ஸிதத்தா பரிச்சே²த³வாரோ நாம. காமராகா³னுஸயோ…பே… அவிஜ்ஜானுஸயோதி அயம் பரிச்சே²த³வாரேன பரிச்சி²ன்னானம் நாமமத்தம் உத்³தி³ஸித்வா ‘‘இமே நாம தே’’தி தே³ஸிதத்தா பரிச்சி²ன்னுத்³தே³ஸவாரோ நாம. கத்த² காமராகா³னுஸயோ அனுஸேதி…பே… ஏத்த² அவிஜ்ஜானுஸயோ அனுஸேதீதி அயம் ‘‘இமேஸு நாம டா²னேஸு இமே அனுஸயா அனுஸேந்தி’’தி ஏவம் தேஸம்யேவ உப்பத்திட்டா²னஸ்ஸ தே³ஸிதத்தா உப்பத்திட்டா²னவாரோ நாம.

யேஸம் பன ஸத்தன்னம் மஹாவாரானம் வஸேன அனுஸயே யோஜேத்வா யமகதே³ஸனா கதா, தேஸம் இமானி நாமானி – அனுஸயவாரோ, ஸானுஸயவாரோ, பஜஹனவாரோ, பரிஞ்ஞாவாரோ, பஹீனவாரோ, உப்பஜ்ஜனவாரோ தா⁴துவாரோதி. தேஸு பட²மோ அனுஸயவாரோ. ஸோ அனுலோமபடிலோமனயவஸேன து³விதோ⁴ ஹோதி.

தத்த² அனுலோமனயே ‘‘யஸ்ஸ அனுஸேதி, யத்த² அனுஸேதி, யஸ்ஸ யத்த² அனுஸேதீ’’தி புக்³க³லோகாஸதது³ப⁴யவஸேன தயோ அந்தரவாரா ஹோந்தி. தேஸு பட²மே புக்³க³லவாரே ‘‘யஸ்ஸ காமராகா³னுஸயோ அனுஸேதி, தஸ்ஸ படிகா⁴னுஸயோ அனுஸேதி; யஸ்ஸ வா பன படிகா⁴னுஸயோ அனுஸேதி, தஸ்ஸ காமராகா³னுஸயோ அனுஸேதி; யஸ்ஸ காமராகா³னுஸயோ அனுஸேதி, தஸ்ஸ மானானுஸயோ, தி³ட்டா²னுஸயோ, விசிகிச்சா²னுஸயோ, ப⁴வராகா³னுஸயோ, அவிஜ்ஜானுஸயோ அனுஸேதி. யஸ்ஸ வா பன அவிஜ்ஜானுஸயோ அனுஸேதி, தஸ்ஸ காமராகா³னுஸயோ அனுஸேதீ’’தி காமராகா³னுஸயமூலகானி ச² யமகானி. புன அக³ஹிதக்³க³ஹணவஸேன படிகா⁴னுஸயமூலகானி பஞ்ச, மானானுஸயமூலகானி சத்தாரி, தி³ட்டா²னுஸயமூலகானி தீணி, விசிகிச்சா²னுஸயமூலகானி த்³வே, ப⁴வராகா³னுஸயமூலகம் ஏகந்தி ஏவம் ஸப்³பா³னிபி ஏகமூலகானி ஏகவீஸதி. புன ‘‘யஸ்ஸ காமராகா³னுஸயோ ச படிகா⁴னுஸயோ ச அனுஸேந்தீ’’தி ஏவம் ஆக³தானி து³கமூலகானி பஞ்ச, திகமூலகானி சத்தாரி, சதுக்கமூலகானி தீணி, பஞ்சகமூலகானி த்³வே, ச²க்கமூலகம் ஏகந்தி அபரானிபி பன்னரஸ ஹோந்தி. தானி புரிமேஹி ஏகவீஸதியா ஸத்³தி⁴ம் ச²த்திம்ஸாதி புக்³க³லவாரே ச²த்திம்ஸ யமகானி. ததா² ஓகாஸவாரே, ததா² புக்³க³லோகாஸவாரேதி ஸப்³பா³னிபி அனுலோமனயே அட்ட²ஸதம் யமகானி. ததா² படிலோமனயேதி அனுஸயவாரே ஸோளஸாதி⁴கானி த்³வே யமகஸதானி, ததோ தி³கு³ணா புச்சா², ததோ தி³கு³ணா அத்தா² ச வேதி³தப்³பா³. யதா² சேத்த², ஏவம் ஸானுஸயவாரோ, பஜஹனவாரோ, பரிஞ்ஞாவாரோ, பஹீனவாரோ, உப்பஜ்ஜனவாரோதி இமேஸம்பி பஞ்சன்னம் வாரானம், ஏகேகஸ்மிம் யமகக³ணனா; யமகதி³கு³ணா புச்சா², புச்சா²தி³கு³ணா ச அத்தா² வேதி³தப்³பா³. அயம் பனேத்த² புரிமேஸு தீஸு வாரேஸு விஸேஸோ. ஓகாஸவாரே ‘‘யத்த² தத்தா²’’தி அவத்வா யதோ ததோதி நிஸ்ஸக்கவசனேன தே³ஸனா கதா. ஸேஸம் தாதி³ஸமேவ.

யோ பனாயம் ஸப்³ப³பச்சி²மோ தா⁴துவாரோ நாம, ஸோ புச்சா²வாரோ, விஸ்ஸஜ்ஜனாவாரோதி த்³விதா⁴ டி²தோ. தஸ்ஸ புச்சா²வாரே காமதா⁴துயா சுதஸ்ஸ காமதா⁴தும் உபபஜ்ஜந்தஸ்ஸாதி வத்வா ‘‘காமதா⁴தும் வா பன உபபஜ்ஜந்தஸ்ஸ காமதா⁴துயா சுதஸ்ஸா’’தி ந வுத்தம். கிம் காரணா? அத்த²விஸேஸாபா⁴வதோ. த்³வேபி ஹி ஏதா புச்சா² ஏகத்தா²யேவ, தஸ்மா ஏகேகஸ்மா யமகா ஏகேகமேவ புச்ச²ம் புச்சி²த்வா ஸப்³ப³புச்சா²வஸானே புச்சா²னுக்கமேனேவ ‘‘காமதா⁴துயா சுதஸ்ஸ காமதா⁴தும் உபபஜ்ஜந்தஸ்ஸ கஸ்ஸசி ஸத்த அனுஸயா அனுஸேந்தீ’’திஆதி³னா நயேன விஸ்ஸஜ்ஜனம் கதம்.

தத்த² ‘‘காமதா⁴துயா சுதஸ்ஸ காமதா⁴தும் உபபஜ்ஜந்தஸ்ஸ, ரூபதா⁴தும், அரூபதா⁴தும், நகாமதா⁴தும், நரூபதா⁴தும் நஅரூபதா⁴தும், உபபஜ்ஜந்தஸ்ஸா’’தி ச² ஸுத்³தி⁴கபுச்சா²; ‘‘நகாமதா⁴தும், நஅரூபதா⁴தும், நரூபதா⁴தும்; நஅரூபதா⁴தும், நகாமதா⁴தும், நரூபதா⁴தும், உபபஜ்ஜந்தஸ்ஸா’’தி திஸ்ஸோ மிஸ்ஸகா புச்சா² சாதி காமதா⁴துமூலகா நவ அனுலோமபுச்சா² ஹோந்தி. ததா² ரூபதா⁴துமூலகா நவ, அரூபதா⁴துமூலகா நவாதி ஸத்தவீஸதி அனுலோமபுச்சா² ஹோந்தி. ததா² நகாமதா⁴துனரூபதா⁴துனஅரூபதா⁴துமூலகா ஸத்தவீஸதி படிலோமபுச்சா². புன ‘‘நகாமதா⁴துயா, நஅரூபதா⁴துயா, நரூபதா⁴துயா, நஅரூபதா⁴துயா, நகாமதா⁴துயா, நஅரூபதா⁴துயா’’தி ஸத்தவீஸதி து³கமூலகா புச்சா²தி ஸப்³பா³பி ஸம்பிண்டி³தா ஏகாஸீதி புச்சா² ஹோந்தி. தாஸம் வஸேனேத்த² விஸ்ஸஜ்ஜனம் கதந்தி இத³ம் தா⁴துவாரே பாளிவவத்தா²னம். ஏவம் தாவ ஸகலேபி அனுஸயயமகே பாளிவவத்தா²னமேதம் வேதி³தப்³ப³ம்.

ஆதி³தோ பட்டா²ய பனேத்த² யம் யம் அனுத்தானம், தத்த² தத்த² அயம் வினிச்ச²யகதா² – அனுஸயாதி கேனட்டே²ன அனுஸயா? அனுஸயனட்டே²ன. கோ ஏஸ அனுஸயனட்டோ² நாமாதி? அப்பஹீனட்டோ². ஏதே ஹி அப்பஹீனட்டே²ன தஸ்ஸ தஸ்ஸ ஸந்தானே அனுஸேந்தி நாம, தஸ்மா அனுஸயாதி வுச்சந்தி. அனுஸேந்தீதி அனுரூபம் காரணம் லபி⁴த்வா உப்பஜ்ஜந்தீதி அத்தோ². அதா²பி ஸியா – அனுஸயனட்டோ² நாம அப்பஹீனாகாரோ. அப்பஹீனாகாரோ ச உப்பஜ்ஜதீதி வத்தும் ந யுஜ்ஜதி, தஸ்மா ந அனுஸயா உப்பஜ்ஜந்தீதி. தத்ரித³ம் படிவசனம் – அப்பஹீனாகாரோ அனுஸயோ, அனுஸயோதி பன அப்பஹீனட்டே²ன தா²மக³தகிலேஸோ வுச்சதி. ஸோ சித்தஸம்பயுத்தோ ஸாரம்மணோ ஸப்பச்சயட்டே²ன ஸஹேதுகோ ஏகந்தாகுஸலோ அதீதோபி ஹோதி அனாக³தோபி பச்சுப்பன்னோபி, தஸ்மா உப்பஜ்ஜதீதி வத்தும் யுஜ்ஜதி.

தத்ரித³ம் பமாணம் – அபி⁴த⁴ம்மே தாவ கதா²வத்து²ஸ்மிம் (கதா². 554 ஆத³யோ) ‘‘அனுஸயா அப்³யாகதா, அனுஸயா அஹேதுகா, அனுஸயா சித்தவிப்பயுத்தா’’தி ஸப்³பே³ வாதா³ படிஸேதி⁴தா. படிஸம்பி⁴தா³மக்³கே³ (படி. ம. 3.21) ‘‘பச்சுப்பன்னே கிலேஸே பஜஹதீ’’தி புச்ச²ம் கத்வா அனுஸயானம் பச்சுப்பன்னபா⁴வஸ்ஸ அத்தி²தாய ‘‘தா²மக³தானுஸயம் பஜஹதீ’’தி வுத்தம். த⁴ம்மஸங்க³ஹே பன மோஹஸ்ஸ பத³பா⁴ஜனே ‘‘அவிஜ்ஜானுஸயோ அவிஜ்ஜாபரியுட்டா²னம் அவிஜ்ஜாலங்கீ³ மோஹோ அகுஸலமூலம், அயம் தஸ்மிம் ஸமயே மோஹோ ஹோதீ’’தி (த⁴. ஸ. 390) அகுஸலசித்தேன ஸத்³தி⁴ம் அவிஜ்ஜானுஸயஸ்ஸ உப்பன்னபா⁴வோ வுத்தோ. இமஸ்மிம்யேவ அனுஸயயமகே ஸத்தன்னம் மஹாவாரானம் அஞ்ஞதரஸ்மிம் உப்பஜ்ஜனவாரே ‘‘யஸ்ஸ காமராகா³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதீ’’திஆதி³ வுத்தம். தஸ்மா ‘‘அனுஸேந்தீதி அனுரூபம் காரணம் லபி⁴த்வா உப்பஜ்ஜந்தீ’’தி யம் வுத்தம், தம் இமினா தந்திப்பமாணேன ஸுவுத்தந்தி வேதி³தப்³ப³ம். யம்பி ‘‘சித்தஸம்பயுத்தோ ஸாரம்மணோ’’திஆதி³ வுத்தம், தம்பி ஸுவுத்தமேவ. அனுஸயோ ஹி நாமேஸ பரினிப்ப²ன்னோ சித்தஸம்பயுத்தோ அகுஸலத⁴ம்மோதி நிட்ட²மேத்த² க³ந்தப்³ப³ம். காமராகா³னுஸயோதிஆதீ³ஸு காமராகோ³ ச ஸோ அப்பஹீனட்டே²ன அனுஸயோ சாதி காமராகா³னுஸயோ. ஸேஸபதே³ஸுபி ஏஸேவ நயோ.

பரிச்சே²த³பரிச்சி²ன்னுத்³தே³ஸவாரவண்ணனா.

உப்பத்திட்டா²னவாரவண்ணனா

2. இதா³னி தேஸம் உப்பத்திட்டா²னம் பகாஸேதும் கத்த² காமராகா³னுஸயோ அனுஸேதீதிஆதி³மாஹ. தத்த² காமதா⁴துயா த்³வீஸு வேத³னாஸூதி காமாவசரபூ⁴மியம் ஸுகா²ய ச உபேக்கா²ய சாதி த்³வீஸு வேத³னாஸு. ஏத்த² காமராகா³னுஸயோ அனுஸேதீதி இமாஸு த்³வீஸு வேத³னாஸு உப்பஜ்ஜதி. ஸோ பனேஸ அகுஸலவேத³னாஸு ஸஹஜாதவஸேன ஆரம்மணவஸேன சாதி த்³வீஹாகாரேஹி அனுஸேதி. அகுஸலாய ஸுகா²ய வேத³னாய சேவ உபேக்கா²ய வேத³னாய ச ஸஹஜாதோபி ஹுத்வா உப்பஜ்ஜதி. தா வேத³னா ஆரம்மணம் கத்வாபி உப்பஜ்ஜதீதி அத்தோ². அவஸேஸா பன காமாவசரகுஸலவிபாககிரியவேத³னா ஆரம்மணமேவ கத்வா உப்பஜ்ஜதி. காமதா⁴துயா த்³வீஸு வேத³னாஸு அனுஸயமானோ சேஸ தாஹி வேத³னாஹி ஸம்பயுத்தேஸு ஸஞ்ஞாஸங்கா²ரவிஞ்ஞாணேஸுபி அனுஸேதியேவ. ந ஹி ஸக்கா வேத³னாஸு அனுஸயமானேன தம்ஸம்பயுத்தேஹி ஸஞ்ஞாதீ³ஹி ஸத்³தி⁴ம் அஸஹஜாதேன வா ப⁴விதும், தம்ஸம்பயுத்தே வா ஸஞ்ஞாத³யோ ஆரம்மணம் அகத்வா உப்பஜ்ஜிதும். ஏவம் ஸந்தேபி பன யஸ்மா இமா த்³வே வேத³னாவ ஸாதஸந்தஸுக²த்தா அஸ்ஸாத³ட்டே²ன காமராகா³னுஸயஸ்ஸ உப்பத்தியா ஸேஸஸம்பயுத்தத⁴ம்மேஸு பதா⁴னா, தஸ்மா ‘‘த்³வீஸு வேத³னாஸு ஏத்த² காமராகா³னுஸயோ அனுஸேதீ’’தி வுத்தம், ஓளாரிகவஸேன ஹி போ³த⁴னேய்யே ஸுக²ம் போ³தே⁴துந்தி.

நனு சேஸ ஆரம்மணவஸேன அனுஸயமானோ ந கேவலம் இமாஸு த்³வீஸு வேத³னாஸு சேவ வேத³னாஸம்பயுத்தத⁴ம்மேஸு ச அனுஸேதி, இட்டே²ஸு பன ரூபாதீ³ஸுபி அனுஸேதியேவ. வுத்தம்பி சேதம் விப⁴ங்க³ப்பகரணே (விப⁴. 816) ‘‘யம் லோகே பியரூபம் ஸாதரூபம், ஏத்த² ஸத்தானம் காமராகா³னுஸயோ அனுஸேதீ’’தி இமஸ்மிம்பி பகரணே அனுஸயவாரஸ்ஸ படிலோமனயே வுத்தம். ‘‘யத்த² காமராகா³னுஸயோ நானுஸேதி தத்த² தி³ட்டா²னுஸயோ நானுஸேதீதி து³க்கா²ய வேத³னாய ரூபதா⁴துயா அரூபதா⁴துயா ஏத்த² காமராகா³னுஸயோ நானுஸேதி, நோ ச தத்த² தி³ட்டா²னுஸயோ நானுஸேதி. அபரியாபன்னே ஏத்த² காமராகா³னுஸயோ ச நானுஸேதி, தி³ட்டா²னுஸயோ ச நானுஸேதீ’’தி. ஏத்த² ஹி து³க்க²வேத³னாய சேவ ரூபதா⁴துஆதீ³ஸு ச நானுஸேதீதி வுத்தத்தா ஸஸம்பயுத்தத⁴ம்மம் து³க்க²வேத³னம் ஸஓகாஸே ரூபாரூபாவசரத⁴ம்மே நவ ச, லோகுத்தரத⁴ம்மே ட²பேத்வா அவஸேஸேஸு ரூபஸத்³த³க³ந்த⁴ரஸபோ²ட்ட²ப்³பே³ஸு அனுஸேதீதி வுத்தம் ஹோதி. தம் இத⁴ கஸ்மா ந வுத்தந்தி? அனோளாரிகத்தா. ஹேட்டா² வுத்தனயேன ஹி வேத³னானஞ்ஞேவ ஓளாரிகத்தா இமேஸம் பன அனோளாரிகத்தா ஏதேஸு ரூபாதீ³ஸு அனுஸேதீதி ந வுத்தம், அத்த²தோ பன லப்³ப⁴தி. தஸ்மா ஏதேஸுபி காமராகா³னுஸயோ அனுஸேதியேவாதி வேதி³தப்³போ³. ந ஹி ஸத்தா² ஸப்³ப³ம் ஸப்³ப³த்த² கதே²தி. போ³த⁴னேய்யஸத்தானம் பன வஸேன கத்த²சி யம் லப்³ப⁴தி, தம் ஸப்³ப³ம் கதே²தி, கத்த²சி ந கதே²தி. ததா² ஹி அனேன கத்த²சி தி³ட்டா²னுஸயோ அனுஸேதீதி புச்சி²த்வா ‘‘ஸப்³ப³ஸக்காயபரியாபன்னேஸு த⁴ம்மேஸு ஏத்த² தி³ட்டா²னுஸயோ அனுஸேதீ’’தி யம் லப்³ப⁴தி தம் ஸப்³ப³ம் கதி²தம். அபரஸ்மிம் டா²னே விஸ்ஸஜ்ஜந்தேன ‘‘ரூபதா⁴துயா அரூபதா⁴துயா ஏத்த² விசிகிச்சா²னுஸயோ ச மானானுஸயோ ச தி³ட்டா²னுஸயோ ச அனுஸேந்தி, காமதா⁴துயா த்³வீஸு வேத³னாஸு ஏத்த² விசிகிச்சா²னுஸயோ ச காமராகா³னுஸயோ ச மானானுஸயோ ச தி³ட்டா²னுஸயோ ச அனுஸேந்தி, து³க்கா²ய வேத³னாய ஏத்த² விசிகிச்சா²னுஸயோ ச படிகா⁴னுஸயோ ச தி³ட்டா²னுஸயோ ச அவிஜ்ஜானுஸயோ ச அனுஸேந்தீ’’தி யம் லப்³ப⁴தி தம் ஸப்³ப³ம் அகதே²த்வா ரூபதா⁴துஅரூபதா⁴தூஹி ஸத்³தி⁴ம் திஸ்ஸோ வேத³னாவ கதி²தா. வேத³னாஸம்பயுத்தா பன அரூபத⁴ம்மா, ஸப்³ப³ஞ்ச ரூபம் ந கதி²தம். கிஞ்சாபி ந கதி²தம், தி³ட்டா²னுஸயோ பனேத்த² அனுஸேதியேவ. ஏவமேவ கிஞ்சாபி இத⁴ ரூபாதி³இட்டா²ரம்மணம் ந கதி²தம், காமராகா³னுஸயோ பனேத்த² அனுஸேதியேவாதி. ஏவம் தாவ காமராகா³னுஸயஸ்ஸ அனுஸயனட்டா²னம் வேதி³தப்³ப³ம்.

படிகா⁴னுஸயஸ்ஸ பன ‘‘து³க்கா²ய வேத³னாயா’’தி வசனதோ த்³வே தோ³மனஸ்ஸவேத³னா காயவிஞ்ஞாணஸம்பயுத்தா து³க்க²வேத³னாதி திஸ்ஸோ வேத³னா அனுஸயனட்டா²னம். ஸோ பனேஸ தோ³மனஸ்ஸவேத³னாஸு ஸஹஜாதவஸேன ஆரம்மணவஸேன சாதி த்³வீஹாகாரேஹி அனுஸேதி. அவஸேஸது³க்க²வேத³னாய பன ஆரம்மணவஸேனேவ அனுஸேதி. தாஸு வேத³னாஸு அனுஸயமானோ சேஸ தாஹி ஸம்பயுத்தேஸு ஸஞ்ஞாக்க²ந்தா⁴தீ³ஸுபி அனுஸேதியேவ. யாய ஹி வேத³னாய ஏஸ ஸஹஜாதோ, தம்ஸம்பயுத்தேஹி ஸஞ்ஞாதீ³ஹிபி ஸஹஜாதோவ. யா ச வேத³னா ஆரம்மணம் கரோதி, தாஹி ஸம்பயுத்தே ஸஞ்ஞாத³யோபி கரோதியேவ. ஏவம் ஸந்தேபி பன யஸ்மா து³க்க²வேத³னாவ அஸாதது³க்க²வேத³யிதத்தா நிரஸ்ஸாத³ட்டே²ன படிகா⁴னுஸயஸ்ஸ உப்பத்தியா ஸேஸஸம்பயுத்தத⁴ம்மேஸு அதி⁴கா; தஸ்மா ‘‘து³க்கா²ய வேத³னாய ஏத்த² படிகா⁴னுஸயோ அனுஸேதீ’’தி வுத்தம், ஓளாரிகவஸேன ஹி போ³த⁴னேய்யே ஸுக²ம் போ³தே⁴துந்தி.

நனு சேஸ ஆரம்மணவஸேன அனுஸயமானோ ந கேவலம் து³க்க²வேத³னாய சேவ தம்ஸம்பயுத்தத⁴ம்மேஸு ச அனுஸேதி, அனிட்டே²ஸு பன ரூபாதீ³ஸுபி அனுஸேதியேவ? வுத்தம்பி சேதம் விப⁴ங்க³ப்பகரணே (விப⁴. 816) ‘‘யம் லோகே அப்பியரூபம் அஸாதரூபம், ஏத்த² ஸத்தானம் படிகா⁴னுஸயோ அனுஸேதீ’’தி இமஸ்மிம்பி பகரணே அனுஸயவாரஸ்ஸ படிலோமனயே வுத்தம் – ‘‘காமதா⁴துயா த்³வீஸு வேத³னாஸு ஏத்த² படிகா⁴னுஸயோ நானுஸேதி, நோ ச தத்த² காமராகா³னுஸயோ நானுஸேதி. ரூபதா⁴துயா அரூபதா⁴துயா அபரியாபன்னே ஏத்த² படிகா⁴னுஸயோ ச நானுஸேதி, காமராகா³னுஸயோ ச நானுஸேதீ’’தி. ஏத்த² ஹி த்³வீஸு காமாவசரவேத³னாஸு சேவ ரூபதா⁴துஆதீ³ஸு ச நானுஸேதீதி வுத்தத்தா ஸஸம்பயுத்தத⁴ம்மா த்³வே வேத³னா ஸஓகாஸே ரூபாரூபாவசரத⁴ம்மே நவ ச, லோகுத்தரத⁴ம்மே ட²பேத்வா அவஸேஸேஸு ரூபாதீ³ஸு அனுஸேதீதி வுத்தம் ஹோதி. தம் இத⁴ கஸ்மா ந வுத்தந்தி? அனோளாரிகத்தா. ஹேட்டா² வுத்தனயேன ஹி து³க்க²வேத³னாய ஏவ ஓளாரிகத்தா இமேஸம் பன அனோளாரிகத்தா ஏதேஸு ரூபாதீ³ஸு அனுஸேதீதி ந வுத்தம். அத்த²தோ பன லப்³ப⁴தி, தஸ்மா ஏதேஸுபி படிகா⁴னுஸயோ அனுஸேதியேவாதி வேதி³தப்³போ³.

கிம் பன இதரா த்³வே வேத³னா இட்டா²ரம்மணம் வா படிக⁴ஸ்ஸ ஆரம்மணம் ந ஹோந்தீதி? நோ ந ஹோந்தி. பரிஹீனஜ்ஜா²னஸ்ஸ விப்படிஸாரவஸேன ஸஸம்பயுத்தத⁴ம்மா தா வேத³னா ஆரப்³ப⁴ தோ³மனஸ்ஸம் உப்பஜ்ஜதி. இட்டா²ரம்மணஸ்ஸ ச படிலத்³த⁴ஸ்ஸ விபரிணாமம் வா அப்படிலத்³த⁴ஸ்ஸ அப்படிலாப⁴ம் வா ஸமனுஸ்ஸரதோபி தோ³மனஸ்ஸம் உப்பஜ்ஜதி. தோ³மனஸ்ஸமத்தமேவ பன தம் ஹோதி, ந படிகா⁴னுஸயோ. படிகா⁴னுஸயோ ஹி அனிட்டா²ரம்மணே படிஹஞ்ஞனவஸேன உப்பன்னோ தா²மக³தோ கிலேஸோ, தஸ்மா ஏத்த² தோ³மனஸ்ஸேன ஸத்³தி⁴ம் படிகோ⁴ உப்பன்னோபி அத்தனோ படிக⁴கிச்சம் அகரணபா⁴வேன ஏவ படிகா⁴னுஸயோ ந ஹோதி அப்³போ³ஹாரிகத்தம் க³ச்ச²தி. யதா² ஹி பாணாதிபாதசேதனாய ஸத்³தி⁴ம் உப்பன்னோபி ப்³யாபாதோ³ மனோகம்மம் நாம ந ஹோதி அப்³போ³ஹாரிகத்தம் க³ச்ச²தி, ஏவம் படிகா⁴னுஸயோ ந ஹோதி, அப்³போ³ஹாரிகத்தம் க³ச்ச²தி. வுத்தம்பி சேதம் ஏகச்சம் இட்டா²ரம்மணம் நேக்க²ம்மஸிதம்பி வா தோ³மனஸ்ஸம் ஸந்தா⁴ய ‘‘யம் ஏவரூபம் தோ³மனஸ்ஸம் படிக⁴ம் தேன பஜஹதி ந தத்த² படிகா⁴னுஸயோ அனுஸேதீ’’தி (ம. நி. 1.465). ஏவம் படிகா⁴னுஸயஸ்ஸ அனுஸயனட்டா²னம் வேதி³தப்³ப³ம்.

மானானுஸயஸ்ஸ பன ‘‘காமதா⁴துயா த்³வீஸு வேத³னாஸூ’’திஆதி³வசனதோ த்³வே காமாவசரவேத³னா ரூபாரூபதா⁴துயோ சாதி இத³ம் திவித⁴ம் அனுஸயனட்டா²னம். தஸ்ஸ அகுஸலாஸு வேத³னாஸு காமராகா³னுஸயஸ்ஸ விய ஸஹஜாதானுஸயதா வேதி³தப்³பா³. ஸஸம்பயுத்தத⁴ம்மாஸு பன ஸப்³பா³ஸுபி காமாவசராஸு ஸுக²அது³க்க²மஸுக²வேத³னாஸு ரூபாரூபதா⁴தூஸு ச ஆரம்மணவஸேனேவ அனுஸேதி. அனுஸயவாரஸ்ஸ பன படிலோமனயே ‘‘து³க்கா²ய வேத³னாய அபரியாபன்னே ஏத்த² காமராகா³னுஸயோ ச நானுஸேதி, மானானுஸயோ ச நானுஸேதீ’’தி வுத்தத்தா ட²பேத்வா து³க்க²வேத³னஞ்சேவ நவவித⁴ம் லோகுத்தரத⁴ம்மஞ்ச ஸேஸரூபாரூபத⁴ம்மேஸுபி அயம் அனுஸேதியேவாதி. ஏவம் மானானுஸயஸ்ஸ அனுஸயனட்டா²னம் வேதி³தப்³ப³ம்.

தி³ட்டா²னுஸயவிசிகிச்சா²னுஸயா பன கேவலம் லோகுத்தரத⁴ம்மேஸ்வேவ நானுஸேந்தி. தேபூ⁴மகேஸு பன ஸப்³பே³ஸுபி அனுஸேந்தியேவ. தேன வுத்தம் – ‘‘ஸப்³ப³ஸக்காயபரியாபன்னேஸு த⁴ம்மேஸு ஏத்த² தி³ட்டா²னுஸயோ அனுஸேதி, ஏத்த² விசிகிச்சா²னுஸயோ அனுஸேதீ’’தி. தத்த² ஸப்³ப³ஸக்காயபரியாபன்னேஸூதி ஸம்ஸாரவட்டனிஸ்ஸிதட்டே²ன ஸக்காயபரியாபன்னேஸு ஸப்³ப³த⁴ம்மேஸூதி அத்தோ². தத்த² பனேதே பஞ்சஸு சித்துப்பாதே³ஸு ஸஹஜாதானுஸயனவஸேன அனுஸேந்தி. தே வா பன பஞ்ச சித்துப்பாதே³ அஞ்ஞே வா தேபூ⁴மகத⁴ம்மே ஆரப்³ப⁴ பவத்திகாலே ஆரம்மணானுஸயனவஸேன அனுஸேந்தீதி. ஏவம் தி³ட்டா²னுஸயவிசிகிச்சா²னுஸயானம் அனுஸயனட்டா²னம் வேதி³தப்³ப³ம்.

ப⁴வராகா³னுஸயோ பன கிஞ்சாபி தி³ட்டி²விப்பயுத்தேஸு சதூஸு சித்தேஸு உப்பஜ்ஜனதோ ஸஹஜாதானுஸயனவஸேன ‘‘காமதா⁴துயா த்³வீஸு வேத³னாஸு அனுஸேதீ’’தி வத்தப்³போ³ ப⁴வேய்ய. காமதா⁴துயம் பனேஸ த்³வீஹி வேத³னாஹி ஸத்³தி⁴ம் உப்பஜ்ஜமானோபி ரூபாரூபாவசரத⁴ம்மமேவ படிலப⁴தி. காமதா⁴துயா பரியாபன்னம் ஏகத⁴ம்மம்பி ஆரம்மணம் ந கரோதி, தஸ்மா ஆரம்மணானுஸயனவஸேன நியமம் கத்வா ‘‘ரூபதா⁴துயா அரூபதா⁴துயா ஏத்த² ப⁴வராகா³னுஸயோ அனுஸேதீ’’தி வுத்தம். அபிச ராகோ³ நாமேஸ காமராக³ப⁴வராக³வஸேன து³விதோ⁴. தத்த² காமராகோ³ காமதா⁴துயா த்³வீஸு வேத³னாஸு அனுஸேதீதி வுத்தோ. ஸசே பன ப⁴வராகோ³பி காமராகோ³ விய ஏவம் வுச்சேய்ய, காமராகே³ன ஸத்³தி⁴ம் தே³ஸனா ஸம்கிண்ணா விய ப⁴வேய்யாதி ராக³கிலேஸம் த்³விதா⁴ பி⁴ந்தி³த்வா காமராக³தோ ப⁴வராக³ஸ்ஸ விஸேஸத³ஸ்ஸனத்த²ம்பி ஏவம் தே³ஸனா கதாதி. ஏவம் ப⁴வராகா³னுஸயஸ்ஸ அனுஸயனட்டா²னம் வேதி³தப்³ப³ம்.

அவிஜ்ஜானுஸயோ பன ஸப்³பே³ஸுபி தேபூ⁴மகத⁴ம்மேஸு அனுஸேதி. தேன வுத்தம் ‘‘ஸப்³ப³ஸக்காயபரியாபன்னேஸு த⁴ம்மேஸு ஏத்த² அவிஜ்ஜானுஸயோ அனுஸேதீ’’தி. தஸ்ஸ த்³வாத³ஸஸு சித்துப்பாதே³ஸு ஸஹஜாதானுஸயதா வேதி³தப்³பா³. ஆரம்மணகரணவஸேன பன ந கிஞ்சி தேபூ⁴மகத⁴ம்மம் ஆரப்³ப⁴ ந பவத்ததீதி. ஏவம் அவிஜ்ஜானுஸயஸ்ஸ அனுஸயனட்டா²னம் வேதி³தப்³ப³ம். அயம் தாவ பரிச்சே²த³வாரபரிச்சி²ன்னுத்³தே³ஸவாரஉப்பத்திட்டா²னவாரேஸு வினிச்ச²யகதா².

உப்பத்திட்டா²னவாரவண்ணனா.

மஹாவாரோ

1. அனுஸயவாரவண்ணனா

3. ஸத்தன்னம் பன மஹாவாரானம் பட²மே அனுஸயவாரே யஸ்ஸ காமராகா³னுஸயோ அனுஸேதி, தஸ்ஸ படிகா⁴னுஸயோ அனுஸேதீதி ஏத்த² யதே³தம் ‘‘ஆமந்தா’’தி படிவசனம் தி³ன்னம், தம் து³த்³தி³ன்னம் விய கா²யதி. கஸ்மா? காமராக³படிகா⁴னம் ஏகக்க²ணே அனுப்பத்திதோ. யதா² ஹி ‘‘யஸ்ஸ மனாயதனம் உப்பஜ்ஜதி, தஸ்ஸ த⁴ம்மாயதனம் உப்பஜ்ஜதீதி ‘ஆமந்தா’, அஸ்ஸாஸபஸ்ஸாஸானம் உப்பாத³க்க²ணே தேஸம் காயஸங்கா²ரோ ச உப்பஜ்ஜதி, வசீஸங்கா²ரோ ச உப்பஜ்ஜதீ’’திஆதீ³ஸு மனாயதனத⁴ம்மாயதனானி காயஸங்கா²ரவசீஸங்கா²ரா ச ஏகக்க²ணே உப்பஜ்ஜந்தி, ந ததா² காமராக³படிகா⁴. காமராகோ³ ஹி அட்ட²ஸு லோப⁴ஸஹக³தசித்துப்பாதே³ஸு உப்பஜ்ஜதி. படிகோ⁴ த்³வீஸு தோ³மனஸ்ஸஸஹக³தேஸூதி, நத்தி² நேஸம் ஏகக்க²ணே உப்பத்தி; தஸ்மா ஏத்த² ‘நோ’தி படிஸேதோ⁴ கத்தப்³போ³ ஸியா. தம் அகத்வா பன ‘ஆமந்தா’தி படிவசனஸ்ஸ தி³ன்னத்தா ஹேட்டா²யமகேஸு விய ஏத்த² க²ணபச்சுப்பன்னவஸேன வத்தமானவோஹாரம் அக்³க³ஹேத்வா அஞ்ஞதா² க³ஹேதப்³போ³.

கத²ம்? அப்பஹீனவஸேன. அப்பஹீனதஞ்ஹி ஸந்தா⁴ய அயம் ‘‘அனுஸேதீ’’தி வத்தமானவோஹாரோ வுத்தோ, ந க²ணபச்சுப்பன்னதம். யஸ்மா ச அப்பஹீனதம் ஸந்தா⁴ய வுத்தோ, தஸ்மா ‘‘யஸ்ஸ காமராகா³னுஸயோ அனுஸேதி, தஸ்ஸ படிகா⁴னுஸயோ அனுஸேதீ’’தி புச்சா²ய யஸ்ஸ காமராகா³னுஸயோ அப்பஹீனோ, ந அனுப்பத்தித⁴ம்மதம் ஆபாதி³தோ, தஸ்ஸ படிகா⁴னுஸயோபி அப்பஹீனோதி ஏவமத்தோ² த³ட்ட²ப்³போ³. யஸ்மா ச தேஸு யஸ்ஸேகோ அப்பஹீனோ, தஸ்ஸ இதரோபி அப்பஹீனோவ ஹோதி, தஸ்மா ‘‘ஆமந்தா’’தி வுத்தம். யதி³ ஏவம், யம் உபரி உப்பஜ்ஜனவாரே ‘யஸ்ஸ காமராகா³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதீ’தி புச்சி²த்வா ‘ஆமந்தா’தி வுத்தம்; தத்த² கத²ம் அத்தோ² க³ஹேதப்³போ³தி? தத்தா²பி அப்பஹீனவஸேனேவ உப்பத்திபச்சயே ஸதி உப்பத்தியா அனிவாரிதவஸேன வா. யதா² ஹி சித்தகம்மாதீ³னி ஆரபி⁴த்வா அபரினிட்டி²தகம்மந்தா சித்தகாராத³யோ தேஸம் கம்மந்தானம் அகரணக்க²ணேபி மித்தஸுஹஜ்ஜாதீ³ஹி தி³ட்ட²தி³ட்ட²ட்டா²னே ‘‘இமேஸு தி³வஸேஸு கிம் கரோதா²’’தி வுத்தா, ‘‘சித்தகம்மம் கரோம, கட்ட²கம்மம் கரோமா’’தி வத³ந்தி. தே கிஞ்சாபி தஸ்மிம் க²ணே ந கரோந்தி அவிச்சி²ன்னகம்மந்தத்தா பன கதக²ணஞ்ச கத்தப்³ப³க²ணஞ்ச உபாதா³ய கரோந்தியேவ நாம ஹோந்தி. ஏவமேவ யம்ஹி ஸந்தானே அனுஸயா அப்பஹீனா, யம்ஹி வா பன நேஸம் ஸந்தானே உப்பத்திபச்சயே ஸதி உப்பத்தி அனிவாரிதா, தத்த² அனுப்பஜ்ஜனக்க²ணேபி உப்பன்னபுப்³ப³ஞ்சேவ காலந்தரே உப்பஜ்ஜனகஞ்ச உபாதா³ய யஸ்ஸ காமராகா³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதியேவ நாமாதி ஏவமத்தோ² வேதி³தப்³போ³. இதோ பரேஸுபி ஏவரூபேஸு விஸ்ஸஜ்ஜனேஸு ஏஸேவ நயோ. நோ ச தஸ்ஸாதி இத³ம் அனாகா³மிஸ்ஸ காமராக³ப்³யாபாதா³னம் அனவஸேஸதோ பஹீனத்தா வுத்தம். திண்ணம் புக்³க³லானந்தி புது²ஜ்ஜனஸோதாபன்னஸகதா³கா³மீனம். த்³வின்னம் புக்³க³லானந்தி ஸோதாபன்னஸகதா³கா³மீனம். பரதோபி ஏவரூபேஸு டா²னேஸு ஏஸேவ நயோ.

14. ஓகாஸவாரஸ்ஸ பட²மது³தியபுச்சா²ஸு யஸ்மா காமராகா³னுஸயோ காமதா⁴துயா த்³வீஸு வேத³னாஸு அனுஸேதி, படிகா⁴னுஸயோ து³க்க²வேத³னாய; தஸ்மா ‘நோ’தி படிஸேதோ⁴ கதோ. ததியபுச்சா²யம் உபி⁴ன்னம்பி காமதா⁴துயா த்³வீஸு வேத³னாஸு அனுஸயனதோ ‘ஆமந்தா’தி படிவசனம் தி³ன்னம். ரூபதா⁴துஅரூபதா⁴துயா பன மானானுஸயஸ்ஸ காமராகா³னுஸயேன ஸத்³தி⁴ம் அஸாதா⁴ரணம் உப்பத்திட்டா²னம். தஸ்மா நோ ச தத்த² காமராகா³னுஸயோதி வுத்தம். இமினா நயேன ஸப்³பே³ஸம் உப்பத்திட்டா²னவாரம் ஓலோகேத்வா ஸாதா⁴ரணாஸாதா⁴ரணம் உப்பத்திட்டா²னம் வேதி³தப்³ப³ம்.

20. து³கமூலகபுச்சா²யம் யஸ்மா காமராக³படிகா⁴னுஸயா நாபி ஏகஸ்மிம் டா²னே உப்பஜ்ஜந்தி, ந ஏகம் த⁴ம்மம் ஆரம்மணம் கரோந்தி, தஸ்மா நத்தீ²தி படிக்கே²போ கதோ. அயஞ்ஹேத்த² அதி⁴ப்பாயோ. யஸ்மிம் இமே த்³வே அனுஸயா அனுஸயேய்யும், தம் டா²னமேவ நத்தி². தஸ்மா ‘‘கத்த² மானானுஸயோ அனுஸேதீ’’தி அயம் புச்சா² அபுச்சா²யேவாதி. அஞ்ஞேஸுபி ஏவரூபேஸு ஏஸேவ நயோ.

27. புக்³க³லோகாஸவாரே சதுன்னந்தி புது²ஜ்ஜனஸோதாபன்னஸகதா³கா³மிஅனாகா³மீனம்.

36. படிலோமனயே யஸ்ஸ காமராகா³னுஸயோ நானுஸேதீதி அயம் புச்சா² அனாகா³மிம் க³ஹேத்வா புச்ச²தி.

56. த்³வின்னம் புக்³க³லானம் ஸப்³ப³த்த² காமராகா³னுஸயோ நானுஸேதீதி அனாகா³மிஅரஹந்தானம். காமதா⁴துயா தீஸு வேத³னாஸூதி ச வேத³னாக்³க³ஹணேன வேத³னாஸம்பயுத்தகானம்பி தேஸம் வத்தா²ரம்மணானம்பீதி ஸப்³பே³ஸம்பி காமாவசரத⁴ம்மானம் க³ஹணம் வேதி³தப்³ப³ம். அயம் அனுஸயவாரே வினிச்ச²யகதா².

அனுஸயவாரவண்ணனா.

2. ஸானுஸயவாரவண்ணனா

66-131. ஸானுஸயவாரே பன யோ காமராகா³னுஸயேன ஸானுஸயோதி யதா² ஏகந்தரிகஜராதி³ரோகே³ன ஆபா³தி⁴கோ யாவ தம்ஹா ரோகா³ ந முச்சதி, தாவ தஸ்ஸ ரோக³ஸ்ஸ அனுப்பத்திக்க²ணேபி ஸரோகோ³யேவ நாம ஹோதி. ஏவம் ஸஸம்கிலேஸஸ்ஸ வட்டகா³மிஸத்தஸ்ஸ யாவ அரியமக்³கே³ன அனுஸயா ஸமுக்³கா⁴தம் ந க³ச்ச²ந்தி, தாவ தேஸம் அனுஸயானம் அனுப்பத்திக்க²ணேபி ஸானுஸயோயேவ நாம ஹோதி. ஏவரூபம் ஸானுஸயதம் ஸந்தா⁴ய ‘ஆமந்தா’தி வுத்தம். ஸேஸமேத்த² அனுஸயவாரஸதி³ஸமேவ.

ஓகாஸவாரே பன ‘‘ரூபதா⁴துயா அரூபதா⁴துயா ஏத்த² மானானுஸயேன ஸானுஸயோ’’தி வுத்தே தாஸு தா⁴தூஸு புக்³க³லஸ்ஸ ஸானுஸயதா பஞ்ஞாயேய்ய, அனுஸயஸ்ஸ உப்பத்திட்டா²னம் ந பஞ்ஞாயேய்ய. அனுஸயஸ்ஸ ச உப்பத்திட்டா²னத³ஸ்ஸனத்த²ம் அயம் வாரோ ஆரத்³தோ⁴, தஸ்மா ததோ மானானுஸயேன ஸானுஸயோதி வுத்தம். ஏவஞ்ஹி ஸதி ததோ தா⁴துத்³வயதோ உப்பன்னேன மானானுஸயேன ஸானுஸயோதி அனுஸயஸ்ஸ உப்பத்திட்டா²னம் த³ஸ்ஸிதம் ஹோதி. இமஸ்ஸ பன பஞ்ஹஸ்ஸ அத்தே² அவுத்தே ஆதி³பஞ்ஹஸ்ஸ அத்தோ² பாகடோ ந ஹோதீதி பட²மம் ந வுத்தோ, தஸ்மா ஸோ ஏவம் வேதி³தப்³போ³. யதோ காமராகா³னுஸயேனாதி யதோ உப்பன்னேன காமராகா³னுஸயேன ஸானுஸயோ, கிம் ஸோ ததோ உப்பன்னேன படிகா⁴னுஸயேனபி ஸானுஸயோதி? யஸ்மா பனேதே த்³வே ஏகஸ்மா டா²னா நுப்பஜ்ஜந்தி; தஸ்மா ‘‘நோ’’தி படிஸேதோ⁴ கதோ. அரஹா ஸப்³ப³த்தா²தி அரஹா ஸப்³ப³த⁴ம்மேஸு உப்பஜ்ஜனகேன கேனசி அனுஸயேன நிரானுஸயோதி. இமினா அத்த²வஸேன நிப்பதே³ஸட்டா²னேஸு பு⁴ம்மவசனமேவ கதந்தி. இமினா உபாயேன ஸப்³ப³த்த² அத்த²வினிச்ச²யோ வேதி³தப்³போ³தி.

ஸானுஸயவாரவண்ணனா.

3. பஜஹனவாரவண்ணனா

132-197. பஜஹனவாரே பஜஹதீதி தேன தேன மக்³கே³ன பஹானபரிஞ்ஞாவஸேன பஜஹதி, ஆயதிம் அனுப்பத்தித⁴ம்மதம் ஆபாதே³தி. ஆமந்தாதி அனாகா³மீமக்³க³ட்ட²ம் ஸந்தா⁴ய படிவசனம். ததே³கட்ட²ம் பஜஹதீதி பஹானேகட்ட²தம் ஸந்தா⁴ய வுத்தம். நோதி அரஹத்தமக்³க³ட்ட²ம் ஸந்தா⁴ய படிஸேதோ⁴.

யதோ காமராகா³னுஸயம் பஜஹதீதி யதோ உப்பஜ்ஜனகம் காமராகா³னுஸயம் பஜஹதீதி அத்தோ². அட்ட²மகோதி அரஹத்தப²லட்ட²தோ பட்டா²ய பச்சோரோஹனக³ணனாய க³ணியமானோ ஸோதாபத்திமக்³க³ட்டோ² அட்ட²மகோ நாம. த³க்கி²ணேய்யக³ணனாய ஹி அரஹா அக்³க³த³க்கி²ணேய்யத்தா பட²மோ, அரஹத்தமக்³க³ட்டோ² து³தியோ, அனாகா³மீ ததியோ…பே… ஸோதாபத்திமக்³க³ட்டோ² அட்ட²மோ. ஸோ இத⁴ ‘‘அட்ட²மகோ’’தி வுத்தோ. நாமஸஞ்ஞாயேவ வா ஏஸா தஸ்ஸாதி. அனாகா³மிமக்³க³ஸமங்கி³ஞ்ச அட்ட²மகஞ்ச ட²பேத்வா அவஸேஸாதி ஸத்³தி⁴ம் புது²ஜ்ஜனேன ஸேக்கா²ஸேக்கா². தேஸு ஹி புது²ஜ்ஜனோ பஹானபரிஞ்ஞாய அபா⁴வேன நப்பஜஹதி. ஸேஸா தேஸம் அனுஸயானம் பஹீனத்தா. த்³வின்னம் மக்³க³ஸமங்கீ³னந்தி த்³வே மக்³க³ஸமங்கி³னோ ட²பேத்வாதி அத்தோ². இமினா நயேன ஸப்³ப³த்த² வினிச்ச²யோ வேதி³தப்³போ³தி.

பஜஹனவாரவண்ணனா.

4. பரிஞ்ஞாவாரவண்ணனா

198-263. பரிஞ்ஞாவாரே பரிஜானாதீதி தீஹி பரிஞ்ஞாஹி பரிஜானாதி. ஸேஸமேத்த² ஹேட்டா² வுத்தனயமேவ. அயம்பி ஹி வாரோ பஜஹனவாரோ விய மக்³க³ட்டா²னஞ்ஞேவ வஸேன விஸ்ஸஜ்ஜிதோதி.

பரிஞ்ஞாவாரவண்ணனா.

5. பஹீனவாரவண்ணனா

264-274. பஹீனவாரே ப²லட்ட²வஸேனேவ தே³ஸனா ஆரத்³தா⁴. அனாகா³மிஸ்ஸ ஹி உபோ⁴பேதே அனுஸயா பஹீனா, தஸ்மா ‘‘ஆமந்தா’’தி வுத்தம்.

275-296. ஓகாஸவாரே யத்த² காமராகா³னுஸயோ பஹீனோ தத்த² படிகா⁴னுஸயோ பஹீனோதி புச்சி²த்வா ந வத்தப்³போ³ பஹீனோதி வா அப்பஹீனோதி வாதி வுத்தம் தம் கஸ்மாதி? உப்பத்திட்டா²னஸ்ஸ அஸாதா⁴ரணத்தா. அஞ்ஞம் ஹி காமராகா³னுஸயஸ்ஸ உப்பத்திட்டா²னம், அஞ்ஞம் படிகா⁴னுஸயஸ்ஸ. அபா⁴விதமக்³க³ஸ்ஸ ச யத்த² அனுஸயோ உப்பஜ்ஜதி, மக்³கே³ பா⁴விதே தத்தே²வ ஸோ பஹீனோ நாம ஹோதி. தத்த² யஸ்மா நேவ காமராகா³னுஸயட்டா²னே படிகா⁴னுஸயோ உப்பஜ்ஜதி, ந படிகா⁴னுஸயட்டா²னே காமராகா³னுஸயோ, தஸ்மா தத்த² ஸோ பஹீனோதி வா அப்பஹீனோதி வா ந வத்தப்³போ³. ஸோ ஹி யஸ்மிம் அத்தனோ உப்பத்திட்டா²னே காமராகா³னுஸயோ பஹீனோ, தஸ்மிம் அப்பஹீனத்தா தத்த² பஹீனோதி ந வத்தப்³போ³. யம் காமராகா³னுஸயஸ்ஸ உப்பத்திட்டா²னம், தஸ்மிம் அட்டி²தத்தா தத்த² அப்பஹீனோதி ந வத்தப்³போ³.

யத்த² காமராகா³னுஸயோ பஹீனோ, தத்த² மானானுஸயோ பஹீனோதி ஏத்த² பன ஸாதா⁴ரணட்டா²னம் ஸந்தா⁴ய ஆமந்தாதி வுத்தம். காமராகா³னுஸயோ ஹி காமதா⁴துயா த்³வீஸு வேத³னாஸு அனுஸேதி. மானானுஸயோ தாஸு சேவ ரூபாரூபதா⁴தூஸு ச. ஸோ ட²பேத்வா அஸாதா⁴ரணட்டா²னம் ஸாதா⁴ரணட்டா²னே தேன ஸத்³தி⁴ம் பஹீனோ நாம ஹோதி. தஸ்மா ‘ஆமந்தா’தி வுத்தம். இமினா நயேன ஸப்³ப³ஸ்மிம்பி ஓகாஸவாரே பஹீனதா ச நவத்தப்³ப³தா ச வேதி³தப்³பா³. ‘நத்தீ²’தி ஆக³தட்டா²னேஸு பன ஹேட்டா² வுத்தஸதி³ஸோவ வினிச்ச²யோ. புக்³க³லோகாஸவாரோ, ஓகாஸவாரக³திகோயேவ.

297-307. படிலோமனயே யஸ்ஸ காமராகா³னுஸயோ அப்பஹீனோதி புது²ஜ்ஜனஸோதாபன்னஸகதா³கா³மிவஸேன புச்ச²தி. கிஞ்சாபி ஹி இமே த்³வே அனுஸயா புது²ஜ்ஜனதோ பட்டா²ய யாவ அனாகா³மிமக்³க³ட்டா² ச²ன்னம் புக்³க³லானம் அப்பஹீனா. இத⁴ பன பரதோ ‘‘திண்ணம் புக்³க³லானம் த்³வின்னம் புக்³க³லான’’ந்திஆதி³வசனதோ மக்³க³ட்டா² அனதி⁴ப்பேதா, தஸ்மா புது²ஜ்ஜனஸோதாபன்னஸகதா³கா³மினோவ ஸந்தா⁴ய ‘ஆமந்தா’தி வுத்தம். த்³வின்னம் புக்³க³லானந்தி ஸோதாபன்னஸகதா³கா³மீனம். இமினா நயேன புக்³க³லவாரே வினிச்ச²யோ வேதி³தப்³போ³.

308-329. ஓகாஸவாரபுக்³க³லோகாஸவாரா பன ஹேட்டா² வுத்தனயேனேவ வேதி³தப்³பா³தி.

பஹீனவாரவண்ணனா.

6. உப்பஜ்ஜனவாரவண்ணனா

330. உப்பஜ்ஜனவாரோ அனுஸயவாரஸதி³ஸோயேவ.

7. தா⁴துபுச்சா²வாரவண்ணனா

332-340. தா⁴துவாரஸ்ஸ புச்சா²வாரே தாவ கதி அனுஸயா அனுஸேந்தீதி கதி அனுஸயா ஸந்தானம் அனுக³தா ஹுத்வா ஸயந்தி. கதி அனுஸயா நானுஸேந்தீதி கதி அனுஸயா ஸந்தானம் ந அனுக³தா ஹுத்வா ஸயந்தி. கதி அனுஸயா ப⁴ங்கா³தி கதி அனுஸயா அனுஸேந்தி நானுஸேந்தீதி ஏவம் விப⁴ஜிதப்³பா³தி அத்தோ². ஸேஸமேத்த² யம் வத்தப்³ப³ம் ஸியா, தம் ஹேட்டா² பாளிவவத்தா²னே வுத்தமேவ.

7. தா⁴துவிஸ்ஸஜ்ஜனாவாரவண்ணனா

341-349. நித்³தே³ஸவாரே பனஸ்ஸ கஸ்ஸசி ஸத்த அனுஸயா அனுஸேந்தீதி புது²ஜ்ஜனவஸேன வுத்தம். கஸ்ஸசி பஞ்சாதி ஸோதாபன்னஸகதா³கா³மிவஸேன வுத்தம். தேஸஞ்ஹி தி³ட்டா²னுஸயோ ச விசிகிச்சா²னுஸயோ ச பஹீனாதி பஞ்சேவ அனுஸேந்தி. தத்த² யதா² அனுஸயவாரே ‘‘அனுஸேந்தீ’’தி பத³ஸ்ஸ உப்பஜ்ஜந்தீதி அத்தோ² க³ஹிதோ, ஏவமித⁴ ந க³ஹேதப்³போ³. கஸ்மா? தஸ்மிம் க²ணே அனுப்பஜ்ஜனதோ. காமதா⁴தும் உபபஜ்ஜந்தஸ்ஸ ஹி விபாகசித்தஞ்சேவ கம்மஸமுட்டா²னரூபஞ்ச உப்பஜ்ஜதி, அகுஸலசித்தம் நத்தி². அனுஸயா ச அகுஸலசித்தக்க²ணே உப்பஜ்ஜந்தி, ந விபாகசித்தக்க²ணேதி தஸ்மிம் க²ணே அனுப்பஜ்ஜனதோ ததா² அத்தோ² ந க³ஹேதப்³போ³. கத²ம் பன க³ஹேதப்³போ³தி? யதா² லப்³ப⁴தி ததா² க³ஹேதப்³போ³. கத²ஞ்ச லப்³ப⁴தி? அப்பஹீனட்டே²ன. யதா² ஹி ராக³தோ³ஸமோஹானம் அப்பஹீனத்தா. குஸலாப்³யாகதசித்தஸமங்கீ³ புக்³க³லோ ‘‘ஸராகோ³ ஸதோ³ஸோ ஸமோஹோ’’தி வுச்சதி, ஏவம் மக்³க³பா⁴வனாய அப்பஹீனத்தா படிஸந்தி⁴க்க²ணேபி தஸ்ஸ தஸ்ஸ புக்³க³லஸ்ஸ தே தே அனுஸயா அனுஸேந்தீதி வுச்சந்தி. ந கேவலஞ்ச வுச்சந்தி, அப்பஹீனத்தா பன தே அனுஸேந்தியேவ நாமாதி வேதி³தப்³பா³.

அனுஸயா ப⁴ங்கா³ நத்தீ²தி யஸ்ஸ ஹி யோ அனுஸேதி, ஸோ அனுஸேதியேவ; யோ நானுஸேதி, ஸோ நானுஸேதியேவ. அயம் அனுஸேதி ச நானுஸேதி ச, அயம் ஸியா அனுஸேதி ஸியா நானுஸேதீதி, ஏவம் விப⁴ஜிதப்³போ³ அனுஸயோ நாம நத்தி². ரூபதா⁴தும் உபபஜ்ஜந்தஸ்ஸ கஸ்ஸசி தயோதி அனாகா³மிவஸேன வுத்தம். தஸ்ஸ ஹி காமராக³படிக⁴தி³ட்டி²விசிகிச்சா²னுஸயா சத்தாரோபி அனவஸேஸதோ பஹீனா. இதரே தயோவ அப்பஹீனா. தேன வுத்தம் – ‘‘கஸ்ஸசி தயோ அனுஸயா அனுஸேந்தீ’’தி.

ந காமதா⁴துந்தி காமதா⁴துயா படிஸித்³த⁴த்தா ஸேஸா த்³வே தா⁴துயோ உபபஜ்ஜந்தஸ்ஸாதி அத்தோ². ஸத்தே வாதி யஸ்மா அரியஸாவகஸ்ஸ ரூபதா⁴துயா சுதஸ்ஸ காமதா⁴துயம் உபபத்தி நாம நத்தி², புது²ஜ்ஜனஸ்ஸேவ ஹோதி, தஸ்மா ஸத்தேவாதி நியமேத்வா வுத்தம். ‘‘அரூபதா⁴துயா சுதஸ்ஸ காமதா⁴தும் உபபஜ்ஜந்தஸ்ஸ ஸத்தேவா’’தி ஏத்தா²பி ஏஸேவ நயோ. ரூபதா⁴துயா உபபத்தி நத்தீ²தி கஸ்மா நத்தி²? உபபத்தினிப்பா²த³கஸ்ஸ ரூபாவசரஜ்ஜா²னஸ்ஸ அபா⁴வா. ஸோ ஹி ஸப்³ப³ஸோ ரூபஸஞ்ஞானம் ஸமதிக்கமா தம் தா⁴தும் உபபன்னோதி நாஸ்ஸ தத்த² ரூபாவசரஜ்ஜா²னம் அத்தி². தத³பா⁴வா ரூபதா⁴துயம் உபபத்தி நத்தீ²தி வேதி³தப்³பா³. அரூபதா⁴துயா சுதஸ்ஸ ந காமதா⁴துந்தி ஏத்த² அரூபதா⁴துயேவ அதி⁴ப்பேதா. இமினா நயேன ஸப்³ப³விஸ்ஸஜ்ஜனேஸு அத்தோ² வேதி³தப்³போ³தி.

தா⁴துவாரவண்ணனா.

அனுஸயயமகவண்ணனா நிட்டி²தா.