8. சித்தயமகம்

உத்³தே³ஸவாரவண்ணனா

1-62. இதா³னி தேஸஞ்ஞேவ மூலயமகே தே³ஸிதானம் குஸலாதி³த⁴ம்மானம் லப்³ப⁴மானவஸேன ஏகதே³ஸமேவ ஸங்க³ண்ஹித்வா அனுஸயயமகானந்தரம் தே³ஸிதஸ்ஸ சித்தயமகஸ்ஸ அத்த²வண்ணனா ஹோதி. தத்த² பாளிவவத்தா²னம் தாவ வேதி³தப்³ப³ம். இமஸ்மிஞ்ஹி சித்தயமகே மாதிகாட²பனம், ட²பிதமாதிகாய விஸ்ஸஜ்ஜனந்தி த்³வே வாரா ஹோந்தி. தத்த² மாதிகாட²பனே புக்³க³லவாரோ, த⁴ம்மவாரோ, புக்³க³லத⁴ம்மவாரோதி ஆதி³தோவ தயோ ஸுத்³தி⁴கமஹாவாரா ஹோந்தி.

தத்த² ‘‘யஸ்ஸ சித்தம் உப்பஜ்ஜதி, ந நிருஜ்ஜ²தீ’’தி ஏவம் புக்³க³லவஸேன சித்தஸ்ஸ உப்பஜ்ஜனனிருஜ்ஜ²னாதி³பே⁴த³ம் தீ³பேந்தோ க³தோ புக்³க³லவாரோ நாம. ‘‘யம் சித்தம் உப்பஜ்ஜதி, ந நிருஜ்ஜ²தீ’’தி ஏவம் த⁴ம்மவஸேனேவ சித்தஸ்ஸ உப்பஜ்ஜனனிருஜ்ஜ²னாதி³பே⁴த³ம் தீ³பேந்தோ க³தோ த⁴ம்மவாரோ நாம. ‘‘யஸ்ஸ யம் சித்தம் உப்பஜ்ஜதி, ந நிருஜ்ஜ²தீ’’தி ஏவம் உப⁴யவஸேன சித்தஸ்ஸ உப்பஜ்ஜனனிருஜ்ஜ²னாதி³பே⁴த³ம் தீ³பேந்தோ க³தோ புக்³க³லத⁴ம்மவாரோ நாம. ததோ ‘‘யஸ்ஸ ஸராக³ம் சித்த’’ந்தி ஸோளஸன்னம் பதா³னம் வஸேன அபரே ஸராகா³தி³பத³விஸேஸிதா ஸோளஸ புக்³க³லவாரா, ஸோளஸ த⁴ம்மவாரா, ஸோளஸ புக்³க³லத⁴ம்மவாராதி அட்ட²சத்தாலீஸம் மிஸ்ஸகவாரா ஹோந்தி. தே ஸராகா³தி³பத³மத்தம் த³ஸ்ஸேத்வா ஸங்கி²த்தா. ததோ ‘‘யஸ்ஸ குஸலம் சித்த’’ந்திஆதி³னா நயேன ச²ஸட்டி²த்³விஸதஸங்கா²னம் அபி⁴த⁴ம்மமாதிகாபதா³னம் வஸேன அபரே குஸலாதி³பத³விஸேஸிதா ச²ஸட்டி²த்³விஸதபுக்³க³லவாரா, ச²ஸட்டி²த்³விஸதத⁴ம்மவாரா ச²ஸட்டி²த்³விஸதபுக்³க³லத⁴ம்மவாராதி அட்ட²னவுதிஸத்தஸதா மிஸ்ஸகவாரா ஹோந்தி. தேபி குஸலாதி³பத³மத்தம் த³ஸ்ஸேத்வா ஸங்கி²த்தாயேவ. யானிபேத்த² ஸனித³ஸ்ஸனாதீ³னி பதா³னி சித்தேன ஸத்³தி⁴ம் ந யுஜ்ஜந்தி, தானி மோக⁴புச்சா²வஸேன ட²பிதானி.

தேஸு பன தீஸு வாரேஸு ஸப்³ப³பட²மே ஸுத்³தி⁴கபுக்³க³லமஹாவாரே உப்பாத³னிரோத⁴காலஸம்பே⁴த³வாரோ, உப்பாது³ப்பன்னவாரோ, நிரோது⁴ப்பன்னவாரோ, உப்பாத³வாரோ, நிரோத⁴வாரோ, உப்பாத³னிரோத⁴வாரோ உப்பஜ்ஜமானனிரோத⁴வாரோ, உப்பஜ்ஜமானுப்பன்னவாரோ, நிருஜ்ஜ²மானுப்பன்னவாரோ, உப்பன்னுப்பாத³வாரோ, அதீதானாக³தவாரோ, உப்பன்னுப்பஜ்ஜமானவாரோ, நிருத்³த⁴னிருஜ்ஜ²மானவாரோ, அதிக்கந்தகாலவாரோதி சுத்³த³ஸ அந்தரவாரா. தேஸு உப்பாத³வாரோ, நிரோத⁴வாரோ, உப்பாத³னிரோத⁴வாரோதி இமேஸு தீஸு வாரேஸு அனுலோமபடிலோமவஸேன ச² ச² கத்வா அட்டா²ரஸ யமகானி. உப்பன்னுப்பாத³வாரே அதீதானாக³தகாலவஸேன அனுலோமதோ த்³வே, படிலோமதோ த்³வேதி சத்தாரி யமகானி. ஸேஸேஸு ஆதி³தோ நித்³தி³ட்டே²ஸு தீஸு, அனந்தரே நித்³தி³ட்டே²ஸு தீஸு; அவஸானே நித்³தி³ட்டே²ஸு சதூஸூதி த³ஸஸு வாரேஸு அனுலோமதோ ஏகம், படிலோமதோ ஏகந்தி த்³வே த்³வே கத்வா வீஸதி யமகானி. ஏவம் ஸப்³பே³ஸுபி சுத்³த³ஸஸு அந்தரவாரேஸு த்³வாசத்தாலீஸ யமகானி, சதுராஸீதி புச்சா² அட்ட²ஸட்டி²அத்த²ஸதம் ஹோதி. யதா² ச ஏகஸ்மிம் ஸுத்³தி⁴கபுக்³க³லமஹாவாரே, ததா² ஸுத்³தி⁴கத⁴ம்மவாரேபி ஸுத்³தி⁴கபுக்³க³லத⁴ம்மவாரேபீதி தீஸு மஹாவாரேஸு ச²ப்³பீ³ஸதியமகஸதம், ததோ தி³கு³ணா புச்சா², ததோ தி³கு³ணா அத்தா² ச வேதி³தப்³பா³. இத³ம் பன வாரத்தயம் ஸராகா³தி³வஸேன ஸோளஸகு³ணம், குஸலாதி³வஸேன ச²ஸட்டி²த்³விஸதகு³ணம் கத்வா இமஸ்மிம் சித்தயமகே அனேகானி யமகஸஹஸ்ஸானி, ததோ தி³கு³ணா புச்சா², ததோ தி³கு³ணா அத்தா² ச ஹோந்தீதி. பாடோ² பன ஸம்கி²த்தோதி. ஏவம் தாவ இமஸ்மிம் சித்தயமகே பாளிவவத்தா²னம் வேதி³தப்³ப³ம்.

மாதிகாட²பனவண்ணனா.

நித்³தே³ஸோ

1. புக்³க³லவாரவண்ணனா

63. இதா³னி ட²பிதானுக்கமேன மாதிகம் விஸ்ஸஜ்ஜேதும் யஸ்ஸ சித்தம் உப்பஜ்ஜதி ந நிருஜ்ஜ²தீதிஆதி³ ஆரத்³த⁴ம். தத்த² உப்பஜ்ஜதீதி உப்பாத³க்க²ணஸமங்கி³தாய உப்பஜ்ஜதி ந நிருஜ்ஜ²தீதி நிரோத⁴க்க²ணம் அப்பத்ததாய ந நிருஜ்ஜ²தி. தஸ்ஸ சித்தந்தி தஸ்ஸ புக்³க³லஸ்ஸ ததோ பட்டா²ய சித்தம் நிருஜ்ஜி²ஸ்ஸதி நுப்பஜ்ஜிஸ்ஸதீதி புச்ச²தி. தேஸம் சித்தந்தி யேஸம் பரிச்சி²ன்னவட்டது³க்கா²னம் கீ²ணாஸவானம் ஸப்³ப³பச்சி²மஸ்ஸ சுதிசித்தஸ்ஸ உப்பாத³க்க²ணோ வத்ததி, ஏதேஸம் ததே³வ சுதிசித்தம் உப்பாத³ப்பத்ததாய உப்பஜ்ஜதி நாம, ப⁴ங்க³ம் அப்பத்ததாய ந நிருஜ்ஜ²தி. இதா³னி பன ப⁴ங்க³ம் பத்வா தம் தேஸம் சித்தம் நிருஜ்ஜி²ஸ்ஸதி, ததோ அப்படிஸந்தி⁴கத்தா அஞ்ஞம் நுப்பஜ்ஜிஸ்ஸதி. இதரேஸந்தி பச்சி²மசித்தஸமங்கி³ம் கீ²ணாஸவம் ட²பேத்வா அவஸேஸானம் ஸேக்கா²ஸேக்க²புது²ஜ்ஜனானம் நிருஜ்ஜி²ஸ்ஸதி சேவ உப்பஜ்ஜிஸ்ஸதி சாதி யம் தம் உப்பாத³க்க²ணப்பத்தம் தம் நிருஜ்ஜி²ஸ்ஸதேவ. அஞ்ஞம் பன தஸ்மிம் வா அஞ்ஞஸ்மிம் வா அத்தபா⁴வே உப்பஜ்ஜிஸ்ஸதி சேவ நிருஜ்ஜி²ஸ்ஸதி ச. து³தியபுச்சா²விஸ்ஸஜ்ஜனேபி ததா²ரூபஸ்ஸேவ கீ²ணாஸவஸ்ஸ சித்தம் ஸந்தா⁴ய ‘ஆமந்தா’தி வுத்தம். நுப்பஜ்ஜதி நிருஜ்ஜ²தீதி ப⁴ங்க³க்க²ணே அரஹதோ பச்சி²மசித்தம்பி ஸேஸானம் பி⁴ஜ்ஜமானசித்தம்பி. ததோ பட்டா²ய பன அரஹதோ சித்தம் ந நிருஜ்ஜி²ஸ்ஸதீதி ஸக்கா வத்தும் உப்பஜ்ஜிஸ்ஸதீதி பன ந ஸக்கா. ஸேஸானம் உப்பஜ்ஜிஸ்ஸதீதி ஸக்கா வத்தும், ந நிருஜ்ஜி²ஸ்ஸதீதி ந ஸக்கா. தஸ்மா ‘நோ’தி படிஸேதோ⁴ கதோ. து³தியபஞ்ஹே யஸ்ஸ சித்தம் ந நிருஜ்ஜி²ஸ்ஸதி, உப்பஜ்ஜிஸ்ஸதீதி ஸோ புக்³க³லோயேவ நத்தி², தஸ்மா நத்தீ²தி படிக்கே²போ கதோ.

65-82. உப்பன்னந்தி உப்பாத³ஸமங்கி³னோபேதம் நாமம். உப்பாத³ம் பத்வா அனிருத்³த⁴ஸ்ஸாபி. தத்த² உப்பாத³ஸமங்கி³தம் ஸந்தா⁴ய ‘ஆமந்தா’தி, உப்பாத³ம் பத்வா அனிருத்³த⁴பா⁴வம் ஸந்தா⁴ய ‘‘தேஸம் சித்தம் உப்பன்ன’’ந்தி வுத்தம். அனுப்பன்னந்தி உப்பாத³ம் அப்பத்தம். தேஸம் சித்தம் உப்பஜ்ஜித்தா²தி ஏத்தா²பி ஸப்³பே³ஸம் தாவ சித்தம் க²ணபச்சுப்பன்னமேவ ஹுத்வா உப்பாத³க்க²ணம் அதீதத்தா உப்பஜ்ஜித்த² நாம, நிரோத⁴ஸமாபன்னானம் நிரோத⁴தோ புப்³பே³ உப்பன்னபுப்³ப³த்தா, அஸஞ்ஞஸத்தானம் ஸஞ்ஞீப⁴வே உப்பன்னபுப்³ப³த்தா. உப்பஜ்ஜித்த² சேவ உப்பஜ்ஜதி சாதி உப்பாத³ம் பத்தத்தா உப்பஜ்ஜித்த², அனதீதத்தா உப்பஜ்ஜதி நாமாதி அத்தோ².

உப்பாத³க்க²ணே அனாக³தஞ்சாதி உப்பாத³க்க²ணே ச சித்தம் அனாக³தஞ்ச சித்தந்தி அத்தோ².

83. அதிக்கந்தகாலவாரே உப்பஜ்ஜமானம் க²ணந்தி உப்பாத³க்க²ணம். தத்த² கிஞ்சாபி உப்பாத³க்க²ணோ உப்பஜ்ஜமானோ நாம ந ஹோதி, உப்பஜ்ஜமானஸ்ஸ பன க²ணத்தா ஏவம் வுத்தோ. க²ணம் வீதிக்கந்தம் அதிக்கந்தகாலந்தி ந சிரம் வீதிக்கந்தம் தமேவ பன உப்பாத³க்க²ணம் வீதிக்கந்தம் ஹுத்வா அதிக்கந்தகாலந்தி ஸங்க²ம் க³ச்ச²தி. நிருஜ்ஜ²மானம் க²ணந்தி நிரோத⁴க்க²ணம். தத்த² கிஞ்சாபி நிரோத⁴க்க²ணோ நிருஜ்ஜ²மானோ நாம ந ஹோதி, நிருஜ்ஜ²மானஸ்ஸ பன க²ணத்தா ஏவம் வுத்தோ. க²ணம் வீதிக்கந்தம் அதிக்கந்தகாலந்தி கிம் தஸ்ஸ சித்தம் ஏவம் நிரோத⁴க்க²ணம்பி வீதிக்கந்தம் ஹுத்வா அதிக்கந்தகாலம் நாம ஹோதீதி புச்ச²தி. தத்த² யஸ்மா ப⁴ங்க³க்க²ணே சித்தம் உப்பாத³க்க²ணம் க²ணம் வீதிக்கந்தம் ஹுத்வா அதிக்கந்தகாலம் ஹோதி, நிரோத⁴க்க²ணம் க²ணம் வீதிக்கந்தம் ஹுத்வா அதிக்கந்தகாலம் நாம ந ஹோதி. அதீதம் பன சித்தம் உபோ⁴பி க²ணே க²ணம் வீதிக்கந்தம் ஹுத்வா அதிக்கந்தகாலம் நாம, தஸ்மா ‘‘ப⁴ங்க³க்க²ணே சித்தம் உப்பாத³க்க²ணம் வீதிக்கந்தம், ப⁴ங்க³க்க²ணம் அவீதிக்கந்தம், அதீதம் சித்தம் உப்பாத³க்க²ணஞ்ச வீதிக்கந்தம் ப⁴ங்க³க்க²ணஞ்ச வீதிக்கந்தந்தி விஸ்ஸஜ்ஜனமாஹ. து³தியபஞ்ஹஸ்ஸ விஸ்ஸஜ்ஜனே யஸ்மா அதீதம் சித்தம் உபோ⁴பி க²ணே வீதிக்கந்தம் ஹுத்வா அதிக்கந்தகாலம் நாம ஹோதி, தஸ்மா அதீதம் சித்தந்தி வுத்தம். படிலோமபஞ்ஹஸ்ஸ விஸ்ஸஜ்ஜனே யஸ்மா உப்பாத³க்க²ணே ச சித்தம் அனாக³தஞ்ச சித்தம் உபோ⁴பி க²ணே க²ணம் வீதிக்கந்தம் ஹுத்வா அதிக்கந்தகாலம் நாம ந ஹோதி, தேஸம் க²ணானம் அவீதிக்கந்தத்தா. தஸ்மா ‘‘உப்பாத³க்க²ணே சித்தம் அனாக³தம் சித்த’’ந்தி வுத்தம். து³தியவிஸ்ஸஜ்ஜனம் பாகடமேவ.

84-113. த⁴ம்மவாரேபி இமினாவுபாயேன ஸப்³ப³விஸ்ஸஜ்ஜனேஸு அத்தோ² வேதி³தப்³போ³. புக்³க³லத⁴ம்மவாரோ த⁴ம்மவாரக³திகோயேவ.

114-116. ஸப்³பே³பி மிஸ்ஸகவாரா யஸ்ஸ ஸராக³ம் சித்தந்திஆதி³னா நயேன முக²மத்தம் த³ஸ்ஸேத்வா ஸங்கி²த்தா. வித்தா²ரோ பன நேஸம் ஹேட்டா² வுத்தனயேனேவ வேதி³தப்³போ³. தேஸு பன ‘‘யஸ்ஸ ஸராக³ம் சித்தம் உப்பஜ்ஜதி, ந நிருஜ்ஜ²தி; தஸ்ஸ சித்தம் நிருஜ்ஜி²ஸ்ஸதி, நுப்பஜ்ஜிஸ்ஸதீ’’தி ஏவம் வித்தா²ரேதப்³ப³தாய புச்சா²வ ஸதி³ஸா ஹோதி. யஸ்மா பன ஸராக³ம் சித்தம் பச்சி²மசித்தம் ந ஹோதி, தஸ்மா ‘‘யஸ்ஸ ஸராக³ம் சித்தம் உப்பஜ்ஜதி, ந நிருஜ்ஜ²தி; தஸ்ஸ சித்தம் நிருஜ்ஜி²ஸ்ஸதி, நுப்பஜ்ஜிஸ்ஸதீதி நோ’’தி ஏவம் விஸ்ஸஜ்ஜிதப்³ப³த்தா விஸ்ஸஜ்ஜனம் அஸதி³ஸம் ஹோதி. தம் தம் தஸ்ஸா தஸ்ஸா புச்சா²ய அனுரூபவஸேன வேதி³தப்³ப³ந்தி.

சித்தயமகவண்ணனா நிட்டி²தா.