2. அரியபுக்³க³லஸம்ஸந்த³னபரிஹானிவண்ணனா

240. இதா³னி அரியபுக்³க³லஸம்ஸந்த³னா ஆரத்³தா⁴. தத்த² யஸ்மா கேசி அரஹதோவ பரிஹானிம் இச்ச²ந்தி, கேசி அனாகா³மினோபி, கேசி ஸகதா³கா³மிஸ்ஸபி. ஸோதாபன்னஸ்ஸ பன ஸப்³பே³பி ந இச்ச²ந்தியேவ. யே அரஹத்தா பரிஹாயித்வா அனாகா³மிஸகதா³கா³மிபா⁴வே டி²தா, தேஸம் பரிஹானிம் இச்ச²ந்தி, ந இதரேஸம் அனாகா³மிஸகதா³கா³மீனம். ஸோதாபன்னஸ்ஸ பன தேபி ஸப்³ப³தா²பி ந இச்ச²ந்தியேவ, தஸ்மா பேய்யாலமுகே²ன புச்சா² கதா. தத்த² தேஸம் லத்³தி⁴வஸேன படிஞ்ஞா ச படிக்கே²போ ச வேதி³தப்³பா³. ‘‘பரிஹாயதி அனாகா³மீ அனாகா³மிப²லா’’தி ஹி பஞ்ஹஸ்மிம் யே அனாகா³மினோ பரிஹானிம் ந இச்ச²ந்தி, தேஸம் வஸேன படிக்கே²போ. யே பகதிஅனாகா³மினோ வா அரஹத்தா பரிஹாயித்வா டி²தஅனாகா³மினோ வா பரிஹானிம் இச்ச²ந்தி, தேஸம் வஸேன படிஞ்ஞாதி இத³மேத்த² நயமுக²ம். தஸ்ஸானுஸாரேன ஸப்³ப³பேய்யாலா அத்த²தோ வேதி³தப்³பா³.

241. யம் பனேத்த² ‘‘ஸோதாபத்திப²லஸ்ஸ அனந்தரா அரஹத்தம்யேவ ஸச்சி²கரோதீ’’தி வுத்தம், தம் பரிஹீனஸ்ஸ புன வாயமதோ அரஹத்தப்பத்திம் ஸந்தா⁴ய வுத்தம். இதரோ ஸோதாபத்திப²லானந்தரம் அரஹத்தஸ்ஸ அபா⁴வா படிக்கி²பதி.

242. ததோ பரம் ‘‘பரிஹானி நாமேஸா கிலேஸப்பஹானஸ்ஸ வா மந்த³தாய ப⁴வேய்ய, மக்³க³பா⁴வனாதீ³னம் வா அனதி⁴மத்ததாய, ஸச்சானம் வா அத³ஸ்ஸனேனா’’தி ஏவமாதீ³னம் வஸேன அனுயுஞ்ஜிதும் கஸ்ஸ ப³ஹுதரா கிலேஸா பஹீனாதிஆதி³ வுத்தம். தம் ஸப்³ப³ம் உத்தானாதி⁴ப்பாயமேவ ஸுத்தானம் பனத்தோ² ஆக³மட்ட²கதா²ஸு வுத்தனயேனேவ வேதி³தப்³போ³.

262. ஸமயவிமுத்தோ அரஹா அரஹத்தா பரிஹாயதீதி ஏத்த² முதி³ந்த்³ரியோ ஸமயவிமுத்தோ, திக்கி²ந்த்³ரியோ அஸமயவிமுத்தோதி தேஸம் லத்³தி⁴. ஸகஸமயே பன அவஸிப்பத்தோ ஜா²னலாபீ⁴ ஸமயவிமுத்தோ, வஸிப்பத்தோ ஜா²னலாபீ⁴ சேவ ஸப்³பே³ ச அரியபுக்³க³லா அரியே விமோக்கே² அஸமயவிமுத்தாதி ஸன்னிட்டா²னம். ஸோ பன தம் அத்தனோ லத்³தி⁴ம் க³ஹேத்வா ஸமயவிமுத்தோ பரிஹாயதி, இதரோ ந பரிஹாயதீ’’தி ஆஹ. ஸேஸமேத்த² உத்தானத்த²மேவ.

அரியபுக்³க³லஸம்ஸந்த³னபரிஹானிவண்ணனா.