3. ஸுத்தஸாத⁴னபரிஹானிவண்ணனா

265. இதா³னி ஸுத்தஸாத⁴னா ஹோதி. தத்த² உச்சாவசாதி உத்தமஹீனபே⁴த³தோ உச்சா ச அவசா ச. படிபாதா³தி படிபதா³. ஸமணேன பகாஸிதாதி பு³த்³த⁴ஸமணேன ஜோதிதா. ஸுகா²படிபதா³ ஹி கி²ப்பாபி⁴ஞ்ஞா உச்சா. து³க்கா²படிபதா³ த³ந்தா⁴பி⁴ஞ்ஞா அவசா. இதரா த்³வே ஏகேனங்கே³ன உச்சா, ஏகேன அவசா. பட²மம் வுத்தா ஏவ வா உச்சா, இதரோ திஸ்ஸோபி அவசா. தாய சேதாய உச்சாவசாய படிபதா³ய ந பாரம் தி³கு³ணம் யந்தி, ஏகமக்³கே³ன த்³விக்க²த்தும் நிப்³பா³னம் ந க³ச்ச²ந்தீதி அத்தோ². கஸ்மா? யேன மக்³கே³ன யே கிலேஸா பஹீனா, தேன தேஸம் புன அப்பஹாதப்³ப³தோ. ஏதேன பரிஹானித⁴ம்மாபா⁴வம் தீ³பேதி. நயித³ம் ஏககு³ணம் முதந்தி தஞ்ச இத³ம் பாரம் ஏகவாரம்யேவ பு²ஸனாரஹம் ந ஹோதி. கஸ்மா? ஏகேன மக்³கே³ன ஸப்³ப³கிலேஸானம் அப்பஹானதோ. ஏதேன ஏகமக்³கே³னேவ அரஹத்தாபா⁴வம் தீ³பேதி.

அத்தி² சி²ன்னஸ்ஸ சே²தி³யந்தி சி²ன்னஸ்ஸ கிலேஸவட்டஸ்ஸ புன சி²ந்தி³தப்³ப³ம் கிஞ்சி அத்தீ²தி புச்ச²தி. இதரோ திக்கி²ந்த்³ரியம் ஸந்தா⁴ய படிக்கி²பித்வா புன புட்டோ² முதி³ந்த்³ரியம் ஸந்தா⁴ய படிஜானாதி. ஸகவாதீ³ ஸுத்தம் ஆஹரித்வா நத்தி²பா⁴வம் த³ஸ்ஸேதி. தத்த² ஓக⁴பாஸோதி கிலேஸோகோ⁴ சேவ கிலேஸபாஸோ ச.

266. கதஸ்ஸ படிசயோதி பா⁴விதஸ்ஸ மக்³க³ஸ்ஸ புன பா⁴வனா. இதா⁴பி படிக்கே²பபடிஜானனானி புரிமனயேனேவ வேதி³தப்³பா³னி.

267. பரிஹானாய ஸம்வத்தந்தீதி பரவாதி³னா ஆப⁴தே ஸுத்தே பஞ்ச த⁴ம்மா அப்பத்தபரிஹானாய சேவ லோகியஸமாபத்திபரிஹானாய ச ஸம்வத்தந்தி. ஸோ பன பத்தஸ்ஸ அரஹத்தப²லஸ்ஸ பரிஹானாய ஸல்லக்கே²தி. தேனேவ அத்தி² அரஹதோ கம்மாராமதாதி ஆஹ. இதரோபி அஸமயவிமுத்தம் ஸந்தா⁴ய படிக்கி²பித்வா இதரம் ஸந்தா⁴ய படிஜானாதி. காமராக³வஸேன வா பவத்தமானம் தம் படிக்கி²பித்வா இதரதா² பவத்தமானம் படிஜானாதி. ராகா³தீ³னம் பன அத்தி²தம் புட்டோ² படிஜானிதும் ந ஸக்கோதி.

268. கிம் பரியுட்டி²தோதி கேன பரியுட்டி²தோ அனுப³த்³தோ⁴ அஜ்ஜோ²த்த²தோ வா ஹுத்வாதி அத்தோ². அனுஸயபுச்சா²யபி திக்கி²ந்த்³ரியமுதி³ந்த்³ரியவஸேனேவ படிக்கே²பபடிஜானனானி வேதி³தப்³பா³னி. கல்யாணானுஸயோதி வசனமத்தஸாமஞ்ஞேன வா படிஜானாதி. ராகோ³ உபசயம் க³ச்ச²தீதி பா⁴வனாய பஹீனம் ஸந்தா⁴யாஹ. பரதோ தோ³ஸமோஹேஸுபி ஏஸேவ நயோ. ஸக்காயதி³ட்டி²ஆதீ³னம் பன த³ஸ்ஸனேன பஹீனத்தா உபசயம் ந இச்ச²தி. ஸேஸம் ஸப்³ப³த்த² உத்தானத்த²மேவாதி.

ஸுத்தஸாத⁴னா.

பரிஹானிகதா² நிட்டி²தா.