5. ஸச்சயமகம்

1. பண்ணத்திவாரவண்ணனா

1-9. இதா³னி தேயேவ மூலயமகே தே³ஸிதே குஸலாதி³த⁴ம்மே ஸச்சவஸேன ஸங்க³ண்ஹித்வா தா⁴துயமகானந்தரம் தே³ஸிதஸ்ஸ ஸச்சயமகஸ்ஸ வண்ணனா ஹோதி. தத்தா²பி ஹேட்டா² வுத்தனயேனேவ பண்ணத்திவாராத³யோ தயோ மஹாவாரா அந்தரவாராத³யோ ச அவஸேஸப்பபே⁴தா³ வேதி³தப்³பா³. பண்ணத்திவாரே பனேத்த² சதுன்னம் ஸச்சானம் வஸேன பத³ஸோத⁴னவாரோ, பத³ஸோத⁴னமூலசக்கவாரோ, ஸுத்³த⁴ஸச்சவாரோ, ஸுத்³த⁴ஸச்சமூலசக்கவாரோதி இமேஸு சதூஸு வாரேஸு யமகக³ணனா வேதி³தப்³பா³.

10-26. பண்ணத்திவாரனித்³தே³ஸே பன அவஸேஸம் து³க்க²ஸச்சந்தி து³க்க²வேத³னாய சேவ தண்ஹாய ச வினிமுத்தா தேபூ⁴மகத⁴ம்மா வேதி³தப்³பா³. அவஸேஸோ ஸமுத³யோதி ஸச்சவிப⁴ங்கே³ நித்³தி³ட்ட²காமாவசரகுஸலாதி³பே⁴தோ³ து³க்க²ஸச்சஸ்ஸ பச்சயோ. அவஸேஸோ நிரோதோ⁴தி தத³ங்க³விக்க²ம்ப⁴னஸமுச்சே²த³படிபஸ்ஸத்³தி⁴னிரோதோ⁴ சேவ க²ணப⁴ங்க³னிரோதோ⁴ ச. அவஸேஸோ மக்³கோ³தி ‘‘தஸ்மிம் கோ² பன ஸமயே பஞ்சங்கி³கோ மக்³கோ³ ஹோதி, அட்ட²ங்கி³கோ மக்³கோ³, மிச்சா²மக்³கோ³, ஜங்க⁴மக்³கோ³, ஸகடமக்³கோ³’’தி ஏவமாதி³கோ.

பண்ணத்திவாரவண்ணனா.

2. பவத்திவாரவண்ணனா

27-164. பவத்திவாரே பனேத்த² பச்சுப்பன்னகாலே புக்³க³லவாரஸ்ஸ அனுலோமனயே ‘‘யஸ்ஸ து³க்க²ஸச்சம் உப்பஜ்ஜதி, தஸ்ஸ ஸமுத³யஸச்சம் உப்பஜ்ஜதி; யஸ்ஸ வா பன ஸமுத³யஸச்சம் உப்பஜ்ஜதி, தஸ்ஸ து³க்க²ஸச்சம் உப்பஜ்ஜதீ’’தி து³க்க²ஸச்சமூலகேஹி தீஹி, ஸமுத³யஸச்சமூலகேஹி த்³வீஹி, நிரோத⁴ஸச்சமூலகேன ஏகேனாதி லப்³ப⁴மானஞ்ச அலப்³ப⁴மானஞ்ச க³ஹேத்வா பாளிவஸேன ச²ஹி யமகேஹி ப⁴விதப்³ப³ம். தேஸு யஸ்மா நிரோத⁴ஸ்ஸ நேவ உப்பாதோ³, ந நிரோதோ⁴ யுஜ்ஜதி, தஸ்மா து³க்க²ஸச்சமூலகானி ஸமுத³யஸச்சமக்³க³ஸச்சேஹி ஸத்³தி⁴ம் த்³வே, ஸமுத³யஸச்சமூலகம் மக்³க³ஸச்சேன ஸத்³தி⁴ம் ஏகந்தி தீணி யமகானி ஆக³தானி. தஸ்ஸ படிலோமனயேபி ஓகாஸவாராதீ³ஸுபி ஏஸேவ நயோ. ஏவமேத்த² ஸப்³ப³வாரேஸு திண்ணம் திண்ணம் யமகானம் வஸேன யமகக³ணனா வேதி³தப்³பா³. அத்த²வினிச்ச²யே பனேத்த² இத³ம் லக்க²ணம் – இமஸ்ஸ ஹி ஸச்சயமகஸ்ஸ பவத்திவாரே நிரோத⁴ஸச்சம் தாவ ந லப்³ப⁴தேவ. ஸேஸேஸு பன தீஸு ஸமுத³யஸச்சமக்³க³ஸச்சானி ஏகந்தேன பவத்தியம்யேவ லப்³ப⁴ந்தி. து³க்க²ஸச்சம் சுதிபடிஸந்தீ⁴ஸுபி பவத்தேபி லப்³ப⁴தி. பச்சுப்பன்னாத³யோ பன தயோ காலா சுதிபடிஸந்தீ⁴னம்பி பவத்தியாபி வஸேன லப்³ப⁴ந்தி. ஏவமேத்த² யம் யம் லப்³ப⁴தி, தஸ்ஸ தஸ்ஸ வஸேன அத்த²வினிச்ச²யோ வேதி³தப்³போ³.

தத்ரித³ம் நயமுக²ம் – ஸப்³பே³ஸம் உபபஜ்ஜந்தானந்தி அந்தமஸோ ஸுத்³தா⁴வாஸானம்பி. தேபி ஹி து³க்க²ஸச்சேனேவ உபபஜ்ஜந்தி. தண்ஹாவிப்பயுத்தசித்தஸ்ஸாதி இத³ம் து³க்க²ஸச்சஸமுத³யஸச்சேஸு ஏககோட்டா²ஸஸ்ஸ உப்பத்தித³ஸ்ஸனத்த²ம் வுத்தம். தஸ்மா பஞ்சவோகாரவஸேனேவ க³ஹேதப்³ப³ம். சதுவோகாரே பன தண்ஹாவிப்பயுத்தஸ்ஸ ப²லஸமாபத்திசித்தஸ்ஸ உப்பாத³க்க²ணே ஏகம்பி ஸச்சம் நுப்பஜ்ஜதி. இத³ம் இத⁴ ந க³ஹேதப்³ப³ம். தேஸம் து³க்க²ஸச்சஞ்சாதி தஸ்மிஞ்ஹி க²ணே தண்ஹம் ட²பேத்வா ஸேஸம் து³க்க²ஸச்சம் நாம ஹோதீதி ஸந்தா⁴யேதம் வுத்தம். மக்³க³ஸ்ஸ உப்பாத³க்க²ணேபி ஏஸேவ நயோ. தத்த² பன ரூபமேவ து³க்க²ஸச்சம் நாம. ஸேஸா மக்³க³ஸம்பயுத்தகா த⁴ம்மா ஸச்சவினிமுத்தா. தேனேவ காரணேன ‘‘அரூபே மக்³க³ஸ்ஸ உப்பாத³க்க²ணே தேஸம் மக்³க³ஸச்சம் உப்பஜ்ஜதி, நோ ச தேஸம் து³க்க²ஸச்சம் உப்பஜ்ஜதீ’’தி வுத்தம். ஸப்³பே³ஸம் உபபஜ்ஜந்தானம் பவத்தே தண்ஹாவிப்பயுத்தசித்தஸ்ஸ உப்பாத³க்க²ணே தேஸம் தத்தா²தி தேஸம் தஸ்மிம் உபபத்திக்க²ணே தண்ஹாவிப்பயுத்தசித்துப்பத்திக்க²ணே சாதி ஏவமேத்த² க²ணவஸேன ஓகாஸோ வேதி³தப்³போ³. அஞ்ஞேஸுபி ஏவரூபேஸு ஏஸேவ நயோ. அனபி⁴ஸமேதாவீனந்தி சதுஸச்சபடிவேத⁴ஸங்கா²தம் அபி⁴ஸமயம் அப்பத்தஸத்தானம். அபி⁴ஸமேதாவீனந்தி அபி⁴ஸமிதஸச்சானந்தி. இமினா நயமுகே²ன ஸப்³ப³த்த² அத்த²வினிச்ச²யோ வேதி³தப்³போ³.

பவத்திவாரவண்ணனா.

3. பரிஞ்ஞாவாரவண்ணனா

165-170. பரிஞ்ஞாவாரே பன ஞாதபரிஞ்ஞா, தீரணபரிஞ்ஞா, பஹானபரிஞ்ஞாதி திஸ்ஸோபேத்த² பரிஞ்ஞாயோ லப்³ப⁴ந்தி. யஸ்மா ச லோகுத்தரத⁴ம்மேஸு பரிஞ்ஞா நாம நத்தி²; தஸ்மா இத⁴ த்³வே ஸச்சானி க³ஹிதானி. தத்த² து³க்க²ஸச்சம் பரிஜானாதீதி ஞாததீரணபரிஞ்ஞாவஸேனேவ வுத்தம். ஸமுத³யஸச்சம் பஜஹதீதி ஞாதபஹானபரிஞ்ஞாவஸேன. இதி இமாஸம் பரிஞ்ஞானம் வஸேன ஸப்³ப³பதே³ஸு அத்தோ² வேதி³தப்³போ³தி.

பரிஞ்ஞாவாரவண்ணனா.

ஸச்சயமகவண்ணனா நிட்டி²தா.