3. பரிஞ்ஞாவாரவண்ணனா

206-208. தத³னந்தரே பரிஞ்ஞாவாரேபி ச²ளேவ காலபே⁴தா³. அனுலோமபடிலோமதோ த்³வேயேவ நயா. புக்³க³லவாரோ, ஓகாஸவாரோ, புக்³க³லோகாஸவாரோதி இமேஸு பன தீஸு புக்³க³லவாரோவ லப்³ப⁴தி, ந இதரே த்³வே. கிம் காரணா? ஸதி³ஸவிஸ்ஸஜ்ஜனதாய. யோ ஹி கோசி புக்³க³லோ யத்த² கத்த²சி டா²னே ரூபக்க²ந்த⁴ம் சே பரிஜானாதி, வேத³னாக்க²ந்த⁴ம்பி பரிஜானாதியேவ. வேத³னாக்க²ந்த⁴ம் சே பரிஜானாதி, ரூபக்க²ந்த⁴ம்பி பரிஜானாதியேவ. ரூபக்க²ந்த⁴ம் சே ந பரிஜானாதி, வேத³னாக்க²ந்த⁴ம்பி ந பரிஜானாதியேவ. வேத³னாக்க²ந்த⁴ம் சே ந பரிஜானாதி, ரூபக்க²ந்த⁴ம்பி ந பரிஜானாதியேவ. தஸ்மா தேஸுபி ‘யத்த² ரூபக்க²ந்த⁴ம் பரிஜானாதி, தத்த² வேத³னாக்க²ந்த⁴ம் பரிஜானாதீ’தி ஆதி³வஸேன புச்ச²ம் கத்வா ‘ஆமந்தா’த்வேவ விஸ்ஸஜ்ஜனம் காதப்³ப³ம். ஸியாதி ஸதி³ஸவிஸ்ஸஜ்ஜனதாய தே இத⁴ ந லப்³ப⁴ந்தீதி வேதி³தப்³பா³.

அத² வா பரிஞ்ஞாகிச்சம் நாம புக்³க³லஸ்ஸேவ ஹோதி, நோ ஓகாஸஸ்ஸ, புக்³க³லோவ பரிஜானிதும் ஸமத்தோ², நோ ஓகாஸோதி புக்³க³லவாரோவேத்த² க³ஹிதோ, ந ஓகாஸவாரோ. தஸ்ஸ பன அக்³க³ஹிதத்தா தத³னந்தரோ புக்³க³லோகாஸவாரோ லப்³ப⁴மானோபி ந க³ஹிதோ. யோ பனேஸ புக்³க³லவாரோ க³ஹிதோ, தத்த² பச்சுப்பன்னகாலே ரூபக்க²ந்த⁴மூலகானி சத்தாரி, வேத³னாக்க²ந்த⁴மூலகானி தீணி, ஸஞ்ஞாக்க²ந்த⁴மூலகானி த்³வே, ஸங்கா²ரக்க²ந்த⁴மூலகம் ஏகந்தி ஹேட்டா² வுத்தனயேனேவ அனுலோமனயே அக்³க³ஹிதக்³க³ஹணேன த³ஸ யமகானி. படிலோமனயே த³ஸாதி வீஸதி. ததா² ஸேஸேஸுபீதி ஏகேகஸ்மிம் காலே வீஸதி வீஸதி கத்வா ச²ஸு காலேஸு வீஸம் யமகஸதம், சத்தாரீஸானி த்³வே புச்சா²ஸதானி, அஸீத்யாதி⁴கானி சத்தாரி அத்த²ஸதானி ச ஹோந்தீதி இத³மேத்த² பாளிவவத்தா²னம்.

அத்த²வினிச்ச²யே பனேத்த² அதீதானாக³தபச்சுப்பன்னஸங்கா²தா தயோ அத்³தா⁴ பவத்திவாரே விய சுதிபடிஸந்தி⁴வஸேன ந லப்³ப⁴ந்தி. பவத்தே சித்தக்க²ணவஸேனேவ லப்³ப⁴ந்தி. தேனேவேத்த² ‘யோ ரூபக்க²ந்த⁴ம் பரிஜானாதி, ஸோ வேத³னாக்க²ந்த⁴ம் பரிஜானாதீ’திஆதீ³ஸு புச்சா²ஸு ‘ஆமந்தா’தி விஸ்ஸஜ்ஜனம் கதம். லோகுத்தரமக்³க³க்க²ணஸ்மிஞ்ஹி நிப்³பா³னாரம்மணேன சித்தேன பஞ்சஸு க²ந்தே⁴ஸு பரிஞ்ஞாகிச்சனிப்³ப³த்தியா யம் கிஞ்சி ஏகம் க²ந்த⁴ம் பரிஜானந்தோ இதரம்பி பரிஜானாதீதி வுச்சதி. ஏவமேத்த² ‘பரிஜானாதீ’தி பஞ்ஹேஸு அனுலோமனயே பரிஞ்ஞாகிச்சஸ்ஸ மத்த²கப்பத்தம் அக்³க³மக்³க³ஸமங்கி³ம் ஸந்தா⁴ய ‘ஆமந்தா’தி வுத்தந்தி வேதி³தப்³ப³ம். படிலோமனயே பன ‘ந பரிஜானாதீ’தி பஞ்ஹேஸு புது²ஜ்ஜனாத³யோ ஸந்தா⁴ய ‘ஆமந்தா’தி வுத்தம். ‘பரிஜானித்தா²’தி இமஸ்மிம் பன அதீதகாலவாரே மக்³கா³னந்தரஅக்³க³ப²லே டி²தோபி பரிஞ்ஞாகிச்சஸ்ஸ நிட்டி²தத்தா பரிஜானித்த²யேவ நாம.

209. யோ ரூபக்க²ந்த⁴ம் பரிஜானாதி, ஸோ வேத³னாக்க²ந்த⁴ம் பரிஜானித்தா²தி பஞ்ஹேன அக்³க³மக்³க³ஸமங்கி³ம் புச்ச²தி. யஸ்மா பனேஸ க²ந்த⁴பஞ்சகம் பரிஜானாதியேவ நாம, ந தாவ நிட்டி²தபரிஞ்ஞாகிச்சோ; தஸ்மா ‘நோ’தி படிஸேதோ⁴ கதோ. து³தியபஞ்ஹே பன பரிஜானித்தா²தி அரஹந்தம் புச்ச²தி. யஸ்மா பனேஸோ நிட்டி²தபரிஞ்ஞாகிச்சோ. நத்தி² தஸ்ஸ பரிஞ்ஞேய்யம் நாம; தஸ்மா ‘நோ’தி படிஸேதோ⁴ கதோ. படிலோமனயவிஸ்ஸஜ்ஜனே பனேத்த² அரஹா ரூபக்க²ந்த⁴ம் ந பரிஜானாதீதி அரஹதோ பரிஞ்ஞாய அபா⁴வேன வுத்தம். அக்³க³மக்³க³ஸமங்கீ³ வேத³னாக்க²ந்த⁴ம் ந பரிஜானித்தா²தி அரஹத்தமக்³க³ட்ட²ஸ்ஸ அனிட்டி²தபரிஞ்ஞாகிச்சதாய வுத்தம். ந கேவலஞ்ச வேத³னாக்க²ந்த⁴மேவ, ஏகத⁴ம்மம்பி ஸோ ந பரிஜானித்தே²வ. இத³ம் பன புச்சா²வஸேன வுத்தம். நோ ச ரூபக்க²ந்த⁴ந்தி இத³ம்பி புச்சா²வஸேனேவ வுத்தம். அஞ்ஞம்பி பன ஸோ க²ந்த⁴ம் பரிஜானாதி.

210-211. யோ ரூபக்க²ந்த⁴ம் பரிஜானாதி, ஸோ வேத³னாக்க²ந்த⁴ம் பரிஜானிஸ்ஸதீதி ஏத்த² யஸ்மா மக்³க³ட்ட²புக்³க³லோ ஏகசித்தக்க²ணிகோ, தஸ்மா ஸோ பரிஜானிஸ்ஸதீதி ஸங்க²ம் ந க³ச்ச²தி. தேன வுத்தம் ‘நோ’தி. தே ரூபக்க²ந்த⁴ஞ்ச ந பரிஜானித்தா²தி புச்சா²ஸபா⁴கே³ன வுத்தம், ந பரிஜானிம்ஸூதி பனேத்த² அத்தோ². இமினா உபாயேன ஸப்³ப³த்த² அத்த²வினிச்ச²யோ வேதி³தப்³போ³தி.

பரிஞ்ஞாவாரவண்ணனா.

க²ந்த⁴யமகவண்ணனா நிட்டி²தா.