4. திரச்சா²னகதா²வண்ணனா

869-871. இதா³னி திரச்சா²னகதா² நாம ஹோதி. தத்த² தே³வேஸு ஏராவணாத³யோ தே³வபுத்தா ஹத்தி²வண்ணம் அஸ்ஸவண்ணம் விகுப்³ப³ந்தி, நத்தி² தத்த² திரச்சா²னக³தா. யேஸம் பன திரச்சா²னவண்ணினோ தே³வபுத்தே தி³ஸ்வா ‘‘அத்தி² தே³வேஸு திரச்சா²னக³தா’’தி லத்³தி⁴, ஸேய்யதா²பி அந்த⁴கானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ தே³வயோனியம் திரச்சா²னக³தா ஸியும், திரச்சா²னயோனியம்பி தே³வா ஸியு’’ந்தி சோதே³தும் அத்தி² திரச்சா²னக³தேஸூதிஆதி³மாஹ. கீடாதிஆதி³ யேஸம் ஸோ அபா⁴வம் இச்ச²தி, தே த³ஸ்ஸேதும் வுத்தம். ஏராவணோதி பஞ்ஹே தஸ்ஸ அத்தி²தாய படிஞ்ஞா ஸகவாதி³ஸ்ஸ, ந திரச்சா²னக³தஸ்ஸ. ஹத்தி²ப³ந்தா⁴திஆதி³ ‘‘யதி³ தத்த² ஹத்தி²ஆத³யோ ஸியும், ஹத்தி²ப³ந்தா⁴த³யோபி ஸியு’’ந்தி சோத³னத்த²ம் வுத்தம். தத்த² யாவஸிகாதி யவஸ்ஸ தா³யகா. காரணிகாதி ஹத்தா²சரியாத³யோ, யேஹி தே நானாவித⁴ம் காரணம் கரேய்யும். ப⁴த்தகாரகாதி ஹத்தி²ஆதீ³னம் ப⁴த்தரந்த⁴கா. ந ஹேவந்தி ததா² அனிச்ச²ந்தோ படிக்கி²பதீதி.

திரச்சா²னகதா²வண்ணனா.