5. மக்³க³கதா²வண்ணனா

872-875. இதா³னி மக்³க³கதா² நாம ஹோதி. தத்த² யேஸம் ‘‘புப்³பே³வ கோ² பனஸ்ஸ காயகம்மம் வசீகம்மம் ஆஜீவோ ஸுபரிஸுத்³தோ⁴ ஹோதீ’’தி (அ. நி. 3.431) இத³ஞ்சேவ ஸுத்தம் ஸம்மாவாசாகம்மந்தாஜீவானஞ்ச சித்தவிப்பயுத்ததம் நிஸ்ஸாய ‘‘நிப்பரியாயேன பஞ்சங்கி³கோவ மக்³கோ³’’தி லத்³தி⁴, ஸேய்யதா²பி மஹிஸாஸகானம், தே ஸந்தா⁴ய பஞ்சங்கி³கோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸம்மாவாசா மக்³க³ங்க³ம், ஸா ச ந மக்³கோ³திஆதி³ பரஸமயவஸேன வுத்தம். பரஸமயஸ்மிஞ்ஹி ஸம்மாவாசாத³யோ மக்³க³ங்க³ந்தி ஆக³தா. ரூபத்தா பன மக்³கோ³ ந ஹோதீதி வண்ணிதா. ஸம்மாதி³ட்டி² மக்³க³ங்க³ந்திஆதி³ மக்³க³ங்க³ஸ்ஸ அமக்³க³தா நாம நத்தீ²தி த³ஸ்ஸனத்த²ம் வுத்தம். புப்³பே³வ கோ² பனஸ்ஸாதி ஸுத்தே பரிஸுத்³த⁴ஸீலஸ்ஸ மக்³க³பா⁴வனா நாம ஹோதி, ந இதரஸ்ஸாதி ஆக³மனியபடிபதா³ய விஸுத்³தி⁴பா⁴வத³ஸ்ஸனத்த²ம் ‘‘காயகம்மம் வசீகம்மம் ஆஜீவோ ஸுபரிஸுத்³தோ⁴ ஹோதீ’’தி வுத்தம், ந இமேஹி வினா பஞ்சங்கி³கபா⁴வத³ஸ்ஸனத்த²ம். தேனேவாஹ ‘‘ஏவமஸ்ஸாயம் அரியோ அட்ட²ங்கி³கோ மக்³கோ³ பா⁴வனாபாரிபூரிம் க³ச்ச²தீ’’தி. ஸகவாதி³னா ஆப⁴தஸுத்தம் நீதத்த²மேவாதி.

மக்³க³கதா²வண்ணனா.