3. நிரயபாலகதா²வண்ணனா

866. இதா³னி நிரயபாலகதா² நாம ஹோதி. தத்த² ‘‘நிரயே நேரயிககம்மானேவ நிரயபாலரூபவஸேன வதே⁴ந்தி, நத்தி² நிரயபாலா நாம ஸத்தா’’தி யேஸம் லத்³தி⁴, ஸேய்யதா²பி அந்த⁴கானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ தத்த² நிரயபாலா ந ஸியும், கம்மகாரணாபி ந ப⁴வேய்யும். காரணிகேஸு ஹி ஸதி காரணா’’தி சோதே³தும் நத்தி² நிரயேஸூதிஆதி³மாஹ.

867-868. அத்தி² மனுஸ்ஸேஸூதி பச்சக்கே²ன ஞாபனத்த²ம். யதா² ஹி மனுஸ்ஸேஸு ஸதி காரணிகேஸு காரணா, ஏவம் தத்தா²பீதி அயமேத்த² அதி⁴ப்பாயோ. அத்தி² நிரயேஸூதி புச்சா² பரவாதி³ஸ்ஸ, படிஞ்ஞா இதரஸ்ஸ. ந வேஸ்ஸபூ⁴ நோபி ச பேத்திராஜாதி பரவாதி³னா ஸகஸமயதோ ஸுத்தம் ஆப⁴தம். தம் பன ஸாஸனாவசரிகந்தி ஸகவாதி³னா அனுஞ்ஞாதம். தத்த² வேஸ்ஸபூ⁴தி ஏகோ தே³வோ. பேத்திராஜாதி பேத்திவிஸயே பேதமஹித்³தி⁴கோ. ஸோமாத³யோ பாகடா ஏவ. இத³ம் வுத்தம் ஹோதி – அத்தனோ கம்மேஹி இதோ பணுன்னம் பரலோகம் பத்தம் புரிஸம் ந ஏதே வேஸ்ஸபூ⁴ஆத³யோ ஹனந்தி. யேஹி பன ஸோ கம்மேஹி தத்த² பணுன்னோ, தானி ஸகானி கம்மானியேவ நம் தத்த² ஹனந்தீதி கம்மஸ்ஸகதம் தீ³பேதி, ந நிரயபாலானம் அபா⁴வம். ஸகவாதி³னா பன தமேனம், பி⁴க்க²வேதி ஆப⁴தானி ஸுத்தபதா³னி நீதத்தா²னேவாதி.

நிரயபாலகதா²வண்ணனா.