2. ஞாணகதா²வண்ணனா

863-865. இதா³னி ஞாணகதா² நாம ஹோதி. தத்த² து³வித⁴ம் ஞாணம் – லோகியஞ்ச லோகுத்தரஞ்ச. லோகியம் ஸமாபத்திஞாணம்பி ஹோதி தா³னாதி³வஸேன பவத்தம் கம்மஸ்ஸகதஞாணம்பி; லோகுத்தரம் ஸச்சபரிச்சே²த³கம் மக்³க³ஞாணம்பி ப²லஞாணம்பி. இமம் பன விபா⁴க³ம் அகத்வா ‘‘ஸச்சபரிச்சே²த³கமேவ ஞாணம் ந இதரம், தஸ்மா நத்தி² புது²ஜ்ஜனஸ்ஸ ஞாண’’ந்தி யேஸம் லத்³தி⁴, ஸேய்யதா²பி ஹேதுவாதா³னம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. பஞ்ஞாதிஆதி³ ஞாணவேவசனத³ஸ்ஸனத்த²ம் வுத்தம். தேனேதம் தீ³பேதி – யதி³ தஸ்ஸ ஞாணம் நத்தி², பஞ்ஞாத³யோபி நத்தி². அத² பஞ்ஞாத³யோ அத்தி², ஞாணம்பி அத்தி². கஸ்மா? பஞ்ஞாதீ³னம் ஞாணதோ அனஞ்ஞத்தாதி. பட²மம் ஜா²னந்திஆதி³ ஸமாபத்திஞாணஸ்ஸ த³ஸ்ஸனத்த²ம் வுத்தம். தா³னம் த³தே³ய்யாதிஆதி³ கம்மஸ்ஸகதஞாணஸ்ஸ. து³க்க²ம் பரிஜானாதீதி லோகுத்தரமக்³க³ஞாணமேவ தீ³பேதி, ந ச லோகுத்தரமேவ ஞாணந்தி.

ஞாணகதா²வண்ணனா.