1. அஸஞ்சிச்சகதா²வண்ணனா

857-862. இதா³னி அஸஞ்சிச்சகதா² நாம ஹோதி. தத்த² ‘‘ஆனந்தரியவத்தூ²னி நாம க³ரூனி பா⁴ரியானி, தஸ்மா அஸஞ்சிச்சாபி தேஸு வத்தூ²ஸு விகோபிதேஸு ஆனந்தரிகோ ஹோதீ’’தி யேஸம் லத்³தி⁴, ஸேய்யதா²பி ஏகச்சானம் உத்தராபத²கானம்; தே ஸந்தா⁴ய அஸஞ்சிச்சாதி புச்சா² ஸகவாதி³ஸ்ஸ, லத்³தி⁴வஸேன படிஞ்ஞா இதரஸ்ஸ. அத² நம் ‘‘யஸ்மா ஆனந்தரியகம்மம் நாம கம்மபத²ப்பத்தம். யதி³ ச அஸஞ்சிச்ச கம்மபத²பே⁴தோ³ ஸியா, அவஸேஸா பாணாதிபாதாத³யோபி அஸஞ்சிச்ச ப⁴வேய்யு’’ந்தி சோத³னத்த²ம் அஸஞ்சிச்சபாணம் ஹந்த்வாதிஆதி³மாஹ. இதரோ ததா²ரூபாய லத்³தி⁴யா அபா⁴வேன படிக்கி²பதி. ஸேஸம் யதா²பாளிமேவ நிய்யாதி. ந வத்தப்³ப³ம் மாதுகா⁴தகோதி புச்சா² பரவாதி³ஸ்ஸ, ரோக³படிகாராதி³காலே அஸஞ்சிச்ச கா⁴தம் ஸந்தா⁴ய படிஞ்ஞா ஸகவாதி³ஸ்ஸ. நனு மாதா ஜீவிதா வோரோபிதாதி பஞ்ஹேபி அஸஞ்சிச்ச வோரோபிதம் ஸந்தா⁴ய படிஞ்ஞா ஸகவாதி³ஸ்ஸேவ. ஏவம் அதி⁴ப்பாயம் பன அக்³க³ஹேத்வா ஹஞ்சீதி லத்³தி⁴பதிட்டா²பனம் இதரஸ்ஸ. தம் அயோனிஸோ பதிட்டா²பிதத்தா அப்பதிட்டி²தமேவ. பிதுகா⁴தகாதீ³ஸுபி ஏஸேவ நயோ. ஸங்க⁴பே⁴த³கே பன த⁴ம்மஸஞ்ஞிம் ஸந்தா⁴ய ஸங்க⁴பே⁴தோ³ ஆனந்தரிகோதி புச்சா² ஸகவாதி³ஸ்ஸ, ‘‘ஸங்க⁴ம் ஸமக்³க³ம் பே⁴த்வான, கப்பம் நிரயம்ஹி பச்சதீ’’தி வசனம் அயோனிஸோ க³ஹேத்வா படிஞ்ஞா பரவாதி³ஸ்ஸ. புன ஸப்³பே³தி புட்டோ² ஸகபக்கே² த⁴ம்மஸஞ்ஞிம் ஸந்தா⁴ய படிக்கி²பதி, பரபக்கே² த⁴ம்மஸஞ்ஞிம் ஸந்தா⁴ய படிஜானாதி. த⁴ம்மஸஞ்ஞீதி பஞ்ஹத்³வயேபி ஏஸேவ நயோ. நனு வுத்தம் ப⁴க³வதாதி ஸுத்தம் ஏகந்தேனேவ த⁴ம்மவாதி³ஸ்ஸ ஆனந்தரிகபா⁴வத³ஸ்ஸனத்த²ம் வுத்தம். ஆபாயிகோ நேரயிகோதி கா³தா²யபி அத⁴ம்மவாதீ³யேவ அதி⁴ப்பேதோ. இதரோ பன அதி⁴ப்பாயம் அக்³க³ஹேத்வா லத்³தி⁴ம் பதிட்ட²பேதி. ஸா அயோனிஸோ பதிட்டா²பிதத்தா அப்பதிட்டி²தாயேவாதி.

அஸஞ்சிச்சகதா²வண்ணனா.