13. புரிஸகாரானுயோக³வண்ணனா

123. இதா³னி புரிஸகாரானுயோகோ³ ஹோதி. தத்த² கம்மே ஸதி நியமதோ தஸ்ஸ காரகேனபி ப⁴விதப்³ப³ந்தி லத்³தி⁴யா புச்சா² பரவாதி³ஸ்ஸ, ததா²ரூபானம் கம்மானம் அத்தி²தாய படிஞ்ஞா ஸகவாதி³ஸ்ஸ. புன கத்தா காரேதாதி புச்சா² பரவாதி³ஸ்ஸ. தத்த² கத்தாதி தேஸம் கம்மானம் காரகோ. காரேதாதி ஆணத்திதே³ஸனாதீ³ஹி உபாயேஹி காராபகோ. இதா³னி யஸ்மா பரவாதீ³ புக்³க³லம் ஸந்தா⁴ய கத்தாதி புச்ச²தி, ந கரணமத்தம், தஸ்மா படிக்கே²போ ஸகவாதி³ஸ்ஸ.

124. தஸ்ஸ கத்தா காரேதாதி ஏத்த² யதி³ யம் யம் உபலப்³ப⁴தி, தஸ்ஸ தஸ்ஸ கத்தா புக்³க³லோ தே உபலப்³ப⁴தி, கிம் தஸ்ஸாபி காரகோ ச காராபகோ ச அஞ்ஞோ புக்³க³லோ உபலப்³ப⁴தீதி அத்தோ². பரவாதீ³ ததா² அனிச்ச²ந்தோ இஸ்ஸரனிம்மானவாத³ப⁴யேன படிக்கி²பதி. புன புட்டோ² யஸ்மா புக்³க³லம் மாதாபிதரோ ஜனேந்தி நாமம் கரோந்தி போஸேந்தி, தஸ்மாஸ்ஸ தே காரகா. யே ச பன தம் கல்யாணமித்தா வா ஆசரியா வா தானி தானி விஜ்ஜாட்டா²னஸிப்பாயதனானி ஸிக்கா²பேந்தி, தே காராபகா நாமாதி இமமத்த²ம் ஸந்தா⁴ய படிஜானாதி. புரிமகம்மமேவ தஸ்ஸ கத்தா சேவ காராபேதா சாதி அதி⁴ப்பேதம்.

125. தஸ்ஸ தஸ்ஸேவாதி இமினா இத³ம் புச்ச²தி – யதி³ கம்மானம் காரகஸ்ஸ கத்தா தஸ்ஸாபி கத்தா தஸ்ஸாபி கத்தா அத்தே²வ, ஏவம் ஸந்தே புரிமேன புரிமேன அவஸ்ஸம் பச்சா² பச்சா² புக்³க³லோ காதப்³போ³தி இமினாபி தே கம்மானம் காரகேன புக்³க³லேன ஆயதிம் அஞ்ஞோ புக்³க³லோ காதப்³போ³, தேனாபி அஞ்ஞோதி நத்தி² து³க்க²ஸ்ஸ அந்தகிரியா, நத்தி² வட்டஸ்ஸ உபச்சே²தோ³, நத்தி² அப்பச்சயபரினிப்³பா³னம். பச்சயாபா⁴வேன பச்சயபடிப³த்³த⁴ஸ்ஸ து³க்க²ஸ்ஸ அபா⁴வா யம் நிப்³பா³னம் வுத்தம், நத்தி² தே தந்தி. அத² வா தஸ்ஸ தஸ்ஸேவாதி யதி³ கம்மம் கம்மமத்தம் ந ஹோதி, தஸ்ஸ பன காரகோ புக்³க³லோ, தஸ்ஸாபி காரகோ, தஸ்ஸாபி காரகோதி ஏவம் புக்³க³லபரம்பரா அத்தி². ஏவம் ஸந்தே யா ஏஸா கம்மவட்டஸ்ஸ அப்பவத்திகரணேன து³க்க²ஸ்ஸ அந்தகிரியா வுத்தா, ஸா நத்தீ²தி அத்தோ². பரவாதீ³ தம் அனிச்ச²ந்தோ படிக்கி²பதி. இதோ அபராஸுபி உபலப்³ப⁴தி ஸாமஞ்ஞேன காரகபுச்சா²ஸு புக்³க³லம்யேவ ஸந்தா⁴ய ‘‘கத்தா காரேதா’’தி வுத்தம், ந பச்சயே. ந ஹி மஹாபத²வீஆதீ³னம் பச்சயா நத்தி².

135. அஞ்ஞோ கல்யாணபாபகானம் கம்மானம் கத்தாதி பஞ்ஹோ ‘‘ஸங்கா²ரவந்தம் வா அத்தான’’ந்திஆதி³தி³ட்டி²ப⁴யா படிக்கி²த்தோ.

136. விபாகோ உபலப்³ப⁴தீதிஆதி³ விபாகபடிஸம்வேதீ³வஸேன புக்³க³லம் த³ஸ்ஸேந்தஸ்ஸ லத்³தி⁴பி⁴ந்த³னத்த²ம் வுத்தம். தத்த² விபாகபடிஸம்வேதீ³தி அனுயோகோ³ பரவாதி³ஸ்ஸ, விபாகபவத்திதோ அஞ்ஞஸ்ஸ வேத³கஸ்ஸ அபா⁴வா படிக்கே²போ ஸகவாதி³ஸ்ஸ. புன புச்சா² ஸகவாதி³ஸ்ஸ, படிஞ்ஞா இதரஸ்ஸ.

138. தஸ்ஸ படிஸம்வேதீ³தி தஸ்ஸ விபாகபடிஸம்வேத³கஸ்ஸ படிஸம்வேதீ³ யஸ்மா பன படிஸம்வேதி³தப்³போ³ நாம விபாகோ, ந ச புக்³க³லோ விபாகோ, தஸ்மா படிக்கே²போ பரவாதி³ஸ்ஸ. புன புட்டோ² யஸ்மா புஞ்ஞவிபாகே டி²தத்தா விபாகபடிஸம்வேதீ³ புத்தம் வா பதிம் வா மாதா வா ஜாயா வா பரிசும்ப³தி பரிஸஜ்ஜதி, தஸ்மா ததா²ரூபம் படிஸம்வேதி³தம் ஸந்தா⁴ய படிஜானாதி பரவாதீ³.

தஸ்ஸ தஸ்ஸேவாதி யதி³ விபாகோ விபாகமத்தம் ந ஹோதி, தஸ்ஸ பன படிஸம்வேதீ³ புக்³க³லோ, தஸ்ஸாபி படிஸம்வேதீ³ தஸ்ஸாபி படிஸம்வேதீ³தி ஏவம் புக்³க³லபரம்பரா அத்தி². ஏவம் ஸந்தே யா ஏஸா விபாகவட்டஸ்ஸ அப்பவத்திகரணேன து³க்க²ஸ்ஸ அந்தகிரியா வுத்தா, ஸா நத்தீ²தி அத்தோ². இதோ பரம் உபலப்³ப⁴திஸாமஞ்ஞேன படிஸம்வேதீ³புச்சா²ஸு ஹேட்டா² வுத்தனயேனேவ அத்தோ² வேதி³தப்³போ³.

142. அஞ்ஞோ கல்யாணபாபகானம் கம்மானம் விபாகபடிஸம்வேதீ³தி பஞ்ஹோ ‘‘வேத³னவந்தம் வா அத்தான’’ந்திஆதி³தி³ட்டி²ப⁴யா படிக்கி²த்தோ.

143. தி³ப்³ப³ம் ஸுக²ந்திஆதி³ கல்யாணபாபகானம் கம்மானம் விபாகம் பா⁴ஜேத்வா த³ஸ்ஸனவஸேன ஆரத்³த⁴ம். தம் ஸப்³ப³ம் ஹேட்டா² வுத்தனயேனேவ வேதி³தப்³ப³ம். ஸகவாதி³னோ சேத்த² புக்³க³லவஸேனேவ படிஸம்வேதீ³படிக்கே²போ வேதி³தப்³போ³, ந வேத³யிதவஸேன.

148. மஹாபத²வீஆதீ³னி ஹி ஆரம்மணம் கத்வா வேத³யிதானம் உப்பத்தி அப்படிஸித்³தா⁴.

170. கத்தா காரேதா விபாகபடிஸம்வேதீ³திஆதி³ வோமிஸ்ஸகனயவஸேன ஆரத்³த⁴ம். தத்த² ஸோ கரோதீதி யம் த்வம் கத்தாதி ச படிஸம்வேதீ³தி ச வதே³ஸி, கிம் ஸோயேவ கரோதி, ஸோ படிஸம்வேதே³தி. அயமனுயோகோ³ ஸகவாதி³ஸ்ஸ, ஸுத்தவிரோத⁴ப⁴யேன படிக்கே²போ பரவாதி³ஸ்ஸ.

171. புன புட்டோ² ‘‘இத⁴ நந்த³தி பேச்ச நந்த³தீ’’திஆதி³ஸுத்தவஸேன (த⁴. ப. 18) படிஞ்ஞா தஸ்ஸேவ. அத²ஸ்ஸ வசனோகாஸம் படிபா³ஹந்தோ ஸகவாதீ³ ஸயம்கதம் ஸுக²து³க்க²ந்தி ஆஹ.

172. தத்த² அஞ்ஞோ கரோதீதி காரகவேத³கானம் அஞ்ஞத்தபுச்சா²வஸேன வுத்தம். ததோ பரவாதீ³ ஸுத்தவிரோத⁴ப⁴யேன படிக்கி²பித்வா புன புட்டோ² ‘‘மனுஸ்ஸபூ⁴தோ கத்வா தே³வபூ⁴தோ படிஸம்வேதே³தீ’’தி மஞ்ஞமானோ படிஜானாதி. ஏவம்வாதி³னோ பன பரம்கதம் ஸுக²து³க்க²ம் ஆபஜ்ஜதீதி தஸ்ஸ வஸேன புட்டோ² புன படிக்கி²பதி.

174. ஸோ ச அஞ்ஞோ சாதி காரகவேத³கானம் ஏகத்தஅஞ்ஞத்தபுச்சா²வஸேன வுத்தம். ததோ பரவாதீ³ ஸுத்தவிரோத⁴ப⁴யேனேவ படிக்கி²பித்வா புன புட்டோ² புரிமே த்³வேபி நயே ஏகதோ கத்வா படிஜானாதி. ஏவம்வாதி³னோ பன ஸயம்கதஞ்ச பரம்கதஞ்ச ஸுக²து³க்க²ம் ஆபஜ்ஜதீதி தஸ்ஸ வஸேன புட்டோ² புன படிக்கி²பதி.

176. நேவ ஸோ கரோதீதி காரகவேத³கானம் ஏகத்தஅஞ்ஞத்தபடிக்கே²பவஸேன வுத்தம். ததோ பரவாதீ³ ஸுத்தவிரோத⁴வஸேனேவ படிக்கி²பித்வா புன புட்டோ² யஸ்மா மனுஸ்ஸோ தே³வலோகூபபத்தியா கம்மம் கத்வா ந மனுஸ்ஸபூ⁴தோவ படிஸம்வேதே³தி, நாபி யேன கம்மம் கதம், ததோ அஞ்ஞோவ படிஸம்வேதே³தி, தஸ்மா காரகதோ வேத³கோ நேவ ஸோ ஹோதி, ந அஞ்ஞோதி மஞ்ஞமானோ படிஜானாதி. லத்³தி⁴மத்தமேவேதம்? ஏவம்வாதி³னோ பன அஸயம்காரம் அபரம்காரம் அதி⁴ச்சஸமுப்பன்னம் ஸுக²து³க்க²ம் ஆபஜ்ஜதீதி தஸ்ஸ வஸேன புட்டோ² புன படிக்கி²பதி. அபிச இமஸ்மிம் வோமிஸ்ஸகனயே ஆதி³தோ பட்டா²ய இமினாபி நயேன அத்தோ² வேதி³தப்³போ³. யஸ்மா ஹி அயம் புக்³க³லவாதீ³ கம்மானம் காரகஞ்சேவ வேத³கஞ்ச இச்ச²தி, தஸ்மாஸ்ஸ யோ காரகோ, தேனேவ வா வேத³கேன ப⁴விதப்³ப³ம், அஞ்ஞேன வா உபோ⁴ஹி வா ப⁴விதப்³ப³ம், உபோ⁴ஹி வாபி ந ப⁴விதப்³ப³ந்தி இத³மாபன்னம் ஹோதி. ஏவமாபன்னமேவ அனுயோக³ம் அனுயுஞ்ஜந்தோ ஸகவாதீ³ ‘‘ஸோ கரோதீ’’திஆத³யோ சத்தாரோபி விகப்பே ஆஹ. ஸேஸம் வுத்தப்பகாரமேவ.

பரியோஸானே பன சத்தாரோபி பஞ்ஹா ஏகதோ புட்டா². தத்த² படிக்கே²போ ச படிஜானனா ச ஸயம்கதாதி³தோ³ஸப்பத்தி ச புரிமனயேனேவ வேதி³தப்³பா³. இதோ பரம் ‘‘கல்யாணபாபகானீ’’தி அவத்வா ஹேட்டா² வுத்தனயா ஏவ ‘‘கம்மம் அத்தீ²’’திஆதி³னா விகப்பேன த³ஸ்ஸிதா. தேஸம்பி ஹேட்டா² வுத்தனயேனேவ அத்தோ² வேதி³தப்³போ³.

புரிஸகாரானுயோக³வண்ணனா.

கல்யாணவக்³கோ³திபி ஏதஸ்ஸேவ நாமம்.