2. ஸுஞ்ஞதகதா²வண்ணனா

832. இதா³னி ஸுஞ்ஞதகதா² நாம ஹோதி. தத்த² ஸுஞ்ஞதாதி த்³வே ஸுஞ்ஞதா க²ந்தா⁴னஞ்ச அனத்தலக்க²ணம் நிப்³பா³னஞ்ச. தேஸு அனத்தலக்க²ணம் தாவ ஏகச்சம் ஏகேன பரியாயேன ஸியா ஸங்கா²ரக்க²ந்த⁴பரியாபன்னம், நிப்³பா³னம், அபரியாபன்னமேவ. இமம் பன விபா⁴க³ம் அக்³க³ஹேத்வா ‘‘ஸுஞ்ஞதா ஸங்கா²ரக்க²ந்த⁴பரியாபன்னா’’தி யேஸம் லத்³தி⁴, ஸேய்யதா²பி அந்த⁴கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அனிமித்தந்தி ஸப்³ப³னிமித்தரஹிதம் நிப்³பா³னம். ‘‘அப்பணிஹிதோ’’திபி தஸ்ஸேவ நாமம். கஸ்மா பனேதம் ஆப⁴தந்தி? அவிப⁴ஜ்ஜவாதீ³வாதே³ தோ³ஸாரோபனத்த²ம். யஸ்ஸ ஹி அவிப⁴ஜித்வா ‘‘ஏகதே³ஸேனேவ ஸுஞ்ஞதா ஸங்கா²ரக்க²ந்த⁴பரியாபன்னா’’தி லத்³தி⁴, தஸ்ஸ நிப்³பா³னம்பி ஸங்கா²ரக்க²ந்த⁴பரியாபன்னந்தி ஆபஜ்ஜதி. இமஸ்ஸ தோ³ஸஸ்ஸாரோபனத்த²ம் ‘‘அனிமித்தம் அப்பணிஹித’’ந்தி ஆப⁴தம். இதரோ தஸ்ஸ பரியாபன்னபா⁴வம் அனிச்ச²ந்தோ படிக்கி²பதி. ஸங்கா²ரக்க²ந்தோ⁴ ந அனிச்சோதிஆதி³ நிப்³பா³னஸங்கா²தாய ஸுஞ்ஞதாய அனிச்சபா⁴வாபத்திதோ³ஸத³ஸ்ஸனத்த²ம் வுத்தம்.

833. ஸங்கா²ரக்க²ந்த⁴ஸ்ஸ ஸுஞ்ஞதாதி ‘‘யதி³ அஞ்ஞஸ்ஸ க²ந்த⁴ஸ்ஸ ஸுஞ்ஞதா அஞ்ஞக்க²ந்த⁴பரியாபன்னா, ஸங்கா²ரக்க²ந்த⁴ஸுஞ்ஞதாயபி ஸேஸக்க²ந்த⁴பரியாபன்னாய ப⁴விதப்³ப³’’ந்தி சோத³னத்த²ம் வுத்தம். ஸங்கா²ரக்க²ந்த⁴ஸ்ஸ ஸுஞ்ஞதா ந வத்தப்³பா³திஆதி³ ‘‘யதி³ ஸங்கா²ரக்க²ந்த⁴ஸுஞ்ஞதா ஸேஸக்க²ந்த⁴பரியாபன்னா ந ஹோதி, ஸேஸக்க²ந்த⁴ஸுஞ்ஞதாபி ஸங்கா²ரக்க²ந்த⁴பரியாபன்னா ந ஹோதீ’’தி படிலோமத³ஸ்ஸனத்த²ம் வுத்தம்.

834. ஸுஞ்ஞமித³ம், பி⁴க்க²வே, ஸங்கா²ராதி ஸுத்தம் பரஸமயதோ ஆப⁴தம். தத்த² ஸங்கா²ராதி ‘‘ஸப்³பே³ ஸங்கா²ரா அனிச்சா’’தி ஆக³தட்டா²னே விய பஞ்சக்க²ந்தா⁴, தே ச அத்தத்தனியஸுஞ்ஞத்தா ஸுஞ்ஞதாதி ஸாஸனாவசரம் ஹோதி, ந விருஜ்ஜ²தி, தஸ்மா அனுஞ்ஞாதம். யஸ்மா பனேதம் ந ஸுஞ்ஞதாய ஸங்கா²ரக்க²ந்த⁴பரியாபன்னபா⁴வம் தீ³பேதி, தஸ்மா அஸாத⁴கந்தி.

ஸுஞ்ஞதகதா²வண்ணனா.