4. அதி⁴க³ய்ஹமனஸிகாரகதா²வண்ணனா

749-753. இதா³னி அதி⁴க³ய்ஹ மனஸிகாரகதா² நாம ஹோதி. தத்த² து³விதோ⁴ மனஸிகாரோ நயதோ ச ஆரம்மணதோ ச. தத்த² ஏகஸங்கா²ரஸ்ஸாபி அனிச்சதாய தி³ட்டா²ய ஸப்³பே³ ஸங்கா²ரா அனிச்சாதி அவஸேஸேஸு நயதோ மனஸிகாரோ ஹோதி. அதீதே பன ஸங்கா²ரே மனஸிகரோந்தோ ந அனாக³தே மனஸிகாதும் ஸக்கோதி. அதீதாதீ³ஸு அஞ்ஞதரம் மனஸிகரோதோ ஆரம்மணதோ மனஸிகாரோ ஹோதி. தத்த² பச்சுப்பன்னே மனஸிகரோந்தோ யேன சித்தேன தே மனஸிகரோதி, தம் பச்சுப்பன்னக்க²ணே மனஸிகாதும் ந ஸக்கோதி. தத்த² யேஸம் ‘‘ஸப்³பே³ ஸங்கா²ரா அனிச்சா’’திஆதி³வசனம் நிஸ்ஸாய ‘‘மனஸிகரோந்தோ நாம அதி⁴க³ய்ஹ அதி⁴க³ண்ஹித்வா ஸங்க³ண்ஹித்வா ஸப்³பே³ ஸங்கா²ரே ஏகதோ மனஸிகரோதீ’’தி லத்³தி⁴, ஸேய்யதா²பி புப்³ப³ஸேலியாபரஸேலியானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ.

அத² நம் யஸ்மா ஸப்³பே³ ஏகதோ மனஸிகரோந்தேன யேன சித்தேன தே மனஸிகரோதி, தம்பி மனஸிகாதப்³ப³ம் ஹோதி. தஸ்மா தம்சித்ததாய சோதே³தும் தேன சித்தேனாதி ஆஹ. இதரோ ஆரம்மணம் கத்வா ந ஸக்கா ஜானிதுந்தி ஸந்தா⁴ய படிக்கி²பதி. ஏவம்லக்க²ணம் சித்தந்தி ஞாதத்தா பன தம்பி சித்தம் ஞாதமேவ ஹோதீதி ஸந்தா⁴ய படிஜானாதி. அத² வா தஞ்ஞேவ தஸ்ஸ ஆரம்மணம் ந ஹோதீதி படிக்கி²பதி. ‘‘ஸப்³பே³ ஸங்கா²ரா அனிச்சா, யதா³ பஞ்ஞாய பஸ்ஸதீ’’திஆதீ³னி நிஸ்ஸாய உப்பன்னலத்³தி⁴வஸேன படிஜானாதி. ஸேஸபஞ்ஹத்³வயேபி ஏஸேவ நயோ. தேன ப²ஸ்ஸேனாதிஆதீ³ஸு பன ததா²ரூபம் ஸுத்தம் அபஸ்ஸந்தோ படிக்கி²பதேவ. அதீதாதி³பஞ்ஹேஸு ஹேட்டா² வுத்தனயேனேவ படிக்கே²பபடிஞ்ஞா வேதி³தப்³பா³. ஸேஸம் யதா²பாளிமேவ நிய்யாதீதி. ஸப்³பே³ ஸங்கா²ராதிஆதி³வசனம் நயதோ த³ஸ்ஸனம் ஸந்தா⁴ய வுத்தம், ந ஏகக்க²ணே ஆரம்மணதோ, தஸ்மா அஸாத⁴கந்தி.

அதி⁴க³ய்ஹமனஸிகாரகதா²வண்ணனா.