2. அஞ்ஞமஞ்ஞபச்சயகதா²வண்ணனா

718-719. இதா³னி அஞ்ஞமஞ்ஞபச்சயகதா² நாம ஹோதி. தத்த² யேஸம் ஸமயே ‘‘அவிஜ்ஜாபச்சயா ஸங்கா²ரா’’தி அயமேவ தந்தி, ‘‘ஸங்கா²ரபச்சயாபி அவிஜ்ஜா’’தி அயம் நத்தி², தஸ்மா அவிஜ்ஜாவ ஸங்கா²ரானம் பச்சயோ, ந பன ஸங்கா²ரா அவிஜ்ஜாயாதி லத்³தி⁴, ஸேய்யதா²பி மஹாஸங்கி⁴கானம்; தே ஸந்தா⁴ய அவிஜ்ஜாஸங்கா²ராதீ³னம் அஞ்ஞமஞ்ஞபச்சயதாபி அத்தீ²தி த³ஸ்ஸேதும் புச்சா² ஸகவாதி³ஸ்ஸ, படிஞ்ஞா இதரஸ்ஸ. அவிஜ்ஜா ஸங்கா²ரேனாதி ஏத்த² அபுஞ்ஞாபி⁴ஸங்கா²ரோவ க³ஹிதோ. தஸ்மா ஸங்கா²ரபச்சயாபி அவிஜ்ஜாதி ஏத்த² ஸஹஜாதஅஞ்ஞமஞ்ஞஅத்தி²அவிக³தஸம்பயுத்தவஸேன பச்சயதா வேதி³தப்³பா³. உபாதா³னபச்சயாபி தண்ஹாதி ஏத்த² ட²பேத்வா காமுபாதா³னம் ஸேஸானி தீணி உபாதா³னானி அவிஜ்ஜாய ஸங்கா²ரா விய தண்ஹாய பச்சயா ஹோந்தீதி வேதி³தப்³பா³னி. ஸேஸம் யதா²பாளிமேவ நிய்யாதி. ஜராமரணபச்சயாதி புச்சா² பரவாதி³ஸ்ஸ, நாமரூபம் விஞ்ஞாணபச்சயாதி ஸகவாதி³ஸ்ஸாதி.

அஞ்ஞமஞ்ஞபச்சயகதா²வண்ணனா.