1. குஸலாகுஸலபடிஸந்த³ஹனகதா²வண்ணனா

686-690. இதா³னி குஸலாகுஸலபடிஸந்த³ஹனகதா² நாம ஹோதி. தத்த² குஸலம் வா அகுஸலஸ்ஸ, அகுஸலம் வா குஸலஸ்ஸ அனந்தரா உப்பஜ்ஜனகம் நாம நத்தீ²தி தேஸம் அஞ்ஞமஞ்ஞம் படிஸந்தா⁴னம் ந யுஜ்ஜதி. யே பன யஸ்மா ஏகவத்து²ஸ்மிஞ்ஞேவ ரஜ்ஜதி விரஜ்ஜதி ச, தஸ்மா தம் அஞ்ஞமஞ்ஞம் படிஸந்த³ஹதீதி லத்³தி⁴ம் க³ஹேத்வா டி²தா, ஸேய்யதா²பி மஹாஸங்கி⁴கா; தே ஸந்தா⁴ய புச்சா² ஸகவாதி³ஸ்ஸ; படிஞ்ஞா இதரஸ்ஸ. ஆவட்டனா பணிதீ⁴தி உப⁴யம் ஆவஜ்ஜனஸ்ஸேவ நாமம். தஞ்ஹி ப⁴வங்க³ம் ஆவட்டேதீதி ஆவட்டனா. ப⁴வங்கா³ரம்மணதோ அஞ்ஞஸ்மிம் ஆரம்மணே சித்தம் பணித³ஹதி ட²பேதீதி பணிதி⁴. குஸலம் அனாவட்டேந்தஸ்ஸாதி யம் தம் அகுஸலானந்தரம் படிஸந்த³ஹந்தம் குஸலம் உப்பஜ்ஜதி, தம் அனாவட்டேந்தஸ்ஸ உப்பஜ்ஜதீதி புச்ச²தி. இதரோ பன வினா ஆவஜ்ஜனேன குஸலஸ்ஸ உப்பத்திம் அபஸ்ஸந்தோ படிக்கி²பதி. குஸலம் அயோனிஸோ மனஸிகரோதோதி இத³ம் யதி³ அகுஸலானந்தரம் குஸலம் உப்பஜ்ஜேய்ய, அகுஸலஸ்ஸேவ ஆவஜ்ஜனேன அயோனிஸோ மனஸிகரோதோ உப்பஜ்ஜேய்யாதி சோத³னத்த²ம் வுத்தம். ஸேஸம் யதா²பாளிமேவ நிய்யாதி. நனு யஸ்மிம்யேவ வத்து²ஸ்மிந்தி வசனம் ஏகாரம்மணே ஸராக³விராகு³ப்பத்திம் தீ³பேதி, ந குஸலாகுஸலானம் அனந்தரதம், தஸ்மா அஸாத⁴கந்தி.

குஸலாகுஸலபடிஸந்த³ஹனகதா²வண்ணனா.