14. சுத்³த³ஸமவக்³கோ³

1. குஸலாகுஸலபடிஸந்த³ஹனகதா²வண்ணனா

686-690. இதா³னி குஸலாகுஸலபடிஸந்த³ஹனகதா² நாம ஹோதி. தத்த² குஸலம் வா அகுஸலஸ்ஸ, அகுஸலம் வா குஸலஸ்ஸ அனந்தரா உப்பஜ்ஜனகம் நாம நத்தீ²தி தேஸம் அஞ்ஞமஞ்ஞம் படிஸந்தா⁴னம் ந யுஜ்ஜதி. யே பன யஸ்மா ஏகவத்து²ஸ்மிஞ்ஞேவ ரஜ்ஜதி விரஜ்ஜதி ச, தஸ்மா தம் அஞ்ஞமஞ்ஞம் படிஸந்த³ஹதீதி லத்³தி⁴ம் க³ஹேத்வா டி²தா, ஸேய்யதா²பி மஹாஸங்கி⁴கா; தே ஸந்தா⁴ய புச்சா² ஸகவாதி³ஸ்ஸ; படிஞ்ஞா இதரஸ்ஸ. ஆவட்டனா பணிதீ⁴தி உப⁴யம் ஆவஜ்ஜனஸ்ஸேவ நாமம். தஞ்ஹி ப⁴வங்க³ம் ஆவட்டேதீதி ஆவட்டனா. ப⁴வங்கா³ரம்மணதோ அஞ்ஞஸ்மிம் ஆரம்மணே சித்தம் பணித³ஹதி ட²பேதீதி பணிதி⁴. குஸலம் அனாவட்டேந்தஸ்ஸாதி யம் தம் அகுஸலானந்தரம் படிஸந்த³ஹந்தம் குஸலம் உப்பஜ்ஜதி, தம் அனாவட்டேந்தஸ்ஸ உப்பஜ்ஜதீதி புச்ச²தி. இதரோ பன வினா ஆவஜ்ஜனேன குஸலஸ்ஸ உப்பத்திம் அபஸ்ஸந்தோ படிக்கி²பதி. குஸலம் அயோனிஸோ மனஸிகரோதோதி இத³ம் யதி³ அகுஸலானந்தரம் குஸலம் உப்பஜ்ஜேய்ய, அகுஸலஸ்ஸேவ ஆவஜ்ஜனேன அயோனிஸோ மனஸிகரோதோ உப்பஜ்ஜேய்யாதி சோத³னத்த²ம் வுத்தம். ஸேஸம் யதா²பாளிமேவ நிய்யாதி. நனு யஸ்மிம்யேவ வத்து²ஸ்மிந்தி வசனம் ஏகாரம்மணே ஸராக³விராகு³ப்பத்திம் தீ³பேதி, ந குஸலாகுஸலானம் அனந்தரதம், தஸ்மா அஸாத⁴கந்தி.

குஸலாகுஸலபடிஸந்த³ஹனகதா²வண்ணனா.

2. ஸளாயதனுப்பத்திகதா²வண்ணனா

691-692. இதா³னி ஸளாயதனுப்பத்திகதா² நாம ஹோதி. தத்த² உபபத்தேஸியேன படிஸந்தி⁴சித்தேன ஸஹேவ ஓபபாதிகானம் ஸளாயதனம் உப்பஜ்ஜதி. க³ப்³ப⁴ஸேய்யகானம் அஜ்ஜ²த்திகாயதனேஸு மனாயதனகாயாயதனானேவ படிஸந்தி⁴க்க²ணே உப்பஜ்ஜந்தி. ஸேஸானி சத்தாரி ஸத்தஸத்ததிரத்திம்ஹி. தானி ச கோ² யேன கம்முனா படிஸந்தி⁴ க³ஹிதா, தஸ்ஸேவ அஞ்ஞஸ்ஸ வா கதத்தாதி அயம் ஸகஸமயே வாதோ³. யேஸம் பன ஏககம்மஸம்ப⁴வத்தா ஸம்பன்னஸாகா²விடபானம் ருக்கா²தீ³னம் அம்குரோ விய பீ³ஜமத்தம் ஸளாயதனம் மாதுகுச்சி²ஸ்மிம் படிஸந்தி⁴க்க²ணேயேவ உப்பஜ்ஜதீதி லத்³தி⁴, ஸேய்யதா²பி புப்³ப³ஸேலியானம்; தே ஸந்தா⁴ய ஸளாயதனந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸப்³ப³ங்க³பச்சங்கீ³திஆதி³ ஸளாயதனே ஸதி ஏவரூபோ ஹுத்வா ஓக்கமேய்யாதி சோத³னத்த²ம் வுத்தம். மாதுகுச்சி²க³தஸ்ஸாதி புச்சா² பரவாதி³ஸ்ஸ. பரதோ மாதுகுச்சி²க³தஸ்ஸ பச்சா² கேஸாதி புச்சா² ஸகவாதி³ஸ்ஸ. ஸேஸமேத்த² உத்தானத்த²மேவாதி.

ஸளாயதனுப்பத்திகதா²வண்ணனா.

3. அனந்தரபச்சயகதா²வண்ணனா

693-697. இதா³னி அனந்தரபச்சயகதா² நாம ஹோதி. தத்த² நச்சகீ³தாதீ³ஸு ரூபத³ஸ்ஸனஸத்³த³ஸவனாதீ³னம் லஹுபரிவத்திதம் தி³ஸ்வா ‘‘இமானி விஞ்ஞாணானி அஞ்ஞமஞ்ஞஸ்ஸ அனந்தரா உப்பஜ்ஜந்தீ’’தி யேஸம் லத்³தி⁴, ஸேய்யதா²பி உத்தராபத²கானம்; தே ஸந்தா⁴ய சக்கு²விஞ்ஞாணஸ்ஸாதி புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸோதவிஞ்ஞாணம் ரூபாரம்மணம்யேவாதி யதி³ சக்கு²விஞ்ஞாணஸ்ஸ அனந்தரா உப்பஜ்ஜேய்ய, விபாகமனோதா⁴து விய ரூபாரம்மணம் ஸியாதி சோதே³தும் வுத்தம். சக்கு²ஞ்ச படிச்ச ரூபே ச உப்பஜ்ஜதி ஸோதவிஞ்ஞாணந்தி பஞ்ஹேஸு ஸுத்தாபா⁴வேன படிக்கி²பித்வா அனந்தருப்பத்திம் ஸல்லக்கே²ந்தோ லத்³தி⁴வஸேன படிஜானாதி. தஞ்ஞேவ சக்கு²விஞ்ஞாணம் தம் ஸோதவிஞ்ஞாணந்தி யதா² பட²மஜவனானந்தரம் து³தியஜவனம் மனோவிஞ்ஞாணபா⁴வேன தஞ்ஞேவ ஹோதி, கிம் தே ததா² ஏதம்பி த்³வயம் ஏகமேவாதி புச்ச²தி. இமினா நயேன ஸப்³ப³வாரேஸு அத்தோ² வேதி³தப்³போ³. நச்சதி கா³யதீதிஆதி³வசனம் ஆரம்மணஸமோதா⁴னே லஹுபரிவத்திதாய வோகிண்ணபா⁴வம் தீ³பேதி, ந அனந்தரபச்சயதம், தஸ்மா அஸாத⁴கந்தி.

அனந்தரபச்சயகதா²வண்ணனா.

4. அரியரூபகதா²வண்ணனா

698-699. இதா³னி அரியரூபகதா² நாம ஹோதி. தத்த² ஸம்மாவாசாகம்மந்தா ரூபம், தஞ்ச கோ² ‘‘ஸப்³ப³ம் ரூபம் சத்தாரி ச மஹாபூ⁴தானி சதுன்னஞ்ச மஹாபூ⁴தானம் உபாதா³யரூப’’ந்தி (ம. நி. 3.67) வசனதோ உபாதா³யரூபந்தி யேஸம் லத்³தி⁴, ஸேய்யதா²பி உத்தராபத²கானம்; தே ஸந்தா⁴ய அரியரூபம் மஹாபூ⁴தானம் உபாதா³யாதி புச்சா² ஸகவாதி³ஸ்ஸ. தத்த² அரியானம் ரூபம், அரியம் வா ரூபந்தி அரியரூபம். ஆமந்தாதி லத்³தி⁴யம் ட²த்வா படிஞ்ஞா இதரஸ்ஸ. குஸலந்தி புட்டோ² லத்³தி⁴வஸேனேவ படிஜானாதி. அனாஸவபுச்சா²தீ³ஸுபி ஏஸேவ நயோ. யம் கிஞ்சி ரூபந்தி ஸுத்தம் ட²பேத்வா பூ⁴தானி ஸேஸரூபஸ்ஸ உபாதா³பா⁴வம் தீ³பேதி, ந ஸம்மாவாசாகம்மந்தானம். தேஸஞ்ஹி ரூபமத்தஞ்ஞேவ அஸித்³த⁴ம், குதோ உபாதா³ரூபதா; தஸ்மா அஸாத⁴கந்தி.

அரியரூபகதா²வண்ணனா.

5. அஞ்ஞோ அனுஸயோதிகதா²வண்ணனா

700-701. இதா³னி அஞ்ஞோ அனுஸயோதிகதா² நாம ஹோதி. தத்த² யஸ்மா புது²ஜ்ஜனோ குஸலாப்³யாகதே சித்தே வத்தமானே ஸானுஸயோதி வத்தப்³போ³, ந பரியுட்டி²தோதி தஸ்மா அஞ்ஞோ அனுஸயோ, அஞ்ஞம் பரியுட்டா²னந்தி யேஸம் லத்³தி⁴, ஸேய்யதா²பி அந்த⁴கானம்; தே ஸந்தா⁴ய அஞ்ஞோ காமராகா³னுஸயோதி புச்சா² ஸகவாதி³ஸ்ஸ படிஞ்ஞா இதரஸ்ஸ. ஸேஸம் ஹேட்டா² அனுஸயகதா²யம் வுத்தனயேனேவ வேதி³தப்³ப³ம். ஸானுஸயோதிஆதி³ பன தஸ்மிம் ஸமயே அனுஸயஸ்ஸ அப்பஹீனத்தா ஸானுஸயோதி வத்தப்³ப³தம், அனுப்பன்னத்தா ச பரியுட்டி²தோதி அவத்தப்³ப³தம் தீ³பேதி, ந அனுஸயபரியுட்டா²னானம் அஞ்ஞத்தம், தஸ்மா அஸாத⁴கந்தி.

அஞ்ஞோ அனுஸயோதிகதா²வண்ணனா.

6. பரியுட்டா²னம் சித்தவிப்பயுத்தந்திகதா²வண்ணனா

702. இதா³னி பரியுட்டா²னம் சித்தவிப்பயுத்தந்திகதா² நாம ஹோதி. தத்த² யஸ்மா அனிச்சாதி³தோ மனஸிகரோதோபி ராகா³த³யோ உப்பஜ்ஜந்தி. வுத்தம்பி சேதம் – ‘‘அப்பேகதா³, போ⁴ பா⁴ரத்³வாஜ, அஸுப⁴தோ மனஸிகரிஸ்ஸாமீதி ஸுப⁴தோவ மனஸிகரோதீ’’தி (ஸம். நி. 4.127). தஸ்மா பரியுட்டா²னம் சித்தவிப்பயுத்தந்தி யேஸம் லத்³தி⁴, ஸேய்யதா²பி அந்த⁴கானம்யேவ; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸமேத்த² உத்தானத்த²மேவாதி.

பரியுட்டா²னம் சித்தவிப்பயுத்தந்திகதா²வண்ணனா.

7. பரியாபன்னகதா²வண்ணனா

703-705. இதா³னி பரியாபன்னகதா² நாம ஹோதி. தத்த² யஸ்மா காமராகோ³ காமதா⁴தும் அனுஸேதி, காமதா⁴துபரியாபன்னோதி ச வுச்சதி, தஸ்மா ரூபராகா³ரூபராகா³பி ரூபதா⁴துஅரூபதா⁴துயோ அனுஸேந்தி. ரூபதா⁴துஅரூபதா⁴துபரியாபன்னாயேவ ச நாம ஹோந்தீதி யேஸம் லத்³தி⁴, ஸேய்யதா²பி அந்த⁴கானஞ்சேவ ஸம்மிதியானஞ்ச; தே ஸந்தா⁴ய ரூபராகோ³தி புச்சா² ஸகவாதி³ஸ்ஸ, படிஞ்ஞா இதரஸ்ஸ. தத்த² அனுஸேதீதி யதா² காமராகோ³ காமவிதக்கஸங்கா²தம் காமதா⁴தும் ஸஹஜாதவஸேன அனுஸேதி, கிம் தே ஏவம் ரூபராகோ³ ரூபதா⁴துந்தி புச்ச²தி. பரியாபன்னோதி யதா² ச ஸோ திவிதா⁴ய காமதா⁴துயா கிலேஸகாமவஸேன பரியாபன்னத்தா காமதா⁴துபரியாபன்னோ, கிம் தே ஏவம் ரூபராகோ³பி ரூபதா⁴துபரியாபன்னோதி புச்ச²தி. இதரோ பனஸ்ஸ அதி⁴ப்பாயம் அஸல்லக்கே²ந்தோ கேவலம் லத்³தி⁴வஸேன ஆமந்தாதி படிஜானாதி. அத² நம் தமத்த²ம் ஸல்லக்கா²பேதும் குஸலவிபாககிரியஸங்கா²தேஹி ஸமாபத்தேஸியாதீ³ஹி ஸம்ஸந்தி³த்வா புச்சி²தும் ஸமாபத்தேஸியோதிஆதி³மாஹ. ஸேஸமேத்த² யதா²பாளிமேவ நிய்யாதி. நனு காமராகோ³திஆதி³வசனம்பி காமராக³ஸ்ஸேவ காமதா⁴துயம் அனுஸயபா⁴வம் பரியாபன்னதஞ்ச தீ³பேதி, ந இதரேஸம் இதரதா⁴தூஸூதி.

பரியாபன்னகதா²வண்ணனா.

8. அப்³யாகதகதா²வண்ணனா

706-708. இதா³னி அப்³யாகதகதா² நாம ஹோதி. தத்த² விபாககிரியரூபனிப்³பா³னஸங்கா²தம் சதுப்³பி³த⁴ம் அப்³யாகதம் அவிபாகத்தா அப்³யாகதந்தி வுத்தம். தி³ட்டி²க³தம் ‘‘ஸஸ்ஸதோ லோகோதி கோ², வச்ச², அப்³யாகதமேத’’ந்தி (ஸம். நி. 4.416 தோ²கம் விஸதி³ஸம்) ஸஸ்ஸதாதி³பா⁴வேன அகதி²தத்தா. யேஸம் பன இமம் விபா⁴க³ம் அக்³க³ஹேத்வா புரிமாப்³யாகதம் விய தி³ட்டி²க³தம்பி அப்³யாகதந்தி லத்³தி⁴, ஸேய்யதா²பி அந்த⁴கானஞ்சேவ உத்தராபத²கானஞ்ச; தேஸம் தம் விபா⁴க³ம் த³ஸ்ஸேதும் தி³ட்டி²க³தம் அப்³யாகதந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸமேத்த² யதா²பாளிமேவ நிய்யாதீதி.

அப்³யாகதகதா²வண்ணனா.

9. அபரியாபன்னகதா²வண்ணனா

709-710. இதா³னி அபரியாபன்னகதா² நாம ஹோதி. தத்த² யஸ்மா புது²ஜ்ஜனோ ஜா²னலாபீ⁴ காமேஸு வீதராகோ³தி வத்தப்³போ³ ஹோதி, ந பன விக³ததி³ட்டி²கோதி, தஸ்மா தி³ட்டி²க³தம் அபரியாபன்னந்தி யேஸம் லத்³தி⁴, ஸேய்யதா²பி புப்³ப³ஸேலியானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸமேத்த² யதா²பாளிமேவ நிய்யாதீதி.

அபரியாபன்னகதா²வண்ணனா.

சுத்³த³ஸமோ வக்³கோ³.