3. அனந்தராபயுத்தகதா²வண்ணனா

660-662. இதா³னி அனந்தராபயுத்தகதா² நாம ஹோதி. தத்த² அனந்தராபயுத்தோ நாம யேன க²ந்த⁴பே⁴த³தோ அனந்தரா விபாகதா³யகம் மாதுகா⁴தாதி³ ஆனந்தரியகம்மம் ஆணத்தம். தத்த² யஸ்ஸ நியதாய ஆணத்தியா ஆணத்தோ தம் கம்மம் கரிஸ்ஸதி, ஸோ அத்த²ஸாதி⁴காய சேதனாய உப்பாதி³தத்தா மிச்ச²த்தனியதோ ஹோதி, அப⁴ப்³போ³ ஸம்மத்தனியாமம் ஓக்கமிதும். யஸ்ஸ அனியதாய ஆணத்தியா ஆணத்தோ தம் கம்மம் கரிஸ்ஸதி, ஸோ அத்த²ஸாதி⁴காய சேதனாய அனுப்பாதி³தத்தா ந மிச்ச²த்தனியதோ, ப⁴ப்³போ³ ஸம்மத்தனியாமம் ஓக்கமிதுந்தி இத³ம் ஸகஸமயே ஸன்னிட்டா²னம். யேஸம் பன ‘‘அனியதாயபி ஆணத்தியா அப⁴ப்³போ³யேவ ஸம்மத்தனியாமம் ஓக்கமிது’’ந்தி லத்³தி⁴, ஸேய்யதா²பி உத்தராபத²கானம்; தேஸம் தம் லத்³தி⁴ம் பி⁴ந்தி³தும் ஸகவாதீ³ புப்³ப³பக்க²ம் த³த்வா அனந்தராபயுத்தோதி பரவாதி³னா அத்தானம் புச்சா²பேதி. தேனேத்த² பட²மபுச்சா² பரவாதி³ஸ்ஸ, அத்த²ஸாதி⁴கசேதனாய அபா⁴வம் ஸந்தா⁴ய படிஞ்ஞா ஸகவாதி³ஸ்ஸ. ததோ பரவாதீ³ மாதுகா⁴தாதி³கம்மஸ்ஸ ஆணத்தத்தாவ ‘‘ஸோ மிச்ச²த்தனியதோ’’தி மஞ்ஞதி. தஸ்மா மிச்ச²த்தனியாமஞ்சாதி பஞ்ஹம் புச்ச²தி. ஸகவாதீ³ பன ஏகஸ்ஸ புக்³க³லஸ்ஸ த்³வின்னம் நியாமானம் அனோக்கந்திமத்தமேவ ஸந்தா⁴ய ந ஹேவந்தி படிக்கி²பதி.

நனு தம் கம்மந்தி மாதுகா⁴தாதி³கம்மம். தத்த² அனியதாணத்திம் ஸந்தா⁴ய ‘‘ஆமந்தா’’தி படிஞ்ஞா ஸகவாதி³ஸ்ஸ. அனியதம்பி ஹி ஆணத்திம் பயோஜேத்வா டி²தஸ்ஸ ‘‘அனனுச்ச²விகம் மயா கத’’ந்தி குக்குச்சம் உப்பஜ்ஜதேவ, விப்படிஸாரோ ஜாயதேவ. ஹஞ்சீதிஆதி³ குக்குச்சுப்பத்திமத்தம் க³ஹேத்வா பரவாதி³னா லத்³தி⁴பதிட்டா²பனத்த²ம் வுத்தம்.

661. இதா³னி யஸ்ஸ அனியதாணத்திகஸ்ஸாபி அனந்தராபயுத்தஸ்ஸ பரவாதி³னா ஸம்மத்தனியாமோக்கமனம் படிஸித்³த⁴ம், தமேவ புக்³க³லம் க³ஹேத்வா அனந்தராபயுத்தோ புக்³க³லோ அப⁴ப்³போ³தி புச்சா² ஸகவாதி³ஸ்ஸ, அத்தனோ லத்³தி⁴வஸேன படிஞ்ஞா இதரஸ்ஸ. அத² நம் ஸகவாதீ³ ‘‘அப⁴ப்³போ³ நாம மாதுகா⁴தாதி³கம்மானம் காரகோ, கிம் தே தேன தானி கம்மானி கதானீ’’தி சோதே³தும் மாதா ஜீவிதா வோரோபிதாதிஆதி³மாஹ. இதரோ தேஸம் வத்தூ²னம் அரோக³தாய ததா²ரூபம் கிரியம் அபஸ்ஸந்தோ ‘‘ந ஹேவ’’ந்தி படிக்கி²பதி.

தம் கம்மம் படிஸம்ஹரித்வாதி அனியதாணத்திகம்மம் ஸந்தா⁴ய வுத்தம். தஞ்ஹி ‘‘மா கோ² மயா ஆணத்தம் ஆகாஸீ’’தி ஆணத்தம் நிவாரேந்தேன படிஸம்ஹடம் நாம ஹோதி. படிஸம்ஹடத்தாயேவ சேத்த² குக்குச்சம் படிவினோதி³தம், விப்படிஸாரோ படிவினீதோ நாம ஹோதி. ஏவம் ஸந்தேபி பனேத்த² புரிமாணத்தியாயேவ நியதபா⁴வம் மஞ்ஞமானோ பரவாதீ³ ‘‘ஆமந்தா’’தி படிஜானாதி. அத² நம் ஸகவாதீ³ தஸ்ஸ கம்மஸ்ஸ படிஸம்ஹடபா⁴வம் ஸம்படிச்சா²பேத்வா அத்தனோ லத்³தி⁴ம் பதிட்டா²பேத்வா ஹஞ்சீதிஆதி³மாஹ.

662. புன அனந்தராபயுத்தோதி பரியோஸானபஞ்ஹே பட²மபஞ்ஹே விய புச்சா² பரவாதி³ஸ்ஸ, படிஞ்ஞா ஸகவாதி³ஸ்ஸ. நனு தம் கம்மந்தி அனுயோகோ³ பரவாதி³ஸ்ஸ, படிஸம்ஹடகாலதோ புப்³பே³ பயுத்தகாலம் ஸந்தா⁴ய படிஞ்ஞா ஸகவாதி³ஸ்ஸ. பயுத்தபுப்³ப³தாமத்தம் க³ஹேத்வா அனியதாணத்திவஸேன ஹஞ்சீதி லத்³தி⁴பதிட்டா²பனம் பரவாதி³ஸ்ஸ. அயம் பன லத்³தி⁴ அயோனிஸோ பதிட்டி²தத்தா அப்பதிட்டி²தாவ ஹோதீதி.

அனந்தராபயுத்தகதா²வண்ணனா.