5. ஸத்தக்க²த்துபரமகதா²வண்ணனா

541-545. இதா³னி ஸத்தக்க²த்துபரமகதா² நாம ஹோதி, தத்த² யஸ்மா ‘‘ஸத்தக்க²த்துபரமோ’’தி வுத்தம், தஸ்மா ‘‘ஸத்தக்க²த்துபரமோ புக்³க³லோ ஸத்தக்க²த்துபரமதாய நியதோ’’தி யேஸம் லத்³தி⁴, ஸேய்யதா²பி உத்தராபத²கானம்; தேஸம் ட²பேத்வா ‘‘அரியமக்³க³ம் அஞ்ஞோ தஸ்ஸ நியமோ நத்தி², யேன ஸோ ஸத்தக்க²த்துபரமதாய நியதோ ப⁴வேய்யா’’தி இமம் விபா⁴க³ம் த³ஸ்ஸேதும் புச்சா² ஸகவாதி³ஸ்ஸ, படிஞ்ஞா இதரஸ்ஸ.

மாதா ஜீவிதாதிஆதீ³ஸு அயமதி⁴ப்பாயோ – த்³வே நியாமா ஸம்மத்தனியாமோ ச மிச்ச²த்தனியாமோ ச. ஸம்மத்தனியாமோ அரியமக்³கோ³. ஸோ அவினிபாதத⁴ம்மதஞ்சேவ ப²லுப்பத்திஞ்ச நியமேதி. மிச்ச²த்தனியாமோ ஆனந்தரியகம்மம். தம் அனந்தரா நிரயூபபத்திம் நியமேதி. தத்த² ஸத்தக்க²த்துபரமோ ஸோதாபத்திமக்³கே³ன அவினிபாதத⁴ம்மதாய ச ப²லுப்பத்தியா ச நியமிதோ. ஸேஸமக்³க³னியாமோ பனஸ்ஸ நத்தி² அனதி⁴க³தத்தா, ஆனந்தரியம்பி காதும் ஸோ அப⁴ப்³போ³. த்வம் பனஸ்ஸ நியாமம் இச்ச²ஸி, தேன தம் வதா³ம – ‘‘கிம் தே ஸோ இமினா மிச்ச²த்தனியாமேன நியமிதோ’’தி.

அப⁴ப்³போ³ அந்தராதி பஞ்ஹேஸு ஆனந்தரியாபா⁴வம் ஸந்தா⁴ய படிக்கி²பதி, ஸத்தக்க²த்துபரமம் ஸந்தா⁴ய படிஜானாதி. அத்தி² ஸோ நியாமோதி பஞ்ஹே ஸத்தக்க²த்துபரமதாய நியாமம் அபஸ்ஸந்தோ படிக்கி²பதி. அத்தி² தே ஸதிபட்டா²னாதிஆதி³ நியாமஸங்கா²தே மக்³க³த⁴ம்மே த³ஸ்ஸேதும் வுத்தம். தஸ்ஸ பன புன பட²மமக்³கா³னுப்பத்திதோ தேபி நத்தி², தஸ்மா படிக்கி²பதி. ஸேஸமேத்த² உத்தானத்த²மேவ. நனு ஸோ ஸத்தக்க²த்துபரமோதி ஏத்த² ப⁴க³வா ‘‘அயம் புக்³க³லோ ஏத்தகே ப⁴வே ஸந்தா⁴வித்வா பரினிப்³பா³யிஸ்ஸதி, அயம் ஏத்தகே’’தி அத்தனோ ஞாணப³லேன ப்³யாகரோதி, ந ப⁴வனியாமம் நாம கிஞ்சி தேன ஸத்தக்க²த்துபரமோ, கோலம்கோலோ, ஏகபீ³ஜீ வாதி வுத்தம், தஸ்மா அஸாத⁴கமேதந்தி.

ஸத்தக்க²த்துபரமகதா²வண்ணனா.

646-647. கோலம்கோலஏகபீ³ஜிகதா²யோபி இமினாவுபாயேன வேதி³தப்³பா³.

கோலம்கோலஏகபீ³ஜிகதா²வண்ணனா.