8. ஜீவிதாவோரோபனகதா²வண்ணனா

648-649. இதா³னி ஜீவிதாவோரோபனகதா² நாம ஹோதி. தத்த² யஸ்மா தோ³ஸஸம்பயுத்தேன சித்தேன பாணாதிபாதோ ஹோதி, தோ³ஸோ ச தி³ட்டி²ஸம்பன்னஸ்ஸ அப்பஹீனோ, தஸ்மா ‘‘தி³ட்டி²ஸம்பன்னோ ஸஞ்சிச்ச பாணம் ஜீவிதா வோரோபேய்யா’’தி யேஸம் லத்³தி⁴, ஸேய்யதா²பி புப்³ப³ஸேலியாபரஸேலியானம்; தே ஸந்தா⁴ய தி³ட்டி²ஸம்பன்னோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸஞ்சிச்ச மாதரந்திஆதி³பஞ்ஹேஸு பன ‘‘அட்டா²னமேதம் அனவகாஸோ’’தி ஸுத்தப⁴யேன படிக்கி²பதி. ஸத்த²ரி அகா³ரவோதிஆதி³ ஸத்தா²ராதீ³ஸு ஸகா³ரவஸ்ஸ ஸிக்கா²பத³ஸ்ஸ வீதிக்கமாபா⁴வத³ஸ்ஸனத்த²ம் வுத்தம். இதரோ பன அகுஸலவஸேன தஸ்ஸ அகா³ரவோ நாம நத்தீ²தி படிக்கி²பித்வா ஸகா³ரவபா⁴வஞ்ச ஸம்படிச்சி²த்வா புன அகா³ரவோதி புட்டோ² தேஸு தேஸு கிச்சேஸு பஸுததாய விக்கி²த்தானம் அஸதியா அமனஸிகாரேன சேதியே அபி⁴வாத³னபத³க்கி²ணகரணாபா⁴வம் ஸந்தா⁴ய படிஜானாதி. புன ஓஹதே³ய்யாதிஆதி³னா நயேன புட்டோ² தாதி³ஸாய கிரியாய ஸஞ்சிச்ச அகரணதோ படிக்கி²பதி. ஸேஸமேத்த² உத்தானத்த²மேவாதி.

ஜீவிதாவோரோபனகதா²வண்ணனா.