10. அனிச்சதாகதா²வண்ணனா

628. இதா³னி அனிச்சதாகதா² நாம ஹோதி. தத்த² ‘‘அனிச்சானம் ரூபாதீ³னம் அனிச்சதாபி ரூபாத³யோ விய பரினிப்ப²ன்னா’’தி யேஸம் லத்³தி⁴, ஸேய்யதா²பி அந்த⁴கானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ தே ரூபாத³யோ விய அனிச்சதா பரினிப்ப²ன்னா, தஸ்ஸாபி அஞ்ஞாய பரினிப்ப²ன்னாய அனிச்சதாய ப⁴விதப்³ப³’’ந்தி சோதே³தும் தாய அனிச்சதாயாதிஆதி³மாஹ. இதரோ த்³வின்னம் அனிச்சதாய ஏகதோ அபா⁴வேன படிக்கி²பித்வா புன யஸ்மா ஸா அனிச்சதா நிச்சா ந ஹோதி, தேனேவ அனிச்சேன ஸத்³தி⁴ம் அந்தரதா⁴யதி, தஸ்மா படிஜானாதி. அத²ஸ்ஸ ஸகவாதீ³ லேஸோகாஸம் அத³த்வா யா தேன து³தியா அனிச்சதா படிஞ்ஞாதா, தாயபி ததோ பராயபீதி பரம்பரவஸேன அனுபச்சே²த³தோ³ஸம் ஆரோபேந்தோ தாய தாயேவாதிஆதி³மாஹ. ஜரா பரினிப்ப²ன்னாதிஆதி³ யஸ்மா உப்பன்னஸ்ஸ ஜராமரணதோ அஞ்ஞா அனிச்சதா நாம நத்தி², தஸ்மா அனிச்சதாவிபா⁴கா³னுயுஞ்ஜனவஸேன வுத்தம். தத்ராபி பரவாதி³னோ புரிமனயேனேவ படிஞ்ஞா ச படிக்கே²போ ச வேதி³தப்³போ³.

629. ரூபம் பரினிப்ப²ன்னந்திஆதி³ யேஸம் ஸா அனிச்சதா, தேஹி ஸத்³தி⁴ம் ஸம்ஸந்த³னத்த²ம் வுத்தம். தத்த² ‘‘யதா² பரினிப்ப²ன்னானம் ரூபாதீ³னம் அனிச்சதாஜராமரணானி அத்தி², ஏவம் பரினிப்ப²ன்னானம் அனிச்சதாதீ³னம் தானி நத்தீ²’’தி மஞ்ஞமானோ ஏகந்தேன படிக்கி²பதியேவாதி.

அனிச்சதாகதா²வண்ணனா.

ஏகாத³ஸமோ வக்³கோ³.