10. த³ஸமவக்³கோ³

1. நிரோத⁴கதா²வண்ணனா

571-572. இதா³னி நிரோத⁴கதா² நாம ஹோதி. தத்த² யேஸம் ‘‘உபபத்தேஸியந்தி ஸங்க²ம் க³தஸ்ஸ ப⁴வங்க³சித்தஸ்ஸ ப⁴ங்க³க்க²ணேன ஸஹேவ கிரியாதி ஸங்க²ம் க³தா குஸலா வா அகுஸலா வா சத்தாரோ க²ந்தா⁴ சித்தஸமுட்டா²னரூபஞ்சாதி பஞ்சக்க²ந்தா⁴ உப்பஜ்ஜந்தி. தேஸு ஹி அனுப்பன்னேஸு ப⁴வங்கே³ நிருத்³தே⁴ ஸந்ததிவிச்சே²தோ³ ப⁴வேய்யா’’தி லத்³தி⁴, ஸேய்யதா²பி அந்த⁴கானம்; தே ஸந்தா⁴ய உபபத்தேஸியேதி புச்சா² ஸகவாதி³ஸ்ஸ, படிஞ்ஞா இதரஸ்ஸ. தத்த² உபபத்தேஸியேதி சதூஸுபி பதே³ஸு ப³ஹுவசனபு⁴ம்மத்தே² ஏகவசனபு⁴ம்மம். உபபத்தேஸியேஸு பஞ்சஸு க²ந்தே⁴ஸு அனிருத்³தே⁴ஸூதி அயஞ்ஹேத்த² அத்தோ². த³ஸன்னந்தி உபபத்தேஸியக²ந்தா⁴னஞ்ச கிரியக²ந்தா⁴னஞ்ச வஸேன வுத்தம். தத்த² பட²மபஞ்ஹே க²ந்த⁴லக்க²ணவஸேன கிரியவஸேன ச பஞ்சேவ நாம தே க²ந்தா⁴தி படிக்கி²பதி. து³தியபஞ்ஹே புரிமபச்சி²மவஸேன உபபத்தேஸியகிரியவஸேன ச நானத்தம் ஸந்தா⁴ய படிஜானாதி. த்³வின்னம் பன ப²ஸ்ஸானம் சித்தானஞ்ச ஸமோதா⁴னம் புட்டோ² ஸுத்தலேஸாபா⁴வேன படிக்கி²பதி.

கிரியா சத்தாரோதி ரூபேன வினா குஸலா அகுஸலா வா சத்தாரோ க³ஹிதா. கிரியாஞாணந்தி பரவாதி³னா சக்கு²விஞ்ஞாணஸமங்கி³க்க²ணே அரஹதோ அனுஞ்ஞாதம் அனாரம்மணஞாணம். நிருத்³தே⁴ மக்³கோ³ உப்பஜ்ஜதீதி புச்சா² பரவாதி³ஸ்ஸ, அனிருத்³தே⁴ அனுப்பஜ்ஜனதோ படிஞ்ஞா ஸகவாதி³ஸ்ஸ. மதோ மக்³க³ம் பா⁴வேதீதி ச²லேன புச்சா² பரவாதி³ஸ்ஸ. யஸ்மா பன படிஸந்தி⁴தோ யாவ சுதிசித்தா ஸத்தோ ஜீவதியேவ நாம, தஸ்மா ஸகவாதீ³ ந ஹேவந்தி படிக்கி²பதி.

நிரோத⁴கதா²வண்ணனா.

2. ரூபம்மக்³கோ³திகதா²வண்ணனா

573-575. இதா³னி ரூபம் மக்³கோ³திகதா² நாம ஹோதி. தத்த² யேஸம் ‘‘ஸம்மாவாசாகம்மந்தாஜீவா ரூப’’ந்தி லத்³தி⁴, ஸேய்யதா²பி மஹிஸாஸகஸம்மிதியமஹாஸம்கி⁴கானம்; தே ஸந்தா⁴ய மக்³க³ஸமங்கி³ஸ்ஸாதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ தே ஸம்மாவாசாத³யோ ரூபம், ந விரதியோ, யதா² ஸம்மாதி³ட்டா²தி³மக்³கோ³ ஸாரம்மணாதி³ஸபா⁴வோ, ஏவம் தம்பி ரூபம் ஸியா’’தி சோதே³தும் ஸாரம்மணோதிஆதி³மாஹ. தத்த² படிக்கே²போ ச படிஞ்ஞா ச பரவாதி³னோ லத்³தி⁴அனுரூபேன வேதி³தப்³பா³. ஸேஸமேத்த² உத்தானத்த²மேவாதி.

ரூபம் மக்³கோ³திகதா²வண்ணனா.

3. பஞ்சவிஞ்ஞாணஸமங்கி³ஸ்ஸ மக்³க³கதா²வண்ணனா

576. இதா³னி பஞ்சவிஞ்ஞாணஸமங்கி³ஸ்ஸ மக்³க³கதா² நாம ஹோதி. தத்த² யேஸம் ‘‘சக்கு²னா ரூபம் தி³ஸ்வா ந நிமித்தக்³கா³ஹீ ஹோதீ’’தி ஸுத்தம் நிஸ்ஸாய ‘‘பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா’’தி லத்³தி⁴, ஸேய்யதா²பி மஹாஸம்கி⁴கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘ஸசே தஸ்ஸ மக்³க³பா⁴வனா அத்தி², பஞ்சவிஞ்ஞாணக³திகேன வா மக்³கே³ன, மக்³க³க³திகேஹி வா பஞ்சவிஞ்ஞாணேஹி ப⁴விதப்³ப³ம், ந ச தானி மக்³க³க³திகானி அனிப்³பா³னாரம்மணத்தா அலோகுத்தரத்தா ச, ந மக்³கோ³ பஞ்சவிஞ்ஞாணக³திகோ தேஸம் லக்க²ணேன அஸங்க³ஹிதத்தா’’தி சோதே³தும் நனு பஞ்சவிஞ்ஞாணா உப்பன்னவத்து²காதிஆதி³மாஹ. தத்ராயம் அதி⁴ப்பாயோ – யதி³ பஞ்சவிஞ்ஞாணஸமங்கி³ஸ்ஸ மக்³க³பா⁴வனா ஸியா, யேன மனோவிஞ்ஞாணேன மக்³கோ³ ஸம்பயுத்தோ, தம்பி பஞ்சவிஞ்ஞாணஸமங்கி³ஸ்ஸ ஸியா. ஏவம் ஸந்தே யதி³த³ம் ‘‘பஞ்சவிஞ்ஞாணா உப்பன்னவத்து²கா’’திஆதி³ லக்க²ணம் வுத்தம், தம் ஏவம் அவத்வா ‘‘ச² விஞ்ஞாணா’’தி வத்தப்³ப³ம் ஸியா. ததா² பன அவத்வா ‘‘பஞ்சவிஞ்ஞாணா’’த்வேவ வுத்தம், தஸ்மா ந வதப்³ப³ம் ‘‘பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா’’தி. யஸ்மா சேத்த² அயமேவ அதி⁴ப்பாயோ, தஸ்மா ஸகவாதீ³ தம் லக்க²ணம் பரவாதி³ம் ஸம்படிச்சா²பேத்வா நோ ச வத ரே வத்தப்³பே³ பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனாதி ஆஹ.

அபரோ நயோ – பஞ்சவிஞ்ஞாணா உப்பன்னவத்து²கா, மக்³கோ³ அவத்து²கோபி ஹோதி. தே ச உப்பன்னாரம்மணா, மக்³கோ³ நவத்தப்³பா³ரம்மணோ. தே புரேஜாதவத்து²காவ மக்³கோ³ அவத்து²கோபி. தே புரேஜாதாரம்மணா, மக்³கோ³ அபுரேஜாதாரம்மணோ. தே அஜ்ஜ²த்திகவத்து²காவ மக்³கோ³ அவத்து²கோபி ஹோதி. தே ச ரூபாதி³வஸேன பா³ஹிராரம்மணா, மக்³கோ³ நிப்³பா³னாரம்மணோ. தே அனிருத்³த⁴ம் வத்து²ம் நிஸ்ஸயம் கத்வா பவத்தனதோ அஸம்பி⁴ன்னவத்து²கா, மக்³கோ³ அவத்து²கோபி. தே அனிருத்³தா⁴னேவ ரூபாதீ³னி ஆரப்³ப⁴ பவத்தனதோ அஸம்பி⁴ன்னாரம்மணா, மக்³கோ³ நிப்³பா³னாரம்மணோ. தே நானாவத்து²கா, மக்³கோ³ அவத்து²கோ வா ஏகவத்து²கோ வா. தே நானாரம்மணா மக்³கோ³ ஏகாரம்மணோ. தே அத்தனோ அத்தனோவ ரூபாதி³கோ³சரே பவத்தனதோ ந அஞ்ஞமஞ்ஞஸ்ஸ கோ³சரவிஸயம் பச்சனுபோ⁴ந்தி, மக்³கோ³ ரூபாதீ³ஸு ஏகம்பி கோ³சரம் ந கரோதி. தே கிரியமனோதா⁴தும் புரேசாரிகம் கத்வா உப்பஜ்ஜனதோ ந அஸமன்னாஹாரா ந அமனஸிகாரா உப்பஜ்ஜந்தி, மக்³கோ³ நிராவஜ்ஜனோவ. தே ஸம்படிச்ச²னாதீ³ஹி வோகிண்ணா உப்பஜ்ஜந்தி, மக்³க³ஸ்ஸ வோகாரோயேவ நத்தி². தே அஞ்ஞமஞ்ஞம் புப்³ப³சரிமபா⁴வேன உப்பஜ்ஜந்தி, மக்³க³ஸ்ஸ தேஹி ஸத்³தி⁴ம் புரிமபச்சி²மதாவ நத்தி², தேஸம் அனுப்பத்திகாலே திக்க²விபஸ்ஸனாஸமயே, தேஸம் அனுப்பத்திதே³ஸே ஆருப்பேபி ச உப்பஜ்ஜனதோ. தே ஸம்படிச்ச²னாதீ³ஹி அந்தரிதத்தா ந அஞ்ஞமஞ்ஞஸ்ஸ ஸமனந்தரா உப்பஜ்ஜந்தி, மக்³க³ஸ்ஸ ஸம்படிச்ச²னாதீ³ஹி அந்தரிதபா⁴வோவ நத்தி². தேஸம் அஞ்ஞத்ர அபி⁴னிபாதா ஆபோ⁴க³மத்தம்பி கிச்சம் நத்தி², மக்³க³ஸ்ஸ கிலேஸஸமுக்³கா⁴தனம் கிச்சந்தி. யஸ்மா சேத்த² அயம்பி அதி⁴ப்பாயோ, தஸ்மா ஸகவாதீ³ இமேஹாகாரேஹி பரவாதி³ம் மக்³க³ஸ்ஸ அபஞ்சவிஞ்ஞாணக³திகபா⁴வம் ஸம்படிச்சா²பேத்வா நோ ச வத ரே வத்தப்³பே³ பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனாதி ஆஹ.

577. ஸுஞ்ஞதம் ஆரப்³பா⁴தி ‘‘யதா² லோகுத்தரமக்³கோ³ ஸுஞ்ஞதம் நிப்³பா³னம் ஆரப்³ப⁴, லோகியோ ஸுத்³த⁴ஸங்கா²ரபுஞ்ஜம் ஆரப்³ப⁴ உப்பஜ்ஜதி, கிம் தே ஏவம் சக்கு²விஞ்ஞாண’’ந்தி புச்ச²தி. இதரோ ‘‘சக்கு²ஞ்ச படிச்ச ரூபே சா’’தி வசனதோ படிக்கி²பதி. து³தியம் புட்டோ² ‘‘ந நிமித்தக்³கா³ஹீ’’தி வசனதோ யம் தத்த² அனிமித்தம், ததே³வ ஸுஞ்ஞதந்தி ஸந்தா⁴ய படிஜானாதி. சக்கு²ஞ்ச படிச்சாதி பஞ்ஹத்³வயேபி ஏஸேவ நயோ.

578-579. சக்கு²விஞ்ஞாணம் அதீதானாக³தம் ஆரப்³பா⁴தி ஏத்த² அயமதி⁴ப்பாயோ – மனோவிஞ்ஞாணஸமங்கி³ஸ்ஸ அத்தி² மக்³க³பா⁴வனா, மனோவிஞ்ஞாணஞ்ச அதீதானாக³தம்பி ஆரப்³ப⁴ உப்பஜ்ஜதி, கிம் தே ஏவம் சக்கு²விஞ்ஞாணம்பீதி. ப²ஸ்ஸம் ஆரப்³பா⁴திஆதீ³ஸுபி ஏஸேவ நயோ. சக்கு²னா ரூபம் தி³ஸ்வா ந நிமித்தக்³கா³ஹீதி ஏத்த² ஜவனக்க²ணே ந நிமித்தக்³கா³ஹிதா வுத்தா, ந சக்கு²விஞ்ஞாணக்க²ணே. தஸ்மா லோகியமக்³க³ம்பி ஸந்தா⁴யேதம் அஸாத⁴கந்தி.

பஞ்சவிஞ்ஞாணஸமங்கி³ஸ்ஸ மக்³க³கதா²வண்ணனா.

4. பஞ்சவிஞ்ஞாணா குஸலாபீதிகதா²வண்ணனா

580-583. இதா³னி பஞ்சவிஞ்ஞாணா குஸலாபீதிகதா² நாம ஹோதி. ஸா ஹேட்டா² வுத்தனயேனேவ அத்த²தோ வேதி³தப்³பா³தி.

பஞ்சவிஞ்ஞாணா குஸலாபீதிகதா²வண்ணனா.

5. பஞ்சவிஞ்ஞாணா ஸாபோ⁴கா³திகதா²வண்ணனா

584-586. இதா³னி பஞ்சவிஞ்ஞாணா ஸாபோ⁴கா³திகதா² நாம ஹோதி. தத்த² ஆபோ⁴கோ³ நாம குஸலாகுஸலவஸேன ஹோதி ஸத்தா²ரா ச ‘‘சக்கு²னா ரூபம் தி³ஸ்வா நிமித்தக்³கா³ஹீ ஹோதி, ந நிமித்தக்³கா³ஹீ ஹோதீ’’திஆதி³ வுத்தம், தம் அயோனிஸோ க³ஹேத்வா ‘‘பஞ்சவிஞ்ஞாணா ஸாபோ⁴கா³’’தி யேஸம் லத்³தி⁴, ஸேய்யதா²பி மஹாஸம்கி⁴கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸமேத்த² புரிமகதா²ஸதி³ஸமேவாதி.

பஞ்சவிஞ்ஞாணா ஸாபோ⁴கா³திகதா²வண்ணனா.

6. த்³வீஹி ஸீலேஹீதிகதா²வண்ணனா

587-589. இதா³னி த்³வீஹி ஸீலேஹீதிகதா² நாம ஹோதி. தத்த² ‘‘ஸீலே பதிட்டா²ய நரோ ஸபஞ்ஞோ’’திஆதி³வசனதோ (ஸம். நி. 1.23) யஸ்மா லோகியேன ஸீலேன ஸீலவா லோகுத்தரம் மக்³க³ம் பா⁴வேதி, தஸ்மா ‘‘புரிமேன ச லோகியேன மக்³க³க்க²ணே லோகுத்தரேன சாதி த்³வீஹி ஸீலேஹி ஸமன்னாக³தோ நாம ஹோதீ’’தி யேஸம் லத்³தி⁴, ஸேய்யதா²பி மஹாஸம்கி⁴கானம்யேவ, தே ஸந்தா⁴ய மக்³க³ஸமங்கீ³தி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ ஸோ ஏகக்க²ணே லோகியலோகுத்தரேஹி த்³வீஹி ஸீலேஹி ஸமன்னாக³தோ, த்³வீஹி ப²ஸ்ஸாதீ³ஹிபி தேன ஸமன்னாக³தேன ப⁴விதப்³ப³’’ந்தி சோதே³தும் த்³வீஹி ப²ஸ்ஸேஹீதிஆதி³மாஹ. இதரோ ததா²ரூபம் நயம் அபஸ்ஸந்தோ படிக்கி²பதி. லோகியேன ச லோகுத்தரேன சாதி பஞ்ஹே புப்³பே³ ஸமாதி³ன்னஞ்ச மக்³க³க்க²ணே உப்பன்னஸம்மாவாசாதீ³னி ச ஸந்தா⁴ய படிஜானாதி.

லோகியே ஸீலே நிருத்³தே⁴தி புச்சா² பரவாதி³ஸ்ஸ, க²ணப⁴ங்க³னிரோத⁴ம் ஸந்தா⁴ய படிஞ்ஞா ஸகவாதி³ஸ்ஸ. இதரோ பன தம் வீதிக்கமம் விய ஸல்லக்கே²ந்தோ து³ஸ்ஸீலோதிஆதி³மாஹ. லத்³தி⁴பதிட்டா²பனம் பனஸ்ஸ புப்³பே³ அபி⁴ன்னஸீலதம்யேவ தீ³பேதி, ந த்³வீஹி ஸமன்னாக³ததம். தஸ்மா அப்பதிட்டி²தாவ லத்³தீ⁴தி.

த்³வீஹி ஸீலேஹீதிகதா²வண்ணனா.

7. ஸீலம் அசேதஸிகந்திகதா²வண்ணனா

590-594. இதா³னி ஸீலம் அசேதஸிகந்திகதா² நாம ஹோதி. தத்த² யஸ்மா ஸீலே உப்பஜ்ஜித்வா நிருத்³தே⁴பி ஸமாதா³னஹேதுகோ ஸீலோபசயோ நாம அத்தி², யேன ஸோ ஸீலவாயேவ நாம ஹோதி, தஸ்மா ‘‘ஸீலம் அசேதஸிக’’ந்தி யேஸம் லத்³தி⁴, ஸேய்யதா²பி மஹாஸம்கி⁴கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸேஸமேத்த² ‘‘தா³னம் அசேதஸிக’’ந்திகதா²யம் வுத்தனயேனேவ வேதி³தப்³ப³ம். லத்³தி⁴பதிட்டா²பனம்பி அயோனிஸோ க³ஹிதத்தா அப்பதிட்டா²பனமேவாதி.

ஸீலம் அசேதஸிகந்திகதா²வண்ணனா.

8. ஸீலம் ந சித்தானுபரிவத்தீதிகதா²வண்ணனா

595-597. இதா³னி ஸீலம் ந சித்தானுபரிவத்தீதிகதா² நாம ஹோதி. தத்த² ந சித்தானுபரிவத்தீதி பா⁴ஸந்தரமேவ நானம், ஸேஸம் புரிமகதா²ஸதி³ஸமேவாதி.

ஸீலம் ந சித்தானுபரிவத்தீதிகதா²வண்ணனா.

9. ஸமாதா³னஹேதுகதா²வண்ணனா

598-600. இதா³னி ஸமாதா³னஹேதுகதா² நாம ஹோதி. தத்த² ‘‘ஆராமரோபா’’தி கா³தா²ய அத்த²ம் அயோனிஸோ க³ஹேத்வா ‘‘ஸதா³ புஞ்ஞம் பவட்³ட⁴தீ’’தி வசனதோ ‘‘ஸமாதா³னஹேதுகம் ஸீலம் வட்³ட⁴தீ’’தி யேஸம் லத்³தி⁴, ஸேய்யதா²பி மஹாஸம்கி⁴கானஞ்ஞேவ, தே ஸந்தா⁴ய புச்சா² ஸகவாதி³ஸ்ஸ, சித்தவிப்பயுத்தம் ஸீலோபசயம் ஸந்தா⁴ய படிஞ்ஞா பரவாதி³ஸ்ஸ. ஸேஸம் புரிமகதா²ஸதி³ஸமேவாதி.

ஸமாதா³னஹேதுகதா²வண்ணனா.

10. விஞ்ஞத்தி ஸீலந்திகதா²வண்ணனா

601-602. இதா³னி விஞ்ஞத்தி ஸீலந்திகதா² நாம ஹோதி. தத்த² காயவிஞ்ஞத்தி காயகம்மம், வசீவிஞ்ஞத்தி வசீகம்மந்தி க³ஹிதத்தா ‘‘விஞ்ஞத்தி ஸீல’’ந்தி யேஸம் லத்³தி⁴, ஸேய்யதா²பி மஹாஸம்கி⁴கானஞ்சேவ ஸம்மிதியானஞ்ச; தே ஸந்தா⁴ய விஞ்ஞத்தீதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் யஸ்மா ஸீலம் நாம விரதி, ந ரூபத⁴ம்மோ, தஸ்மா தேனத்தே²ன சோதே³தும் பாணாதிபாதா வேரமணீதிஆதி³மாஹ. அபி⁴வாத³னம் ஸீலந்திஆதி³ யதா²ரூபம் விஞ்ஞத்திம் ஸோ ‘‘ஸீல’’ந்தி மஞ்ஞதி தம் உத்³த⁴ரித்வா த³ஸ்ஸேதும் வுத்தம். யஸ்மா பன ஸா விரதி ந ஹோதி, தஸ்மா புன பாணாதிபாதாதிஆதி³மாஹ. லத்³தி⁴ பனஸ்ஸ ச²லேன பதிட்டி²தத்தா அப்பதிட்டி²தாயேவாதி.

விஞ்ஞத்தி ஸீலந்திகதா²வண்ணனா.

11. அவிஞ்ஞத்தி து³ஸ்ஸீல்யந்திகதா²வண்ணனா

603-604. இதா³னி அவிஞ்ஞத்தி து³ஸ்ஸீல்யந்திகதா² நாம ஹோதி. தத்த² சித்தவிப்பயுத்தம் அபுஞ்ஞூபசயஞ்சேவ ஆணத்தியா ச பாணாதிபாதாதீ³ஸு அங்க³பாரிபூரிம் ஸந்தா⁴ய ‘‘அவிஞ்ஞத்தி து³ஸ்ஸீல்ய’’ந்தி யேஸம் லத்³தி⁴, ஸேய்யதா²பி மஹாஸம்கி⁴கானம், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘ஸசே ஸா து³ஸ்ஸீல்யம், பாணாதிபாதாதீ³ஸு அஞ்ஞதரா ஸியா’’தி சோதே³தும் பாணாதிபாதோதிஆதி³மாஹ. பாபகம்மம் ஸமாதி³யித்வாதி ‘‘அஸுகம் நாம கா⁴தேஸ்ஸாமி, அஸுகம் ப⁴ண்ட³ம் அவஹரிஸ்ஸாமீ’’தி ஏவம் பாபஸமாதா³னம் கத்வா. உபோ⁴ வட்³ட⁴ந்தீதி புட்டோ² தா³னக்க²ணே பாபஸ்ஸ அனுப்பத்திம் ஸந்தா⁴ய படிக்கி²பதி. து³தியம் புட்டோ² சித்தவிப்பயுத்தம் பாபூபசயம் ஸந்தா⁴ய படிஜானாதி. ஸேஸமேத்த² பரிபோ⁴க³மயகதா²யம் வுத்தனயேனேவ வேதி³தப்³ப³ம். லத்³தி⁴பதிட்டா²பனம்பிஸ்ஸ பாபஸமாதி³ன்னபுப்³ப³பா⁴க³மேவ ஸாதே⁴தி; ந அவிஞ்ஞத்தியா து³ஸ்ஸீலபா⁴வந்தி.

அவிஞ்ஞத்தி து³ஸ்ஸீல்யந்திகதா²வண்ணனா.

த³ஸமோ வக்³கோ³.

து³தியபண்ணாஸகோ ஸமத்தோ.