10. ஜீவிதிந்த்³ரியகதா²வண்ணனா

540. இதா³னி ஜீவிதிந்த்³ரியகதா² நாம ஹோதி. தத்த² யேஸம் ஜீவிதிந்த்³ரியம் நாம சித்தவிப்பயுத்தோ அரூபத⁴ம்மோ, தஸ்மா ரூபஜீவிதிந்த்³ரியம் நத்தீ²தி லத்³தி⁴, ஸேய்யதா²பி புப்³ப³ஸேலியானஞ்சேவ ஸம்மிதியானஞ்ச; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. நத்தி² ரூபீனம் த⁴ம்மானம் ஆயூதி பஞ்ஹே உபாதி³ன்னரூபானம்பி திணகட்டா²தீ³னம்பி ஸந்தானவஸேன பவத்திமேவ ஆயு டி²தி யபனா யாபனா இரியனா வத்தனா பாலனாதி இச்ச²தி, தஸ்மா படிக்கி²பதி. அத்தீ²தி பஞ்ஹேபி இமினா காரணேன படிஜானாதி. அத்தி² அரூபஜீவிதிந்த்³ரியந்தி பஞ்ஹே அரூபத⁴ம்மானம் சித்தவிப்பயுத்தம் ஜீவிதிந்த்³ரியஸந்தானம் நாம அத்தீ²தி இச்ச²தி, தஸ்மா படிஜானாதி.

541. ரூபீனம் த⁴ம்மானம் ஆயு அரூபஜீவிதிந்த்³ரியந்தி பஞ்ஹே ஸத்தஸந்தானே ரூபினோ வா ஹோந்து அரூபினோ வா, ஸப்³பே³ஸம் சித்தவிப்பயுத்தம் அரூபஜீவிதிந்த்³ரியமேவ இச்ச²தி, தஸ்மா படிஜானாதி.

542. நிரோத⁴ஸமாபன்னபஞ்ஹேஸுபி சித்தவிப்பயுத்தம் அரூபஜீவிதமேவ ஸந்தா⁴ய படிக்கி²பதி ச படிஜானாதி ச. ஸகவாதீ³ பன தம் அஸம்படிச்ச²ந்தோ யம் அரூபபவத்தே அஸதி அத்தி², ரூபேன தேன ப⁴விதப்³ப³ந்தி சோதே³தும் ஹஞ்சீதிஆதி³மாஹ. ஸங்கா²ரக்க²ந்த⁴பஞ்ஹே ப²ஸ்ஸாதி³ஸங்கா²ரக்க²ந்த⁴ம் ஸந்தா⁴ய படிக்கி²பதி, காயகம்மாதி³ஸங்கா²ரக்க²ந்த⁴ம் ஸந்தா⁴ய படிஜானாதி. காயவிஞ்ஞத்தி வசீவிஞ்ஞத்தி ஸம்மாவாசா ஸம்மாகம்மந்தோ ஜீவிதிந்த்³ரியந்தி ஏவமாத³யோபி த⁴ம்மா ஸங்கா²ரக்க²ந்த⁴பரியாபன்னாதிஸ்ஸ லத்³தி⁴. ஸகவாதீ³ பன தம் அஸம்படிச்ச²ந்தோ யதி³ நிருத்³தே⁴பி அரூபபவத்தே ஸங்கா²ரக்க²ந்தோ⁴ அத்தி², சதுன்னம்பி க²ந்தா⁴னம் அத்தி²தா ஹோதூதி சோதே³தும் அத்தி² வேத³னாக்க²ந்தோ⁴தி ஆதி³மாஹ. இதரோ அந்தோஸமாபத்திம் ஸந்தா⁴ய படிக்கி²பதி, ஸமாபஜ்ஜந்தஸ்ஸ ச வுட்ட²ஹந்தஸ்ஸ ச புப்³பா³பரபா⁴க³ம் ஸந்தா⁴ய படிஜானாதி.

543. அஸஞ்ஞஸத்தவாரேபி ஏஸேவ நயோ. தஸ்ஸ ஹி லத்³தி⁴யா அஸஞ்ஞஸத்தானம் படிஸந்தி⁴காலே சித்தம் உப்பஜ்ஜித்வா நிருஜ்ஜ²தி, தேன ஸஹ சித்தவிப்பயுத்தஅரூபஜீவிதிந்த்³ரியம் உப்பஜ்ஜித்வா யாவதாயுகம் பவத்ததி. தஸ்மா தேஸம் ஜீவிதிந்த்³ரியம் நத்தீ²தி புட்டோ² படிக்கி²பதி, அத்தீ²தி புட்டோ² படிஜானாதி. வேத³னாக்க²ந்தா⁴த³யோபி தேஸம் பவத்திவஸேன படிக்கி²பதி, சுதிபடிஸந்தி⁴வஸேன படிஜானாதி. ஸகவாதீ³ பன தம் அனிச்ச²ந்தோ ‘‘ஸசே தத்த² ஏகக்க²ணேபி வேத³னாத³யோ அத்தி², பஞ்சவோகாரப⁴வத்தம் பாபுணாதீ’’தி சோதே³தும் பஞ்சவோகாரப⁴வோதி ஆஹ. இதரோ ஸுத்தவிரோத⁴ப⁴யா படிக்கி²பதி.

544-545. ஏகதே³ஸம் பி⁴ஜ்ஜதீதி பஞ்ஹே ஸம்பயுத்தம் பி⁴ஜ்ஜதி, விப்பயுத்தம் திட்ட²தீதி தஸ்ஸ லத்³தி⁴, தஸ்மா படிஜானாதி. த்³வே ஜீவிதிந்த்³ரியானீதி புச்சா² பரவாதி³ஸ்ஸ, படிஞ்ஞா ஸகவாதி³ஸ்ஸ. ரூபாரூபவஸேன ஹி த்³வே ஜீவிதிந்த்³ரியானி, தேஹியேவ ஸத்தோ ஜீவதி, தேஸம் ப⁴ங்கே³ன மரதீதி வுச்சதி. சுதிக்க²ணஸ்மிஞ்ஹி த்³வேபி ஜீவிதானி ஸஹேவ பி⁴ஜ்ஜந்தி.

ஜீவிதிந்த்³ரியகதா²வண்ணனா.