1. நியாமகதா²வண்ணனா

445-447. இதா³னி நியாமகதா² நாம ஹோதி. தத்த² நியாமோதி ‘‘ப⁴ப்³போ³ நியாமம் ஓக்கமிதும் குஸலேஸு த⁴ம்மேஸு ஸம்மத்த’’ந்தி (பு. ப. 13) வசனதோ அரியமக்³கோ³ வுச்சதி. யஸ்மா பன தஸ்மிம் உப்பஜ்ஜித்வா நிருத்³தே⁴பி புக்³க³லோ அனியதோ நாம ந ஹோதி, தஸ்மா ‘‘ஸோ நியாமோ நிச்சட்டே²ன அஸங்க²தோ’’தி யேஸம் லத்³தி⁴, ஸேய்யதா²பி அந்த⁴கானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ததோ ‘‘யதி³ ஸோ அஸங்க²தோ, ஏவரூபேன தேன ப⁴விதப்³ப³’’ந்தி தீ³பேந்தோ நிப்³பா³னந்திஆதி³மாஹ. ஸம்ஸந்த³னபுச்சா² உத்தானத்தா²யேவ.

அத்தி² கேசீதிஆதி³ நியாமஸ்ஸ ஸங்க²தபா⁴வதீ³பனத்த²ம் வுத்தம். மக்³கோ³ அஸங்க²தோதிபஞ்ஹே தஸ்ஸ உப்பாத³னிரோத⁴பா⁴வதோ படிக்கி²பதீதி. நியாமோ ஸங்க²தோதிபஞ்ஹே நிருத்³தே⁴பி மக்³கே³ நியாமஸ்ஸ அத்தி²தம் ஸந்தா⁴ய படிக்கி²பதி. ஸோதாபத்தினியாமோதிஆதி³பஞ்ஹேஸுபி அனுலோமதோ ச படிலோமதோ ச இமினாவ நயேன அத்தோ² வேதி³தப்³போ³. பஞ்ச அஸங்க²தானீதி புட்டோ² பஞ்சன்னம் அஸங்க²தானம் ஆக³தட்டா²னம் அபஸ்ஸந்தோ படிக்கி²பதி. து³தியம் புட்டோ² சதுன்னம் ஸம்மத்தனியாமானம் நியாமவசனதோ நிப்³பா³னஸ்ஸ ச அஸங்க²தபா⁴வதோ படிஜானாதி. மிச்ச²த்தனியாமபஞ்ஹோ நியாமவசனமத்தேன அஸங்க²ததாய அயுத்தபா⁴வதீ³பனத்த²ம் வுத்தோதி.

நியாமகதா²வண்ணனா.