2. படிச்சஸமுப்பாத³கதா²வண்ணனா

448. இதா³னி படிச்சஸமுப்பாத³கதா² நாம ஹோதி. தத்த² யேஸம் நிதா³னவக்³கே³ ‘‘உப்பாதா³ வா ததா²க³தானம் அனுப்பாதா³ வா ததா²க³தானம் டி²தாவ ஸா தா⁴து த⁴ம்மட்டி²ததா’’திஆதி³வசனதோ (ஸம். நி. 2.20) ‘‘படிச்சஸமுப்பாதோ³ அஸங்க²தோ’’தி லத்³தி⁴, ஸேய்யதா²பி புப்³ப³ஸேலியானஞ்ச மஹிஸாஸகானஞ்ச; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ.

449. அவிஜ்ஜா அஸங்க²தாதி ஆத³யோ பஞ்ஹா அவிஜ்ஜாதீ³னம்யேவ படிச்சஸமுப்பாத³பா⁴வத³ஸ்ஸனத்த²ம் வுத்தா. யேன பனத்தே²ன தத்த² ஏகேகம் அங்க³ம் ‘‘படிச்சஸமுப்பாதோ³’’தி வுச்சதி, ஸோ படிச்சஸமுப்பாத³விப⁴ங்கே³ வுத்தோயேவ.

451. அவிஜ்ஜாபச்சயா ஸங்கா²ராதி யா தத்த² த⁴ம்மட்டி²ததாதிஆதி³ யேன ஸுத்தேன லத்³தி⁴ பதிட்டா²பிதா, தஸ்ஸேவ அத்த²த³ஸ்ஸனேன லத்³தி⁴பி⁴ந்த³னத்த²ம் வுத்தம். அயஞ்ஹேத்த² அத்தோ² – யா அயம் ஹேட்டா² ‘‘டி²தாவ ஸா தா⁴து த⁴ம்மட்டி²ததா த⁴ம்மனியாமதா’’தி வுத்தா ந ஸா அஞ்ஞத்ர அவிஜ்ஜாதீ³ஹி விஸும் ஏகா அத்தி². அவிஜ்ஜாதீ³னம் பன பச்சயானம்யேவேதம் நாமம். உப்பன்னேபி ஹி ததா²க³தே அனுப்பன்னேபி அவிஜ்ஜாதோ ஸங்கா²ரா ஸம்ப⁴வந்தி, ஸங்கா²ராதீ³ஹி ச விஞ்ஞாணாதீ³னி, தஸ்மா ‘‘அவிஜ்ஜாபச்சயா ஸங்கா²ரா’’தி யா ஏதஸ்மிம் பதே³ ஸங்கா²ரத⁴ம்மானம் காரணட்டே²ன டி²ததாதி த⁴ம்மட்டி²ததா. தேஸம்யேவ ச த⁴ம்மானம் காரணட்டே²னேவ நியாமதாதி த⁴ம்மனியாமதாதி அவிஜ்ஜா வுச்சதி. ஸா ச அஸங்க²தா, நிப்³பா³னஞ்ச அஸங்க²தந்தி புச்ச²தி. பரவாதீ³ லத்³தி⁴வஸேன படிஜானித்வா புன த்³வே அஸங்க²தானீதி புட்டோ² ஸுத்தாபா⁴வேன படிக்கி²பித்வா லத்³தி⁴வஸேனேவ படிஜானாதி. ஸேஸபதே³ஸுபி ஏஸேவ நயோ. ஹேட்டா² வுத்தஸதி³ஸம் பன தத்த² வுத்தனயேனேவ வேதி³தப்³ப³ந்தி.

படிச்சஸமுப்பாத³கதா²வண்ணனா.