2. உபபத்திகதா²வண்ணனா

388. இதா³னி உபபத்திகதா² நாம ஹோதி. தத்த² யேஸம் ‘‘ஓபபாதிகோ ஹோதி தத்த²பரினிப்³பா³யீ’’திவசனானி (பு. ப. 35-40) அயோனிஸோ க³ஹேத்வா ஸுத்³தா⁴வாஸேஸு உபபத்தியா அரஹாதி லத்³தி⁴, ‘‘யேஸம் வா உபஹச்சபரினிப்³பா³யீ’’தி பத³ம் பரிவத்தித்வா ‘‘உபபஜ்ஜபரினிப்³பா³யீ’’தி பரியாபுணந்தானம் ஸஹ உபபத்தியா அரஹா ஹோதீதி லத்³தி⁴, ஸேய்யதா²பி ஏதரஹி உத்தராபத²கானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. தத்த² யஸ்மா உபபத்திசித்தம் நாம லோகியம், தேன ஸோதாபன்னாத³யோபி ந ஹோந்தி, பகே³வ அரஹா. தஸ்மாஸ்ஸ இமம் நயம் த³ஸ்ஸேதும் ஸஹ உபபத்தியா ஸோதாபன்னோதிஆதி³ ஆரத்³த⁴ம்.

389. ஸாரிபுத்தோதிஆதி³ இமேஸு மஹாதே²ரேஸு கோ ஏகோபி ஸஹ உபபத்தியா அரஹா நாமாதி சோத³னத்த²ம் வுத்தம்.

390. உபபத்தேஸியேனாதி படிஸந்தி⁴சித்தேன. தஞ்ஹி உபபத்திம் ஏஸதி க³வேஸதி, தஸ்மா உபபத்தேஸியந்தி வுச்சதி. ஸேஸமேத்த² உத்தானத்த²மேவாதி.

உபபத்திகதா²வண்ணனா.