2. து³தியவக்³கோ³

1. பரூபஹாரவண்ணனா

307. இதா³னி பரூபஹாரகதா² நாம ஹோதி. தத்த² யே அரஹத்தம் படிஜானந்தானம் அப்பத்தே பத்தஸஞ்ஞீனம் அதி⁴மானிகானம் குஹகானம் வா அரஹத்தம் படிஜானந்தானம் ஸுக்கவிஸ்ஸட்டி²ம் தி³ஸ்வா ‘‘மாரகாயிகா தே³வதா அரஹதோ அஸுசிம் உபஸம்ஹரந்தீ’’தி மஞ்ஞந்தி; ஸேய்யதா²பி ஏதரஹி புப்³ப³ஸேலியா ச அபரஸேலியா ச; தே ஸந்தா⁴ய அத்தி² அரஹதோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. இதா³னி யஸ்மா ஸுக்கவிஸ்ஸட்டி² நாம ராக³ஸமுட்டா²னா ஹோதி, தஸ்மா அத்தி² அரஹதோ ராகோ³தி அனுயோகோ³ ஆரத்³தோ⁴. ஸோ ஸப்³போ³பி உத்தானத்தோ²யேவ.

மாரகாயிகா தே³வதா அத்தனோதிஆதி³பஞ்ஹே யஸ்மா தாஸம் தே³வதானம் ஸுக்கவிஸ்ஸட்டி² நாம நத்தி², அஞ்ஞேஸம்பி ஸுக்கம் க³ஹேத்வா ந உபஸம்ஹரந்தி, அரஹதோ பன ஸுக்கமேவ நத்தி², தஸ்மா ந ஹேவந்தி படிக்கி²பதி.

நேவ அத்தனோதிபஞ்ஹே பன நிம்மினித்வா உபஸம்ஹரந்தீதி லத்³தி⁴யா படிஜானாதி. லோமகூபேஹீதிபஞ்ஹே ஸப்பிதேலானம் விய லோமகூபேஹி உபஸம்ஹரணாபா⁴வம் தி³ஸ்வா படிக்கி²பதி.

308. ஹந்த³ ஹீதி வசஸாயத்தே² நிபாதோ. ‘‘அரஹா நு கோ² அஹம், நோ’’தி ஏவம் விமதிம் கா³ஹயிஸ்ஸாமாதி ஏவம் வசஸாயம் கத்வா உபஸம்ஹரந்தீதி அத்தோ². அத்தி² அரஹதோ விமதீதி புட்டோ² அட்ட²வத்து²கம் விசிகிச்ச²ம் ஸந்தா⁴ய படிக்கி²பதி, து³தியம் புட்டோ² இத்தி²புரிஸானம் நாமகோ³த்தாதீ³ஸு ஸன்னிட்டா²னாபா⁴வம் ஸந்தா⁴ய படிஜானாதி.

309. அத்தி² தஸ்ஸ ஆஸயோதி தஸ்ஸ ஸுக்கஸ்ஸ உச்சாரபஸ்ஸாவானம் விய பதிட்டா²னோகாஸோ அத்தீ²தி புச்ச²தி.

312. ஸத⁴ம்மகுஸலஸ்ஸாதி அத்தனோ அரஹத்தத⁴ம்மமத்தேயேவ குஸலஸ்ஸ. பஞ்ஞாவிமுத்தம் ஸந்தா⁴யேவம் வத³தி. பரத⁴ம்மகுஸலஸ்ஸாதி ஸத⁴ம்மதோ பரஸ்மிம் அட்ட²ஸமாபத்தித⁴ம்மேபி குஸலஸ்ஸ. உப⁴தோபா⁴க³விமுத்தம் ஸந்தா⁴யேவம் வத³தி. ஸேஸமேத்த² பாளிஅனுஸாரேனேவ வேதி³தப்³ப³ந்தி.

பரூபஹாரகதா²வண்ணனா.

2-3-4. அஞ்ஞாணாதி³கதா²வண்ணனா

314. இதா³னி அஞ்ஞாணம், கங்கா², பரவிதரணாதி திஸ்ஸோ கதா² நாம ஹோந்தி. தத்த² யேஸம் ‘‘அரஹதோ இத்தி²புரிஸாதீ³னம் நாமகோ³த்தாதீ³ஸு ஞாணப்பவத்தியா அபா⁴வேன அத்தி² அஞ்ஞாணம், தத்தே²வ ஸன்னிட்டா²னாபா⁴வேன அத்தி² கங்கா². யஸ்மா ச நேஸம் தானி வத்தூ²னி பரே விதரந்தி பகாஸேந்தி ஆசிக்க²ந்தி, தஸ்மா நேஸம் அத்தி² பரவிதரணா’’தி இமா லத்³தி⁴யோ, ஸேய்யதா²பி ஏதரஹி புப்³ப³ஸேலியாதீ³னம்; தேஸம் தா லத்³தி⁴யோ பி⁴ந்தி³தும் தீஸுபி கதா²ஸு புச்சா² ஸகவாதி³ஸ்ஸ, படிஞ்ஞா ச படிக்கே²போ ச இதரஸ்ஸ. தத்த² ஸப்³பே³ஸுபி பஞ்ஹேஸு சேவ விஸ்ஸஜ்ஜனேஸு ச பாளிம் அனுக³ந்த்வாவ அத்தோ² வேதி³தப்³போ³தி.

அஞ்ஞாணாதி³கதா²வண்ணனா.

5. வசீபே⁴த³கதா²வண்ணனா

326. இதா³னி வசீபே⁴த³கதா² நாம ஹோதி. தத்த² யேஸம் ‘‘ஸோதாபத்திமக்³க³க்க²ணே பட²மம் ஜா²னம் ஸமாபன்னஸ்ஸ து³க்க²ந்தி வாசா பி⁴ஜ்ஜதீ’’தி லத்³தி⁴, ஸேய்யதா²பி ஏதரஹி புப்³ப³ஸேலியாதீ³னம்; தே ஸந்தா⁴ய ஸமாபன்னஸ்ஸ அத்தி² வசீபே⁴தோ³தி புச்சா² ஸகவாதி³ஸ்ஸ, லத்³தி⁴யம் ட²த்வா படிஞ்ஞா பரவாதி³ஸ்ஸ. புன ஸப்³ப³த்தா²தி தயோ ப⁴வே ஸந்தா⁴ய புட்டோ² அரூபம் ஸந்தா⁴ய படிக்கி²பதி. ஸப்³ப³தா³தி காலவஸேன புட்டோ² பட²மமக்³க³க்க²ணே பட²மஜ்ஜா²னிகஸமாபத்திதோ அஞ்ஞம் ஸப்³ப³ம் ஸமாபத்திகாலம் ஸந்தா⁴ய படிக்கி²பதி. ஸப்³பே³ஸம் ஸமாபன்னானந்தி புட்டோ² லோகியஸமாபத்தியோ ஸமாபன்னே ஸந்தா⁴ய படிக்கி²பதி. ஸப்³ப³ஸமாபத்தீஸூதி புட்டோ² து³தியஜ்ஜா²னாதி³கம் லோகுத்தரம் ஸப்³ப³ஞ்ச லோகியஸமாபத்திம் ஸந்தா⁴ய படிக்கி²பதி.

காயபே⁴தோ³தி அபி⁴க்கமாதி³வஸேன பவத்தகாயவிஞ்ஞத்தி. இத³ம் ‘‘யானி சித்தானி வசீவிஞ்ஞத்திம் ஸமுட்டா²பேந்தி, தானேவ காயவிஞ்ஞத்திம். ஏவம் ஸந்தே கஸ்மா காயபே⁴தோ³பி ந ஹோதீ’’தி சோத³னத்த²ம் புச்ச²தி. இதரோ லத்³தி⁴வஸேன படிக்கி²பதி சேவ படிஜானாதி ச. இதா³னி யதி³ ஸோ மக்³க³க்க²ணே ‘‘து³க்க²’’ந்தி வாசம் பா⁴ஸதி, ‘‘ஸமுத³யோ’’திஆதி³கம்பி பா⁴ஸேய்ய. யதி³ வா தம் ந பா⁴ஸதி, இதரம்பி ந பா⁴ஸேய்யாதி சோத³னத்த²ம் து³க்க²ந்தி ஜானந்தோதிஆத³யோ பஞ்ஹா வுத்தா. இதரோ பன அத்தனோ லத்³தி⁴வஸேனேவ படிஜானாதி சேவ படிக்கி²பதி ச. லோகுத்தரம் பட²மஜ்ஜா²னம் ஸமாபன்னோ து³க்க²து³க்க²ந்தி விபஸ்ஸதீதி ஹிஸ்ஸ லத்³தி⁴.

328. ஞாணந்தி லோகுத்தரம் சதுஸச்சஞாணம். ஸோதந்தி ஸோதவிஞ்ஞாணம் அதி⁴ப்பேதம், யேன தம் ஸத்³த³ம் ஸுணாதி. த்³வின்னம் ப²ஸ்ஸானந்தி ஸோதஸம்ப²ஸ்ஸமனோஸம்ப²ஸ்ஸானம்.

329. நோ வத ரே வத்தப்³பே³தி யதி³ அவிஸேஸேன யம்கிஞ்சி ஸமாபன்னஸ்ஸ நத்தி² வசீபே⁴தோ³, ந அவிஸேஸேன வத்தப்³ப³ம் ‘‘ஸமாபன்னஸ்ஸ அத்தி² வசீபே⁴தோ³’’தி. ஸேஸமேத்த² உத்தானத்த²மேவ ஸத்³தி⁴ம் ஸுத்தஸாத⁴னாய. யம் பனேதேன ‘‘ஸிகி²ஸ்ஸ ஆனந்த³, ப⁴க³வதோ’’தி பரியோஸானே ஸுத்தம் ஆப⁴தம், தத்த² யேன ஸமாபத்திசித்தேன ஸோ வசீபே⁴தோ³ ஸமுட்டி²தோ, காயபே⁴தோ³பி தேன ஸமுட்டா²தியேவ, ந ச தம் லோகுத்தரம் பட²மஜ்ஜா²னசித்தம், தஸ்மா அஸாத⁴கந்தி.

வசீபே⁴த³கதா²வண்ணனா.

6. து³க்கா²ஹாரகதா²வண்ணனா

334. இதா³னி து³க்கா²ஹாரகதா² நாம ஹோதி. தத்த² ‘‘து³க்க²ம் து³க்க²ந்தி வாசம் பா⁴ஸந்தோ து³க்கே² ஞாணம் ஆஹரதி, தம் து³க்கா²ஹாரோ நாம வுச்சதி. தஞ்ச பனேதம் மக்³க³ங்க³ம் மக்³க³பரியாபன்ன’’ந்தி யேஸம் லத்³தி⁴, ஸேய்யதா²பி ஏதரஹி புப்³ப³ஸேலியானம்; தே ஸந்தா⁴ய து³க்கா²ஹாரோதி புச்சா² ஸகவாதி³ஸ்ஸ, படிஞ்ஞா பரவாதி³ஸ்ஸ. யே கேசீதி பட²மபஞ்ஹே அவிபஸ்ஸகே ஸந்தா⁴ய படிக்கி²பதி, து³தியபஞ்ஹே விபஸ்ஸகே ஸந்தா⁴ய படிஜானாதி, தம் பனஸ்ஸ லத்³தி⁴மத்தமேவ. தஸ்மா ‘‘ஸப்³பே³ தே’’தி வாத³ஸ்ஸ பி⁴ந்த³னத்த²ம் பா³லபுது²ஜ்ஜனாதிஆதி³மாஹ. தம் உத்தானத்த²மேவாதி.

து³க்கா²ஹாரகதா²வண்ணனா.

7. சித்தட்டி²திகதா²வண்ணனா

335. இதா³னி சித்தட்டி²திகதா² நாம ஹோதி. தத்த² யேஸம் ஸமாபத்திசித்தஞ்சேவ ப⁴வங்க³சித்தஞ்ச அனுப்பப³ந்தே⁴ன பவத்தமானம் தி³ஸ்வா ‘‘ஏகமேவ சித்தம் சிரம் திட்ட²தீ’’தி லத்³தி⁴ ஸேய்யதா²பி ஏதரஹி ஹேட்டா² வுத்தப்பபே⁴தா³னம் அந்த⁴கானம், தம்லத்³தி⁴விஸோத⁴னத்த²ம் ஏகம், சித்தம் தி³வஸம் திட்ட²தீதி புச்சா² ஸகவாதி³ஸ்ஸ, படிஞ்ஞா பரவாதி³ஸ்ஸ. உபட்³ட⁴தி³வஸோ உப்பாத³க்க²ணோதி ஏத்த² டி²திக்க²ணம் அனாமஸித்வா ‘‘அனிச்சா வத ஸங்கா²ரா, உப்பாத³வயத⁴ம்மினோ’’தி (ஸம். நி. 1.186; 2.143) தே³ஸனானயேன உப்பாத³வயவஸேனேவ புச்சா² கதா.

தே த⁴ம்மா சித்தேன லஹுபரிவத்தாதி புட்டோ² சித்ததோ லஹுதரபரிவத்தினோ த⁴ம்மே அபஸ்ஸந்தோ படிக்கி²பதி. து³தியம் புட்டோ² யஸ்ஸ சித்தஸ்ஸ தீ³க⁴ட்டி²திம் இச்ச²தி, தம் ஸந்தா⁴ய படிஜானாதி. யாவதாயுகம் திட்ட²தீதி பஞ்ஹே ‘‘சுல்லாஸீதிஸஹஸ்ஸானி, கப்பா திட்ட²ந்தி யே மரூ’’திஆதி³வசனவஸேன (மஹானி. 10) ஆருப்பதோ அஞ்ஞத்ர படிக்கி²பதி, ஆருப்பே படிஜானாதி. முஹுத்தம் முஹுத்தம் உப்பஜ்ஜதீதி பஞ்ஹே பரவாதி³ஸ்ஸ ‘‘உப்பாத³வயத⁴ம்மினோ’’திஆதி³ஸுத்தவிரோத⁴ப⁴யேன படிஜானாதி. டி²திம் பனஸ்ஸ லத்³தி⁴வஸேன இச்ச²தி. ஸேஸமேத்த² உத்தானத்த²மேவாதி.

சித்தட்டி²திகதா²வண்ணனா.

8. குக்குளகதா²வண்ணனா

338. இதா³னி குக்குளகதா² நாம ஹோதி. தத்த² யேஸம் ‘‘ஸப்³ப³ம், பி⁴க்க²வே, ஆதி³த்தம் (ஸம். நி. 4.28; மஹாவ. 54) ஸப்³பே³ ஸங்கா²ரா து³க்கா²’’திஆதீ³னி (த⁴. ப. 278) ஸுத்தானி அயோனிஸோ க³ஹேத்வா ‘‘நிப்பரியாயேனேவ ஸப்³பே³ ஸங்கா²ரா குக்குளா வீதச்சிதங்கா³ரஸம்மிஸ்ஸா சா²ரிகனிரயஸதி³ஸா’’தி லத்³தி⁴, ஸேய்யதா²பி ஏதரஹி கோ³குலிகானம்; தேஸம் நானப்பகாரஸுக²ஸந்த³ஸ்ஸனேன தம் லத்³தி⁴ம் விவேசேதும் புச்சா² ஸகவாதி³ஸ்ஸ, படிஞ்ஞா பரவாதி³ஸ்ஸ. தத்த² அனோதி⁴ம் கத்வாதி ஓதி⁴ம் மரியாத³ம் கோட்டா²ஸம் அகரித்வா, அவிஸேஸேன ஸப்³பே³யேவாதி அத்தோ². ஸேஸம் ஸப்³ப³ம் பாளினயேனேவ வேதி³தப்³ப³ம் ஸத்³தி⁴ம் ஸுத்தஸாத⁴னாயாதி.

குக்குளகதா²வண்ணனா.

9. அனுபுப்³பா³பி⁴ஸமயகதா²வண்ணனா

339. இதா³னி அனுபுப்³பா³பி⁴ஸமயகதா² நாம ஹோதி. தத்த² யேஸம் –

‘‘அனுபுப்³பே³ன மேதா⁴வீ, தோ²கம் தோ²கம் க²ணே க²ணே;

கம்மாரோ ரஜதஸ்ஸேவ, நித்³த⁴மே மலமத்தனோ’’தி. (த⁴. ப. 239) –

ஆதீ³னி ஸுத்தானி அயோனிஸோ க³ஹேத்வா ‘‘ஸோதாபத்திப²லஸச்சி²கிரியாய படிபன்னோ ஏகச்சே கிலேஸே து³க்க²த³ஸ்ஸனேன பஜஹதி, ஏகச்சே ஸமுத³யனிரோத⁴மக்³க³த³ஸ்ஸனேன, ததா² ஸேஸாபீதி ஏவம் ஸோளஸஹி கோட்டா²ஸேஹி அனுபுப்³பே³ன கிலேஸப்பஹானம் கத்வா அரஹத்தபடிலாபோ⁴ ஹோதீ’’தி ஏவரூபா நானாபி⁴ஸமயலத்³தி⁴ உப்பன்னா, ஸேய்யதா²பி ஏதரஹி அந்த⁴கஸப்³ப³த்தி²கஸம்மிதியப⁴த்³ரயானிகானம்; தேஸம் லத்³தி⁴விவேசனத்த²ம் அனுபுப்³பா³பி⁴ஸமயோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அனுபுப்³பே³ன ஸோதாபத்திமக்³க³ந்தி புட்டோ² பன ஏகஸ்ஸ மக்³க³ஸ்ஸ ப³ஹுபா⁴வாபத்திப⁴யேன படிக்கி²பதி. து³தியம் புட்டோ² து³க்க²த³ஸ்ஸனாதி³வஸேன படிஜானாதி. தானி வா சத்தாரிபி ஞாணானி ஏகோ ஸோதாபத்திமக்³கோ³யேவாதி படிஜானாதி, ப²லம் பன ஏகமேவ இச்ச²தி, தஸ்மா படிக்கி²பதி. ஸகதா³கா³மிமக்³கா³தீ³ஸுபி ஏஸேவ நயோ.

344. மக்³கே³ தி³ட்டே² ப²லே டி²தோதி பஞ்ஹே யஸ்மா து³க்க²த³ஸ்ஸனாதீ³ஹி த³ஸ்ஸனம் அபரினிட்டி²தம், மக்³க³த³ஸ்ஸனேன பரினிட்டி²தம் நாம ஹோதி, ததா³ ஸோ ப²லே டி²தோதி ஸங்க²ம் க³ச்ச²தி, தஸ்மா படிஜானாதி.

345. து³க்கே² தி³ட்டே² சத்தாரி ஸச்சானீதி புச்சா² பரவாதி³ஸ்ஸ, ஏகாபி⁴ஸமயவஸேன படிஞ்ஞா ஸகவாதி³ஸ்ஸ. புன து³க்க²ஸச்சம் சத்தாரி ஸச்சானீதி அனுயோகே³ சதுன்னம்பி நானாஸபா⁴வத்தா படிக்கே²போ தஸ்ஸேவ.

ரூபக்க²ந்தே⁴ அனிச்சதோ தி³ட்டே²தி புச்சா² ஸகவாதி³ஸ்ஸ, ஸமுத்³த³தோ ஏகபி³ந்து³ஸ்ஸ ரஸே படிவித்³தே⁴ ஸேஸஉத³கஸ்ஸ படிவேதோ⁴ விய ஏகத⁴ம்மே அனிச்சாதி³தோ படிவித்³தே⁴ ஸப்³பே³பி படிவித்³தா⁴ ஹோந்தீதி லத்³தி⁴யா படிஞ்ஞா பரவாதி³ஸ்ஸ.

சதூஹி ஞாணேஹீதி து³க்கே² ஞாணாதீ³ஹி. அட்ட²ஹி ஞாணேஹீதி ஸாவகானம் ஸாதா⁴ரணேஹி ஸச்சஞாணேஹி சேவ படிஸம்பி⁴தா³ஞாணேஹி ச. த்³வாத³ஸஹி ஞாணேஹீதி த்³வாத³ஸங்க³படிச்சஸமுப்பாத³ஞாணேஹி. சதுசத்தாரீஸாய ஞாணேஹீதி ‘‘ஜராமரணே ஞாணம், ஜராமரணஸமுத³யே ஞாண’’ந்தி ஏவம் நிதா³னவக்³கே³ வுத்தஞாணேஹி. ஸத்தஸத்ததியா ஞாணேஹீதி ‘‘ஜராமரணம், பி⁴க்க²வே, அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்ம’’ந்தி (ஸம். நி. 2.20) ஏவம் தத்தே²வ வுத்தஞாணேஹி. ஸேஸமேத்த² பாளினயேனேவ வேதி³தப்³ப³ம் ஸத்³தி⁴ம் ஸுத்தஸாத⁴னேனாதி.

அனுபுப்³பா³பி⁴ஸமயகதா²வண்ணனா.

10. வோஹாரகதா²வண்ணனா

347. இதா³னி வோஹாரகதா² நாம ஹோதி. தத்த² பு³த்³தோ⁴ ப⁴க³வா லோகுத்தரேன வோஹாரேன வோஹரதீதி யேஸம் லத்³தி⁴, ஸேய்யதா²பி ஏதரஹி அந்த⁴கானம்; தே ஸந்தா⁴ய புச்சா² ஸகவாதி³ஸ்ஸ, லத்³தி⁴வஸேன படிஞ்ஞா பரவாதி³ஸ்ஸ. லோகுத்தரே ஸோதேதிஆதீ³னி தஸ்ஸ அயுத்தவாதீ³பா⁴வதீ³பனத்த²ம் வுத்தானி. அயஞ்ஹேத்த² அதி⁴ப்பாயோ – ‘‘ஸத்³தா³யதனமேவ தே லோகுத்தரம், உதா³ஹு ஸோதாதீ³னிபீ’’தி.

ஹஞ்சி பு³த்³த⁴ஸ்ஸ ப⁴க³வதோ வோஹாரோ லோகியே ஸோதே படிஹஞ்ஞதீதி ஏத்த² யதி³ ஸோ லோகுத்தரே படிஹஞ்ஞேய்ய. லோகுத்தரோ ஸியாதி ஏவமத்தோ² ந க³ஹேதப்³போ³. லோகியே படிஹஞ்ஞமானஸ்ஸ பன லோகுத்தரதா நாம நத்தீ²தி அயமேத்தா²தி⁴ப்பாயோ. லோகியேன விஞ்ஞாணேனாதி ஏத்தா²பி லோகியேனேவாதி அத்தோ². இதரதா² அனேகந்ததா ஸியா. லோகுத்தரஞ்ஹி லோகியேனபி ஞாணேன ஞாயதீ. ஏவம் ஸப்³ப³ம் யதா²னுரூபதோ வேதி³தப்³ப³ம். ஸப்³பே³ தே மக்³க³ம் பா⁴வேந்தீதி பஞ்ஹேஸு யே மக்³க³ம் நப்படிலப⁴ந்தி, தே ஸந்தா⁴ய படிக்கி²பதி. யே படிலப⁴ந்தி, தே ஸந்தா⁴ய படிஜானாதி.

351. ஸோவண்ணமயாயாதி ஸுவண்ணமயாய. இத³ம் பரவாதி³ஸ்ஸ உதா³ஹரணம்.

ஏளண்டி³யாயாதி ஏளண்ட³மயாய. இத³ம் ஸகவாதி³ஸ்ஸ உதா³ஹரணம். லோகியம் வோஹரந்தஸ்ஸ லோகியோதி அயம்பி ஏகா லத்³தி⁴. ஸா ஏதரஹி ஏகச்சானம் அந்த⁴கானம் லத்³தி⁴. ஸேஸமேத்த² உத்தானத்த²மேவாதி.

வோஹாரகதா²வண்ணனா.

11. நிரோத⁴கதா²வண்ணனா

353. இதா³னி நிரோத⁴கதா² நாம ஹோதி. தத்த² யேஸம் அப்படிஸங்கா²னிரோத⁴ஞ்ச படிஸங்கா²னிரோத⁴ஞ்ச த்³வேபி ஏகதோ கத்வா நிரோத⁴ஸச்சந்தி லத்³தி⁴, ஸேய்யதா²பி ஏதரஹி மஹிஸாஸகானஞ்சேவ அந்த⁴கானஞ்ச; தே ஸந்தா⁴ய த்³வே நிரோதா⁴தி புச்சா² ஸகவாதி³ஸ்ஸ, படிஞ்ஞா பரவாதி³ஸ்ஸ. த்³வே து³க்க²னிரோதா⁴தி பஞ்ஹேஸு யஸ்மா த்³வே து³க்க²ஸச்சானி ந இச்ச²தி, தஸ்மா படிக்கி²பதி. யஸ்மா த்³வீஹாகாரேஹி து³க்க²ம் நிருஜ்ஜ²தீதி இச்ச²தி, தஸ்மா படிஜானாதி. த்³வே நிரோத⁴ஸச்சானீதிபஞ்ஹேஸு த்³வின்னம் து³க்க²ஸச்சானம் நிரோத⁴வஸேனஅனிச்ச²ந்தோ படிக்கி²பதி. த்³வீஹாகாரேஹி து³க்க²ஸ்ஸ நிருஜ்ஜ²னதோ படிஜானாதி. த்³வே தாணானீதிஆதீ³ஸுபி ஏஸேவ நயோ.

அத்தி² த்³வின்னம் நிப்³பா³னானந்திஆதீ³ஸு புச்சா²ஸு உச்சனீசதாதீ³னி அபஸ்ஸந்தோ படிக்கி²பதி.

அப்படிஸங்கா²னிருத்³தே⁴தி யே படிஸங்கா²ய லோகுத்தரேன ஞாணேன அனிருத்³தா⁴ ஸுத்³த⁴பகதிகத்தா வா உத்³தே³ஸபரிபுச்சா²தீ³னம் வா வஸேன ந ஸமுதா³சரணதோ நிருத்³தா⁴தி வுச்சந்தி, தே ஸங்கா²ரே. படிஸங்கா² நிரோதே⁴ந்தீதி. லோகுத்தரஞாணேன நிரோதே⁴ந்தி அனுப்பத்திபா⁴வம் க³மேந்தி. நனு அப்படிஸங்கா²னிருத்³தா⁴ ஸங்கா²ராதி புச்சா² பரவாதி³ஸ்ஸ. தத்த² ப⁴க்³கா³னம் புன அப⁴ஞ்ஜனதோ அப்படிஸங்கா²னிருத்³தா⁴னம் வா அரியமக்³கே³ உப்பன்னே ததா² நிருஜ்ஜ²னதோவ ஸகவாதீ³ அச்சந்தப⁴க்³க³தம் படிஜானாதி. ஸேஸமேத்த² உத்தானத்த²மேவாதி.

நிரோத⁴கதா²வண்ணனா.

து³தியோ வக்³கோ³.