9. ஹேவத்தி²கதா²வண்ணனா

304. இதா³னி ஹேவத்தி²கதா² நாம ஹோதி. தத்த² யேஸம் ‘‘ஸப்³பே³பி அதீதாதி³பே⁴தா³ த⁴ம்மா ரூபாதி³வஸேன அத்தி², அதீதம் அனாக³தபச்சுப்பன்னவஸேன, அனாக³தபச்சுப்பன்னானி வா அதீதாதி³வஸேன நத்தி²; தஸ்மா ஸப்³ப³மேவித³ம் ஏவம் அத்தி² ஏவம் நத்தீ²’’தி லத்³தி⁴, ஸேய்யதா²பி ஏதரஹி வுத்தப்பபே⁴தா³னம் அந்த⁴கானம்; தே ஸந்தா⁴ய அதீதம் அத்தீ²தி புச்சா² ஸகவாதி³ஸ்ஸ. ஹேவத்தி² ஹேவ நத்தீ²தி விஸ்ஸஜ்ஜனம் பரவாதி³ஸ்ஸ. தத்த² ஹேவாதி ஏவம். அத² நம் ஸகவாதீ³ ‘‘யதி³ அதீதோவ ஏவம் அத்தி², ஏவம் நத்தீ²தி லத்³தி⁴, ஏவம் ஸந்தே ஸோயேவ அத்தி², ஸோயேவ நத்தி² நாமா’’தி புச்ச²ந்தோ ஸேவத்தி², ஸேவ நத்தீ²தி ஆஹ. இதரோ தேனேவ ஸபா⁴வேன அத்தி²தம், தேனேவ நத்தி²தம் ஸந்தா⁴ய படிக்கி²பதி. து³தியம் புட்டோ² ஸகபா⁴வேனேவ அத்தி²தம், பரபா⁴வேனேவ நத்தி²தம் ஸந்தா⁴ய படிஜானாதி. ததோ பரம் அத்த²ட்டோ² நத்த²ட்டோ²தி அத்தி²ஸபா⁴வோ நத்தி²ஸபா⁴வோ நாம ஹோதீதி புச்ச²தி. இமினாவுபாயேன ஸப்³ப³வாரேஸு அத்தோ² வேதி³தப்³போ³. பரியோஸானே பன ‘‘தேன ஹி அதீதம் ஹேவத்தி², ஹேவ நத்தீ²’’தி ச ‘‘தேன ஹி ரூபம் ஹேவத்தி², ஹேவ நத்தீ²’’தி சாதிஆதீ³னி வத்வா கிஞ்சாபி பரவாதி³னா லத்³தி⁴ பதிட்டா²பிதா, அயோனிஸோ பதிட்டா²பிதத்தா பனேஸா அப்பதிட்டா²பிதாயேவாதி.

ஹேவத்தி²கதா²வண்ணனா.

மஹாவக்³கோ³ நிட்டி²தோ.