8. ஸதிபட்டா²னகதா²வண்ணனா

301. இதா³னி ஸதிபட்டா²னகதா² ஹோதி. ‘‘தத்த² – சதுன்னம், பி⁴க்க²வே, ஸதிபட்டா²னானம் ஸமுத³யஞ்ச அத்த²ங்க³மஞ்ச தே³ஸேஸ்ஸாமீ’’தி (ஸம். நி. 5.408) ஸதிபட்டா²னஸம்யுத்தே வுத்தனயேனேவ யேஸம் காயாத³யோ ஸதியா ஆரம்மணத⁴ம்மே க³ஹேத்வா ‘‘ஸப்³பே³ த⁴ம்மா ஸதிபட்டா²னா’’தி லத்³தி⁴, ஸேய்யதா²பி ஏதரஹி அந்த⁴கானம். அந்த⁴கா நாம புப்³ப³ஸேலியா, அபரஸேலியா, ராஜகி³ரியா, ஸித்³த⁴த்தி²காதி இமே பச்சா² உப்பன்னனிகாயா. தேஸம் லத்³தி⁴விவேசனத்த²ம் புச்சா² ஸகவாதி³ஸ்ஸ, படிஞ்ஞா பரவாதி³ஸ்ஸ. தத்த² யஸ்மா ‘‘பதிட்டா²தி ஏதேஸூதி பட்டா²னா. கா பதிட்டா²தி? ஸதி. ஸதியா பட்டா²னா ஸதிபட்டா²னா’’தி இமினா அத்தே²ன ஸதிகோ³சராபி ஸதிபட்டா²னா. ‘‘பதிட்ட²ஹந்தீதி பட்டா²னா. கா பதிட்ட²ஹந்தி? ஸதியோ. ஸதியோவ பட்டா²னா ஸதிபட்டா²னா’’தி இமினா அத்தே²ன ஸதியோவ ஸதிபட்டா²னா. தஸ்மா த்³வேபி வாதா³ பரியாயேன யுஜ்ஜந்தி. யே பன தம் பரியாயம் பஹாய ஏகந்தேனேவ ‘‘ஸப்³பே³ த⁴ம்மா ஸதிபட்டா²னா’’தி வத³ந்தி, தே ஸந்தா⁴ய புச்சா² ஸகவாதி³ஸ்ஸ, ஆரம்மணவஸேன படிஞ்ஞா பரவாதி³ஸ்ஸ. ஸப்³பே³ த⁴ம்மா ஸதீதி அனுயுத்தஸ்ஸ பன ஸப்³பே³ஸம் ஸதிஸபா⁴வாபா⁴வதோ படிக்கே²போ தஸ்ஸேவ. தத்த² க²யகா³மீதிஆதீ³னி மக்³க³விஸேஸனானி. ஏகாயனமக்³கோ³ ஹி கிலேஸானம் க²யபூ⁴தம் நிப்³பா³னம் க³ச்ச²தீதி க²யகா³மீ. சத்தாரி ஸச்சானி பு³ஜ்ஜ²ந்தோ க³ச்ச²தீதி போ³த⁴கா³மீ. வட்டம் அபசினந்தோ க³ச்ச²தீதி அபசயகா³மீ. ஏவமேதேஹி பதே³ஹி ‘‘கிம் தே ஸப்³பே³ த⁴ம்மா ஏவரூபோ தே ஏகாயனோ மக்³கோ³ ஹோதீ’’தி புச்ச²தி. அனாஸவா அஸம்யோஜனியாதிஆதீ³னிபி லோகுத்தரபா⁴வம் புச்ச²னத்தா²ய வுத்தானி. பு³த்³தா⁴னுஸ்ஸதீதிஆதீ³னி பபே⁴த³புச்சா²வஸேன வுத்தானி.

சக்கா²யதனம் ஸதிபட்டா²னந்திஆதி³ ஸப்³ப³த⁴ம்மானம் பபே⁴த³புச்சா²வஸேன வுத்தம். தத்தா²பி ஸதிவஸேன படிக்கே²போ, ஆரம்மணவஸேன படிஞ்ஞாதி. ஏவம் ஸப்³ப³பஞ்ஹேஸு அத்தோ² வேதி³தப்³போ³. ஸுத்தஸாத⁴னா உத்தானத்தா²யேவாதி.

ஸதிபட்டா²னகதா²வண்ணனா நிட்டி²தா.