4. சதுக்கனித்³தே³ஸவண்ணனா

132. சதுக்கனித்³தே³ஸே – அஸப்புரிஸோதி லாமகபுரிஸோ. பாணம் அதிபாதேதீதி பாணாதிபாதீ. அதி³ன்னம் ஆதி³யதீதி அதி³ன்னாதா³யீ. காமேஸு மிச்சா² சரதீதி காமேஸுமிச்சா²சாரீ. முஸா வத³தீதி முஸாவாதீ³. ஸுராமேரயமஜ்ஜபமாதே³ திட்ட²தீதி ஸுராமேரயமஜ்ஜபமாத³ட்டா²யீ.

133. பாணாதிபாதே ஸமாத³பேதீதி யதா² பாணம் அதிபாதேதி, ததா² நம் தத்த² க³ஹணம் க³ண்ஹாபேதி. ஸேஸேஸுபி ஏஸேவ நயோ. அயம் வுச்சதீதி அயம் ஏவரூபோ புக்³க³லோ யஸ்மா ஸயம் கதேன ச து³ஸ்ஸீல்யேன ஸமன்னாக³தோ யஞ்ச ஸமாத³பிதேன கதம், ததோ உபட்³ட⁴ஸ்ஸ தா³யாதோ³, தஸ்மா அஸப்புரிஸேன அஸப்புரிஸதரோதி வுச்சதி. ஸப்புரிஸோதி உத்தமபுரிஸோ.

135. ஸப்புரிஸேன ஸப்புரிஸதரோதி அத்தனா கதேன ஸுஸீல்யேன ஸமன்னாக³தத்தா யஞ்ச ஸமாத³பிதோ கரோதி. ததோ உபட்³ட⁴ஸ்ஸ தா³யாத³த்தா உத்தமபுரிஸேன உத்தமபுரிஸதரோ.

136. பாபோதி அகுஸலகம்மபத²ஸங்கா²தேன த³ஸவிதே⁴ன பாபேன ஸமன்னாக³தோ.

138. கல்யாணோதி குஸலகம்மபத²ஸங்கா²தேன த³ஸவிதே⁴ன கல்யாணத⁴ம்மேன ஸமன்னாக³தோ ஸுத்³த⁴கோ ப⁴த்³ரகோ. ஸேஸமேத்த² ஹேட்டா² வுத்தனயத்தா உத்தானத்த²மேவ.

140. பாபத⁴ம்மாதீ³ஸு – பாபோ த⁴ம்மோ அஸ்ஸாதி பாபத⁴ம்மோ. கல்யாணோ த⁴ம்மோ அஸ்ஸாதி கல்யாணத⁴ம்மோ. ஸேஸமேத்த² உத்தானத்த²மேவ.

144. ஸாவஜ்ஜாதீ³ஸு – ஸாவஜ்ஜோதி ஸதோ³ஸோ. ஸாவஜ்ஜேன காயகம்மேனாதி ஸதோ³ஸேன பாணாதிபாதாதி³னா காயகம்மேன. இதரேஸுபி ஏஸேவ நயோ. அயம் வுச்சதீதி அயம் ஏவரூபோ புக்³க³லோ தீஹி த்³வாரேஹி ஆயூஹனகம்மஸ்ஸ ஸதோ³ஸத்தா, கூ³த²குணபாதி³ப⁴ரிதோ பதே³ஸோ விய ஸாவஜ்ஜோதி வுச்சதி.

145. ஸாவஜ்ஜேன ப³ஹுலந்தி யஸ்ஸ ஸாவஜ்ஜமேவ காயகம்மம் ப³ஹு ஹோதி, அப்பம் அனவஜ்ஜம்; ஸோ ஸாவஜ்ஜேன ப³ஹுலம் காயகம்மேன ஸமன்னாக³தோ, அப்பம் அனவஜ்ஜேனாதி வுச்சதி. இதரேஸுபி ஏஸேவ நயோ. கோ பன ஏவரூபோ ஹோதீதி? யோ கா³மத⁴ம்மதாய வா நிக³மத⁴ம்மதாய வா கதா³சி கரஹசி உபோஸத²ம் ஸமாதி³யதி, ஸீலானி பூரேதி. அயம் வுச்சதீதி அயம் ஏவரூபோ புக்³க³லோ தீஹி த்³வாரேஹி ஆயூஹனகம்மேஸு ஸாவஜ்ஜஸ்ஸேவ ப³ஹுலதாய அனவஜ்ஜஸ்ஸ அப்பதாய வஜ்ஜப³ஹுலோதி வுச்சதி.

யதா² ஹி ஏகஸ்மிம் பதே³ஸே து³ப்³ப³ண்ணானி து³க்³க³ந்தா⁴னி புப்பா²னி ராஸிகதானஸ்ஸு, தேஸம் உபரி தஹம் தஹம் அதிமுத்தகவஸ்ஸிகபாடலானி பதிதானி ப⁴வேய்யும். ஏவரூபோ அயம் புக்³க³லோ வேதி³தப்³போ³. யதா² பன ஏகஸ்மிம் பதே³ஸே அதிமுத்தகவஸ்ஸிகபாடலானி ராஸிகதானஸ்ஸு, தேஸம் உபரி தஹம் தஹம் து³ப்³ப³ண்ணது³க்³க³ந்தா⁴னி ப³த³ரபுப்பா²தீ³னி பதிதானி ப⁴வேய்யும். ஏவரூபோ ததியோ புக்³க³லோ வேதி³தப்³போ³. சதுத்தோ² பன தீஹிபி த்³வாரேஹி ஆயூஹனகம்மஸ்ஸ நித்³தோ³ஸத்தா, சதுமது⁴ரப⁴ரிதஸுவண்ணபாதி விய த³ட்ட²ப்³போ³. தேஸு பட²மோ அந்த⁴பா³லபுது²ஜ்ஜனோ. து³தியோ அந்தரந்தரா குஸலஸ்ஸ காரகோ லோகியபுது²ஜ்ஜனோ. ததியோ ஸோதாபன்னோ ஸகதா³கா³மிஅனாகா³மினோபி ஏதேனேவ ஸங்க³ஹிதா. சதுத்தோ² கீ²ணாஸவோ. ஸோ ஹி ஏகந்தேன அனவஜ்ஜோயேவ. அயம் அங்கு³த்தரட்ட²கதா²யோ.

148. உக்³க⁴டிதஞ்ஞூஆதீ³ஸு – உக்³க⁴டிதஞ்ஞூதி ஏத்த² உக்³க⁴டிதம் நாம ஞாணுக்³கா⁴டனம், ஞாணே உக்³க⁴டிதமத்தேயேவ ஜானாதீதி அத்தோ². ஸஹ உதா³ஹடவேலாயாதி உதா³ஹாரே உதா³ஹடமத்தேயேவ. த⁴ம்மாபி⁴ஸமயோதி சதுஸச்சத⁴ம்மஸ்ஸ ஞாணேன ஸத்³தி⁴ம் அபி⁴ஸமயோ. அயம் வுச்சதீதி அயம் ‘சத்தாரோ ஸதிபட்டா²னா’திஆதி³னா நயேன ஸம்கி²த்தேன மாதிகாய ட²பியமானாய தே³ஸனானுஸாரேன ஞாணம் பேஸேத்வா அரஹத்தம் க³ண்ஹிதும் ஸமத்தோ² புக்³க³லோ உக்³க⁴டிதஞ்ஞூதி வுச்சதி.

149. விபஞ்சிதம் வித்தா²ரிதமேவ அத்த²ம் ஜானாதீதி விபஞ்சிதஞ்ஞூ. அயம் வுச்சதீதி அயம் ஸங்கி²த்தேன மாதிகம் ட²பேத்வா வித்தா²ரேன அத்தே² பா⁴ஜியமானே அரஹத்தம் பாபுணிதும் ஸமத்தோ² புக்³க³லோ விபஞ்சிதஞ்ஞூதி வுச்சதி.

150. உத்³தே³ஸாதீ³ஹி நேதப்³போ³தி நேய்யோ. அனுபுப்³பே³ன த⁴ம்மாபி⁴ஸமயோ ஹோதீதி அனுக்கமேன அரஹத்தப்பத்தி.

151. ப்³யஞ்ஜனபத³மேவ பரமம் அஸ்ஸாதி பத³பரமோ. ந தாய ஜாதியா த⁴ம்மாபி⁴ஸமயோ ஹோதீதி ந தேன அத்தபா⁴வேன ஜா²னம் வா விபஸ்ஸனம் வா மக்³க³ம் வா ப²லம் வா நிப்³ப³த்தேதும் ஸக்கோதீதி அத்தோ².

152. யுத்தபடிபா⁴னாதீ³ஸு – படிபா⁴னம் வுச்சதி ஞாணம்பி, ஞாணஸ்ஸ உபட்டி²தவசனம்பி. தம் இத⁴ அதி⁴ப்பேதம். அத்த²யுத்தம் காரணயுத்தஞ்ச படிபா⁴னமஸ்ஸாதி யுத்தப்படிபா⁴னோ. புச்சி²தானந்தரமேவ ஸீக⁴ம் ப்³யாகாதும் அஸமத்த²தாய நோ முத்தம் படிபா⁴னமஸ்ஸாதி நோ முத்தப்படிபா⁴னோ. இமினா நயேன ஸேஸா வேதி³தப்³பா³. ஏத்த² பன பட²மோ – கிஞ்சி காலம் வீமம்ஸித்வா யுத்தமேவ பேக்க²தி, திபிடகசூளனாக³த்தே²ரோ விய. ஸோ கிர பஞ்ஹம் புட்டோ² பரிக்³க³ஹேத்வா யுத்தபயுத்தகாரணமேவ கதே²தி.

து³தியோ – புச்சா²னந்தரமேவ யேன வா தேன வா வசனேன படிபா³ஹதி, வீமம்ஸித்வாபி ச யுத்தம் ந பேக்க²தி சதுனிகாயிகபண்டி³ததிஸ்ஸத்தே²ரோ விய. ஸோ கிர பஞ்ஹம் புட்டோ² பஞ்ஹபரியோஸானம்பி நாக³மேதி, யம் வா தம் வா கதே²தியேவ. வசனத்த²ம் பனஸ்ஸ வீமம்ஸியமானம் கத்த²சி ந லக்³க³தி.

ததியோ – புச்சா²ஸமகாலமேவ யுத்தம் பேக்க²தி, தங்க²ணஞ்ஞேவ வசனம் ப்³யாகரோதி திபிடகசூளாப⁴யத்தே²ரோ விய. ஸோ கிர பஞ்ஹம் புட்டோ² ஸீக⁴மேவ கதே²தி, யுத்தபயுத்தகாரணோ ச ஹோதி.

சதுத்தோ² – புட்டோ² ஸமானோ நேவ யுத்தம் பேக்க²தி, ந யேன வா தேன வா படிபா³ஹிதும் ஸக்கோதி திப்³ப³ந்த⁴காரனிமுக்³கோ³ விய ஹோதி லாளுதா³யித்தே²ரோ விய.

156. த⁴ம்மகதி²கேஸு – அப்பஞ்ச பா⁴ஸதீதி ஸம்பத்தபரிஸாய தோ²கமேவ கதே²தி. அஸஹிதஞ்சாதி கதே²ந்தோ ச பன ந அத்த²யுத்தம் காரணயுத்தம் கதே²தி. பரிஸா சஸ்ஸ ந குஸலா ஹோதீதி ஸோதும் நிஸின்னபரிஸா சஸ்ஸ யுத்தாயுத்தம் காரணாகாரணம் ஸிலிட்டா²ஸிலிட்ட²ம் ந ஜானாதீதி அத்தோ². ஏவரூபோதி அயம் ஏவம்ஜாதிகோ பா³லத⁴ம்மகதி²கோ. ஏவம்ஜாதிகாய பா³லபரிஸாய த⁴ம்மகதி²கோத்வேவ நாமம் லப⁴தி. இமினா நயேன ஸப்³ப³த்த² அத்தோ² வேதி³தப்³போ³. ஏத்த² ச த்³வேயேவ ஜனா ஸபா⁴வத⁴ம்மகதி²கா, இதரே பன த⁴ம்மகதி²கானம் அந்தரே பவிட்ட²த்தா ஏவம் வுத்தா.

157. வலாஹகூபமேஸு வலாஹகாதி மேகா⁴. க³ஜ்ஜிதாதி த²னிதா. தத்த² க³ஜ்ஜித்வா நோ வஸ்ஸனபா⁴வோ நாம பாபகோ. மனுஸ்ஸா ஹி யதா² தே³வோ க³ஜ்ஜதி ‘ஸுவுட்டி²கா ப⁴விஸ்ஸதீ’தி பீ³ஜானி நீஹரித்வா வபந்தி. அத² தே³வே அவஸ்ஸந்தே கே²த்தே பீ³ஜானி கே²த்தேயேவ நஸ்ஸந்தி, கே³ஹே பீ³ஜானி கே³ஹேயேவ நஸ்ஸந்தீதி து³ப்³பி⁴க்க²ம் ஹோதி. நோ க³ஜ்ஜித்வா வஸ்ஸனபா⁴வோபி பாபகோவ. மனுஸ்ஸா ஹி ‘இமஸ்மிம் காலே து³ப்³பு³ட்டி²கா ப⁴விஸ்ஸதீ’தி நின்னட்டா²னேஸுயேவ வப்பம் கரோந்தி. அத² தே³வோ வஸ்ஸித்வா ஸப்³ப³பீ³ஜானி மஹாஸமுத்³த³ம் பாபேதி, து³ப்³பி⁴க்க²மேவ ஹோதி. க³ஜ்ஜித்வா வஸ்ஸனபா⁴வோ பன ப⁴த்³த³கோ. ததா³ ஹி ஸுபி⁴க்க²ம் ஹோதி. நோ க³ஜ்ஜித்வா நோ வஸ்ஸனபா⁴வோ ஏகந்தபாபகோவ.

பா⁴ஸிதா ஹோதி நோ கத்தாதி ‘இதா³னி க³ந்த²து⁴ரம் பூரேஸ்ஸாமி, வாஸது⁴ரம் பூரேஸ்ஸாமீ’தி கதே²தியேவ, ந பன உத்³தே³ஸம் க³ண்ஹாதி, ந கம்மட்டா²னம் பா⁴வேதி.

கத்தா ஹோதி நோ பா⁴ஸிதாதி ‘க³ந்த²து⁴ரம் வா பூரேஸ்ஸாமி வாஸது⁴ரம் வா’தி ந பா⁴ஸதி. ஸம்பத்தே பன காலே தமத்த²ம் ஸம்பாதே³தி. இமினா நயேன இதரேபி வேதி³தப்³பா³. ஸப்³ப³ம் பனேதம் பச்சயதா³யகேனேவ கதி²தம். ஏகோ ஹி ‘அஸுகதி³வஸே நாம தா³னம் த³ஸ்ஸாமீ’தி ஸங்க⁴ம் நிமந்தேதி, ஸம்பத்தகாலே நோ கரோதி. அயம் புக்³க³லோ புஞ்ஞேன பரிஹாயதி, பி⁴க்கு²ஸங்கோ⁴பி லாபே⁴ன பரிஹாயதி. அபரோ ஸங்க⁴ம் அனிமந்தேத்வாவ ஸக்காரம் கத்வா ‘பி⁴க்கூ² ஆனேஸ்ஸாமீ’தி ந லப⁴தி, ஸப்³பே³ அஞ்ஞத்த² நிமந்திதா ஹோந்தி. அயம்பி புஞ்ஞேன பரிஹாயதி, ஸங்கோ⁴பி தேன லாபே⁴ன பரிஹாயதி. அபரோ பட²மம் ஸங்க⁴ம் நிமந்தேத்வா, பச்சா² ஸக்காரம் கத்வா தா³னம் தே³தி, அயம் கிச்சகாரீ ஹோதி. அபரோ நேவ ஸங்க⁴ம் நிமந்தேதி, ந தா³னம் தே³தி, அயம் ‘பாபபுக்³க³லோ’தி வேதி³தப்³போ³.

158. மூஸிகூபமேஸு – கா³த⁴ம் கத்தா நோ வஸிதாதி அத்தனோ ஆஸயம் பி³லம் கூபம் க²ணதி, நோ தத்த² வஸதி, கிஸ்மிஞ்சிதே³வ டா²னே வஸதி, ஏவம் பி³ளாராதி³அமித்தவஸம் க³ச்ச²தி. க²த்தாதிபி பாடோ². வஸிதா நோ கா³த⁴ம் கத்தாதி ஸயம் ந க²ணதி, பரேன க²தே பி³லே வஸதி, ஏவம் ஜீவிதம் ரக்க²தி. ததியா த்³வேபி கரோந்தீ, ஜீவிதம் ரக்க²தி. சதுத்தா² த்³வேபி அகரோந்தீ அமித்தவஸம் க³ச்ச²தி. இமாய பன உபமாய உபமிதேஸு புக்³க³லேஸு பட²மோ யதா² ஸா மூஸிகா கா³த⁴ம் க²ணதி, ஏவம் நவங்க³ம் ஸத்து²ஸாஸனம் உக்³க³ண்ஹாதி. யதா² பன ஸா தத்த² ந வஸதி, கிஸ்மிஞ்சிதே³வ டா²னே வஸந்தீ, அமித்தவஸம் க³ச்ச²தி; ததா² அயம்பி பரியத்திவஸேன ஞாணம் பேஸேத்வா சதுஸச்சத⁴ம்மம் ந படிவிஜ்ஜ²தி, லோகாமிஸட்டா²னேஸுயேவ சரந்தோ மச்சுமாரகிலேஸமாரதே³வபுத்தமாரஸங்கா²தானம் அமித்தானம் வஸம் க³ச்ச²தி. து³தியோ யதா² ஸா மூஸிகா கா³த⁴ம் ந க²ணதி, ஏவம் நவங்க³ம் ஸத்து²ஸாஸனம் ந உக்³க³ண்ஹாதி. யதா² பன பரேன க²தபி³லே வஸந்தீ ஜீவிதம் ரக்க²தி; ஏவம் பரஸ்ஸ கத²ம் ஸுத்வா சதுஸச்சத⁴ம்மம் படிவிஜ்ஜி²த்வா திண்ணம் மாரானம் வஸம் அதிக்கமதி. இமினா நயேன ததியசதுத்தே²ஸுபி ஓபம்மஸம்ஸந்த³னம் வேதி³தப்³ப³ம்.

159. அம்பூ³பமேஸு – ஆமம் பக்கவண்ணீதி அந்தோ ஆமம் ப³ஹி பக்கஸதி³ஸம். பக்கம் ஆமவண்ணீதி அந்தோ பக்கம் ப³ஹி ஆமஸதி³ஸம். ஸேஸத்³வயேஸுபி ஏஸேவ நயோ. தத்த² யதா² அம்பே³ அபக்கபா⁴வோ ஆமதா ஹோதி, ஏவம் புக்³க³லேபி புது²ஜ்ஜனபா⁴வோ ஆமதா, அரியபா⁴வோ பக்கதா. யதா² ச தத்த² பக்கஸதி³ஸதா பக்கவண்ணிதா; ஏவம் புக்³க³லேபி அரியானம் அபி⁴க்கமனாதி³ஸதி³ஸதா பக்கவண்ணிதாதி – இமினா நயேன உபமிதபுக்³க³லேஸு ஓபம்மஸம்ஸந்த³னம் வேதி³தப்³ப³ம்.

160. கும்பூ⁴பமேஸு – கும்போ⁴தி க⁴டோ. துச்சோ²தி அந்தோ ரித்தோ. பிஹிதோதி பித³ஹித்வா ட²பிதோ. புரோதி அந்தோ புண்ணோ. விவடோதி விவரித்வா ட²பிதோ. உபமிதபுக்³க³லேஸு பனேத்த² அந்தோ கு³ணஸாரவிரஹிதோ துச்சோ² பா³ஹிரஸோப⁴னதாய பிஹிதோ புக்³க³லோ வேதி³தப்³போ³. ஸேஸேஸுபி ஏஸேவ நயோ.

161. உத³கரஹதூ³பமேஸு – உத³கரஹதோ³ தாவ ஜண்ணுமத்தேபி உத³கே ஸதி பண்ணரஸஸம்பி⁴ன்னவண்ணத்தா வா ப³ஹலத்தா வா உத³கஸ்ஸ அபஞ்ஞாயமானதலோ உத்தானோ க³ம்பீ⁴ரோபா⁴ஸோ நாம ஹோதி. திபோரிஸ சதுபோரிஸேபி பன உத³கே ஸதி அச்ச²த்தா உத³கஸ்ஸ பஞ்ஞாயமானதலோ க³ம்பீ⁴ரோ உத்தானோபா⁴ஸோ நாம ஹோதி. உப⁴யகாரணஸம்பா⁴வதோ பன இதரே த்³வே வேதி³தப்³பா³. புக்³க³லோபி கிலேஸுஸ்ஸத³பா⁴வதோ கு³ணக³ம்பீ⁴ரதாய ச அபா⁴வதோ கு³ணக³ம்பீ⁴ரானம் ஸதி³ஸேஹி அபி⁴க்கமாதீ³ஹி யுத்தோ உத்தானோ க³ம்பீ⁴ரோபா⁴ஸோ நாம. இமினா நயேன ஸேஸாபி வேதி³தப்³பா³.

162. ப³லீப³த்³தூ³பமேஸு – ப³லீப³த்³தோ³ தாவ யோ அத்தனோ கோ³க³ணம் க⁴ட்டேதி உப்³பே³ஜேதி, பரகோ³க³ணே பன ஸோரதோ ஸுக²ஸீலோ ஹோதி – அயம் ஸகக³வசண்டோ³ நோ பரக³வசண்டோ³ நாம. புக்³க³லோபி அத்தனோ பரிஸம் க⁴ட்டேந்தோ விஜ்ஜ²ந்தோ ப²ருஸேன ஸமுதா³சரந்தோ, பரபரிஸாய பன ஸோரச்சம் நிவாதவுத்திதம் ஆபஜ்ஜந்தோ ஸகக³வசண்டோ³ ஹோதி நோ பரக³வசண்டோ³ நாமாதி. இமினா நயேன ஸேஸாபி வேதி³தப்³பா³. நித்³தே³ஸவாரே பனேத்த² உப்³பே³ஜிதா ஹோதீதி க⁴ட்டேத்வா விஜ்ஜி²த்வா உப்³பே³க³ப்பத்தம் கரோதிச்சேவ அத்தோ².

163. ஆஸீவிஸூபமேஸு – ஆஸீவிஸோ தாவ யஸ்ஸ விஸம் ஆஸும் ஆக³ச்ச²தி ஸீக⁴ம் ப²ரதி; கோ⁴ரம் பன ந ஹோதி, சிரகாலம் ந பீளேதி – அயம் ஆக³தவிஸோ நோ கோ⁴ரவிஸோ. ஸேஸபதே³ஸுபி ஏஸேவ நயோ. புக்³க³லவிபா⁴ஜனம் பன உத்தானத்த²மேவ.

164. அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸிதா ஹோதீதிஆதீ³ஸு அனனுவிச்சாதி அதுலயித்வா, அபரிக்³க³ண்ஹித்வா. அபரியோகா³ஹேத்வாதி பஞ்ஞாய கு³ணே அனோகா³ஹேத்வா.

166. பூ⁴தம் தச்ச²ந்தி விஜ்ஜமானதோ பூ⁴தம், அவிபரீததோ தச்ச²ம். காலேனாதி யுத்தபயுத்தகாலேன. தத்ர காலஞ்ஞூ ஹோதீதி யமித³ம் காலேனாதி வுத்தம். தத்ர யோ புக்³க³லோ காலஞ்ஞூ ஹோதி, காலம் ஜானாதி, தஸ்ஸ பஞ்ஹஸ்ஸ வேய்யாகரணத்தா²ய ‘‘இமஸ்மிம் காலே புச்சி²தேனாபி மயா ந கதே²தப்³பா³, இமஸ்மிம் காலே கதே²தப்³பா³’’தி – அயம் காலேன ப⁴ணதி நாம. உபேக்க²கோ விஹரதீதி மஜ்ஜ²த்தபூ⁴தாய உபேக்கா²ய டி²தோ ஹுத்வா விஹரதி. ஸேஸம் ஸப்³ப³த்த² உத்தானத்த²மேவ.

167. உட்டா²னப²லூபஜீவீதிஆதீ³ஸு – யோ உட்டா²னவீரியேனேவ தி³வஸம் வீதினாமேத்வா தஸ்ஸ நிஸ்ஸந்த³ப²லமத்தம் கிஞ்சிதே³வ லபி⁴த்வா ஜீவிகம் கப்பேதி, தம் பன உட்டா²னம் ஆக³ம்ம கிஞ்சி புஞ்ஞப²லம் ந படிலப⁴தி, தம் ஸந்தா⁴ய யஸ்ஸ புக்³க³லஸ்ஸ உட்ட²ஹதோதிஆதி³ வுத்தம். ததூபரி தே³வாதி ததோ உபரி ப்³ரஹ்மகாயிகாத³யோ தே³வா. தேஸஞ்ஹி உட்டா²னவீரியேன கிச்சம் நாம நத்தி². புஞ்ஞப²லமேவ உபஜீவந்தி. புஞ்ஞவதோ சாதி இத³ம் புஞ்ஞவந்தே க²த்தியப்³ராஹ்மணாத³யோ சேவ பு⁴ம்மதே³வே ஆதி³ம் கத்வா நிம்மானரதிபரியோஸானே தே³வே ச ஸந்தா⁴ய வுத்தம். ஸப்³பே³பி ஹேதே வாயாமப²லஞ்சேவ புஞ்ஞப²லஞ்ச அனுப⁴வந்தி. நேரயிகா பன நேவ உட்டா²னேன ஆஜீவம் உப்பாதே³தும் ஸக்கோந்தி, நாபி நேஸம் புஞ்ஞப²லேன கோசி ஆஜீவோ உப்பஜ்ஜதி.

168. தமாதீ³ஸு – ‘‘நீசே குலே பச்சாஜாதோ’’திஆதி³கேன தமேன யுத்தோதி தமோ. காயது³ச்சரிதாதீ³ஹி புன நிரயதமூபக³மனதோ தமபராயணோ. நேஸாத³குலேதி மிக³லுத்³த³காதீ³னம் குலே. வேனகுலேதி விலீவகாரகுலே. ரத²காரகுலேதி சம்மகாரகுலே. புக்குஸகுலேதி புப்ப²ச²ட்³ட³ககுலே. கஸிரவுத்திகேதி து³க்க²வுத்திகே. து³ப்³ப³ண்ணோதி பம்ஸுபிஸாசகோ விய ஜா²மகா²ணுவண்ணோ. து³த்³த³ஸிகோதி விஜாதமாதுயாபி அமனாபத³ஸ்ஸனோ. ஓகோடிமகோதி லகுண்ட³கோ. காணோதி ஏகக்கி²காணோ வா உப⁴யக்கி²காணோ வா. குணீதி ஏகஹத்த²குணீ வா உப⁴யஹத்த²குணீ வா. க²ஞ்ஜோதி ஏகபாத³க²ஞ்ஜோ வா உப⁴யபாத³க²ஞ்ஜோ வா. பக்க²ஹதோதி ஹதபக்கோ² பீட²ஸப்பீ. பதீ³பேய்யஸ்ஸாதி தேலகபல்லகாதி³னோ பதீ³பூபகரணஸ்ஸ. ஏவம் புக்³க³லோ தமோ ஹோதி தமபராயணோதி ஏத்த² ஏகோ புக்³க³லோ ப³ஹித்³தா⁴ ஆலோகம் அதி³ஸ்வா மாதுகுச்சி²ஸ்மிஞ்ஞேவ காலம் கத்வா அபாயேஸு நிப்³ப³த்தந்தோ ஸகலேபி கப்பே ஸம்ஸரதி. ஸோபி தமோ தமபராயணோவ. ஸோ பன குஹகபுக்³க³லோ ப⁴வேய்ய. குஹகஸ்ஸ ஹி ஏவரூபா நிப்³ப³த்தி ஹோதீதி வுத்தம்.

ஏத்த² ச நீசே குலே பச்சாஜாதோ ஹோதி சண்டா³லகுலே வாதிஆதீ³ஹி ஆக³மனவிபத்தி சேவ புப்³பு³ப்பன்னபச்சயவிபத்தி ச த³ஸ்ஸிதா. த³லித்³தே³திஆதீ³ஹி பவத்திபச்சயவிபத்தி. கஸிரவுத்திகேதிஆதீ³ஹி ஆஜீவுபாயவிபத்தி. து³ப்³ப³ண்ணோதிஆதீ³ஹி ரூபவிபத்தி. ப³ஹ்வாபா³தோ⁴திஆதீ³ஹி து³க்க²காரணஸமாயோகோ³. ந லாபீ⁴திஆதீ³ஹி ஸுக²காரணவிபத்தி சேவ உபபோ⁴க³விபத்தி ச. காயேன து³ச்சரிதந்திஆதீ³ஹி தமபராயணபா⁴வஸ்ஸ காரணஸமாயோகோ³. காயஸ்ஸ பே⁴தா³திஆதீ³ஹி ஸம்பராயிகதமூபக³மோ. ஸுக்கபக்கோ² வுத்தபடிபக்க²னயேன வேதி³தப்³போ³.

அபிசேத்த² திவிதா⁴ய குலஸம்பத்தியா பச்சாஜாதிஆதி³கேன ஜோதினா யுத்ததோ ஜோதி, ஆலோகபூ⁴தோதி வுத்தம் ஹோதி. காயஸுசரிதாதீ³ஹி பன ஸக்³கூ³பபத்திஜோதிபா⁴வூபக³மனதோ ஜோதிபராயணோ. க²த்தியமஹாஸாலகுலே வாதிஆதீ³ஸு க²த்தியமஹாஸாலாதி க²த்தியா மஹாஸாரா மஹாஸாரப்பத்தா க²த்தியா. யேஸஞ்ஹி க²த்தியானம் ஹேட்டி²மந்தேன கோடிஸதம் நிதா⁴னக³தம் ஹோதி, தயோ கஹாபணகும்பா⁴ வளஞ்ஜனத்தா²ய கே³ஹமஜ்ஜே² ராஸிம் கத்வா ட²பிதா ஹோந்தி, தே க²த்தியமஹாஸாலா நாம. யேஸம் ப்³ராஹ்மணானம் அஸீதிகோடித⁴னம் நிஹிதம் ஹோதி, தி³யட்³டோ⁴ கஹாபணகும்போ⁴ வளஞ்ஜனத்தா²ய கே³ஹமஜ்ஜே² ராஸிம் கத்வா ட²பிதோ ஹோதி, தே ப்³ராஹ்மணமஹாஸாலா நாம. யேஸம் க³ஹபதீனம் சத்தாலீஸகோடித⁴னம் நிஹிதம் ஹோதி, கஹாபணகும்போ⁴ வளஞ்ஜத்தா²ய கே³ஹமஜ்ஜே² ராஸிம் கத்வா ட²பிதோ ஹோதி, தே க³ஹபதிமஹாஸாலா நாம. தேஸம் குலேதி அத்தோ². அட்³டே⁴தி இஸ்ஸரே. நிதா⁴னக³தத⁴னஸ்ஸ மஹந்ததாய மஹத்³த⁴னே. ஸுவண்ணரஜதபா⁴ஜனாதீ³னம் உபபோ⁴க³ப⁴ண்டா³னம் மஹந்ததாய மஹாபோ⁴கே³. நிதா⁴னக³தஸ்ஸ ஜாதரூபரஜதஸ்ஸ பஹூததாய பஹூதஜாதரூபரஜதே. வித்தூபகரணஸ்ஸ துட்டி²கரணஸ்ஸ பஹூததாய பஹூதவித்தூபகரணே. கோ³த⁴னாதீ³னஞ்ச ஸத்தவித⁴த⁴ஞ்ஞானஞ்ச பஹூததாய பஹூதத⁴னத⁴ஞ்ஞே. அபி⁴ரூபோதி ஸுந்த³ரரூபோ. த³ஸ்ஸனீயோதி அஞ்ஞம் கம்மம் பஹாய தி³வஸம்பி பஸ்ஸிதப்³ப³யுத்தோ. பாஸாதி³கோதி த³ஸ்ஸனேனேவ சித்தபஸாதா³வஹோ. பரமாயாதி உத்தமாய. வண்ணபோக்க²ரதாயாதி போக்க²ரவண்ணதாய. போக்க²ரம் வுச்சதி ஸரீரம். தஸ்ஸ வண்ணஸம்பத்தியாதி அத்தோ². ஸமன்னாக³தோதி உபேதோ.

169. ஓணதோணதாதீ³ஸு – தி³ட்ட²த⁴ம்மிகாய வா ஸம்பராயிகாய வா ஸம்பத்தியா விரஹிதோ ஓணதோ. நீசோ, லாமகோதி அத்தோ². தப்³பி³பக்க²தோ உண்ணதோ. உச்சோ, உக்³க³தோதி அத்தோ². ஸேஸமேத்த² தமாதீ³ஸு வுத்தனயேனேவ வேதி³தப்³ப³ம். அபிச – ஓணதோணதோதி இதா³னி நீசோ, ஆயதிம்பி நீசோவ ப⁴விஸ்ஸதி. ஓணதுண்ணதோதி இதா³னி நீசோ, ஆயதிம் உச்சோ ப⁴விஸ்ஸதி. உண்ணதோணதோதி இதா³னி உச்சோ, ஆயதிம் நீசோ ப⁴விஸ்ஸதி. உண்ணதுண்ணதோதி இதா³னி உச்சோ, ஆயதிம்பி உச்சோவ ப⁴விஸ்ஸதீதி.

170. ருக்கூ²பமேஸு – ருக்கோ² தாவ பே²க்³கு³ஸாரபரிவாரோதி வனஜேட்ட²கருக்கோ² ஸயம் பே²க்³கு³ ஹோதி, பரிவாரருக்கா² பனஸ்ஸ ஸாரா ஹோந்தி. இமினா நயேன ஸேஸா வேதி³தப்³பா³. புக்³க³லேஸு பன ஸீலஸாரவிரஹதோ பே²க்³கு³தா, ஸீலாசாரஸமன்னாக³மேன ச ஸாரதா வேதி³தப்³பா³.

171. ரூபப்பமாணாதீ³ஸு – ஸம்பத்தியுத்தம் ரூபம் பமாணம் கரோதீதி ரூபப்பமாணோ. தத்த² பஸாத³ம் ஜனேதீதி ரூபப்பஸன்னோ. கித்திஸத்³த³பூ⁴தம் கோ⁴ஸம் பமாணம் கரோதீதி கோ⁴ஸப்பமாணோ. ஆரோஹம் வாதிஆதீ³ஸு பன – ஆரோஹந்தி உச்சத்தனம். பரிணாஹந்தி கிஸதூ²லபா⁴வாபக³தம் பரிக்கே²பஸம்பத்திம். ஸண்டா²னந்தி அங்க³பச்சங்கா³னம் தீ³க⁴ரஸ்ஸவட்டதாதி³யுத்தட்டா²னேஸு ததா²பா⁴வம். பாரிபூரிந்தி யதா²வுத்தப்பகாரானம் அனூனதம், லக்க²ணபரிபுண்ணபா⁴வம் வா. பரவண்ணனாயாதி பரேஹி பரம்முகா² நிச்சா²ரிதாய கு³ணவண்ணனாய. பரதோ²மனாயாதி பரேஹி து²திவஸேன கா³தா²தி³உபனிப³ந்த⁴னேன வுத்தாய தோ²மனாய. பரபஸம்ஸனாயாதி பரேஹி ஸம்முகா² வுத்தாய பஸம்ஸாய. பரவண்ணஹாரிகாயாதி பரம்பரது²திவஸேன பரேஹி பவத்திதாய வண்ணஹரணாய.

172. சீவரலூக²ந்தி சீவரஸ்ஸ து³ப்³ப³ண்ணாதி³பா⁴வேன லூக²தம். பத்தலூக²ந்தி பா⁴ஜனஸ்ஸ வண்ணஸண்டா²னவத்தூ²ஹி லூக²தம். ஸேனாஸனலூக²ந்தி நாடகாதி³ஸம்பத்திவிரஹேன ஸேனாஸனஸ்ஸ லூக²தம். விவித⁴ந்தி அசேலகாதி³பா⁴வேன அனேகப்பகாரம். து³க்கரகாரிகந்தி ஸரீரதாபனம்.

அபரோ நயோ – இமேஸு ஹி சதூஸு புக்³க³லேஸு ரூபே பமாணம் க³ஹேத்வா பஸன்னோ ரூபப்பமாணோ நாம. ரூபப்பஸன்னோதி தஸ்ஸேவ அத்த²வசனம். கோ⁴ஸே பமாணம் க³ஹேத்வா பஸன்னோ கோ⁴ஸப்பமாணோ நாம. சீவரலூக²பத்தலூகே²ஸு பமாணம் க³ஹேத்வா பஸன்னோ லூக²ப்பமாணோ நாம. த⁴ம்மே பமாணம் க³ஹேத்வா பஸன்னோ த⁴ம்மப்பமாணோ நாம. இதரானி தேஸம்யேவ அத்த²வசனானி. ஸப்³ப³ஸத்தே ச தயோ கோட்டா²ஸே கத்வா த்³வே கோட்டா²ஸா ரூபப்பமாணா, ஏகோ ந ரூபப்பமாணோ. பஞ்ச கோட்டா²ஸே கத்வா சத்தாரோ கோட்டா²ஸா கோ⁴ஸப்பமாணா, ஏகோ ந கோ⁴ஸப்பமாணோ. த³ஸ கோட்டா²ஸே கத்வா நவ கோட்டா²ஸா லூக²ப்பமாணா, ஏகோ ந லூக²ப்பமாணோ. ஸதஸஹஸ்ஸம் கோட்டா²ஸே கத்வா பன ஏகோ கோட்டா²ஸோவ த⁴ம்மப்பமாணோ, ஸேஸா ந த⁴ம்மப்பமாணா. ஏவமயம் சதுப்பமாணோ லோகஸன்னிவாஸோ.

ஏதஸ்மிம் சதுப்பமாணே லோகஸன்னிவாஸே பு³த்³தே⁴ஸு அப்பஸன்னா மந்தா³, பஸன்னாவ ப³ஹுகா. ரூபப்பமாணஸ்ஸ ஹி பு³த்³த⁴ரூபதோ உத்தரி பஸாதா³வஹம் ரூபம் நாம நத்தி². கோ⁴ஸப்பமாணஸ்ஸ பு³த்³தா⁴னம் கித்திகோ⁴ஸதோ உத்தரி பஸாதா³வஹோ கோ⁴ஸோ நாம நத்தி². லூக²ப்பமாணஸ்ஸ காஸிகானி வத்தா²னி மஹாரஹானி கஞ்சனபா⁴ஜனானி திண்ணம் உதூனம் அனுச்ச²விகே ஸப்³ப³ஸம்பத்தியுத்தே பாஸாத³வரே பஹாய பம்ஸுகூலசீவரஸேலமயபத்தருக்க²மூலாதி³ஸேனாஸனஸேவினோ பு³த்³த⁴ஸ்ஸ ப⁴க³வதோ லூக²தோ உத்தரி பஸாதா³வஹம் அஞ்ஞம் லூக²ம் நாம நத்தி². த⁴ம்மப்பமாணஸ்ஸ ஸதே³வகே லோகே அஸாதா⁴ரணஸீலாதி³கு³ணஸ்ஸ ததா²க³தஸ்ஸ ஸீலாதி³கு³ணதோ உத்தரி பஸாதா³வஹோ அஞ்ஞோ ஸீலாதி³கு³ணோ நாம நத்தி². இதி ப⁴க³வா இமம் சதுப்பமாணிகம் லோகஸன்னிவாஸம் முட்டி²னா க³ஹேத்வா விய டி²தோதி.

173. அத்தஹிதாய படிபன்னாதீ³ஸு – ஸீலஸம்பன்னோதி ஸீலேன ஸம்பன்னோ ஸமன்னாக³தோ. ஸமாதி⁴ஸம்பன்னோதிஆதீ³ஸுபி ஏஸேவ நயோ. ஏத்த² ச ஸீலம் லோகியலோகுத்தரம் கதி²தம். ததா² ஸமாதி⁴பஞ்ஞா ச. விமுத்தி அரஹத்தப²லவிமுத்தியேவ. ஞாணத³ஸ்ஸனம் ஏகூனவீஸதிவித⁴ம் பச்சவேக்க²ணஞாணம். நோ பரந்திஆதீ³ஸு – பரபுக்³க³லம் ‘‘தயாபி ஸீலஸம்பன்னேன ப⁴விதும் வட்டதீ’’தி வத்வா யதா² ஸீலம் ஸமாதி³யதி, ஏவம் ந ஸமாத³பேதி, ந க³ண்ஹாபேதி. ஏஸேவ நயோ ஸப்³ப³த்த². ஏதேஸு பன சதூஸு பட²மோ வக்கலித்தே²ரஸதி³ஸோ ஹோதி. து³தியோ உபனந்த³ஸக்யபுத்தஸதி³ஸோ. ததியோ ஸாரிபுத்தமோக்³க³ல்லானத்தே²ரஸதி³ஸோ. சதுத்தோ² தே³வத³த்தஸதி³ஸோதி வேதி³தப்³போ³.

174. அத்தந்தபாதீ³ஸு – அத்தானம் தபதி து³க்கா²பேதீதி அத்தந்தபோ. அத்தனோ பரிதாபனானுயோக³ம் அத்தபரிதாபனானுயோக³ம். அசேலகோதி நிச்சேலோ, நக்³கோ³. முத்தாசாரோதி விஸட்டா²சாரோ. உச்சாரகம்மாதீ³ஸு லோகியகுலபுத்தாசாரேன விரஹிதோ டி²தகோவ உச்சாரம் கரோதி, பஸ்ஸாவம் கரோதி, கா²த³தி, பு⁴ஞ்ஜதி ச. ஹத்தா²பலேக²னோதி ஹத்தே² பிண்ட³ம்ஹி நிட்டி²தே ஜிவ்ஹாய ஹத்த²ம் அபலேக²தி. உச்சாரம் வா கத்வா ஹத்த²ஸ்மிஞ்ஞேவ த³ண்ட³கஸஞ்ஞீ ஹுத்வா ஹத்தே²ன அபலேக²தீதி த³ஸ்ஸேதி. தே கிர த³ண்ட³கம் ஸத்தோதி பஞ்ஞபேந்தி. தஸ்மா தேஸம் படிபத³ம் பூரேந்தோ ஏவம் கரோதி. பி⁴க்கா²க³ஹணத்த²ம் ‘ஏஹி ப⁴த்³த³ந்தே’தி வுத்தோ, ந ஏதீதி நஏஹிப⁴த்³த³ந்திகோ. தேன ஹி ‘திட்ட² ப⁴த்³த³ந்தே’தி வுத்தோபி ந திட்ட²தீதி நதிட்ட²ப⁴த்³த³ந்திகோ. தது³ப⁴யம்பி ஹேதம் தித்தி²யா ‘‘ஏதஸ்ஸ வசனம் கதம் ப⁴விஸ்ஸதீ’’தி ந கரோந்தி. அபி⁴ஹடந்தி புரேதரம் க³ஹேத்வா ஆஹடம் பி⁴க்க²ம். உத்³தி³ஸ்ஸகதந்தி ‘‘இமம் தும்ஹே உத்³தி³ஸ்ஸ கத’’ந்தி ஏவம் ஆரோசிதபி⁴க்க²ம். ந நிமந்தனந்தி ‘‘அஸுகம் நாம குலம் வா வீதி²ம் வா கா³மம் வா பவிஸேய்யாதா²’’தி ஏவம் நிமந்திதபி⁴க்க²ம்பி ந ஸாதி³யதி, ந க³ண்ஹாதி.

ந கும்பி⁴முகா²தி கும்பி⁴தோ உத்³த⁴ரித்வா தி³ய்யமானம் பி⁴க்க²ம் ந க³ண்ஹாதி. ந களோபிமுகா²தி களோபீதி உக்க²லி, பச்சி² வா. ததோபி ந க³ண்ஹாதி. கஸ்மா? கும்பீ⁴ களோபியோ கடச்சு²னா பஹாரம் லப⁴ந்தீதி. ந ஏளகமந்தரந்தி உம்மாரம் அந்தரம் கத்வா தி³ய்யமானம் ந க³ண்ஹாதி. கஸ்மா? அயம் மம் நிஸ்ஸாய அந்தரகரணம் லப⁴தீதி. த³ண்ட³முஸலேஸுபி ஏஸேவ நயோ. த்³வின்னந்தி த்³வீஸு பு⁴ஞ்ஜமானேஸு ஏகஸ்மிம் உட்டா²ய தே³ந்தே ந க³ண்ஹதி. கஸ்மா? கப³ளந்தராயோ ஹோதீதி. ந க³ப்³பி⁴னியாதிஆதீ³ஸு பன க³ப்³பி⁴னியா குச்சி²யம் தா³ரகோ கிலமதி. பாயந்தியா தா³ரகஸ்ஸ கீ²ரந்தராயோ ஹோதி. புரிஸந்தரக³தாய ரதிஅந்தராயோ ஹோதீதி ந க³ண்ஹாதி ந ஸங்கித்தீஸூதி ஸங்கித்தேத்வா கதப⁴த்தேஸு. து³ப்³பி⁴க்க²ஸமயே கிர அசேலகஸாவகா அசேலகானம் அத்தா²ய ததோ ததோ தண்டு³லாதீ³னி ஸமாத³பேத்வா ப⁴த்தம் பசந்தி, உக்கட்டா²சேலகோ ததோ ந படிக்³க³ண்ஹாதி. ந யத்த² ஸாதி யத்த² ஸுனகோ² ‘பிண்ட³ம் லபி⁴ஸ்ஸாமீ’தி உபட்டி²தோ ஹோதி, தத்த² தஸ்ஸ அத³த்வா ஆஹடம் ந க³ண்ஹாதி. கஸ்மா? ஏதஸ்ஸ பிண்ட³ந்தராயோ ஹோதீதி.

ஸண்ட³ஸண்ட³சாரினீதி ஸமூஹஸமூஹசாரினீ. ஸசே ஹி அசேலகம் தி³ஸ்வா ‘இமஸ்ஸ பி⁴க்க²ம் த³ஸ்ஸாமா’தி மானுஸ்ஸகா ப⁴த்தகே³ஹம் பவிஸந்தி, தேஸு ச பவிஸந்தேஸு களோபிமுகா²தீ³ஸு நிலீனா மக்கி²கா உப்பதித்வா ஸண்ட³ஸண்டா³ சரந்தி, ததோ ஆஹடம் பி⁴க்க²ம் ந க³ண்ஹாதி. கஸ்மா? மம் நிஸ்ஸாய மக்கி²கானம் கோ³சரந்தராயோ ஜாதோதி. து²ஸோத³கந்தி ஸப்³ப³ஸஸ்ஸஸம்பா⁴ரேஹி கதம் ஸோவீரகம். ஏத்த² ச ஸுராபானமேவ ஸாவஜ்ஜம். அயம் பன ஏதஸ்மிம்பி ஸாவஜ்ஜஸஞ்ஞீ. ஏகாகா³ரிகோதி யோ ஏகஸ்மிம்யேவ கே³ஹே பி⁴க்க²ம் லபி⁴த்வா நிவத்ததி. ஏகாலோபிகோதி யோ ஏகேனேவ ஆலோபேன யாபேதி. த்³வாகா³ரிகாதீ³ஸுபி ஏஸேவ நயோ. ஏகிஸ்ஸாபி த³த்தியாதி ஏகாய த³த்தியா. த³த்தி நாம ஏகா கு²த்³த³கபாதி ஹோதி, யத்த² அக்³க³பி⁴க்க²ம் பக்கி²பித்வா ட²பேந்தி.

ஏகாஹிகந்தி ஏகதி³வஸந்தரிகம். அட்³ட⁴மாஸிகந்தி அட்³ட⁴மாஸந்தரிகம். பரியாயப⁴த்தபோ⁴ஜனந்தி வாரப⁴த்தபோ⁴ஜனம். ஏகாஹவாரேன த்³வீஹவாரேன ஸத்தாஹவாரேன அட்³ட⁴மாஸவாரேனாதி – ஏவம் தி³வஸவாரேன ஆப⁴தப⁴த்தபோ⁴ஜனம். ஸாகப⁴க்கோ²தி அல்லஸாகப⁴க்கோ². ஸாமாகப⁴க்கோ²தி ஸாமாகதண்டு³லப⁴க்கோ². நீவாராதீ³ஸு – நீவாரா நாம தாவ அரஞ்ஞே ஸயம் ஜாதா வீஹிஜாதி. த³த்³து³லந்தி சம்மகாரேஹி சம்மம் விலிகி²த்வா ச²ட்³டி³தகஸடம். ஹடம் வுச்சதி ஸிலேஸோபி, ஸேவாலோபி கணிகாராதி³ருக்க²னிய்யாஸோபி. கணந்தி குண்ட³கம். ஆசாமோதி ப⁴த்தஉக்க²லிகாய லக்³கோ³ ஜா²மோத³னோ. தம் ச²ட்³டி³தட்டா²னே க³ஹேத்வா கா²த³தி. ‘‘ஓத³னகஞ்ஜிய’’ந்திபி வத³ந்தி. பிஞ்ஞாகாத³யோ பாகடா ஏவ. பவத்தப²லபோ⁴ஜீதி பதிதப²லபோ⁴ஜீ.

ஸாணானீதி ஸாணவாகசேலானி. மஸாணானீதி மிஸ்ஸகசேலானி. ச²வது³ஸ்ஸானீதி மதஸரீரதோ ச²ட்³டி³தவத்தா²னி. ஏரகதிணாதீ³னி வா க³ந்தே²த்வா கதனிவாஸனானி. பம்ஸுகூலானீதி பத²வியம் ச²ட்³டி³தனந்தகானி. திரீடானீதி ருக்க²த்தசவத்தா²னி. அஜினந்தி அஜினமிக³சம்மம். அஜினக்கி²பந்தி ததே³வ மஜ்ஜே² பா²லிதம். ஸகு²ரகந்திபி வத³ந்தி. குஸசீரந்தி குஸதிணானி க³ந்தே²த்வா கதசீரகம். வாகசீரப²லகசீரேஸுபி ஏஸேவ நயோ. கேஸகம்ப³லந்தி மனுஸ்ஸகேஸேஹி கதகம்ப³லம். யம் ஸந்தா⁴ய வுத்தம் – ‘‘ஸேய்யதா²பி, பி⁴க்க²வே, யானி கானிசி தந்தாவுதானம் வத்தா²னம் கேஸகம்ப³லோ தேஸம் பதிகுட்டோ² அக்கா²யதீ’’தி (அ. நி. 3.138). வாளகம்ப³லந்தி அஸ்ஸவாளாதீ³ஹி கதகம்ப³லம். உலூகபக்க²ந்தி உலூகபத்தானி க³ந்தே²த்வா கதனிவாஸனம். உப்³ப⁴ட்ட²கோதி உத்³த⁴ம் டி²தகோ.

உக்குடிகப்பதா⁴னமனுயுத்தோதி உக்குடிகவீரியம் அனுயுத்தோ. க³ச்ச²ந்தோபி உக்குடிகோவ ஹுத்வா உப்பதித்வா உப்பதித்வா க³ச்ச²தி. கண்டகாபஸ்ஸயிகோதி அயகண்டகே வா பகதிகண்டகே வா பூ⁴மியம் கோட்டேத்வா தத்த² சம்மம் அத்த²ரித்வா டா²னசங்கமாதீ³னி கரோதி. ஸேய்யந்தி ஸயந்தோபி தத்தே²வ ஸேய்யம் கப்பேதி. ஸாயம் ததியமஸ்ஸாதி ஸாயததியகம். ‘‘பாதோ, மஜ்ஜ²ன்ஹிகே, ஸாயந்தி தி³வஸஸ்ஸ திக்க²த்தும் பாபம் பவாஹேஸ்ஸாமீ’’தி உத³கோரோஹனானுயோக³ம் அனுயுத்தோ விஹரதி.

175. பரம் தபதீதி பரந்தபோ. பரேஸம் பரிதாபனானுயோக³ம் பரபரிதாபனானுயோக³ம். ஓரப்³பி⁴காதீ³ஸு – உரப்³பா⁴ வுச்சந்தி ஏளகா. உரப்³பே⁴ ஹனதீதி ஓரப்³பி⁴கோ. ஸூகரிகாதீ³ஸுபி – ஏஸேவ நயோ. லுத்³தோ³தி தா³ருணோ கக்க²ளோ. மச்ச²கா⁴தகோதி மச்ச²ப³ந்தோ⁴ கேவட்டோ. ப³ந்த⁴னாகா³ரிகோதி ப³ந்த⁴னாகா³ரகோ³பகோ. குரூரகம்மந்தாதி தா³ருணகம்மந்தா.

176. முத்³தா⁴வஸித்தோதி க²த்தியாபி⁴ஸேகேன முத்³த⁴னி அபி⁴ஸித்தோ. புரத்தி²மேன நக³ரஸ்ஸாதி நக³ரதோ புரத்தி²மதி³ஸாய. ஸந்தா⁴கா³ரந்தி யஞ்ஞஸாலம். க²ராஜினம் நிவாஸேத்வாதி ஸகு²ரம் அஜினசம்மம் நிவாஸேத்வா. ஸப்பிதேலேனாதி ஸப்பினா ச தேலேன ச. ட²பேத்வா ஹி ஸப்பிம் அவஸேஸோ யோ கோசி ஸ்னேஹோ தேலந்தி வுச்சதி. கண்டு³வமானோதி நகா²னம் சி²ன்னத்தா கண்டு³விதப்³ப³காலே தேன கண்டு³வமானோ. அனந்தரஹிதாயாதி அஸந்த²தாய. ஸரூபவச்சா²யாதி ஸதி³ஸவச்சா²ய. ஸசே கா³வீ ஸேதா ஹோதி, வச்சோ²பி ஸேதகோவ ஸசே கப³ரா வா, ரத்தா வா, வச்சோ²பி தாதி³ஸோவாதி – ஏவம் ஸரூபவச்சா²ய. ஸோ ஏவமாஹாதி ஸோ ராஜா ஏவம் வதே³தி. வச்ச²தராதி தருணவச்ச²கபா⁴வம் அதிக்கந்தா ப³லவவச்சா². வச்ச²தரீஸுபி ஏஸேவ நயோ. ப³ரிஹிஸத்தா²யாதி பரிக்கே²பகரணத்தா²ய சேவ யஞ்ஞபூ⁴மியம் அத்த²ரணத்தா²ய ச.

177. தி³ட்டே²வ த⁴ம்மேதி இமஸ்மிம்யேவ அத்தபா⁴வே. நிச்சா²தோதி சா²தம் வுச்சதி தண்ஹா, ஸா அஸ்ஸ நத்தீ²தி நிச்சா²தோ. ஸப்³ப³கிலேஸானம் நிப்³பு³தத்தா நிப்³பு³தோ. அந்தோ தாபனகிலேஸானம் அபா⁴வா ஸீதலோ ஜாதோதி ஸீதீபூ⁴தோ. ஜா²னமக்³க³ப²லனிப்³பா³னஸுகா²னி படிஸம்வேதே³தீதி ஸுக²ப்படிஸம்வேதீ³. ப்³ரஹ்மபூ⁴தேன அத்தனாதி ஸேட்ட²பூ⁴தேன அத்தனா.

இமம் பன புக்³க³லம் பு³த்³து⁴ப்பாத³தோ பட்டா²ய த³ஸ்ஸேதும் – இத⁴ ததா²க³தோதிஆதி³மாஹ. தத்த² ததா²க³தோதி அட்ட²ஹி காரணேஹி ப⁴க³வா ததா²க³தோ – ததா² ஆக³தோதி ததா²க³தோ, ததா² க³தோதி ததா²க³தோ, தத²லக்க²ணம் ஆக³தோதி ததா²க³தோ, தத²த⁴ம்மே யாதா²வதோ அபி⁴ஸம்பு³த்³தோ⁴தி ததா²க³தோ, தத²த³ஸ்ஸிதாய ததா²க³தோ, ததா²வாதி³தாய ததா²க³தோ, ததா²காரிதாய ததா²க³தோ, அபி⁴ப⁴வனட்டே²ன ததா²க³தோதி. அரஹம் ஸம்மாஸம்பு³த்³தோ⁴திஆதீ³னி விஸுத்³தி⁴மக்³கே³ வித்தா²ரிதானேவ. தம் த⁴ம்மந்தி தம் வுத்தப்பகாரஸம்பத³ம் த⁴ம்மம். ஸுணாதி க³ஹபதி வாதி கஸ்மா பட²மம் க³ஹபதிம் நித்³தி³ஸதி? நிஹதமானத்தா உஸ்ஸன்னத்தா ச. யேபு⁴ய்யேன ஹி க²த்தியகுலதோ பப்³ப³ஜிதா ஜாதிம் நிஸ்ஸாய மானம் கரோந்தி. ப்³ராஹ்மணகுலா பப்³ப³ஜிதா மந்தே நிஸ்ஸாய மானம் கரோந்தி. ஹீனஜச்சகுலா பப்³ப³ஜிதா அத்தனோ விஜாதிதாய பதிட்டா²தும் ந ஸக்கோந்தி. க³ஹபதிதா³ரகா பன கச்சே²ஹி ஸேத³ம் முஞ்சந்தேஹி பிட்டி²யா லோணம் புப்ப²மானாய பூ⁴மிம் கஸித்வா தாதி³ஸஸ்ஸ மானஸ்ஸ அபா⁴வதோ நிஹதமானத³ப்பா ஹோந்தி. தே பப்³ப³ஜித்வா மானம் வா த³ப்பம் வா அகத்வா யதா²ப³லம் பு³த்³த⁴வசனம் உக்³க³ஹேத்வா விபஸ்ஸனாய கம்மம் கரோந்தா ஸக்கோந்தி அரஹத்தே பதிட்டா²தும். இதரேஹி ச குலேஹி நிக்க²மித்வா பப்³ப³ஜிதா நாம ந ப³ஹுகா, க³ஹபதிகாவ ப³ஹுகா. இதி நிஹதமானத்தா உஸ்ஸன்னத்தா ச பட²மம் க³ஹபதிம் நித்³தி³ஸதீதி.

அஞ்ஞதரஸ்மிம் வாதி இதரேஸம் வா குலானம் அஞ்ஞதரஸ்மிம். பச்சாஜாதோதி பதிஜாதோ. ததா²க³தே ஸத்³த⁴ம் படிலப⁴தீதி பரிஸுத்³த⁴ம் த⁴ம்மம் ஸுத்வா த⁴ம்மஸ்ஸாமிம்ஹி ததா²க³தே ‘‘ஸம்மாஸம்பு³த்³தோ⁴ வத ஸோ ப⁴க³வா’’தி ஸத்³த⁴ம் படிலப⁴தி. இதி படிஸஞ்சிக்க²தீதி ஏவம் பச்சவேக்க²தி. ஸம்பா³தோ⁴ க⁴ராவாஸோதி ஸசேபி ஸட்டி²ஹத்தே² க⁴ரே யோஜனஸதந்தரேபி வா த்³வே ஜாயம்பதிகா வஸந்தி, ததா²பி நேஸம் ஸகிஞ்சனஸபலிபோ³த⁴ட்டே²ன க⁴ராவாஸோ ஸம்பா³தோ⁴யேவ. ரஜோபதோ²தி ராக³ரஜாதீ³னம் உட்டா²னட்டா²னந்தி மஹாஅட்ட²கதா²யம் வுத்தம். ஆக³மனபதோ²திபி வத்தும் வட்டதி. அலக்³க³னட்டே²ன அப்³போ⁴காஸோ வியாதி அப்³போ⁴காஸோ. பப்³ப³ஜிதோ ஹி கூடாகா³ரரதனபாஸாதே³ ச தே³வவிமானாதீ³ஸு ச ஸுபிஹிதத்³வாரவாதபானேஸு படிச்ச²ன்னேஸு வஸந்தோபி நேவ லக்³க³தி, ந ஸஜ்ஜதி, ந ப³ஜ்ஜ²தி. தேன வுத்தம் – ‘‘அப்³போ⁴காஸோ பப்³ப³ஜ்ஜா’’தி.

அபிச – ஸம்பா³தோ⁴ க⁴ராவாஸோ குஸலகிரியாய ஓகாஸாபா⁴வதோ. ரஜோபதோ² அஸம்வுதஸங்காரட்டா²னம் விய ரஜானம் கிலேஸரஜானம் ஸன்னிபாதட்டா²னதோ. அப்³போ⁴காஸோ பப்³ப³ஜ்ஜா குஸலகிரியாய யதா²ஸுக²ம் ஓகாஸஸம்பா⁴வதோ. நயித³ம் ஸுகரம்…பே… பப்³ப³ஜேய்யந்தி ஏத்த² அயம் ஸங்கே²பகதா² – யதே³தம் ஸிக்க²த்தயப்³ரஹ்மசரியம் ஏகம்பி தி³வஸம் அக²ண்ட³ம் கத்வா சரிமகசித்தம் பாபேதப்³ப³தாய ஏகந்தபரிபுண்ணம். ஏகதி³வஸம்பி ச கிலேஸமலேன அமலினம் கத்வா சரிமகசித்தம் பாபேதப்³ப³தாய ஏகந்தபரிஸுத்³த⁴ம். ஸங்க²லிகி²தம் லிகி²தஸங்க²ஸதி³ஸம் தோ⁴தஸங்க²ஸப்படிபா⁴க³ம் சரிதப்³ப³ம். இத³ம் ந ஸுகரம் அகா³ரம் அஜ்ஜா²வஸதா அகா³ரமஜ்ஜே² வஸந்தேன ஏகந்தபரிபுண்ணம்…பே… சரிதும் – ‘‘யம்னூனாஹம் கேஸே ச மஸ்ஸுஞ்ச ஓஹாரேத்வா கஸாயரஸபீததாய காஸாயானி ப்³ரஹ்மசரியம் சரந்தானம் அனுச்ச²விகானி வத்தா²னி அச்சா²தே³த்வா பரித³ஹித்வா அகா³ரஸ்மா நிக்க²மித்வா அனகா³ரியம் பப்³ப³ஜேய்ய’’ந்தி. ஏத்த² ச யஸ்மா அகா³ரஸ்ஸ ஹிதம் கஸிவாணிஜ்ஜாதி³கம்மம் ‘‘அகா³ரிய’’ந்தி வுச்சதி, தஞ்ச பப்³ப³ஜ்ஜாய நத்தி², தஸ்மா பப்³ப³ஜ்ஜா ‘‘அனகா³ரிய’’ந்தி ஞாதப்³பா³. தம் அனகா³ரியம். பப்³ப³ஜேய்யந்தி படிபஜ்ஜேய்யம். அப்பம் வாதி ஸஹஸ்ஸதோ ஹேட்டா² போ⁴க³க்க²ந்தோ⁴ அப்போ நாம ஹோதி, ஸஹஸ்ஸதோ பட்டா²ய மஹா. அப³ந்த⁴னட்டே²ன ஞாதியேவ ஞாதிபரிவட்டோ. ஸோபி வீஸதியா ஹேட்டா² அப்போ ஹோதி, வீஸதியா பட்டா²ய மஹா.

178. பி⁴க்கூ²னம் ஸிக்கா²ஸாஜீவஸமாபன்னோதி யா பி⁴க்கூ²னம் அதி⁴ஸீலஸங்கா²தா ஸிக்கா², தஞ்ச. யத்த² சேதே ஸஹ ஜீவந்தி, ஏகஜீவிகா ஸபா⁴க³வுத்தினோ ஹோந்தி, தம் ப⁴க³வதா பஞ்ஞத்தஸிக்கா²பத³ஸங்கா²தம் ஸாஜீவஞ்ச. தத்த² ஸிக்க²னபா⁴வேன ஸமாபன்னோதி பி⁴க்கூ²னம் ஸிக்கா²ஸாஜீவஸமாபன்னோ. ஸமாபன்னோதி ஸிக்க²ம் பரிபூரேந்தோ ஸாஜீவஞ்ச அவீதிக்கமந்தோ ஹுத்வா தது³ப⁴யம் உபக³தோதி அத்தோ². பாணாதிபாதம் பஹாயாதிஆதீ³ஸு பாணாதிபாதாதி³கதா² ஹேட்டா² வித்தா²ரிதா ஏவ. பஹாயாதி இமம் பாணாதிபாதசேதனாஸங்கா²தம் து³ஸ்ஸீல்யம் பஜஹித்வா. படிவிரதோ ஹோதீதி பஹீனகாலதோ பட்டா²ய ததோ து³ஸ்ஸீல்யதோ ஓரதோ விரதோவ ஹோதி. நிஹிதத³ண்டோ³ நிஹிதஸத்தோ²தி பரூபகா⁴தத்தா²ய த³ண்ட³ம் வா ஸத்த²ம் வா ஆதா³ய அவத்தனதோ நிக்கி²த்தத³ண்டோ³ சேவ நிக்கி²த்தஸத்தோ² சாதி அத்தோ². ஏத்த² ச ட²பேத்வா த³ண்ட³ம், ஸப்³ப³ம்பி அவஸேஸம் உபகரணம் ஸத்தானம் வினாஸனபா⁴வதோ ‘ஸத்த²’ந்தி வேதி³தப்³ப³ம். யம் பன பி⁴க்கூ² கத்தரத³ண்ட³ம் வா த³ந்தகட்ட²வாஸிம் வா பிப்ப²லிகம் வா க³ஹேத்வா விசரந்தி, ந தம் பரூபகா⁴தத்தா²ய. தஸ்மா நிஹிதத³ண்டா³ நிஹிதஸத்தா²த்வேவ ஸங்க²ம் க³ச்ச²ந்தி. லஜ்ஜீதி பாபஜிகு³ச்ச²னலக்க²ணாய லஜ்ஜாய ஸமன்னாக³தோ. த³யாபன்னோதி த³யம் மேத்தசித்ததம் ஆபன்னோ. ஸப்³ப³பாணபூ⁴தஹிதானுகம்பீதி ஸப்³பே³ பாணபூ⁴தே ஹிதேன அனுகம்பகோ. தாய த³யாபன்னதாய ஸப்³பே³ஸம் பாணபூ⁴தானம் ஹிதசித்தகோதி அத்தோ². விஹரதீதி இரியதி, பாலேதி.

தி³ன்னமேவ ஆதி³யதீதி தி³ன்னாதா³யீ. சித்தேனபி தி³ன்னமேவ படிகங்க²தீதி தி³ன்னபாடிகங்கீ². தே²னேதீதி தே²னோ. ந தே²னேன அதே²னேன. அதே²னத்தாயேவ ஸுசிபூ⁴தேன. அத்தனாதி அத்தபா⁴வேன. அதே²னம் ஸுசிபூ⁴தம் அத்தபா⁴வம் கத்வா விஹரதீதி வுத்தம் ஹோதி.

அப்³ரஹ்மசரியந்தி அஸேட்ட²சரியம். ப்³ரஹ்மம் ஸேட்ட²ம் ஆசாரம் சரதீதி ப்³ரஹ்மசாரீ. ஆராசாரீதி அப்³ரஹ்மசரியதோ தூ³ரசாரீ. மேது²னாதி ராக³பரியுட்டா²னவஸேன ஸதி³ஸத்தா மேது²னகாதி லத்³த⁴வோஹாரேஹி படிஸேவிதப்³ப³தோ மேது²னாதி ஸங்க²ம் க³தா அஸத்³த⁴ம்மா. கா³மத⁴ம்மாதி கா³மவாஸீனம் த⁴ம்மா.

ஸச்சம் வத³தீதி ஸச்சவாதீ³. ஸச்சேன ஸச்சம் ஸந்த³ஹதி க⁴டேதீதி ஸச்சஸந்தோ⁴. ந அந்தரந்தரா முஸா வத³தீதி அத்தோ². யோ ஹி புரிஸோ கதா³சி முஸா வத³தி, கதா³சி ஸச்சம், தஸ்ஸ முஸாவாதே³ன அந்தரிதத்தா ஸச்சம் ஸச்சேன ந க⁴டீயதி, தஸ்மா ந ஸோ ஸச்சஸந்தோ⁴. அயம் பன ந தாதி³ஸோ. ஜீவிதஹேதுபி முஸா அவத்வா ஸச்சேன ஸச்சம் ஸந்த³ஹதியேவாதி ஸச்சஸந்தோ⁴. தே²தோதி தி²ரோ, தி²ரகதோ²தி அத்தோ². ஏகோ ஹி புக்³க³லோ ஹலித்³தி³ராகோ³ விய, து²ஸராஸிம்ஹி நிகா²தகா²ணுகோ விய, அஸ்ஸபிட்டே² ட²பிதகும்ப⁴ண்ட³மிவ ச, ந தி²ரகதோ² ஹோதி. ஏகோ பாஸாணலேகா² விய, இந்த³கீ²லோ விய ச தி²ரகதோ² ஹோதி. அஸினா ஸீஸே சி²ந்த³ந்தேபி த்³வே கதா² ந கதே²தி. அயம் வுச்சதி தே²தோ. பச்சயிகோதி பத்தியாயிதப்³ப³கோ, ஸத்³தா⁴யிகோதி அத்தோ². ஏகச்சோ ஹி புக்³க³லோ ந பச்சயிகோ ஹோதி. ‘இத³ம் கேன வுத்தம்? அஸுகேனா’தி வுத்தே ‘மா தஸ்ஸ வசனம் ஸத்³த³ஹதா²’தி வத்தப்³ப³தம் ஆபஜ்ஜதி. ஏகோ பச்சயிகோ ஹோதி. ‘இத³ம் கேன வுத்தம்? அஸுகேனா’தி வுத்தே ‘யதி³ தேன வுத்தம், இத³மேவ பமாணம், இதா³னி உபபரிக்கி²தப்³ப³ம் நத்தி², ஏவமேவ இத³’ந்தி வத்தப்³ப³தம் ஆபஜ்ஜதி. அயம் வுச்சதி பச்சயிகோ. அவிஸம்வாத³கோ லோகஸ்ஸாதி தாய ஸச்சவாதி³தாய லோகம் ந விஸம்வாதே³தீதி அத்தோ².

இமேஸம் பே⁴தா³யாதி யேஸம் இதோ ஸுத்வாதி வுத்தானம் ஸந்திகே ஸுதம், தேஸம் பே⁴தா³ய. பி⁴ன்னானம் வா ஸந்தா⁴தாதி த்³வின்னம் மித்தானம் வா ஸமானுபஜ்ஜா²யகாதீ³னம் வா கேனசிதே³வ காரணேன பி⁴ன்னானம் ஏகமேகம் உபஸங்கமித்வா – ‘தும்ஹாகம் ஈதி³ஸே குலே ஜாதானம், ஏவம் ப³ஹுஸ்ஸுதானம் இத³ம் ந யுத்த’ந்திஆதீ³னி வத்வா ஸந்தா⁴னம் கத்தா. அனுப்பதா³தாதி ஸந்தா⁴னானுப்பதா³தா. த்³வே ஜனே ஸமக்³கே³ தி³ஸ்வா – ‘தும்ஹாகம் ஏவரூபே குலே ஜாதானம், ஏவரூபேஹி கு³ணேஹி ஸமன்னாக³தானம் அனுச்ச²விகமேத’ந்திஆதீ³னி வத்வா த³ள்ஹீகம்மம் கத்தாதி அத்தோ². ஸமக்³கோ³ ஆராமோ அஸ்ஸாதி ஸமக்³கா³ராமோ. யத்த² ஸமக்³கா³ நத்தி², தத்த² வஸிதும்பி ந இச்ச²தீதி அத்தோ². ஸமக்³க³ராமோதிபி பாளி. அயமேவ அத்தோ². ஸமக்³க³ரதோதி ஸமக்³கே³ஸு ரதோ. தே பஹாய அஞ்ஞத்ர க³ந்தும்பி ந இச்ச²தீதி அத்தோ². ஸமக்³கே³ தி³ஸ்வாபி ஸுத்வாபி நந்த³தீதி ஸமக்³க³னந்தீ³. ஸமக்³க³கரணிம் வாசம் பா⁴ஸிதாதி யா வாசா ஸத்தே ஸமக்³கே³யேவ கரோதி, தம் ஸாமக்³கீ³கு³ணபரிதீ³பகமேவ வாசம் பா⁴ஸதி, ந இதரந்தி.

காலேன வத³தீதி காலவாதீ³. வத்தப்³ப³யுத்தகாலம் ஸல்லக்கே²த்வா வத³தீதி அத்தோ². பூ⁴தம் தத²ம் தச்ச²ம் ஸபா⁴வமேவ வத³தீதி பூ⁴தவாதீ³. தி³ட்ட²த⁴ம்மிகஸம்பராயிகத்த²ஸன்னிஸ்ஸிதமேவ கத்வா வத³தீதி அத்த²வாதீ³. நவலோகுத்தரத⁴ம்மஸன்னிஸ்ஸிதம் கத்வா வத³தீதி த⁴ம்மவாதீ³. ஸம்வரவினயபஹானவினயஸன்னிஸ்ஸிதம் கத்வா வத³தீதி வினயவாதீ³. நிதா⁴னம் வுச்சதி ட²பனோகாஸோ. நிதா⁴னமஸ்ஸ அத்தீ²தி நிதா⁴னவதீ. ஹத³யே நிதா⁴தப்³ப³யுத்தகம் வாசம் பா⁴ஸிதாதி அத்தோ². காலேனாதி ஏவரூபிம் பா⁴ஸமானோபி ச ‘‘அஹம் நிதா⁴னவதிம் வாசம் பா⁴ஸிஸ்ஸாமீ’’தி ந அகாலேன பா⁴ஸதி. யுத்தகாலம் பன ஸல்லக்கே²த்வாவ பா⁴ஸதீதி அத்தோ². ஸாபதே³ஸந்தி ஸஉபமம், ஸகாரணந்தி அத்தோ². பரியந்தவதிந்தி பரிச்சே²த³ம் த³ஸ்ஸேத்வா. யதா²ஸ்ஸா பரிச்சே²தோ³ பஞ்ஞாயதி, ஏவம் பா⁴ஸதீதி அத்தோ². அத்த²ஸம்ஹிதந்தி அனேகேஹிபி நயேஹி விப⁴ஜந்தேன பரியாதா³தும் அஸக்குணேய்யதாய அத்த²ஸம்பன்னம் பா⁴ஸதி. யம் வா ஸோ அத்த²வாதீ³ அத்த²ம் வத³தி, தேன அத்தே²ன ஸம்ஹிதத்தா அத்த²ஸம்ஹிதம் வாசம் பா⁴ஸதி. ந அஞ்ஞம் நிக்கி²பித்வா அஞ்ஞம் பா⁴ஸதீதி வுத்தம் ஹோதி.

179. பீ³ஜகா³மபூ⁴தகா³மஸமாரம்பா⁴தி மூலபீ³ஜம், க²ந்த⁴பீ³ஜம், ப²ளுபீ³ஜம், அக்³க³பீ³ஜம் பீ³ஜபீ³ஜந்தி பஞ்சவித⁴ஸ்ஸ பீ³ஜகா³மஸ்ஸ சேவ யஸ்ஸ கஸ்ஸசி நீலதிணருக்கா²தி³கஸ்ஸ பூ⁴தகா³மஸ்ஸ ச ஸமாரம்பா⁴. சே²த³னபே⁴த³னபசனாதி³பா⁴வேன விகோபனா படிவிரதோதி அத்தோ². ஏகப⁴த்திகோதி பாதராஸப⁴த்தம், ஸாயமாஸப⁴த்தந்தி த்³வே ப⁴த்தானி. தேஸு பாதராஸப⁴த்தம் அந்தோமஜ்ஜ²ன்ஹிகேன பரிச்சி²ன்னம். இதரம் மஜ்ஜ²ன்ஹிகதோ உத்³த⁴ம் அந்தோஅருணேன. தஸ்மா அந்தோமஜ்ஜ²ன்ஹிகே த³ஸக்க²த்தும் பு⁴ஞ்ஜமானோபி ஏகப⁴த்திகோவ ஹோதி. தம் ஸந்தா⁴ய வுத்தம் – ஏகப⁴த்திகோதி. ரத்தியா போ⁴ஜனம் ரத்தி, ததோ உபரதோதி ரத்தூபரதோ. அதிக்கந்தே மஜ்ஜ²ன்ஹிகே யாவ ஸூரியஸத்த²ங்க³மனா போ⁴ஜனம் விகாலபோ⁴ஜனம் நாம, ததோ விரதத்தா விரதோ விகாலபோ⁴ஜனா. ஸாஸனஸ்ஸ அனனுலோமத்தா விஸூகம் படாணீபூ⁴தம் த³ஸ்ஸனந்தி விஸூகத³ஸ்ஸனம். அத்தனா நச்சனனச்சாபனாதி³வஸேன நச்சா ச கீ³தா ச வாதி³தா ச அந்தமஸோ மயூரனச்சனாபனாதி³வஸேனபி பவத்தானம் நச்சாதீ³னம் விஸூகபூ⁴தா த³ஸ்ஸனா சாதி நச்சகீ³தவாதி³தவிஸூகத³ஸ்ஸனா. நச்சாதீ³னி ஹி அத்தனா பயோஜேதும் வா பரேஹி பயோஜாபேதும் வா யுத்தானி பஸ்ஸிதும் வா நேவ பி⁴க்கூ²னம் ந பி⁴க்கு²னீனம் வட்டந்தி. மாலாதீ³ஸு – மாலாதி யம்கிஞ்சி புப்ப²ம். க³ந்த⁴ந்தி யம்கிஞ்சி க³ந்த⁴ஜாதம். விலேபனந்தி ச²விராக³கரணம். தத்த² பிளந்த⁴ந்தோ தா⁴ரேதி நாம. ஊனட்டா²னம் பூரேந்தோ மண்டே³தி நாம. க³ந்த⁴வஸேன ச²விராக³வஸேன ச ஸாதி³யந்தோ விபூ⁴ஸேதி நாம. டா²னம் வுச்சதி காரணம். தஸ்மா யாய து³ஸ்ஸீல்யசேதனாய தானி மாலாதா⁴ரணாதீ³னி மஹாஜனோ கரோதி, ததோ படிவிரதோதி அத்தோ². உச்சாஸயனம் வுச்சதி பமாணாதிக்கந்தம். மஹாஸயனம் அகப்பியஸந்த²தம், ததோ படிவிரதோதி அத்தோ². ஜாதரூபந்தி ஸுவண்ணம். ரஜதந்தி கஹாபணோ, லோஹமாஸகோ, ஜதுமாஸகோ, தா³ருமாஸகோதி யே வோஹாரம் க³ச்ச²ந்தி. தஸ்ஸ உப⁴யஸ்ஸாபி படிக்³க³ஹணா படிவிரதோ, நேவ நம் உக்³க³ண்ஹாதி, ந உக்³க³ண்ஹாபேதி, ந உபனிக்கி²த்தம் ஸாதி³யதீதி அத்தோ².

ஆமகத⁴ஞ்ஞபடிக்³க³ஹணாதி ஸாலிவீஹியவகோ³து⁴மகங்கு³வரககுத்³ரூஸகஸங்கா²தஸ்ஸ ஸத்தவித⁴ஸ்ஸாபி ஆமகத⁴ஞ்ஞஸ்ஸ படிக்³க³ஹணா. ந கேவலஞ்ச ஏதேஸம் படிக்³க³ஹணமேவ, ஆமஸனம்பி பி⁴க்கூ²னம் ந வட்டதியேவ. ஆமகமம்ஸபடிக்³க³ஹணாதி ஏத்த² அஞ்ஞத்ர ஓதி³ஸ்ஸ அனுஞ்ஞாதா ஆமகமச்ச²மம்ஸானம் படிக்³க³ஹணமேவ பி⁴க்கூ²னம் ந வட்டதி, நோ ஆமஸனம். இத்தி²குமாரிகபடிக்³க³ஹணாதி ஏத்த² இத்தீ²தி புரிஸந்தரக³தா. இதரா குமாரிகா நாம. தாஸம் படிக்³க³ஹணம்பி ஆமஸனம்பி அகப்பியமேவ. தா³ஸிதா³ஸபடிக்³க³ஹணாதி ஏத்த² தா³ஸிதா³ஸவஸேனேவ தேஸம் படிக்³க³ஹணம் ந வட்டதி. ‘கப்பியகாரகம் த³ம்மி’, ‘ஆராமிகம் த³ம்மீ’தி ஏவம் வுத்தே பன வட்டதி. அஜேளகாதீ³ஸுபி கே²த்தவத்து²பரியோஸானேஸு கப்பியாகப்பியனயோ வினயவஸேன உபபரிக்கி²தப்³போ³. தத்த² கே²த்தம் நாம யஸ்மிம் புப்³ப³ண்ணம் ருஹதி. வத்து² நாம யஸ்மிம் அபரண்ணம் ருஹதி. யத்த² வா உப⁴யம்பி ருஹதி தம் கே²த்தம். தத³த்தா²ய அகதபூ⁴மிபா⁴கோ³ வத்து². கே²த்தவத்து²ஸீஸேன சேத்த² வாபிதளாகாதீ³னிபி ஸங்க³ஹிதானேவ.

தூ³தேய்யம் வுச்சதி தூ³தகம்மம். கி³ஹீனம் பஹிதம் பண்ணம் வா ஸாஸனம் வா க³ஹேத்வா தத்த² தத்த² க³மனம். பஹீணக³மனம் வுச்சதி பரக⁴ரம் பேஸிதஸ்ஸ கு²த்³த³கக³மனம். அனுயோகோ³ நாம தது³ப⁴யகரணம். தஸ்மா தூ³தேய்யபஹீணக³மனானம் அனுகோ³தி ஏவமேத்த² அத்தோ² த³ட்ட²ப்³போ³. கயவிக்கயாதி கயா ச விக்கயா ச. துலாகூடாதீ³ஸு – கூடந்தி வஞ்சனம். தத்த² துலாகூடம் நாம ரூபகூடம், அங்க³கூடம் க³ஹணகூடம், படிச்ச²ன்னகூடந்தி சதுப்³பி³த⁴ம் ஹோதி. தத்த² ரூபகூடம் நாம த்³வே துலா ஸமரூபா கத்வா க³ண்ஹந்தோ மஹதியா க³ண்ஹாதி, த³த³ந்தோ கு²த்³தி³காய தே³தி. அங்க³கூடம் நாம க³ண்ஹந்தோ பச்சா²பா⁴கே³ ஹத்தே²ன துலம் அக்கமதி, த³த³ந்தோ புப்³ப³பா⁴கே³. க³ஹணகூடம் நாம க³ண்ஹந்தோ மூலே ரஜ்ஜும் க³ண்ஹாதி, த³த³ந்தோ அக்³கே³. படிச்ச²ன்னகூடம் நாம துலம் ஸுஸிரம் கத்வா அந்தோ அயசுண்ணம் பக்கி²பித்வா க³ண்ஹந்தோ தம் பச்சா²பா⁴கே³ கரோதி, த³த³ந்தோ அக்³க³பா⁴கே³.

கம்ஸோ வுச்சதி ஸுவண்ணபாதி. தாய வஞ்சனம் கம்ஸகூடம். கத²ம்? ஏகம் ஸுவண்ணபாதிம் கத்வா அஞ்ஞா த்³வே திஸ்ஸோ லோஹபாதியோ ஸுவண்ணவண்ணா கரோந்தி, ததோ ஜனபத³ம் க³ந்த்வா கிஞ்சிதே³வ அட்³ட⁴குலம் பவிஸித்வா ஸுவண்ணபா⁴ஜனானி கிணதா²’தி வத்வா அக்³கே⁴ புச்சி²தே ஸமக்³க⁴தரம் தா³துகாமா ஹோந்தி. ததோ தேஹி ‘கத²ம் இமேஸம் ஸுவண்ணபா⁴வோ ஜானிதப்³போ³’தி வுத்தே ‘வீமம்ஸித்வா க³ண்ஹதா²’தி ஸுவண்ணபாதிம் பாஸாணே க⁴ம்ஸித்வா ஸப்³ப³பாதியோ த³த்வா க³ச்ச²ந்தி.

மானகூடம் நாம ஹத³யபே⁴த³ஸிகா²பே⁴த³ரஜ்ஜுபே⁴த³வஸேன திவித⁴ம் ஹோதி. தத்த² ஹத³யபே⁴தோ³ ஸப்பிதேலாதி³மினனகாலே லப்³ப⁴தி. தானி ஹி க³ண்ஹந்தோ ஹேட்டா² சி²த்³தே³ன மானேன ‘ஸணிகம் ஆஸிஞ்சா’தி வத்வா அந்தோபா⁴ஜனே ப³ஹும் பக்³க⁴ராபேத்வா க³ண்ஹாதி. த³த³ந்தோ சி²த்³த³ம் பிதா⁴ய ஸீக⁴ம் பூரேத்வா தே³தி. ஸிகா²பே⁴தோ³ திலதண்டு³லாதி³மினனகாலே லப்³ப⁴தி. தானி ஹி க³ண்ஹந்தோ ஸணிகம் ஸிக²ம் உஸ்ஸாபேத்வா க³ண்ஹாதி. த³த³ந்தோ வேகே³ன பூரேத்வா ஸிக²ம் சி²ந்த³ந்தோ தே³தி. ரஜ்ஜுபே⁴தோ³ கே²த்தவத்து²மினனகாலே லப்³ப⁴தி. லஞ்ஜம் அலப⁴ந்தா ஹி கே²த்தம் அமஹந்தம்பி மஹந்தம் கத்வா மினந்தி.

உக்கோடனாதீ³ஸு – உக்கோடனந்தி அஸ்ஸாமிகே ஸாமிகே காதும் லஞ்ஜக்³க³ஹணம். வஞ்சனந்தி தேஹி தேஹி உபாயேஹி பரேஸம் வஞ்சனம். தத்ரித³மேகம் வத்து² – ஏகோ கிர லுத்³த³கோ மிக³ஞ்ச மிக³போதகஞ்ச க³ஹேத்வா ஆக³ச்ச²தி. தமேகோ து⁴த்தோ – ‘‘கிம் போ⁴ மிகோ³ அக்³க⁴தி, கிம் மிக³போதகோ’’தி ஆஹ. ‘‘மிகோ³ த்³வே கஹாபணே, மிக³போதகோ ஏக’’ந்தி ச வுத்தே கஹாபணம் த³த்வா மிக³போதகம் க³ஹேத்வா தோ²கம் க³ந்த்வா நிவத்தோ, ‘‘ந மே போ⁴ மிக³போதகேன அத்தோ², மிக³ம் மே தே³ஹீ’’தி ஆஹ. தேன ஹி ‘‘த்³வே கஹாபணே தே³ஹீ’’தி. ஸோ ஆஹ – ‘‘நனு தே, போ⁴, மயா பட²மம் ஏகோ கஹாபணோ தி³ன்னோ’’தி? ‘‘ஆம தி³ன்னோ’’தி. இத³ம்பி மிக³போதகம் க³ண்ஹ, ஏவம் ஸோ ச கஹாபணோ அயஞ்ச கஹாபணக்³க⁴ணகோ மிக³போதகோதி த்³வே கஹாபணா ப⁴விஸ்ஸந்தீதி. ஸோ ‘‘காரணம் வத³தீ’’தி ஸல்லக்கே²த்வா மிக³போதகம் க³ஹேத்வா மிக³ம் அதா³ஸீதி.

நிகதீதி யோக³வஸேன வா மாயாவஸேன வா அபாமங்க³ம் பாமங்க³ந்தி, அமணிம் மணீதி, அஸுவண்ணம் ஸுவண்ணந்தி கத்வா பதிரூபகேன வஞ்சனம். ஸாசியோகோ³தி குடிலயோகோ³. ஏதேஸம்யேவ உக்கோடனாதீ³னமேதம் நாமம். தஸ்மா உக்கோடனஸாசியோகோ³ வஞ்சனஸாசியோகோ³ நிகதிஸாசியோகோ³தி ஏவமேத்த² அத்தோ² த³ட்ட²ப்³போ³. கேசி அஞ்ஞம் த³ஸ்ஸேத்வா அஞ்ஞஸ்ஸ பரிவத்தனம் ‘ஸாசியோகோ³’தி வத³ந்தி. தம் பன வஞ்சனேனேவ ஸங்க³ஹிதம்.

சே²த³னாதீ³ஸு – சே²த³னந்தி ஹத்த²ச்சே²த³னாதி³. வதோ⁴தி மாரணம். ப³ந்தோ⁴தி ரஜ்ஜுப³ந்த⁴னாதீ³ஹி ப³ந்த⁴னம். விபராமோஸோதி ஹிமவிபராமோஸோ, கு³ம்ப³விபராமோஸோதி து³விதோ⁴. யஞ்ஹி ஹிமபாதஸமயே ஹிமேன படிச்ச²ன்னா ஹுத்வா மக்³க³ப்படிபன்னம் ஜனம் முஸந்தி, அயம் ஹிமவிபராமோஸோ. யம் கு³ம்பா³தீ³ஹி படிச்ச²ன்னா முஸந்தி, அயம் கு³ம்ப³விபராமோஸோ. ஆலோபோ வுச்சதி கா³மனிக³மாதீ³னம் விலோபகரணம். ஸஹஸாகாரோதி ஸாஹஸிககிரியா. கே³ஹம் பவிஸித்வா மனுஸ்ஸானம் உரே ஸத்த²ம் ட²பேத்வா இச்சி²தப⁴ண்ட³க்³க³ஹணம். ஏவமேதஸ்மா சே²த³ன…பே… ஸஹஸாகாரா படிவிரதோ ஹோதி.

180. ஸோ ஸந்துட்டோ² ஹோதீதி ஸோ சதூஸு பச்சயேஸு த்³வாத³ஸவிதே⁴ன இதரீதரபச்சயஸந்தோஸேன ஸமன்னாக³தோ ஹோதி. காயபரிஹாரிகேனாதி காயம் பரிஹரணமத்தகேன. குச்சி²பரிஹாரிகேனாதி குச்சி²பரிஹரணமத்தகேன. ஸமாதா³யேவ பக்கமதீதி அட்ட²வித⁴ம் பி⁴க்கு² பரிக்கா²ரமத்தகம் ஸப்³ப³ம் க³ஹேத்வாவ காயபடிப³த்³த⁴ம் கத்வாவ க³ச்ச²தி. ‘‘மம விஹாரோ பரிவேணம் உபட்டா²கோ’’தி ஸங்கோ³ வா ப³த்³தோ⁴ வா ந ஹோதி. ஸோ ஜியா முத்தஸரோ விய யூதா² பக்கந்தோ, மத்தஹத்தீ² விய இச்சி²திச்சி²தம் ஸேனாஸனம் வனஸண்ட³ம் ருக்க²மூலம் வனபத்த²ம் பப்³பா⁴ரம் பரிபு⁴ஞ்ஜந்தோ ஏகோவ திட்ட²தி, ஏகோவ நிஸீத³தி. ஸப்³பி³ரியாபதே²ஸு ஏகோவ அது³தியோ.

‘‘சாதுத்³தி³ஸோ அப்படிகோ⁴ ச ஹோதி,

ஸந்துஸ்ஸமானோ இதரீதரேன;

பரிஸ்ஸயானம் ஸஹிதா அச²ம்பீ⁴,

ஏகோ சரே க²க்³க³விஸாணகப்போ’’தி. (ஸு. நி. 42);

ஏவம் வண்ணிதம் க²க்³க³விஸாணகப்பதம் ஆபஜ்ஜதி.

இதா³னி தமத்த²ம் உபமாய ஸாதே⁴ந்தோ, ‘‘ஸேய்யதா²பீ’’திஆதி³மாஹ. தத்த² பக்கீ² ஸகுணோதி பக்க²யுத்தோ ஸகுணோ. டே³தீதி உப்பததி. அயம் பனேத்த² ஸங்கே²பத்தோ² – ஸகுணோ நாம ‘‘அஸுகஸ்மிம் பதே³ஸே ருக்கோ² பரிபக்கப²லோ’’தி ஞத்வா நானாதி³ஸாஹி ஆக³ந்த்வா நக²பக்க²துண்டா³தீ³ஹி தஸ்ஸ ப²லானி விஜ்ஜ²ந்தா விது⁴னந்தா கா²த³ந்தி. ‘‘இத³ம் அஜ்ஜதனாய, இத³ம் ஸ்வாதனாய ப⁴விஸ்ஸதீ’’தி தேஸம் ந ஹோதி. ப²லே பன கீ²ணே நேவ ருக்க²ஸ்ஸ ஆரக்க²ம் ட²பேந்தி, ந தத்த² பத்தம் வா நக²ம் வா துண்ட³ம் வா ட²பேந்தி. அத² கோ² தஸ்மிம் ருக்கே² அனபேக்கோ² ஹுத்வா யோ யம் தி³ஸாபா⁴க³ம் இச்ச²தி, ஸோ தேன ஸபத்தபா⁴ரோவ உப்பதித்வா க³ச்ச²தி. ஏவமேவ அயம் பி⁴க்கு² நிஸ்ஸங்கோ³ நிரபேக்கோ²யேவ பக்கமதி, தேன வுத்தம் ஸமாதா³யேவ பக்கமதீதி. அரியேனாதி நித்³தோ³ஸேன. அஜ்ஜ²த்தந்தி ஸகே அத்தபா⁴வே. அனவஜ்ஜஸுக²ந்தி நித்³தோ³ஸஸுக²ம்.

181. ஸோ சக்கு²னா ரூபம் தி³ஸ்வாதி ஸோ இமினா அரியேன ஸீலக்க²ந்தே⁴ன ஸமன்னாக³தோ பி⁴க்கு² சக்கு²விஞ்ஞாணேன ரூபம் பஸ்ஸித்வாதி அத்தோ². ஸேஸபதே³ஸுபி யம் வத்தப்³ப³ம், தம் ஸப்³ப³ம் ஹேட்டா² வுத்தமேவ. அப்³யாஸேகஸுக²ந்தி கிலேஸேஹி அனவஸித்தஸுக²ம். அவிகிண்ணஸுக²ந்திபி வுத்தம். இந்த்³ரியஸம்வரஸுக²ஞ்ஹி தி³ட்டா²தீ³ஸு தி³ட்ட²மத்தாதி³வஸேன பவத்ததாய அவிகிண்ணம் ஹோதி.

182. ஸோ அபி⁴க்கந்தே படிக்கந்தேதி ஸோ மனச்ச²ட்டா²னம் இந்த்³ரியானம் ஸம்வரேன ஸமன்னாக³தோ பி⁴க்கு² இமேஸு அபி⁴க்கந்தபடிக்கந்தாதீ³ஸு ஸத்தஸு டா²னேஸு ஸதிஸம்பஜஞ்ஞவஸேன ஸம்பஜானகாரீ ஹோதி. தத்த² யம் வத்தப்³ப³ம் ஸியா, தம் ஜா²னவிப⁴ங்கே³ வுத்தமேவ.

ஸோ இமினா சாதிஆதி³னா கிம் த³ஸ்ஸேதி? அரஞ்ஞவாஸஸ்ஸ பச்சயஸம்பத்திம் த³ஸ்ஸேதி. யஸ்ஸ ஹி இமே சத்தாரோ பச்சயா நத்தி², தஸ்ஸ அரஞ்ஞவாஸோ ந இஜ்ஜ²தி, திரச்சா²னக³தேஹி வா வனசரகேஹி வா ஸத்³தி⁴ம் வத்தப்³ப³தம் ஆபஜ்ஜதி. அரஞ்ஞே அதி⁴வத்தா² தே³வதா ‘‘கிம் ஏவரூபஸ்ஸ பாபபி⁴க்கு²னோ அரஞ்ஞவாஸேனா’’தி பே⁴ரவம் ஸத்³த³ம் ஸாவேந்தி. ஹத்தே²ஹி ஸீஸம் பஹரித்வா பலாயனாகாரம் கரோந்தி. ‘‘அஸுகோ பி⁴க்கு² அரஞ்ஞம் பவிஸித்வா இத³ஞ்சித³ஞ்ச பாபகம்மம் அகாஸீ’’தி அயஸோ பத்த²ரதி. யஸ்ஸ பனேதே சத்தாரோ பச்சயா அத்தி², தஸ்ஸ அரஞ்ஞவாஸோ இஜ்ஜ²தி. ஸோ ஹி அத்தனோ ஸீலம் பச்சவேக்க²ந்தோ கிஞ்சி காளகம் வா திலகம் வா அபஸ்ஸந்தோ பீதிம் உப்பாதே³த்வா தம் க²யதோ வயதோ ஸம்மஸந்தோ அரியபூ⁴மிம் ஓக்கமதி. அரஞ்ஞே அதி⁴வத்தா² தே³வதா அத்தமனா வண்ணம் பா⁴ஸந்தி. இதிஸ்ஸ உத³கே பக்கி²த்ததேலபி³ந்து³ விய யஸோ வித்தா²ரிகோ ஹோதி. விவித்தந்திஆதீ³னி ஹேட்டா² வுத்தத்தா²னேவ. ஸோ ஏவம் ஸமாஹிதே சித்தே…பே… யதா²கம்மூபகே³ ஸத்தே பஜானாதீதி ஏத்தகே டா²னே யம் வத்தப்³ப³ம் ஸியா, தம் ஸப்³ப³ம் விஸுத்³தி⁴மக்³கே³ வுத்தமேவ.

185. ததியவிஜ்ஜாய ஸோ ஏவம் ஸமாஹிதே சித்தேதி விபஸ்ஸனாபாத³கம் சதுத்த²ஜ்ஜா²னசித்தம் வேதி³தப்³ப³ம். ஆஸவானம் க²யஞாணாயாதி அரஹத்தமக்³க³ஞாணத்தா²ய. அரஹத்தமக்³கோ³ ஹி ஆஸவானம் வினாஸனதோ ஆஸவானம் க²யோதி வுச்சதி. தத்ர சேதம் ஞாணம் தப்பரியாபன்னத்தாதி. சித்தம் அபி⁴னின்னாமேதீதி விபஸ்ஸனாசித்தம் அபி⁴னீஹரதி. ஸோ இத³ம் து³க்க²ந்தி ஏவமாதீ³ஸு – ‘‘ஏத்தகம் து³க்க²ம், ந இதோ பி⁴ய்யோ’’தி ஸப்³ப³ம்பி து³க்க²ஸச்சம் ஸரஸலக்க²ணப்படிவேதே⁴ன யதா²பூ⁴தம் பஜானாதி, படிவிஜ்ஜ²தி. தஸ்ஸ ச து³க்க²ஸ்ஸ நிப்³ப³த்திகம் தண்ஹம் – அயம் து³க்க²ஸமுத³யோதி; தது³ப⁴யம்பி யம் டா²னம் பத்வா நிருஜ்ஜ²தி, தம் தேஸம் அப்பவத்திம் நிப்³பா³னம் – அயம் து³க்க²னிரோதோ⁴தி; தஸ்ஸ ச ஸம்பாபகம் அரியமக்³க³ம் – அயம் து³க்க²னிரோத⁴கா³மினீ படிபதா³தி ஸரஸலக்க²ணபடிவேதே⁴ன யதா²பூ⁴தம் பஜானாதி, படிவிஜ்ஜ²தீதி – ஏவமத்தோ² வேதி³தப்³போ³.

ஏவம் ஸரூபதோ ஸச்சானி த³ஸ்ஸேத்வா இதா³னி கிலேஸவஸேன பரியாயதோ த³ஸ்ஸேந்தோ இமே ஆஸவாதிஆதி³மாஹ. தஸ்ஸ ஏவம் ஜானதோ ஏவம் பஸ்ஸதோதி தஸ்ஸ ஏவம் ஜானந்தஸ்ஸ ஏவம் பஸ்ஸந்தஸ்ஸ ஸஹ விபஸ்ஸனாய கோடிப்பத்தம் மக்³க³ம் கதே²தி. காமாஸவாதி காமாஸவதோ. விமுச்சதீதி இமினா மக்³க³க்க²ணம் த³ஸ்ஸேதி. விமுத்தஸ்மிந்தி இமினா ப²லக்க²ணம் த³ஸ்ஸேதி. மக்³க³க்க²ணே ஹி சித்தம் விமுச்சதி, ப²லக்க²ணே விமுத்தம் ஹோதி. விமுத்தஸ்மிம் விமுத்தமிதி ஞாணந்தி இமினா பச்சவேக்க²ணஞாணம் த³ஸ்ஸேதி. கீ²ணா ஜாதீதிஆதீ³ஹி தஸ்ஸ பூ⁴மிம். தேன ஹி ஞாணேன ஸோ பச்சவேக்க²ந்தோ ‘கீ²ணா ஜாதீ’திஆதீ³னி பஜானாதி. வுஸிதந்தி வுட்ட²ம் பரிவுட்ட²ம் கதம் சரிதம் நிட்டி²தந்தி அத்தோ². ப்³ரஹ்மசரியந்தி மக்³க³ப்³ரஹ்மசரியம். புது²ஜ்ஜனகல்யாணகேன ஹி ஸத்³தி⁴ம் ஸத்த ஸேக்கா² ப்³ரஹ்மசரியவாஸம் வஸந்தி நாம. கீ²ணாஸவோ வுட்ட²வாஸோ. தஸ்மா ஸோ அத்தனோ ப்³ரஹ்மசரியவாஸம் பச்சவேக்க²ந்தோ வுஸிதம் ப்³ரஹ்மசரியந்தி பஜானாதி. கதம் கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியாபா⁴வனாவஸேன ஸோளஸவித⁴ம்பி கிச்சம் நிட்டா²பிதந்தி அத்தோ². புது²ஜ்ஜனகல்யாணகாத³யோ ஹி தம் கிச்சம் கரோந்தி; கீ²ணாஸவோ கதகரணீயோ. தஸ்மா ஸோ அத்தனோ கரணீயம் பச்சவேக்க²ந்தோ. ‘‘கதம் கரணீய’’ந்தி பஜானாதி. நாபரம் இத்த²த்தாயாதி ‘‘இதா³னி புன ஏத்த²பா⁴வாய ஏவம் ஸோளஸகிச்சபா⁴வாய கிலேஸக்க²யாய வா மக்³க³பா⁴வனாகிச்சம் நத்தீ²’’தி பஜானாதி.

186. ஸராகா³தீ³ஸு – அப்பஹீனோதி விக்க²ம்ப⁴னப்பஹானேன வா தத³ங்க³ப்பஹானேன வா ஸமுச்சே²த³ப்பஹானேன வா அப்பஹீனோ.

187. லாபீ⁴ ஹோதீதிஆதீ³ஸு – லாபீ⁴தி லாப⁴வா படிலபி⁴த்வா டி²தோ. அஜ்ஜ²த்தம் சேதோஸமத²ஸ்ஸாதி நியகஜ்ஜ²த்தஸங்கா²தே அத்தனோ சித்தே உப்பன்னஸ்ஸ சேதோஸமத²ஸ்ஸ. அதி⁴பஞ்ஞாத⁴ம்மவிபஸ்ஸனாயாதி அதி⁴பஞ்ஞாஸங்கா²தாய க²ந்த⁴த⁴ம்மேஸு அனிச்சாதி³வஸேன பவத்தாய விபஸ்ஸனாய. ரூபஸஹக³தானந்தி ரூபனிமித்தாரம்மணானம் ரூபாவசரஸமாபத்தீனம். அரூபஸஹக³தானந்தி ந ரூபனிமித்தாரம்மணானம் அரூபஸமாபத்தீனம். ஏத்த² ச பட²மோ அட்ட²ஸமாபத்திலாபீ⁴ புது²ஜ்ஜனோ. து³தியோ ஸுக்க²விபஸ்ஸகஅரியஸாவகோ. ததியோ அட்ட²ஸமாபத்திலாபீ⁴ அரியஸாவகோ. சதுத்தோ² லோகியமஹாஜனோ வேதி³தப்³போ³.

188. அனுஸோதகா³மீஆதீ³ஸு – அனுஸோதகா³மீதி வட்டஸோதம் அனுக³தோ, வட்டஸோதே நிமுக்³கோ³ புது²ஜ்ஜனோ வேதி³தப்³போ³. படிஸோதகா³மீதி படிஸோதக³மனோ. அனுஸோதம் அக³ந்த்வா படிஸோதம் க³ச்ச²ந்தஸ்ஸேதம் அதி⁴வசனம். பாபஞ்ச கம்மம் ந கரோதீதி பஞ்ஞத்தம் வீதிக்கமந்தோ ந கரோதி. ஸஹாபி து³க்கே²ன ஸஹாபி தோ³மனஸ்ஸேனாதி கிலேஸபரியுட்டா²னே ஸதி உப்பன்னேன து³க்க²தோ³மனஸ்ஸேன ஸத்³தி⁴ம்பி. பரிபுண்ணந்தி திஸ்ஸன்னம் ஸிக்கா²னம் ஏகாயபி அனூனம். பரிஸுத்³த⁴ந்தி நிருபக்கிலேஸம். ப்³ரஹ்மசரியந்தி ஸேட்ட²சரியம். இமினா வாரேன ஸோதாபன்னஸகதா³கா³மினோ கதி²தா. கிம் பன தே ருத³ந்தா ப்³ரஹ்மசரியம் சரந்தீதி? ஆம. கிலேஸரோத³னேன ருத³ந்தா சரந்தி நாம. ஸீலஸம்பன்னோ புது²ஜ்ஜனபி⁴க்கு²பி ஏத்தே²வ ஸங்க³ஹிதோ.

டி²தத்தோதி டி²தஸபா⁴வோ. அனாகா³மீதி காமராக³ப்³யாபாதே³ஹி அகம்பனீயசித்ததாய ச தம்ஹா லோகா அனாவத்தித⁴ம்மதாய ச டி²தஸபா⁴வோ நாம. திண்ணோதி தண்ஹாஸோதம் உத்திண்ணோ. பாரங்க³தோதி நிப்³பா³னபாரம் க³தோ. த²லே திட்ட²தீதி அரஹத்தப²லஸமாபத்தித²லே திட்ட²தி. சேதோவிமுத்திந்தி ப²லஸமாதி⁴ம். பஞ்ஞாவிமுத்திந்தி ப²லஞாணம். அயம் வுச்சதீதி அயம் கீ²ணாஸவோ ‘‘திண்ணோ பாரங்க³தோ த²லே திட்ட²தி ப்³ராஹ்மணோ’’தி வுச்சதி. பா³ஹிதபாபதாய ஹி ஏஸ ப்³ராஹ்மணோ நாம.

189. அப்பஸ்ஸுதாதீ³ஸு – அப்பகம் ஸுதம் ஹோதீதி நவங்கே³ ஸத்து²ஸாஸனே கிஞ்சிதே³வ தோ²கம் ஸுதம் ஹோதி. ந அத்த²மஞ்ஞாய, ந த⁴ம்மமஞ்ஞாய த⁴ம்மானுத⁴ம்மபடிபன்னோ ஹோதீதி அட்ட²கத²ஞ்ச பாளிஞ்ச ஜானித்வா லோகுத்தரத⁴ம்மஸ்ஸ அனுரூபத⁴ம்மம் புப்³ப³பா⁴க³படிபத³ம் படிபன்னோ ந ஹோதி. இமினா நயேன ஸப்³ப³த்த² அத்தோ² வேதி³தப்³போ³.

190. ஸமணமசலாதீ³ஸு – ஸமணமசலோதி ஸமணஅசலோ, மகாரோ பத³ஸந்தி⁴கரோ. நிச்சலஸமணோ, தி²ரஸமணோதி அத்தோ². அயம் வுச்சதீதி அயம் ஸோதாபன்னோ ஸாஸனே மூலஜாதாய ஸத்³தா⁴ய பதிட்டி²தத்தா ‘ஸமணமசலோ’தி வுச்சதி. ஸகதா³கா³மீ பன ரஜ்ஜனகிலேஸஸ்ஸ அத்தி²தாய ஸமணபது³மோதி வுத்தோ. ரத்தட்டோ² ஹி இத⁴ பது³மட்டோ² நாமாதி வுத்தம். அனாகா³மீ காமராக³ஸங்கா²தஸ்ஸ ரஜ்ஜனகிலேஸஸ்ஸ நத்தி²தாய ஸமணபுண்ட³ரீகோதி வுத்தோ. பண்ட³ரட்டோ² ஹி இத⁴ புண்ட³ரீகட்டோ² நாமாதி வுத்தம். கீ²ணாஸவோ ச த²த்³த⁴பா⁴வகரானம் கிலேஸானம் அபா⁴வேன ஸமணேஸு ஸமணஸுகு²மாலோ நாமாதி வுத்தோ. அப்பது³க்க²ட்டே²னபி சேஸ ஸமணஸுகு²மாலோயேவாதி.

சதுக்கனித்³தே³ஸவண்ணனா.