5. பஞ்சகனித்³தே³ஸவண்ணனா

191. பஞ்சகே – தத்ராதி தேஸு ‘‘ஆரப⁴தி ச விப்படிஸாரீ ச ஹோதீ’’திஆதி³னா நயேன ஹேட்டா² உத்³தி³ட்ட²புக்³க³லேஸு. ய்வாயந்தி யோ அயம். ஆரப⁴தீதி ஏத்த² ஆரம்ப⁴ஸத்³தோ³ கம்மகிரியாஹிம்ஸனவீரியவிகோபனாபத்திவீதிக்கமேஸு வத்ததி. ததா² ஹேஸ ‘‘யம்கிஞ்சி து³க்க²ம் ஸம்போ⁴தி, ஸப்³ப³ம் ஆரம்ப⁴பச்சயா’’தி (ஸு. நி. 748) கம்மே ஆக³தோ. ‘‘மஹாயஞ்ஞா மஹாரம்பா⁴, ந தே ஹோந்தி மஹப்ப²லா’’தி (அ. நி. 4.39) கிரியாயம். ‘‘ஸமணம் கோ³தமம் உத்³தி³ஸ்ஸ பாணம் ஆரப⁴ந்தீ’’தி (ம. நி. 2.51-52) ஹிம்ஸனே. ‘‘ஆரப⁴த², நிக்க²மத², யுஞ்ஜத² பு³த்³த⁴ஸாஸனே’’தி (ஸம். நி. 1.185) வீரியே. ‘‘பீ³ஜகா³மபூ⁴தகா³மஸமாரம்பா⁴ படிவிரதோ ஹோதீ’’தி (தீ³. நி. 1.10, 194; ம. நி. 1.293) விகோபனே. ‘‘ஆரப⁴தி ச விப்படிஸாரீ ச ஹோதீ’’தி (அ. நி. 5.142) அயம் பன ஆபத்திவீதிக்கமே ஆக³தோ. தஸ்மா ஆபத்திவீதிக்கமவஸேன ஆரப⁴தி சேவ தப்பச்சயா விப்படிஸாரீ ச ஹோதீதி அயமேத்த² அத்தோ².

யதா²பூ⁴தம் நப்பஜானாதீதி அனதி⁴க³தத்தா யதா²ஸபா⁴வதோ ந ஜானாதி. யத்த²ஸ்ஸாதி யஸ்மிம் அஸ்ஸ, யம் டா²னம் பத்வா ஏதஸ்ஸ புக்³க³லஸ்ஸ உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தீதி அத்தோ². கிம் பன பத்வா தே நிருஜ்ஜ²ந்தீதி? அரஹத்தமக்³க³ம். ப²லப்பத்தஸ்ஸ பன நிருத்³தா⁴ நாம ஹோந்தி. ஏவம் ஸந்தேபி இத⁴ மக்³க³கிச்சவஸேன ப²லமேவ வுத்தந்தி வேதி³தப்³ப³ம். ஆரம்ப⁴ஜாதி ஆபத்திவீதிக்கமஸம்ப⁴வா. விப்படிஸாரஜாதி விப்படிஸாரதோ ஜாதா. பவட்³ட⁴ந்தீதி புனப்புனம் உப்பஜ்ஜனேன வட்³ட⁴ந்தி. ஸாதூ⁴தி ஆயாசனஸாது⁴. இத³ம் வுத்தம் ஹோதி – யாவ அபரத்³த⁴ஞ்ச வத ஆயஸ்மதா, ஏவம் ஸந்தேபி மயம் ஆயஸ்மந்தம் யாசாம – ‘‘தே³ஸேதப்³ப³யுத்தகஸ்ஸ தே³ஸனாய, வுட்டா²தப்³ப³யுத்தகஸ்ஸ வுட்டா²னேன, ஆவிகாதப்³ப³யுத்தகஸ்ஸ ஆவிகிரியாய, ஆரம்ப⁴ஜே ஆஸவே பஹாய, ஸுத்³த⁴ந்தே டி²தபா⁴வபச்சவேக்க²ணேன விப்படிஸாரஜே ஆஸவே படிவினோதே³த்வா நீஹரித்வா விபஸ்ஸனாசித்தஞ்சேவ விபஸ்ஸனாபஞ்ஞஞ்ச பா⁴வேதூ’’தி. அமுனா பஞ்சமேன புக்³க³லேனாதி ஏதேன பஞ்சமேன கீ²ணாஸவபுக்³க³லேன. ஸமஸமோ ப⁴விஸ்ஸதீதி லோகுத்தரகு³ணேஹி ஸமபா⁴வேனேவ ஸமோ ப⁴விஸ்ஸதீதி ஏவம் கீ²ணாஸவேன ஓவதி³தப்³போ³தி அத்தோ².

ஆரப⁴தி ந விப்படிஸாரீ ஹோதீதி ஆபத்திம் ஆபஜ்ஜதி. தம் பன தே³ஸேதும் ஸபா⁴க³புக்³க³லம் பரியேஸதி. தஸ்மா ந விப்படிஸாரீ ஹோதி. அங்கு³த்தரட்ட²கதா²யம் பன ‘‘வுட்டி²தத்தா ந விப்படிஸாரீ ஹோதீ’’தி வுத்தம். ந ஆரப⁴தி விப்படிஸாரீ ஹோதீதி ஆபத்திம் நாபஜ்ஜதி, வினயபஞ்ஞத்தியம் பன அகோவித³த்தா அனாபத்தியம் ஆபத்திஸஞ்ஞீ ஹுத்வா விப்படிஸாரீ ஹோதி. அங்கு³த்தரட்ட²கதா²யம் பன ‘‘ஸகிம் ஆபத்திம் ஆபஜ்ஜித்வா ததோ வுட்டா²ய பச்சா² கிஞ்சாபி நாபஜ்ஜதி, விப்படிஸாரம் பன வினோதே³தும் ந ஸக்கோதீ’’தி வுத்தம். ந ஆரப⁴தி ந விப்படிஸாரீ ஹோதீதி நேவ ஆபத்திம் ஆபஜ்ஜதி, ந விப்படிஸாரீ ஹோதி. கதமோ பனேஸ புக்³க³லோதி? ஓஸ்ஸட்ட²வீரியபுக்³க³லோ. ஸோ ஹி ‘‘கிம் மே இமஸ்மிம் பு³த்³த⁴காலே பரினிப்³பா³னேன, அனாக³தே மேத்தேய்யஸம்மாஸம்பு³த்³த⁴காலே பரினிப்³பா³யிஸ்ஸாமீ’’தி விஸுத்³த⁴ஸீலோபி படிபத்திம் ந பூரேதி. ஸோபி ‘‘கிமத்த²ம் ஆயஸ்மா பமத்தோ விஹரதி புது²ஜ்ஜனஸ்ஸ நாம க³தி அனிப³த்³தா⁴. ஆயஸ்மா ஹி மேத்தேய்யஸம்மாஸம்பு³த்³த⁴ஸ்ஸ ஸம்முக²பா⁴வம் லபே⁴ய்யபி ந லபே⁴ய்யாபீதி அரஹத்தத்தா²ய விபஸ்ஸனம் பா⁴வேஹீ’’தி ஓவதி³தப்³போ³வ. ஸேஸம் ஸப்³ப³த்த² வுத்தனயேனேவ வேதி³தப்³ப³ம்.

192. த³த்வா அவஜானாதீதிஆதீ³ஸு – ஏகோ பி⁴க்கு² மஹாபுஞ்ஞோ சதுபச்சயலாபீ⁴ ஹோதி. ஸோ சீவராதீ³னி லபி⁴த்வா அஞ்ஞம் அப்பபுஞ்ஞம் ஆபுச்ச²தி. ஸோபி தஸ்மிம் புனப்புனம் ஆபுச்ச²ந்தேபி க³ண்ஹாதியேவ. அத²ஸ்ஸ இதரோ தோ²கம் குபிதோ ஹுத்வா மங்குபா⁴வம் உப்பாதே³துகாமோ வத³தி – ‘‘அயம் அத்தனோ த⁴ம்மதாய சீவராதீ³னி ந லப⁴தி, அம்ஹே நிஸ்ஸாய லப⁴தீ’’தி. ஏவம் புக்³க³லோ த³த்வா அவஜானாதி நாம. ஏகோ பன ஏகேன ஸத்³தி⁴ம் த்³வே தீணி வஸ்ஸானி வஸந்தோ புப்³பே³ தம் புக்³க³லம் க³ரும் கத்வா பச்சா² க³ச்ச²ந்தே க³ச்ச²ந்தே காலே சித்தீகாரம் ந கரோதி, ஆஸனாபி ந வுட்டா²தி, உபட்டா²னம்பி ந க³ச்ச²தி. ஏவம் புக்³க³லோ ஸம்வாஸேன அவஜானாதி நாம.

ஆதே⁴ய்யமுகோ²தி ஆதி³தோ தே⁴ய்யமுகோ². பட²மவசனஸ்மிம்யேவ ட²பிதமுகோ²தி அத்தோ². அதி⁴முச்சிதா ஹோதீதி ஸத்³தா⁴தா ஹோதி. தத்ராயம் நயோ – ஏகோ புக்³க³லோ ஸாருப்பம்யேவ பி⁴க்கு²ம் ‘அஸாருப்போ ஏஸோ’தி கதே²தி, தம் ஸுத்வா ஏஸ நிட்ட²ம் க³ச்ச²தி. புன அஞ்ஞேன ஸபா⁴கே³ன பி⁴க்கு²னா ‘ஸாருப்போ அய’ந்தி வுத்தேபி தஸ்ஸ வசனம் ந க³ண்ஹாதி ‘‘அஸுகேன நாம ‘அஸாருப்போ அய’ந்தி அம்ஹாகம் கதி²த’’ந்தி புரிமபி⁴க்கு²னோவ கத²ம் க³ண்ஹாதி. அபரோபிஸ்ஸ து³ஸ்ஸீலம் ‘ஸீலவா’தி கதே²தி. தஸ்ஸ வசனம் ஸத்³த³ஹித்வா புன அஞ்ஞேன ‘‘அஸாருப்போ ஏஸ பி⁴க்கு², நாயம் தும்ஹாகம் ஸந்திகம் உபஸங்கமிதும் யுத்தோ’’தி வுத்தோபி தஸ்ஸ வசனம் அக்³க³ஹேத்வா புரிமஸ்ஸேவ கத²ம் க³ண்ஹாதி. அபரோ வண்ணம்பி கதி²தம் க³ண்ஹாதி, அவண்ணம்பி கதி²தம் க³ண்ஹாதியேவ. அயம்பி ஆதே⁴ய்யமுகோ²யேவ நாம. ஆதா⁴தப்³ப³முகோ² யம் யம் ஸுணாதி, தத்த² தத்த² ட²பிதமுகோ²தி அத்தோ².

லோலோதி ஸத்³தா⁴தீ³னம் இத்தரகாலட்டி²திகத்தா அஸ்ஸத்³தி⁴யாதீ³ஹி லுலிதபா⁴வேன லோலோ. இத்தரஸத்³தோ⁴தி பரித்தஸத்³தோ⁴, அபரிபுண்ணஸத்³தோ⁴. ஸேஸேஸுபி ஏஸேவ நயோ. ஏத்த² பன புனப்புனம் ப⁴ஜனவஸேன ஸத்³தா⁴வ ப⁴த்தி. பேமம் ஸத்³தா⁴பேமம் கே³ஹஸிதபேமம்பி வட்டதி. பஸாதோ³ ஸத்³தா⁴பஸாதோ³வ. ஏவம் புக்³க³லோ லோலோ ஹோதீதி ஏவம் இத்தரஸத்³தா⁴தி³தாய புக்³க³லோ லோலோ நாம ஹோதி. ஹலித்³தி³ராகோ³ விய, து²ஸராஸிம்ஹி கோட்டிதகா²ணுகோ விய, அஸ்ஸபிட்டி²யம் ட²பிதகும்ப⁴ண்ட³ம் விய ச அனிப³த்³த⁴ட்டா²னோ முஹுத்தேன பஸீத³தி, முஹுத்தேன குப்பதி.

மந்தோ³ மோமூஹோதி அஞ்ஞாணபா⁴வேன மந்தோ³ அவிஸத³தாய மோமூஹோ. மஹாமூள்ஹோதி அத்தோ².

193. யோதா⁴ஜீவூபமேஸு – யோதா⁴ஜீவாதி யுத்³தூ⁴பஜீவினோ. ரஜக்³க³ந்தி ஹத்தி²அஸ்ஸாதீ³னம் பாத³ப்பஹாரபி⁴ன்னாய பூ⁴மியா உக்³க³தம் ரஜக்க²ந்த⁴ம். ந ஸந்த²ம்ப⁴தீதி ஸந்த²ம்பி⁴த்வா டா²தும் ந ஸக்கோதி. ஸஹதி ரஜக்³க³ந்தி ரஜக்க²ந்த⁴ம் தி³ஸ்வாபி அதி⁴வாஸேதி. த⁴ஜக்³க³ந்தி ஹத்தி²அஸ்ஸாதி³பிட்டே²ஸு வா ரதே²ஸு வா உஸ்ஸாபிதானம் த⁴ஜானம் அக்³க³ம். உஸ்ஸாரணந்தி ஹத்தி²அஸ்ஸரதா²தீ³னஞ்சேவ ப³லகாயஸ்ஸ ச உச்சாஸத்³த³மஹாஸத்³த³ம். ஸம்பஹாரேதி ஸமாக³தே அப்பமத்தகேபி பஹாரே. ஹஞ்ஞதீதி விஹஞ்ஞதி, விகா⁴தம் ஆபஜ்ஜதி. ப்³யாபஜ்ஜதீதி விபத்திம் ஆபஜ்ஜதி, பகதிபா⁴வம் ஜஹதி. ஸஹதி ஸம்பஹாரந்தி த்³வே தயோ பஹாரே பத்வாபி ஸஹதி, அதி⁴வாஸேதி. தமேவ ஸங்கா³மஸீஸந்தி தமேவ ஜயக²ந்தா⁴வாரட்டா²னம். அஜ்ஜா²வஸதீதி ஸத்தாஹமத்தம் அபி⁴ப⁴வித்வா ஆவஸதி. கிம் காரணா? லத்³த⁴ப்பஹாரானம் பஹாரஜக்³க³னத்த²ஞ்சேவ கதகம்மானம் விஸேஸம் ஞத்வா டா²னந்தரதா³னத்த²ஞ்ச இஸ்ஸரியஸுகா²னுப⁴வனத்த²ஞ்ச.

194. இதா³னி யஸ்மா ஸத்து² யோதா⁴ஜீவேஹி கிச்சம் நத்தி², இமஸ்மிம் பன ஸாஸனே ததா²ரூபே பஞ்ச புக்³க³லே த³ஸ்ஸேதும் இத³ம் ஓபம்மம் ஆப⁴தம், தஸ்மா தே புக்³க³லே த³ஸ்ஸேந்தோ ஏவமேவந்திஆதி³மாஹ.

தத்த² ஸம்ஸீத³தீதி மிச்சா²விதக்கஸ்மிம் விஸீத³தி, அனுபவிஸதி. ந ஸக்கோதி ப்³ரஹ்மசரியம் ஸந்தா⁴ரேதுந்தி ப்³ரஹ்மசரியவாஸம் அனுபச்சி²ஜ்ஜமானம் கோ³பேதும் ந ஸக்கோதி. ஸிக்கா²து³ப்³ப³ல்யம் ஆவிகத்வாதி ஸிக்கா²ய து³ப்³ப³லபா⁴வம் பகாஸேத்வா. கிமஸ்ஸ ரஜக்³க³ஸ்மிந்தி கிம் தஸ்ஸ புக்³க³லஸ்ஸ ரஜக்³க³ம் நாமாதி வத³தி. அபி⁴ரூபாதி அபி⁴ரூபவதீ. த³ஸ்ஸனீயாதி த³ஸ்ஸனயோக்³கா³. பாஸாதி³காதி த³ஸ்ஸனேனேவ சித்தப்பஸாதா³வஹா. பரமாயாதி உத்தமாய. வண்ணபோக்க²ரதாயாதி ஸரீரவண்ணேன சேவ அங்க³ஸண்டா²னேன ச.

196. ஊஹஸதீதி அவஹஸதி. உல்லபதீதி கதே²தி. உஜ்ஜக்³க⁴தீதி பாணிம் பஹரித்வா மஹாஹஸிதம் ஹஸதி. உப்பண்டே³தீதி உப்பண்ட³னகத²ம் கதே²தி.

197. அபி⁴னிஸீத³தீதி அபி⁴ப⁴வித்வா ஸந்திகே வா ஏகாஸனே வா நிஸீத³தி. து³தியபதே³பி ஏஸேவ நயோ. அஜ்ஜோ²த்த²ரதீதி அவத்த²ரதி.

198. வினிவேடே²த்வா வினிமோசேத்வாதி க³ஹிதட்டா²னதோ தஸ்ஸ ஹத்த²ம் வினிவேடே²த்வா சேவ, மோசேத்வா ச. ஸேஸமேத்த² உத்தானத்த²மேவ.

199. பிண்ட³பாதிகேஸு – மந்த³த்தா மோமூஹத்தாதி நேவ ஸமாதா³னம் ஜானாதி, ந ஆனிஸம்ஸம்; அத்தனோ பன மந்த³த்தா மோமூஹத்தா அஞ்ஞாணேனேவ பிண்ட³பாதிகோ ஹோதி. பாபிச்சோ² இச்சா²பகதோதி பிண்ட³பாதிகஸ்ஸ மே ஸதோ ‘‘அயம் பிண்ட³பாதிகோ’’தி சதுபச்சயஸக்காரம் கரிஸ்ஸந்தி. லஜ்ஜீ, அப்பிச்சோ²திஆதீ³ஹி ச கு³ணேஹி ஸம்பா⁴வேஸ்ஸந்தீதி. ஏவம் பாபிகாய இச்சா²ய ட²த்வா தாய பாபிச்சா²ய அபி⁴பூ⁴தோ ஹுத்வா பிண்ட³பாதிகோ ஹோதி. உம்மாத³வஸேன பிண்டா³ய சரந்தோ பன உம்மாதா³ சித்தவிக்கே²பா பிண்ட³பாதிகோ நாம ஹோதி. வண்ணிதந்தி இத³ம் பிண்ட³பாதிகங்க³ம் நாம பு³த்³தே⁴ஹி ச பு³த்³த⁴ஸாவகேஹி ச வண்ணிதம் பஸத்த²ந்தி பிண்ட³பாதிகோ ஹோதி. அப்பிச்ச²தம்யேவ நிஸ்ஸாயாதிஆதீ³ஸு – ‘‘இதி அப்பிச்சோ² ப⁴விஸ்ஸாமி, இத³ம் மே பிண்ட³பாதிகங்க³ம் அப்பிச்ச²தாய ஸம்வத்திஸ்ஸதி; ‘இதி ஸந்துட்டோ² ப⁴விஸ்ஸாமி இத³ம் மே பிண்ட³பாதிகங்க³ம் ஸந்துட்டி²யா ஸம்வத்திஸ்ஸதி’; ‘இதி கிலேஸே ஸம்லிகி²ஸ்ஸாமி’, இத³ம் மே பிண்ட³பாதிகங்க³ம் கிலேஸஸல்லேக²னத்தா²ய ஸம்வத்திஸ்ஸதீ’’தி பிண்ட³பாதிகோ ஹோதி. இத³மத்தி²தந்தி இமாய கல்யாணாய படிபத்தியா அத்தி²கபா⁴வம், இமினா வா பிண்ட³பாதமத்தேன அத்தி²கபா⁴வம். யம் யம் லத்³த⁴ம் தேன தேனேவ யாபனபா⁴வம் நிஸ்ஸாயாதி அத்தோ². அக்³கோ³தி ஜேட்ட²கோ. ஸேஸானி தஸ்ஸேவ வேவசனானி.

க³வா கீ²ரந்தி கா³விதோ கீ²ரம் நாம ஹோதி, ந வினா கா³வியா. கீ²ரம்ஹா த³தீ⁴திஆதீ³ஸுபி ஏஸேவ நயோ. ஏவமேவந்தி யதா² ஏதேஸு பஞ்சஸு கோ³ரஸேஸு ஸப்பிமண்டோ³ அக்³கோ³; ஏவமேவம் இமேஸு பஞ்சஸு பிண்ட³பாதிகேஸு ய்வாயம் அப்பிச்ச²தாதீ³னி நிஸ்ஸாய பிண்ட³பாதிகோ ஹோதி. அயம் அக்³கோ³ ச ஸேட்டோ² ச பாமோக்கோ² ச உத்தமோ ச பவரோ ச. இமேஸு பன பஞ்சஸு பிண்ட³பாதிகேஸு த்³வேவ ஜனா பிண்ட³பாதிகா, தயோ ந பிண்ட³பாதிகா. நாமமத்தேன பன பிண்ட³பாதிகாதி வேதி³தப்³பா³. க²லுபச்சா²ப⁴த்திகாதீ³ஸுபி ஏஸேவ நயோதி.

பஞ்சகனித்³தே³ஸவண்ணனா.