த⁴ம்முத்³தே³ஸவாரகதா²

பட²மசித்தம்

365. இதா³னி அகுஸலத⁴ம்மபத³ம் பா⁴ஜேத்வா த³ஸ்ஸேதும் கதமே த⁴ம்மா அகுஸலாதிஆதி³ ஆரத்³த⁴ம். தத்த² த⁴ம்மவவத்தா²னாதி³வாரப்பபே⁴தோ³ ச ஹேட்டா² ஆக³தானம் பதா³னம் அத்த²வினிச்ச²யோ ச ஹேட்டா² வுத்தனயேனேவ வேதி³தப்³போ³. தத்த² தத்த² பன விஸேஸமத்தமேவ வண்ணயிஸ்ஸாம. தத்த² ஸமயவவத்தா²னே தாவ யஸ்மா, குஸலஸ்ஸ விய, அகுஸலஸ்ஸ பூ⁴மிபே⁴தோ³ நத்தி², தஸ்மா ஏகந்தம் காமாவசரம்பி ஸமானம் ஏதம் ‘காமாவசர’ந்தி ந வுத்தம். தி³ட்டி²க³தஸம்பயுத்தந்தி ஏத்த² தி³ட்டி² ஏவ தி³ட்டி²க³தம் ‘கூ³த²க³தம் முத்தக³த’ந்திஆதீ³னி (அ. நி. 9.11) விய. க³ந்தப்³பா³பா⁴வதோ வா தி³ட்டி²யா க³தமத்தமேவேதந்திபி தி³ட்டி²க³தம். தேன ஸம்பயுத்தம் தி³ட்டி²க³தஸம்பயுத்தம்.

தத்த² அஸத்³த⁴ம்மஸவனம், அகல்யாணமித்ததா, அரியானம் அத³ஸ்ஸனகாமதாதீ³னி அயோனிஸோ மனஸிகாரோதி ஏவமாதீ³ஹி காரணேஹி இமஸ்ஸ தி³ட்டி²க³தஸங்கா²தஸ்ஸ மிச்சா²த³ஸ்ஸனஸ்ஸ உப்பத்தி வேதி³தப்³பா³. யே ஹி ஏதே தி³ட்டி²வாத³படிஸம்யுத்தா அஸத்³த⁴ம்மா தேஸம் ப³ஹுமானபுப்³ப³ங்க³மேன அதிக்கந்தமஜ்ஜ²த்தேன உபபரிக்கா²ரஹிதேன ஸவனேன, யே ச தி³ட்டி²விபன்னா அகல்யாணமித்தா தம்ஸம்பவங்கதாஸங்கா²தாய அகல்யாணமித்ததாய, பு³த்³தா⁴தீ³னம் அரியானஞ்சேவ ஸப்புரிஸானஞ்ச அத³ஸ்ஸனகாமதாய சதுஸதிபட்டா²னாதி³பே⁴தே³ அரியத⁴ம்மே அகோவித³த்தேன பாதிமோக்க²ஸம்வரஇந்த்³ரியஸம்வரஸதிஸம்வரஞாணஸம்வரபஹானஸம்வரப்பபே⁴தே³ அரியத⁴ம்மே சேவ ஸப்புரிஸத⁴ம்மே ச ஸம்வரபே⁴த³ஸங்கா²தேன அவினயேன தேஹேவ காரணேஹி பரிபா⁴விதேன அயோனிஸோ மனஸிகாரேன கோதூஹலமங்க³லாதி³பஸுததாய ச ஏதம் உப்பஜ்ஜதீதி வேதி³தப்³ப³ம். அஸங்கா²ரபா⁴வோ பனஸ்ஸ சித்தஸ்ஸ ஹேட்டா² வுத்தனயேனேவ வேதி³தப்³போ³.

த⁴ம்முத்³தே³ஸவாரே ப²ஸ்ஸோதி அகுஸலசித்தஸஹஜாதோ ப²ஸ்ஸோ. வேத³னாதீ³ஸுபி ஏஸேவ நயோ. இதி அகுஸலமத்தமேவ ஏதேஸம் புரிமேஹி விஸேஸோ.

சித்தஸ்ஸேகக்³க³தா ஹோதீதி பாணாதிபாதாதீ³ஸுபி அவிக்கி²த்தபா⁴வேன சித்தஸ்ஸ ஏகக்³க³தா ஹோதி. மனுஸ்ஸா ஹி சித்தம் ஸமாத³ஹித்வா அவிக்கி²த்தா ஹுத்வா அவிரஜ்ஜ²மானானி ஸத்தா²னி பாணஸரீரேஸு நிபாதேந்தி, ஸுஸமாஹிதா பரேஸம் ஸந்தகம் ஹரந்தி, ஏகரஸேன சித்தேன மிச்சா²சாரம் ஆபஜ்ஜந்தி. ஏவம் அகுஸலப்பவத்தியம்பி சித்தஸ்ஸ ஏகக்³க³தா ஹோதி.

மிச்சா²தி³ட்டீ²தி அயாதா²வதி³ட்டி², விரஜ்ஜி²த்வா க³ஹணதோ வா விததா² தி³ட்டி² மிச்சா²தி³ட்டி². அனத்தா²வஹத்தா பண்டி³தேஹி ஜிகு³ச்சி²தா தி³ட்டீ²திபி மிச்சா²தி³ட்டி². மிச்சா²ஸங்கப்பாதீ³ஸுபி ஏஸேவ நயோ. அபிச மிச்சா² பஸ்ஸந்தி தாய, ஸயம் வா மிச்சா² பஸ்ஸதி, மிச்சா²த³ஸ்ஸனமத்தமேவ வா ஏஸாதி மிச்சா²தி³ட்டி². ஸா அயோனிஸோ அபி⁴னிவேஸலக்க²ணா, பராமாஸரஸா, மிச்சா²பி⁴னிவேஸபச்சுபட்டா²னா, அரியானம் அத³ஸ்ஸனகாமதாதி³பத³ட்டா²னா; பரமம் வஜ்ஜந்தி த³ட்ட²ப்³பா³. மிச்சா²ஸங்கப்பாதீ³ஸு ‘மிச்சா²’தி பத³மத்தமேவ விஸேஸோ. ஸேஸம் குஸலாதி⁴காரே வுத்தனயேனேவ வேதி³தப்³ப³ம்.

அஹிரிகப³லம் அனோத்தப்பப³லந்தி ஏத்த² ப³லத்தோ² நித்³தே³ஸவாரே ஆவி ப⁴விஸ்ஸதி. இதரேஸு பன – ந ஹிரியதீதி அஹிரிகோ. அஹிரிகஸ்ஸ பா⁴வோ அஹிரிகம். ந ஓத்தப்பம் அனோத்தப்பம். தேஸு அஹிரிகம் காயது³ச்சரிதாதீ³ஹி அஜிகு³ச்ச²னலக்க²ணம், அலஜ்ஜாலக்க²ணம் வா. அனோத்தப்பம் தேஹேவ அஸாரஜ்ஜனலக்க²ணம் அனுத்தாஸனலக்க²ணம் வா. அஹிரிகமேவ ப³லம் அஹிரிகப³லம். அனோத்தப்பமேவ ப³லம் அனோத்தப்பப³லம். அயமேத்த² ஸங்கே²பத்தோ². வித்தா²ரோ பன ஹேட்டா² வுத்தபடிபக்க²வஸேன வேதி³தப்³போ³.

லுப்³ப⁴ந்தி தேன, ஸயம் வா லுப்³ப⁴தி, லுப்³ப⁴னமத்தமேவ வா தந்தி லோபோ⁴. முய்ஹந்தி தேன, ஸயம் வா முய்ஹதி, முய்ஹனமத்தமேவ வா தந்தி மோஹோ. தேஸு லோபோ⁴ ஆரம்மணக்³க³ஹணலக்க²ணோ மக்கடாலேபோ விய, அபி⁴ஸங்க³ரஸோ தத்தகபாலே கி²த்தமம்ஸபேஸி விய, அபரிச்சாக³பச்சுபட்டா²னோ தேலஞ்ஜனராகோ³ விய, ஸம்யோஜனியத⁴ம்மேஸு அஸ்ஸாத³த³ஸ்ஸனபத³ட்டா²னோ. ஸோ தண்ஹானதீ³பா⁴வேன வட்³ட⁴மானோ, ஸீக⁴ஸோதா நதீ³ விய மஹாஸமுத்³த³ம், அபாயமேவ க³ஹேத்வா க³ச்ச²தீதி த³ட்ட²ப்³போ³.

மோஹோ சித்தஸ்ஸ அந்த⁴பா⁴வலக்க²ணோ அஞ்ஞாணலக்க²ணோ வா, அஸம்படிவேத⁴ரஸோ ஆரம்மணஸபா⁴வச்சா²த³னரஸோ வா, அஸம்மாபடிபத்திபச்சுபட்டா²னோ அந்த⁴காரபச்சுபட்டா²னோ வா, அயோனிஸோமனஸிகாரபத³ட்டா²னோ. ஸப்³பா³குஸலானம் மூலந்தி த³ட்ட²ப்³போ³.

அபி⁴ஜ்ஜா²யந்தி தாய, ஸயம் வா அபி⁴ஜ்ஜா²யதி, அபி⁴ஜ்ஜா²யனமத்தமேவ வா ஏஸாதி அபி⁴ஜ்ஜா². ஸா பரஸம்பத்தீனம் ஸககரணஇச்சா²லக்க²ணா, தேனாகாரேன ஏஸனபா⁴வரஸா, பரஸம்பத்தி-அபி⁴முக²பா⁴வபச்சுபட்டா²னா, பரஸம்பத்தீஸு அபி⁴ரதிபத³ட்டா²னா. பரஸம்பத்திஅபி⁴முகா² ஏவ ஹி ஸா உபட்ட²ஹதி. தாஸு ச அபி⁴ரதியா ஸதி பவத்ததி, பரஸம்பத்தீஸு சேதஸோ ஹத்த²ப்பஸாரோவியாதி த³ட்ட²ப்³பா³.

ஸமதோ² ஹோதீதிஆதீ³ஸு அஞ்ஞேஸு கிச்சேஸு விக்கே²பஸமனதோ ஸமதோ². அகுஸலப்பவத்தியம் சித்தம் பக்³க³ண்ஹாதீதி பக்³கா³ஹோ. ந விக்கி²பதீதி அவிக்கே²போ.

இமஸ்மிம் சித்தே ஸத்³தா⁴, ஸதி, பஞ்ஞா, ச² யுக³ளகானீதி இமே த⁴ம்மா ந க³ஹிதா. கஸ்மா? அஸ்ஸத்³தி⁴யசித்தே பஸாதோ³ நாம நத்தி². தஸ்மா தாவ ஸத்³தா⁴ ந க³ஹிதா. கிம் பன தி³ட்டி²க³திகா அத்தனோ அத்தனோ ஸத்தா²ரானம் ந ஸத்³த³ஹந்தீதி? ஸத்³த³ஹந்தி. ஸா பன ஸத்³தா⁴ நாம ந ஹோதி, வசனஸம்படிச்ச²னமத்தமேவேதம். அத்த²தோ அனுபபரிக்கா² வா ஹோதி, தி³ட்டி² வா. அஸதியசித்தே பன ஸதி நத்தீ²தி ந க³ஹிதா. கிம் தி³ட்டி²க³திகா அத்தனா கதகம்மம் ந ஸரந்தீதி? ஸரந்தி. ஸா பன ஸதி நாம ந ஹோதி. கேவலம் தேனாகாரேன அகுஸலசித்தப்பவத்தி. தஸ்மா ஸதி ந க³ஹிதா. அத² கஸ்மா ‘‘மிச்சா²ஸதீ’’தி (தீ³. நி. 3.333; ஸம். நி. 5.1) ஸுத்தந்தே வுத்தா? ஸா பன அகுஸலக்க²ந்தா⁴னம் ஸதிவிரஹிதத்தா ஸதிபடிபக்க²த்தா ச மிச்சா²மக்³க³மிச்ச²த்தானம் பூரணத்த²ம் தத்த² பரியாயேன தே³ஸனா கதா. நிப்பரியாயேன பனேஸா நத்தி². தஸ்மா ந க³ஹிதா. அந்த⁴பா³லசித்தே பன பஞ்ஞா நத்தீ²தி ந க³ஹிதா. கிம் தி³ட்டி²க³திகானம் வஞ்சனாபஞ்ஞா நத்தீ²தி? அத்தி². ந பனேஸா பஞ்ஞா, மாயா நாமேஸா ஹோதி. ஸா அத்த²தோ தண்ஹாவ. இத³ம் பன சித்தம் ஸத³ரத²ம் க³ருகம் பா⁴ரியம் கக்க²ளம் த²த்³த⁴ம் அகம்மஞ்ஞம் கி³லானம் வங்கம் குடிலம். தஸ்மா பஸ்ஸத்³தா⁴தீ³னி ச² யுக³ளகானி ந க³ஹிதானி.

ஏத்தாவதா பத³படிபாடியா சித்தங்க³வஸேன பாளிஆருள்ஹானி த்³வத்திம்ஸ பதா³னி த³ஸ்ஸேத்வா இதா³னி யேவாபனகத⁴ம்மே த³ஸ்ஸேதும் யே வா பன தஸ்மிம் ஸமயேதிஆதி³மாஹ. தத்த² ஸப்³பே³ஸுபி அகுஸலசித்தேஸு ச²ந்தோ³ அதி⁴மோக்கோ² மனஸிகாரோ மானோ இஸ்ஸா மச்ச²ரியம் தி²னம் மித்³த⁴ம் உத்³த⁴ச்சம் குக்குச்சந்தி இமே த³ஸேவ யேவாபனகா ஹோந்தி த⁴ம்மா, ஸுத்தாக³தா, ஸுத்தபதே³ஸு தி³ஸ்ஸரேதி வுத்தா. இமஸ்மிம் பன சித்தே ச²ந்தோ³ அதி⁴மோக்கோ² மனஸிகாரோ உத்³த⁴ச்சந்தி இமே அபண்ணகங்க³ஸங்கா²தா சத்தாரோவ யேவாபனகா ஹோந்தி.

தத்த² ச²ந்தா³த³யோ ஹேட்டா² வுத்தனயேனேவ வேதி³தப்³பா³. கேவலஞ்ஹி தே குஸலா, இமே அகுஸலா. இதரம் பன உத்³த⁴தஸ்ஸ பா⁴வோ ‘உத்³த⁴ச்சம்’. தம் சேதஸோ அவூபஸமலக்க²ணம் வாதாபி⁴கா⁴தசலஜலம் விய, அனவட்டா²னரஸம் வாதாபி⁴கா⁴தசலத⁴ஜபடாகா விய, ப⁴ந்தத்தபச்சுபட்டா²னம் பாஸாணாபி⁴கா⁴தஸமுத்³த⁴தப⁴ஸ்மா விய, சேதஸோ அவூபஸமே அயோனிஸோமனஸிகாரபத³ட்டா²னம். சித்தவிக்கே²போதி த³ட்ட²ப்³ப³ம்.

இதி ப²ஸ்ஸாதீ³னி த்³வத்திம்ஸ, யேவாபனகவஸேன வுத்தானி சத்தாரீதி ஸப்³பா³னிபி இமஸ்மிம் த⁴ம்முத்³தே³ஸவாரே ச²த்திம்ஸ த⁴ம்மபதா³னி ப⁴வந்தி. சத்தாரி அபண்ணகங்கா³னி ஹாபேத்வா பாளியம் ஆக³தானி த்³வத்திம்ஸமேவ. அக்³க³ஹிதக்³க³ஹணேன பனேத்த² ப²ஸ்ஸபஞ்சகம், விதக்கோ விசாரோ பீதி சித்தஸ்ஸேகக்³க³தா வீரியிந்த்³ரியம் ஜீவிதிந்த்³ரியம் மிச்சா²தி³ட்டி² அஹிரிகம் அனோத்தப்பம் லோபோ⁴ மோஹோதி ஸோளஸ த⁴ம்மா ஹோந்தி.

தேஸு ஸோளஸஸு ஸத்த த⁴ம்மா அவிப⁴த்திகா நவ ஸவிப⁴த்திகா ஹோந்தி. கதமே ஸத்த? ப²ஸ்ஸோ ஸஞ்ஞா சேதனா விசாரோ பீதி ஜீவிதிந்த்³ரியம் மோஹோதி இமே ஸத்த அவிப⁴த்திகா. வேத³னா சித்தம் விதக்கோ சித்தஸ்ஸேகக்³க³தா வீரியிந்த்³ரியம் மிச்சா²தி³ட்டி² அஹிரிகம் அனோத்தப்பம் லோபோ⁴தி இமே நவ ஸவிப⁴த்திகா.

தேஸு ச² த⁴ம்மா த்³வீஸு டா²னேஸு விப⁴த்தா, ஏகோ தீஸு, ஏகோ சதூஸு, ஏகோ ச²ஸு. கத²ம்? சித்தம் விதக்கோ மிச்சா²தி³ட்டி² அஹிரிகம் அனோத்தப்பம் லோபோ⁴தி இமே ச² த்³வீஸு டா²னேஸு விப⁴த்தா. தேஸு ஹி சித்தம் தாவ ப²ஸ்ஸபஞ்சகம் பத்வா சித்தம் ஹோதீதி வுத்தம், இந்த்³ரியானி பத்வா மனிந்த்³ரியந்தி. விதக்கோ ஜா²னங்கா³னி பத்வா விதக்கோ ஹோதீதி வுத்தோ, மக்³க³ங்கா³னி பத்வா மிச்சா²ஸங்கப்போதி. மிச்சா²தி³ட்டி² மக்³க³ங்கே³ஸுபி கம்மபதே²ஸுபி மிச்சா²தி³ட்டி²யேவ. அஹிரிகம் ப³லானி பத்வா அஹிரிகப³லம் ஹோதீதி வுத்தம், லோகனாஸகது³கம் பத்வா அஹிரிகந்தி. அனோத்தப்பேபி ஏஸேவ நயோ. லோபோ⁴ மூலம் பத்வா லோபோ⁴ ஹோதீதி வுத்தோ. கம்மபத²ம் பத்வா அபி⁴ஜ்ஜா²தி. இமே ச² த்³வீஸு டா²னேஸு விப⁴த்தா.

வேத³னா பன ப²ஸ்ஸபஞ்சகம் பத்வா வேத³னா ஹோதீதி வுத்தா, ஜா²னங்கா³னி பத்வா ஸுக²ந்தி, இந்த்³ரியானி பத்வா ஸோமனஸ்ஸிந்த்³ரியந்தி. ஏவம் ஏகோவ த⁴ம்மோ தீஸு டா²னேஸு விப⁴த்தோ.

வீரியம் பன இந்த்³ரியானி பத்வா வீரியிந்த்³ரியம் ஹோதீதி வுத்தம், மக்³க³ங்கா³னி பத்வா மிச்சா²வாயாமோ ஹோதீதி, ப³லானி பத்வா வீரியப³லந்தி, பிட்டி²து³கம் பத்வா பக்³கா³ஹோ ஹோதீதி. ஏவம் அயம் ஏகோ த⁴ம்மோ சதூஸு டா²னேஸு விப⁴த்தோ.

ஸமாதி⁴ பன ஜா²னங்கா³னி பத்வா சித்தஸ்ஸேகக்³க³தா ஹோதீதி வுத்தோ, இந்த்³ரியானி பத்வா ஸமாதி⁴ந்த்³ரியந்தி, மக்³க³ங்கா³னி பத்வா மிச்சா²ஸமாதீ⁴தி, ப³லானி பத்வா ஸமாதி⁴ப³லந்தி, பிட்டி²து³கம் பத்வா து³தியது³கே ஏககவஸேனேவ ஸமதோ²தி, ததியே அவிக்கே²போதி. ஏவமயம் ஏகோ த⁴ம்மோ ச²ஸு டா²னேஸு விப⁴த்தோ.

ஸப்³பே³பி பனேதே த⁴ம்மா ப²ஸ்ஸபஞ்சகவஸேன ஜா²னங்க³வஸேன இந்த்³ரியவஸேன மக்³க³ங்க³வஸேன ப³லவஸேன மூலவஸேன கம்மபத²வஸேன லோகனாஸகவஸேன பிட்டி²து³கவஸேனாதி நவ ராஸயோ ஹோந்தி. தத்த² யம் வத்தப்³ப³ம் தம் பட²மகுஸலசித்தனித்³தே³ஸே வுத்தமேவாதி.

த⁴ம்முத்³தே³ஸவாரகதா² நிட்டி²தா.